«Бузныг ут»
«Бузныг ут»
«Уӕ зӕрдӕты ӕлдариуӕг кӕнӕд Чырыстийы фарн... Ӕмӕ бузныг ут» (КОЛОССӔГТӔМ 3:15, НД).
1. Куыд хицӕн кӕны чырыстон ӕмбырд, Сайтаны къухы цы дуне ис, уымӕй?
ӔППӔТ дунейы Иегъовӕйы Ӕвдисӕнты 94 600 ӕмбырды фенӕн ис бузныг адӕм. Алы фембӕлд дӕр райдайы ӕмӕ фӕвӕййы куывдӕй, Иегъовӕйӕн бузныджы ныхӕстӕй. Хуыцауӕн кад кӕнынмӕ ӕмӕ сӕ зӕрдӕйы дзӕбӕхӕн ӕмчырыстӕттимӕ ныхас кӕнынмӕ цы ӕрыгӕттӕ ӕмӕ ацӕргӕтӕ, ногӕрбацӕуӕг ӕмӕ бирӕ рӕстӕг лӕггадгӕнӕг Ӕвдисӕнтӕ ӕрбацӕуы, уыдонӕй арӕх фехъусӕн вӕййы «бузныг», «табуафси», йе та ӕндӕр ахӕм ныхӕстӕ (Псалом 132:1). Куыд тынг хицӕн кӕны уый, «Хуыцауы чи нӕ зоны, ӕмӕ Евангелимӕ чи нӕ хъусы», уыцы адӕмы ’хсӕн цы хиуарзондзинад ис, уымӕй! (2 Фессалоникӕгтӕм 1:8, НФ). Мах цӕрӕм ӕбузн дунейы. Ӕмӕ уый диссаг нӕу, уымӕн ӕмӕ ацы дунейы хуыцау у Сайтан Хӕйрӕг, цы у, уымӕй хиуарзон чи у, йӕ сӕрбӕрзонддзинад ӕмӕ змӕнтӕг зондахаст ӕхсӕнады кӕмӕн хъары, уый! (Иоанны 8:44; 2 Коринфӕгтӕм 4:4; 1 Иоанны 5:19).
2. Цӕмӕй нӕ хъӕуы нӕхи хъахъхъӕнын ӕмӕ цавӕр фарстытӕ равзардзыстӕм?
2 Сайтаны дунейы кӕй цӕрӕм, уымӕ гӕсгӕ хъуамӕ нӕхи хъахъхъӕнӕм, цӕмӕй йӕ зондахастӕй ма фӕхъӕстӕ уӕм. Фыццаг ӕнусы апостол Павел Ефесы чырыстӕтты зӕрдыл лӕууын кодта: «Сымах кӕддӕр цардыстут, ацы дунейы ӕгъдаумӕ гӕсгӕ, уӕлдӕфы хицауиуӕггӕнӕг ӕлдары уды фӕндонмӕ гӕсгӕ, ныр ныхмӕлӕуджыты фыртты мидӕг архайӕг, кӕцыты ӕхсӕн кӕддӕр цардыстӕм мах иуылдӕр нӕ буары фӕндӕттӕм гӕсгӕ, буары фӕндӕттӕ ӕмӕ хъуыдытӕ ӕххӕст кӕнгӕйӕ, ӕмӕ ӕрдзӕй уыдыстӕм масты цӕуӕт, куыд иннӕтӕ» (Ефесӕгтӕм 2:2, 3). Абон дӕр бирӕтӕй ис афтӕ зӕгъӕн. Цы саразӕн ис уӕдӕ, цӕмӕй мах дарддӕр дӕр бузныг уӕм? Иегъовӕ нын цавӕр ӕххуыс дӕтты? Ӕцӕгдӕр бузныг кӕй стӕм, уый хъуыддагӕй куыд у нӕ бон ӕвдисын?
Цӕмӕн хъуамӕ уӕм бузныг
3. Иегъовӕйӕ бузныг цӕй тыххӕй стӕм?
