Рагон чырыстӕттӕ ӕмӕ Моисейы Закъон

«Закъон уыдис махӕн сывӕллон кӕнӕгӕй [«сабигӕсау», НФ] Чырыстимӕ» (ГАЛАТӔГТӔМ 3:24).

1, 2. Дзуттӕгтӕй Моисейы Закъон лӕмбынӕг чи ӕххӕст кота, уыдоныл уый хорзырдӕм куыд ӕндӕвта?

НӔ ЭРӔЙЫ агъоммӕ 1513 азы Иегъовӕ дзуттӕгтӕн радта закъӕтты ӕмбырдгонд. Загъта сын, зӕгъгӕ, мӕм куы хъусат, уӕд уын уе ’ппӕт хъуыддӕгтӕ аразӕг уыдзынӕн ӕмӕ уын фарн, амонд нӕ бавгъау кӕндзынӕн (Рацыд 19:5, 6).

² Уыцы закъӕтты ӕмбырдгонд — Моисейы Закъон кӕнӕ, хуымӕтӕгӕй, «закъон» — уыд «сыгъдӕг ӕмӕ раст ӕмӕ хорз» (Ромӕгтӕм 7:12). Адӕймаг уый фӕрцы кодта зӕрдӕхӕлар, ӕууӕнкджын, ӕфсармджын ӕмӕ адӕмуарзон (Рацыд 23:4, 5; Левит 19:14; Дыккаг закъон 15:13—15; 22:10, 22). Закъон ма дзуттӕгтӕн амыдта кӕрӕдзи уарзын дӕр (Левит 19:18). Фӕлӕ сын бар нӕ уыд ӕндӕр адӕмтимӕ иу кӕнын, афтӕ сӕ чызджыты курын дӕр, уымӕн ӕмӕ уыдон уыцы Закъонмӕ гӕсгӕ нӕ цардысты (Дыккаг закъон 7:3, 4). Афтӕ ма Моисейы Закъон дзуттӕгты ӕмӕ мурттаты ’хсӕн уыд «гӕрӕны» хуызӕн дӕр: хъахъхъӕдта Хуыцауы адӕмы муртатты галиу зондӕй ӕмӕ се ’гъдӕуттӕй (Ефесӕгтӕм 2:14, НФ, 15; Иоанны 18:28).

3. Кӕд иу адӕймаджы бон дӕр нӕ уыд, Закъон куыд ӕмбӕлд, афтӕ ӕххӕст кӕнын, уӕддӕр цӕмӕн хъуыд?

³ Фӕлӕ зӕгъын хъӕуы уый, ӕмӕ иууыл ӕгъдауджын дзуттаджы бон дӕр нӕ уыд Хуыцауы Закъон ӕххӕст кӕнын, куыд ӕмбӕлд, афтӕ. Цымӕ цӕуылнӕ? Иегъовӕ сӕ ӕгӕр бирӕ домдта? Нӕ. Дзуттӕгтӕн Закъон, иуӕй, лӕвӕрд ӕрцыд «сӕ фыдракӕндтӕ раргом кӕнынӕн» (Галатӕгтӕм 3:19, НД). Закъоны руаджы сыгъдӕгзӕрдӕ дзуттӕгтӕ ӕмбӕрстой, Ирвӕзынгӕнӕг сӕ ӕнӕмӕнг кӕй хъӕуы, уый. Ӕмӕ куы фӕзынд, уӕд, Хуыцауыл зӕрдӕйӕ чи уыд, уыцы дзуттӕгты цинӕн кӕрон нал уыд. Ныр тагъд, тынг тагъд ссӕрибар уыдзысты тӕригъӕд ӕмӕ мӕлӕтӕй! (Иоанны 1:29).

4. Куыд ӕмбаргӕ у, зӕгъгӕ, Закъон уыд Чырыстимӕ кӕнӕг «сабигӕс»?

