Хуыцауы уагӕвӕрдтӕм гӕсгӕ цӕр
Хуыцауы уагӕвӕрдтӕм гӕсгӕ цӕр
«Пайда дын цы у, уый дын [Иегъовӕ] амоны» (ИСАЙ 48:17).
1. Сфӕлдисӕг адӕмӕн разамынд куыд дӕтты?
АХУЫРГӔНДТӔ Дун-дунейы сусӕгдзинӕдтӕ раргом кӕныныл цас фылдӕр архайынц, уыйас тынгдӕр дис кӕнынц, нӕ алфамбылай дунейы цас энерги ис, ууыл. Хур — рӕстӕмбис стъалы — «алы секунд дӕр [ӕвзӕрын кӕны], 100 миллиард донгуыр бомбӕйы куы фехӕлдаиккой, уӕд цас энерги рацыдаид», уыйбӕрц. Сфӕлдисӕг йӕ ӕгӕрон тыхы руаджы бар дары ахӕм стыр уӕларвон буӕрттыл (Иов 38:32; Исай 40:26). Цы зӕгъӕн ис адӕймаджы тыххӕй та — йӕ цард йӕхӕдӕг чи аразы, хорз ӕвзӕрӕй чи хицӕн кӕны, хъуыды кӕнын ӕмӕ монон хъуыддӕгтӕ ӕмбарын йӕ бон кӕмӕн у? Куыд нын дӕтты Сфӕлдисӕг разамынд? Уый нын хӕларзӕрдӕйӕ радта йе ’ххӕст закъӕттӕ ӕмӕ, ӕмбал кӕмӕн нӕй, ахӕм уагӕвӕрдтӕ, стӕй ма нын цы ’фсарм радта, уый дӕр нын ахъаз кӕны (2 Паддзахӕдты 22:31; Ромӕгтӕм 2:14, 15).
2, 3. Цӕмӕй Хуыцауӕн адӕмӕй йӕ зӕрдӕ рухс кӕна, уый тыххӕй йӕм куыд хъуамӕ хъусой?
2 Хуыцауӕн йӕ зӕрдӕ рухс кӕны, барвӕндӕй йӕм чи хъусы, ахӕм адӕмӕй (Ӕмбисӕндтӕ 27:11). Иегъовӕ нӕ ӕнӕмбаргӕ роботтау не сфӕлдыста, фӕлӕ нын радта сӕрибардзинад, ӕмӕ нӕ бон у зонгӕ-ӕмбаргӕйӕ, раст цы у, уый барвӕндонӕй аразын (Дзуттытӕм 5:14, НФ).
3 Йесо, алцӕмӕйдӕр йӕ Фыды чи фӕзмыдта, уый йӕ ахуыргӕнинӕгтӕн загъта: «Сымах стут Мӕ хӕлӕрттӕ, Ӕз уын цы фӕдзӕхсын, уыдон куы ӕххӕст кӕнат, уӕд. Ӕз ныр сымах нал хонын цагъартӕ» (Иоанны 15:14, 15). Рагзаманты цагъарӕн ӕндӕр гӕнӕн нӕ уыд — хъуамӕ йӕ хицауы коммӕ кастаид. Хӕлӕрттӕ та кӕрӕдзийыл ӕнувыд сты сӕхи фӕндонмӕ гӕсгӕ. Махӕн нӕ бон у, ӕмӕ Иегъовӕйы хӕлӕрттӕ суӕм (Иаковы 2:23). Уыцы хӕлардзинад фидар кӕндзӕн, Хуыцау нӕ куыд уарзы, мах дӕр ӕй афтӕ куы уарзӕм, уӕд. Хуыцауы куы уарзӕм, уӕд ын йӕ коммӕ дӕр кӕй хъуамӕ кӕсӕм, уый Йесо равдыста ахӕм ныхӕстӕй: «Мӕн чи уарзы, уый Мӕ дзырд сӕххӕст кӕндзӕн; ӕмӕ йӕ Мӕ Фыд бауарздзӕн» (Иоанны 14:23). Уарзгӕ нӕ кӕй кӕны ӕмӕ нӕ ӕвзӕрдзинадӕй кӕй хизы, растдӕр нын уый тыххӕй дзуры Иегъовӕ, цӕмӕй йын йӕ уагӕвӕрдтӕм гӕсгӕ цӕрӕм.
Хуыцауы уагӕвӕрдтӕ
4. Уагӕвӕрд цы у, уый куыд бамбарын кӕнис?
