«Мӕ фӕдыл цӕут»

«Сымах уымӕ хуынд стут; уымӕн ӕмӕ Чырысти дӕр мах тыххӕй фӕхъизӕмар кодта, ныууадзгӕйӕ нын дӕнц, цӕмӕй мах цӕуӕм Йӕ къахфӕдтыл» (1 ПЕТРЫ 2:21).

1, 2. Цӕуылнӕ ис афтӕ зӕгъӕн, ӕмӕ нӕ бон нӕ бауыдзӕн, Йесойы, ӕппӕты дӕсны ахуыргӕнӕджы, фӕзмын?

ЗӔХХЫЛ ӕппӕты номдзыддӕр Ахуыргӕнӕг уыд Йесо Чырысти. Уыимӕ ма уыдис алцӕмӕй ӕххӕст, ӕмӕ зӕххыл цы фӕцард, никуы ницӕмӕй фӕрӕдыди (1 Петры 2:22). Фӕлӕ цымӕ уый ууыл дзурӕг у, ӕмӕ махӕн, ӕнӕххӕст адӕмӕн, Йесойы, ӕппӕты дӕсны ахуыргӕнӕджы, нӕ бон нӕ бауыдзӕн фӕзмын? Афтӕ зӕгъӕн нӕй.

² Амӕй размӕ статьяйӕ куыд базыдтам, афтӕмӕй Йесойӕн адӕмы ахуыргӕнгӕйӕ иууыл сӕйрагдӕр уыди уарзондзинад. Зӕххыл та ахӕм адӕймаг нӕй, ӕмӕ уарзондзинад цы у, уый ма зона. Хуыцауы Ныхас нӕ арӕх разӕнгард кӕны, цӕмӕй иннӕты бонӕй-бонмӕ тынгдӕр уарзӕм (Филиппӕгтӕм 1:9; Колоссӕгтӕм 3:14). Иегъовӕ йе сконд адӕммӕ, сӕ бон цы у, уымӕй фылдӕр ницӕмӕ ӕнхъӕлмӕ кӕсы. «Хуыцау у уарзондзинад» ӕмӕ мах дӕр йӕхи фӕлгонцмӕ гӕсгӕ скодта. Уӕдӕ зӕгъӕн ис, ӕмӕ нӕ уарзынӕн сфӕлдыста (1 Иоанны 4:8; Уӕвынад 1:27). Уымӕ гӕсгӕ мах ӕнӕгуырысхойӕ разы кӕнӕм, нӕ статьяйы сӕйраг стихы чи ис фыст, Петры уыцы ныхӕстимӕ. О, нӕ бон у Чырыстийы къахфӕдтыл цӕуын, иудзырдӕй, нӕ бон у ӕххӕст кӕнын Йесойы фӕдзӕхст, «мӕ фӕдыл цӕут», зӕгъгӕ (Лукайы 9:23, НФ). Цӕй уӕдӕ равзарӕм, нӕ бон куыд у Чырыстийы фӕзмын, цы ӕцӕгад амыдта, уый, ӕмӕ кӕй ахуыр кодта, уыдоны куыд уарзта, уымӕй.

Цы ахуыр кӕнӕм, уый уарзӕм

3. Иуӕй-иутӕн ахуыр кӕнын зын цӕмӕн у, фӕлӕ нӕ Ӕмбисӕндты 2:1—5 фӕдзӕхст цӕмӕ разӕнгард кӕны?

³ Адӕмӕн цы амонӕм, уый цӕмӕй нӕхӕдӕг уарзӕм, уый тыххӕй ахуыр кӕнын хъуамӕ нӕхи зӕрдӕмӕ дӕр цӕуа. Абоны дунейы та уый ӕнцон нӕу. Бирӕтӕ, се ’рыгон бонты скъола кӕронмӕ кӕй нӕ фесты кӕнӕ ахуырыл ӕнувыд кӕй нӕ уыдысты, уымӕ гӕсгӕ ахуыр кӕнын нӕ уарзынц. Фӕлӕ мах ахуыр кӕны Иегъовӕ, ӕмӕ нын уый цы амоны, уый та нӕ тынг ӕхсызгонӕй хъӕуы. Ӕмбисӕндты 2:1—5 фыст ис: «Мӕ фырт, кӕд мын мӕ ныхӕстӕ райсай  ӕмӕ мын мӕ фӕдзӕхстытӕн дӕ риуы арф бынат скӕнай, кӕд дӕ хъус лӕмбынӕг дарай зондмӕ ӕмӕ дӕ зӕрдӕ саразай ӕмбаргӕдзинадмӕ; кӕд ӕмбарынадмӕ сидай ӕмӕ ӕмбаргӕдзинадмӕ хъӕр кӕнай; ӕвзистау ӕй кӕд зӕрдиагӕй агурай ӕмӕ йӕ ӕмбӕхст хӕзнатау ссарынмӕ тырнай, уӕд базондзынӕ, Иегъовӕйӕ тӕрсын цы у, уый ӕмӕ ссардзынӕ Хуыцауы тыххӕй раст зонындзинӕдтӕ».

