Чырыстон ӕфсармыл ахуыр кӕнӕм нӕхи дӕр ӕмӕ иннӕты дӕр

«Искӕйы ахуыр кӕнгӕйӕ, дӕхӕдӕг дӕхи куыннӕ ахуыр кӕныс?» (РОМӔГТӔМ 2:21).

1, 2. Цӕмӕн ахуыр кӕнӕм Библи?

ЦӔМӔН ахуыр кӕныс Библи? Ӕвӕццӕгӕн дӕ фӕнды зонын, кӕддӕр цы адӕм цард, цы цаутӕ ӕрцыд ӕмӕ кӕмыты ӕрцыдысты, стӕй ма бирӕ ӕндӕр цыдӕртӕ дӕр. Уымӕй уӕлдай ма дӕ фӕнды, Хуыцауы Ныхас ӕцӕгӕй цы дзуры, уый зонын, цӕмӕй ӕмбарай, Хуыцауы Ӕртӕуон кӕй хонынц кӕнӕ адӕм зындоны хъизӕмар кӕнынц, зӕгъгӕ, кӕй дзурынц, уый раст кӕй нӕу (Иоанны 8:32). Уӕдӕ дӕ куыннӕ фӕнды Иегъовӕйы хуыздӕр базонын дӕр, цӕмӕй алы хъуыддаджы дӕр йӕ зондыл цӕуай ӕмӕ йын ӕнӕзӕрдӕхудтӕй лӕггад кӕнай (3 Паддзахӕдты 15:4, 5).

² Фӕлӕ ма Хуыцауы Ныхас ахуыр кӕнӕм ӕндӕр цӕйдӕр тыххӕй дӕр. Хъуамӕ йӕ адӕмӕн амонынмӕ цӕттӕ уӕм: нӕ хиуӕттӕн, нӕ зонгӕтӕн ӕмӕ суанг, кӕй нӕ зонӕм, уыдонӕн дӕр. Ацы хъуыддаг ӕцӕг чырыстӕттӕн сӕ хӕс у. Йесо бафӕдзӕхста йӕ ахуыргӕнинӕгтӕн: «Уӕдӕ, ацӕут, сахуыр кӕнут ӕппӕт адӕмты... ахуыр кӕнгӕйӕ уыдоны ӕххӕст кӕнын ӕппӕт, Ӕз цы бафӕдзӕхстон сымахӕн» (Матфейы 28:19, 20).

3, 4. Йесойы фӕдзӕхстмӕ гӕсгӕ адӕмы ахуыр кӕнын арфӕйаг хъуыддаг цӕмӕн у?

³ Адӕмӕн нӕ Библи амонын кӕй фӕнды, уый тыххӕй йӕ кӕй ахуыр кӕнӕм,  уый у тынг кадджын ӕмӕ арфӕйаг хъуыддаг. Адӕмы ’хсӕн ахуыргӕнӕг рагӕй-ӕрӕгмӕ дӕр кадджын у. Иу энциклопеди уый тыххӕй афтӕ дзуры: «Дзуттӕгтӕй бирӕты хъуыдымӕ гӕсгӕ ахуыргӕнӕг уыди ирвӕзындзинады фӕндаг амонӕг, ӕмӕ уымӕ гӕсгӕ кӕстӕрты ахуыр кодтой сӕ ныййарджытӕй дӕр ахуыргӕнджытӕн тынгдӕр кад кӕнын» («Encarta Encyclopedia»). Уӕдӕ чырыстӕттӕ Библи ахуыргӕнгӕйӕ фыццаджыдӕр сӕхи раст зондыл кӕй ӕвӕрынц ӕмӕ стӕй иннӕты дӕр кӕй ахуыр кӕнынц, уый арфӕйаг хъуыддаг куыннӕ у.

