Библи ахуыр кӕнӕм, цӕмӕй хорз ахуыргӕнджытӕ уӕм

«Ууыл хъуыды кӕн, уый уӕд ӕдзухдӕр дӕ мӕт, цӕмӕй дын де ’нтыстдзинад алчидӕр уына. Ӕппынӕдзух кӕс дӕхимӕ ӕмӕ куыд амоныс, уымӕ» (1 ТИМОФЕЙМӔ 4:15, 16, НД).

1. Цы ис зӕгъӕн рӕстӕг ӕмӕ нӕ Библийы ахуыры тыххӕй?

«АЛЦӔМӔН дӕр ис йӕхи рӕстӕг»,— дзырдӕуы Библийы, Екклесиасты 3:1. Афтӕ зӕгъӕн ис, Библи нӕхӕдӕг куы фӕахуыр кӕнӕм, уый тыххӕй дӕр. Бирӕтӕн Хуыцауы хъуыддӕгтыл хъуыды кӕнын зын вӕййы, уымӕн хорз рӕстӕг куы нӕ вӕййы кӕнӕ сӕ куы фӕхъыгдарынц, уӕд. Зӕгъӕм, изӕрӕй куыствӕлладӕй ӕрбацыдтӕ, ӕхсӕвӕр бахордтай, стӕй телевизоры раз фӕлмӕн къӕлӕтджыны сбадтӕ — бафӕнддзӕн ма дӕ исты ахуыр кӕнын? Куыннӕ стӕй. Уӕдӕ цы бачындӕуа? Цӕмӕй нын Библийы ахуыр исты ахъаз фӕуа, уый тыххӕй уымӕн хъуамӕ уа ӕмбӕлон рӕстӕг дӕр ӕмӕ бынат дӕр.

2. Библи ахуыр кӕнын фылдӕр хатт хуыздӕр кӕд вӕййы?

² Бирӕтӕм Библи ахуыр кӕнын хуыздӕр кӕсы райсомӕй, уымӕн ӕмӕ уӕд сӕ сӕр хуыздӕр фӕкусы. Иннӕтӕ та Хуыцауы Ныхас ахуыр кӕнынӕн иугыццыл рӕстӕг ссарынц сихорӕй. Ӕркӕсӕм цалдӕр цӕвиттонмӕ, Хуыцауы Ныхас ахуыр кӕнын кӕд хуыздӕр у, уымӕн. Рагон Израилы паддзах  Давид фыста: «Лӕвар кӕн мӕнӕн раджы [«райсомӕй», НД] фехъусын Дӕ хорзӕх, уымӕн ӕмӕ ме ’нхъӕлцаудзинад ӕвӕрын Дӕуыл. Бацамон мын фӕндаг, кӕцыйыл мӕн цӕуын хъӕуы, уымӕн ӕмӕ Дӕумӕ хӕссын ӕз мӕ уды» (Псалом 142:8). Пехуымпар Исай дӕр ацы хъуыддагмӕ ахӕм цӕстӕй каст. Уый загъта: «Дунедарӕг Иегъовӕ мын радта йӕ ахуыргӕнинӕгты ӕвзаг, цӕмӕй зонон, ӕфхӕрд адӕймаджы ныхасӕй куыд бафидар кӕнын хъӕуы, уый. Хъал мӕ кӕны алы райсом; мӕ хъустӕ мын байгом кӕны, цӕмӕй хъусон, ахуыргӕнинӕгтӕ куыд фӕхъусынц, афтӕ». Хъуыддаг афтӕ у, ӕмӕ Библи куы фӕахуыр кӕнӕм ӕмӕ Иегъовӕмӕ куы фӕкувӕм, уӕд нӕ сӕр хъуамӕ уа улӕфт, ӕмӕ уӕлдай нӕу, райсомӕй уа, бонӕй уа ӕви изӕрӕй (Исай 50:4, 5; Псалом 5:4; 87:14).