4 Цы сты уагӕвӕрдтӕ? Иу дзырдуатмӕ гӕсгӕ уагӕвӕрд у «иумӕйаг кӕнӕ бындурон ӕцӕгдзинад. Цавӕрдӕр архайд, ахуырад кӕнӕ закъон кӕуыл бындуриуӕг кӕны, ахӕм хъуыды» («Webster’s Third New International Dictionary»). Библи лӕмбынӕг куы кӕсӕм, уӕд фендзыстӕм, нӕ уӕларвон Фыд нын царды алыхуызон уавӕртӕн ӕмӕ алыхуызон фарстатӕн уагӕвӕрдтӕ кӕй радта, уый. Уымӕй бӕрӕг у, кӕй йӕ фӕнды, цӕмӕй ӕнустӕм амондджын уӕм. Уый тыххӕй дзырдта паддзах Соломон дӕр: «Байхъус мӕм, мӕ фырт, ӕмӕ мын мӕ ныхӕстӕ айс, цӕмӕй фылдӕр фӕцӕрай. Ӕз дӕ сӕвӕрдзынӕн зонды фӕндагыл, акӕндзынӕн дӕ рӕстдзинады къахвӕндӕгтыл» (Ӕмбисӕндтӕ 4:10, 11). Иегъовӕ нын цы уагӕвӕрдтӕ радта, уыдонӕн сӕ сӕйрагдӕртӕ хауынц, йемӕ ӕмӕ нын адӕмимӕ цавӕр ахастытӕ ис, уымӕ, стӕй Хуыцауӕн куыд лӕггад кӕнӕм, уымӕ ӕмӕ нӕ ӕрвылбоны хъуыддӕгтӕм дӕр (Псалом 1:1). Ӕркӕсӕм уыцы уагӕвӕрдтӕй цалдӕрмӕ.
5. Цӕвиттонӕн ӕрхӕсс цалдӕр уагӕвӕрды.
5 Иегъовӕимӕ нын цавӕр ахастытӕ хъуамӕ уа, уый тыххӕй Йесо загъта: «Бауарз дӕ Хицау Хуыцауы дӕ ӕппӕт зӕрдӕйӕ, ӕмӕ дӕ ӕппӕт удӕй, ӕмӕ дӕ ӕппӕт зондӕй» (Матфейы 22:37). Адӕмимӕ цӕрын куыд хъӕуы, уый тыххӕй дӕр нын Хуыцау радта уагӕвӕрдтӕ, зӕгъӕм, «сыгъзӕрин уагӕвӕрд»: «Алцыдӕр уӕ уӕхицӕн куыд фӕнды, цӕмӕй уын адӕм кӕной, афтӕ сымах дӕр кӕнут уыдонӕн» (Матфейы 7:12; Галатӕгтӕм 6:10; Титмӕ 3:2). Хуыцауӕн куыд хъуамӕ лӕггад кӕнӕм, уый тыххӕй та нын Библи амоны: «Уыдзыстӕм лӕмбынӕг кӕрӕдзимӕ, уарзондзинад ӕмӕ хорз хъуыддӕгтӕм разӕнгард кӕнгӕйӕ; нӕ ӕмбырдтӕ нӕ уадздзыстӕм» (Дзуттытӕм 10:24, 25). Нӕ ӕрвылбоны хъуыддӕгты тыххӕй та апостол Павел афтӕ загъта: «Хӕргӕ кӕнат, нуазгӕ кӕнат, ӕви ӕндӕр исты кусат, алцыдӕр кӕнут Хуыцауы кадӕн» (1 Коринфӕгтӕм 10:31). Хуыцауы Ныхасы ма цы уагӕвӕрдтӕ ис, уыдонӕн нымӕц дӕр нӕй.
6. Уагӕвӕрдтӕ закъӕттӕй цӕмӕй хицӕн кӕнынц?