3 Сӕйраджыдӕр хъуамӕ бузныг уӕм Иегъовӕ Хуыцауӕй, не Сфӕлдисӕг ӕмӕ нӕ Царддӕттӕгӕй, уӕлдайдӕр та нын рӕдауӕй цы лӕвӕрттӕ кӕны, уыдон тыххӕй (Иаковы 1:17). Алы бон дӕр Иегъовӕйӕн бузныг дзурӕм, удӕгас кӕй стӕм (Псалом 35:10). Нӕ алыварс уынӕм дуне бӕлвырдгӕнӕнтӕ Иегъовӕйы къухты куыстӕн, зӕгъӕм, хур, мӕй ӕмӕ стъалытӕ. Зӕххы пайдайаг къахинӕгты хъӕздыг ӕвӕрӕнтӕ, атмосферӕйы цардӕн ӕнӕмӕнгхъӕугӕ газты раст ӕмхӕццӕ, ӕрдзы буаргъӕдты вазыгджын зилдухтӕ — ӕппӕт адӕттӕ ууыл дзурӕг сты, ӕмӕ нӕ уарзӕгой уӕларвон Фыды раз хӕсджын стӕм. «Бирӕ сарӕзтай Ды, Хицау, мӕ Хуыцау,— зарыд паддзах Давид.— Дӕ диссӕгты ӕмӕ хъуыдыдзинӕдты мах тыххӕй — чи суыдзӕн Дӕу ӕнгӕс! — фӕндыдаид мӕн амонын ӕмӕ дзурын: фӕлӕ уыдон фылдӕр сты нымӕцӕй» (Псалом 39:6).
4. Не ’мбырдты нын хорз хӕлӕрттӕ кӕй ис, уый тыххӕй Иегъовӕйӕн бузныг цӕмӕн хъуамӕ дзурӕм?
4 Кӕд абон зӕхх дзӕнӕт нӕма у, уӕддӕр Хуыцауы лӕггадгӕнджытӕ зӕрдӕрухсӕй цӕрынц монон дзӕнӕты. Нӕ Паддзахады залты, нӕ облӕстон ӕмӕ районон конгрессты мах уынӕм, не ’мчырыстӕттӕ Хуыцауы сыгъдӕг уды дыргъ хъуыддагӕй кӕй ӕвдисынц, уый. Уымӕ гӕсгӕ иуӕй-иу Ӕвдисӕнтӕ, Хуыцауыл тынг чи не ’ууӕнды кӕнӕ та бынтондӕр кӕй нӕ уырны, ахӕм адӕмӕн хъусынгӕнгӕйӕ ӕрхӕссынц, Павел йӕ фыстӕджы Галатӕгтӕм цы ныхӕстӕ ныффыста, уыдон. Фыццаг сын сӕ хъус ӕрдарынц «буары хъуыддӕгтӕм» ӕмӕ сӕ бафӕрсынц, ахӕм хъуыддӕгтӕ нырыккон ӕхсӕнады нӕ уынынц (Галатӕгтӕм 5:19—23). Адӕмӕн сӕ фылдӕр уайтагъд сразы вӕййынц, абон адӕм ахӕмтӕ кӕй сты. Хуыцауы сыгъдӕг уды дыргъы афыст сын куы равдисынц ӕмӕ сӕ бынӕттон Паддзахады залмӕ куы фӕхонынц, цӕмӕй алцыдӕр сӕхи цӕстӕй феной, уӕд сӕ бирӕтӕ уыцы тӕккӕ сразы вӕййынц: «Ӕцӕг у, Хуыцау уемӕ кӕй ис!» (1 Коринфӕгтӕм 14:25, НФ). Ӕмӕ уый канд Паддзахады залы нӕй фенӕн. Кӕдӕмфӕнды ма ацӕуай ӕмӕ 6 милуан Ӕвдисӕнӕй кӕуылфӕнды дӕр ма сӕмбӕлай, уӕддӕр бафиппайдзынӕ, уыдон дӕр афтӕ амондджын ӕмӕ зӕрдӕрухс кӕй сты. Ӕцӕгдӕр, ахӕм хорз хӕлӕрттӕ нын кӕй ис, уый тыххӕй дӕр хъуамӕ бузныг дзурӕм Иегъовӕйӕн, ӕппӕт уыдӕттӕ кӕй сыгъдӕг уды руаджы сты, уымӕн (Софони 3:9; Ефесӕгтӕм 3:20, 21).
