Мӕнгуырнындзинӕдты ахӕсты дӕ?
Мӕнгуырнындзинӕдты ахӕсты дӕ?
ДУНЕЙЫ алы ран дӕр ис алыхуызон мӕнгуырнындзинӕдтӕ, ома алыхуызон цаутӕн ӕнахуыр аххосӕгтӕ агурын ӕмӕ цавӕрдӕр хъуыддӕгтӕ ӕнӕбындурӕй нӕфӕтчиӕгтӕ хонын. Иутӕ сӕ нымайынц адӕмон культурӕйы хӕзнайыл, иннӕтӕн та сты ӕрмӕстдӕр, цард цымыдисагдӕр чи кӕны, ахӕм хиирхӕфсӕн ӕгъдӕуттӕ. Ныгуылӕйнаг бӕстӕты мӕнгуырнындзинӕдтӕ уыйбӕрц ницӕмӕ дарынц. Иннӕ бӕстӕты та, зӕгъӕм, Африкӕйы, тынг ӕндавынц адӕмы цардыл.
Африкӕйы адӕмтӕй бирӕтӕн се сфӕлдыстады уидӕгтӕ цӕуынц мӕнгуырнындзинӕдтӕй. Сӕ киноты, радиоралӕвӕрдты ӕмӕ чингуыты арӕх дзырдӕуы уыдоныл ӕмӕ ӕндӕр алыхуызон ӕнахуыр диссӕгтыл, зӕгъӕм, хинтӕ ӕмӕ кӕлӕнтыл, мӕрдтӕн табу кӕнын ӕмӕ дуатыл. Цӕмӕн афтӕ тынг ӕндавынц уыдӕттӕ адӕмы цардыл, ӕмӕ кӕцӕй цӕуынц уыцы мӕнгуырнындзинӕдтӕ?
Куыд фӕзынынц мӕнгуырнындзинӕдтӕ?
Мӕнгуырнындзинӕдтӕ фылдӕр хатт фӕзынынц, адӕм мӕрдтӕй кӕнӕ ӕндӕр ӕнӕуынгӕ тыхтӕй кӕй тӕрсынц, уымӕ гӕсгӕ. Исты куы ’рцӕуы, уӕд фӕзӕгъынц, зӕгъгӕ, уый удыгӕсты уыцы тыхтӕ тӕрсын кӕнынц, кӕнӕ та сӕ цӕмӕйдӕр фӕдзӕхсынц, йе та сыл хӕрзаудӕн кӕнынц.
Арӕх ма мӕнгуырнындзинӕдтӕ баст вӕййынц хос кӕнынимӕ дӕр. Мӕгуыр бӕстӕты адӕмӕй сӕ фылдӕрӕн дохтырмӕ ацӕуын сӕ къух нӕ амоны, кӕмдӕрты та дохтыртӕ уӕвгӕ дӕр нӕй. Уымӕ гӕсгӕ бирӕтӕ хос кӕнынӕн кӕнӕ сӕхи фыдбылызӕй бахизынӕн ӕххуыс агурынц сӕ фыдӕлты ӕгъдӕутты, кӕлӕнты ӕмӕ мӕнгуырнындзинӕдты. Ноджы ма уыдонӕн ӕнцондӕр вӕййы ахуыргонд дохтырмӕ бацӕуын нӕ, фӕлӕ сын се ’гъдӕуттӕ чи зоны ӕмӕ се ’взагыл чи дзуры, ахӕм дӕснымӕ. Ӕмӕ афтӕмӕй мӕнгуырнындзинӕдтӕ дарддӕр дӕр парахат кӕнынц.
Бирӕты уырны, адӕймаг хуымӕтӕджы кӕй нӕ фӕрынчын вӕййы, фӕлӕ йыл сау тыхтӕ кӕй бафтауынц низ ӕмӕ йӕ исты бӕллӕхы дӕр уыдон кӕй баппарынц. Хосгӕнӕг зӕгъдзӕн, зӕгъгӕ, уый дӕ амӕлджытӕй чидӕр цӕуылдӕр тыхсы. Дӕсныфӕрсӕг та зӕгъдзӕн, чидӕр дын хинтӕ кӕй скодта, уымӕ гӕсгӕ фӕрынчын дӕ кӕнӕ дыл уый тыххӕй ӕрцыд цавӕрдӕр бӕллӕх.