6 Уагӕвӕрдтӕ сты бындурон, ахадгӕ ӕцӕгдзинӕдтӕ, ӕмӕ зондджын чырыстӕттӕн ӕхсызгон у уыдонмӕ гӕсгӕ цӕрын. Соломон Иегъовӕйы разамындӕй ныффыста: «Мӕ ныхӕстӕм мын хъус, цы дзурын, уымӕ дӕ хъус ӕрдар. Дӕ цӕстыты разӕй сӕ макуы айс. Арф сӕ дӕ зӕрдӕйы сӕвӕр. Уымӕн ӕмӕ уыдон цард сты, чи сӕ ссардта, уымӕн, ӕмӕ ӕнӕниздзинад йӕ буарӕн» (Ӕмбисӕндтӕ 4:20—22). Цӕмӕй хицӕн кӕнынц уагӕвӕрдтӕ закъӕттӕй? Уагӕвӕрд у закъонӕн йӕ бындур. Закъӕттӕ дзурынц комкоммӕ ӕмӕ хауынц сӕрмагонд рӕстӕгмӕ кӕнӕ уавӕрмӕ, уагӕвӕрдтӕй та кӕдфӕнды дӕр ис спайдагӕнӕн (Псалом 118:111). Хуыцауы уагӕвӕрдтӕй нӕй зӕгъӕн, ӕмӕ сӕ рӕстӕг аивгъуыйдзӕн кӕнӕ ферох уыдзысты. Пехуымпар Исай Хуыцауы разамындӕй цы ныхӕстӕ ныффыста, уыдон раст сты: «Цъӕх кӕрдӕг бахус вӕййы, дидинӕг ӕрызгъӕлы; фӕлӕ нӕ Хуыцауы ныхас уыдзӕн ӕнустӕм» (Исай 40:8).
Уагӕвӕрдтӕ куыд амонынц, афтӕ хъуыды кӕн ӕмӕ цӕр
7. Хуыцауы Ныхас нӕ куыд разӕнгард кӕны, уагӕвӕрдтӕ нын куыд амонынц, афтӕ хъуыды кӕнынмӕ ӕмӕ цӕрынмӕ?
7 «Нӕ Хуыцауы ныхас» нӕ иу ӕмӕ дыууӕ хатты нӕ разӕнгард кӕны, цӕмӕй, уагӕвӕрдтӕ куыд амонынц, афтӕ хъуыды кӕнӕм ӕмӕ цӕрӕм. Йесойы куы бафарстой, зӕгъгӕ, Закъоны мидис цы у, уӕд уый загъта дыууӕ фӕдзӕхсты: фыццаг — Иегъовӕйы уарзын, дыккаг та — адӕмы уарзын (Матфейы 22:37—40). Уыдонӕй фыццаджы Йесо ӕрхаста Моисейы закъоны сӕйраг фӕдзӕхстытӕй сӕ иу, Дыккаг закъоны 6:4, 5-ӕм стихты чи ис фыст, уый: «Иегъовӕ, нӕ Хуыцау, у иунӕг Иегъовӕ. Ӕмӕ йӕ уарз ӕппӕт зӕрдӕйӕ ӕмӕ ӕппӕт удӕй, ӕмӕ ӕппӕт хъарутӕй». Йесо ма кой кодта, Левиты 19:18-ӕм стихы чи ис фыст, уыцы амынды тыххӕй дӕр. Екклесиасты чиныджы рӕстдзӕвин, цыбыр ӕмӕ зӕрдӕмӕхъаргӕ фӕсныхасы паддзах Соломон иу хъуыдыйӕ загъта Хуыцауы ӕппӕт закъӕтты мидис: «Ӕппӕт ацы хъуыддӕгтӕй ис ахӕм хатдзӕг скӕнӕн: тӕрс Хуыцауӕй, ӕмӕ йын йӕ фӕдзӕхстытӕ ӕххӕст кӕн. Уымӕн ӕмӕ уый у адӕймагӕн йӕ хӕс. Стӕй ӕцӕг Хуыцау алы хъуыддаг дӕр рахӕсдзӕн тӕрхонмӕ, уыимӕ алы ӕмбӕхст хъуыддаг дӕр, хорз у ӕви ӕвзӕр» (Екклесиаст 12:13, 14; Михей 6:8).
8. Цӕмӕн у хорз Библийы сӕйраг уагӕвӕрдтӕ дзӕбӕх ӕмбарын?
8 Ахӕм сӕйраг уагӕвӕрдтӕ дзӕбӕх куы ’мбарӕм, уӕд нын бӕлвырд амындтӕ ’мбарын ӕмӕ сӕ ӕххӕст кӕнын ӕнцондӕр уыдзӕн. Уымӕй уӕлдай ма ахӕм сӕйраг уагӕвӕрдтӕ хорз куы не ’мбарӕм ӕмӕ сыл куы нӕ разы кӕнӕм, уӕд нӕ бон нӕ уыдзӕн раст уынаффӕтӕ хӕссын ӕмӕ нӕ уырнындзинад, гӕнӕн ис, ӕнцонтӕй фӕцуда (Ефесӕгтӕм 4:14). Ахӕм уагӕвӕрдтӕ нӕ зонды ӕмӕ нӕ зӕрдӕйы куы уой, уӕд сӕ пайда кӕндзыстӕм, уынаффӕ хӕссын нӕ куы хъӕуа, уӕд. Ӕмбаргӕйӕ сӕ куы пайда кӕнӕм, уӕд уыдзыстӕм ӕнтыстджын (Йесо Навин 1:8; Ӕмбисӕндтӕ 4:1—9).