⁴ Моисейы Закъон рӕстӕгмӕ уыд. Апостол Павел ӕй йӕ иу фыстӕджы схуыдта Чырыстимӕ кӕнӕг «сабигӕс» (НФ) (Галатӕгтӕм 3:24). Рагзаманты-иу сабигӕсы хӕс уыд сывӕллоны скъоламӕ ӕмӕ фӕстӕмӕ кӕнын. Сывӕллоны-иу кӕсын, фыссын нӕ ахуыр кодта, фӕлӕ-иу ӕй кодта ахуыргӕнӕгмӕ. Моисейы Закъон дӕр лӕвӕрд уыд, дзуттӕгтӕй Хуыцауӕй чи тарсти, уыдоны Чырыстимӕ ӕркӕныны охыл. Йесо йӕ фӕдылдзӕуджытӕн зӕрдӕ бавӕрдта, семӕ кӕй уыдзӕн «ӕппӕт бонты, дунейы фӕуынмӕ» (Матфейы 28:20). Ӕмӕ фыццаг чырыстон ӕмбырд куы фӕзынд, уӕд «сабигӕсы», ома Закъоны сӕр нал хъуыд (Ромӕгтӕм 10:4; Галатӕгтӕм 3:25). Фӕлӕ дзуттӕгтӕй чырыстон чи сси, уыдонӕй иуӕй-иутӕ уыцы ахсджиаг хабар нӕма ӕмбӕрстой. Суанг ма Йесойы райгасы фӕстӕ дӕр Закъонӕй цыдӕртӕ ӕххӕст кодтой. Иннӕтӕ та хъуыддаг бамбӕрстой, ӕмӕ афтӕ нал кодтой. Уымӕй нын сты фӕзминаг. Цӕй уӕдӕ ӕркӕсӕм, уыцы хабӕрттӕ куыд цыдысты, уымӕ.

Чырыстӕтты ахуырӕдтӕ — диссаджы ивддзинӕдтӕ

5. Петрӕн цӕстылуайӕны хъӕлӕс цы загъта ӕмӕ цӕмӕн фӕуыргъуыйау?

⁵ Н. э. 36 азы апостол Петр федта ӕнахуыр цӕстылуайӕн. Уӕлӕрвтӕй йын хъӕлӕс загъта, цӕмӕй, Закъонмӕ гӕсгӕ нӕфӕтчиаг цы мӕргътӕ ӕмӕ цӕрӕгойтӕ уыдысты, уыдонӕй аргӕвда ӕмӕ дзы бахӕра. Петр фӕуыргъуыйау! Никуы ма «бахордта исты нӕфӕтчиагӕй, кӕнӕ чъизийӕ». Фӕлӕ йӕм хъӕлӕс уӕддӕр дзуры: «Хуыцау кӕй ссыгъдӕг кодта, уый ды чъизийыл ма нымай!» (Куыстытӕ 10:9—15, НФ). Петр «Закъон! Закъон!» кӕнын нӕ райдыдта, фӕлӕ йӕ хъуыды аивта. Афтӕ кӕй бакодта, уый фӕрцы йын раргом сты Хуыцауы диссаджы фӕндтӕ.

6, 7. Куыд бамбӕрста Петр, ӕндӕр адӕмыхӕттытӕн йӕ бон кӕй у хъусын кӕнын, ӕмӕ ма фӕстӕдӕр ноджыдӕр цавӕр хатдзӕгтӕм ӕрцыд?

⁶ Хабар та уыд афтӕ: Петр цы хӕдзары ӕрфысым кодта, уырдӕм бацыдысты ӕртӕ лӕджы ӕмӕ йӕм бахатыдысты, цӕмӕй семӕ рацыдаид, Хуыцауыл ӕнувыд чи уыд, уыцы ӕнӕсунӕтгонд ромаг лӕг Корнилимӕ. Петр сӕ мидӕмӕ бахуыдта ӕмӕ сӕ суазӕг кодта. Петр цӕстылуайӕны нысаниуӕг бамбӕрста ӕмӕ дыккаг бон уыцы лӕгтимӕ Корнилимӕ араст. Корнилийы хӕдзары зӕрдиагӕй фӕдзырдта Йесо Чырыстийы тыххӕй. Уым Петр загъта: «Ӕцӕг бамбӕрстон, Хуыцау кӕй нӕ кӕсы цӕсгоммӕ, фӕлӕ алы адӕмы ӕхсӕн, Уымӕй чи тӕрсы ӕмӕ рӕстдзинад чи кӕны, ӕхсызгон у Уымӕн». Йӕ ныхӕстӕй ӕрмӕст Корнилий нӕ, фӕлӕ ма йӕ къабӕзтӕ дӕр ӕмӕ йӕ хӕлӕрттӕ дӕр Йесойыл баууӕндыдысты, ӕмӕ «Сыгъдӕг Уд ӕрцыд се ’ппӕтыл, ныхас хъусджытыл». Петр бамбӕрста, уыцы хъуыддаг Иегъовӕйӕ кӕй уыд, «ӕмӕ сын Йесо Чырыстийы номыл донӕйаргъуыд райсын кодта» (НФ) (Куыстытӕ 10:17—48).