3. Библи ахуыргӕнгӕйӕ цы базонӕм, уый цӕмӕй нӕ зӕрдӕмӕ хъара, уый тыххӕй цы хъӕуы?

³ Стӕй, Библи ахуыргӕнгӕйӕ цы базонӕм, уый цӕмӕй нӕ зӕрдӕмӕ хъара, уый тыххӕй хъуамӕ фӕлмӕн къӕлӕтджыны кӕнӕ диваныл ма сбадӕм. Уӕд нӕ хъуыдытӕ нӕ дзӕгъӕлтӕ кӕндзысты. Ахуыры рӕстӕджы сӕр хъуамӕ дзӕбӕх куса, ахӕм фӕлмӕн ран бадгӕйӕ та уый зын уыдзӕн. Афтӕ ма нӕ ахуыры ӕмӕ хъуыды кӕныны рӕстӕджы хъуамӕ мацы хъыгдара. Радио, телевизор ӕмӕ сывӕллӕтты хъӕрмӕ ницы сахуыр кӕндзынӕ. Йесойы-иу хъуыды кӕнын куы фӕндыд, уӕд-иу ацыд, кӕм-иу ӕй ничи хъыгдардтаид, ахӕм ранмӕ. Уый ма дзырдта, зӕгъгӕ, кувынӕн хъӕуы хибар ран (Матфейы 6:6; 14:13; Маркы 6:30—32).

Библи ахуыр кӕнӕм, цӕмӕй фарстытӕн дзуапп дӕттӕм

4, 5. Брошюрӕ «Цы домы?» хорз ӕххуыс цӕмӕй у?

⁴ Библийы ахуырӕй зӕрдӕ тынгдӕр уӕд фӕрайы, исты фарст бӕстондӕр равзарынӕн алыхуызон ӕххуысчингуытӕ куы фӕиртасӕм,— уӕлдайдӕр та, ӕцӕгдӕр цыдӕр базонын кӕй фӕнды, уыдоны фарстытӕн дзуапп куы фӕагурӕм (1 Тимофеймӕ 1:4; 2 Тимофеймӕ 2:23). Цымыдисгӕнӕг адӕмӕй бирӕтӕ раздӕр райдайынц ахуыр кӕнын брошюрӕ, «Хуыцау нӕ цы домы» *, зӕгъгӕ (ис 261 ӕвзагыл). Ацы брошюрӕ ӕнӕхъӕнӕй дӕр ӕнцайы Библийыл; фыст у хуымӕтӕг ӕвзагыл; цы дзы ис, уый у ӕнӕ уӕлдай ныхасӕй, бӕлвырд. Ӕнцонтӕй дзы базонӕн  ис, Хуыцау раст диныл цы нымайы, уый. Фӕлӕ стыр кӕй нӕу, уымӕ гӕсгӕ дзы алы темӕ дӕр бӕстонӕй райхалӕн нӕй. Зӕгъӕм, Библи кӕимӕ ахуыр кӕныс, уый дӕм искӕцы урокӕй вазыгджын фарстытӕ куы радта, уӕд ын кӕм ис ӕрмӕг ссарӕн?

⁵ «Хъахъхъӕнӕн мӕсыджы литературӕ» компакт-дискыл йе ’взагыл кӕмӕн ис, уыдон дзы базондзысты бирӕ цыдӕртӕ. Фӕлӕ компьютер кӕмӕ нӕй, кӕнӕ уыцы компакт-диск кӕй ӕвзагыл нӕй, уыдон та куыд кӕной? Равзарӕм брошюрӕ «Цы домы»-йӕ дыууӕ урочы, ӕмӕ базонӕм, куыд ис Библи хуыздӕр бамбарӕн ӕмӕ искӕй фарстӕн бӕстондӕр дзуапп дӕттӕн — уӕлдайдӕр та нӕ куы фӕрсой, чи у Хуыцау, кӕнӕ, Йесо ӕцӕгӕй чи уыд, зӕгъгӕ (Рацыд 5:2; Лукайы 9:18—20; 1 Петры 3:15, НФ).

