Фӕсивӕд, Хуыцауӕн аккаг цы у, уый кӕнут!

ИУ ӔМӔ дыууӕ не сты, йӕ бинонтӕ ӕмӕ йе ’мбырд цасдӕр рӕстӕгмӕ ныууадзын кӕй бахъӕуы ӕмӕ ӕндӕр ранмӕ цӕрынмӕ чи ацӕуы, уыцы ӕрыгон чырыстӕттӕ. Иутӕ сӕ фыдыуӕзӕгӕй ацӕуынц, цӕмӕй Хуыцауӕн фылдӕр лӕггад кӕной. Иннӕтӕ та нейтралитеты тыххӕй фӕхауынц сӕ хӕдзӕрттӕй (Исай 2:4; Иоанны 17:16). Кӕмдӕрты та «кесӕр», фӕсивӕдӕй Хуыцауыл иузӕрдион чи у, уыдоны ахӕстоны сбадын кӕны кӕнӕ сӕ ӕхсӕнадон куыстытӕм арвиты * (Маркы 12:17; Титмӕ 3:1, 2).

Нейтралитеты тыххӕй кӕй сбадын кӕнынц, уыдон цасдӕр рӕстӕгмӕ бахауынц фыдгӕнджыты ’хсӕнмӕ. Ӕндӕр цӕйдӕр тыххӕй йӕ фыдыуӕзӕгӕй чи фӕхауд, уыцы фӕсивӕды та, гӕнӕн ис, ӕмӕ бахъӕуа тынг ӕвзӕр ӕмӕ ӕнӕгъдау адӕмы ’хсӕн цардамӕлттӕ кӕнын. Уыцы ӕрыгӕттӕ кӕнӕ ӕндӕр чырыстӕттӕ ахӕм фыдуавӕрты кӕй цӕрынц ӕмӕ кӕй кусынц, уымӕ гӕсгӕ сӕ цы аразын хъӕуы, цӕмӕй зынтӕн ӕмӕ лӕгӕвзарӕнтӕн фӕразой ӕмӕ, «Хуыцауӕн аккаг цы у», уый кӕной? (1 Фессалоникӕгтӕм 2:12). Цы хъуамӕ аразой ныййарджытӕ, цӕмӕй сӕ зӕнӕг, царды зилдухӕнты куы бахауой, уӕд ма фӕцудой? (Ӕмбисӕндтӕ 22:3).

Зындзинӕдтӕ

«Мӕ уарзагзӕрдӕ ныййарджытӕй, мӕ зынаргъ, мӕ хӕлар хистӕр нӕлгоймӕгтӕй кӕй фӕхицӕн дӕн, уый мын уыд тынг зын, стӕй сагъӕстыл сдӕн»,— зӕгъы, йӕ фыдыуӕзӕгӕй 3 аз ӕмӕ 1 мӕймӕ кӕй фӕхицӕн кодтой, уыцы 21-аздзыд Такес *. Уый ма загъта: «Бирӕ хатт-иу мӕхимӕ гыццыл сывӕллоны хуызӕн кастӕн». Йӕ хӕдзары дыууӕ азӕй фылдӕр чи нӕ уыд, уыцы 20-аздзыд лӕппу Петрос ӕргом дзуры: «Царды фыццаг хатт мӕхи бахъуыди хиирхӕфсӕнтӕ ӕмӕ ӕмбӕлттӕ ӕвзарын,— ӕмӕ-иу мын уый алы хатт нӕ фӕрӕстмӕ ис». Уый ма йӕ ныхасмӕ бафтыдта: «Кӕд ноджы сӕрибардӕр адӕймаг сдӕн, уӕддӕр-иу, цы стыр хӕстӕ мыл ӕрӕнцад, уыдонӕй афтӕ стыхстӕн, ӕмӕ диссаг». Хистӕр нӕлгоймаг Тассос фӕбӕрӕг кӕны, ӕрыгон чырыстӕттӕй ахӕм уавӕрты чи бахауы, уыдоны ӕмӕ цы бафиппайдта, уый фӕдыл афтӕ зӕгъы: «Тӕссаг у, ӕнӕуырнджыты ӕнӕпълан ныхӕстӕ, сӕ хъӕддаг ӕмӕ нӕрӕмон митӕ ӕнӕхин ӕмӕ зӕрдӕйӕ лӕмӕгъ ӕрыгӕттыл куы фӕзыной».

