«Ӕрбаввахс ут Хуыцаумӕ»

«Ӕрбаввахс ут Хуыцаумӕ, ӕмӕ Уый ӕрбаввахс уыдзӕн сымахмӕ» (ИАКОВЫ 4:8, НФ).

1, 2. а) Адӕм арӕх цы фӕдзурынц? ӕ) Иаков йе ’муырнджыты цӕмӕй ӕмӕ цӕмӕн бафӕдзӕхста?

«ХУЫЦАУ мах фарс у». Ацы ныхӕстӕ фыстой паддзахадон гербтыл ӕмӕ ӕфсӕдтонты дарӕсыл. Ныр дӕр тынг бирӕ лыстӕг ӕмӕ ставд ӕхцатыл фыст ис мӕнӕ ахӕм ныхӕстӕ: «Нӕ ныфс дарӕм Хуыцауыл». Адӕм арӕх фӕдзурынц, зӕгъгӕ, Хуыцаумӕ ӕввахс стӕм. Фӕлӕ куыд хъуыды кӕныс, цӕмӕй адӕймаг Хуыцаумӕ ӕввахс уа, уый тыххӕй ууыл дзурын кӕнӕ цӕуылдӕр фыссын ӕгъгъӕд у?

² Библийы куыд дзырдӕуы, афтӕмӕй адӕймагӕн йӕ бон у, ӕмӕ Хуыцауы хӕлар суа. Фӕлӕ уый тыххӕй хъӕуы цыдӕртӕ аразын. Фыццаг ӕнусы дӕр иуӕй-иу сӕрст чырыстӕтты хъуыдис архайын, цӕмӕй Иегъовӕ Хуыцауимӕ ноджы ӕнгомдӕр уыдаиккой. Чырыстон цӕстдарӕг Иаков иуӕй-иуты фӕдзӕхста, зӕгъгӕ, уӕ монцты фӕдыл ма цӕут, науӕд Хуыцауы зӕрдӕхудты бацӕудзыстут. Йе ’муырнджытӕн цы уынаффӕтӕ радта, уыдонӕй иу у уӕлдай хъуыдыйаг: «Ӕрбаввахс ут Хуыцаумӕ, ӕмӕ Уый ӕрбаввахс уыдзӕн сымахмӕ» (Иаковы 4:1—12, НФ). Иаковы ацы ныхӕстӕй, зӕгъгӕ, «ӕрбаввахс ут», цы зӕгъын фӕндыд?

3, 4. а) Иаков фыццаг ӕнусы чырыстӕттӕм куы фыста, зӕгъгӕ, «ӕрбаввахс ут Хуыцаумӕ», уӕд ӕй цы зӕгъын фӕндыд? ӕ) Хуыцаумӕ фӕндаг гом кӕй у, уый кӕцӕй зонӕм?

³ Иаковӕн йӕ фыстӕг чи каст, уыдон ацы хъуыддаг хорз зыдтой. Моисейы Закъоны дӕр сауджынтӕн уыд бӕлвырд амындтӕ, Иегъовӕмӕ-иу адӕмы номӕй куыд хъуамӕ «бацыдаиккой», уый фӕдыл (Рацыд 19:22). Уӕдӕ Иаковы уый зӕгъын фӕндыд, Иегъовӕмӕ ӕввахс кӕнынмӕ уӕлӕнгай цӕстӕй кӕсӕн кӕй нӕй, уымӕн ӕмӕ Дунедарӕг уый у.

⁴ Фӕлӕ иу библииртасӕг куыд зӕгъы, афтӕмӕй «уыцы уынаффӕ [Иаковы 4:8] адӕймаджы зӕрдӕйы ныфсы цӕхӕр ссудзы». Иаков зыдта, Иегъовӕ ӕнӕххӕст адӕмӕн алкӕддӕр кӕй дзырдта, ӕрбаввахс мӕм ут, зӕгъгӕ (2 Паралипоменон 15:2). Йесойы нывонды фӕрцы та сын байгом фӕндаг, цӕмӕй Иегъовӕмӕ ноджы тынгдӕр баввахс уыдаиккой (Ефесӕгтӕм 3:11, 12). Уыцы фӕндаг абон дӕр милуантӕн гом у. Цы у нӕ бон саразын, цӕмӕй уыцы диссаджы фадат ма ауадзӕм? Иегъовӕ Хуыцаумӕ куыд ӕрбаввахсдӕр уӕм, уымӕн ис ӕртӕ мадзалы ӕмӕ сӕм, цӕй, ӕркӕсӕм.