Алы адӕмты алыхуызон хабӕрттӕ уырны, ӕмӕ уый уымӕн афтӕ у, ӕмӕ адӕмы сфӕлдыстад, таурӕгътӕ ӕмӕ царды уавӕртӕ алыхуызон сты. Фӕлӕ се ’ппӕтӕн дӕр сӕ рахӕцӕн у иу: ӕнӕуынгӕ тыхты дунейӕ искӕмӕн истӕмӕй йӕ зӕрдӕ балхӕнын хъӕуы.
Ӕвзӕрӕй сӕ ницы ис?
Фаззӕтты райгуырд бинонтӕн вӕййы тынг ӕхсызгон хабар. Фӕлӕ мӕнгуырнындзинӕдты ахӕсты чи ис, уыдонмӕ гӕсгӕ уый хуымӕтӕджы нӕ вӕййы. Ныгуылӕн Африкӕйы иуӕй-иу рӕтты искӕмӕн фаззӕттӕ куы райгуыры, уӕд фӕзӕгъынц, зӕгъгӕ, дауджытӕ райгуырдысты, ӕмӕ сын фӕкувынц. Фаззӕттӕй иу кӕнӕ сӕ дыууӕ дӕр куы амӕлынц, уӕд сын саразынц
сӕ цыртсурӕттӕ, ӕмӕ уыцы гуымирытӕн бинонтӕ нывондӕн фӕхӕссынц хӕринаг. Кӕмдӕрты та фаззӕтты райгуырд фыдбылызыл нымад у, суанг ма ныййарджытӕ фаззӕттӕй сӕ иуы дӕр амарынц. Цӕмӕн? Уымӕн ӕмӕ уыдоны уырны, дыууӕ дӕр удӕгасӕй куы баззайой, уӕд иу бон сӕ ныййарджыты кӕй амардзысты.Уӕдӕ ацы цӕвиттонтӕй бӕрӕг у: кӕд афтӕ фӕкӕсы ӕмӕ иуӕй-иу мӕнгуырнындзинӕдты ӕвзӕрӕй ницы ис, уӕд иннӕтӕ та, гӕнӕн ис, тӕссаг уой, суанг ма мӕлӕтхӕссӕг дӕр. Хуымӕтӕджы цау дӕр свӕййы тӕссаг хабар, фыдбылызхӕссӕг ӕй куы схонынц, уӕд.
Раст зӕгъгӕйӕ, мӕнгуырнындзинад дӕр дин у. Мӕнгуырнындзинӕдтӕ арӕх зианхӕссӕг кӕй вӕййынц, уый хынцгӕйӕ хорз уаид ахъуыды кӕнын: адӕм мӕнгуырнындзинӕдты бындурыл цы хъуыддӕгтӕ ӕмӕ ӕгъдӕуттӕ кӕнынц, уымӕй ӕцӕгӕй кӕй къух аразынц?
Кӕцӕй цӕуынц мӕнгуырнындзинӕдтӕ
Кӕд уымӕн бирӕ бӕлвырдгӕнӕнтӕ ис, уӕддӕр абон бирӕты нӕ уырны, Хӕйрӕг ӕмӕ сау тыхтӕ кӕй ис, уый. Фӕлӕ, зӕгъӕм, хӕсты рӕстӕджы адӕм, знагӕй тӕссаг кӕй у, уый куы ницӕмӕ ӕрдарой, уӕд сын ӕнӕ сӕфгӕ нӕй. Раст афтӕ зӕгъӕн ис уӕлӕрдзон ӕнӕуынгӕ тыхтимӕ тохы тыххӕй дӕр, уымӕн ӕмӕ апостол Павел фыста: «Мах тох [у]... арвы бын фыддзинады удты ныхмӕ» (Ефесӕгтӕм 6:12).