⁴ «Зӕххыл ахуыргӕнджытӕ цас ис, уыйбӕрц ӕндӕр ницы куыстгӕнджытӕ ис. Ӕгас дунейы 48 милуан адӕймаджы бӕрц кусы ахуыргӕнджытӕй» («The World Book Encyclopedia»). Адӕм ахуыргӕнӕджы бар бакӕнынц рӕзинаг фӕлтӕр ӕмӕ сын уый цы бацамона, цы зондыл сӕ сӕвӕра, уый гӕнӕн ис, ӕмӕ фӕзына, сӕ фидӕны цард куыд рауайдзӕн, ууыл дӕр. Уӕдӕ уӕд ды Йесойы фӕдзӕхстмӕ куы хъусай ӕмӕ адӕмӕн Библи куы амонай, уӕд уый та фӕзындзӕн се ’нусон фидӕныл. Ацы хъуыды ирдӕй зыны Павелы ныхӕсты. Уый фӕдзӕхста Тимофейы: «Лӕмбынӕг хъуыды кӕн дӕхиуыл ӕмӕ ахуырадыл [«куыд амоныс, ууыл», НД], ӕдзухдӕр уыдоны куыст кӕн, уымӕн ӕмӕ афтӕ кӕнгӕйӕ дӕхи [дӕр] фервӕзын кӕндзынӕ ӕмӕ дӕумӕ хъусджыты дӕр» (1 Тимофеймӕ 4:16). О, адӕмы ирвӕзындзинад, Библи сын куыд амондзынӕ, уымӕй кӕнгӕ у.

5. Чырыстӕттӕ сӕхи дӕр ӕмӕ иннӕты дӕр цӕуыл ахуыр кӕнынц, уый иууыл ахсджиагдӕр цӕмӕн у?

⁵ Нӕхи дӕр ӕмӕ иннӕты дӕр ахуыр кӕнын нын бахӕс кодта Дунескӕнӕг Стыр Хуыцау, ӕмӕ нын ацы хъуыддаджы ӕххуысгӕнӕг дӕр у йӕхӕдӕг. Ӕмӕ ӕрмӕст уымӕй дӕр бӕрӕг у, ацы хъуыддаг цыфӕнды ахуырӕй дӕр ахсджиагдӕр кӕй у (кӕсын ӕмӕ фыссын зӕгъай, исты куыстӕй зӕгъай ӕви суанг дохтырыл сахуыр кӕнынӕй дӕр). Чырыстӕттӕ сӕхи дӕр ӕмӕ иннӕты дӕр ахуыр кӕнынц Хуыцауы Фырт Йесо Чырыстийы фӕзмын (Иоанны 15:10).

Цӕмӕн нӕ хъӕуы нӕхи ахуыр кӕнын?

6, 7. а) Фыццаджыдӕр нӕ нӕхи цӕмӕн хъӕуы ахуыр кӕнын? ӕ) Фыццаг ӕнусы иудейтӕ ахуыргӕнджытӕн цӕуылнӕ бӕззыдысты?

⁶ Фыццаджыдӕр нӕ нӕхи цӕмӕн хъӕуы ахуыр кӕнын? Уымӕн ӕмӕ ӕнӕ уымӕй иннӕты, куыд ӕмбӕлы, афтӕ никуы сахуыр кӕндзыстӕм. Павелы фӕндыд, цӕмӕй ууыл ахъуыды кодтаиккой йӕ рӕстӕджы цӕрӕг иудейтӕ. Ӕмӕ кӕд йӕ ныхӕстӕ комкоммӕ махмӕ здӕхт не сты, уӕддӕр сӕм махӕн (ӕцӕг чырыстӕттӕн) уӕлӕнгай цӕстӕй кӕсӕн нӕй. Павел фӕрсы: «Ды та, искӕйы ахуыр кӕнгӕйӕ, дӕхӕдӕг дӕхи куыннӕ ахуыр кӕныс? Амонгӕйӕ нӕ давын, давыс? дзургӕйӕ: „ма хӕт“, хӕтыс? ӕнӕрвӕссон кӕныс гуымирытыл, афтӕмӕй сыгъдӕджы фауыс [«кувӕндӕттӕ фӕкъахтай», НФ]? Закъонӕй ӕппӕлыс, фӕлӕ закъон халгӕйӕ, фауыс [«ӕгад кӕныс», НФ] Хуыцауы?» (Ромӕгтӕм 2:21—23).

