Маст ӕвзаргӕйӕ хиуылхӕцгӕ уӕм
Маст ӕвзаргӕйӕ хиуылхӕцгӕ уӕм
«Хицауы цагъар хъуамӕ быцӕу ма кӕна, фӕлӕ фӕлмас уа алкӕимӕдӕр, ...маст ӕвзаргӕйӕ уа хиуылхӕцгӕ» (2 ТИМОФЕЙМӔ 2:24, НД).
1. Тызмӕгӕй чи дзуры, ахӕм адӕмыл иуӕй-иу хатт уацамынды цӕмӕн сӕмбӕлӕм?
ДӔХИ куыд фӕдарыс, дӕумӕ кӕнӕ цы хабар дзурыс, уымӕ хорз цӕстӕй чи нӕ кӕсы, ахӕм адӕмыл куы сӕмбӕлыс, уӕд? Апостол Павел фӕстаг бонты тыххӕй загъта, адӕм кӕй уыдзысты «маргӕвзаг, ...фыдкой кӕнджытӕ, ӕнӕхиуылхӕцгӕ, хъӕбӕрзӕрдӕ» (2 Тимофеймӕ 3:1–5, 12). Ӕвӕццӕгӕн, ахӕм адӕмыл иу ӕмӕ дыууӕ хаттты нӕ сӕмбӕлдтӕ уацамынды кӕны ӕндӕр искуы.
2. Цавӕр стихтӕ нын баххуыс кӕндзысты, цӕмӕй ӕмбаргӕ уӕм, тызмӕгӕй нӕм чи дзуры, уыдонимӕ?
2 Адӕймаг тызмӕгӕй куы дзура, уӕддӕр афтӕ зӕгъӕн нӕй, ӕмӕ раст цы у, ууыл йӕ къух систа. Иуӕй-иутӕ уӕззау уавӕрты кӕй сты кӕнӕ сӕ хъуыддӕгтӕй сӕ зӕрдӕ кӕй нӕ рухс кӕны, уымӕ гӕсгӕ, гӕнӕн ис, алкӕимӕдӕр карзӕй дзурой (Екклесиаст 7:7). Бирӕтӕ сӕхи афтӕ уымӕн дарынц, ӕмӕ цӕргӕ дӕр ӕмӕ кусгӕ дӕр кӕнынц, гуырымыхъхъ ныхас ӕвзӕрыл нымад кӕмӕ нӕу, ахӕм адӕмы ’хсӕн. Уый ууыл дзурӕг нӕу, ӕмӕ сӕ махӕн, чырыстӕттӕн, нӕ бон фӕзмын у, фӕлӕ уый фӕрцы ӕмбарӕм, иннӕтӕ афтӕ цӕмӕн кӕнынц. Тызмӕг ныхасмӕ цы цӕстӕй хъуамӕ кӕсӕм? Ӕмбисӕндты 19:11 дзырдӕуы: «Арфуынӕг адӕймаг йӕ маст уромын фӕразы». Ромӕгтӕм 12:17 нын амоны: «Фыддзинад макӕмӕн фидут фыддзинадӕй... Кӕд сымахӕрдыгӕй гӕнӕн ис, уӕд фидыддзинады ут ӕппӕт адӕмимӕ дӕр».
3. Цӕмӕй хорз хабар хъусын кӕнӕм, уый тыххӕй фарнхӕсджытӕ цӕмӕн хъуамӕ уӕм?
3 Ӕцӕг фарнхӕсджытӕ кӕй стӕм, уый бӕрӕг уыдзӕн нӕ зӕрдӕйы уагӕй, нӕ ныхасӕй ӕмӕ нӕ хъуыддӕгтӕй, уыимӕ ма нӕ цӕсгомӕй ӕмӕ нӕ хъӕлӕсы уагӕй дӕр (Ӕмбисӕндтӕ 17:27). Йесо йӕ апостолты хъусын кӕнынмӕ куы ӕрвыста, уӕд сын загъта: «Хӕдзармӕ бацӕугӕйӕ та салам дӕттут, дзургӕйӕ: „фарн ацы хӕдзарӕн“; Ӕмӕ кӕд хӕдзар аккаг уа, уӕд уӕ фарн ӕрцӕудзӕн ууыл; куы нӕ уа аккаг уӕд уӕ фарн сымахмӕ раздӕхдзӕн» (Матфейы 10:12, 13). Мах хъусын кӕнӕм хорз хабар. Библи йӕ хоны «фидыды уац», «Хуыцауы хорзӕхы фарны уац», ӕмӕ «Паддзахады Евангели» (Ефесӕгтӕм 6:15, НТ; Куыстытӕ 20:24, НФ; Матфейы 24:14). Махӕн нӕ хӕс уый нӕу, ӕмӕ адӕймагӕн йӕ дин фауӕм, йе та йӕ цӕстӕнгасы тыххӕй йемӕ быцӕу кӕнӕм, фӕлӕ йын Хуыцауы Ныхасӕй хорз хабар фехъусын кӕнӕм.
