Ма фӕсайды ут

«Кӕсут, цӕмӕй уӕ мачи аздаха... афтид сайдӕй» (КОЛОССӔГТӔМ 2:8).

1—3. а) Абон адӕм кӕрӕдзи кӕй сайынц, уымӕн цавӕр цӕвиттонтӕ ис? ӕ) Мӕнгдзинад дунейыл афтӕ тынг кӕй ахӕлиу, уый нӕм диссаг цӕуылнӕ хъуамӕ кӕса?

«ЙӔ КЛИЕНТТӔ уӕ гӕды ныхӕстӕ кӕмӕн нӕ кодтой?» Цалдӕр азы размӕ иу профессор ацы фарст лӕвӕрдта бирӕ адвокаттӕм. Ӕмӕ цы базыдта? «Цалдӕр минӕй ӕрмӕстдӕр иу адвокатӕн йӕ клиенттӕ гӕды ныхӕстӕ никуы кодтой»,— загъы профессор. Афтӕ куыд рауад? «Уыцы адвокат стыр фирмӕйы бынтон ӕрӕджы райдыдта кусын ӕмӕ йӕм нырма иу клиент дӕр не ’рбацыд». Ацы хабар ирдӕй ӕвдисы иу бӕлвырд хъуыддаг: нӕ дуг сси сайыны ӕмӕ гӕды ныхӕстӕ кӕныны дуг.

² Абон адӕм кӕрӕдзи цынӕ хуызӕтты ӕмӕ цӕмӕй нӕ сайынц, ахӕмӕй ницыуал ис. Дзыллон хабархӕссӕг фӕрӕзты уый тыххӕй бирӕ цӕвиттонтӕ ис, зӕгъӕм: политиктӕ сӕ куысты тыххӕй рӕстытӕ нӕ дзурынц, бухгалтертӕ ӕмӕ юристтӕ сӕ куыстуӕтты ӕфтиӕгтыл ӕфтауынц, рекламӕгӕнджытӕ фӕлхасгӕнджыты сайынц, тӕрхондӕтты адӕм фӕдзӕхстадон компаниты фӕливынц, ӕмӕ сӕ дарддӕр куы нымайӕм, уӕд сын кӕрон нӕ уыдзӕн. Зӕгъын хъӕуы динты мӕнгдзинады тыххӕй дӕр. Дины кусджытӕ адӕмы сайынц мӕнг ахуырӕдтӕй, зӕгъгӕ, дам, уд ӕнӕмӕлгӕ у, артын зындон ис, ӕмӕ, дам, Хуыцау Ӕртӕиууон у (2 Тимофеймӕ 4:3, 4).

³ Ахӕм цыдӕртыл дис кӕнын хъӕуы? Ӕппындӕр нӕ. «Фӕстаг бонты» тыххӕй нӕ Библи фӕдзӕхсы: «Знӕт адӕмтӕ ӕмӕ сайӕгойтӕ ӕвзӕрдзинӕдты сгуыхдзысты, ӕмӕ афтӕмӕй фӕрӕдийын-иу кӕндзысты иннӕты, сӕхӕдӕг дӕр-иу рӕдийдзысты» (2 Тимофеймӕ 3:1, 13, НФ). Мах, чырыстӕттӕ, хъуамӕ къӕрцхъус уӕм, цӕмӕй нӕ цавӕрдӕр мӕнг хъуыдытӕ ӕцӕгады фӕндагӕй ма фӕиппӕрд кӕной. Уый фӕдыл адӕймагмӕ ӕвзӕры дыууӕ фарсты: цӕмӕн ахӕлиу мӕнгдзинад афтӕ тынг дунейыл? Ӕмӕ цӕмӕй ма фӕсайды уӕм, уый тыххӕй цы хъӕуы?

Цӕмӕн ахӕлиу мӕнгдзинад афтӕ тынг дунейыл?

4. Мӕнгдзинад дунейыл кӕй ахӕлиу, уый Библи куыд ӕмбарын кӕны?