Библи нымады дӕр кӕмӕ нӕй, ахӕм адӕмы ’хсӕн цы ’рыгон чырыстӕттӕ цӕры ӕмӕ кусы, уыдон хъуамӕ сӕхимӕ лӕмбынӕг кӕсой, цӕмӕй, се ’мгӕрттӕ цы аллайаг, цы ӕнӕуаг митӕ кӕнынц, ахӕм митӕ кӕнын ма райдайой (Псалом 1:1; 25:4; 118:9). Ахӕм уавӕрты ӕнцон нӕу Библи иудадзыг ахуыр кӕнын, фембӕлдтӕм ӕнӕсцухӕй цӕуын, стӕй хъусын кӕнын дӕр (Филиппӕгтӕм 3:16). Уӕдӕ Хуыцауы хъуыддаджы исты нысӕнттӕ ӕвӕрын ӕмӕ сӕм тырнын та ноджы зындӕр у.

Иузӕрдион ӕрыгон чырыстӕтты, кӕй зӕгъын ӕй хъӕуы, фӕнды сӕ уагӕй дӕр ӕмӕ сӕ ныхасӕй дӕр Иегъовӕйы зӕрдӕ рухс кӕнын. Ӕмӕ куыд зӕрдиагӕй архайынц сӕ уӕларвон Фыды амындыл цӕуын: «Зондджын у, мӕ фырт, ӕмӕ мын мӕ зӕрдӕ рухс кӕн, цӕмӕй мын фидистӕ чи кӕны, уымӕн дзуапп дӕттон» (Ӕмбисӕндтӕ 27:11). Уыдон хорз ӕмбарынц, сӕ уаг, се ’гъдау иннӕтӕн Иегъовӕ ӕмӕ йӕ кувӕг адӕмы айдӕн кӕй у (1 Петры 2:12).

Уыцы фӕсивӕдӕй бирӕтӕ раппӕлинаг сты,  фыццаг ӕнусы цӕрӕг ӕфсымӕрты кӕй фӕзмынц, апостол Павел кӕй тыххӕй куывта, цӕмӕй сӕ «хъуыддӕгтӕй Иегъовӕйы ма худинаг кӕной, фӕлӕ йын алцӕмӕй дӕр йӕ зӕрдӕ райын кӕной..., цӕмӕй кӕронмӕ фидар лӕууой ӕмӕ бирӕфӕразон уой зӕрдӕрайгӕйӕ», уыдоны (Колоссӕгтӕм 1:10, 11, НД). Библийы фыст ис, ӕцӕгӕлон, фыдзӕрдӕ ӕмӕ алыхуызон гуымирытӕн кувӕг адӕмы ’хсӕн цӕргӕйӕ Иегъовӕйы аккаг чи дардта йӕхи, ахӕм кӕстӕрты тыххӕй (Филиппӕгтӕм 2:15).

«Иегъовӕ уыд Иосифимӕ»

Иаков ӕмӕ Рахилы уарзон хъӕбул Иосиф ӕнахъомӕй фӕхаудта йӕ фыдыуӕзӕгӕй. Ныр ӕм йӕ Хуыцаумӕ кувӕг фыды цӕст нал хӕццӕ кодта. Иосифы йе ’фсымӕртӕ ныууӕй кодтой Египетмӕ цагъарӕй. Иосиф разынд ӕнаипп лӕппу: куыстуарзаг, ӕууӕнкджын ӕмӕ ӕфсармджын. Ӕмӕ кӕд, Иегъовӕйӕн чи нӕ куывта, ахӕм лӕджы, Потифары, цумайы лӕппу уыд, уӕддӕр йӕхи равдыста ӕнӕзӕрдӕхудт ӕмӕ зӕрдиаг кусӕгӕй,— ӕмӕ йӕ уый тыххӕй йӕ хицау йӕ хӕдзарӕн уынаффӕгӕнӕгӕй сӕвӕрдта (Уӕвынад 39:2—6). Иосиф йе ’фсарм никуы фесӕфта, Иегъовӕйы хъыджы никуы бацыд. Ӕмӕ йӕ уый тыххӕй кӕд ахӕстоны дӕр бакодтой, уӕддӕр афтӕ нӕ загъта: «Цымӕ мӕхи тухӕнӕй цы марын»? Уый ахӕстоны дӕр йӕ кад дӕлӕмӕ не ’руагъта, ӕмӕ бирӕ рӕстӕг нӕ рацыд, афтӕ йын ахӕстоны бирӕ бӕрнон хъуыддӕгтӕ бахӕсчындӕуыд (Уӕвынад 39:17—22). Хуыцау ын арфӕ кодта ӕмӕ Уӕвынады 39:23 дӕр уымӕн дзырдӕуы, зӕгъгӕ, «Иегъовӕ уыд Иосифимӕ».