⁷ Ахӕм рӕстдзӕвин фарстытӕй Павел бацамыдта, Дӕс фӕдзӕхсты стыр фыдракӕндыл нымад чи у, дыууӕ ахӕм хъуыддагмӕ: давын ӕмӕ хӕтынмӕ (Рацыд 20:14, 15). Павелы рӕстӕджы иудейтӕ, Хуыцау сын йӕ Закъон кӕй радта, уый тыххӕй сӕ сӕр бӕрзӕндты хастой. Чидӕр сын Закъон бацамыдта ӕмӕ сӕм афтӕ каст, цыма уыдон сты фӕндагамонджытӕ куырмытӕн, рухс — талынджы чи ис, уыдонӕн ӕмӕ ахуыргӕнджытӕ — сывӕллӕттӕн (Ромӕгтӕм 2:17—20). Фӕлӕ се ’хсӕн уыди, сусӕгӕй кӕнӕ хӕтгӕ чи кодта кӕнӕ давгӕ, ахӕм дыдзӕсгӕмттӕ дӕр. Уыдон хынджылӕггаг скодтой Закъон дӕр ӕмӕ сын ӕй чи радта, уыцы уӕларвон Хуыцауы дӕр. Уӕдӕ куыд уыныс, афтӕмӕй уыдон ахуыргӕнджытӕн нӕ бӕззыдысты, ӕгӕр-мӕгуыр сӕхи сахуыр кӕнынӕн дӕр куы нӕ уыдысты.

8. Павелы рӕстӕджы иудейтӕй чидӕртӕ кувӕндӕттӕ куыд «къахтой»?

⁸ Павел, иудейтӕ кувӕндӕттӕ кӕй фӕкъахтой, уый кой дӕр кӕны. Ӕцӕгдӕр кодтой афтӕ? Цы зӕгъын фӕндыд Павелы? Хабар ӕцӕг куыд уыди, уый ацы скъуыддзагӕй бӕрӕг нӕу, ӕмӕ уымӕ гӕсгӕ, иудейтӕ кувӕндӕттӕ куыд фӕкъахтой, уый тыххӕй фидарӕй ницы зӕгъӕн ис. Фӕлӕ уымӕй размӕ Ефесы сахары ӕгъдаумӕ кӕсӕг Павелы ӕмбӕлттӕй загъта, зӕгъгӕ, уыдон «кувӕндонӕй ницы адавтой». Ацы ныхӕстӕ та ууыл дзурӕг сты, ӕмӕ чидӕртӕ хъуыды кодтой, иудейтӕн уый саразын зын кӕй нӕу (Куыстытӕ 19:29—37). Чи зоны, хъуыддаг афтӕ уыди, ӕмӕ-иу сахартӕм чи бабырста кӕнӕ дины сӕрыл чи тох кодта, уыдон-иу муртатты кувӕндӕттӕй кӕй рахастой, уыцы хӕзнатӕ-иу иудейтӕ кӕнӕ сӕ хӕдзӕртты дардтой, кӕнӕ та-иу сӕ ауӕй кодтой.  Афтӕмӕй та Хуыцауы Закъонмӕ гӕсгӕ, мӕнг хуыцӕутты номыл цы ӕвзист ӕмӕ сызгъӕрин уыди, уымӕй сӕхицӕн мацы хъуамӕ ныууагътаиккой, фӕлӕ-иу сӕ иууылдӕр фесӕфтаиккой (Дыккаг закъон 7:25) *. Уӕдӕ Павел дӕр, ӕвӕццӕгӕн, Хуыцауы фӕдзӕхстытӕ чи ницӕмӕ дардта, растдӕр ахӕм иудейты кой кӕны.

9. Иерусалимы кувӕндоны цы митӕ кодтой, уыдон «кувӕндон фӕкъахынӕй» уӕлдай цӕуылнӕ сты?

⁹ Иосиф Флавий ма дзуры, Ромы цыппар иудейаджы (сӕ амидингӕнӕг Закъон амонӕг, афтӕмӕй) сӕ сӕрмӕ цы ӕгады ми ӕрхастой, уый тыххӕй дӕр. Уыдон, иудейты дин чи райста, иу ахӕм ромаг сылгоймаджы сразы кодтой, Иерусалимы кувӕндонӕн мысайнагӕн сыгъзӕрин ӕмӕ ӕндӕр зынаргъ дзауматӕ радтын. Ӕмӕ уый фӕстӕ уыцы хӕзнатӕ сӕхи бакодтой. Уӕдӕ нӕ фӕкъахтой кувӕндон цы, ӕндӕр ма йӕ куыд бамбарӕн ис? * Иудейтӕ ма кувӕндон уымӕй дӕр давтой, ӕмӕ нывондӕн хастой сӕ рынчын фос, ӕнӕфсис базаргӕнджытӕн сӕ къух арӕзтой, ӕмӕ афтӕмӕй кувӕндонӕй кӕй сарӕзтой «абырджыты лӕгӕт» (Матфейы 21:12, 13; Малахи 1:12—14; 3:8, 9).

Ахуыр кӕн чырыстон ӕфсармыл

10. Павел Ромӕгтӕм 2:21—23 цы загъта, уый махмӕ куыд хауы?