9. Библийы уагӕвӕрдтӕ ӕмбарын ӕмӕ уыдонмӕ гӕсгӕ цӕрын алы хатт ӕнцон цӕуылнӕ вӕййы?
9 Цӕттӕ закъӕттӕ ӕххӕст кӕнынӕй хъауджыдӕр Библийы уагӕвӕрдтӕ ӕмбарын ӕмӕ уыдонмӕ гӕсгӕ цӕрын афтӕ ӕнцон нӕу. Ӕнӕххӕст кӕй стӕм, уымӕ гӕсгӕ, гӕнӕн ис, уагӕвӕрдтыл хъуыды кӕнын ӕмӕ афтӕмӕй раст хатдзӕгтӕ кӕнынмӕ зивӕг кӕнӕм. Хъуыды кӕныны бӕсты нӕ фӕфӕнды, цӕмӕй нын цавӕрдӕр уынаффӕ рахӕссынӕн кӕнӕ исты зын хъуыддаг аскъуыддзаг кӕнынӕн цӕттӕ закъон уа. Иуӕй-иу хатт фӕфӕрсӕм фӕлтӕрд чырыстӕтты, зӕгъӕм, ӕмбырды хистӕр нӕлгоймӕгты, уымӕн ӕмӕ нӕ афтӕ фӕфӕнды, цӕмӕй нын нӕ уавӕрмӕ гӕсгӕ бӕлвырд амынд радтой. Фӕлӕ гӕнӕн ис, ӕмӕ Библийы кӕнӕ уый бындурыл фыст публикациты бӕлвырд амынд ма уа, науӕд дзы куы уа, уӕддӕр уымӕй алкӕддӕр ӕмӕ алы уавӕры дӕр спайдагӕнӕн нӕ уыдзӕн. Хъуыды ма кӕныс, иу лӕг Йесойӕ куы куырдта, зӕгъгӕ: «Ахуыргӕнӕг! Зӕгъ ме ’фсымӕрӕн, цӕмӕй уый бынтӕ мемӕ адих кӕна». Уӕд Йесо ӕфсымӕрты хъаугъа ахицӕн кӕнынӕн уыцы лӕгӕн уайтагъд бӕлвырд амынд нӕ радта, фӕлӕ йын бацамыдта, алыхуызон фарстатӕм чи хауы, ахӕм уагӕвӕрдмӕ: «Кӕсут, уӕхи хъахъхъӕнут зыд уӕвынӕй ӕмӕ хъӕздыгдзинад уарзынӕй» (НФ). Афтӕмӕй Йесо радта, абон дӕр спайдагӕнӕн кӕмӕй ис, ахӕм уагӕвӕрд (Лукайы 12:13—15).
10. Адӕймаг уагӕвӕрдтӕм гӕсгӕ кӕй цӕры, уымӕй йӕ зӕрдӕйы фӕндтӕ куыд ӕргом кӕнынц?
10 Ӕвӕццӕгӕн, зоныс, закъӕттӕ ӕвӕндонӕй, ӕрмӕст сӕ цӕмӕй ма бафхӕрой, уый тыххӕй чи ӕххӕст кӕны, ахӕм адӕймӕгты. Уӕдӕ уагӕвӕрдтӕн чи аргъ кӕны, уыдонӕй афтӕ зӕгъӕн нӕй. Уагӕвӕрдтӕ адӕймаджы разӕнгард кӕнынц зӕрдӕйӕ архайынмӕ. Сӕ фылдӕр ахӕм сты, ӕмӕ сӕ чи не ’ххӕст кӕны, уыдоны уыцы тӕккӕ ӕфхӕрд нӕ баййафы. Уымӕ гӕсгӕ нӕ бон вӕййы бамбарын, цӕй тыххӕй хъусӕм Иегъовӕмӕ ӕмӕ нӕ зӕрдӕйы цы ис, уый. Ацы ран цӕвиттонӕн ӕрхӕссӕн ис, Иосиф Потифары усы ӕнӕгъдау фӕндыл кӕй не сразы, уый. Уӕды рӕстӕджы Иегъовӕ хӕтындзинады ныхмӕ закъон нӕма радта, ӕмӕ искӕй усимӕ фӕуыны тыххӕй адӕймаг бафхӕринаг кӕй у, уый никуы ма уыд фыст. Фӕлӕ Иосиф зыдта Хуыцауы уагӕвӕрд, ус ӕмӕ лӕг кӕрӕдзийыл иузӕрдион кӕй хъуамӕ уой (Уӕвынад 2:24; 12:18—20). Иосиф Потифары усӕн цы загъта, уымӕй бӕрӕг у, уыцы уагӕвӕрд хорз кӕй ӕмбӕрста: «Куыд хъуамӕ саразон ӕз ахӕм стыр фыддзинад ӕмӕ Хуыцауы раз тӕригъӕд куыд хъуамӕ ракӕнон?» (Уӕвынад 39:9).