4. Цы нысан кӕны «зӕрдӕ саразын» ӕмӕ нын цавӕр зондахаст баххуыс кӕндзӕн уымӕн?

⁴ Дӕ хъус ма ӕрдар, 1—4 стихтӕ нӕ цалдӕр хатты кӕй разӕнгард кӕнынц, цӕмӕй ӕрмӕст «райсыныл» ӕмӕ «арф бынат скӕныныл» ма архайӕм, фӕлӕ ма цӕмӕй «зӕрдиагӕй агурӕм» ӕмӕ «ссарынмӕ тырнӕм». Фӕлӕ нӕ уымӕ цы хъуамӕ разӕнгард кӕна? Равзарӕм дзы иу дзырдбаст, «дӕ зӕрдӕ сараз ӕмбаргӕдзинадмӕ», зӕгъгӕ. Иу бӕрӕгуаты дзырдӕуы, зӕгъгӕ, ацы фӕдзӕхст адӕймагӕй «ӕрмӕст ӕргом раздахын нӕ домы; уый амоны бӕлвырд зӕрдӕйы уагмӕ — ахуыр кӕнынмӕ зӕрдиагӕй тырнын». Ӕмӕ цӕмӕй кӕнгӕ у, Иегъовӕ нын цы амоны, уый базонынмӕ тырндзыстӕм ӕви нӕ? Нӕ зондахастӕй. «Хуыцауы тыххӕй раст зонындзинӕдтӕм» хъуамӕ кӕсӕм, куыд «ӕвзист» ӕмӕ «ӕмбӕхст хӕзнатӕм».

5, 6. а) Рӕстӕг куыд цӕуы, афтӕ нын тӕссаг цӕмӕй у ӕмӕ цы у нӕ бон саразын, цӕмӕй уый ма ’рцӕуа? ӕ) Библийы цы зонындзинады хӕзнатӕ ссардтам, уыдонмӕ ма ноджыдӕр цӕмӕн хъуамӕ ӕфтауӕм?

⁵ Ахӕм цӕстӕнгас нын уа, уый зын нӕу. Зӕгъӕм, Хуыцауы тыххӕй куы базыдтай, уӕд базыдтай Иегъовӕйы фӕнд дӕр — иузӕрдион адӕм зӕххыл Дзӕнӕты ӕнустӕм кӕй цӕрдзысты (Псалом 36:28, 29). Уыцы хабар фыццаг хатт куы фехъуыстай, уӕд ӕй, кӕй зӕгъын ӕй хъӕуы, банымадтай ӕцӕг хӕзнайыл, дӕ зонд ӕмӕ дын дӕ зӕрдӕ ныфс ӕмӕ циндзинадӕй чи байдзаг кодта, ахӕм хъуыддагыл. Ӕмӕ ныр та? Мыййаг, рӕстӕг куыд цӕуы, афтӕ дӕ хӕзнайӕн къаддӕр аргъ кӕнын нӕ райдыдтай? Уӕд бацархай дыууӕ хъуыддаджы саразыныл. Фыццаг уый, ӕмӕ-иу рӕстӕгӕй-рӕстӕгмӕ дӕ зӕрдыл ӕрлӕууын кӕн, цӕй тыххӕй аргъ кӕныс, Иегъовӕ дын кӕй бацамыдта, уыцы ӕцӕгдзинӕдтӕй алкӕцыйӕн дӕр, бирӕ азты размӕ кӕй базыдтай, уыдонӕн дӕр.