¹⁰ Фыццаг ӕнусы иудейтӕ давӕг, хӕтаг ӕмӕ кувӕндӕттӕ къахджытӕ цыфӕнды хуызы ма уыдаиккой, мах хъуамӕ нӕ зӕрдӕмӕ арф айсӕм, Павелы уынаффӕ махмӕ куыд хауы, уый. Павел фӕрсы: «Ды та, искӕйы ахуыр кӕнгӕйӕ, дӕхӕдӕг дӕхи куыннӕ ахуыр кӕныс?» Зӕгъын хъӕуы уый, ӕмӕ Павел цӕй кой кӕны, уыдӕттӕ иууылдӕр хауынц адӕймаджы ӕгъдау ӕмӕ ӕфсарммӕ. Апостол ам нӕдӕр Библийы ахуырӕдтыл дзуры, нӕдӕр кӕддӕры хабӕрттыл. Павелы ныхас ууыл у, ӕмӕ адӕймаг йӕхи дӕр ӕмӕ иннӕты дӕр кӕй хъуамӕ ахуыр кӕна чырыстон ӕфсармыл.

11. Хуыцауы Ныхас ахуыргӕнгӕйӕ нӕ чырыстон ӕфсарммӕ нӕ хъус лӕмбынӕг дарын цӕмӕн хъӕуы?

¹¹ Цӕмӕй нын Ромӕгтӕм 2:21—23 ныхӕстӕ зондзонӕн уой, уый тыххӕй хъӕуы Хуыцауы Ныхас ахуыр кӕнгӕйӕ, чырыстон ӕфсарм цы у, уый базонын, цы базонӕм, уымӕ гӕсгӕ цӕрын ӕмӕ стӕй иннӕты дӕр ууыл ахуыр кӕнын. Уӕдӕ Библи куы фӕкӕсыс, уӕд-иу дӕ хъус уӕлдай лӕмбынӕг дар, Иегъовӕйы зӕрдӕмӕ цы цӕуы ӕмӕ цы нӕ цӕуы, уымӕ, уымӕн ӕмӕ ууыл ӕнцайы чырыстон ӕфсарм. Хъуыды кӕн, цы цӕвиттонтӕ ӕмӕ дзы цы зондамындтӕ ис, уыдоныл. Ӕмӕ дарддӕр, цы базонай, уымӕ гӕсгӕ архай. О, Библимӕ гӕсгӕ цӕрын ӕнцон  нӕу, уымӕн стыр лӕгдзинад хъӕуы. Ӕнӕххӕст адӕймаг дӕсны у йӕхи рӕстытӕ кӕнынмӕ, чырыстон ӕфсармы сӕрты ахизӕн цӕмӕн ис, йе та ма хуыздӕр дӕр цӕмӕн уыдзӕн, уый афтӕ хорз бамбарын кӕндзӕн, ӕмӕ ма йӕ ныхмӕ исты зӕгъын уыдзӕн тынг зын. Чи зоны, Павел цы иудейты кой кодта, уыдон дӕр афтӕ дӕсны уыдысты сӕхи дӕр ӕмӕ ма иннӕты сайынмӕ дӕр. Фӕлӕ Павелы ныхӕстӕй уынӕм, чырыстон ӕгъдау ӕмӕ чырыстон ӕфсарм, нӕхимӕ раст цы кӕсы, уый кӕй нӕу.

12. Хорз кӕнӕ ӕвзӕр уагахаст Иегъовӕ Хуыцауы номыл куыд фӕзындзӕн ӕмӕ нӕ уый нӕ зӕрдыл дарын цӕмӕн хъӕуы?