Чи у Хуыцау?

6, 7. а) Хуыцау чи у, уый фӕдыл цавӕр фарст сӕвзӕры? ӕ) Иу дины кусӕг лекци куы каст, уӕд дзы цавӕр ахсджиаг хъуыддаг ауагъта?

⁶ Брошюрӕ «Цы домы?»-йы 2-аг урочы ис дзуапп ахсджиаг фарстӕн, чи у Хуыцау, зӕгъгӕ. Уый тынг ахсджиаг фарст у, уымӕн ӕмӕ адӕймаг ӕцӕг Хуыцауы куы нӕ зона кӕнӕ, кӕй ис, ууыл куы дызӕрдыг кӕна, уӕд ын куыд кувдзӕн?! (Ромӕгтӕм 1:19, 20; Дзуттытӕм 11:6). Ӕгас дунейы дӕр Хуыцауы тыххӕй ис бирӕ алыхуызон хъуыдытӕ (1 Коринфӕгтӕм 8:4—6). Алы дины философи дӕр, Хуыцау чи у, уый йӕхирдыгонау ӕмбарын кӕны. Аргъуантӕн сӕ фылдӕр Хуыцауы нымайынц Ӕртӕиууоныл. АИШ-ы иу зындгонд дины кусӕг йӕ лекци «Хуыцауы зоныс?», зӕгъгӕ, куы каст, уӕд Хуыцауы ном йӕ дзыхӕй  иу хатт дӕр не схаудта, кӕд цалдӕр хатты Дзуттаг Фыстытӕй стихтӕ бакаст, уӕддӕр. Цы Библийы тӕлмац ӕм уыд, уым «Иегъовӕ», кӕнӕ «Яхвӕйы» бӕсты фыст ис дымидисон ӕмӕ ӕбӕлвырд дзырд «Хицау».

⁷ Уыцы дины кусӕг Иеремийы 31:33, 34 куы каст, уӕд дзы иу ахсджиаг хъуыдды ауагъта: «Нал ахуыр кӕндзӕн иу иннӕйы ӕмӕ ӕфсымӕр ӕфсымӕры, ӕмӕ нал дзурдзысты: „Базон Дунедарӕджы“ [рагон дзуттаг къухфыстыты — „базон Иегъовӕйы“], уымӕн ӕмӕ Мӕ хуымӕтӕг адӕймагӕй дзырддзӕугӕйӕ се ’ппӕт дӕр зондзысты,— дзуры Дунедарӕг [рагон дзуттаг къухфыстыты — „Иегъовӕ“]». Ацы тӕлмацӕй айстӕуыд, Хуыцауы ӕндӕр хуыцӕуттӕй чи хицӕн кӕны, уыцы ном — Иегъовӕ (Псалом 82:19, МГТ).

8. Хуыцаумӕ ӕнӕмӕнг йӕ номӕй дзурын кӕй хъӕуы, уый цӕмӕй у бӕрӕг?

⁸ Псаломы 8:10 Г. Мчедловы тӕлмацӕй бӕрӕг у, Хуыцаумӕ йӕ номӕй кӕй хъӕуы дзурын: «Иегъовӕ, нӕ Хицау! Цӕй стыр у Дӕ ном ӕгас зӕххыл!» «Ног Фӕдзӕхст ӕмӕ Псалтиры» та афтӕ у: «Хицау, нӕ Хуыцау! куыд бӕрзонд у Дӕ ном ӕппӕт зӕххыл!» Фӕлӕ айразмӕйы статьяйы куыд дзырдӕуыд, афтӕмӕй «Хуыцауы базонынӕн» хъӕуы йӕ Ныхас ахуыр кӕнын. Хуыцаумӕ йӕ номӕй дзурын кӕй хъӕуы, уымӕн цавӕр ӕххуысчингуыты ис дзуапп ссарӕн? (Ӕмбисӕндтӕ 2:1—6).