⁶ Дыккаг уый, ӕмӕ дӕ хӕзнатӕ фылдӕрӕй-фылдӕр кӕн. Цӕвиттон, рӕсугъд зынаргъ дур скъахтай, уӕд ӕй дӕ дзыппы нывӕрдзынӕ ӕмӕ дӕхицӕн дарддӕр ацӕудзынӕ? Ӕви арфдӕр къахдзынӕ, чи зоны ма дзы ноджы ис, зӕгъгӕ? Хуыцауы Ныхас йедзаг у ӕцӕгады зынаргъ дуртӕ ӕмӕ хӕзнатӕй. Цасфӕнды дзы ма ссарай, уӕддӕр ма дзы уыдзӕн (Ромӕгтӕм 11:33). Ӕцӕгады зынаргъ дур куы ссарай, уӕд ахъуыды кӕн: цӕмӕн ис зӕгъӕн, ӕмӕ хӕзна у? Иегъовӕйы миниуджытӕ кӕнӕ  мын йӕ фӕндтӕ хуыздӕр бамбарынӕн ӕххуыс кӕны? Йесойы къахфӕдтыл цӕуынӕн мын чи баххуыс кӕндзӕн, ахӕм разамынд мын дӕтты? Ахӕм фарстатыл куы хъуыды кӕнай, уӕд дын уый баххуыс кӕндзӕн, Иегъовӕ дын цы амоны, уый фылдӕр уарзынӕн.

Цы ӕцӕгад амонӕм, уый кӕй уарзӕм, уый ӕвдисӕм

7, 8. Цы ис саразӕн, цӕмӕй иннӕтӕ уыной, Библийӕ цы ӕцӕгад базыдтам, уый кӕй уарзӕм? Ӕрхӕсс цӕвиттон.

⁷ Иннӕты ахуыргӕнгӕйӕ нӕ бон куыд у ӕвдисын, Хуыцауы Ныхасӕй цы базыдтам, уый кӕй уарзӕм? Йесойы фӕзмгӕйӕ адӕмӕн хъусын кӕнӕм ӕмӕ сын амонӕм, ӕрмӕстдӕр Библийы цы фыст ис, уый. Фӕстаг рӕстӕджы Хуыцауы адӕмы ӕгас зӕххыл баразӕнгард кодтой, цӕмӕй хъусынгӕнгӕйӕ Библийӕ фылдӕр пайда кӕной. Кӕд уыцы уынаффӕ ды дӕр дӕ зӕрдӕмӕ айстай, уӕд ууыл архай, цӕмӕй адӕймаг уына, Библийӕ цы хъуыдытӕ кӕсыс, уыдонӕн дӕхӕдӕг дӕр стыр аргъ кӕй кӕныс (Матфейы 13:52).

⁸ Цӕвиттон, фарон Нью-Йорчы террористты фыдракӕнды фӕстӕ нӕ хотӕй иу куы хъусын кодта, уӕд-иу, кӕуыл ӕмбӕлд, уыдонӕн-иу бакаст Псалом 45:2, 12. Фыццаг уал-иу сӕ бафарста, уыцы ӕвирхъау бӕллӕхы фӕстӕ сӕхи куыд хатынц, уымӕй. Лӕмбынӕг-иу сӕм байхъуыста, бузныг-иу сын загъта, стӕй-иу сӕ бафарста: «Гӕнӕн ис, ӕмӕ дын бакӕсон ацы зын рӕстӕджы мӕнӕн Библийӕ цы ныхӕстӕ баххуыс кодтой, уыдон?» Иу цалдӕрӕй не сразы сты, ӕндӕр иннӕтимӕ тынг хорз аныхас кодта. Ӕрыгӕттимӕ ныхас кӕнгӕйӕ та уыцы хо арӕх фӕзӕгъы: «Ӕз Библи ахуыр кӕнын 50 азы бӕрц, ӕмӕ зоныс, мӕ бон цы у фидарӕй зӕгъын? Иу ахӕм зындзинадыл дӕр нӕма сӕмбӕлдтӕн, ӕмӕ йӕ ацы чиныджы ӕххуысӕй аскъуыддзаг кӕнын мӕ бон ма бауыдаид». Адӕмимӕ ӕргомӕй, зӕрдиагӕй кӕй ныхас кӕнӕм, уый фӕрцы уыдон уынынц, Хуыцауы Ныхасӕй цы ӕцӕгад базыдтам, уымӕн кӕй аргъ кӕнӕм ӕмӕ йӕ кӕй уарзӕм, уый (Псалом 118:97, 105).

9, 10. Цӕуыл ӕууӕндӕм, уымӕй нӕ куы фӕрсой, уӕд, Библи йӕхӕдӕг цы дзуры, уый цӕмӕн хъӕуы ӕвдисын?