5, 6. Хуыцауы ӕппӕты стырдӕр лӕварӕй, ахӕстаргъӕй, бузныг кӕй стӕм, уый нӕ бон куыд у ӕвдисын?
5 Иегъовӕ нын цы балӕвар кодта, уыдонӕй ӕппӕты стырдӕр, ӕппӕты ӕххӕстдӕр лӕвар у йӕ Фырт Йесойы ӕлхӕнӕг нывонд. «Кӕд Хуыцау мах афтӕ бауарзта,— ныффыста апостол Иоанн,— уӕд хъуамӕ мах дӕр нӕ кӕрӕдзи уарзӕм» (1 Иоанны 4:11, НФ). Ахӕстаргъӕй бузныг кӕй стӕм, уый ӕрмӕст, Иегъовӕйы кӕй уарзӕм ӕмӕ дзы бузныг кӕй стӕм, уымӕй хъуамӕ ма ӕвдисӕм, фӕлӕ ма иннӕ адӕмы кӕй уарзӕм, уымӕй дӕр (Матфейы 22:37—39).
6 Бузныг куыд хъуамӕ уӕм, уый тыххӕй ма фылдӕр базонӕн ис, Иегъовӕ рагон Израилмӕ цы ахаст дардта, уымӕ ӕркӕсгӕйӕ. Иегъовӕ израилӕгтӕн Моисейы уылты цы Закъон радта, уый руаджы сӕ бирӕ цӕуылдӕрты сахуыр кодта. «Закъоны зонындзинад ӕмӕ ӕцӕгады рахӕцӕнтӕм» нӕ хъус лӕмбынӕг куы ’рдарӕм, уӕд бирӕ хуыздӕр бамбардзыстӕм Павелы уынаффӕ, «бузныг ут», зӕгъгӕ, ӕмӕ нын йе ’ххӕст кӕнын дӕр ӕнцондӕр уыдзӕн (Ромӕгтӕм 2:20, НД; Колоссӕгтӕм 3:15, НД).
Моисейы Закъонӕй ӕртӕ фӕдзӕхсты — цӕуыл нӕ ахуыр кӕнынц
7. Дӕсӕм хай хӕссыны руаджы израилӕгтӕ, Иегъовӕйӕ бузныг кӕй сты, уый куыд ӕвдыстой?
7 Моисейы Закъоны мидӕг Иегъовӕ израилӕгтӕн радта ӕртӕ фадаты, йӕ хорздзинадӕй бузныг кӕй уыдысты, уый ӕвдисынӕн. Фыццаг, дӕсӕм хай хӕссын. Зӕххы лӕвӕрттӕй дӕсӕм хай, уыимӕ ма «стурвос ӕмӕ лыстӕг фосы» дӕсӕм хай дӕр, уыдысты «табуйаг Иегъовӕйӕн» (Левит 27:30—32). Израилӕгтӕ-иу Иегъовӕйы коммӕ куы кастысты, уӕд-иу сыл йӕ ӕгӕрон арфӕдзинӕдтӕ ӕруагъта. «Уе ’ппӕт фӕллӕйттӕй дӕр мын дӕсӕм хай ӕрбахӕссут мӕ хордонмӕ, цӕмӕй мӕ хӕдзар хойрагӕй цух ма уа. Уӕ хорзӕхӕй, ацы хъуыддаджы мӕ бафӕлварут,— зӕгъы ӕфсӕдты Хуыцау Иегъовӕ,— кӕддӕра уын Ӕз уӕларвон къӕбицы дуӕрттӕ нӕ бакӕнин ӕмӕ уыл мӕ хорзӕхтӕ кӕлгӕуӕлдайӕ нӕ рауадзин» (Малахи 3:10).
8. Барвӕндон лӕвӕрттӕ дӕсӕм хайӕ цӕмӕй хицӕн кодтой?