⁴ Мӕнгдзинад дунейыл цӕмӕн ахӕлиу, уый Библи хорз ӕмбарын кӕны. Апостол Иоанн фыста, зӕгъгӕ, «ӕппӕт дуне ис Фыдбылызы къухы» (1 Иоанны 5:19, НД). Уыцы «Фыдбылыз» у Сайтан Хӕйрӕг. Йесо уый тыххӕй афтӕ загъта: «Уый... нӕ бафӕрӕзта ӕцӕгады, уымӕн ӕмӕ йӕм нӕй ӕцӕгад; уый мӕнг куы дзуры, уӕд йӕхион дзуры, уымӕн ӕмӕ уый у мӕнгдзурӕг ӕмӕ мӕнгдзинады фыд». Уӕдӕ ацы дуне йӕ «ӕлдары» зондыл кӕй цӕуы, алцӕмӕдӕр уый цӕстӕй кӕй кӕсы ӕмӕ йӕ кӕй фӕзмы, уый нӕм диссаг хъуамӕ кӕса? (Иоанны 8:44; 14:30; Ефесӕгтӕм 2:1—3).

5. Ацы фӕстаг бонты Сайтан куыд архайы ӕмӕ йӕ тыхтӕ тынгдӕр кӕмӕ сарӕзта?

 ⁵ Ацы фӕстаг бонты Сайтан цъилау зилы, алырдӕм лӕбуры. Уый зӕхмӕ ӕппӕрст ӕрцыд. Зоны йӕ, бирӕ рӕстӕг ын кӕй нал баззад ӕмӕ «знӕтӕй судзы». Фӕнды йӕ адӕмы иууылдӕр аныхъуырын ӕмӕ уый тыххӕй «ӕппӕт дунейы фӕливы» (Раргомад 12:9, 12, НФ). Сайтан хуымӕтӕджы фӕлитой нӕу. Уый йӕ тыхтӕ уӕлдай тынгдӕр скодта адӕммӕ, цӕмӕй сӕ афӕлива *. Ӕнӕуырнджыты зӕндтӕ бакуырм кӕнынӕн ӕмӕ сӕ Хуыцауӕй аздахынӕн алы амалӕй дӕр пайда кӕны ӕмӕ ма гӕды ныхӕстӕ ӕмӕ мӕнгард митыл дӕр нӕ ауӕрды (2 Коринфӕгтӕм 4:4). Ацы хинӕйдзаг йӕ бицъынӕг скъуыны, Хуыцауӕн «удӕй ӕмӕ ӕцӕгадӕй» чи кувы, уыдоны аныхъуырыныл (Иоанны 4:24; 1 Петры 5:8). Ма рох кӕнут Сайтаны ныхӕстӕ, зӕгъгӕ, дам, кӕй фӕнды дӕр Хуыцауӕй аздахдзынӕн (Иов 1:9—12). Ӕркӕсӕм ма Сайтаны «хин митӕм» ӕмӕ базонӕм, куыд сӕ ис хи бахизӕн (Ефесӕгтӕм 6:11).

Раст дин ныууадзджытӕ уӕ ма асайӕнт

6, 7. а) Раст дин ныууадзджытӕ цы фӕдзурынц? ӕ) Раст дин ныууадзджытӕм цы фӕнд ис, уый Библи куыд ӕргом кӕны?

⁶ Рагӕй фӕстӕмӕ Сайтан раст дин ныууадзджыты руаджы архайы Хуыцауы лӕггадгӕнджыты раст фӕндагӕй аздахыныл (Матфейы 13:36—39). Уыцы адӕм дзургӕ дӕр фӕкӕнынц, зӕгъгӕ, мах дӕр Иегъовӕйӕн кувӕм кӕнӕ Библийыл ӕууӕндӕм, фӕлӕ Иегъовӕйы зӕххон организацийыл сӕхи атигъ кодтой. Чидӕртӕ дзы фӕстӕмӕ ныххӕцыдысты, Хуыцауы ном ӕгадгӕнӕг «стыр Вавилоны» (мӕнг дины дунеон империйы) ахуырӕдтыл (Раргомад 17:5; 2 Петры 2:19—22). Хуыцауы фӕндӕй Библи фысджытӕ карзӕй ӕфхӕрынц дин ныууадзджыты фӕндтӕ ӕмӕ сӕ хин митӕ.