Хуыцауимӕ «зонгӕ кӕнут»

5, 6. Ӕнахъом Самуилы хабарӕй куыд ис базонӕн, Хуыцауимӕ «зонгӕ кӕнын» цы нысан кӕны?

⁵ «Сыгъдӕг Фыстады ног дунейы тӕлмацы» Йесойы ныхӕстӕ Иоанны 17:3 тӕлмац сты афтӕ: «Ӕнусон цард та уый мидӕг ис, цӕмӕй зонгӕ кӕной демӕ, иунӕг ӕцӕг Хуыцауимӕ, ӕмӕ де ’рвыст Йесо Чырыстиимӕ». Библийы бирӕ тӕлмацты ацы стих гыццыл ӕндӕрхуызон у. Мивдисӕг, «зонгӕ кӕной» Хуыцауимӕ, зӕгъгӕ, ивд ӕрцыд мивдисӕгӕй «зоной» Хуыцауы. Фӕлӕ ахуыргӕндтӕ куыд зӕгъынц, афтӕмӕй, ацы мивдисӕг цы рагон грекъаг дзырдӕй ӕрцыд тӕлмац, уымӕн йӕ мидис уӕрӕхдӕр у: искӕй хуыздӕр базонын ӕмӕ йемӕ бахӕлар уын.

⁶ Хуыцауы хуыздӕр базонӕн кӕй ис, уый адӕм Йесойы заманты дӕр хорз зыдтой. Дзуттаг Фыстыты дзырдӕуы, зӕгъгӕ, Самуил ӕнахъомӕй «Иегъовӕйы нӕма зыдта» (1 Паддзахӕдты 3:⁠7). Самуил Хуыцауы ӕцӕгдӕр дзӕбӕх нӕ зыдта? Нӕ, афтӕ зӕгъӕн нӕй. Йӕ ныййарджытӕ ӕмӕ йын сауджынтӕ, бӕгуыдӕр, бирӕ цыдӕртӕ бацамыдтаиккой. Фӕлӕ ацы стихы цы рагон дзуттаг дзырд ис, уый, иу ахуыргонд куыд зӕгъы, афтӕмӕй ахӕссӕн ис «ӕввахс адӕймагмӕ, ахсджиагмӕ». Самуил Иегъовӕйы сӕрмагонд минӕвар куы сси, уӕд ӕй куыд хорз базыдта, афтӕ йӕ йӕ сабибонты нӕ зыдта. Самуил куыд стырдӕр кодта, афтӕ Иегъовӕимӕ ноджы хуыздӕр зонгӕ кодта, ӕмӕ афтӕмӕй йӕ хӕлар сси (1 Паддзахӕдты 3:19, 20).

7, 8. а) Цӕуылнӕ хъуамӕ тӕрсӕм Библийы арф хъуыдытӕ иртасынӕй? ӕ) Хуыцауы Ныхасы «арфадтӕй» цавӕртӕ ис раиртасӕн?

 ⁷ Цӕмӕй Иегъовӕмӕ баввахс уай, йӕ хӕлар суай, уый тыххӕй йемӕ зонгӕ кӕныс? Уымӕн дӕ хъӕуы, Хуыцау цы монон хӕринаг дӕтты, уый «бауарзын» (1 Петры 2:2). Кӕд Библийы сӕйраг ахуырӕдтӕ зоныс, уӕд дӕм уый ӕгъгъӕд ма фӕкӕсӕд. Архай цы арф хъуыдытӕ дзы ис, уыдон раиртасыныл дӕр (Дзуттытӕм 5:12—14). Фӕлӕ дӕм, чи зоны, уыцы ахуырӕдтӕ зынӕмбарӕн кӕсынц ӕмӕ сӕм уый тыххӕй дӕ ныфс нӕ хӕссыс, уӕд та куыд? Кӕд хабар афтӕ у, уӕд зон — Иегъовӕ у «Стыр Зондамонӕг» (Исай 30:20). Уый хорз зоны, ӕнӕххӕст адӕймагӕн йӕ арф хъуыдытӕ куыд бамбарын кӕнын хъӕуы, уый. Ӕмӕ цы амоны, уый дӕ кӕд ӕцӕгдӕр фӕнды базонын, уӕд дын ахъаз кӕндзӕн (Псалом 24:4).