9. а) Хуыцаумӕ йӕ номӕй дзурын кӕй хъӕуы, уый тыххӕй кӕм ис бакӕсӕн? ӕ) Бирӕ тӕлмацгӕнджытӕ Хуыцауы ном кӕй ницӕмӕ дардтой, уый цӕмӕй у бӕрӕг?

⁹ Ӕркӕсӕм брошюрӕмӕ «Хуыцауы ном уӕвдзӕн ӕнустӕм» *; ис 69 ӕвзагыл. Уыцы брошюрӕйы иу сӕргонды, «Хуыцауы ном — йӕ нысаниуӕг ӕмӕ йӕ ныхасыздӕхт», зӕгъгӕ (6—11 фф.), фыст ис, рагон дзуттаг тетраграмматон (грекъагау амоны «цыппар дамгъӕйы») рагон дзуттаг къухфыстыты кӕй ӕмбӕлд иу-7 000 хатты. Фӕлӕ дзуттаг дингӕнджытӕ ӕмӕ чырыстон динты кусджытӕ ӕмӕ тӕлмацгӕнджытӕ Библийы бирӕ тӕлмацтӕй Хуыцауы ном барӕй айстой *. Уӕдӕ цы ныфсӕй хъуамӕ дзурой, зӕгъгӕ, Хуыцауы зонӕм ӕмӕ йемӕ стӕм хӕлар, кӕд ӕмӕ йын йӕ ном ницӕмӕ дарынц? Ӕрмӕстдӕр ын йе ’цӕг номы нысаниуӕгӕй базонӕн ис йӕ фӕндтӕ ӕмӕ чи у, уый. Науӕд, Йесойы дӕнцон куывды ныхӕстӕн, «мах Фыд, ӕрвтыл уӕвӕг; сыгъдӕг уӕд Дӕ ном», зӕгъгӕ, цы ахадындзинад ис, кӕд Хуыцаумӕ йӕ номӕй нӕ дзурынц, уӕд? (Матфейы 6:9; Иоанны 5:43; 17:6).

Чи у Йесо Чырысти?

10. Йесойы царды хабӕрттӕ ӕмӕ Хуыцауӕн куыд лӕггад кодта, уый кӕцӕй базонӕн ис?

¹⁰ Брошюрӕ «Цы домы»-йы 3-аг урок хуыйны «Чи у Йесо Чырысти?», зӕгъгӕ. Ӕхсӕз абзацы цыбыртӕй дзырдӕуы Йесойы тыххӕй: куыд равзӕрд ӕмӕ зӕхмӕ цӕмӕн ӕрцыд. Фӕлӕ дӕ кӕд йӕ царды тыххӕй ӕппӕтдӕр фӕнды базонын, уӕд уымӕн, Евангелитӕй уӕлдай, чиныг «Ӕппӕты номдзыддӕр адӕймаг»-ӕй хуыздӕр ницы ис (ис 111 ӕвзагыл) *. Ацы чиныг ӕнцайы цыппар Евангелийыл, ӕмӕ дзы сӕрӕй кӕронмӕ фыст ис Чырыстийы царды ӕмӕ йӕ ахуырӕдты тыххӕй. Чиныджы ис 133 сӕргонды, ӕмӕ дзы фыст сты Йесойы царды хабӕрттӕ ӕмӕ Хуыцауӕн куыд лӕггад кодта, уый. Кӕд ма дӕ Йесойы тыххӕй ноджы фылдӕр базонын фӕнды, уӕд кӕс «Фыстады ӕмбарынад»-ы, 2 том, сӕргонд «Йесо Чырысти».

11. а) Иегъовӕйы Ӕвдисӕнтӕ иннӕ динтӕй хъауджы Йесойы кӕуыл нымайынц? ӕ) Ӕртӕиууоны ахуырад мӕнг кӕй у, уый Библийӕ цавӕр стихтӕ ӕвдисынц ӕмӕ ма уый тыххӕй кӕцы брошюрӕйы ис фыст?

