Иннӕтӕм Иегъовӕйы цӕстӕй кӕс

«Хуыцау, адӕймаг цы цӕстӕй кӕсы, афтӕ нӕ кӕсы» (1 ПАДДЗАХӔДТЫ 16:7).

1, 2. Иегъовӕ ӕмӕ Самуил Елиавмӕ цы цӕстӕй кастысты, ӕмӕ нын уый цӕуыл дзурӕг у?

НӔ ЭРӔЙЫ агъоммӕ XI ӕнусы Иегъовӕ пехуымпар Самуилӕн бахӕс кодта иу сусӕг хъуыддаг. Загъта йын, цӕмӕй Йессейы хӕдзармӕ ацыдаид ӕмӕ йын йӕ лӕппутӕй иуы зетийӕ байсӕрстаид, Израилы паддзах кӕй хъуамӕ суыдаид, уый тыххӕй. Самуил Йессейы зӕнӕджы хистӕр Елиавы куы ауыдта, уӕд йӕ мидзӕрдӕйы скарста, ай мӕнӕ, Хуыцау кӕй равзӕрста, уый у, зӕгъгӕ. Фӕлӕ йын Иегъовӕ загъта: «Ма йын кӕс йӕ уындмӕ ӕмӕ йӕ асмӕ; уый нӕ равзӕрстон. Уымӕн ӕмӕ Хуыцау, адӕймаг цы цӕстӕй кӕсы, афтӕ нӕ кӕсы. Адӕймаг кӕсы, цӕст цы уыны, уымӕ, Иегъовӕ та кӕсы зӕрдӕмӕ» (1 Паддзахӕдты 16:6, 7). Самуил Елиавмӕ Иегъовӕйы цӕстӕй нӕ каст *.

² Ӕвӕдза, куыд арӕх вӕййы, адӕймагӕй цы ӕнхъӕл вӕййӕм, ахӕм кӕй нӕ разыны! Иуӕй нӕ ӕвӕтк, ӕнӕфсарм адӕймаджы рӕсугъддзинад фӕсайы. Иннӕмӕй та, сыгъдӕгзӕрдӕ адӕймагмӕ ӕвзӕр цӕстӕй кӕсӕм, цавӕрдӕр миниуджытӕ дзы нӕ зӕрдӕмӕ кӕй нӕ цӕуы, уый тыххӕй.

3, 4. а) Дыууӕ чырыстоны куы фӕхъӕлӕба уой, уӕд сӕ цы бакӕнын хъӕуы? ӕ) Кӕд не ’муырнджытӕй искӕимӕ фӕхыл стӕм, уӕд нӕ цавӕр фарстытыл хъӕуы ахъуыды кӕнын?

³ Иннӕтыл фаутӕ ӕвӕрын куы уарзӕм, суанг рагӕй кӕй зонӕм, уыдоныл дӕр, уӕд ӕнӕмаст нӕ уыдзыстӕм. Чи зоны, хорз кӕимӕ цардтӕ, уыцы чырыстон ӕфсымӕр кӕнӕ хоимӕ фӕхъӕлӕба дӕ. Бафидауын дӕ нӕ фӕнды? Ӕмӕ дӕ уый тыххӕй цы бакӕнын хъӕуы?