¹² Апостол Павел бамбарын кодта, Библи цы дзуры, уый зонын ӕмӕ уымӕ гӕсгӕ цӕрын нӕ сӕйраджыдӕр цӕмӕн хъӕуы, уый. Иудейтӕ се ’взӕр митӕй худинаг кодтой Иегъовӕйы: «Закъонӕй ӕппӕлыс, фӕлӕ закъон халгӕйӕ, фауыс [«ӕгад кӕныс», НФ] Хуыцауы? Уымӕн ӕмӕ сымах тыххӕй... Хуыцауы ном фауд цӕуы муртаттӕм» (Ромӕгтӕм 2:23, 24). Ӕмӕ уый афтӕ у абон дӕр. Чырыстон ӕфсармы сӕрты куы хизӕм, уӕд мах ӕгады бынаты ӕвӕрӕм, уыцы ӕфсарм ӕмӕ ӕгъдау кӕмӕй цӕуынц, уыцы Хуыцауы. Йӕ амындтӕм гӕсгӕ куы цӕрӕм, уӕд та кад кӕндзыстӕм йӕ номӕн (Исай 52:5; Иезекил 36:20). Ацы хъуыды дын ӕххуыс кӕндзӕн цыфӕнды зын уавӕры дӕр, суанг дӕм чырыстон ӕфсармы арӕнтӕй ахизын иууыл ӕнцондӕр куы кӕса, уӕд дӕр. Фӕлӕ нын Павелы ныхӕстӕ ӕрмӕст ууыл дзурӕг не сты. Иугӕр уый зонӕм, ӕмӕ адӕймаджы уагахаст Хуыцауы ном кӕнӕ бӕрзонд кӕны кӕнӕ та ӕгады бынаты ӕвӕры, уӕд уый амонӕм иннӕтӕн дӕр. Библи кӕимӕ ахуыр кӕныс, уыдонӕн ӕххуыс кӕн, цы ӕгъдау ӕмӕ ӕфсармимӕ зонгӕ кӕнынц, уымӕ сын цавӕр ахаст уыдзӕн, уый Иегъовӕйы номыл куыд фӕзындзӕн, уый ӕмбарынӕн. Дзырд ӕрмӕст ууыл нӕ цӕуы, чырыстон ӕфсарм ӕмӕ ӕгъдау адӕймаджы ӕнӕниздзинад ӕмӕ амондӕн кӕй сты ахъаз. Чырыстон ӕгъдауыл хӕцӕм ӕви нӕ, ууыл баст у, уыцы ӕгъдауыл нӕ чи ахуыр кӕны, уыцы Хуыцаумӕ адӕм цы цӕстӕй кӕсдзысты, уый дӕр (Псалом 73:10; Иаковы 3:17).

13. а) Нӕхи куыд хъуамӕ дарӕм, уый бамбарынӕн нын Библи куыд ӕххуыс кӕны? ӕ) Дӕхи ныхӕстӕй радзур, 1 Фессалоникӕгтӕм 4:3—7 цы хъуыды ис, уый.

¹³ Нӕ уагахаст зыны нӕ алыварс адӕмыл дӕр. Уымӕн бирӕ бӕлвырдгӕнӕнтӕ ис Хуыцауы Ныхасы: бӕлвырд адӕймӕгты цардӕй уынӕм, йӕ Хуыцауы ӕфсарм чи нӕ сафы, уыдонӕн уый куыд стыр ахъаз у ӕмӕ адӕймаг йе ’фсарм куы фесафы, уӕд ӕй уый цӕмӕ ’ркӕны (Уӕвынад 39:1—9, 21; Йесо Навин 7:1—25). Нӕхи куыд хъуамӕ дарӕм, уый тыххӕй нын Библи дӕтты бӕлвырд амындтӕ дӕр, зӕгъӕм: «Хуыцауы фӕндон у сымах ссыгъдӕгад,— ӕнӕфсарм митӕй уӕхи куыд хизат,— афтӕ хъуамӕ сымахӕй алчидӕр дара йӕ мигӕнӕн сыгъдӕг ӕмӕ цытджын, мондӕгты цыбӕллӕгтӕм гӕсгӕ нӕ, муртаччытау, Хуыцауы чи нӕ зоны. Хъуамӕ иу хъуыддаджы дӕр сымах мацы-иу ракӕнат ӕнӕгъдауӕй, кӕнӕ кӕрӕфӕй уе ‘фсымӕры ныхмӕ [«уе ’фсымӕры бартӕ ма исат», НД]... Цӕмӕйдӕриддӕр Хуыцау нӕм нӕ басидти ӕнӕфӕтчиаг митӕм, фӕлӕ сыгъдӕгадмӕ» (1 Фессалоникӕгтӕм 4:3—7, НФ).

14. 1 Фессалоникӕгтӕм 4:3—7 иртасгӕйӕ цавӕр фарстытыл ис ахъуыды кӕнӕн?