¹¹ Аргъуантӕ быцӕу кӕнынц, Йесо «Хуыцауы Фырт» у ӕви «Фырт-Хуыцау». Бӕлвырдӕй та сӕ быцӕу у, мӕнӕ «Католикты аргъуаны Катехизис» (англ.) «чырыстӕтты уырнынӕдты сӕйраг сусӕгдзинад» кӕй хоны, ууыл, ома, Ӕртӕиууоныл. Иегъовӕйы Ӕвдисӕнтӕ, иннӕ чырыстон динтӕй хъауджыдӕр,  ӕууӕндынц, Йесойы Хуыцау кӕй сфӕлдыста, фӕлӕ Хуыцау кӕй нӕу, ууыл. Уый тыххӕй хорз цыдӕртӕ бакӕсӕн ис брошюрӕйы «Хуыцау Ӕртӕиууон у?», зӕгъгӕ (ис 95 ӕвзагыл) *. Ӕртӕиууон мӕнг ахуырад кӕй у, уый ӕмбарын кӕнынц Библийӕ тынг бирӕ стихтӕ, зӕгъӕм: Маркы 13:32 ӕмӕ 1 Коринфӕгтӕм 15:24, 28.

12. Цавӕр фарст ма нӕ хъӕуы равзарын?

¹² Хуыцау ӕмӕ Йесо Чырыстийы тыххӕй уӕлдӕр цы равзӕрстам, уый ӕвдисы, куыд ис Библи иртасӕн, цӕмӕй иннӕтӕн ӕцӕгад базонынӕн баххуыс кӕнӕм (Иоанны 17:3). Хуыцауы фӕндагыл рагӕй нырмӕ чи лӕууы, уыдоны тыххӕй та цы зӕгъӕн ис? Кӕд Библи хорз зонынц, уӕд ма сӕ раздӕрау Иегъовӕйы Ныхас ахуыр кӕнын хъӕуы?

Цӕмӕн хъӕуы «ӕппынӕдзух кӕсын»?

13. Иуӕй-иутӕ Библи ахуыр кӕнынмӕ цы цӕстӕй кӕсынц?

¹³ Хуыцауы фӕндагыл рагӕй чи лӕууы, уыдонӕй иуӕй-иутӕм, ӕвӕццӕгӕн фаг фӕкӕсы, Библийӕ иууыл райдианы цы базыдтой, уыдӕттӕ. Дзурын ӕнцон у: «Библи фыццӕгты куыд биноныгӕй фӕиртасынц, ӕз ма йӕ афтӕ цы иртасон? Стӕй, Библи цал хатты бакастӕн, уый та! Библийы бындурыл фыст чингуытӕ, журналтӕ ӕмӕ брошюрӕтӕ та ныр цал азы кӕсын!» Кӕд афтӕ у, уӕд хӕрды тыххӕй дӕр зӕгъӕн ис: «Ныр, цас хӕрын, уымӕ ма цы кӕсон, кӕд ӕмӕ ныронг бирӕ хӕринӕгтӕ фӕхордтон». Бӕлвырд у, цӕмӕй адӕймаг ӕнӕниз уа ӕмӕ йӕ уӕнгты хъару уа, уый тыххӕй йӕ иудадзыг хӕрын хъӕуы хӕрзад ӕмӕ хорз хӕринӕгтӕ. Уӕдӕ цӕмӕй нӕ уырнындзинад ма фӕцуда, уый тыххӕй нӕ куыд ӕхсызгонӕй хъӕуы Хуыцауӕй дӕтгӕ хӕринаг! (Дзуттытӕм 5:12—14).

14. Нӕхимӕ ӕппынӕдзух цӕмӕн хъуамӕ кӕсӕм?