Мах сӕ кӕй нӕ уынӕм, уый ууыл дзурӕг нӕу, ӕмӕ сау тыхтӕ нӕй. Библийы куыд кӕсӕм, афтӕмӕй ӕнӕуынгӕ уӕларвон гоймаг калмы уылты фыццаг сылгоймаг Евӕмӕ сдзырдта ӕмӕ йӕ Хуыцауы ныхмӕ рацӕуын кодта (Уӕвынад 3:1—5). Ацы ӕнӕуынгӕ гоймаджы Библи хоны «рагон калм, йӕ ном [Хӕйрӕг] ӕмӕ сайтан кӕмӕн у, ӕгас дунейы чи фӕливы», уый (Раргомад 12:9, НФ). Уыцы Сайтан ма ӕндӕр зӕдты дӕр скодта Хуыцауы ныхмӕ (Иудӕйы 6). Ӕмӕ ацы ӕвзӕр зӕдтӕ систы хӕйрӕджытӕ, Хуыцауы знӕгтӕ.
Йесо сырдта хӕйрӕджыты адӕмӕй, афтӕ кодтой йӕ ахуыргӕнинӕгтӕ дӕр (Маркы 1:34; Куыстытӕ 16:18). Уыцы ӕнӕуынгӕ тыхтӕ адӕймаджы мард фыдӕлтӕ не сты, уымӕн ӕмӕ «мӕрдтӕ... ӕппындӕр ницы зонынц» (Екклесиаст 9:5). Уыдон сты Хуыцауы ныхмӕ цӕуӕг зӕдтӕ, Сайтан йӕ фӕдыл кӕй асайдта, уыдон. Адӕймагӕн уыдонимӕ иумӕйагӕй исты куы уа кӕнӕ йыл куы ӕндавой, уӕд уый тынг тӕссаг у, уымӕн ӕмӕ нӕм уыдон дӕр, сӕ раздзог Сайтан Хӕйрӕгау, гӕппӕввонгӕй лӕууынц, бауадз сӕ, уӕд нӕ аныхъуыриккой (1 Петры 5:8). Уыдон тырнынц, цӕмӕй нӕ ӕнӕхай фӕкӕной, адӕмӕн цы иунӕг ныфс ис, уымӕй — Хуыцауы Паддзахадӕй.
Библи нын ӕргом кӕны, Сайтан ӕмӕ йӕ хӕйрӕджытӕ кӕмӕй пайда кӕнынц, иу ахӕм мадзал: «Хӕйрӕг йӕхӕдӕг дӕр райсы рухсы Зӕды хуыз» (2 Коринфӕгтӕм 11:14). Сайтаны фӕнды, цӕмӕй нӕ баууӕндын кӕна, йӕ бон кӕй у махӕн хуыздӕр цард раттын. Ӕмӕ уымӕ гӕсгӕ, чи зоны, кӕмӕдӕр афтӕ фӕкӕса, цыма сау тыхты руаджы рӕстӕгмӕ йӕ цард фӕхуыздӕр. Фӕлӕ уыцы тыхтӕн сӕ бон нӕу адӕймаджы зындзинӕдтӕн бынтондӕр кӕрон скӕнын (2 Петры 2:4). Сӕ бон нӕу искӕмӕн ӕнусон цард раттын, ӕмӕ тагъд рӕстӕджы та сӕхицӕн сӕ кой сӕ хъӕр дӕр нал уыдзӕн (Ромӕгтӕм 16:20). Ӕрмӕстдӕр не Сфӕлдисӕг у ӕнусон цард ӕмӕ ӕцӕг амонды суадон, уымӕй хуыздӕр нӕ ничи бахъахъхъӕндзӕн сау тыхтӕй (Иаковы 4:7).
Хинтӕ ӕмӕ кӕлӕнты руаджы ӕххуыс агурын у Хуыцауы ӕваст хъуыддаг (Дыккаг закъон 18:10—12; 4 Паддзахӕдты 21:6). Афтӕмӕй адӕймаг йӕхи бӕтты знӕгтимӕ, Хуыцауыл гадзрахатӕй чи рацыд, уыдонимӕ! Гороскоптӕ кӕсгӕйӕ, кӕлӕнгӕнӕгӕй ӕххуыс кургӕйӕ кӕнӕ ӕндӕр мӕнгуырнындзинӕдтимӕ баст хъуыддӕгты архайгӕйӕ адӕймаг йӕ цард сау тыхты бар бакӕны. Уый та нысан кӕны семӕ иу кӕнын ӕмӕ Хуыцауы ныхмӕ цӕуын.