⁴ Ноджыдӕр ма иу хатт дзӕбӕх ахъуыды кӕн де ’муырнӕг ӕфсымӕр кӕнӕ хойыл, цыма хыл дӕр нӕ фестут, афтӕ. Уымӕн дын фӕахъаз уыдзысты Йесойы ныхӕстӕ: «Никӕйы бон у ӕрцӕуын Мӕнмӕ, Мӕн рарвитӕг Фыд ӕй куы нӕ ӕрбакӕна, уӕд» (Иоанны 6:44). Уый фӕстӕ ахъуыды кӕн: уыцы адӕймаджы Иегъовӕ йӕ Фыртмӕ цӕмӕн ӕрбакодта? Цавӕр хорз миниуджытӕ йӕм ис? Кӕд ын, мыййаг, уыцы миниуджытӕ нӕ уынын кӕнӕ мӕм ницӕйаг кӕсынц? Уӕвгӕ, цӕмӕн бахӕлар стӕм? Мӕ зӕрдӕмӕ дзы цы фӕцыд? Фыццаг дын, чи зоны, зын уа, хорзӕй йӕм исты ссарын, уӕлдайдӕр та дын маст дӕ зӕрдӕ куы ӕвдӕрза, уӕд. Фӕлӕ бафидауынӕн уыдӕттыл ахъуыды кӕнын хъӕуы. Цӕвиттонӕн ӕркӕсӕм, хатт ӕрмӕстдӕр лӕмӕгъ миниуджытӕ кӕмӕ фӕуынынц, уыцы дыууӕ лӕджы хабармӕ, ӕмӕ сын сӕ удыхъӕды ссарӕм рӕсугъд миниуджытӕ. Нӕ ныхас у пехуымпар Ионӕ ӕмӕ апостол Петрыл.

 Цавӕр адӕймаг уыд Ионӕ

5. Хуыцау Ионӕйӕн цы бахӕс кодта, ӕмӕ уый та куыд бакодта?

⁵ Ионӕ уыд пехуымпар, ӕмӕ цардис цӕгат паддзахад Израилы, Иоасы фырт Иеровоам II куы паддзахиуӕг кодта, уӕд (4 Паддзахӕдты 14:23—25). Иу бон Иегъовӕ Ионӕйӕн загъта, зӕгъгӕ, сыст ӕмӕ ацу хъомысджын паддзахад Ассирийы сӕйраг сахар Ниневимӕ. Цымӕ йын цы бахӕс кодта? Хъуамӕ адӕмӕн хъусын кодтаид, сӕ нӕргӕ сахар кӕй сӕфдзӕн (Ионӕ 1:1, 2). Фӕлӕ Ионӕ, марадз зӕгъай, Хуыцауы ныхасмӕ байхъуса — лидзынмӕ фӕци! Уый сбадт, Ниневийӕ дард сахар Фарсисмӕ цы нау цыд, ууыл (Ионӕ 1:3).

6. Иегъовӕ Ниневимӕ Ионӕйы цӕмӕн арвыста?

⁶ Ионӕ дӕ зӕрдыл куы ’рбалӕууы, уӕд дзы фыццаджыдӕр цы ахъуыды кӕныс? Ӕгоммӕгӕс пехуымпар дӕм кӕсы? Йӕ хабӕрттӕ йын хорз чи нӕ зоны, уый дзы, бӕгуыдӕр, афтӕ зӕгъдзӕн. Фӕлӕ исты Иегъовӕ Ионӕйы пехуымпарӕй уый тыххӕй равзӕрста, хивӕнд кӕй уыди?! Кӕй зӕгъын ӕй хъӕуы, нӕ! Хорз миниуджытӕ йӕм куыннӕ уыди. Ӕркӕсӕм, Ионӕ пехуымпар уӕвгӕйӕ йӕхи цавӕр адӕймагӕй равдыста, уымӕ.

7. Ионӕ Иегъовӕйы ныхас Израилы цы уавӕрты хъусын кодта ӕмӕ йӕм, уый хынцгӕйӕ, цы зӕрдӕ дарыс?

⁷ Ионӕ Израилы уазалзӕрдӕ адӕмы ’хсӕн бирӕ кӕй фӕфыдӕбон кодта, уый гыццыл хъуыддаг нӕ уыд. Ионӕйы ӕмдугон пехуымпар Амос куыд фыссы, афтӕмӕй израилӕгтӕ уыдысты хъал, хъӕздыг цард уарзаг *. Бӕстӕ фыддзинадӕй байдзаг, фӕлӕ израилӕгтӕм уый нымады дӕр нӕ уыд (Амос 3:13—15; 4:4; 6:4—6). Ахӕм уавӕры дӕр Ионӕ нӕ фӕкъуыхцы. Уый уӕддӕр зӕрдиагӕй ӕххӕст кодта йӕ хӕслӕвӕрд — хъусын кодта Хуыцауы ныхас. Кӕд ды дӕр хорз хабар хъусын кӕныс, уӕд ӕй зондзынӕ, ӕнӕмӕт ӕмӕ уазалзӕрдӕ адӕмимӕ ныхас кӕнын куыд зын у. Раст у, Ионӕ бынтон ӕнаипп нӕ уыд, фӕлӕ нӕ хъуамӕ ма рох кӕна, мӕнгард, ӕнӕхуыцау израилӕгтӕн хъусынгӕнгӕйӕ куыд иузӕрдион ӕмӕ куыд фидар разынд, уый.