 ⁷ Куыд бамбӕрста Петр, Моисейы Закъонмӕ гӕсгӕ чи нӕ цард, уыцы адӕмыхӕттытӕн сӕ бон кӕй уыд, ӕмӕ Йесо Чырыстийы фӕдылдзӕуджытӕ суой? Уыцы хъуыддагмӕ Хуыцауы цӕстӕй кӕй каст, уый руаджы. Петр куы федта, Хуыцау ӕнӕсунӕтгонд муртаттыл йӕ сыгъдӕг уд кӕй ӕруагъта, ома сӕм йе ’ргом кӕй раздӕхта, уӕд бамбӕрста, кӕй сын ис донаргъуыд исӕн. Петр ма, ӕвӕццӕгӕн, бамбӕрста, ӕндӕр адӕмыхӕттытӕй чырыстон дин чи райста, уыдонӕй Хуыцау кӕй нӕ домдта донаргъуыд райсыны тыххӕй Моисейы Закъон ӕххӕст кӕнын. Уыцы заман куы цардаис, уӕд ды дӕр Петрау дӕ хъуыды аивтаис?

Иуӕй-иутӕ ма цыдысты «сабигӕсимӕ»

8. Иерусалимы цӕрӕг чырыстӕттӕ сунӕт кӕныны хъуыддаджы фӕдыл, Петрӕй хъауджыдӕр, цы дзырдтой ӕмӕ цӕмӕн?

⁸ Петр Корнилийӕ рацыд ӕмӕ араст Иерусалиммӕ. Уым ӕмбырд фехъуыста, ӕнӕсунӕтгонд муртаттытӕ «кӕй райстой Хуыцауы дзырд»; ӕмӕ дзуттӕгтӕй чырыстон чи сси, уыдонӕн уый сӕ зӕрдӕмӕ нӕ фӕцыди (Куыстытӕ 11:1—3). «Сунӕт кӕныны сӕрыл дзурджытӕ» (НД) разы уыдысты, муртаттӕн кӕй ис Йесойы фӕдыл цӕуӕн. Фӕлӕ уӕддӕр уыцы иу дзырд кодтой: фервӕзыны тыххӕй хъуамӕ Закъон ӕххӕст кӕной. Муртакк бӕстӕты та, чырыстон чи сси, ахӕм дзуттӕгтӕй цалдӕр адӕймаджы йедтӕмӕ кӕм нӕ цард, уым сунӕтыл афтӕ тынг нӕ дзырдтой. Ӕртындӕс азы дӕргъы ацы фарсты фӕдыл уыдис дыууӕ хъуыдыйы (1 Коринфӕгтӕм 1:10). Ӕвӕдза, фыццаг чырыстӕтты  уырнындзинадӕн уый цӕй стыр фӕлварӕн уыдаид, уӕлдайдӕр та, дзуттаг хъӕуты ӕмӕ сахарты чи цард, уыдонӕн!

9. Цӕмӕн хъуамӕ ӕрцыдаид лыггонд сунӕт кӕныны фарст?