⁷ Раст дин ныууадзджыты цы хъӕуы? Бирӕтӕ кӕддӕр раст дин кӕй ныууагътой, уый сын ӕгъгъӕд нӕу, фӕлӕ ма сӕ фӕнды иннӕты дӕр сӕ фӕдыл акӕнын. Сӕхицӕн ахуыргӕнинӕгтӕ нӕ агурынц ӕмӕ сӕ нӕ цӕттӕ кӕнынц, фӕлӕ «ахуыргӕнинӕгты [ома Чырыстийы ахуыргӕнинӕгты] сӕ фӕдыл акӕныныл» сӕ уд хъарынц (Куыстытӕ 20:29, 30). Мӕнг ахуыргӕнджыты тыххӕй апостол Павел тынг фӕдзӕхста: «Кӕсут, цӕмӕй уӕ мачи аздаха... афтид сайдӕй» (Колоссӕгтӕм 2:8). Раст дин ныууадзджытӕй бирӕтӕ исты ууыл нӕ архайынц? Мӕнӕ адӕмы чи давы, уый кӕйдӕр йӕ бинонтӕй ӕнӕнхъӕлӕджы куыд радавы, афтӕ раст дин ныууадзджытӕ дӕр дзугӕй, ома ӕмбырдӕй, искӕй раскъӕфыны тыххӕй, цуан кӕнынц ӕнцонфӕсайӕн хъусынгӕнджытыл.

8. Раст дин ныууадзджытӕ цавӕр хиндзинадӕй фӕархайынц?

⁸ Раст дин ныууадзджытӕн сӕ фыдвӕндтӕ сӕ къухы куыдӕй бафтынц? Арӕх дӕр, хабӕрттӕ сзыгъуыммӕ кӕнынц, гӕдыбыд ныхӕстӕ фӕкӕнынц кӕнӕ ӕргом фӕсайынц. Йесо зыдта, «ӕнаххосӕй [йӕ фӕдылдзӕуджыты] фыдгой кӕй кӕндзысты», уый (Матфейы 5:11). Ацы фыдгултӕ искӕуыл сайдӕй рацӕуыны охыл фӕкӕнынц мӕнг ныхӕстӕ. Апостол Павел фӕдзӕхста, «мӕнг ныхӕстӕ» чи кӕндзӕн, «мӕнг ахуырӕдтӕ» (НД) чи парахат кӕндзӕн ӕмӕ сӕ зӕрдӕйы фӕндтӕ сӕххӕст кӕныны тыххӕй Фыстад чи «зыгъуыммӕ кӕндзӕн», ахӕм фыдгултӕй (2 Петры 2:3, 13; 3:16). Хъыгагӕн, раст дин ныууадзджытӕ кӕйдӕрты «уырнындзинад фехӕлдтой» (2 Тимофеймӕ 2:18).

9, 10. а) Цы кӕнын нӕ хъӕуы, цӕмӕй нӕ раст дин ныууадзджытӕ ма афӕливой? ӕ) Хуыцауы фӕнды фӕдыл цыдӕр ног ӕмбарынад куы фӕзыны, уӕд нӕм диссаг цӕуылнӕ фӕкӕсы?

⁹ Цӕмӕй нӕ раст дин ныууадзджытӕ ма асайой уый тыххӕй цы хъӕуы? Байхъусын хъӕуы Хуыцауы Ныхасы амындмӕ: «Хъахъхъӕнут уӕхи хицӕндзинад ӕмӕ рӕдийындзинӕдтӕ аразджытӕй, цӕуыл сахуыр стут, уыцы ахуырады ныхмӕ, ӕмӕ иуварс ут уыдонӕй» (Ромӕгтӕм 16:17, НФ). Нӕхи сӕ «иуварс кӕнӕм», ома сын сӕ ныхӕстӕм ма хъусӕм, фӕнды нын сӕ сӕхӕдӕг дзурой, фӕнды мыхуыр уой, йе та — Интернеты. Афтӕ цӕмӕн хъуамӕ кӕнӕм? Фыццаджыдӕр уымӕн, ӕмӕ Хуыцауы Ныхас афтӕ амоны, стӕй Иегъовӕйы  нӕ хорз йеддӕмӕ не ’взӕр нӕ фӕнды (Исай 48:17, 18).