8. Израилаг пехуымпармӕ Ниневийы цы ӕнхъӕлмӕ каст?

⁸ Ниневимӕ ацӕуын та ноджы зындӕр хӕслӕвӕрд уыд. Уыцы сахармӕ йӕ фистӕгӕй цӕуын хъуыд 800 километры бӕрц — ӕппынкъаддӕр иу мӕй, ӕмӕ уый ӕнцон кӕцӕй уыдаид. Стӕй уым хъуамӕ ассирийӕгтӕн хъусын кодтаид Хуыцауы ныхас. Ассирийӕгтӕ та зындгонд уыдысты ӕгъатыр, фыдадӕмӕй. Хӕсты-иу адӕмӕн цы митӕ кодтой, уымӕн зӕгъӕн дӕр нӕй. Сӕ хъӕддаг митӕй ма сӕрыстыр дӕр уыдысты. Уӕдӕ диссаг нӕу, Ниневи кӕй схуыдтой «тугзӕйты сахар»! (Наум 3:1, 7, «Мах дуг» № 12, 1999).

9 . Денджыздзаутӕ тыхджын уады куы фӕцӕйсӕфтысты, уӕд Ионӕ йӕхи цавӕр адӕймагӕй равдыста?

⁹ Ионӕ Иегъовӕмӕ нӕ байхъуыста: сбадт науыл, ӕмӕ цы сахармӕ хъуамӕ ацыдаид, уымӕй дарддӕрӕй-дарддӕр кодта. Фӕлӕ йыл Иегъовӕ йӕ къух нӕ ауыгъта, стӕй йын йӕ бӕсты ӕндӕр адӕймаджы дӕр нӕ арвыста. Иегъовӕ йын баххуыс кодта йӕхи ӕрӕмбарынӕн. Денджызыл тыхджын уад сыстын кодта, ӕмӕ Ионӕ цы науыл бадт, уый знӕт уылӕнтӕ сӕ сӕрыл систой. Ионӕйы тыххӕй ӕнаххос адӕм куыд сӕфтысты! (Ионӕ 1:4). Цымӕ Ионӕ цы бакодта? Нӕ йӕ фӕндыд, цӕмӕй денджыздзаутӕ уый тыххӕй бабын уыдаиккой, ӕмӕ сын загъта: «Айсут мӕ, ӕмӕ мӕ денджызы баппарут, ӕмӕ уын уӕд денджыз банцайдзӕн» (Ионӕ 1:12, Иосиф Чепиговскийы тӕлмац, 1870). Ионӕйы уый ныфс ӕппындӕр нӕ уыд, ӕмӕ йӕ денджыздзаутӕ науӕй куы раппарой, уӕд ӕй Иегъовӕ фервӕзын кӕндзӕн (Ионӕ 1:15). Фӕлӕ Ионӕ денджыздзауты фервӕзын кӕныны сӕраппонд разы уыд йӕ уд раттын. Ацы хабӕртты фӕстӕ ма чи зӕгъдзӕн, Ионӕ ныфсджын, сӕрныллӕг ӕмӕ уарзӕгой адӕймаг кӕй нӕ уыд?

10. Иегъовӕ та ногӕй Ионӕйы Ниневимӕ куы арвыста, уӕд цы ’рцыд?