11. Чырыстӕттӕ цавӕр фарстатӕ лыггӕнгӕйӕ архайынц Иегъовӕйы уагӕвӕрдтӕм гӕсгӕ?
11 Абон чырыстӕттӕ, алкӕмӕндӕр ӕрмӕст йӕхимӕ чи хауы, ахӕм фарстатӕ лыггӕнгӕйӕ хынцынц Иегъовӕйы уагӕвӕрдтӕ, зӕгъӕм, ӕмбӕлттӕ, хиирхӕфсӕнтӕ, музыкӕ кӕнӕ чингуытӕ куы февзарынц, уӕд (1 Коринфӕгтӕм 15:33; Филиппӕгтӕм 4:8). Нӕ зонындзинӕдтӕ ӕмӕ не ’мбарынад цас фылдӕр кӕной ӕмӕ Иегъовӕ ӕмӕ йӕ амындтӕн цас тынгдӕр аргъ кӕнӕм, уыйас нын нӕ намыс, не ’фсарм тынгдӕр ӕххуыс кӕндзӕн, цӕмӕй цыфӕнды уавӕры дӕр ма рох кӕнӕм Хуыцауы уагӕвӕрдтӕ, суанг нӕ куы ничи уына, уӕд дӕр. Библийы уагӕвӕрдтӕм гӕсгӕ куы цӕрӕм, уӕд нӕхицӕн ӕфсӕнттӕ нӕ агурдзыстӕм, цӕмӕй Хуыцауы закъӕттӕй кӕцыдӕр ма сӕххӕст кӕнӕм. Стӕй, уагӕвӕрдтӕ чи ницӕмӕ дары, фӕлӕ афтӕ чи хъуыды кӕны, зӕгъгӕ, уӕддӕр закъоны сӕрты нӕ хизын, уыдоны фӕдыл дӕр нӕ цӕудзыстӕм. Ахӕм зондахаст нын нӕхицӕн зиан кӕй ӕрхӕссид, уый хорз ӕмбарӕм (Иаковы 1:22—25).
12. Хуыцауы уагӕвӕрдтӕм гӕсгӕ цӕрынӕн адӕймаджы цы хъӕуы?
12 Фӕлтӕрд чырыстон ӕмбары, Хуыцауы уагӕвӕрдтӕм гӕсгӕ цӕрынӕн ӕй кӕй хъуамӕ фӕнда зонын, цавӕрдӕр хъуыддаджы фӕдыл Иегъовӕ цы хъуыды кӕны, уый. «Хицауы уарзджытӕ,— дзуры псаломзарӕггӕнӕг,— уӕд уын ӕнӕуынон фыддзинад» (Псалом 96:10). Хуыцау ӕвзӕрыл цы нымайы, уыцы хъуыддӕгтӕй цалдӕры тыххӕй ис фыст Ӕмбисӕндты 6:16—19-ӕм стихты: «Мӕнӕ уын, Дунедарӕгӕн ӕнӕуынон чи у, ахӕм ӕхсӕз хъуыддаджы, кӕнӕ та авд ӕлгъаг мийы: хъал цӕстытӕ, гӕды ’взаг ӕмӕ, ӕнаххосы туг чи ныккалы, ахӕм къухтӕ, фыдвӕндтӕ кӕм гуырынц, ахӕм зӕрдӕ, фыд ракӕнынмӕ хӕлӕфӕй чи уайы, ахӕм къӕхтӕ, даутӕ чи мысы, ахӕм мӕнгӕвдисӕн ӕмӕ, ӕфсымӕрты кӕрӕдзиуыл чи ардауы, ахӕм лӕг» («Мах дуг» №12, 1999). Ахӕм ахсджиаг хъуыддӕгты нӕ Иегъовӕйы цӕстӕнгас хынцын куы фӕнда, уӕд нӕ цард иууылдӕр уыдзӕн уагӕвӕрдты бындурыл арӕзт (Иереми 22:16).