⁹ Адӕм нӕ нӕ уырнындзинӕдтӕй куы фӕфӕрсынц, уӕд нын вӕййы хорз фадат, Хуыцауы  Ныхас кӕй уарзӕм, уый равдисынӕн. Йесойы фӕзмгӕйӕ, ӕрмӕст нӕхи ныхӕстӕй нӕ дӕтдзыстӕм дзуапп (Ӕмбисӕндтӕ 3:5, 6). Фӕлӕ Библи йӕхӕдӕг цы дзуры, уый сын ӕвдисдзыстӕм. Мыййаг тӕрсыс, исчи дӕм ахӕм фарста куы радта, ӕмӕ йын дӕ бон дзуапп радтын куы не бауа? Уӕд ӕркӕс, цавӕр дыууӕ хъуыддаджы у дӕ бон саразын, цӕмӕй афтӕ ма рауайа.

¹⁰ Хорз-иу бацӕттӕ кӕн. Апостол Петр фыста: «[Чырыстийы] — нӕ Хицауы цытджын-иу дарут уӕ мидзӕрдӕйы! — Цӕттӕ ут кӕддӕриддӕр ӕмӕ кӕмӕндӕриддӕр, сымахӕй дзуапп чи агура уӕ [ныфсы] тыххӕй, дзуапп раттын фӕлмасӕй ӕмӕ уӕзданӕй» (1 Петры 3:15, НФ). Хуыцауӕн афтӕ цӕмӕн кувыс, уый дӕ бон бамбарын кӕнын у? Зӕгъӕм, искӕй фӕнды базонын, Библимӕ гӕсгӕ раст чи нӕу, ахӕм ӕгъдау цӕуылнӕ ӕххӕст кӕныс, уый. Уӕд хорз уаид, афтӕ куы нӕ дзуриккам, «уый мӕ дины ныхмӕ у», зӕгъгӕ. Ахӕм дзуапп афтӕ бамбарӕн ис, цыма иннӕтӕ дӕ бӕсты скъуыддзаг кӕнынц, цы ӕмӕ куыд араздзынӕ, уый, ӕмӕ уӕд афтӕ рауайдзӕн, цыма цавӕрдӕр сектӕмӕ бахаудтӕ. Хуыздӕр уаид зӕгъын, зӕгъгӕ, «уый раст нӕу Хуыцауы Ныхас, Библимӕ гӕсгӕ», кӕнӕ «уый мӕ Хуыцауы зӕрдӕмӕ нӕ цӕуы». Стӕй бӕлвырд бамбарын кӕн, афтӕ цӕмӕн у, уый (Ромӕгтӕм 12:1).

11. Хуыцауы Ныхасы ӕцӕгады тыххӕй нӕ куы фӕрсой, уӕд дзуапп раттынмӕ цавӕр ӕххуысчиныджы руаджы уыдзыстӕм цӕттӕ?

¹¹ Кӕд хатыс, ӕмӕ цӕттӕ нӕ дӕ, уӕд хорз уаид рӕстӕг рахицӕн кӕнын ӕмӕ равзарын брошюрӕ «Цӕуыл ис адӕмимӕ Библийӕ ныхас кӕнӕн»? * Адӕм арӕх цы фарстатӕ фӕдӕттынц, уыдон рахицӕн кӕн, ӕмӕ сӕм чи хауы, уыцы библион стихтӕй цалдӕр бахъуыды кӕн. Ацы брошюрӕ ӕмӕ дӕ Библи алкӕддӕр демӕ хӕсс. Ма ӕфсӕрмы кӕн дыууӕйӕ дӕр пайда кӕнын, зӕгъ-иу, кӕй дӕм ис, алыхуызон фарстатӕн Библийӕ дзуапп кӕй руаджы ис ссарӕн, ахӕм ӕххуысчиныг.

12. Цавӕрдӕр библион фарстайӕн дзуапп куы нӕ зонӕм, уӕд цы у нӕ бон зӕгъын?

¹² Ма-иу стыхс. Зӕххыл иу ахӕм адӕймаг дӕр нӕй, ӕмӕ алы фарстайӕн дӕр дзуапп чи зона. Уӕдӕ дӕм исчи ахӕм фарста куы радта, дзуапп кӕмӕн нӕ зоныс, уӕд дӕ бон у зӕгъын: «Бузныг дын, ахӕм цымыдисаг фарста кӕй радтай. Раст зӕгъгӕйӕ йын дзуапп нӕ зонын, фӕлӕ мӕ бон у фидарӕй зӕгъын, ацы фарстайӕн Библийы ӕнӕмӕнг кӕй ис дзуапп. Мӕнӕн мӕ зӕрдӕмӕ тынг цӕуы Библи иртасын, ӕмӕ дын дӕ фарстайӕн дӕр дзуапп ссардзынӕн, ӕмӕ та дӕм уӕд ӕрбацӕудзынӕн». Афтӕ ӕргом ӕмӕ уӕзданӕй куы дзурӕм, уӕд уый руаджы, гӕнӕн ис, нӕ ныхас адарддӕр кӕнӕм (Ӕмбисӕндтӕ 11:2).