⁸ «Хуыцауы арфадтӕ» куыд хорз зоныс, уый тыххӕй ма дӕхи сфӕлтӕр (1 Коринфӕгтӕм 2:10). Уыдон не сты, диниртасджытӕ ӕмӕ сауджынтӕ цӕуыл фӕбыцӕу кӕнынц, ахӕм ӕрхӕндӕг амындтӕ. Уыдон афтӕ ахсджиаг ӕмӕ афтӕ ахадгӕ ахуырӕдтӕ сты, ӕмӕ сӕ фӕрцы базонӕн ис нӕ уарзӕгой Фыды хъуыдытӕ ӕмӕ зӕрдӕйы конд. Дзырдӕн, ахӕм ахуырӕдтӕ: ахӕстаргъ, «сусӕггад»; алыхуызон бадзырдтӕ — Иегъовӕ йӕ кувӕг адӕмы цӕй фӕрцы хъахъхъӕдта ӕмӕ йӕ фӕндтӕ цӕй руаджы ӕххӕст кодта, уыдон, ӕмӕ а. д. Уыцы фарстытӕ нӕхӕдӕг лӕмбынӕг куы иртасӕм, уӕд нын уый уыдзӕн зӕрдӕрухсы хос ӕмӕ стыр ахъаз (1 Коринфӕгтӕм 2:7).

9, 10. а) Сӕрбӕрзонддзинад ӕвзӕр миниуӕг цӕмӕн у ӕмӕ нын цы аразгӕ у, цӕмӕй ахӕм ма суӕм? ӕ) Иегъовӕйы тыххӕй исты куы базонӕм, уӕд уӕлдай сӕрныллӕг цӕмӕн хъуамӕ уӕм?

⁹ Библийы арф хъуыдытӕ хуыздӕрӕй-хуыздӕр куы ӕмбарай, уӕд ма ссӕрбӕрзонд у (1 Коринфӕгтӕм 8:1). Сӕрбӕрзонддзинад тынг ӕвзӕр миниуӕг у, уымӕн ӕмӕ адӕймаджы Хуыцауӕй дард кӕны (Ӕмбисӕндтӕ 16:5; Иаковы 4:⁠6). Кӕд адӕймаг цыдӕртӕ зоны, уӕддӕр ын йӕхицӕй цы ӕппӕлгӕ у?! Цӕвиттон, а-фӕстаг рӕстӕджы зонадӕн цы бантыст, уый фӕдыл иу чиныджы разныхасы ис ахӕм ныхӕстӕ: «Цас фылдӕр базонӕм, уыйас тынгдӕр бамбарӕм, цӕй гыццыл зонӕм, уый. [...] Ныридӕгӕн цы зонӕм, уый ницы у, цы ма базондзыстӕм, уыимӕ абаргӕйӕ». Ахӕм сӕрныллӕг адӕм ма кӕй ис, уый куыд ӕхсызгон у. Тӕккӕ стырдӕр зонындзинӕдты  къабазыл куы дзурӕм — Иегъовӕ Хуыцауы тыххӕй зонындзинӕдтыл — уӕд та хъуамӕ ноджы сӕрныллӕгдӕр уӕм. Цӕмӕн?

¹⁰ Ӕркӕсӕм ма, Библийы Иегъовӕйы тыххӕй цы дзырдӕуы, уымӕ. «Иттӕг арф сты Дӕ хъуыдытӕ» (Псалом 91:6, МГТ). «[Иегъовӕйы] зонд ӕнӕсбаргӕ [у]» (Псалом 146:5). «[Иегъовӕйы] зондӕн кӕронмӕ раиртасӕн нӕй» (Исай 40:28). «О ӕгӕрон хъӕздыгад Хуыцауы тарф хъуыдыйы ӕмӕ зонды!» (Ромӕгтӕм 11:33, НФ). Бӕлвырд у, Иегъовӕйы тыххӕй ӕппӕт дӕр никуы базондзыстӕм (Екклесиаст 3:11). Уый нын бирӕ хорз цыдӕртӕ бацамыдта, фӕлӕ фидӕны дӕр бирӕ ног цыдӕртӕ базондзыстӕм — афтӕ никуы уыдзӕн, цӕмӕй та-иу ногӕй исты ма базонӕм. Ацы хъуыды нын нӕ зӕрдӕйы зынг не ссыгъта? Ӕмӕ уыимӕ, сӕрныллӕг кӕй хъуамӕ уӕм, уымӕ дӕр нӕ амоны? Исты-иу куы базонӕм, уӕддӕр-иу уӕлӕхох никӕуыл кӕндзыстӕм, фӕлӕ-иу нӕ зонындзинӕдтӕй пайда кӕндзыстӕм, цӕмӕй Иегъовӕмӕ ӕввахсдӕр уӕм ӕмӕ иннӕтӕн дӕр уыцы хъуыддаджы ӕххуыс кӕнӕм (Матфейы 23:12; Лукайы 9:48).