¹⁴ Ацы стихтӕй нӕ алчидӕр, ӕвӕццӕгӕн, бамбӕрста, чырыстон ӕфсармӕн хӕтын ӕмӕ ӕндӕр алы ӕнӕгъдау, хӕлд митимӕ иумӕйагӕй кӕй ницы ис. Фӕлӕ ацы ныхӕсты ис ноджы арфдӕр хъуыды. О, Библийы иуӕй-иу бынӕттӕ вӕййынц лӕмбынӕг раиртасинаг, фӕхъӕуы сыл дзӕвгар ахъуыды кӕнын, ӕмӕ сӕ афтӕмӕй адӕймаг ноджы хуыздӕр бамбары. Цӕвиттон, Павел афтӕ куы загъта, зӕгъгӕ, йӕ монцы фӕдыл ацӕугӕйӕ, адӕймаг «йе ’фсымӕры бартӕ исы», уӕд ӕй цы зӕгъын фӕндыди? Цавӕр бартыл цӕуы дзырд ӕмӕ уый хуыздӕр куы ’мбарай, уӕд дын куыд ӕххуыс кӕндзӕн, цӕмӕй цыфӕндыйӕ дӕр дӕ чырыстон ӕфсарм ма фесафай? Куыд дын баххуыс кӕндзӕн ахӕм иртасӕн куыст иннӕты ахуыр кӕнгӕйӕ, цӕмӕй уыдон дӕр Хуыцауы кадджын кӕной?

Библи иртас, цӕмӕй йӕ иннӕтӕн амонай

15. Библи ахуыргӕнгӕйӕ цавӕр ӕрмӕгӕй ис пайдагӕнӕн?

¹⁵ Иегъовӕйы Ӕвдисӕнтӕм ис бирӕ ӕрмӕг, Библи кӕсгӕйӕ кӕнӕ йӕ иннӕтимӕ ахуыргӕнгӕйӕ цы фарстытӕ фӕзыны, уыдон иртасынӕн. Зӕгъӕм, бирӕ ӕвзӕгтыл ис «Хъахъхъӕнӕн мӕсыджы публикациты индекс». «Индексы»  руаджы ссарӕн ис, цы фарст дӕм фӕзынд, уый тыххӕй Иегъовӕйы Ӕвдисӕнты уагъд библион литературӕйы кӕм ис бакӕсӕн, уый. Ӕрмӕг агурӕн ис цавӕрдӕр дзырд кӕнӕ стихмӕ гӕсгӕ. Афтӕ ма бирӕ ӕвзӕгтыл ис «Хъахъхъӕнӕн мӕсыджы библиотекӕ» компьютеры. Уым ис тынг бирӕ публикацитӕ ӕмӕ дзы ӕнцонтӕй ссарӕн ис, алыхуызон фарстытӕ ӕмӕ библион стихтӕ Ӕхсӕнад куыд ӕмбарын кӕны, уый. Кӕд дын фадат ис, уӕд сӕ пайда кӕн, Хуыцауы Ныхас иннӕтӕн амонынмӕ куы фӕцӕттӕ кӕныс, уӕд.

16, 17. а) 1 Фессалоникӕгтӕм 4:6 стихы цы барты кой цӕуы, уый тыххӕй диссаджы хъуыдытӕ кӕм ис ссарӕн? ӕ) Хӕтгӕ чи кӕны, уый иннӕты бартӕ куыд исы?

¹⁶ Райсӕм, уӕлдӕр кӕй ӕрхастам, уыцы стихтӕ — 1 Фессалоникӕгтӕм 4:3—7. Нӕ ныхас уыди бартыл. Кӕй бартыл? Куыд ис уыцы бартӕн байсӕн? Ацы скъуыддзаг, уыимӕ Павел цы барты кой кодта, уый тыххӕй дӕр диссаджы хъуыдытӕ ссарӕн ис, цы ӕрмӕджы кой кодтам, уым. Уый тыххӕй дӕ бон у бакӕсын энциклопеди «Фыстады ӕмбарынад» 1 том, 863, 864 фӕрстӕ; чиныг «Ӕцӕг фарн ӕмӕ сабырдзинад. Куыд сӕ ис ссарӕн?», 145 фарс; «Хъахъхъӕнӕн мӕсыг» 15 ноябрь, 1989 аз, 31 фарс (иууылдӕр сты англисаг ӕвзагыл).