¹⁰ Иегъовӕ Ионӕйы фервӕзын кодта. Чи зоны, исчи хъуыды кӕны, ӕмӕ Ионӕ йӕ миты  тыххӕй Хуыцауы минӕварӕй лӕггад кӕныны аккаг нал уыд. Нӕ, уарзӕгой, хатыргӕнаг Иегъовӕ йӕ ногӕй Ниневимӕ арвыста. Ионӕ Ниневимӕ куы ӕрцыд, уӕд адӕмӕн уӕндонӕй дзурын райдыдта, зӕгъгӕ уын уе ’взӕр хъуыддӕгтӕм Хуыцау ӕркаст ӕмӕ уын уӕ сахар дыууиссӕдз боны фӕстӕ фесафдзӕн (Ионӕ 1:2; 3:4). Ниневийӕгтӕ Ионӕйӕ сау хабар куы фехъуыстой, уӕд ӕрфӕсмон кодтой, ӕмӕ сӕ сахар нӕ бабын.

11. Ионӕмӕ Иегъовӕйы цӕстуынгӕ цӕвиттон кӕй бахъардта, уый цӕмӕй бӕрӕг у?

¹¹ Фӕлӕ уӕддӕр Ионӕйӕн йӕ зондахаст нӕ аивта. Ӕмӕ йын Иегъовӕ сабырӕй, цӕстуынгӕ цӕвиттонӕй бамбарын кодта, уый адӕмӕй уынагдӕр кӕй у, зӕрдӕтӕм кӕй кӕсы (Ионӕ 4:5—11). Ионӕмӕ уыцы ахсджиаг хъуыддаг кӕй бахъардта, уый бӕрӕг у, йӕхи тыххӕй ӕргом кӕй фыста, уымӕй. Кӕй нӕ фефсӕрмы ӕмӕ йӕ аиппыты тыххӕй бӕстон кӕй ныффыста, уый дӕр дзурӕг у йӕ сӕрныллӕгдзинадыл. Рӕдыдтытыл басӕттынӕн та лӕгдзинад хъӕуы!

12. а) Йесо адӕммӕ Иегъовӕйы цӕстӕй кӕй кӕсы, уый цӕмӕй бӕрӕг у? ӕ) Хорз хабар цы адӕмӕн хъусын кӕнӕм, уыдонмӕ цы зӕрдӕ хъуамӕ дарӕм? (Кӕс фӕлгӕты 12 фарсыл.)

¹² Бирӕ ӕнусты фӕстӕ Йесо Чырысти, Ионӕйы хабары тыххӕй цы загъта, уымӕй бӕрӕг уыд, хорз цӕстӕй йӕм кӕй кӕсы. Уый загъта: «Ионӕ куыд уыд киты гуыбыны ӕртӕ боны ӕмӕ ӕртӕ ’хсӕвы, афтӕ Адӕймаджы Фырт уыдзӕн зӕххы зӕрдӕйы ӕртӕ боны ӕмӕ ӕртӕ ӕхсӕвы» (Матфейы 12:40). Ионӕ куы райгас уа, уӕд базондзӕн, иу заман цы фыдуавӕры бахауд, уый Йесо кӕй абарста, цалдӕр боны ингӕны кӕй фӕци, уыимӕ. Уӕдӕ йӕ лӕггадгӕнджытыл сӕ рӕдыдтыты тыххӕй йӕ къух чи нӕ ауигъы, уыцы Хуыцауӕн кӕй лӕггад кӕнӕм, уымӕй амондджын не стӕм? Псаломзарӕггӕнӕг фыста: «Куыд фыд тӕригъӕд кӕны фырттӕн, афтӕ тӕригъӕд кӕны Хицау Уымӕй тӕрсджытӕн. Уымӕн ӕмӕ Уый зоны не сконд, хъуыды кӕны, кӕй стӕм мах сыджыт» (Псалом 102:13, 14). Ӕмӕ уыцы «сыджыты», уыимӕ абон зӕххыл цы ӕнӕххӕст адӕм цӕры, уыдонӕн дӕр  сӕ бон у Хуыцауы сыгъдӕг уды фӕрцы стыр хъуыддӕгты сгуыхын!