8 Дыккаг, дӕсӕм хай хӕссынӕй уӕлдай ма Иегъовӕ израилӕгтӕн загъта барвӕндон лӕвӕрттӕ кӕнын дӕр. Уый Моисейӕн бафӕдзӕста, цӕмӕй израилӕгтӕн загътаид: «Ӕз уӕ цы зӕхмӕ кӕнын, уырдӕм куы бацӕуат ӕмӕ уыцы зӕххы кӕрдзынӕй куы хӕрат, уӕд-иу дзы хъуамӕ Иегъовӕйӕн лӕварӕн ӕрхӕссат». Фыццаг тыллӕгӕй «ставд ссад хорӕй цӕджы хуызы конд гуылтӕй» «Иегъовӕйӕн лӕварӕн» хӕссын хъуыди мыггагмӕ. Банысан кӕнын хъӕуы уый, ӕмӕ уыцы фыццаг тыллӕгӕй бӕрӕг хай кӕй нӕ хъуыд хӕссын (Нымӕцтӕ 15:18—21). Фӕлӕ уыцы лӕвӕрттӕ Хуыцауӕн бузныджы оххыл куы хастой, уӕд сӕ фидар ныфс уыд Иегъовӕйы хорзӕхӕй. Ахӕм хъуыддаджы кой ма уыд, Иезекил цӕстылуайӕны цы кувӕндон федта, уым дӕр. Мах кӕсӕм: «Алы фыццаг тыллӕджы сӕрӕй ӕмӕ цӕмӕйдӕриддӕр лӕварӕн хӕссут, алы лӕварӕй дӕр ӕмбӕлы суджынтӕн; ӕмӕ хоры ставд ссады сӕрӕй хъуамӕ дӕттат сауджынӕн, цӕмӕй дӕ хӕдзар арфӕгонд уа» (Иезекил 44:30).
9. Иегъовӕ тыллӕгӕй уадзын кӕй бафӕдзӕхста, уымӕй йӕ адӕмы цӕуыл ахуыр кодта?
9 Ӕртыккаг, Иегъовӕ бафӕдзӕхста, цӕмӕй-иу тыллӕгӕй ныууагътаиккой. «Дӕ зӕххы тыллӕг куы кӕрдай,— фӕдзӕхста Хуыцау,— уӕд дӕ хуымы кӕрон хъуамӕ ма кӕрдай ӕмӕ-иу хуымгӕрдӕны фӕстӕ цы ӕфсиртӕ баззайа, уыдон дӕр хъуамӕ ма ӕмбырд кӕнай. Афтӕ ма дӕ сӕнӕфсирдоны цы баззайа, уый дӕр хъуамӕ ма ӕмбырд кӕнай ӕмӕ сӕнӕфсирдоны цы гагатӕ ӕрхауа, уыдон дӕр ма исай. Уыдон хъуамӕ ныууадзай ӕфхӕрд адӕймагӕн ӕмӕ ӕрцӕуӕггагӕн. Ӕз дӕн Иегъовӕ дӕ Хуыцау» (Левит 19:9, 10). Ӕмӕ та ам дӕр бӕрӕг бӕрц амынд нӕ уыд. Алы израилаг дӕр йӕхӕдӕг скъуыддзаг кодта, мӕгуыртӕн цас ныууадздзӕн, уый. Зондджын паддзах Соломон хорз загъта: «Мӕгуырӕн чи ӕххуыс кӕны, уый Иегъовӕйӕн дӕтты ӕфстау, ӕмӕ йын уый йӕ хорздзинад бафиддзӕн» (Ӕмбисӕндтӕ 19:17). Афтӕ сӕ Иегъовӕ ахуыр кодта мӕгуыр адӕмӕн тӕригъӕд кӕнын ӕмӕ сыл аудын.
10. Израилы адӕм ӕбузн куы систы, уӕд сыл цы ’рцыд?
10 Иегъовӕ израилӕгтӕн арфӕ кодта, ӕнӕзивӕгӕй-иу дӕсӕм хай куы хастой, барвӕндон лӕвӕрттӕ-иу куы кодтой ӕмӕ-иу мӕгуыртӕн куы ӕххуыс кодтой, уӕд. Фӕлӕ Израилы адӕм ӕбузн куы систы, уӕд Иегъовӕйы хорзӕхӕй сӕхи ӕнӕхай фӕкодтой. Уый та сӕ ӕркодта бӕллӕхмӕ ӕмӕ ӕппынфӕстаг уацары дӕр бахаудтой (2 Паралипоменон 36:17—21). Уыдӕттӕй нӕ бон цы у зондӕн райсын?