Иегъовӕйы кӕй уарзыс, уый ӕвдис

11, 12. а) Иегъовӕйы тыххӕй цы базонӕм, уый ныл куыд хъуамӕ ӕндава? ӕ) Адӕймаг Хуыцауы кӕй уарзы, уый цӕмӕй бӕрӕг вӕййы?

¹¹ Апостол Павел бамбарын кодта, зонындзинӕдтӕ ӕмӕ уарзондзинад кӕрӕдзийыл баст кӕй сты, афтӕ куы фыста: «Кувын уый тыххӕй, цӕмӕй уӕ уарзондзинад ноджы фылдӕрӕй фылдӕр рӕза зонындзинады ӕмӕ алы ӕнкъарындзинады» (Филиппӕгтӕм 1:9). Уӕдӕ Иегъовӕ ӕмӕ йӕ фӕндты тыххӕй ногӕй исты куы базонӕм, уӕд-иу нын уый иннӕтыл уӕлӕхох кӕнынӕн ӕфсон хъуамӕ ма суа, фӕлӕ нын хъуамӕ нӕ уӕларвон Фыды ноджы тыхджындӕр уарзыны хос фӕуа.

¹² Бирӕтӕ фӕзӕгъынц, зӕгъгӕ, Хуыцауы уарзӕм, фӕлӕ уыдон арӕх ӕрмӕст ныхӕстӕ вӕййынц. Чи зоны, Хуыцауыл зӕрдӕйӕ сты. Уӕвгӕ, адӕймаг Хуыцауыл ӕцӕгӕйдӕр ӕнувыд куы уа, уӕд уый хорз хъуыддаг у, стӕй раппӕлинаг дӕр, ӕрмӕст хъуамӕ Библийӕ алцыдӕр раст ӕмбара. Фӕлӕ адӕймаджы зӕрдӕйы цавӕрдӕр ӕнкъарӕнтӕ куы уа, уӕддӕр ӕрмӕст уый ууыл дзурӕг нӕу, ӕмӕ Хуыцауы уарзы. Цӕмӕн афтӕ? Ӕркӕсӕм, Хуыцауы Ныхас ахӕм уарзондзинады фӕдыл цы зӕгъы: «Хуыцауы уарзын уый у, цӕмӕй мах ӕххӕст кӕнӕм Йӕ фӕдзӕхстытӕ» (1 Иоанны 5:3). Иудзырдӕй, Иегъовӕйы уарзын, зӕгъгӕ, адӕймагӕн йӕ бон уӕд у зӕгъын, йӕ коммӕ куы кӕса.

13. Иегъовӕйӕ куы тӕрсӕм, уӕд, кӕй йӕ уарзӕм, уый ӕвдисын нӕ бон куыд уыдзӕн?

¹³ Иегъовӕйӕ куы тӕрсӕм, уӕд ӕм хъусгӕ дӕр кӕндзыстӕм. Аргъуыц ӕмӕ дзы ӕфсӕрмы уымӕн кӕнӕм, ӕмӕ хуыздӕрӕй-хуыздӕр ӕмбарӕм йӕ ӕнӕкӕрон сыгъдӕгдзинад, йӕ кад, йӕ тых ӕмӕ йӕ рӕстдзинад, йе стыр зонд ӕмӕ йӕ уарзондзинад. Адӕймаг Хуыцауӕй куы нӕ тӕрса, куы нӕ дзы ӕфсӕрмы кӕна, уӕд ӕм нӕ баввахс уыдзӕн. Кӕс ма, Псаломы 25:14 (НД) [24:14] цы фыст ис: «Иегъовӕимӕ ӕнгом ахастытӕ ис, чи дзы тӕрсы, уыдонӕн». Уӕдӕ кӕд нӕ уарзон уӕларвон Фыды зӕрдӕхудты бацӕуынӕй тӕрсӕм, уӕд ӕм ӕввахсдӕр кӕндзыстӕм. Хуыцауӕй куы тӕрсӕм, уӕд Ӕмбисӕндты 3:6 цы уынаффӕ ис, уый дӕр нӕ зӕрдӕмӕ исдзыстӕм. Уым фыст ис: «Алы хъуыддаджы дӕр ын агур йӕ разамынд, ӕмӕ дын уый раст кӕндзӕн дӕ фӕндӕгтӕ». Куыд ӕмбаргӕ сты ацы ныхӕстӕ?