¹⁷ Ахӕм иртасӕн куысты руаджы дӕхӕдӕг фендзынӕ, Павел рӕстытӕ кӕй дзырдта, уый. Хӕтаг адӕймаг Хуыцауы раз тӕригъӕд аразы ӕмӕ йӕхицӕн дӕр тӕссаг у, исты низӕй куы фӕрынчын уа, уымӕй (1 Коринфӕгтӕм 6:18, 19; Дзуттытӕм 13:4). Хӕтаг лӕг исы, кӕй фӕрӕдийын кӕны, уыцы сылгоймагӕн йӕ бартӕ. Йӕ къӕхты бын ын кӕны йӕ чызгон сӕры кад ӕмӕ йӕ сыгъдӕг ӕфсарм. Кӕд ӕмӕ чындзыцыд нӕу, уӕд ын йӕхицӕн дӕр нӕ дӕтты уый бар, цӕмӕй ӕнӕкъӕмдзӕстыгӕй ссара йӕ амонд ӕмӕ кӕмӕ смой кӕна, уый дӕр ӕнӕхай кӕны, йӕ бинойнагимӕ сыгъдӕгӕй баиу уа, уымӕй. Афтӕ ма уый ӕфхӕры сылгоймагӕн йӕ ныййарджыты дӕр, ӕмӕ кӕд моймӕдзыд у, уӕд та йӕ сӕрыхицауы дӕр. Хӕтаг лӕг зиан кӕны йӕхи бинонтӕн дӕр, уымӕн ӕмӕ сӕ ӕгад кӕны. Кӕд чырыстон у, уӕд ма уымӕй уӕлдай цъыфкалӕн кӕны ӕмӕ худинаджы гакк ӕвӕры ӕгас ӕмбырдыл дӕр (1 Коринфӕгтӕм 5:1).

18. Библи чырыстон ӕфсармы тыххӕй цы дзуры, уый ахуыр кӕнын нын цӕмӕн у ахъаз?

¹⁸ Ахӕм хъуыдыты руаджы, ацы стихты барты тыххӕй цы хъуыды ис, уый бирӕ хуыздӕр нӕ бамбӕрстам? Ахӕм иртасӕн куыстытӕ тынг ахъаз сты, уымӕн ӕмӕ афтӕмӕй адӕймаг ахуыр кӕны йӕхи. Зӕгъӕм, ныр хуыздӕр ӕмбарыс, Хуыцауы ныхӕстӕ куыд раст сты ӕмӕ сӕ цы арф хъуыды ис, уый. Уымӕй уӕлдай цыфӕнды зын уавӕры дӕр цӕттӕ уыдзынӕ дӕ чырыстон ӕфсарм бахъахъхъӕнынмӕ. Иннӕты ахуыргӕнгӕйӕ дын куыд стыр ахъаз фӕуыдзӕн, уый та! Библи кӕимӕ ахуыр кӕнай, уымӕн дӕ бон уыдзӕн, 1 Фессалоникӕгтӕм 4:3—7 цы хъуыды ис, уый райхалын ӕмӕ йын афтӕмӕй, чырыстон ӕфсарм цы у, уый арфдӕр бамбарынӕн ӕмӕ аргъ кӕнынӕн баххуыс кӕнын. Уӕдӕ Библи лӕмбынӕг иртасгӕйӕ ды ӕххуыс кӕныс дӕхицӕн дӕр ӕмӕ бирӕ ӕндӕртӕн дӕр Хуыцауы ном бӕрзонд кӕнынӕн. Мах ӕрхастам ӕрмӕстдӕр иу цӕвиттон, Павел фессалоникӕгтӕм цы фыстӕг ныффыста, уырдыгӕй. Фӕлӕ чырыстон ӕфсарм ӕрмӕст уый нӕу, ӕмӕ хӕтгӕ ма кӕнай. Библийы ма ис хорз амындтӕ, царды бирӕ ӕндӕр фӕзилӕнты нӕхи куыд хъуамӕ дарӕм, уый тыххӕй ӕмӕ уыдонмӕ дӕр ис бӕстондӕр ӕркӕсӕн, нӕ царды сӕ пайда кӕнӕн ӕмӕ сӕ иннӕтӕн дӕр амонӕн.

19. Чырыстон ӕгъдауыл нӕ фидар хӕцын цӕмӕн хъӕуы?