¹⁰ Дыккаджы та, мах бирӕ уарзӕм, Стыр Вавилонӕй нӕ цы хицӕн кӕны, уыцы ӕцӕгад нын цы организаци бацамыдта, уый. Уыимӕ ма ӕмбарӕм, Хуыцауы фӕндтӕ кӕронмӕ кӕй нӕ зонӕм; стӕй азтӕ куыд цӕуынц, афтӕ иуӕй-иу ахуырӕдты ӕмбарынад дӕр ивы. Иузӕрдион чырыстӕттӕ цӕттӕ сты ӕнхъӕлмӕ кӕсынмӕ, цалынмӕ цавӕрдӕр ахуырад Иегъовӕ хуыздӕр нӕ бамбарын кӕна (Ӕмбисӕндтӕ 4:18). Уӕдӕ Хуыцау кӕй уарзы, уыцы организаци никуы ныууадздзыстӕм, уымӕн ӕмӕ йӕ нӕхи цӕстӕй уынӕм, куыд ын ахъаз кӕны, уый (Куыстытӕ 6:7; 1 Коринфӕгтӕм 3:6).

Дӕхӕдӕг дӕхи ма сай

11. Ӕнӕххӕст адӕймаг йӕхӕдӕг йӕхи цӕмӕн фӕсайы?

¹¹ Ӕнӕххӕст адӕймагмӕ ис иу ӕвзӕр миниуӕг — хи сайын,— ӕмӕ дзы Сайтан пайда кӕны. «Адӕймаджы зӕрдӕйӕ мӕнгарддӕр ӕмӕ хӕлддӕр ницы ис»,— дзырдӕуы Иеремийы 17:9. Иаков та фыста, зӕгъгӕ, «алчи дӕр ацардыд фӕвӕййы, сцыбӕлгонд йӕхи фыдмондӕгтӕй, ӕмӕ сӕ фӕдыл ацӕугӕйӕ» (Иаковы 1:14, НФ). Кӕд нӕ зӕрдӕ истӕмӕй сцыбӕл, уӕд нӕ тӕригъӕдмӕ ласдзӕн ӕмӕ нӕ сабыр кӕндзӕн, зӕгъгӕ, дам, уым ӕвзӕрӕй ницы ис. Афтӕ чи хъуыды кӕны, уый йӕхӕдӕг йӕхи сайы, уымӕн ӕмӕ тӕригъӕд чи аразы, уый сӕфты фӕндагыл лӕууы (Ромӕгтӕм 8:6).

12. Адӕймаг хисайыны хызы куыд бахауы?

¹² Хи сайыны хызы зын бахауӕн нӕу. Мӕнгард зӕрдӕ йӕхи рӕстытӕ кӕнын райдайы, адӕймагмӕ исты стыр хъӕндзинад куы вӕййы кӕнӕ стыр тӕригъӕд куы саразы, уӕд (1 Паддзахӕдты 15:13—15, 20, 21). Нӕ хӕлд зӕрдӕ ма раст фӕкӕны ӕнӕгъдаудзинад дӕр. Цӕвиттонӕн ӕрхӕссӕм хиирхӕфсӕнтӕ. Иуӕй-иутӕ дзы сты хорз ӕмӕ зӕрдӕ хъӕлдзӕг кӕнынц. Фӕлӕ ацы дуне цы хиирхӕфсӕнтӕ хъары,— киноты, телералӕвӕрдты ӕмӕ Интернеты,— уыдонӕн сӕ фылдӕр сты ӕлгъаг ӕмӕ хӕлд. Уыцы ралӕвӕрдтӕ нын зиан не ’рхӕсдзысты ӕмӕ сӕм сӕрибарӕй кӕсӕн ис, зӕгъгӕ, ууыл хи баууӕндын кӕнын зын нӕу. Чи зоны исчи зӕгъа, зӕгъгӕ, кӕд мӕм худинаг нӕ кӕсы, уӕд дзы ӕвзӕрӕй цы ис? Фӕлӕ афтӕ чи фӕдзуры, уый йӕхӕдӕг йӕхи сайы (Иаковы 1:22).