¹⁴ Уӕдӕ, Библи ахуыр кӕнын раджы райдыдтам ӕви ӕрӕджы, не ’ппӕты дӕр хъӕуы байхъусын, Павел Тимофейӕн цы бауынаффӕ кодта, уымӕ (Тимофей уыцы рӕстӕг уыд фӕлтӕрд чырыстон цӕстдарӕг). «Ӕппынӕдзух кӕс дӕхимӕ ӕмӕ куыд амоныс, уымӕ. Уыцы хъуыддаджы лӕуд у, уымӕн ӕмӕ афтӕмӕй дӕхи дӕр фервӕзын кӕндзынӕ ӕмӕ дӕм чи хъусы, уыдоны дӕр» (1 Тимофеймӕ 4:15, 16, НД). Цӕмӕн хъӕуы хъусын Павелы уынаффӕмӕ? Ӕвӕццӕгӕн ма нӕ зӕрдыл лӕууынц Павелы ныхӕстӕ, зӕгъгӕ, мах тох кӕнӕм «Хӕйрӕджы хин миты ныхмӕ» ӕмӕ «ӕрвты бын сау тыхты ныхмӕ» (НД). Апостол Петр дӕр фӕдзӕхста, Хӕйрӕг кӕй «агуры искӕй аныхъуырынмӕ»,— ӕмӕ уыцы «исчи», уӕвӕн ис, махӕй алчидӕр уа. Хӕйрӕг нӕм цы лӕмӕгъ бынат агуры, уый, гӕнӕн ис, разына нӕ ӕнӕмӕт зӕрдӕ (Ефесӕгтӕм 6:11, 12; 1 Петры 5:8, НФ).

15. Цавӕр «хӕцӕнгӕрзтӕ» нӕм ис нӕ уырнындзинад хъахъхъӕнынӕн ӕмӕ сӕм куыд хъӕуы зилын?

¹⁵ Уӕдӕ нӕхи куыд бахъахъхъӕнӕм? Апостол Павел нын фӕдзӕхсы: «Райсут Хуыцауы ӕппӕт хӕцӕнгӕрзтӕ, цӕмӕй фыддзинады бон уӕ бон уа ныхмӕ слӕууын, ӕмӕ ӕппӕтыл фӕуӕлахиз уӕвгӕйӕ ма фӕцудат» (Ефесӕгтӕм 6:13). Уыцы монон хӕцӕнгӕрзтӕ адӕймаджы бахъахъхъӕндзысты ӕви нӕ, уый канд сӕ хорз арӕзтӕй кӕнгӕ нӕу, фӕлӕ ма сӕм куыд зилы, уымӕй дӕр. Уыцы хӕцӕнгӕрзтӕм хауынц Хуыцауы Ныхасы тыххӕй ног зонындзинӕдтӕ дӕр. Уый та ууыл дзурӕг у, ӕмӕ алкӕддӕр хъуамӕ зонӕм, Иегъовӕ йӕ Ныхасы ӕмӕ «зондджын ӕмӕ ӕууӕнкджын цагъары» фӕрцы ӕцӕгады тыххӕй ногӕй цы бамбарын кӕны, уый. Цӕмӕй нӕ монон хӕцӕнгӕрзтӕ цъӕхарт уадзой, уый тыххӕй нӕ ӕнӕмӕнгдӕр хъӕуы Библи ӕмӕ нӕ дины чингуытӕ ахуыр кӕнын (Матфейы 24:45—47; Ефесӕгтӕм 6:14, 15).

16. Цӕмӕй нӕ «уырнындзинады уарт» хорз уавӕры уа, уый тыххӕй йӕм куыд зилын хъӕуы?