⁹ Н. э. 49 азы Иерусалимӕй чырыстӕттӕ, Павел кӕм хъусын кодта, уыцы сириаг сахар Антиохимӕ куы ’рцыдысты, уӕд хъуыддаг тӕдзынӕгӕй цыхцырӕгмӕ рахызт. Уыдон ахуыр кодтой, зӕгъгӕ, ӕндӕр адӕмыхӕттытӕй Чырыстийыл чи баууӕндыд, уыдоны Закъонмӕ гӕсгӕ сунӕт кӕнын хъӕуы. Суанг ма Павел ӕмӕ Варнавӕ дӕр семӕ фӕбыцӕу сты! Фарст лыггонд куы не ’рцыдаид, уӕд, дзуттӕгтӕй кӕнӕ ӕндӕр адӕмыхӕттытӕй чырыстон чи сси, уыдонӕй исчи уыцы дин ныууагътаид. Уый тыххӕй бауынаффӕ кодтой, Павел ӕмӕ ма цалдӕр лӕджы кӕй ацӕудзысты Иерусалиммӕ ӕмӕ кӕй бахатдзысты чырыстӕтты разамонӕг советмӕ ацы фарст алыг кӕнынмӕ (Куыстытӕ 15:1, 2, 24).

Бирӕ раныхас-баныхасы фӕстӕ иу хъуыдымӕ ӕрцыдысты!

10. Разамонӕг совет, муртатты цы кӕнын хъӕуы, уый лыггӕнгӕйӕ цӕмӕ ӕркаст?

¹⁰ Ӕфсымӕртӕ ӕрӕмбырд сты, ӕмӕ ӕмбырды рӕстӕджы иутӕ, ӕвӕццӕгӕн, дзырдтой сунӕт кӕнын кӕй хъӕуы, иннӕтӕ та — кӕй нӕ хъӕуы, ууыл. Ӕмӕ кӕд хабар афтӕ уыд, уӕддӕр зондӕй архайдтой. Бирӕ раныхас-баныхасы фӕстӕ апостолтӕ Петр ӕмӕ Павел радзырдтой, Иегъовӕ, сунӕт чи нӕ уыд, уыдоны ’хсӕн цы диссӕгтӕ сарӕзта, уый тыххӕй. Уыдон бамбарын кодтой, Хуыцау йӕ сыгъдӕг уд кӕй ӕруагъта ӕнӕсунӕт муртаттыл дӕр. Бӕлвырдӕй, уыдон ӕрӕвӕрдтой ахӕм фарст: Хуыцау йе ’ргом цы адӕммӕ раздӕхта, уыдоны чырыстон ӕмбырд куыннӕ  хъуамӕ райса? Уый фӕстӕ ахуыргӕнинаг Иаков Библийӕ бакаст скъуыддзаг, ӕмӕ уӕд адӕм иууылдӕр бамбӕрстой, Иегъовӕ уыцы фарсты фӕдыл цы хъуыды кодта, уый (Куыстытӕ 15:4—17).

11. Сунӕт кӕнын хъӕуы ӕви нӕ, уый фӕдыл уынаффӕ рахӕссыныл цы нӕ бандӕвта, ӕмӕ уыцы хъуыддаг Иегъовӕйы зӕрдӕмӕ кӕй фӕцыд, уый цӕмӕй уыди бӕрӕг?

¹¹ Ныр сӕ каст уыд разамонӕг советмӕ. Цымӕ дзуттӕгтӕ кӕй сты, уый тыххӕй сунӕтыл ныллӕудзысты? Нӕ. Уыцы лӕгтӕ уыдысты Хуыцауыл иузӕрдион, ӕмӕ сӕ зӕрдиагӕй фӕндыд Фыстадмӕ хъусын ӕмӕ сын Хуыцауы сыгъдӕг уд цы амыдта, уымӕ гӕсгӕ архайын. Разамонӕг совет раздӕр байхъуыста, ацы фарсты фӕдыл чи цы хъуыды кодта, уымӕ. Уый фӕстӕ ӕмхуызонӕй иу уынаффӕ рахастой: ӕндӕр адӕмыхӕттытӕй чырыстон дин чи райста, уыдоны нӕ хъӕуы сунӕт кӕнын ӕмӕ Моисейы Закъон ӕххӕст кӕнын. Уыцы хабар ӕфсымӕртыл куы айхъуыст, уӕд сӕ цинӕн кӕрон нал уыд, ӕмӕ ӕмбырдтӕ «алы бон фылдӕр кодтой нымӕцӕй». Хуыцау сын бӕлвырд-бӕрӕгӕй цы амыдта, уымӕ чи байхъуыста, уыцы чырыстӕттӕ хорзӕхгонд ӕрцыдысты — Сыгъдӕг Фыстадӕй бӕлвырд дзуапп райстой (Куыстытӕ 15:19—23, 28, 29; 16:1—5). Фӕлӕ ма уӕддӕр уыд иу лыггӕнинаг фарст.