4. Цӕй тыххӕй ӕрбацыдтӕ, уый зӕгъын дӕр дӕ куы нӕ бауадзой, афтӕмӕй дын куы зӕгъой «нӕ мӕ хъӕуы», зӕгъгӕ, уӕд цавӕр дзуапп ратдзынӕ?
4 Гӕнӕн ис ӕмӕ нӕм адӕймаг кӕронмӕ дӕр ма байхъуса, ӕмӕ дын дӕ ныхас фескъуына: «Нӕ мӕ хъӕуы». Уӕд ис зӕгъӕн: «Мӕн фӕндыд дӕуӕн Библийӕ ӕрмӕст иу стих бакӕсын». Ӕмӕ чи зоны сразы уа. Кӕнӕ та хорз уаид зӕгъын: «Мӕн фӕндыд радзурын, ахӕм рӕстӕг кӕй уыдзӕн, ӕнӕрастдзинад куы нал уа ӕмӕ адӕм иууылдӕр кӕрӕдзи куы уарзой». Фӕлӕ адӕймаджы фылдӕр базонын куы нӕ фӕнда, уӕд ис зӕгъӕн: «Ӕвӕццӕгӕн дӕ ныртӕккӕ не ’вдӕлы». Адӕймаг сабырӕй дзуапп куы нӕ ратта, уӕд хъуамӕ афтӕ хъуыды кӕнӕм, «аккаг нӕу», зӕгъгӕ? Куыдфӕнды ма уа, уӕддӕр нӕ нӕ зӕрдыл дарын хъӕуы Библийы уынаффӕ, цӕмӕй уӕм «фӕлмас алкӕимӕдӕр, ...маст ӕвзаргӕйӕ хиуылхӕцгӕ» (2 Тимофеймӕ 2:24, НД).
Уыд ӕфхӕрӕг, фӕлӕ барӕй нӕ
5, 6. Савл Йесойы фӕдылдзӕуджытӕм цы зӕрдӕ дардта, ӕмӕ афтӕ цӕмӕн кодта?
5 Фыццаг ӕнусы, иу лӕг, йӕ ном Савл, зӕгъгӕ, зындгонд уыди йӕ гуырымыхъхъ ныхас ӕмӕ тызмӕгдзинадӕй. Библийы дзырдӕуы: «Амарыны ӕртхъирӕнтӕ кодта Хицауы ахуыргӕнинӕгтӕм» (Куыстытӕ 9:1, 2). Фӕстӕдӕр уый басасти, кӕй уыди «фауӕг ӕмӕ сурӕг ӕмӕ ӕфхӕрӕг» (1 Тимофеймӕ 1:13). Савлӕн, ӕвӕццӕгӕн, йӕ хиуӕттӕй чидӕртӕ чырыстӕттӕ уыдысты, фӕлӕ уӕддӕр уый Чырыстийы фӕдылдзӕуджытӕм цы зӕрдӕ дардта, уый тыххӕй загъта: «Тынг мӕстыйӕ сӕ ныхмӕ, сырдтон уыдоны суанг кӕйдӕр сахарты дӕр» (Куыстытӕ 23:16; 26:11; Ромӕгтӕм 16:7, 11). Савл-иу йӕхи афтӕ куы дардта, уӕд-иу ахуыргӕнинӕгтӕ йемӕ быцӕу ныхас кодтой, уымӕн ницы бӕлвырдгӕнӕнтӕ ис.