¹⁶ Павел зӕгъы, зӕгъгӕ нӕм хъуамӕ ӕнӕмӕнгдӕр уа «уырнындзинады уарт»: уымӕй нӕ бон у Сайтаны судзгӕ фаттӕй,— истӕй тыххӕй нӕ ӕнӕ бындурӕй кӕй азымджын кӕнынц, уымӕй ӕмӕ аздӕхджыты ахуырӕдтӕй,— нӕхи хъахъхъӕнын ӕмӕ сӕ хуыссын кӕнын (Ефесӕгтӕм 6:16). Уый тыххӕй хъуамӕ нӕ уырнындзинады уартмӕ кӕсӕм ӕмӕ йӕм зилӕм. Ахъуыды ма кӕн: Библи ахуыр  кӕнынӕн алы къуыри дӕр «Хъахъхъӕнӕн мӕсыджы» цы статья вӕййы, уый куыд фӕцӕттӕ кӕнын? Ӕппӕт дӕр афтӕ лӕмбынӕг фӕахуыр кӕнын, цӕмӕй мӕ бон уа ӕмбырды ахӕм дзуаппытӕ дӕттын, ӕмӕ ме ’муырнджыты, «уарзондзинад ӕмӕ хорз хъуыддӕгтӕм [чи] сразӕнгард кӕндзӕн»? Абзацты ӕрмӕстдӕр къӕлӕтты амынд чи у, уыцы стихтӕ бакӕсын? Ӕмбырды зӕрдиагӕй архайын, цӕмӕй афтӕмӕй иннӕты фидар кӕнон? Уырнындзинадӕн ахъаз хӕринаг хъӕбӕр кӕй у, уый тыххӕй йӕ хъӕуы дзӕбӕх «ӕууилын» (Дзуттытӕм 5:14; 10:24).

17. а) Нӕ уырнындзинад байсафынӕн Сайтан цавӕр маргӕй хъӕстӕ кӕны? ӕ) Сайтаны маргӕн цавӕр хос ис?

¹⁷ Сайтан хин ӕмӕ кӕлӕн у, уый ӕнӕххӕст адӕмы лӕмӕгъ бынӕттӕ иууылдӕр зоны. Дуне йӕ маргӕй схъӕстӕ кодта, ӕмӕ телеуынынады зӕгъай, Интернет кӕнӕ киноты — алы ран дӕр ӕвдисынц тынг хӕлд митӕ. Уӕдӕ дзы мыхуыры фӕрӕзтӕ дӕр фӕстейӕ нӕ зайынц. Чырыстӕттӕй иуӕй-иутӕ сӕхи хорз кӕй нӕ хъахъхъӕдтой, уый фыдӕй уыцы маргӕй фӕхъӕстӕ сты, ӕмӕ афтӕмӕй ӕмбырды ӕфхӕрд баййӕфтой, суанг дзы кӕуылдӕрты хъоды дӕр бакодтой (Ефесӕгтӕм 4:17—19). Сайтаны маргӕн цавӕр хос ис? Библи ахуыр кӕнынмӕ, ӕмбырдтӕм ӕмӕ нын Хуыцау цы хӕцӕнгӕрзтӕ дӕтты, уыдонмӕ куыдфӕндыйы цӕстӕй кӕсӕн нӕй. Уыдоны фӕрцы нӕ бон у хорз ӕвзӕрӕй ӕвзарын ӕмӕ Хуыцауӕн ӕнӕуынон цы у, ууыл ӕлгъ кӕнын (Псалом 96:10; Ромӕгтӕм 12:9).

18. Куыд ис «уырнындзинады ӕхсаргардӕй» Хӕйрӕджы ныхмӕ хӕцӕн?