Дзуттӕгтӕй чырыстон чи сси, уыдон та?

12. Цавӕр фарст не ’рцыд лыггонд?

¹² Разамонӕг совет хорз бамбарын кодта, ӕндӕр адӕмыхӕттытӕй чырыстон дин чи райста, уыдоны сунӕт кӕнын кӕй нӕ хъӕуы. Фӕлӕ дзуттӕгтӕй чырыстон чи сси, уыдон та? Разамонӕг советы уынаффӕ ацы хъуыддаджы фӕдыл ницы дзырдта.

13. Афтӕ чи дзырдта, зӕгъгӕ, фервӕзыны тыххӕй Моисейы Закъон ӕххӕст кӕнын хъӕуы, уыдон цӕмӕн рӕдыдысты?

¹³ Дзуттӕгтӕй чырыстон чи сси, уыдонӕй иуӕй-иутӕ «закъоныл ӕнувыд» кӕй уыдысты, уымӕ гӕсгӕ сӕ сывӕллӕтты сунӕт кодтой, стӕй ма Закъонӕй дӕр цыдӕртӕ ӕххӕст кодтой (Куыстытӕ 21:20). Иннӕтӕ та ӕрмӕст ууыл не ’рлӕууыдысты — ныццӕхгӕр сты, зӕгъгӕ, дам, дзуттӕгтӕй чырыстон чи сси, уыдоны фервӕзынӕн, ӕнӕмӕнгдӕр, хъӕуы Закъон ӕххӕст кӕнын. Куыд тынг рӕдыдысты, ӕвӕдза! Зӕгъӕм, чырыстӕттӕ сӕ тӕригъӕдты тыххӕй нывонд куыд хъуамӕ хастаиккой, кӕд ӕмӕ Чырыстийы нывонды фӕстӕ уыдон нал хъуыдысты? Стӕй, Закъонмӕ гӕсгӕ дзуттӕгтӕ иннӕ адӕмыхӕттытӕй сӕхи кӕй хъуамӕ хызтаиккой, уый та? Афтӕ куы уыдаид, уӕд зынгзӕрдӕ чырыстӕттӕн зын уыдаид уыцы уагӕвӕрдтӕ дӕр ӕххӕст кӕнын ӕмӕ сӕ Йесо цӕуыл сахуыр кодта, уый иннӕ адӕмтӕн амонын (Матфейы 28:19, 20; Куыстытӕ 1:8; 10:28) *. Ацы хъуыддагмӕ разамонӕг совет ӕркаст ӕви нӕ, уый бӕрӕг нӕу. Фӕлӕ ӕмбырд уӕддӕр ӕнӕ ӕххуысӕй нӕ баззад.

14. Павел Хуыцауы фӕндӕй цы фыстӕджытӕ ныффыста, уым Закъоны фӕдыл цавӕр амындтӕ уыд?