Цавӕр адӕймаг уыд Петр

13. Петрӕн йӕ цавӕр миниуджытӕ ӕрцӕуынц фыццаг адӕймаджы хъуыдыйы, фӕлӕ йӕ Йесо апостолӕй цӕмӕн равзӕрста?

¹³ Ныр та цыбыртӕй аныхас кӕнӕм ӕндӕр адӕймагыл, бӕлвырддӕр та апостол Петрыл. Исчи дӕ куы бафӕрсид, зӕгъгӕ, Петр цавӕр адӕймаг уыд, уӕд ын ӕнӕахъуыдыгӕнгӕйӕ зӕгъис: тӕвдтуг ӕмӕ ӕгӕр ныфсхаст. О, хатт-иу йӕхи ахӕмӕй равдыста. Фӕлӕ исты Йесо Петры йӕ апостолӕй уый тыххӕй равзӕрста, тӕвдтуг ӕмӕ ӕгӕр ныфсхаст адӕймаг кӕй уыди? (Лукайы 6:12—14). Кӕй зӕгъын ӕй хъӕуы, нӕ! Йесо йын йӕ аиппытӕм нӕ каст, уый йын уыдта йӕ рӕсугъд миниуджытӕ.

14. а) Петр-иу дзурынмӕ цӕмӕн фӕраздӕр? ӕ) Петр иуыл фарстытӕ кӕй лӕвӕрдта, уый тыххӕй дзы бузныг цӕмӕн хъуамӕ уӕм?

¹⁴ Петр-иу хаттӕй-хатт иннӕ апостолты бӕсты кӕй дзырдта, уымӕ гӕсгӕ йӕ исчи ӕнӕфсарм адӕймаг дӕр схондзӕн. Фӕлӕ уый афтӕ уыд? Куыд зӕгъынц, афтӕмӕй Петр иннӕ апостолтӕй уыд хистӕр; чи зоны, Йесойӕ дӕр хистӕр уыд. Ӕмӕ кӕд афтӕ уыд, уӕд бӕрӕг у, иннӕтӕй-иу цӕмӕн фӕраздӕр ис дзурынмӕ (Матфейы 16:22). Ноджы ма иу хъуыддагмӕ хъӕуы хъус ӕрдарын. Петр Хуыцауы бирӕ уарзта. Ӕппӕт дӕр ӕй кӕй фӕндыд базонын, уый охыл фарстытӕ лӕвӕрдта. Афтӕ кӕй кодта, уый фӕрцы мах дӕр бирӕ цыдӕртӕ базыдтам. Йесо Петры фарстытӕн дзуапп дӕтгӕйӕ загъта тынг бирӕ диссаджы хъуыдытӕ, ӕмӕ уыдон фӕстӕдӕр иууылдӕр фыст ӕрцыдысты Библийы. Дзырдӕн, Йесо «ӕууӕнкджын ӕмӕ ӕмбаргӕ хӕдзармӕгӕсӕджы» тыххӕй цы радзырдта, уый уыд Петры фарстӕн дзуапп (Лукайы 12:41—44). Ахъуыды ма кӕнӕм Петры фарстыл: «Мах ныууагътам ӕппӕт дӕр ӕмӕ ацыдыстӕм Дӕ фӕстӕ; цы уыдзӕнис махӕн?» Ӕмӕ йын Чырысти фидарӕй зӕрдӕ бавӕрдта: «Алкӕцы, чи ныууадза йӕ хӕдзар, кӕнӕ ӕфсымӕрты, кӕнӕ хоты, кӕнӕ фыды, кӕнӕ мады, кӕнӕ усы, кӕнӕ сывӕллӕтты, кӕнӕ зӕххыты, Мӕ номы тыххӕй, райсдзӕн сӕдӕ хатты фылдӕр ӕмӕ райсдзӕн мыггагмӕйы цард» (Матфейы 15:15; 18:21, 22; 19:27—29).

15. Петры ӕнувыд адӕймаг цӕмӕн ис схонӕн?