13, 14. а) Нӕ зӕрдӕ алыхатт ӕууӕнкджын кӕй нӕ разыны, уымӕн Фыстады цавӕр цӕвиттон ис? ӕ) Цы кӕнын нӕ хъӕуы цӕмӕй нӕхӕдӕг нӕхи ма сайӕм?

¹³ Цӕмӕй хисайыны хызы ма бахауӕм, уый тыххӕй цы хъӕуы? Сӕйраджыдӕр нӕ нӕ зӕрдыл дарын хъӕуы иу хъуыддаг — адӕймаджы зӕрдӕ алкӕд ӕууӕнкджын нӕ разыны. Ӕркӕсӕм ма апостол Павелы хабармӕ.  Цалынмӕ чырыстон не сси, уӕдмӕ Чырыстийы фӕдылдзӕуджыты карзӕй ӕфхӕрдта (Куыстытӕ 9:1, 2). Уыцы заманты йыл, ӕвӕццӕгӕн, йӕ зӕрдӕ нӕ худт. Фӕлӕ, раст кӕй нӕ кодта, уый бӕлвырд у. «Афтӕ кодтон нӕзонгӕйӕ, ӕнӕуырнындзинады [тыххӕй]»,— загъта Павел (1 Тимофеймӕ 1:13). Уӕдӕ кӕд цавӕрдӕр хиирхӕфсӕнтӕй нӕхи ирхӕфсӕм ӕмӕ нӕм худинаг нӕ кӕсы, уӕд уый ууыл дзурӕг нӕу ӕмӕ раст фӕндагыл лӕууӕм. Хорз зондамонӕг нын уыдзӕн ӕрмӕстдӕр Хуыцауы Ныхасмӕ гӕсгӕ фӕлтӕрд зӕрдӕ.

¹⁴ Цӕмӕй нӕхӕдӕг нӕхи ма сайӕм, уый тыххӕй нӕ нӕ зӕрдӕмӕ айсын хъӕуы цалдӕр хорз уынаффӕйы. Хуыцаумӕ скув ӕмӕ афтӕмӕй дӕ зӕрдӕмӕ ныккӕс (Псалом 25:2; 2 Коринфӕгтӕм 13:5). Дӕ зӕрдӕмӕ лӕмбынӕг куы ныккӕсай, уӕд базондзынӕ, дӕ зонд ӕмӕ дӕ дӕ уагахасты цы фӕивын хъӕуы, уый. Иннӕтӕм хъус (Иаковы 1:19). Нӕ зӕрдӕмӕ куы ныккӕсӕм, уӕд кӕмдӕрты цӕмӕйдӕрты нӕхи арӕстытӕ кӕнӕм, фӕлӕ хорз уаид, ӕмӕ фӕлтӕрд чырыстӕтты ныхасмӕ куы хъусиккам, уымӕн ӕмӕ уыдон дзурынц цы уынынц, уый. Уӕззаузонд, фӕлтӕрд чырыстонмӕ бынтон раст чи нӕ фӕкӕсдзӕн, кӕд, мыййаг, исты ахӕм аразыс, кӕнӕ дӕм саразыны фӕнд ис, уӕд дӕ ахъуыды кӕнын хъӕуы ахӕм фарстыл: «Кӕд, мыййаг, мӕ зӕрдӕ бынтон хорз фӕлтӕрд нӕу кӕнӕ мӕ сайы?» Иудадзыгдӕр Библи ӕмӕ йе ’мбарынгӕнӕн литературӕ ахуыр кӕн (Псалом 1:2). Афтӕмӕй нӕ хъуыдытӕ, нӕ зонд ӕмӕ не ’нкъарӕнтӕ уыдзысты Хуыцауы уагӕвӕрдтӕм гӕсгӕ.

Сайтаны гӕды ныхӕстыл ма ӕууӕнд

15, 16. а) Сайтан нӕ цӕмӕй хъавы фӕсайын? ӕ) Сайтаны гӕдыныхӕстӕй куыд ис хи бахъахъхъӕнӕн?