14, 15. а) Царды нӕ алы бон дӕр цавӕр хъуыддӕгтӕ фӕхъӕуы лыг кӕнын? ӕ) Куыд ис хъуыддӕгтӕ афтӕ лыг кӕнӕн, цӕмӕй бӕрӕг уа, Хуыцауы зӕрдӕхудты бацӕуынӕй кӕй тӕрсӕм?

¹⁴ Алы бон дӕр нӕ фӕхъӕуы цыдӕр хъуыддаг лыг кӕнын,— уӕлдай нӕу, ахсджиаг хъуыддаг вӕййы ӕви нӕ. Зӕгъӕм, де ’мкъласонимӕ, дӕ сыхагимӕ кӕнӕ, кӕимӕ кусыс, уыимӕ цӕуыл дзурдзынӕ? (Лукайы 6:45). Цы куыст дын бахӕс кӕной, уый зӕрдиагӕй бакӕндзынӕ ӕви йӕ куыдфӕндыйӕ акӕндзынӕ? (Колоссӕгтӕм 3:23). Иегъовӕйыл йӕ зӕрдӕ афтӕ тынг ӕнувыд кӕмӕн нӕу кӕнӕ йӕм бынтон дард чи у, дӕхи уыдоныл бӕтдзынӕ ӕви Хуыцаумӕ хъусын кӕй фӕнды, уыдоныл? (Ӕмбисӕндтӕ 13:20). Цӕмӕй Хуыцауы Паддзахады хъуыддаг размӕ цӕуа, уый тыххӕй цы араздзынӕ, кӕд дӕ бон бирӕ нӕ уа, уӕддӕр? (Матфейы 6:33). Уӕдӕ ацы абзацы Библийӕ цы уагӕвӕрдтӕ ранымадтам, уыдон кӕд алкӕддӕр хынцыс исты лыггӕнгӕйӕ, уӕд, зӕгъӕн ис, ӕмӕ «алы хъуыддаджы дӕр» Иегъовӕйы разамынд агурыс.

¹⁵ Ӕцӕгӕйдӕр, цыфӕнды хъуыддаг скъуыддзаг кӕнгӕйӕ дӕр хъӕуы ахъуыды кӕнын: Иегъовӕ мӕм цӕмӕ ӕнхъӕлмӕ кӕсы? Йӕ зӕрдӕ йын тынгдӕр куыд барухс кӕнон? (Ӕмбисӕндтӕ 27:11). Уыдӕттыл куы сагъӕс кӕнӕм, уӕд уый дзурӕг уыдзӕн, Иегъовӕйы зӕрдӕхудты бацӕуынӕй кӕй тӕрсӕм, ӕмӕ уый та ӕвдисдзӕн,  кӕй йӕ уарзӕм. Хуыцауы зӕрдӕхудты бацӕуынӕй куы тӕрсӕм, уӕд нӕ уырнындзинад уыдзӕн фидар, уыдзӕн нӕм ӕфсарм ӕмӕ нӕхи дардзыстӕм сыгъдӕг. Дӕ зӕрдыл ма ӕрлӕууын кӕн, Иаков чырыстӕттӕн куы дзырдта, зӕгъгӕ, «ӕрбаввахс ут Хуыцаумӕ», уӕд ма ноджыдӕр загъта: «О тӕригъӕдджынтӕ! Ссыгъдӕг кӕнут уӕ къухтӕ; аивут уӕ зӕрдӕйы ахаст сымах дӕр, о дызӕрдыгтӕ!» (Иаковы 4:8, НФ).

16. Иегъовӕйӕн исты дӕтгӕйӕ нын цы нӕ бантысдзӕн, фӕлӕ уымӕй цы ӕвдисдзыстӕм?