¹⁸ Библи иудадзыг зӕрдиагӕй куы ахуыр кӕнӕм, уӕд Хуыцауы тыххӕй цы базонӕм, уый нӕ хъахъхъӕндзӕн ӕмӕ ма сахуыр уыдзыстӕм, «удӕйдзаг ӕхсаргард, Хуыцауы дзырд чи у», уымӕй хӕцын дӕр. Хуыцауы Ныхас «алы дыкомон ӕхсаргардӕй цыргъдӕр у: уый бахъары радихмӕ зӕрдӕйы удӕй, буары уӕнгты магъзӕй, ӕмӕ тӕрхон кӕны зӕрдӕйы фӕндтӕн ӕмӕ хъуыдытӕн» (Ефесӕгтӕм 6:17, НФ; Дзуттытӕм 4:12, НФ). Уыцы «ӕхсаргардӕй» дзӕбӕх хӕцын куы сахуыр уӕм, уӕд зӕрдӕсайӕн рӕстӕг нӕ бон бауыдзӕн, адӕймагмӕ хорз кӕнӕ ӕхсызгон чи кӕсы, бӕлвырдӕй та, Фыдбылызы ӕбуалгъ къӕппӕг чи у, уый ныппырх кӕнын. Библийӕ цы зонӕм, уыдӕтты фӕрцы нӕ бон уыдзӕн, ӕлгъаг цы у, ууыл нӕ къух сисын ӕмӕ хорз цы у, уый аразын. Ныр ахъуыды кӕн: мӕ ӕхсаргард цыргъӕй лӕууы ӕви мын ӕй згӕ бахордта? Тохы размӕ бырсынӕн Библийӕ цы стихтӕ ӕххуыс кӕнынц, уыдон мӕ зӕрдыл ӕнцонтӕй ӕрлӕууынц ӕви нӕ? Цӕй уӕдӕ Библи ахуыр кӕнӕм ӕмӕ афтӕмӕй Хӕйрӕджы ныхмӕ лӕууӕм! (Ефесӕгтӕм 4:22—24).

19. Библи куы ахуыр кӕнӕм, уӕд нын цы бантысдзӕн?

¹⁹ Павел фыста: «Ӕппӕт Фыст у Хуыцауы Удӕй ӕмӕ пайда у сахуыр кӕнынӕн, уайдзӕф кӕнынӕн, сраст уӕвынӕн, амонынӕн рӕстдзинады, уадз уӕд ӕххӕст Хуыцауы адӕймаг, алы хорз хъуыддагмӕ дӕр цӕттӕ». Павел ацы ныхӕстӕ ныффыста Тимофеймӕ, ӕмӕ сӕ мах дӕр нӕ зӕрдӕмӕ куы айсӕм, уӕд нӕ уырнындзинад уыдзӕн фидар, нӕ уацамынд та уыдзӕн ахадгӕдӕр. Хистӕр нӕлгоймӕгтӕ ӕмӕ кӕстӕриуӕггӕнӕг ӕфсымӕртӕ ноджы тынгдӕр ӕххуыс кӕндзысты ӕмбырдӕн. Ӕмӕ не ’ппӕтӕн дӕр нӕ бон уыдзӕн фидар лӕууын (2 Тимофеймӕ 3:16, 17; Матфейы 7:24—27).

[Фиппаинӕгтӕ]

Бахъуыды кодтай?

• Библи ахуыргӕнгӕйӕ цы базонӕм, уый нын цӕмӕй ахъаз уа, уый тыххӕй цы аразын хъӕуы?

• Библийы тӕлмацтӕй бирӕты, Хуыцауы ном кӕм хъуамӕ уа, уым цавӕр рӕдыд ис?

• Ӕртӕиууоны ахуырад мӕнг кӕй у, уый сбӕлвырд кӕнынӕн Библийӕ кӕцы стихтӕ ӕрхӕссис?

• Кӕд Хуыцауы фӕндагыл рагӕй лӕууӕм, уӕддӕр нӕхи куыд хъуамӕ хъахъхъӕнӕм Сайтаны хин митӕй?

[Фарстатӕ ахуыр кӕнынӕн]

[Нывтӕ 25 фарсыл]

Цӕмӕй нын нӕ ахуыр ахъаз уа, уый тыххӕй нӕ хъуамӕ мацы хъыгдара.

[Нывтӕ 26 фарсыл]

Дӕ «ӕхсаргард» цыргъӕй лӕууы ӕви йӕ згӕ бахордта?