¹⁵ Сайтан мах фӕсайыны тыххӕй цынӕ гӕдыныхӕстӕ кӕны, ахӕм нӕй. Уый нын хъары ахӕм хъуыды, зӕгъгӕ, адӕймагмӕ алцыдӕр куы уа, уӕд уыдзӕн амондджын ӕмӕ райгонд, фӕлӕ уый арӕх афтӕ нӕ вӕййы (Екклесиаст 5:10—12). Куыд тынг ӕй фӕнды, цӕмӕй баууӕндӕм, зӕгъгӕ, ацы фыддуне ӕнустӕм лӕудзӕн,— кӕд ӕмӕ бӕлвырдӕй зонӕм, «фӕстаг бонты кӕй цӕрӕм» (2 Тимофеймӕ 3:1—5). Сайтан адӕмы ахӕм хъуыдыйыл ӕфтауы, зӕгъгӕ, ӕвзӕр митӕ худинаг не сты, кӕд ӕмӕ удирхӕфсӕнтӕ чи уарзы, уыдон бирӕ хъизӕмӕрттӕ бавзарынц, уӕддӕр (Галатӕгтӕм 6:7). Куыд у нӕ бон ахӕм мӕнг хъуыдытӕй нӕхи хизын?

¹⁶ Библийы цӕвиттонтӕ — зондзонӕн. Библийы фыстӕуы, Сайтан сайдӕй кӕуыл рацыд, ахӕм адӕмы тыххӕй. Уыдон бауарзтой хъӕздыгдзинад, цы рӕстӕг цардысты, уый сӕ ферох ӕмӕ ӕнӕуаг митыл ныххӕцыдысты. Уый тыххӕй сыл бирӕ бӕллӕхтӕ ’рцыд (Матфейы 19:16—22; 24:36—42; Лукайы 16:14; 1 Коринфӕгтӕм 10:8—11). Нырыккон цӕвиттонтыл ахуыр кӕн. Хъыгагӕн, хаттӕй-хатт иуӕй-иу чырыстӕтты айрох вӕййы, цы рӕстӕджы цӕрынц, уый, ӕмӕ ахӕм хъуыдымӕ ӕрцӕуынц, зӕгъгӕ, Хуыцауӕн лӕггадгӕнгӕйӕ сӕхи хорз цӕмӕйдӕр цух кӕнынц. Ахӕм чырыстӕттӕй чидӕртӕ ӕцӕгад ныууадзынц ӕмӕ сӕ удыдзӕбӕхӕн цӕрын райдайынц. Фӕлӕ уыдон лӕууынц «бырынцъаг фӕндӕгтыл», ӕмӕ абон уа, райсом уа, уӕддӕр се ’нӕгъдау миты тыххӕй хъизӕмар кӕндзысты (Псалом 72:18, 19). Уӕдӕ искӕй рӕдыдтыл ахуыр кӕнын у зондджын адӕймаджы ми (Ӕмбисӕндтӕ 22:3).

17. Сайтан нӕ цӕмӕн сайы, зӕгъгӕ нӕ Иегъовӕ нӕ уарзы ӕмӕ нын нӕ аргъ кӕны?

¹⁷ Сайтан рагӕй фӕстӕмӕ адӕмы сайы, зӕгъгӕ сӕ Иегъовӕ нӕ уарзы ӕмӕ сын нӕ аргъ кӕны. Сайтан цалдӕр миназы дӕргъы лыстӕггай иртасы ӕнӕххӕст адӕймаджы. Хорз зоны, адӕймаг йӕхимӕ куы ныхъхъусы, уӕд йӕ уырнындзинад кӕй фӕцуды (Ӕмбисӕндтӕ 24:10). Уымӕ гӕсгӕ нӕ сайы ахӕм гӕды ныхӕстӕй, зӕгъгӕ нын Хуыцауы цӕсты гӕлӕбуйы кад дӕр нӕй. Кӕд нӕ Сайтан «ӕрбырста» ӕмӕ хъуыды кӕнӕм, Иегъовӕмӕ нымады дӕр кӕй не стӕм, уӕд нӕ бон фидар фӕлӕууын нӕ бауыдзӕн (2 Коринфӕгтӕм 4:9). Быны Фӕливӕг дӕр гъе уымӕ бӕллы! Уӕдӕ цӕмӕй Сайтанӕн йӕ ацы къӕппӕджы ма бахауӕм, уымӕн цы хъӕуы?