Фыдбылызӕй хи бахъахъхъӕнӕн ис?
Нигерийы Иегъовӕйы Ӕвдисӕн (ӕххӕстрӕстӕг лӕггадгӕнӕг) ахуыр кодта Библи иу нӕлгоймагимӕ, Аде *, зӕгъгӕ. Аде йӕ дуканийы дуа цӕмӕн дардта, уый бамбарын кодта афтӕ: «Адӕймагӕн знӕгтӕ бирӕ ис». Адеимӕ Библи чи ахуыр кодта, уый йын загъта, ӕцӕгӕй ӕрмӕстдӕр Иегъовӕ кӕй хъахъхъӕны. Уый Адейӕн бакаст Псалом 33:8: «Хицауы Зӕд ӕртыхсы [«слӕууы», МГТ] Уымӕй тӕрсджыты алыварс ӕмӕ сӕ ирвӕзын кӕны». Аде загъта: «Кӕд мӕ Иегъовӕ ӕцӕгдӕр хъахъхъӕны, уӕд мӕ дуа аппардзынӕн». Ныр, бирӕ азты фӕстӕ, Аде лӕггад кӕны хистӕр нӕлгоймагӕй ӕмӕ пионерӕй. Йе знӕгтӕй йын иу дӕр ницы ракодта.
Екклесиаст 9:11). Фӕлӕ нӕ Иегъовӕ фыддзинадӕй никуы фӕлвары (Иаковы 1:13). Адамӕй нӕ туджы тӕригъӕд кӕй рахастам, уый аххосӕй стӕм ӕнӕххӕст ӕмӕ мӕлгӕ дӕр уый тыххӕй кӕнӕм (Ромӕгтӕм 5:12). Уымӕ гӕсгӕ, рӕстӕгӕй-рӕстӕгмӕ алчидӕр рынчын дӕр кӕны ӕмӕ рӕдийгӕ дӕр, уыдӕттӕ та, гӕнӕн ис, ноджы ӕвзӕрдӕр цӕмӕдӕр ӕркӕной. Фӕлӕ уӕддӕр, адӕймаг куы фӕрынчын вӕййы кӕнӕ йын исты хъуыддаг куы нӕ рауайы, уӕд раст нӕ уыдзӕн алы хатт дӕр ӕй сау тыхты аххос кӕнын. Афтӕ куы хъуыды кӕнӕм, уӕд тӕссаг уыдзӕн уымӕй, ӕмӕ сау тыхтӕн сӕ зӕрдӕ балхӕныныл архайын куы райдайӕм *. Рынчын куы уӕм, уӕд хъуамӕ Сайтан Хӕйрӕгыл, «мӕнгдзурӕг ӕмӕ мӕнгдзинады фыдыл», нӕхи бафӕдзӕхсыныл ма архайӕм, фӕлӕ агурӕм дохтырты ӕххуыс (Иоанны 8:44). Бӕрӕггӕнӕнтӕм гӕсгӕ, фыдӕлты мӕнгуырнындзинӕдтӕ тынг парахат кӕм сты, уыцы бӕстӕты цӕрджытӕ иннӕ бӕстӕты адӕмӕй фылдӕр кӕнӕ хуыздӕр нӕ цӕрынц. Уӕдӕ куыд уынӕм, афтӕмӕй мӕнгуырнындзинӕдтӕ адӕймаджы ӕнӕниздзинадӕн ницы ахъаз сты.
Библи куыд ӕмбарын кӕны, афтӕмӕй адӕймагыл кӕд цы ӕрцӕудзӕн, уымӕн ничи ницы зоны — фӕнды ӕууӕнд мӕнгуырнындзинӕдтыл, фӕнды нӕ (Хуыцау цыфӕнды сау тыхтӕй тыхджындӕр у, ӕмӕ Йӕ фӕнды, цӕмӕй нӕ царды алцыдӕр дзӕбӕх уа. «Хицауы цӕстытӕ здӕхт сты рӕстгӕнджытӕм ӕмӕ Йӕ хъустӕ сӕ куывдмӕ» (1 Петры 3:12). Кув ӕм, кур дзы ӕххуыс ӕмӕ зонд (Ӕмбисӕндтӕ 15:29; 18:10). Архай, цӕмӕй йын йӕ Сыгъдӕг Ныхас, Библи, ӕмбарай. Библийы бӕлвырд зонындзинӕдтӕ нӕ иууыл хуыздӕр хъахъхъӕндзысты. Уыдоны фӕрцы бамбардзыстӕм, цӕмӕн ӕрцӕуы алыхуызон фыдбылызтӕ ӕмӕ куыд ис Дунескӕнӕг Хуыцауы зӕрдӕ ссарӕн.