Иосифы бинонтӕ, Хуыцауы тас кӕмӕ уыд, уыдон сӕ фырты цур кӕй нал уыдысты, уымӕ гӕсгӕ йын ӕнцон уыдаид, йӕ алыварс цы быныхӕлд муртаттӕ цард, уыдоны хуызӕн суын ӕмӕ бынысӕфт египетӕгты цардӕй цӕрын! Фӕлӕ Иосиф Хуыцауы уагӕвӕрдты сӕрты никуы ахызт, стӕй-иу ӕй кӕд ӕнӕгъдау хъуыддӕгтӕм дӕр цыбӕл кодтой, уӕддӕр йӕхи никуы фегад кодта. Ӕмӕ йын Потифары ус куы дзырдта, цӕмӕй йемӕ схуыссыдаид, уӕд ын фидарӕй загъта: «Куыд хъуамӕ саразон ӕз ахӕм стыр фыддзинад ӕмӕ Хуыцауы раз тӕригъӕд куыд хъуамӕ ракӕнон?» (Уӕвынад 39:7—9).

Абон Иегъовӕйы Ӕвдисӕнты ’хсӕн цы фӕсивӕд ис, уыдон дӕр хъуамӕ Библийы амындмӕ гӕсгӕ знаггадхӕсджытӕй, ӕнӕгъдау хиирхӕфсӕнтӕй, хӕлд нывтӕй ӕмӕ музыкӕйӕ сӕхи дард ласой. Уыдон тынг хорз ӕмбарынц, «Иегъовӕйы цӕстытӕ [кӕй] уынынц ӕппӕт дӕр, уый лӕмбынӕг [кӕй] кӕсы ’взӕртӕм дӕр ӕмӕ хорзтӕм дӕр» (Ӕмбисӕндтӕ 15:3).

Моисейы «тӕригъӕдджынӕй йӕ удыдзӕбӕхӕн ацӕрын» нӕ фӕндыд

Моисей схъомыл фараоны хӕдзары. Фараоны бинонтӕ табу кодтой гуымирытӕн, стӕй бирӕ уарзтой сӕ рӕстӕг сӕ зӕрдӕйы дзӕбӕхӕн ӕрвитын дӕр. Библийы дзырдӕуы: «Уырниадмӕ гӕсгӕ Моисей... бавдисӕн кодта йӕхи фараоны чызджы фырт хоныныл, ӕмӕ йӕм хуыздӕр  фӕкаст Хуыцауон адӕмимӕ иумӕ удхар фӕкӕнын, цӕйнӕфӕлтау рӕстӕгмӕ тӕригъӕдджынӕй йӕ удыдзӕбӕхӕн ацӕрын» (Дзуттытӕм 11:24, 25, НФ).

Ацы дунеимӕ лымӕндзинад цавӕрдӕр хъуыддӕгты пайда у, фӕлӕ у ивгъуыйгӕ. Ӕппын фылдӕр дзы уыцы хорздзинад уыдзӕн, цалынмӕ ацы дуне уа, уӕдмӕ (1 Иоанны 2:15—17). Уӕдӕ хуыздӕр нӕ уаид Моисейы бафӕзмын? Библийы дзырдӕуы, зӕгъгӕ, уый «Ӕнӕуынгӕйы цыма уынгӕ кодта, афтӕ фидар уыд» (Дзуттытӕм 11:27). Йӕ зӕрдӕйӕ никуы хицӕн кодтой, Хуыцауы тас кӕмӕ уыди, уыцы фыдӕлтӕ йын цы удварны бынтӕ ныууагътой, уыдон. Моисей йӕ хъару, йӕ тых ӕмӕ йӕ уд радта ӕрмӕстдӕр Иегъовӕйы фӕндон ӕххӕст кӕнынмӕ (Рацыд 2:11; Куыстытӕ 7:23, 25).