Бузныг кӕй стӕм, уый куыд ӕвдисӕм
11. Иегъовӕйӕ бузныг кӕй стӕм, уый сӕйраджыдӕр нӕ бон куыд у ӕвдисын?
11 Иегъовӕйы кадджын кӕнын ӕмӕ дзы бузныг кӕй стӕм, уый махӕн дӕр нӕ бон хъуыддагӕй ӕвдисын у нӕ «лӕввӕрттӕй», нӕ мысайнӕгтӕй. Раст у, мах, чырыстӕттӕ, Моисейы Закъоны бын не стӕм ӕмӕ нӕ фосӕй йе та тыллӕгӕй нывӕндтӕ хӕссын нӕ хъӕуы (Колоссӕгтӕм 2:14). Ӕмӕ уӕддӕр апостол Павел дзуттаг чырыстӕтты разӕнгард кодта: «Ӕнӕрынцойӕ хӕсдзыстӕм Хуыцауӕн ӕппӕлды нывонд, ома Уый ном кадджынгӕнджыты дзыхы дыргъ» (Дзуттытӕм 13:15). Иегъовӕйӕн ӕппӕлды нывонд хӕссынӕн нӕ курдиӕттӕ ӕмӕ нӕ фӕрӕзтӕй пайдагӕнгӕйӕ, уацамынды уа ӕви не ’мчырыстӕтты «ӕмбырдты», махӕн нӕ бон у ӕвдисын, нӕ уарзӕгой уӕларвон Фыд, Иегъовӕ Хуыцауӕй зӕрдӕбынӕй бузныг кӕй стӕм, уый (Псалом 25:12). Уыцы хъуыддаджы, израилӕгтӕ Иегъовӕйӕ бузныг кӕй сты, уый куыд ӕвдыстой, уымӕй нӕ бон цы у зондӕн райсын?
12. Дӕсӕм хай хӕссыны хъуыддагӕй нӕ чырыстон хӕстӕ ӕххӕст кӕныны тыххӕй цӕуыл ахуыр кӕнӕм?
12 Фыццаджыдӕр, куыд федтам, афтӕмӕй дӕсӕм хай хӕссыны хъуыддаг ӕнӕмӕнг уыд; алы израилагӕн дӕр уый уыди йӕ хӕс. Махӕн дӕр, чырыстӕттӕн, нӕ хӕс у хъусын кӕнын ӕмӕ чырыстон фембӕлдтӕм цӕуын. Ацы хъуыддӕгтӕ ӕнӕмӕнг хъӕуы аразын. Фӕстаг бонты тыххӕй йӕ зындгонд пехуымпарады Йесо комкоммӕ загъта: «Хъуыстгонд уыдзӕн ацы Паддзахады Евангели ӕппӕт дунейыл, ӕвдисӕнӕн ӕппӕт адӕмтӕн; ӕмӕ уӕд ӕрцӕудзӕн кӕрон» (Матфейы 24:14; 28:19, 20). Чырыстон фембӕлдты тыххӕй апостол Павел Хуыцауы фӕндӕй ныффыста: «Уыдзыстӕм лӕмбынӕг кӕрӕдзимӕ, уарзондзинад ӕмӕ хорз хъуыддӕгтӕм разӕнгард кӕнгӕйӕ; нӕ ӕмбырдтӕ нӕ уадздзыстӕм, иуӕй-иутӕм куыд ис ӕгъдау; фӕлӕ кӕрӕдзийӕн амондзыстӕм, уӕлдайдӕр уынгӕйӕ, уыцы боны ӕрхӕстӕг» (Дзуттытӕм 10:24, 25). Иегъовӕйӕ бузныг кӕй стӕм, уый ӕвдисӕм, цы хӕстӕ ныл и, уыдон зӕрдӕрухсӕй куы ӕххӕст кӕнӕм ӕмӕ сӕ нӕхицӕн стыр кадыл куы нымайӕм: куы хъусын кӕнӕм, иннӕты куы ахуыр кӕнӕм, стӕй ма не ’фсымӕртимӕ фембӕлдтӕ куы нӕ цух кӕнӕм.