¹⁶ Кӕй зӕгъын ӕй хъӕуы, Иегъовӕйы чи уарзы, уый йӕхи ӕрмӕст ӕвзӕрдзинадӕй нӕ хизы, фӕлӕ ма хорздзинад дӕр фӕаразы. Зӕгъӕм, Иегъовӕ нын цы стыр хӕрзтӕ ракодта, уый тыххӕй йын куыд ис раарфӕ кӕнӕн? Иаков фыста: «Алкӕцы хорз лӕвар ӕмӕ алкӕцы ӕххӕст лӕвар ӕрцӕуы уӕлейӕ, рухсыты Фыдӕй» (Иаковы 1:17). Иегъовӕйӕн цы раттӕм, уымӕй йӕ бӕркадыл нӕ бафты. Дунейыл цыдӕриддӕр ис, уыдон ӕнӕуи дӕр уый сты (Псалом 49:12). Уӕдӕ афтӕ зӕгъӕн ис, ӕмӕ Иегъовӕйӕн нӕ рӕстӕг ӕмӕ нӕ хъарутӕ уый тыххӕй дӕттӕм, ӕмӕ уый хъуаг у? Нӕ, уый ницы хъуаг у. Хуыцауы Паддзахады тыххӕй хорз хабар хъусын кӕнын нӕ куы нӕ фӕндыдаид, уӕддӕр йӕ фӕндӕй дуртӕ дӕр сдзырдтаиккой! Уӕдӕ ма уӕд Иегъовӕйӕн нӕ рӕстӕг, нӕ хъарутӕ ӕмӕ нӕм цы ис, уый цӕмӕн дӕттӕм? Фыццаджы-фыццагдӕр, афтӕмӕй ӕвдисӕм, кӕй йӕ уарзӕм ӕппӕт зӕрдӕйӕ, ӕппӕт удӕй, ӕппӕт зондӕй ӕмӕ ӕппӕт хъаруйӕ (Маркы 12:29, 30).

17. Цӕй тыххӕй нӕ фӕнды Иегъовӕйӕн ӕппӕт дӕр зӕрдӕйӕ дӕттын?

¹⁷ Иегъовӕйӕн цы дӕттӕм, уый хъуамӕ уа зӕрдӕйӕ, уымӕн ӕмӕ Хуыцау «барвӕндонӕй дӕттӕджы уарзы» (2 Коринфӕгтӕм 9:7). Дыккаг закъоны 16:17 цы ныхӕстӕ ис, уыдон нӕ зӕрдӕмӕ куы айсӕм, уӕд ын цыфӕндыдӕр ӕхсызгонӕй дӕтдзыстӕм: «Алчидӕр [уӕ] ӕрбацӕуӕд йӕ лӕваримӕ, уӕ Хуыцау Иегъовӕ уӕ цы хорзӕхӕй схайджын кодта, уымӕ гӕсгӕ». Иегъовӕйы цӕст нын алцыдӕр кӕй уарзы, ууыл куы хъуыды кӕнӕм, уӕд мах дӕр фӕнддзӕн уымӕн алцыдӕр зӕрдӕйӕ дӕттын. Цы йын раттӕм, уымӕй йӕ зӕрдӕ барухс вӕййы, мӕнӕ ныййарджытӕ сӕ чысыл сабийы гыццыл лӕварыл куыд бацин кӕнынц, афтӕ. Уӕдӕ Иегъовӕйӕн рӕдауӕй кӕй дӕттӕм, уымӕй ӕвдисӕм, кӕй йӕ уарзӕм, ӕмӕ йӕм афтӕмӕй та ӕнцондӕр у ӕввахсдӕр кӕнын.

Хуыцаумӕ кув ӕмӕ йӕм ӕввахсдӕр кӕн

18. Цӕй тыххӕй фӕкувӕм, ууыл цӕмӕн фӕхъӕуы хъуыды кӕнын?