Хуыцауӕй чи тӕрсы, уыцы ӕрыгӕттӕй ӕнӕхуыцау ӕмӕ уазалзӕрдӕ адӕмы ’хсӕнмӕ чи бахауы, уыдоны хъӕуы Библи ахуыр кӕнын, цӕмӕй «Ӕнӕуынгӕйы», ома Иегъовӕйы, хуыздӕр базоной ӕмӕ йӕм бангомдӕр уой. Хуыцауы хъуыддагыл лӕуд куы уой, уыйхыгъд, фембӕлдтӕ куы нӕ цух кӕной, куы хъусын кӕной, уӕд сӕ зӕрдӕйы уыдзӕн монон хӕзнатӕ (Псалом 62:7; 76:13). Уыдон дӕр хъуамӕ Моисейау архайой сӕ уырнындзинад ӕмӕ сӕ ныфс фидар кӕныныл. Стыр ахъаз сын фӕуыдзӕн, сӕ хъуыдытӕ иууылдӕр Иегъовӕйыл куы уой, уый номыл куы фыдӕбон кӕной ӕмӕ йӕ хӕлӕрттӕ куы суой.

Гыццыл чызг скадджын кодта Хуыцауы

Йӕ фыдыуӕзӕгӕй ма чи фӕхауд ӕмӕ йӕхи хорз чи дардта, иу ахӕм ӕнахъом израилаг чызг сириӕгтӕм уацары уыд, Елисей Хуыцауӕн пехуымпарӕй куы лӕггад кодта, уыцы рӕстӕджы. Уыцы чызг сси Сирийы ӕфсады сӕргълӕууӕг Нееманы усы лӕггадгӕнӕг. Йе ’хсины лӕгыл хъотыр кӕй уыд, уый тыххӕй йын загъта: «Тӕхуды, Самарийы цы пехуымпар ис, уымӕ куы ацӕуид мӕ хицау! Уӕд ӕй уый йӕ хъотырӕй сдзӕбӕх кӕнид». Нееман ын йӕ ныхӕстӕм байхъуыста, фӕцыд пехуымпар Елисеймӕ Израилмӕ ӕмӕ йӕ уый йӕ низӕй сдзӕбӕх кодта. Фӕлӕ диссаг уый у, ӕмӕ Нееман райдыдта Иегъовӕйӕн кувын (4 Паддзахӕдты 5:1—3, 13—19).

Ацы гыццыл чызг цы бакодта, уый дзурӕг у, фӕсивӕд Иегъовӕйы сӕ ныхасӕй кӕй хъуамӕ кадджын кӕной, суанг ма сӕ ныййарджытӕ сӕ разы куы нӕ уой, уӕддӕр. Уыцы гыццыл чызг «фыддзых» куы уыдаид кӕнӕ «афтид ныхӕстӕ» кӕнын куы уарзтаид, уӕд йӕ цӕсгом  бахъӕцыдаид, гӕнӕн ын куы фӕци, уӕд Хуыцауы скадджын кӕнын? (Ефесӕгтӕм 5:4; Ӕмбисӕндтӕ 15:2). 20-аздзыд Никос, нейтралитеты тыххӕй йӕ кӕй сбадын кодтой, уый фӕдыл дзуры: «Цалдӕр ӕрыгон ӕфсымӕримӕ ахӕстоны куы уыдыстӕм, уӕд-иу нӕ хъӕууонхӕдзарадон куыстытӕм ӕрвыстой. Нӕ ныййарджытӕ ӕмӕ не ’мбырдӕй уыдыстӕм дард, ӕмӕ бафиппайдтон, уый нӕ ныхасы хъӕдыл кӕй фӕзынд. Нӕ ныхас ма Иегъовӕйӕн кад кӕм хаста». Фӕлӕ хорз у, Никос ӕмӕ иннӕттӕн дӕр кӕй баххуыс кодтой сӕ зӕрдӕмӕ Павелы уынаффӕ айсын: «Ӕнӕфсарм митӕн ӕмӕ алы чъизидзинадӕн ӕмӕ кӕрӕфӕн сӕ ном хъуамӕ ма уа сымахмӕ, сыгъдӕджытӕн куыд аккаг у, афтӕ» (Ефесӕгтӕм 5:3, НФ).