Нӕ зӕрдӕйы фӕндтӕ хъуамӕ уой раст
13. Цавӕр зондахастыл ахуыр кодта Йесо йӕ Уӕлхох уацамынды?
13 Уагӕвӕрдтӕ куы ’мбарӕм ӕмӕ уыдонмӕ гӕсгӕ куы цӕрӕм, уӕд Хуыцауӕн куыдфӕндыйӕ, цӕстмӕ нӕ лӕггад кӕндзыстӕм. Закъӕттӕ ӕххӕст кӕнын иу у, уагӕвӕрдтӕм гӕсгӕ цӕрын та — ӕндӕр. Уый Йесо хорз бамбарын кодта Уӕлхох уацамынды (Матфейы 5:17—48). Йесомӕ чи хъуыста, уыдон уыдысты дзуттӕгтӕ, уымӕ гӕсгӕ хъуамӕ цардаиккой Моисейы закъонмӕ гӕсгӕ. Фӕлӕ ӕцӕгӕй та Закъон раст не ’мбӕрстой. Фыст дзы цы уыди, уымӕй дарддӕр ницыуал уыдтой, йӕ мидис сын ахсджиаг нал уыди. Фылдӕр хӕцыдысты се ’рымысгӕ ӕгъдӕуттыл, ӕмӕ сӕ Хуыцауы амындтӕй уӕлдӕр сӕвӕрдтой (Матфейы 12:9—12; 15:1—9). Уый фӕстиуӕгӕн адӕмӕн сӕ фылдӕр уагӕвӕрдтыл хъуыды кӕнын ахуыр нӕ уыдысты.
14. Йесо йӕ хъуысджыты куыд ахуыр кодта уагӕвӕрдтыл хъуыды кӕнын?
14 Уӕдӕ Йесо та Уӕлхох уацамынды дзырдта ӕгъдауы уагӕвӕрдтыл, нӕ царды фондз хъуыддагмӕ ахӕссӕн кӕй ис, ахӕмтыл. Уый дзырдта мӕсты кӕныны тыххӕй, бинонтӕ скӕнын ӕмӕ хицӕн кӕныны тыххӕй, дзырд дӕттын, маст исыны, уарзт ӕмӕ фыдӕхы тыххӕй. Уыдонӕй алкӕцыйы дӕр Йесо равдыста, хуыздӕр кӕй у уагӕвӕрдтӕм гӕсгӕ архайын. Афтӕмӕй Йесо бамбарын кодта, йӕ фӕдылдзӕуджытӕ ноджы ӕгъдауджындӕр кӕй хъуамӕ уыдаиккой. Зӕгъӕм, хӕтындзинады фӕдыл нын радта, ӕрмӕст нӕ уагахастмӕ чи нӕ хауы, фӕлӕ нӕ хъуыдытӕ ӕмӕ нӕ фӕндттӕм дӕр, ахӕм уагӕвӕрд: «Алкӕцы, чи кӕсы сылгоймагмӕ мондагӕй, уый фӕхатт йемӕ йӕ зӕрдӕйы мидӕг» (Матфейы 5:28).
15. Цӕмӕй Библийы чи нӕй, ахӕм фӕтктӕ ӕххӕст кӕнын ма домӕм, уый тыххӕй нӕ цы кӕнын хъӕуы?
15 Ацы цӕвиттон ӕвдисы, Иегъовӕйы уагӕвӕрдты нысан ӕмӕ мидис алкӕддӕр нӕ зӕрдыл кӕй хъуамӕ дарӕм. Кӕй зӕгъын ӕй хъӕуы, цӕмӕй нӕ Хуыцау райгонд уа, уый тыххӕй ӕрмӕстдӕр искӕй цӕстмӕ хъуамӕ ма уӕм ӕгъдауджын. Йесо комкоммӕ дзырдта, ахӕм зондахаст раст кӕй нӕу, ӕмӕ адӕмы ’ргом фылдӕр здӕхта Хуыцауы хорзӕх ӕмӕ уарзондзинадмӕ (Матфейы 12:7; Лукайы 6:1—11). Библийы уагӕвӕрдтӕм гӕсгӕ куы цӕрӕм, уӕд нӕхицӕй дӕр ӕмӕ иннӕтӕй дӕр нӕ домдзыстӕм, Библийы чи нӕй, ахӕм фӕтктӕ ӕххӕст кӕнын. Фылдӕр хъуыды кӕндзыстӕм, нӕ лӕггаддзинады тыххӕй нӕ иннӕтӕ цы зӕгъдзысты, ууыл нӕ, фӕлӕ, Хуыцауы уарзын ӕмӕ йӕм хъусын ӕцӕг цы нысан кӕны, ууыл (Лукайы 11:42).