¹⁵ Петрмӕ ма уыди иу рӕсугъд миниуӕг — ӕнувыддзинад. Иу заман Йесойы йӕ ахуыргӕнинӕгтӕ куы фӕуагътой, йӕ ахуырӕдтӕй йын кӕцыдӕр кӕй нӕ бамбӕрстой, уый тыххӕй, уӕд Петр дыууадӕс апостолы номӕй загъта: «Хицау! кӕмӕ ацӕуӕм? Дӕумӕ ис мыггагмӕйы царды ныхӕстӕ» (Иоанны 6:66—68). Уыцы ныхӕстӕй Йесойы зӕрдӕ хурау куыннӕ ныррухс уыдаид! Фӕстӕдӕр Хицауы ахсынмӕ адӕмы дзыгуыр куы ’рбацыд, уӕд апостолтӕн сӕ фылдӕр алыгъдысты. Фӕлӕ Петр уыцы адӕмы фӕстӕ дӕрддзӕфгомау цыд ӕмӕ бахызт тӕккӕ дӕр хистӕр сауджыны кӕртмӕ. Тӕппуд куы уыдаид, уӕд афтӕ нӕ бакодтаид. Цалынмӕ Йесойы хынцфарст кодтой, уӕдмӕ Петр йӕхи байста, сӕхи артмӕ чи хъарм кодта, уыцы иудейтӕм. Хистӕр сауджыны цагъартӕй йӕ иу базыдта ӕмӕ загъта, зӕгъгӕ дӕ Йесоимӕ федтон. Раст у, Петр йӕ Хицауыл бавдисӕн кодта, фӕлӕ нӕ иу хъуыддаг ма рох кӕнӕд: уыцы тӕссаг уавӕры уымӕн бахауд, ӕмӕ Йесойыл уыд тынг ӕнувыд, стӕй йыл йӕ зӕрдӕ рыст. Иннӕ апостолтӕ та Йесойы фӕдыл рацӕуынмӕ дӕр сӕ ныфс нӕ бахастой (Иоанны 18:15—27).

16. Ионӕ ӕмӕ Петры хорз миниуджытыл цӕмӕ ӕрдзырдтам?

¹⁶ Петрӕн йӕ хорз миниуджытӕ йӕ аиппытӕй фылдӕр уыдысты. Афтӕ зӕгъӕн ис Ионӕйӕ дӕр. Ныр уынӕм, Ионӕ ӕмӕ Петрмӕ цы хорз миниуджытӕ уыд, уыдон. Мах дӕр хъуамӕ нӕхи сахуыр кӕнӕм, нӕ чырыстон  ӕфсымӕртӕ ӕмӕ хоты хорз ӕмӕ рӕсугъдӕй цы ис, уый уынын. Ӕмӕ уӕд кӕрӕдзийӕн уыдзыстӕм адджындӕр. Фӕлӕ афтӕ цӕмӕн хъуамӕ кӕнӕм?

Зондзонӕн не ’ппӕтӕн дӕр

17, 18. а) Чырыстӕттӕ хатт кӕрӕдзи цӕуылнӕ бамбарынц? ӕ) Не ’муырнджытимӕ фидауынӕн нын Библийӕ цавӕр хорз хъуыды ӕххуыс кӕны?

¹⁷ Абон Иегъовӕйӕн ӕмвӕнд-ӕмзондӕй лӕггад кӕнынц алыхуызон адӕм алы адӕмыхӕттытӕй дӕр — нӕлгоймӕгтӕ ӕмӕ сылгоймӕгтӕ, гыццылтӕ ӕмӕ стыртӕ, хъӕздгуытӕ ӕмӕ мӕгуыртӕ, ахуыргондтӕ ӕмӕ ӕнӕахуыргондтӕ (Раргомад 7:9, 10). Алы чырыстон ӕмбырды дӕр тынг бирӕ алыхуызон адӕм ис! Хуыцауӕн уӕхски-уӕхск кӕй лӕггад кӕнӕм, уымӕ гӕсгӕ хаттӕй-хатт, гӕнӕн ис, ӕмӕ-иу кӕрӕдзи ма бамбарӕм (Ромӕгтӕм 12:10; Филиппӕгтӕм 2:3).