Хуыцауы тыххӕй зонындзинӕдтӕ хӕссынц ӕвӕджиауы хорздзинӕдтӕ
Талынг ӕгъдӕуттӕ ӕмӕ мӕнгуырнындзинӕдтӕй хъауджыдӕр Иегъовӕ ӕмӕ йӕ фӕндты тыххӕй бӕлвырд зонындзинӕдтӕ адӕймаджы ӕцӕгӕйдӕр хъахъхъӕнынц. Уый бӕрӕг у, Бенины чи цӕры, уыцы нӕлгоймаг Жаны хабарӕй. Жаны бинонты ’хсӕн мӕнгуырнындзинӕдтӕ тынг ахадыдтой. Сӕ фыдӕлты мӕнгуырнындзинадмӕ гӕсгӕ, сылгоймагӕн лӕппу куы райгуыра, уӕд фараст боны хъуамӕ цӕра хибарӕй, хицӕн агъуысты. Чызг ын куы райгуыра, уӕд та дзы хъуамӕ авд боны фӕуа.
1975 азы Жаны усӕн райгуырд рӕсугъд лӕппу, схуыдтой йӕ Марк. Библийӕ цы зыдтой, уымӕ гӕсгӕ Жан ӕмӕ йӕ усы нӕ фӕндыд сау тыхты бархъомыс кӕмӕ хӕццӕ кӕны, ахӕм хъуыддӕгтӕ кӕнын. Фӕлӕ цымӕ фӕтарстысты ӕмӕ, уыцы мӕнгуырнындзинад куыд домдта, уымӕ гӕсгӕ сывӕллоны мад хицӕн агъуыстмӕ ацыд? Нӕ, уыдон сӕ фыдӕлты мӕнгуырнындзинад ницӕмӕ ӕрдардтой (Ромӕгтӕм 6:16; 2 Коринфӕгтӕм 6:14, 15).
Цымӕ Жаны бинонтыл исты бӕллӕх ӕрцыд? Рацыд бирӕ азтӕ, ӕмӕ ныр Марк Иегъовӕйы Ӕвдисӕнты ӕмбырды у кӕстӕриуӕггӕнӕг ӕфсымӕр. Уыцы бинонтӕн тынг ӕхсызгон у, кӕй нӕ бауагътой, цӕмӕй сын сӕ цардыл мӕнгуырнындзинӕдтӕ ӕндавой ӕмӕ сын сӕ уырнындзинад фӕцудын кӕной (1 Коринфӕгтӕм 10:21, 22).
Чырыстӕттӕ, се Сфӕлдисӕг Иегъовӕ ӕмӕ сын йӕ Фырт Йесо Чырысти цы амонынц, уымӕ хъуамӕ хъусой ӕмӕ сӕхи хизой мӕнгуырнындзинӕдты зианхӕссӕг хъуыддӕгтӕй. Афтӕмӕй уыдон ссардзысты удӕнцой, уымӕн ӕмӕ зондзысты, Хуыцауы цӕсты раст цы у, уый кӕй аразынц (Иоанны 8:32).
[Фиппаинӕгтӕ]
^ 20 абз. Нӕмттӕ ивд сты.
^ 21 абз. Кӕс статья «Низтӕ Хӕйрӕджы аххосӕй сты?» 1999 азы 1 сентябры «Хъахъхъӕнӕн мӕсыджы» (уыр.).
[Нывтӕ 5 фарсыл]
Хуыцауы тыххӕй бӕлвырд зонындзинӕдтӕ ӕцӕгдӕр хъахъхъӕнынц ӕмӕ хӕссынц амонд.