Цы адӕмы ахуыр кӕнӕм, уыдоны уарзӕм

13. Кӕмӕн хъусын кӕнӕм, уыцы адӕмӕй алкӕй тыххӕй дӕр нӕ ныфс цӕуыл хъуамӕ дарӕм?

¹³ Бӕгуыдӕр, Йесо уарзта, кӕй ахуыр кодта, уыдоны. Куыд ӕй у нӕ бон уыцы хъуыддаджы фӕзмын? Нӕ алфамбылай цӕрӕг адӕммӕ куыдфӕндыйы цӕстӕй хъуамӕ ма кӕсӕм. Раст у, «Ӕппӕтылхӕцӕг Хуыцауы... стыр боны» хӕст ӕввахсӕй-ӕввахсдӕр кӕны, ӕмӕ адӕмӕй бирӕтӕ куынӕг ӕрцӕудзысты (Раргомад 16:14; Иереми 25:33). Фӕлӕ мах нӕ зонӕм,  удӕгасӕй чи баззайдзӕн ӕмӕ чи амӕлдзӕн. Уый сбӕлвырд уыдзӕн фидӕны. Тӕрхонгӕнӕг та уыдзӕн, Иегъовӕ кӕй снысан кодта, уый, Йесо Чырысти. Цалынмӕ уыцы тӕрхон хаст не ’рцӕуа, уӕдмӕ хъуамӕ нӕ ныфс дарӕм, алы адӕймаг дӕр Иегъовӕйы лӕггадгӕнӕг кӕй суыдзӕн (Матфейы 19:24—26; 25:31—33; Куыстытӕ 17:31).

14. а) Адӕмыл нӕ зӕрдӕ риссы ӕви нӕ, уый сбӕрӕг кӕнын нӕ бон куыд у? ӕ) Иннӕтыл кӕй мӕт кӕнӕм, уый цавӕр хъуыддӕгтӕй бӕрӕг уыдзӕн?

¹⁴ Уӕдӕ нӕ Йесойау адӕмы уавӕр ӕмбарын дӕр фӕнды. Нӕ бон у ахъуыды кӕнын: ацы дунейы мӕнгард дин, политикӕ ӕмӕ экономикӕйы хъуыддӕгтӕй сайды чи фӕци, уыцы адӕмыл мӕ зӕрдӕ риссы? Цы хорз хабар сын хъусын кӕнӕм, уый сӕм нымады дӕр куы нӕ вӕййы, уӕд мӕ фӕфӕнды бамбарын, сӕхи афтӕ цӕмӕн дарынц? Рох мӕ нӕу, мӕнӕн дӕр ӕмӕ ма Иегъовӕйы иннӕ лӕггадгӕнджытӕй дӕр бирӕтӕн кӕддӕр ӕцӕгадмӕ ахӕм ахаст кӕй уыд? Мӕ ныхӕстӕ адӕмы зӕрдӕмӕ куыд хъарой, ууыл архайын? Ӕви сыл мӕ къух ауыгътон, зӕгъгӕ, уыдонӕй ницы рауайдзӕн? (Раргомад 12:9). Адӕм уый куы хатой, ӕмӕ сыл нӕ зӕрдӕ риссы, уӕд гӕнӕн ис хорз хабар айсой (1 Петры 3:8). Афтӕ ма, иннӕтыл нӕ зӕрдӕ куы рисса, уӕд уацамынды кӕуыл ӕмбӕлӕм, уыцы адӕмыл фылдӕр мӕт кӕндзыстӕм. Цы фарстатӕ сӕм ис ӕмӕ цӕуыл тыхсынц, уый нӕ бон у нӕхимӕ ныффыссын. Дыккаг хатт сӕм куы бацӕуӕм, уӕд сын нӕ бон у зӕгъын, уӕ ныхӕстыл уын хъуыды кодтон, зӕгъгӕ. Ӕмӕ кӕд уыцы тӕккӕ истӕуыл тыхсой, уӕд сын нӕ бон уыдзӕн баххуыс кӕнын дӕр.