¹⁸ Хуыцаумӕ кувгӕйӕ нын фӕзыны диссаджы фадат — нӕ уӕларвон Фыдӕн нӕ зӕрдӕ райгом кӕнын (Филиппӕгтӕм 4:6). Цӕмӕй Хуыцаумӕ ӕввахсдӕр кӕнӕм, уый тыххӕй йӕм хъӕуы кувын. Уымӕ гӕсгӕ хаттӕй-хатт фӕхъӕуы ахъуыды кӕнын, Хуыцаумӕ цӕй тыххӕй ӕмӕ куыд фӕкувӕм, ууыл. Цыдӕр бӕрзонд ныхӕстӕ кӕнын кӕнӕ цыдӕр фӕткмӕ гӕсгӕ дзурын нӕ фӕхъӕуы. Нӕ ныхӕстӕ хъуамӕ цӕуой зӕрдӕйӕ. Фӕлӕ цӕмӕй нӕ куывтытӕ зӕрдӕбынӕй уой, уый тыххӕй цы хъӕуы?

19, 20. Цӕмӕн хъӕуы кувыны размӕ ахъуыды кӕнын ӕмӕ цӕуыл ис асагъӕс кӕнӕн?

¹⁹ Хорз у кувыны размӕ ахъуыды кӕнын. Ахӕм ӕгъдау нӕм куы уа, уӕд нӕ куывтытӕ уыдзысты бӕлвырд ӕмӕ мидисджын, ӕмӕ афтӕмӕй нал фӕлхат кӕндзыстӕм, цы ныхӕстыл сахуыр стӕм, уыдон (Ӕмбисӕндтӕ 15:28, 29). Хорз у, Йесо йӕ дӕнцон куывды цӕуыл дзырдта, ууыл асагъӕс кӕнын, ӕмӕ уый фӕстӕ ахъуыды кӕнын, йӕ ныхӕстӕ махмӕ куыд хауынц, ууыл (Матфейы 6:9—13). Ахъуыды кӕнӕн ис: кӕд нӕ бон бирӕ нӕу, уӕддӕр цӕмӕй Иегъовӕйы фӕндон зӕххыл ӕххӕст кӕна, уый тыххӕй нӕ цы фӕндид аразын? Иегъовӕйӕн хъуамӕ ма зӕгъиккам, кӕй нӕ фӕнды, цӕмӕй йын исты пайда уӕм ӕмӕ дзы ӕххуыс хъуамӕ ма куриккам, цӕмӕй нын цытӕ бахӕс кӕны, уыдон нӕ бон уа ӕххӕст кӕнын? Цардыл ӕгӕр нӕ тыхсӕм? Цавӕр тӕригъӕдтӕ нын хъӕуы ныббарын; мах та кӕмӕн хъуамӕ ныххатыр кӕнӕм?  Цавӕр фыдӕвзарӕнты бахауӕм, ӕмӕ нӕ Иегъовӕйы ӕххуыс кӕй хъӕуы, уый ӕмбарӕм?

²⁰ Хорз уаид, куы нӕ рох кӕниккам, нӕ зонгӕтӕй Иегъовӕйы ӕххуыс кӕй хъӕуы, уыдоны дӕр (2 Коринфӕгтӕм 1:11). Фӕлӕ бузныг дзурын дӕр хъуамӕ зонӕм. Адӕймаг куы ахъуыды кӕна Иегъовӕйы тыххӕй, уӕд ын цас цӕйдӕрты тыххӕй ис арфӕ кӕнӕн ӕмӕ йын кад кӕнӕн (Дыккаг закъон 8:10; Лукайы 10:21). Афтӕ куы кӕнӕм, уӕд ма уый нӕхицӕн дӕр пайда уыдзӕн: афтӕмӕй зӕрдӕ цардӕй тынгдӕр райдзӕн, стӕй сахуыр уыдзыстӕм бузныг дзурын дӕр.

21. Иегъовӕмӕ куыд кувын хъӕуы, уымӕн Библийы цавӕр цӕвиттонтӕ ис?