¹⁴ Уыцы хъуыддаджы фӕдыл дзуапп разамонӕг советӕй не ’рцыд — дзуапп ын уыд, апостолтӕ Хуыцауы фӕндӕй цы фыстӕджытӕ ныффыстой, уыдоны. Дзырдӕн, Павел Ромы цӕрӕг дзуттӕгтӕ ӕмӕ муртаттӕм арвыста иу ахсджиаг фыстӕг. Уым бӕлвырдӕй фыссы, зӕгъгӕ, ӕцӕг дзуттаг уый у, «кӕцы мидӕгӕй у ахӕм, ӕмӕ уый у сунӕт, кӕцы ис зӕрдӕйы... удӕй» (Ромӕгтӕм 2:28, 29). Павел ма уыцы фыстӕджы иу цӕстуынгӕ цӕвиттонӕй бамбарын кодта, чырыстӕттӕ Закъонӕй кӕй ссӕрибар сты, уый. Павел загъта, зӕгъгӕ, уый гӕнӕн нӕй, ӕмӕ сылгоймагӕн дыууӕ лӕджы уа. Фӕлӕ йӕ мой куы амӕла, уӕд йӕ бон у ногӕй смой кӕнын. Афтӕ Павел уыцы цӕвиттонӕй равдыста, сӕрст чырыстӕттӕн сӕ бон кӕй нӕу, Моисейы Закъон дӕр ӕххӕст кӕной ӕмӕ сӕхи Чырыстийы бар дӕр бакӕной. Уыдон хъуамӕ «амардаиккой закъонӕн», науӕд Чырыстиимӕ нӕ баиу уыдаиккой (Ромӕгтӕм 7:1—5).

 Ног фӕтк иуӕй-иутӕ не ’мбарынц

15, 16. Дзуттӕгтӕй чырыстон чи сси, уыдонӕй иуӕй-иутӕ ног фӕтк цӕуылнӕ бамбӕрстой, ӕмӕ адӕймаджы уырнындзинад фидар кӕй хъуамӕ уа, уый уыцы хабар куыд ӕвдисы?

¹⁵ Павел Закъоны фӕдыл цы загъта, уымӕ бафтауӕн дӕр ницыуал уыд ӕмӕ аппарӕн дӕр. Фӕлӕ уӕд, дзуттӕгтӕй чырыстон чи сси, уыдонӕй цымӕ иуӕй-иутӕ уыцы ног фӕтк цӕуылнӕ бамбӕрстой? Иуӕй, уымӕн, ӕмӕ уыцы хъуыддагмӕ Хуыцауы цӕстӕй нӕ кастысты. Дзырдӕн, хъӕбӕр монон хӕринагӕн ӕппындӕр нӕ аргъ кодтой (Дзуттытӕм 5:11—14). Стӕй ӕмбырды фембӕлдтӕ дӕр цух кодтой (Дзуттытӕм 10:23—25). Иннӕмӕй та, сӕ хъуыды кӕй нӕ ивтой, уый, ӕвӕццӕгӕн, баст уыд Закъонӕн йӕхиуыл. Закъон дзырдта, цӕстӕй фенӕн, уырзӕй басгарӕн, къухӕй бавналӕн цӕмӕ уыдис, ахӕм цӕуылдӕрты, зӕгъӕм, кувӕндон ӕмӕ сауджынтӕ. Йӕ уырнындзинад лӕмӕгъ кӕмӕн уыд, уымӕн ӕнцондӕр уыд Закъон ӕххӕст кӕнын, чырыстон дины арф хъуыдытӕ бамбарын нӕ, фӕлӕ, уымӕн ӕмӕ уыцы арф хъуыдытӕ дзырдтой ӕнӕуынгӕ хъуыддӕгтыл (2 Коринфӕгтӕм 4:18).

¹⁶ Иуӕй-иу чырыстӕтты ма Закъон ӕххӕст кӕнын цӕмӕн фӕндыд, уый тыххӕй Павел фыссы йӕ фыстӕджы Галатӕгтӕм. Куыд зӕгъы, афтӕмӕй уыцы адӕймӕгты фӕндыд, цӕмӕй зындгонд диныл хӕст кӕй сты, уый фӕрцы адӕмы цӕсты кадджын уыдаиккой. Иннӕтӕй ма хицӕн кодтаиккой, ӕндӕр алцӕуылдӕр разы уыдысты. Хуыцауы хорзӕх ссарынмӕ нӕ бӕллыдысты, фӕлӕ адӕмы хорзӕх (Галатӕгтӕм 6:12).

17. Закъон ма ӕххӕст кӕнын хъӕуы ӕви нӕ, уый бӕлвырдӕй ӕмбӕрстгонд кӕд ӕрцыд?