15. Адӕммӕ хорз миниуджытӕ цӕмӕн хъуамӕ уынӕм ӕмӕ уый аразын нӕ бон куыд у?

¹⁵ Йесойау мах дӕр адӕмӕн хъуамӕ уынӕм сӕ хорз миниуджытӕ. Чи зоны, ныййарӕг иунӕгӕй хъомыл кӕны йӕ сывӕллӕтты. Кӕнӕ фыд хидкалгӕйӕ кусы, цӕмӕй йӕ бинонты фӕдара. Йе та ацӕргӕ адӕймаджы фӕнды Хуыцауы тыххӕй базонын. Уацамынды адӕммӕ ахӕм хорз миниуджытӕ фӕхатӕм ӕмӕ сӕ уый тыххӕй раппӕлӕм? Уӕд мах архайӕм сӕ зӕрдӕтӕм фӕндаг ссарыныл ӕмӕ нын афтӕмӕй чи зоны бантыса Хуыцауы Паддзахады тыххӕй фехъусын кӕнын дӕр (Куыстытӕ 26:2, 3).

Ӕнӕ сӕрныллӕгдзинадӕй уарзӕн нӕй

16. Кӕмӕн хъусын кӕнӕм, уыдонимӕ алкӕддӕр фӕлмасӕй ӕмӕ уӕзданӕй ныхас кӕнын ахсджиаг цӕмӕн у?

¹⁶ Кӕй ахуыр кӕнӕм, уыцы адӕмы куы уарзӕм, уӕд нӕ хъус дардзыстӕм Библийы зондджын ныхӕстӕм: «Зонынад сӕрыстыр кӕны, уарзондзинад та фӕдзӕхсы [«ахуыр кӕны», НФ]» (1 Коринфӕгтӕм 8:1). Ӕмбисонды зонындзинӕдтӕ Йесомӕ уыд, фӕлӕ уый сӕрбӕрзонд никуы уыди. Уӕдӕ хъусын кӕнгӕйӕ дӕхи хиз быцӕутӕй кӕнӕ схъӕл ныхасӕй. Мах фӕнды, цӕмӕй адӕмы зӕрдӕ арӕм, ӕмӕ сын баххуыс кӕнӕм, нӕхӕдӕг афтӕ тынг цы ӕцӕгад уарзӕм, уый сӕ зӕрдӕмӕ айсынӕн (Колоссӕгтӕм 4:6). Дӕ зӕрдыл дар, Петр чырыстӕтты кӕй фӕдзӕхста, цӕмӕй сӕ уырнындзинады сӕрыл дзурой «фӕлмасӕй ӕмӕ уӕзданӕй» (1 Петры 3:15, НФ). Фӕлмас ӕмӕ уӕздан куы уӕм, уӕд гӕнӕн ис иннӕты дӕр бафӕнда, мах цы Хуыцауӕн лӕггад кӕнӕм, уый тыххӕй базонын.

17, 18. а) Хъусын кӕнынмӕ куыд цӕттӕ стӕм, уый иуӕй-иуты зӕрдӕмӕ куы нӕ цӕуа, уӕд нын уымӕ цавӕр ахаст хъуамӕ уа? ӕ) Библи чи ахуыр кӕны, уыцы адӕмӕн, цы рагон ӕвзӕгтыл фыст уыд, уыдон зонын ӕнӕмӕнг цӕуылнӕ у?

¹⁷ Адӕмы нӕ зонындзинӕдтӕй кӕнӕ нӕ ахуырадӕй дисы хъуамӕ ма ӕфтауӕм. Кӕд дӕ территорийы искӕй нӕ фӕнда, уӕлдӕр ахуырад кӕнӕ цавӕрдӕр кадджын ном кӕмӕн нӕй, ахӕм адӕймагмӕ хъусын, уӕддӕр дӕ ныфс ма асӕттӕд. Йесо ӕппындӕр нӕ мӕт кодта, йӕ рӕстӕджы цы зындгонд раввинты скъолатӕ уыд, уыдонӕй кӕй никӕцы фӕци каст, ууыл; нӕдӕр ӕй фӕндыд иннӕтау адӕмы йӕ бирӕ зонындзинӕдтӕй дисы ’фтауын (Иоанны 7:15).

