Дӕ куывдтытӕй исты фӕивдзӕн?

ДӔ БАР кӕуыл нӕ цыд, ахӕм уӕззау уавӕры ӕнӕ бахаугӕ куыннӕ уыдаис. Библи куыд ӕвдисы, афтӕмӕй апостол Павел зыдта, уӕззау уавӕры куывд ӕххуысы хос кӕй у.

Павелы рӕстӕй Ромы ахӕстоны куы сбадын кодтой, уӕд йе ’муырнджытӕн загъта, зӕгъгӕ, кувут-иу мӕн тыххӕй, ӕмӕ ма бафтыдта: «Уӕлдайдӕр... уӕ курын [ай] кӕнын уый тыххӕй, цӕмӕй уӕм ӕз тагъддӕр раздӕхон» (Дзуттытӕм 13:18, 19). Ӕндӕр хатт та Павелы фидар ныфс уыд, Хуыцау ын йе ’фсымӕрты куывдтытӕн дзуапп кӕй ратдзӕн ӕмӕ йӕ тагъддӕр кӕй ссӕрибар кӕндзысты (Филимонмӕ 22). Павелы гыццыл рӕстӕджы фӕстӕ ахӕстонӕй рауагътой ӕмӕ та хъусын кӕныны хъуыддагмӕ бавнӕлдта.

Фӕлӕ дӕу цы тыхсын кӕны, уыцы хъуыддаджы цымӕ дӕ куывдӕй исты фӕивдзӕн? Гӕнӕн ис, ӕмӕ фӕива. Ӕрмӕст дӕ зӕрдыл дар, кувын цавӕрдӕр дины кӕнон нӕу — кувгӕйӕ мах фӕныхас кӕнӕм нӕ уарзӕгой ӕмӕ хъомысджын уӕларвон Фыдимӕ. Куы фӕкувӕм, уӕд хъуамӕ ма ӕфсӕрмы кӕнӕм, ӕргом, бӕлвырдӕй дзурӕм, цы нӕ тыхсын кӕны, уый тыххӕй, ӕмӕ стӕй та фӕразонӕй ӕнхъӕлмӕ кӕсӕм, Иегъовӕ нын цы дзуапп ратдзӕн, уымӕ.

Хуыцау нын нӕ алы куывдӕн дӕр комкоммӕ нӕ ратты дзуапп, кӕнӕ та йӕ дзуапп алы хатт, мах куыд ӕнхъӕл вӕййӕм, ахӕм нӕ разыны, йе та мах кӕд фӕфӕнды, нӕ курдиат нын уӕд нӕ сӕххӕст кӕны. Цӕвиттон, Павел иу ӕмӕ дыууӕ хатты нӕ куывта йӕ «буары сындзы» тыххӕй. Хуыцау ӕй уыцы «сындзӕй» нӕ фервӕзын кодта, фӕлӕ йын йӕ зӕрдӕ барӕвдыдта ӕмӕ йӕ бафидар кодта ахӕм ныхӕстӕй: «Ӕгъгъӕд дын фӕуӕд Мӕ хорзӕх; Мӕ тых иууыл тыхджын равдисы йӕхи ӕдыхы мидӕг» (2 Коринфӕгтӕм 12:7—9, НФ).

Мах дӕр хъуамӕ фидар ныфс уа, ӕмӕ нӕ кӕд Хуыцау нӕ зындзинадӕй нӕ фервӕзын кӕна, уӕддӕр нын кӕй «ратдзӕн ӕнцондзинад [«ӕххуыс», НФ]... афтӕ, цӕмӕй йӕ нӕ бон ахӕссын уа» (1 Коринфӕгтӕм 10:13). Тынг тагъд Хуыцау адӕмы хъизӕмӕрттӕн кӕрон скӕндзӕн. Цалынмӕ уыцы рӕстӕг не ’рцыд, уӕдмӕ та уал ныхас кӕнӕм, нӕ куывдтытӕ нын Чи хъусы, уыимӕ, ӕмӕ нын уый уыдзӕн стыр ӕххуыс (Псалом 64:3).