¹⁷ Павел ӕмӕ иннӕтӕ Хуыцауы фӕндӕй цы фыстӕджытӕ ныффыстой, уыдон уӕззаузонд чырыстӕттӕ лӕмбынӕг иртӕстой ӕмӕ Закъоны фӕдыл раст хатдзӕгтӕм ӕрцыдысты. Фӕлӕ дзуттӕгтӕй чырыстон дин чи райста, уыдон се ’ппӕт дӕр Моисейы Закъоны хабар бӕлвырд бамбӕрстой ӕрмӕстдӕр н. э. 70 азы. Уӕд Хуыцау бауагъта Иерусалим ӕмӕ кувӕндон ныппырх кӕнын, уыимӕ сауджынты мыггаджы чингуытӕ сӕфты хай бакӕнын. Уӕдӕй фӕстӕмӕ иу адӕймаджы бон дӕр нал уыд Закъоны уагӕвӕрдтӕ иууылдӕр ӕххӕст кӕнын.

Зондзонӕн не ’ппӕтӕн дӕр

18, 19. а) Цӕмӕй нӕ уырнындзинад фидар уа, уый тыххӕй нӕ цы кӕнын хъӕуы ӕмӕ цы та — нӕ? ӕ) Павелыл цы хабар ӕрцыд, уый куыд ӕвдисы, бӕрнон ӕфсымӕрты амындтӕм хъусын кӕй хъӕуы, уый? (Кӕс 16 фарсыл фӕлгӕты.)

¹⁸ Ацы рагон хабӕртты фӕстӕ, чи зоны, дӕ мидзӕрдӕйы сагъӕс кӕныс: Хуыцауы фӕндон бонӕй-бонмӕ куы бӕлвырддӕр кодта, уыцы рӕстӕджы куы цардаин, уӕд ӕз та куыд кодтаин? Фыдӕлтӕй цы баззад, ууыл фидарӕй хӕцыдаин? Ӕви ӕнхъӕлмӕ кастаин, цалынмӕ хъуыддаг бӕстон ӕмбӕрстгонд не ’рцыдаид, уӕдмӕ? Ӕмӕ йыл стӕй фидарӕй ныххӕцыдаин?

¹⁹ Кӕй зӕгъын ӕй хъӕуы, уыцы рӕстӕг куы цардаиккам, уӕд куыд кодтаиккам, уый нӕ иу дӕр нӕ зоны. Фӕлӕ нӕ уӕддӕр алкӕй бон дӕр у ахъуыды кӕнын: абон Библийӕ цы ног хабӕрттӕ раргом вӕййы, уыдон тыххӕй цы фӕдзурын? (Матфейы 24:45). Сыгъдӕг Фыстадӕй исты амындтӕ куы райсӕм, уӕд сӕ феххӕст кӕнын, ӕмӕ афтӕ цӕмӕн хъӕуы кӕнын, уый бамбарыныл фӕархайын? (1 Коринфӕгтӕм 14:20). Стӕй, «ӕгӕр ӕрӕгмӕ» цы фарстӕн цӕуы дзуапп лӕвӕрд, уый Иегъовӕ кӕд бамбарын кӕндзӕн, уымӕ ӕнхъӕлмӕ кӕсын? Абон цы монон хӕринаг исӕм, уый-иу хъуамӕ дзӕбӕх «баууилӕм», цӕмӕй нын «батайа», науӕд «фӕдзӕгъӕл уыдзыстӕм» (Дзуттытӕм 2:1, НФ). Цӕй уӕдӕ Иегъовӕ йӕ Ныхасы, йӕ сыгъдӕг уды ӕмӕ йӕ зӕххон организацийы фӕрцы цы амындтӕ дӕтты, уыдонмӕ дзӕбӕх хъусӕм. Ӕмӕ афтӕ куы кӕнӕм, уӕд нын Иегъовӕ ӕнӕкӕрон амондджын цард нӕ бавгъау кӕндзӕн.

[Фиппаинаг]

Цавӕр дзуапп ратдзынӕ?

• Куыд ӕмбаргӕ у, зӕгъгӕ, Моисейы Закъон уыд Чырыстимӕ кӕнӕг «сабигӕс»?

• Куыд бамбарын кӕнис, цавӕрдӕр ивддзинӕдтӕм Петр ӕмӕ «сунӕт кӕныны сӕрыл дзурджытӕ» алыхуызон цӕмӕн кастысты?