¹⁸ Кӕй зӕгъын ӕй хъӕуы, не ’муырнджыты аиппытӕм куыдфӕндыйы цӕстӕй нӕ кӕсӕм, фӕлӕ сӕ сасирӕй дӕр не ’луарӕм. Мах архайӕм Иегъовӕйы фӕзмыныл. Кӕс ма, псаломзарӕггӕнӕг дзы куыд зӕгъы: «Хицау, Ды куы фиппайай ӕнӕзакъондзинӕдтӕ,— Хицау! чи бафӕраздзӕн?» (Псалом 129:3). Не ’фсымӕртӕ ӕмӕ нӕ хотӕм ӕвзӕр миниуджытӕ агурыны бӕсты, мах «агурӕм, фарнӕн ӕмӕ кӕрӕдзийы схуыздӕр кӕнынӕн ахъаз цы у,— уыдӕттӕ» (Ромӕгтӕм 14:19, НФ). Мах архайӕм алкӕмӕдӕр Иегъовӕйы цӕстӕй кӕсын, ома кӕсӕм, ӕвзӕрӕй сӕм цы ис, уымӕ нӕ, фӕлӕ сӕм хорзӕй цы ис, уымӕ. Ӕмӕ афтӕ куы кӕнӕм, уӕд «кӕрӕдзийӕн бардзыстӕм» (Колоссӕгтӕм 3:13).

19. Цы бакӕнын хъӕуы чырыстоны, цӕмӕй кӕрӕдзи кӕимӕ нӕ бамбӕрстой, уыимӕ бафидауа?

¹⁹ Фӕлӕ, де ’муырнӕг ӕфсымӕр кӕнӕ хоимӕ кӕрӕдзи кӕй нӕ бамбӕрстат, уый дын уӕддӕр дӕ уд куы ’хсына, уӕд та? (Псалом 4:5). Бафидауын дӕ нӕ фӕнды? (Уӕвынад 32:13—15). Фыццаг уал Иегъовӕмӕ скув ӕмӕ дзы зонд ракур. Уый фӕстӕ ахъуыды кӕн, уыцы адӕймагмӕ цавӕр хорз миниуджытӕ ис, ууыл, ӕмӕ йемӕ аныхас кӕн «зондджын фӕлмасдзинадимӕ» (Иаковы 3:13). Бафидауын дӕ кӕй фӕнды, уый йын зӕгъ. Дӕ зӕрдыл дар Библийы уынаффӕ: «Алкӕцы адӕймаг уӕд рӕвдз хъусынмӕ, сындӕг ныхӕстӕм, сындӕг мӕсты кӕнынмӕ» (Иаковы 1:19). Уынаффӕ «сындӕг [у] мӕсты кӕнынмӕ» ууыл дзурӕг у, ӕмӕ дӕ гӕнӕн ис адӕймаг смӕсты кӕна йе ныхасӕй, йе та ӕндӕр истӕмӕй. Ӕмӕ ӕцӕгдӕр афтӕ куы рауайа, уӕд Иегъовӕмӕ кув, дӕхиуыл хӕцын куыд фӕразай (Галатӕгтӕм 5:22, 23). Бауадз де ’фсымӕры йӕ дзуринӕгтӕ зӕгъын; лӕмбынӕг ӕм байхъус. Кӕд ын йӕ ныхӕстӕй алцӕуыл разы нӕ дӕ, уӕддӕр ын йӕ ныхас ма фескъуын. Чи зоны, раст нӕ хъуыды кӕны, фӕлӕ уый уӕддӕр йӕ хъуыды у. Хъуыддагмӕ цы цӕстӕй кӕсы, уый бамбар. Уымӕн дӕ, ӕвӕццӕгӕн, бахъӕудзӕн дӕхимӕ де ’фсымӕры цӕстӕй бакӕсын (Ӕмбисӕндтӕ 18:17).