Стыр пайда
16. Библийы закъӕтты бындуры цы уагӕвӕрдтӕ ис, уыдонӕй ӕрхӕсс цӕвиттонтӕ.
16 Иегъовӕмӕ хъусын нӕ кӕй фӕнды, уымӕ гӕсгӕ хъуамӕ ӕмбарӕм, йӕ закъӕттӕ уагӕвӕрдты бындурыл арӕзт кӕй сты, уый. Цӕвиттон, чырыстӕттӕ гуымирытӕн нӕ кувынц, нӕ хӕтынц ӕмӕ сӕхи тугӕй нӕ хъӕстӕ кӕнынц (Куыстытӕ 15:28, 29). Уымӕн сын цавӕр бындур ис? Ӕрмӕстдӕр Хуыцауӕн кӕй хъӕуы кувын, лӕг ӕмӕ ус кӕрӕдзийыл ӕнувыд кӕй хъуамӕ уой, ӕмӕ ӕрмӕстдӕр Иегъовӕ кӕй у Царддӕттӕг, уый (Уӕвынад 2:24; Рацыд 20:5; Псалом 35:10). Ацы сӕйраг уагӕвӕрдтӕ куы ӕмбарӕм, уӕд нын уыдоны бындурыл арӕзт закъӕттӕ ӕххӕст кӕнын ӕнцондӕр уыдзӕн.
17. Библийы уагӕвӕрдтӕ кӕй ӕмбарӕм ӕмӕ уыдонмӕ гӕсгӕ кӕй цӕрӕм, уый нын пайда цӕмӕн у?
17 Закъӕтты бындуры цы уагӕвӕрдтӕ ис, уыдон куы ’мбарӕм ӕмӕ уыдонмӕ гӕсгӕ куы цӕрӕм, уӕд ӕй нӕхӕдӕг фендзыстӕм, нӕ пайдайӕн кӕй сты, уый. Уыдон Хуыцауы адӕмы уырнындзинадӕн ахъаз кӕй сты, уымӕй дарддӕр ма сын ахъаз сты ӕндӕр хуызы дӕр. Зӕгъӕм, тамако чи нӕ дымы, сыгъдӕг цард чи кӕны ӕмӕ тугӕн чи аргъ кӕны, уый хызт у алыхуызон низтӕй. Афтӕ ма, Библийы ӕцӕгадмӕ гӕсгӕ кӕй цӕрӕм, уый нын ӕххуыс кӕндзӕн ӕхцаимӕ баст хъуыддӕгты, адӕмимӕ ахастыты, бинонты царды. Ахӕм арфӕдзинӕдтӕ бӕлвырд кӕнынц, Иегъовӕйы уагӕвӕрдтӕн ӕмбал кӕй нӕй, ӕмӕ ӕцӕгӕйдӕр хорз кӕй у уыдонмӕ гӕсгӕ цӕрын. Фӕлӕ мах Хуыцауы уагӕвӕрдтӕм гӕсгӕ ӕрмӕст уыцы пайда райсыны тыххӕй нӕ цӕрӕм. Ӕцӕг чырыстӕттӕ Иегъовӕмӕ хъусынц, кӕй йӕ уарзынц, аргъуыц кӕнын ын кӕй ӕмбӕлы ӕмӕ афтӕ кӕнын раст кӕй у, уый тыххӕй (Раргомад 4:11).
18. Кӕд нӕ фӕнды, цӕмӕй амондджын чырыстӕттӕ уӕм, уӕд нӕ цард цӕмӕ гӕсгӕ хъуамӕ аразӕм?
18 Библийы уагӕвӕрдтӕм гӕсгӕ куы цӕрӕм, уӕд цӕудзыстӕм иууыл хуыздӕр цардвӕндагыл ӕмӕ уый уынгӕйӕ ӕндӕр искӕй дӕр, гӕнӕн ис, бафӕнда Хуыцауы фӕндагыл слӕууын. Иууыл ахсджиагдӕр та уый у, ӕмӕ нӕ цардыуагӕй Иегъовӕйы кадджын кӕндзыстӕм. Мах зонӕм, Иегъовӕ нӕ ӕцӕгдӕр кӕй уарзы ӕмӕ йӕ махӕн ӕрмӕстдӕр хорз кӕй фӕнды, уый. Нӕ хъуыддӕгтӕ Библийы уагӕвӕрдтӕм гӕсгӕ куы фӕаразӕм ӕмӕ нын Иегъовӕ кӕй арфӕ кӕны, уый куы фӕуынӕм, уӕд ӕм нӕхи ноджы хӕстӕгдӕр фӕхатӕм. О, уӕд ноджы ӕввахсдӕр хӕлӕрттӕ свӕййӕм нӕ уӕларвон Фыдимӕ.