¹⁸ Чырыстӕттӕн цыфӕнды уӕлдӕр ахуырадӕй ахсджиагдӕр сты сӕрныллӕгдзинад ӕмӕ уарзондзинад. Мах хъусын кӕнынмӕ цӕттӕ кӕны Номдзыд Ахуыргӕнӕг — Иегъовӕ (2 Коринфӕгтӕм 3:5, 6). Чырыстон дунейы иуӕй-иу разамонджытӕ цыфӕнды ма дзурой, уӕддӕр мах нӕ хъӕуы Библийы рагон ӕвзӕгтӕ ахуыр кӕнын, цӕмӕй Хуыцауы Ныхасы ахуыргӕнджытӕ суӕм. Иегъовӕ Библи ахӕм ӕнцонӕмбарӕн, бӕлвырд ӕвзагӕй ныффыссын кодта, ӕмӕ дзы цы арф хъуыдытӕ ис, уыдон алкӕмӕндӕр йӕ бон у бамбарын. Уыдон  ӕнӕивгӕйӕ баззадысты, Библи цы сӕдӕгай ӕвзӕгтӕм ратӕлмац кодтой, уым дӕр. Уӕдӕ рагон ӕвзӕгтӕ зонын кӕд цӕмӕйдӕрты хорз у, уӕддӕр ӕнӕмӕнг нӕу. Адӕймаг ӕндӕр ӕвзӕгтӕ кӕй зоны, уымӕй сӕрыстыр куы уа, уӕд гӕнӕн ис ферох кӕна, ӕцӕг чырыстӕттӕн ахсджиаг цы у, уый — ахуыр кӕнынмӕ зӕрдӕргъӕвд кӕй хъуамӕ уа (1 Тимофеймӕ 6:4).

19. Цӕмӕн ис зӕгъӕн, ӕмӕ хъусынгӕнгӕйӕ мах лӕггад кӕнӕм адӕмӕн?

¹⁹ Уӕвгӕ, сӕрныллӕг куы нӕ уӕм, уӕд нӕ бон нӕ уыдзӕн, Чырысти нын нӕ бӕрны цы хъуыддаг бакодта, уый кӕнын. Арӕх нӕ ныхмӕ фӕцӕуынц, нӕ нӕм фӕхъусынц, суанг нӕ фӕдыл дӕр фӕзилынц (Иоанны 15:20). Фӕлӕ уӕддӕр ӕнувыдӕй кӕй лӕггад кӕнӕм, уымӕй ӕххӕст кӕнӕм ахсджиаг хъуыддаг. Кӕд дарддӕр дӕр уыцы хъуыддаджы иннӕтӕн сӕрныллӕгӕй лӕггад кӕнӕм, уӕд уымӕй фӕзмӕм, Йесо Чырыстийӕн адӕммӕ цы уарзондзинад уыд, уый. Ахъуыды ма кӕн: иу мин адӕймаджы нӕм куы нӕ байхъуса кӕнӕ нӕ ныхмӕ куы цӕуа, фӕлӕ се ’хсӕн иу сӕрныллӕг адӕймаг куы ссарӕм, уӕд нӕ куыст уый аргъ нӕ уыдзӕн? Куыннӕ! Уӕдӕ дарддӕр дӕр кӕй хъусын кӕнӕм, уымӕй, зӕгъӕн ис, ӕмӕ ӕнувыдӕй лӕггад кӕнӕм, цы сӕрныллӕг адӕмы ма ссардзыстӕм, уыдонӕн. Нӕ бон у фидарӕй ӕууӕндын, кӕроны ӕрцыдмӕ ма Иегъовӕ ӕмӕ Йесойы руаджы бирӕ хорз адӕм кӕй ссардзыстӕм ӕмӕ сын кӕй баххуыс кӕндзыстӕм (Аггей 2:7).

20. Куыд ис иннӕты нӕхи цӕвиттонӕй ахуыр кӕнӕн?

²⁰ Иннӕтӕн лӕггад кӕнын нӕ кӕй фӕнды, уый ма бӕрӕг уыдзӕн, нӕхи цӕвиттонӕй дӕр сӕ куы ахуыр кӕнӕм, уӕд. Зӕгъӕм, фӕнды нӕ адӕмӕн бамбарын кӕнын, Иегъовӕйӕн, «амондджын Хуыцауӕн» лӕггад кӕнын ӕппӕты хуыздӕр, иууыл ӕхсызгондӕр цардвӕндаг кӕй у, уый (1 Тимофеймӕ 1:11). Цавӕр уагахаст нын ис, стӕй нын нӕ сыхӕгтимӕ, не ’мкъласонтимӕ кӕнӕ не ’мкусджытимӕ цавӕр ахастытӕ ис, уымӕ гӕсгӕ сӕ бон у зӕгъын, амондджын ӕмӕ райгонд кӕй стӕм? Афтӕ ма, Библи кӕимӕ ахуыр кӕнӕм, уыдонӕн ӕмбарын кӕнӕм, чырыстон ӕмбырд ацы уазал фыддунейы кӕй у ӕдас ӕмӕ хъарм бынат. Не ’мбырды алкӕйдӕр кӕй уарзӕм ӕмӕ нӕ уд кӕй хъарӕм, цӕмӕй не ’хсӕн фарн уа, уый уынынц? (1 Петры 4:8).