6 Савл йӕхи афтӕ цӕмӕн дардта? Бирӕ азты фӕстӕ уый ныффыста: «Цы кодтон, уый не ’мбӕрстон – уыдтӕн ӕнӕуырнӕг» (1 Тимофеймӕ 1:13, НТ). Уый уыд фарисей, «лӕмбынӕг ахуыргонд фыдӕлты закъоныл» (Куыстытӕ 22:3). Савлы ахуыргӕнӕг Гамалиил, ӕвӕццӕгӕн, уыд зондджын, ӕмбаргӕ адӕймаг, фӕлӕ Савл кӕй зондыл цыди, уыцы хистӕр сауджын Каиафӕ та уыд диныл мард. Йесо Чырыстийы марынвӕнд чи кодта, уыдонӕн сӕ хистӕр уыди Каиафӕ (Матфейы 26:3, 4, 63–66; Куыстытӕ 5:34–39). Цасдӕры фӕстӕ Каиафӕйы бардзырдмӕ гӕсгӕ Йесойы апостолты фӕнадтой. Ӕмӕ сын тызмӕгӕй бафӕдзӕхста, цӕмӕй Йесойы номы тыххӕй мауал хъусын кӕной. Стефаны Синедрионӕй дуртӕй амарынмӕ куы ракодтой, уӕд дзы сӕрдариуӕг кодта Каиафӕ (Куыстытӕ 5:27, 28, 40; 7:1–60). Савл касти, дуртӕй йӕ куыд марынц, уымӕ. Стӕй йын Каиафӕ бар радта, цӕмӕй Йесойы фӕдылдзӕуджыты Дамаскы дӕр ахса (Куыстытӕ 8:1; 9:1, 2).Савлӕн ахӕм зондамонӕг кӕй уыд, уымӕ гӕсгӕ хъуыды кодта, афтӕмӕй Хуыцауӕн зынгзӕрдӕйӕ кӕй лӕггад кӕны, фӕлӕ йын ӕцӕгӕй та уырнындзинад нӕ фаг кодта (Куыстытӕ 22:3–5). Уымӕ гӕсгӕ Савл нӕ бамбӕрста, Йесо ӕцӕг Мессиа кӕй у. Фӕлӕ йӕ рӕдыд бамбӕрста, Дамаскмӕ фӕндагыл райгасуӕвӕг Йесойы хъӕлӕс куы фехъуыста, уӕд (Куыстытӕ 9:3–6).
7. Дамаскмӕ цӕугӕйӕ Савлмӕ Йесо куы фӕзынд, уӕд ыл цы ’рцыд?
7 Уымӕй бирӕ нӕ рацыд, афтӕ ахуыргӕнинаг Ананийы арвыстӕуыд Савлӕн Хуыцауы тыххӕй радзурынмӕ. Ды йӕм ацыдаис? Анани тынг тарсти, фӕлӕ йемӕ хӕларӕй ныхас кодта. Савлы ахаст фӕивта, Дамаскмӕ цӕугӕйӕ йӕм Йесо куы фӕзынд, уый фӕстӕ (Куыстытӕ 9:10–22). Фӕстӕдӕр ӕй иууылдӕр базыдтой апостол Павелӕй, зынгзӕрдӕ чырыстон хъусынгӕнӕгӕй.
Фӕлмас, фӕлӕ ныфсджын
8. Иегъовӕйӕн фыдадӕммӕ цы ахаст ис, уый Йесо куыд фӕзмыдта?
8 Йесо Хуыцауы Паддзахады тыххӕй зынгзӕрдӕйӕ хъусын кодта, ӕмӕ уыди ныфсджын, адӕмимӕ та – фӕлмас (Матфейы 11:29). Уыди йын йӕ уӕларвон Фыды зӕрдӕйы уаг,– фыдадӕмы се ’взӕр хъуыддӕгтӕ ныууадзынмӕ чи разӕнгард, уый зӕрдӕйы уаг (Исай 55:6, 7). Йесо-иу уыдта, тӕригъӕдджынтӕ хорзӕрдӕм куы ивтой, уый, ӕмӕ-иу сӕ бафидар кодта (Лукайы 7:37–50; 19:2–10). Уый адӕмӕн сӕ бакастмӕ гӕсгӕ нӕ аргъ кодта, фӕлӕ йӕ Фыдау уыди хорз, фӕлмас ӕмӕ бирӕфӕразон, ӕмӕ адӕмӕн ӕххуыс кодта ӕрфӕсмон кӕнынӕн (Ромӕгтӕм 2:4). Уымӕн ӕмӕ Иегъовӕйы фӕнды, цӕмӕй алы адӕмтӕ дӕр ӕрфӕсмон кӕной ӕмӕ фервӕзой (1 Тимофеймӕ 2:3, 4).
9. Исайы 42:1–4 Йесойы тыххӕй цы фыст ис, уымӕй цӕуыл ахуыр кӕнӕм?
9 Иегъовӕ Йесо Чырыстимӕ цы зӕрдӕ дары, уый равдисынӕн Матфей сфӕлхат кодта ацы пехуымпарадон ныхӕстӕ: «Мӕнӕ Мӕ Лӕппу, Кӕцыйы Ӕз равзӕрстон, Мӕ Уарзон, Кӕцыйӕн хӕрзаудӕн кӕны Мӕ Уд; сӕвӕрдзынӕн Мӕ уд Ууыл ӕмӕ фехъусын кӕндзӕн адӕмтӕн тӕрхон; ныхмӕ нӕ дзурдзӕн, нӕдӕр хъӕр кӕндзӕн ӕмӕ ничи фехъусдзӕн уынгты Йӕ хъӕлӕс; цъӕл хъӕз нӕ асӕтдзӕн, ӕмӕ мынӕг судзгӕ гӕн нӕ ахуыссын кӕндзӕн, цалынмӕ рӕстдзинады тӕрхон нӕ ӕрхӕсса уӕлахиздзинад; Ӕмӕ Йӕ номӕй ныфсджын уыдзысты адӕмтӕ» (Матфейы 12:17–21; Исай 42:1–4). Ацы пехуымпарадӕй куыд зыны, афтӕмӕй Йесо тыхныхасгӕнаг нӕ уыд. Зын рӕстӕг дӕр ӕцӕгады тыххӕй афтӕ дзырдта, ӕмӕ-иу йӕ ныхӕстӕ сыгъдӕгзӕрдӕ адӕммӕ бахъардтой (Иоанны 7:32, 40, 45, 46).