Иегъовӕ сын уыд удӕгас Хуыцау

Рагон Вавилоны Данелы ӕртӕ дзуттаг ӕмбалыл цы хабар ӕрцыд, уый равдыста Йесойы ныхӕсты рӕстдзинад — гыццыл хъуыддаджы ӕууӕнкджын чи у, уый стыр хъуыддаджы дӕр ӕууӕнкджын у (Лукайы 16:10). Уыцы лӕппутӕн, Моисейы закъонмӕ гӕсгӕ цы не ’мбӕлд, уый куы хӕрын кодтой, уӕд сӕ бон уыд зӕгъын, зӕгъгӕ, ай мӕнӕ уацары куы стӕм, уӕд нӕ цы нӕ уадзы. Фӕлӕ се ’ппӕт дӕр бӕрнон цӕстӕй ракастысты уыцы хъуыддагмӕ, кӕд искӕмӕ афтӕ уадиссаг нӕ факастаид, уӕддӕр. Ӕмӕ цы? Уый тыххӕй арфӕгонд ӕрцыдысты! Кӕд иннӕ уацайрӕгтӕ паддзахы фынгӕй хорз хӕринӕгтӕ хордтой, уӕддӕр уыцы лӕппутӕ бирӕ ӕнӕниздӕр ӕмӕ ӕмбаргӕдӕр разындысты. Ацы гыццыл хъуыддӕгты ӕууӕнкджын кӕй разындысты, уый сӕ, кӕй зӕгъын ӕй хъӕуы, бафидар кодта, ӕмӕ сӕ фӕстӕдӕр гуымирыйӕн тыхӕй куы кувын кодтой, уӕд сӕ зӕрдӕ Хуыцауыл не сивтой (Данелы 1:3—21; 3:1—30).

Ацы ӕртӕ лӕппуйӕн Иегъовӕ уыд удӕгас Хуыцау. Ӕмӕ кӕд сӕ фыдыуӕзӕг ӕмӕ раст дины артдзӕстӕй фӕхаудысты, уӕддӕр сӕхи дунейӕ чъизи кӕнын нӕ бауагътой (2 Петры 3:14). Уыдон Иегъовӕйыл афтӕ ӕнувыд уыдысты, ӕмӕ йӕ фӕхъыг кӕныны бӕсты разы уыдысты сӕ удтӕ раттыныл дӕр.

Иегъовӕ дӕ нӕ ныууадздзӕн

Ӕрыгӕттӕ, кӕй уарзынц ӕмӕ кӕуыл ӕууӕндынц, уыдонӕй куы фӕхицӕн вӕййынц, уӕд бирӕ цӕмӕйдӕрты тӕрсын райдайынц, сагъӕстыл свӕййынц ӕмӕ арты судзӕгау фӕкӕнынц. Фӕлӕ цыфӕнды лӕгӕвзарӕны дӕр куы бахауой, уӕддӕр хъуамӕ зоной — Иегъовӕ сӕ нӕ ныууадздзӕн (Псалом 93:14). «Рӕстады тыххӕй куы бахъиамӕт кӕной», уӕд сӕ Иегъовӕ нӕ бауадздзӕн «рӕстдзинады... фӕндӕгтӕй» фӕцудын (1 Петры 3:14, НФ; Ӕмбисӕндтӕ 8:20, «Мах дуг» №12, 1999).

Иегъовӕ ӕдзухдӕр Иосиф, Моисей, израилаг уацайраг чызг ӕмӕ ӕртӕ иузӕрдион дзуттаг лӕппуйы ныфсыл ныфс ӕфтыдта, стӕй сӕ йӕ хорздзинӕдтӕй дӕр цух нӕ уагъта. Абон дӕр Хуыцау йӕ сыгъдӕг уд, йӕ Ныхас ӕмӕ йӕ организацийы руаджы ахъаз кӕны, «хъӕбатырӕй [чи] тох кӕны уырнындзинадыл» (НД), уыдонӕн ӕмӕ сын «мыггагмӕйы цардӕй» зӕрдӕ ӕвӕры (1 Тимофеймӕ 6:11, 12). О, Хуыцауы аккаг хи дарӕн ис, стӕй уый зондджын ми у (Ӕмбисӕндтӕ 23:15, 19).

[Фиппаинӕгтӕ]

[Рамкӕ 31 фарсыл]

НЫЙЙАРДЖЫТӔ, УӔ СЫВӔЛЛӔТТЫ ЦӔТТӔ КӔНУТ!