• Иегъовӕ абон ӕцӕгад куыд ӕргом кӕны, уый тыххӕй цы базыдтай?

[Фарстатӕ ахуыр кӕнынӕн]

[Рамкӕ/Ныв 16 фарсыл]

Павел фӕлварӕны йӕхи равдыста сӕрныллӕг адӕймагӕй

Н. э. 56 азы Павел йӕ уацамындон балцы фӕстӕ ӕрцыд Иерусалиммӕ. Ӕмӕ кӕд йӕ куыстӕй райгондӕй баззад, уӕддӕр ӕм ам ӕнхъӕлмӕ каст иу фӕлварӕн. Иерусалимы ӕмбырдмӕ фӕхӕццӕ хабар, Павел кӕй амоны, Закъонӕн тых нал ис, зӕгъгӕ. Хистӕр нӕлгоймӕгтӕ тарстысты, Павелы ныхӕстӕ куы фӕкъуылымпы кӕной, ӕрӕджы дзуттӕгтӕй чырыстон чи сси, уыдоны. Стӕй афтӕ куы ахъуыды кӕной, ӕмӕ чырыстӕттӕ Иегъовӕйы ныхӕстӕн кӕй нӕ аргъ кӕнынц. Ӕмбырды та уыд чырыстон диныл хӕст цыппар дзуттаг лӕджы, уыдон Хуыцауы раз ард бахордтой — ӕвӕццӕгӕн, назорейтӕ кӕй уыдзысты, уый тыххӕй. Ардбахӕрды ӕгъдау кӕронмӕ сӕххӕст кӕнынӕн сӕ хъуыдис кувӕндонмӕ ацӕуын.

Хистӕр нӕлгоймӕгтӕ Павелмӕ бахатыдысты, цӕмӕй уыцы цыппар дзуттагимӕ ацыдаид ӕмӕ сын сӕ хӕрдзтӕ йӕхимӕ райстаид. Уӕдмӕ Павел Хуыцауы фӕндӕй ныффыста дыууӕ фыстӕджы, ӕмӕ дыууӕйы дӕр фыссы, фервӕзыны тыххӕй Закъон ӕххӕст кӕнын кӕй нӕ хъӕуы, уый. Фӕлӕ Павел уӕддӕр иннӕты хъуыдыйӕн аргъ кодта. Уый размӕ ныффыста: «Закъон ӕххӕстгӕнджытӕн уыдтӕн куыд закъон ӕххӕстгӕнӕг, цӕмӕй ссарон закъон ӕххӕстгӕнджыты» (1 Коринфӕгтӕм 9:20—23). Павел Фыстадӕй иу ахсджиаг уагӕвӕрд дӕр никуы фехӕлдта, ӕмӕ зыдта, кӕй нӕ фӕрӕдидзӕн, уыцы хистӕр нӕлгоймӕгты ныхасыл куы сразы уа, уӕд (Куыстытӕ 21:15—26). Цы бакодта, уым ӕвзӕрӕй ницы уыд. Ард хӕрыны ӕгъдӕуттӕ Сыгъдӕг Фыстады ныхмӕ нӕ уыдысты, стӕй кувӕндоны дӕр ӕцӕг Хуыцауӕн куывтой, дзуӕрттӕ ӕмӕ гуымирытӕн нӕ, фӕлӕ. Павелы нӕ фӕндыд, цӕмӕй искӕмӕн цӕлхдур уыдаид, ӕмӕ уый тыххӕй ӕфсымӕрты ныхасыл сразы (1 Коринфӕгтӕм 8:13). Кӕй зӕгъын ӕй хъӕуы, уыцы хъуыддаджы Павелы хъуыд сӕрныллӕгдзинад. Ӕмӕ йӕхи ахӕмӕй кӕй равдыста, уый тыххӕй нӕ цӕсты бирӕ фӕкадджындӕр.

 [Ныв 14, 15 фӕрстыл]

Цасдӕр рӕстӕг Моисейы Закъоны фӕдыл чырыстӕттӕй иутӕ иу дзырдтой, иннӕтӕ та — ӕндӕр.