13. Барвӕндон лӕвӕрттӕ кӕнын ӕмӕ тыллӕгӕй уадзыны хъуыддӕгтӕй цӕуыл ахуыр кӕнӕм?
13 Уымӕй уӕлдай ма хорз уыдзӕн ӕркӕсын, израилӕгтӕ бузынг кӕй уыдысты, уый цы дыууӕ мадзалӕй ӕвдыстой, уыдонмӕ дӕр — барвӕндон лӕвӕрттӕ кӕнынмӕ ӕмӕ тыллӕгӕй уадзынмӕ. Закъоны уыд бӕлвырд домӕнтӕ дӕсӕм хай хӕссыны тыххӕй, фӕлӕ барвӕндон лӕвӕрттӕ цӕйбӕрц хъуамӕ уыдаиккой ӕмӕ хуымы тыллӕгӕй цас хъуыди ныууадзын, уый фӕдыл бӕлвырд загъд ницы уыд. Уый баст уыд, Иегъовӕйы лӕггадгӕнӕг йӕ зӕрдӕйы куыд бузныг уыд, ууыл. Раст афтӕ, кӕд ӕмбарӕм, хъусын кӕнын ӕмӕ фембӕлдтӕм цӕуын Иегъовӕйы лӕггадгӕнджытӕй алкӕмӕндӕр йӕ сӕйраг хӕс у, уӕддӕр хорз уаид ахъуыды кӕнын: уыцы хъуыддӕгтӕ ӕппӕт зӕрдӕйӕ ӕмӕ ӕнӕзивӕгӕй кӕнӕм? Иегъовӕ нын цыдӕриддӕр сарӕзта, уымӕй зӕрдӕбынӕй бузныг кӕй стӕм, уый равдисынӕн сӕ хорз фадатыл нымайӕм? Нӕ уавӕртӕ нӕ цас амонынц, уымӕ гӕсгӕ ацы хъуыддӕгтӕ ӕнӕзивӕгӕй кӕнӕм? Ӕви сӕ ӕрмӕстдӕр хӕсыл нымайӕм? Кӕй зӕгъын ӕй хъӕуы, ацы фарстытӕн дзуапп хъуамӕ алчи йӕхӕдӕг ратта. Апостол Павел уый афтӕ бамбарын кодта: «Алчидӕр фӕлварӕд йӕ хъуыддаг, ӕмӕ уӕд уыдзӕн ӕппӕлд ӕрмӕст йӕхи мидӕг, фӕлӕ иннӕйы мидӕг нӕ» (Галатӕгтӕм 6:4).
14. Иегъовӕ нӕм нӕ лӕггады цӕмӕ ӕнхъӕлмӕ кӕсы?
14 Иегъовӕ Хуыцау нын тынг хорз зоны нӕ уавӕртӕ. Ӕмбары, нӕ бон цы у ӕмӕ цы нӕу, уый. Йӕ лӕггадгӕнджытӕ зӕрдӕбынӕй цы нывӕндтӕ хӕссынц, стыр уой ӕви гыццыл, уыдонӕн аргъ кӕны. Уый не ’нхъӕлмӕ кӕсы, не ’ппӕтдӕр ын ӕмхуызон нывӕндтӕ кӕй ӕрхӕсдзыстӕм — уӕвгӕ, уый нӕ бон саразын дӕр нӕу. Лӕвӕрттӕ кӕныны фӕдыл апостол Павел Коринфы чырыстӕттӕн загъта: «Кӕд ис зӕрдиагдзинад, уӕд уый ист цӕуы кӕмӕ цы нӕй, уымӕ гӕсгӕ нӕ, фӕлӕ кӕмӕ цы ис, уымӕ гӕсгӕ» (2 Коринфӕгтӕм 8:12). Ацы уагӕвӕрд ахӕссӕн ис, Хуыцауӕн куыд лӕггад кӕнӕм, уымӕ дӕр. Иегъовӕйы цӕсты нӕ лӕггад цас ахады, уый баст у, цас аразӕм, ууыл нӕ, фӕлӕ йӕ куыд аразӕм, ууыл — ома йӕ зӕрдӕрухсӕй ӕмӕ ӕппӕт зӕрдӕйӕ аразӕм ӕви нӕ (Псалом 99:1—5; Колоссӕгтӕм 3:23).