18. Иегъовӕ нӕ кӕй уарзы, уый тыххӕй нын Библи цы дзуры?

¹⁸ Ма рох кӕн Библийы фыст ныхӕстӕ, Хуыцау нӕ кӕй уарзы, уый тыххӕй. Библийы  ахӕм зӕрдӕмӕхъаргӕ ныхӕстӕ ис, ӕмӕ уыдонӕй лӕг бамбары, Иегъовӕ нӕ алкӕйдӕр кӕй уыны ӕмӕ нӕ кӕй уарзы. Уый дын дӕ цӕссыгтӕ «мигӕнӕны» ӕмбырд кӕны, ома, цӕмӕй фидар фӕлӕууай, уый тыххӕй цы цӕссыгтӕ фӕкалдтай, уыдон уыны ӕмӕ дзы рох не сты (Псалом 55:9). «Зӕрдӕсаст» куы вӕййыс, уӕд дӕ фӕуыны ӕмӕ вӕййы дӕ фарсмӕ (Псалом 33:19 [34:18], НД). Иегъовӕ дын дӕ удыхъӕды алы лыстӕг фӕзилӕн дӕр зоны, суанг ын дӕ «сӕры хъуынтӕ дӕр иууылдӕр нымад сты» (Матфейы 10:29—31). Хуыцау «Йӕ иунӕггуырд Фырты» дӕу сӕраппонд кӕй радта, уый та! (Иоанны 3:16; Галатӕгтӕм 2:20). Хатт дын, чи зоны, зын вӕййы Библийӕ ацы стихтӕ дӕхимӕ ахӕссын, фӕлӕ хъуамӕ ӕууӕндӕм Иегъовӕйы ныхӕстыл. Фӕнды йӕ, цӕмӕй зонӕм, адӕмы се ’ппӕты кӕм уарзы, уым ын алы адӕймаг дӕр зынаргъ кӕй у.

19, 20. а) Иегъовӕ дӕ уарзы, зӕгъгӕ, уыцы мӕнг хъуыды Сайтанӕй кӕй цӕуы, уый цӕмӕн хъӕуы ӕмбарын ӕмӕ йӕ дӕхимӕ хӕстӕг дӕр нӕ уадзын? ӕ) Иу цӕугӕ цӕстдарӕг зӕрдӕсаст хотӕ ӕмӕ ӕфсымӕртӕн куыд баххуыс кӕны?

¹⁹ Гӕды ныхӕстӕ ӕвзар ӕмӕ ма фӕсайды у. Куы зонай, чидӕр гӕдыныхӕстӕ кӕны, уӕд ыл, кӕй зӕгъын ӕй хъӕуы, нӕ баууӕнддзынӕ ӕмӕ дыл сайд не ’рцӕудзӕн. Уӕдӕ куы зонай Сайтаны фӕнд — баууӕндын дӕ кӕнын хъуыдыйыл, зӕгъгӕ дӕ Иегъовӕ нӕ уарзы, уӕд дын уыдзӕн ӕнцондӕр. Иу чырыстон хо, «Хъахъхъӕнӕн мӕсыг»-ы Сайтаны хинмиты тыххӕй цы статья уыд, уый фӕдыл афтӕ загъта: «Сайтан мын мӕ ныфс асӕттыны тыххӕй ме ’нкъарӕнтӕй хъазынвӕнд кӕй кодта, уый нӕ зыдтон. Ныр мӕм хъарутӕ фӕзынд уыцы ӕнкъарӕнтимӕ тох кӕнынӕн».