Хъуыды ма кӕныс?
• Цы у уагӕвӕрд?
• Уагӕвӕрдтӕ закъӕттӕй цӕмӕй хицӕн кӕнынц?
• Цы пайда нын у уагӕвӕрдтӕм гӕсгӕ хъуыды кӕнын ӕмӕ уыдонмӕ гӕсгӕ цӕрын?
[Фарстатӕ ахуыр кӕнынӕн]
[Рамкӕ 14 фарсыл]
Уилсонӕн, Ганӕйӕ иу чырыстон ӕфсымӕрӕн, куысты загътой, зӕгъгӕ дӕ цалдӕр боны фӕстӕ дӕ бынатӕй сисдзысты. Фӕстаг бон ма куы куыста, уӕд ын бахӕс кодтой сӕ фирмӕйы хицауы машинӕ ныхсын. Уилсон машинӕйы ӕхца ссардта, ӕмӕ уый йӕ цехы хицау куы базыдта, уӕд ын афтӕ, зӕгъгӕ дын ацы ӕхца Хуыцау рарвыста, уымӕн ӕмӕ фӕстаг бон кусыс. Фӕлӕ Уилсон зыдта, Библийы уагӕвӕрдмӕ гӕсгӕ адӕймаг алцӕмӕй дӕр ӕнӕзӕрдӕхудт кӕй хъуамӕ уа, ӕмӕ ӕхца фирмӕйы хицауӕн радта. Уымӕ уый тынг диссаг фӕкаст ӕмӕ Уилсоны канд йӕ куысты нӕ ныууагъта, фӕлӕ ма йӕ стырдӕр бынаты дӕр сӕвӕрдта (Ефесӕгтӕм 4:28).
[Рамкӕ 15 фарсыл]
Рукиайыл, албайнаг сылгоймагыл, цӕуы 60 азӕй фылдӕр. Йе ’фсымӕримӕ кӕддӕр кӕй фӕхыл сты, уый тыххӕй 17 азӕй фылдӕр кӕрӕдзимӕ нӕ дзырдтой. Рукиа райдыдта Библи ахуыр кӕнын Иегъовӕйы Ӕвдисӕнтимӕ ӕмӕ базыдта, ӕцӕг чырыстӕттӕ алкӕимӕ дӕр хорз кӕй хъуамӕ цӕрой ӕмӕ маст макӕмӕ хӕссой. Иу хатт ӕнӕхъӕн ӕхсӕв Хуыцаумӕ фӕкуывта ӕмӕ иннӕ бон, йӕ зӕрдӕйы гуыпп-гуыпп цыди, афтӕмӕй араст йе ’фсымӕры хӕдзармӕ. Дуар бакодта йе ’фсымӕры чызг, ӕмӕ дисгӕнгӕйӕ афарста Рукиайы: «Исчи фӕзиан? Цӕмӕ ӕрбацыдтӕ?» Рукиа загъта, йе ’фсымӕры фенын ӕй кӕй фӕнды. Сабырӕй сын бамбарын кодта, Библийы уагӕвӕрдтӕ ӕмӕ Иегъовӕйы тыххӕй цы базыдта, уый йӕ кӕй сразӕнгард кодта, цӕмӕй йе ’фсымӕримӕ бафидауа. Цӕссыгтӕ ӕмӕ хъӕбысты фӕстӕ бинонтӕ, кӕй бафидыдтой, уый тыххӕй фынг сӕвӕрдтой ӕмӕ кӕрӕдзийыл фӕцин кодтой (Ромӕгтӕм 12:17, 18).
[Ныв 17 фарсыл]
[Ныв 17 фарсыл]
[Ныв 17 фарсыл]
[Ныв 17 фарсыл]
«Фенгӕйӕ адӕмы, уый ссыди хохмӕ; ӕмӕ куы ӕрбадт, уӕд ӕрбалӕууыдысты Уымӕ Йӕ ахуыргӕнинӕгтӕ; ӕмӕ Уый, байгом кӕнгӕйӕ Йӕ дзых, ахуыр кодта уыдоны» (МАТФЕЙЫ 5:1, 2)