¹⁹ Йӕ чырыстон ӕфсарм цӕстыгагуыйау чи хъахъхъӕны, уый у зондджын адӕймаг. Иаковы 3:17 куыд кӕсӕм, афтӕмӕй «уӕлейӕ [Иегъовӕ Хуыцауӕй] ӕрцӕугӕ зонд фыццагдӕр у сыгъдӕг». Уый ууыл дзурӕг у, ӕмӕ нӕ Хуыцау цы ӕгъдауыл ахуыр кӕны, уымӕ гӕсгӕ  кӕй хъуамӕ цӕрӕм. Уӕвгӕ, Иегъовӕйы номӕй иннӕты чи ахуыр кӕны, уыдон сӕхӕдӕг хъуамӕ уой «фӕзминаг... сыгъдӕгдзинады» (1 Тимофеймӕ 4:12). Уыцы хъуыддаджы фӕзминаг уыдысты фыццаг ӕнусы чырыстӕттӕ, зӕгъӕм, Павел ӕмӕ Тимофей. Уыдон дард лӕууыдысты ӕнӕгъдау, ӕнӕуаг митӕй. Павел ма афтӕ дӕр фыста: «Ӕнӕфсарм митӕн ӕмӕ алы чъизидзинадӕн ӕмӕ кӕрӕфӕн сӕ ном дӕр хъуамӕ ма уа сымахмӕ, сыгъдӕджытӕн куыд аккаг у,— афтӕ. Айадыл аккаг не сты сымахӕн ӕлгъыстытӕ ӕмӕ дзӕгъӕлдзырд ӕмӕ искӕуыл худындзаст» (Ефесӕгтӕм 5:3, 4, НФ).

20, 21. Апостол Иоанн 1 Иоанны 5:3 цы загъта, уыимӕ цӕмӕн дӕ разы?

²⁰ Хуыцауы Ныхас нын комкоммӕ дзуры, нӕхи куыд хъуамӕ дарӕм, не ’гъдау цавӕр хъуамӕ уа, уый. Фӕлӕ афтӕ зӕгъӕн нӕй, ӕмӕ нын уыцы ӕгъдау нӕ сӕрибардзинад исы, цагъартӕ нӕ аразы. Уый зыдта Иоанн, иннӕ апостолтӕй фылдӕр чи фӕцард, уый. Цӕрӕнбонты йӕхи цӕстӕй уыдта, чырыстон ӕгъдау ӕмӕ ӕфсарм адӕймагӕн хорз йедтӕмӕ, ӕвзӕрӕй кӕй ницы хӕссы. Чырыстон ӕфсарм у фӕрныг, дунейы бирӕ хорздзинӕдтӕй дзы уымӕн ӕмбал нӕй. Афтӕ кӕй у, уый Иоанн ахӕм ныхӕстӕй бамбарын кодта: «Хуыцауы уарзын уый у, цӕмӕй мах ӕххӕст кӕнӕм Йӕ фӕдзӕхстытӕ; ӕмӕ Йӕ фӕдзӕхстытӕ уӕззау не сты» (1 Иоанны 5:3).

²¹ О, фӕлӕ Иоанн афтӕ нӕ загъта, ӕмӕ Хуыцауы фӕдзӕхстытӕм хъусын, чырыстон ӕгъдаумӕ гӕсгӕ цӕрын хорз уымӕн у, ӕмӕ афтӕмӕй нӕхи хизӕм бӕллӕхтӕй ӕмӕ ӕнамонд хабӕрттӕй. Иоанн раст бамбарын кодта, Хуыцаумӕ хъусын нӕ фыццаджыдӕр цӕмӕн хъӕуы, уый — уый у иууыл хуыздӕр фадат, Иегъовӕ Хуыцауы кӕй уарзӕм, уый равдисынӕн. Уӕвгӕ, нӕхи дӕр ӕмӕ иннӕты дӕр Хуыцауы уарзын уӕд ахуыр кӕндзыстӕм, кӕд ӕмӕ йе ’вӕрд ӕгъдау уа не ’гъдау дӕр, ома нӕхи дӕр ӕмӕ иннӕты дӕр чырыстон ӕгъдау ӕмӕ ӕфсармыл ахуыр кӕнӕм.

[Фиппаинӕгтӕ]

Бахъуыды кодтай?

• Фыццаджыдӕр нӕ нӕхи ахуыр кӕнын цӕмӕн хъӕуы?

• Нӕхи куыд дарӕм, уымӕ гӕсгӕ иннӕтӕ Иегъовӕйӕ цы хъуыды кӕндзысты?

• Хӕтаг адӕймаг кӕй бартӕ исы?

• Чырыстон ӕгъдауы тыххӕй цы базыдтам, уый дӕ цӕмӕ разӕнгард кӕны?

[Фарстатӕ ахуыр кӕнынӕн]

[Ныв 18 фарсыл]

«Йӕ фӕдзӕхстытӕ уӕззау не сты».