Йесойы арф фӕд дзыллӕты царды

«ЕВАНГЕЛИТЫ Йесойы ныхӕстӕй цыдӕриддӕр фыст ис, иу искӕмӕн сӕ загъта ӕви бирӕтӕн, уый радзырдтаид дыууӕ сахатмӕ,– фыста Библи тӕлмацгӕнӕг Эдгар Гудспид.– Фӕлӕ уыцы гыццыл дӕр зӕрдӕ афтӕ тынг агайдта, ӕмӕ нӕ фӕрӕдийдзыстӕм, куы зӕгъӕм: дзыллӕты царды ахӕм арф фӕд ӕндӕр ничи ныууагъта».

Н. э. 33 азы, Йесо Чырысти зӕххыл йӕ лӕггад куы фӕци, уӕд йӕ фӕдылдзӕуджытӕ уыдысты ӕппынкъаддӕр 120 адӕймаджы бӕрц, нӕлгоймӕгтӕ ӕмӕ сылгоймӕгтӕ (Куыстытӕ 1:16). Абон, йӕхи чырыстон чи хоны, уыдон сты дыууӕ миллиардӕй фылдӕр. Ноджы ма сӕдӕгай милуантӕ Йесойы нымайынц пехуымпарыл. Ӕцӕгӕйдӕр, цӕуыл ахуыр кодта, цы амыдта, уый тынг фӕзындис адӕмыл.

Йесо дзыллӕты царды арф фӕд кӕй ныууагъта, ууыл ӕрмӕст чырыстон дунейы разамонджытӕ не сты разы. Зӕгъӕм, дзуттаг раввин Гиман Энелов ныффыста: «Ӕнусты дӕргъы цы динамонджытӕ уыд, уыдонӕй Йесо у ӕппӕты зындгонддӕр, йӕ цард, йӕ ахуырад – иртасджытӕн ӕппӕты цымыдисагдӕр, дзыллӕты царды йӕ фӕд – ӕппӕты арфдӕр». Энелов ма загъта: «Кӕй бон бауыдзӕн банымайын, Йесо дзыллӕйӕн цас хӕрзты бацыд, уый? Рагӕй фӕстӕмӕ дӕр адӕмы зӕрдӕты цы уарзондзинад гуырын кӕны, цы удӕнцой сын дӕтты, цы ныфс ӕмӕ цины цӕхӕр ссудзы адӕймаджы риуы, стӕй зӕххыл цӕргӕйӕ цы хорздзинӕдтӕ ракодта – ӕппӕт уыдӕттӕн, лӕг кӕдӕй ис, уӕдӕй абонмӕ абарӕн ницӕимӕ ис. Адӕм диссагӕй ӕмӕ хорзӕй цы сарӕзтой, уыдӕттӕй  ницӕмӕй ис зӕгъӕн, ӕмӕ Йесойау ӕгас дунейӕн дӕр йе ’ргом йӕхимӕ аздӕхта ӕмӕ ӕнусты арф фӕд ныууагъта. Йесойӕ цымыдисагдӕр адӕймаг зӕххыл никуы уыд». Индийы зындгонд разамонӕг Мохандас Ганди та загъта: «Ӕз иу ахӕмы дӕр нӕ зонын, адӕмӕн Йесойӕ фылдӕр хӕрзты чи бацыд. Раст зӕгъгӕйӕ, чырыстон динмӕ фау ӕрхӕссӕн нӕй». Фӕлӕ ма йӕ ныхасмӕ бафтыдта: «Бӕллӕх сымахӕн уӕхи мидӕг ис, чырыстӕттӕ. Уӕхӕдӕг уӕ динахуырӕдтӕм гӕсгӕ нӕ цӕрут».

Чырыстон динтӕ рагӕй фӕстӕмӕ дӕр, Чырысти цы амыдта, уый нӕ кӕнынц. Сесил Джон Каду, чырыстон динтӕ иртасӕг, загъта, зӕгъгӕ, «аргъуан сабыргай ӕмӕ иудадзыг йӕ хӕрзӕгъдаудзинад кӕй сӕфта, уый чырыстон разамонджытӕн н. э. 140 азы дӕр уыд сӕ сагъӕсы сӕр». Уый бафиппайдта: «Йӕ фыццаг ӕгъдау ӕмӕ ӕфсармыл фидар кӕй нал хӕцыд, уый йӕ кӕнон кодта – дунейы ӕгъдау фӕзмын райдыдта».

Чырыстон аргъуаны ӕгъдау тынгдӕр хӕлын райдыдта цыппӕрӕм ӕнусы, Ромы император Константин чырыстон дин куы райста, уӕд. Каду фыста: «Иртасджытӕ ӕнӕбафиппайгӕ нӕ фесты – ӕмӕ сӕ кӕмӕндӕрты хъыг дӕр у – аргъуан йӕ динахуырӕдтӕй бирӕ цӕуылдӕрты кӕй систа йӕ къух, Константинимӕ бадзырд куы скодта, уӕд». Уӕдӕй фӕстӕмӕ ӕнусты дӕргъы, йӕхи чырыстон чи хоны, уыдон кӕнынц бирӕ худинаджы хъуыддӕгтӕ, ӕмӕ уымӕй ӕгад кӕнынц Чырыстийы ном.

Уӕдӕ нӕ цы фарстытӕ цымыдис кӕнынц, уыдон сты: цӕуыл ахуыр кодта Йесо? Цы амыдта, уый нӕ цардыл куыд хъуамӕ фӕзына?

[Ныв 3 фарсыл]

«Ӕз иу ахӕмы дӕр нӕ зонын, адӕмӕн Йесойӕ фылдӕр хӕрзты чи бацыд» (Мохандас Ганди).

[Ныв 3 фарсыл]

«Дзыллӕты царды ахӕм арф фӕд ӕндӕр ничи ныууагъта» (Эдгар Гудспид).

[Барлӕвӕрдӕй]

Culver Pictures