Алкӕддӕр дын пионеры зӕрдӕйы уаг уӕд
15, 16. а) Пионерӕй лӕггад кӕныны хъуыддаг бузныгдзинадимӕ куыд у баст? ӕ) Пионерӕй лӕггад кӕнын йӕ бон кӕмӕн нӕу, уыдонӕн сӕ бон куыд у пионеры зӕрдӕйы уаг ӕвдисын?
15 Иегъовӕйӕ бузныг кӕй стӕм, уый равдисынӕн ис иу арфӕйаг мадзал — ӕххӕстрӕстӕг лӕггад кӕнын райдайын. Нывонддзырдраттӕг лӕггадгӕнджытӕй бирӕтӕ Иегъовӕйы уарзондзинад сӕ зӕрдӕмӕ кӕй айстой ӕмӕ йын йӕ ӕнувыд уарзтӕй бузныг кӕй сты, уымӕ гӕсгӕ сӕ царды стыр ивындзинӕдтӕ скодтой, цӕмӕй Иегъовӕйӕн фылдӕр лӕггад кӕной. Иуӕй-иутӕ пионертӕй лӕггадгӕнгӕйӕ, алы мӕй дӕр рӕстӕмбисӕй 70 сахаты хорз хабар хъусын кӕнынц ӕмӕ адӕмы ӕцӕгадыл ахуыр кӕнынц. Иннӕтӕ та, сӕ уавӕртӕ цӕйдӕрты тыххӕй къуындӕг кӕмӕн сты, рӕстӕгӕй-рӕстӕгмӕ мӕй 50 сахаты лӕггад кӕнынц ӕххуысгӕнӕг пионертӕй.
16 Фӕлӕ, ӕххӕстрӕстӕг ӕмӕ ӕххуысгӕнӕг пионерӕй дӕр йӕ бон кӕмӕн нӕу лӕггад кӕнын, Иегъовӕйы уыцы бирӕ лӕггадгӕнджытӕй та цы ис зӕгъӕн? Бузныг кӕй сты, уый сӕ бон ӕвдисын у, алкӕддӕр сын пионеры зӕрдӕйы уаг куы уа, уымӕй. Куыд? Пионерты куы фидар кӕной, сӕ сывӕллӕтты ахӕм зондыл куы аразой, ӕмӕ сӕ ӕххӕстрӕстӕг лӕггад кӕнын бафӕнда, ӕмӕ сӕ уавӕртӕм гӕсгӕ зӕрдиагӕй куы хъусын кӕной, уӕд. Куыд ӕмӕ цас лӕггад кӕнӕм, уый тынгдӕр баст у, Иегъовӕ мах тыххӕй цы сарӕзта, цы аразы ӕмӕ ма ноджыдӕр цы сараздзӕн, уый нӕ зӕрдӕйы цы бынат ахсы ӕмӕ дзы уый тыххӕй куыд бузныг стӕм, ууыл.
«Зынаргъӕй нӕм цы ис», уый ма ’вгъау кӕнӕм
17, 18. а) «Зынаргъӕй нӕм цы ис», уымӕй нӕ бон куыд у, бузныг кӕй стӕм, уый ӕвдисын? ӕ) Идӕдз усы мысайнагӕн Йесо куыд саргъ кодта ӕмӕ цӕмӕн?