²⁰ Ӕркӕсӕм ма Хуссар Америкӕйы цӕрӕг цӕугӕ цӕстдарӕджы хабармӕ. Йе ’муырнджытӕй зӕрдӕсаст чи вӕййы, уыдонмӕ бӕрӕггӕнӕг куы бацӕуы, уӕд сӕм арӕх ратты мӕнӕ ахӕм фарст: «Ӕртӕиууоныл ӕууӕндыс?» Уыцы фарстӕн зӕрдӕсаст хотӕ кӕнӕ ӕфсымӕртӕ фылдӕр хатт фӕзӕгъынц: «Цытӕ дзурыс!»,— уымӕн ӕмӕ йӕ фӕзонынц, уыцы ахуырад Сайтанӕй кӕй цӕуы. Уый фӕстӕ ацы хистӕр нӕлгоймаг ратты ӕндӕр фарст: «Артын зындон кӕй ис, уый дӕ уырны?» Ӕмӕ та йын фӕзӕгъынц: «Цытӕ дзурыс, цы!» Уӕд сын уыцы хистӕр нӕлгоймаг радзуры, Сайтан нын нӕ хъусыцӕгъдӕгау цы ӕндӕр мӕнг ныхӕстӕ кӕны, уый тыххӕй дӕр. Уый сын байгом кӕны чиныг «Баввахс у Иегъовӕмӕ» * 249 фарсыл, 21 абзацыл, ӕмӕ сын уырдыгӕй бакӕсы, зӕгъгӕ, Иегъовӕ дӕу нӕ уарзы, уый мӕнг кӕй у. Уыцы цӕугӕ цӕстдарӕг куыд фыссы, афтӕмӕй зӕрдӕсаст хотӕ ӕмӕ ӕфсымӕртӕн баххуыс кӕны, Сайтан нӕ сайгӕ кӕй кӕны, уый бамбарынӕн ӕмӕ уыцы хъуыды сӕхимӕ хӕстӕг нӕ уадзынӕн.

Ма фӕсайды уӕм

21, 22. Сайтаны хинмитӕ нын зындгонд кӕцӕй сты ӕмӕ нӕ хъарутӕ цӕмӕ хъуамӕ саразӕм?

²¹ Ацы фӕстаг бонты кӕрон Сайтан, кӕй зӕгъын ӕй хъӕуы, йӕ сайын ӕмӕ йӕ гӕдыныхӕстӕ нӕ ныууадздзӕн. Хорз у, ӕмӕ нын Иегъовӕ ӕргом кӕны Сайтаны хинмитӕ. Библи ӕмӕ «зондджын ӕмӕ ӕууӕнкджын цагъар» Библи ӕмбарын кӕнынӕн цы литературӕ уадзы, уыдон нын ӕргом кӕнынц Сайтаны фыдвӕндтӕ (Матфейы 24:45). Уӕдӕ фӕдзӕхстгонд чи ӕрцыд, гӕрзифтонгдӕр уый у (2 Коринфӕгтӕм 2:11).

²² Цӕй нӕхи хизӕм, раст дин ныууадзджытӕ цы ныхӕстӕ кӕнынц, уыдонӕй. Ма бауадзӕм нӕхи хи сайыны хызы бахауын дӕр. Сайтаны гӕды ныхӕстӕ ӕвзарӕм ӕмӕ ма фӕсайды уӕм. Афтӕмӕй «ӕцӕгады Хуыцауимӕ» уыдзыстӕм ӕнгом, уымӕн ӕмӕ уый мӕнгдзинадӕй йе ’сӕфт уыны (Псалом 30:6; Ӕмбисӕндтӕ 3:32).

[Фиппаинӕгтӕ]

Хъуыды ма кӕныс?

• Мӕнгдзинад дунейыл афтӕ тынг цӕмӕн ахӕлиу?

• Цы кӕнын нӕ хъӕуы, цӕмӕй нӕ раст дин ныууадзджытӕ ма фӕсайой?

• Цы кӕнын нӕ хъӕуы, цӕмӕй нӕхӕдӕг нӕхи ма сайӕм?

• Куыд ис Сайтаны гӕды ныхӕстӕй хи хъахъхъӕнӕн?

[Фарстатӕ ахуыр кӕнынӕн]

[Ныв 15 фарсыл]

Хиирхӕфсӕнтӕ ’взаргӕйӕ дӕхи ма сай.