20. Бафидауыныл архайгӕйӕ, исты зӕгъыны размӕ адӕймагмӕ лӕмбынӕг байхъусын цӕмӕн хъӕуы?

²⁰ Ныхас кӕныны рад дӕумӕ куы ’рхауа, уӕд дзур сабыр ӕмӕ лӕгъзӕй (Колоссӕгтӕм 4:6, НФ). Де ’фсымӕрӕн зӕгъ, йӕ удыхъӕды дӕ зӕрдӕмӕ цы цӕуы, уый. Хатыр дзы ракур,  хъуыддаг афтӕ кӕй рауад, уый тыххӕй. Дӕ сӕрныллӕгдзинад бафидауыны хос куы фӕуа, уӕд Иегъовӕйӕн бузныг зӕгъ. Кӕд нӕ, уӕддӕр Иегъовӕйӕ зонд кур ӕмӕ дарддӕр дӕр архай бафидауыныл (Ромӕгтӕм 12:18).

21. Цӕуыл ӕрдзырдтам, уый дын иннӕтӕм Иегъовӕйы цӕстӕй кӕсынӕн куыд баххуыс кодта?

²¹ Иегъовӕйӕн йӕ кувӕг адӕм иууылдӕр зынаргъ сты. Кӕд алцӕмӕй ӕххӕст не стӕм, уӕддӕр ӕй фӕнды, цӕмӕй не ’ппӕт дӕр йӕ къухы хорз мигӕнӕнтӕ уӕм. Хуыцау адӕммӕ цы цӕстӕй кӕсы, ууыл куы ахуыр кӕнӕм, уӕд не ’фсымӕрты ӕмӕ нӕ хоты тынгдӕр уарздзыстӕм. Фӕлӕ нӕ уарзты цӕхӕр куы ӕрмынӕг уа, уӕд ӕй ис фӕстӕмӕ ссудзӕн. Адӕммӕ хорз цӕстӕй, ома Иегъовӕйы цӕстӕй кӕсыныл куы архайӕм, уӕд бирӕ цинтыл ӕмбӕлдзыстӕм!

[Фиппаинӕгтӕ]

Цавӕр дзуапп ратдзынӕ?

• Цы цӕстӕй кӕсы Иегъовӕ йӕ иузӕрдион лӕггадгӕнджыты аиппытӕм?

• Ранымай, Ионӕ ӕмӕ Петрмӕ цы рӕсугъд миниуджытӕ уыд, уыдон.

• Де ’муырнджытӕм цы цӕстӕй кӕсдзынӕ?

[Фарстатӕ ахуыр кӕнынӕн]

[Рамкӕ 12 фарсыл]

Хуыцау адӕммӕ цы цӕстӕй кӕсы, ууыл ахъуыды кӕн

Библийы Ионӕйы тыххӕй цы фыст ис, уый дын ууыл дзурӕг нӕу, ӕмӕ дӕ ныр, хорз хабар кӕмӕн хъусын кӕныс, уыдонмӕ бынтон ӕндӕр цӕстӕй кӕсын кӕй хъӕуы? Чи зоны, уыдон дӕр израилӕгтау сты ӕнӕмӕт ӕмӕ уазалзӕрдӕ, кӕнӕ Хуыцауы ныхас сӕ зӕрдӕмӕ нӕ цӕуы. Фӕлӕ сӕм цымӕ Иегъовӕ Хуыцау цы цӕстӕй кӕсы? Гӕнӕн ис, ӕмӕ абон стыр бынаты чи кусы, уыдонӕй исчи сомбон Иегъовӕмӕ йе ’ргом раздаха, Ниневийы паддзах куыд ӕрфӕсмон кодта Ионӕйы ныхӕсты фӕстӕ, афтӕ (Ионӕ 3:6, 7).

[Ныв 8 фарсыл]

Адӕммӕ Иегъовӕйы цӕстӕй кӕсыс?

[Ныв 10, 11 фарсыл]

Йесо, Ионӕйыл цы хабар ӕрцыд, уым хорзӕй цыдӕр ссардта.