21, 22. а) Фылдӕр лӕггад кӕнынӕн нын цы гӕнӕнтӕ ис, ууыл куы ахъуыды кӕнӕм, уӕд цы уыдзӕн нӕ бон саразын? ӕ) Иннӕ статьяты цы равзардзыстӕм?

²¹ Зӕрдӕйӕ нӕ кӕй фӕнды лӕггад кӕнын, уымӕ гӕсгӕ хаттӕй-хатт нӕ уавӕртыл дӕр фӕхъуыды кӕнӕм. Бирӕтӕ уыцы фарстамӕ ӕнӕзӕрдӕхудтӕй ӕркастысты ӕмӕ сбӕрӕг кодтой, сӕ бон кӕй у фылдӕр аразын: кӕнӕ ӕххӕстрӕстӕг лӕггад кӕнын райдайын кӕнӕ, ӕххуыс кӕм хъӕуы, ахӕм рӕттӕм ацӕуын. Иннӕтӕ та ӕндӕр ӕвзаг ахуыр кӕнынц, цӕмӕй сӕм ӕндӕр бӕстӕтӕй цӕрынмӕ чи ӕрлидзы, уыцы адӕмӕн хъусын кӕной. Кӕд дӕ дӕ уавӕртӕ амонынц фылдӕр лӕггад кӕнын, уӕд Хуыцаумӕ скув ӕмӕ ууыл лӕмбынӕг ахъуыды кӕн. Дӕхи Хуыцауӕн лӕггад кӕнынӕн куы раттай, уӕд ссардзынӕ стыр циндзинад, ӕхцондзинад ӕмӕ удӕнцой (Екклесиаст 5:12).

²² Цӕй уӕдӕ алы хъуыддаджы дӕр фӕзмӕм Йесо Чырыстийы ӕмӕ тынгдӕр уарзӕм, цы ӕцӕгад амонӕм ӕмӕ кӕй ахуыр кӕнӕм, уыцы адӕмы. Ахӕм уарзондзинад куы рӕзын кӕнӕм нӕ зӕрдӕйы ӕмӕ йӕ хъуыддагӕй куы бӕлвырд кӕнӕм, уӕд зӕгъӕн уыдзӕн, ӕмӕ Чырыстийы хуызӕн ахуыргӕнджытӕ уӕм, ууыл цадӕггай ахуыр кӕнын райдыдтам. Фӕлӕ ма нӕ ноджыдӕр цы кӕнын хъӕуы? Иннӕ статьяты равзардзыстӕм, Йесо иннӕты ахуыр кӕнгӕйӕ цавӕр мадзӕлттӕй пайда кодта, уыдонӕй иуӕй-иутӕ.

[Фиппаинаг]

Цавӕр дзуапп ратдзынӕ?

• Цӕмӕ гӕсгӕ ис зӕгъӕн, ӕмӕ нӕ бон у ӕппӕты дӕсны ахуыргӕнӕг Йесойы фӕзмын?

• Библийӕ цы базыдтам, уый кӕй уарзӕм, уый ӕвдисын нӕ бон куыд у?

• Цасфӕнды бирӕ ма базонӕм, уӕддӕр нӕ сӕрныллӕгдзинадыл кусын цӕмӕн хъӕуы?

• Кӕй ахуыр кӕнӕм, уыцы адӕмы кӕй уарзӕм, уый цавӕр хъуыддӕгтӕй бӕрӕг уыдзӕн?

[Фарстатӕ ахуыр кӕнынӕн]

[Нывтӕ 12 фарсыл]

Хорз цӕттӕ кӕн.

[Нывтӕ 13 фарсыл]

«Хуыцауы тыххӕй зонындзинӕдтӕ» хӕзнатау куы ӕмбырд кӕнай, уӕд дӕ бон уыдзӕн Библийы руаджы дзуапп дӕттын.

[Ныв 14 фарсыл]

Адӕмӕн хорз хабар кӕй хъусын кӕнӕм, уымӕй ӕвдисӕм, кӕй сӕ уарзӕм, уый.