«Куыд фаттӕ тыхджыны къухы; афтӕ [сты] ӕрыгон фырттӕ» (Псалом 126:4). Милмӕ куы нӕ ныхъхъавай, дӕ фат ӕм куы нӕ ныддарай, уӕд ӕй нӕ акъахдзынӕ. Раст афтӕ, ныййарджытӕ сӕ сывӕллӕттӕн зонд куы нӕ амоной, уӕд стырӕй сӕ бон нӕ бауыдзӕн царды гуыргъахъ фӕндӕгтыл цӕуын (Ӕмбисӕндтӕ 22:6).

Ӕрыгӕттӕ сты тынг сонт, стӕй «лӕппуйы цыбӕлтӕм» ӕмхиц (2 Тимофеймӕ 2:22, НФ). Ӕмӕ Библи дӕр уымӕн фӕдзӕхсы: «Уис ӕмӕ ных бакъуырын — зонды хос; ӕнӕркастӕй цы лӕппу баззайы, уый йӕ мады худинаг кӕндзӕн» (Ӕмбисӕндтӕ 29:15). Ныййарӕг йӕ сывӕллоны ӕгъдауыл куы нӕ ахуыр кӕна, уӕд уый фӕстӕ сывӕллон царды зынтӕн ӕмӕ фӕлварӕнтӕн нӕ фӕраздзӕн.

Чырыстон ныййарджытӕ хъуамӕ сӕ цотӕн ӕргом дзурой, ацы дунейы цӕргӕйӕ адӕймаг цы зындзинӕдтыл ӕмӕ фӕлварӕнтыл сӕмбӕлы, уый тыххӕй, ӕмӕ уыцы хъуыддагмӕ хъуамӕ бӕрнон цӕстӕй кӕсой. Ныййарӕг йӕ сывӕллоны тӕрсын хъуамӕ ма кӕна, фӕлӕ йын уӕзданӕй ӕмбарын кӕна, сӕ хӕдзарӕй ацӕуын ӕй куы бахъӕуа, уӕд цы зын уавӕрты у йӕ бон бахауын, уый. Ахӕм хъомылады фӕрцы, афтӕ ма Хуыцау цы уынаффӕтӕ дӕтты, уыдоны фӕрцы, «ӕвӕлтӕрд дардмӕ уыныныл сахуыр уыдзӕн, ӕрыгон лӕппу зонындзинад ӕмӕ ӕрхъуыдыйӕ фӕхайджын уыдзӕн» (Ӕмбисӕндтӕ 1:4).

Йӕ сывӕллӕттӕн удварны хӕзнатӕ чи дӕтты, уыдон сӕ цӕттӕ кӕнынц царды гуыргъахъ фӕндӕгтыл цӕуынмӕ. Мадӕлтӕ ӕмӕ фыдӕлтӕ сӕ цотимӕ Библи иудадзыг куы ахуыр кӕной, семӕ ӕргом куы ныхас кӕной ӕмӕ сыл куы аудой, уӕд уыдӕтты фӕрцы сӕ сывӕллӕттӕн сӕ бон бауыдзӕн сӕ цард аразын. Цӕмӕй цотӕн фидӕны сӕ бон уа царды фӕндаг айгӕрдын, уый тыххӕй сӕ сӕ ныййарджытӕ хъуамӕ Хуыцауы зондыл аразой, «ма кӕн» дзурын ӕмӕ ных бакъуырын зоной. Ныййарджытӕ, уӕ сывӕллӕттӕн цӕстуынгӕ ӕрмӕг уӕхӕдӕг стут — ӕвдисут сын, дунейы цӕргӕйӕ дӕр адӕймагӕн йӕ бон кӕй у йӕхи дунейӕ хизын, уый (Иоанны 17:15, 16).

[Ныв 29 фарсыл]

Иуӕй-иу ӕрыгон чырыстӕтты бахъӕуы сӕ фыдыуӕзӕгӕй фӕцӕуын.

[Нывтӕ 30 фарсыл]

Исчи уӕ истӕмӕй куы цыбӕл кӕна, уӕд-иу Иосифы бафӕзмут ӕмӕ-иу уе ’фсарм ма фесафут.

[Нывтӕ 32 фарсыл]

Йӕ ныхӕстӕй Иегъовӕйы чи скадджын кодта, уыцы израилаг уацайраг чызджы фӕзмут.