²¹ Куывтытӕ фӕмидисджындӕр кӕнӕн ма ис Библийы ахуыры фӕрцы дӕр. Хуыцауы Ныхасы фыст ис рагзаманты цӕрӕг иузӕрдион нӕлгоймӕгтӕ ӕмӕ сылгоймӕгты зӕрдӕмӕхъаргӕ куывтытӕ. Стыр зындзинӕдтӕ нын нӕ зӕрдӕ куы марой, ӕмӕ нӕхи ӕмӕ нӕ ахсджиӕгты цардамондӕн куы тӕрсӕм, уӕд бакӕсӕн ис, Иаков йе ’фсымӕр Исавыл, йӕ маст райсынмӕ дзы чи хъавыд, ууыл хъуамӕ куы фембӕлдаид, уӕд куыд куывта (Уӕвынад 32:9—12). Ахъаз ма нын фӕуыдзӕн, Хуыцауы адӕмы ефиопӕгты ӕфсад (милуаны бӕрц) куы ӕрбалхъывта, уӕд паддзах Асӕ куыд куывта, уый дӕр (2 Паралипоменон 14:11, 12). Зӕгъӕм, катай кӕнӕм, «уыцы хъуыддаг Иегъовӕйы рухс ном счъизи кӕндзӕн», зӕгъгӕ, уӕд бакӕсӕн ис, Илиа Кармилы хохыл Ваалы кувджыты раз куыд куывта, уый. Кӕнӕ ма — Нееми Иерусалимы кӕуинаг уавӕры тыххӕй куыд куывта, уый дӕр (3 Паддзахӕдты 18:36, 37; Нееми 1:4—11). Ацы куывтытӕ куы кӕсӕм ӕмӕ сыл куы хъуыды кӕнӕм, уӕд нӕ уырнындзинад фидар кӕндзӕн ӕмӕ зондзыстӕм, нӕ зӕрдӕйӕн нын ӕнцой цы нӕ дӕтты, уый тыххӕй Иегъовӕмӕ куыд хъӕуы кувын.

22. Ацы азы ӕрвылазон стих кӕцӕй ист у ӕмӕ афӕдзы дӕргъы рӕстӕгӕй-рӕстӕгмӕ хорз цӕуыл уыдзӕн хъуыды кӕнын?

²² Ӕцӕгдӕр, уымӕй стырдӕр кад, уымӕй сӕйрагдӕр нысан нӕй, ӕмӕ хъусӕм Иаковы фӕдзӕхстмӕ, «ӕрбаввахс ут Хуыцаумӕ», зӕгъгӕ (Иаковы 4:⁠8, НФ). Уый тыххӕй дарддӕр дӕр архайдзыстӕм Хуыцауы ноджы хуыздӕр базоныныл, бирӕ йӕ кӕй уарзӕм, уый алы хъуыддагӕй ӕвдисдзыстӕм, стӕй йӕм кувдзыстӕм ӕмӕ йӕм афтӕмӕй ноджы тынгдӕр ӕввахсдӕр кӕндзыстӕм. Цӕй уӕдӕ ацы азы дӕргъы ӕрвылазон стих — Иаковы 4:8 — нӕ зӕрдыл дарӕм ӕмӕ кӕсӕм, Иегъовӕмӕ ӕввахсдӕр кӕнӕм ӕви нӕ. Фӕлӕ стихы дыккаг хайы тыххӕй та цы зӕгъӕн ис? Куыд ӕмбаргӕ у, Иегъовӕ «ӕрбаввахс уыдзӕн сымахмӕ», зӕгъгӕ, ӕмӕ уый арфӕйаг хъуыддаг цӕмӕн у? Иннӕ статьяйӕ йын дзуапп базондзыстӕм.

Бахъуыды кодтай?

• Иегъовӕмӕ ӕввахсдӕр кӕныны хъуыддагмӕ уӕлӕнгай цӕстӕй кӕсӕн цӕуылнӕ ис?

• Цӕмӕй Иегъовӕимӕ хуыздӕр зонгӕ кӕнӕм, уый тыххӕй нӕ размӕ цавӕр нысӕнттӕ ис сӕвӕрӕн?

• Иегъовӕйы ӕцӕгӕйдӕр кӕй уарзӕм, уый куыд ис равдисӕн?

• Цӕмӕй Иегъовӕмӕ кувӕм ӕмӕ йӕм афтӕмӕй ӕввахсдӕр кӕнӕм, уый тыххӕй нын цы баххуыс кӕндзӕн?

[Фарстатӕ ахуыр кӕнынӕн]

[Хицӕнгонд текст 12 фарсыл]

2003 азӕн ӕрвылазон стих у: «Ӕрбаввахс ут Хуыцаумӕ, ӕмӕ Уый ӕрбаввахс уыдзӕн сымахмӕ» (Иаковы 4:8, НФ).

[Ныв 8, 9 фарсыл]

Самуил куы сыстыр, уӕд Иегъовӕйы хуыздӕр базыдта.

[Ныв 12 фарсыл]

Илиа Кармилы хохыл куыд куывта, уый нын у хорз цӕвиттон.