17 «Иегъовӕйы кадджын кӕн, зынаргъӕй дӕм цы ис, уымӕй,— фыст ис Ӕмбисӕндты 3:9,— ӕмӕ цыдӕриддӕр ӕрзайын кӕнай, уымӕн йӕ сӕрӕй». Иегъовӕйы лӕггадгӕнджыты дӕсӕм хай хӕссын нал хъӕуы. Павел фыста Коринфы ӕмбырдмӕ: «Алчидӕр хай кӕнӕд йӕ зӕрдӕ куыд зӕгъы, уымӕ гӕсгӕ, ӕнӕхъынцъымӕй ӕмӕ тыххӕй кӕнӕгау нӕ; уымӕн ӕмӕ барвӕндонӕй дӕттӕджы уарзы Хуыцау» (2 Коринфӕгтӕм 9:7). Паддзахады тыххӕй хорз хабар хъусын кӕныны ӕппӕтдунеон хъуыддагӕн мысайнӕгтӕ куы дӕттӕм, уӕд уымӕй дӕр бӕрӕг уыдзӕн, бузныг кӕй стӕм. Зӕрдӕбынӕй бузныг кӕй стӕм, уымӕ гӕсгӕ уый кӕнӕм иудадзыг, фыццаг ӕнусы чырыстӕттау, гӕнӕн уӕвгӕйӕ, алы къуыри дӕр иуцасдӕр ӕхца рахицӕн кӕнӕм (1 Коринфӕгтӕм 16:1, 2).
18 Иегъовӕйӕ бузныг кӕй стӕм, уый, цас дӕттӕм, уымӕй нӕу бӕрӕг, фӕлӕ цы зӕрдӕйӕ дӕттӕм, уымӕй. Уымӕ Йесо дӕр йӕ хъус ӕрдардта, кувӕндоны хӕзнадоны адӕм сӕ мысайнӕгтӕ куы ӕппӕрстой, уӕд. Йесо мӕгуыр идӕдз усы «дыууӕ лептӕйы сӕвӕргӕ» куы федта, уӕд загъта: «Ӕцӕг зӕгъын сымахӕн, уыцы мӕгуыр идӕдз сеппӕтӕй фылдӕр кӕй сӕвӕрдта; уымӕн ӕмӕ уыдон иууылдӕр сӕвӕрдтой сӕ уӕлдайӕ лӕвар Хуыцауӕн, уый та йӕхи хъуагӕй сӕвӕрдта, хӕрынӕн ӕм цы уыдис, уыдон ӕппӕтдӕр» (Лукайы 21:1—4).
19. Иегъовӕйӕ бузныг кӕй стӕм, уый куыд ӕвдисӕм, ууыл ногӕй ахъуыды кӕнын хорз цӕмӕн у?
19 Цӕй ӕмӕ ацы афӕлгӕсты руаджы ногӕй ахъуыды кӕнӕм, бузныг кӕй стӕм, уый куыд ӕвдисӕм, ууыл. Цымӕ нӕ бон у Иегъовӕйӕн ӕппӕлды нывонд фылдӕр хӕссын, ӕмӕ ма ӕппӕтдунеон хъуыддагӕн ӕхцайӕ фылдӕр ӕххуыс кӕнын? Цалынмӕ афтӕ кӕнӕм, уӕдмӕ нӕ бон у фидарӕй ӕууӕндын, ӕмӕ нӕ рӕдау, уарзӕгой Фыд, Иегъовӕ, разы кӕй уыдзӕн, бузныг дзы кӕй стӕм, уый куыд ӕвдисӕм, уымӕй.
Бахъуыды кодтай?
• Цӕмӕ гӕсгӕ хъуамӕ уӕм бузныг Иегъовӕйӕ?
• Цӕуыл ахуыр кӕнӕм дӕсӕм хай хӕссын, барвӕндон лӕвӕрттӕ кӕнын ӕмӕ тыллӕгӕй уадзыны фӕдзӕхстытӕй?
• Пионеры зӕрдӕйы уаг нын и, зӕгъгӕ, кӕд ис зӕгъӕн?
• «Зынаргъӕй нӕм цы ис», уымӕй нӕ бон куыд у, Иегъовӕйӕ бузныг кӕй стӕм, уый ӕвдисын?
[Фарстатӕ ахуыр кӕнынӕн]
[Нывтӕ 29 фарсыл]
«Алкӕцы хорз лӕвар ӕмӕ алкӕцы ӕххӕст лӕвар ӕрцӕуы уӕлейӕ».
[Нывтӕ 30 фарсыл]
Закъонӕй ам цы ӕртӕ фӕдзӕхсты сты нывгонд, уыдонӕй цӕуыл ахуыр кӕнӕм?
[Нывтӕ 31 фарсыл]
Цавӕр нывӕндтӕ у нӕ бон хӕссын?