10, 11. а) Кӕд фарисейтӕ Йесойы ныхмӕ карзӕй дзырдтой, уӕддӕр сӕ иуӕй-иутӕн Хуыцауы тыххӕй цӕмӕн дзырдта? ӕ) Йесо йӕ ныхмӕдзӕуджытӕн цавӕр дзуаппытӕ лӕвӕрдта, фӕлӕ цы нӕ кодта?
10 Йесо йӕ лӕггады рӕстӕг фарисейтӕй бирӕтимӕ ныхас кодта. Кӕд сӕ иуӕй-иутӕ тынг архайдтой, цӕмӕй йӕ ныхасы мидӕг ӕрцахсой, уӕддӕр се ’ппӕты ӕвзӕрыл нӕ нымадта. Симоны, Йесоимӕ разы чи нӕ уыд, уыцы фарисейы, ӕвӕццӕгӕн, фӕндыд йемӕ аныхас кӕнын ӕмӕ йӕ сӕхимӕ фӕхуыдта. Йесо сразы ӕмӕ Симонӕн, ӕмӕ йӕ хӕдзары чи уыд, уыдонӕн Хуыцауы тыххӕй дзырдта (Лукайы 7:36–50). Ӕндӕр хатт та зындгонд фарисей Никодим, Йесомӕ ӕхсӕвыгон сусӕгӕй ӕрбацыд. Йесо йын нӕ бауайдзӕф кодта, ӕхсӕвмӕ кӕй ӕнхъӕлмӕ каст ӕмӕ раздӕр кӕй не ’рбацыд, уый тыххӕй. Уый бӕсты Никодимӕн бамбарын кодта, Хуыцау йӕ уарзондзинад уымӕй кӕй равдыста, ӕмӕ йӕ Фырты рарвыста, цӕмӕй ирвӕзындзинадмӕ фӕндаг бакӕна, уырнындзинад кӕмӕ ис, уыдонӕн. Йесо ма йын хӕларзӕрдӕйӕ загъта, куыд ахсджиаг у Хуыцауы коммӕ кӕсын (Иоанны 3:1–21). Фӕстӕдӕр Никодим Йесойы сӕрыл сдзырдта, иннӕ фарисейтӕ йӕ куы фаудтой, уӕд (Иоанны 7:46–51).
11 Йесойы ныхмӕ чи уыд, уыдоны цӕстмӕмитӕм куыдфӕндыйы цӕстӕй нӕ каст. Семӕ быцӕу нӕ кодта. Фӕлӕ-иу куы хъуыди, уӕд-иу цыбыр, рӕстдзӕвин дзуаппытӕ лӕвӕрдта, искӕцы уагӕвӕрдмӕ кӕнӕ Фыстадмӕ бацамонгӕйӕ, йе та цӕстуынгӕ цӕвиттон ӕрхӕсгӕйӕ (Матфейы 12:38–42; 15:1–9; 16:1–4). Ӕндӕр хӕттыты та-иу Йесо ницы дзырдта, бӕрӕг-иу куы уыд, уый ницы пайда у, уӕд (Маркы 15:2–5; Лукайы 22:67–70).
12. Йесойыл хъӕр чи кодта, уыдонӕн дӕр-иу куыд ӕххуыс кодта?
12 Хатт-иу Йесойыл хъӕр дӕр кодтой, сау тыхты ахӕсты чи уыд, уыцы адӕм. Ахӕм уавӕрты-иу, уыд хиуылхӕцгӕ ӕмӕ йын Хуыцау цы хъару радта, уымӕй дӕр-иу пайда кодта, цӕмӕй-иу сын баххуыс кодтаид (Маркы 1:23–28; 5:2–8, 15). Уацамынды нӕм исчи куы смӕсты уа ӕмӕ ныл хъӕр кӕнын куы райдайа, уӕд мах дӕр хъуамӕ хиуылхӕцгӕ, хӕларзӕрдӕ ӕмӕ уӕздан уӕм (Колоссӕгтӕм 4:6).
Бинонты ’хсӕн
13. Иегъовӕйы Ӕвдисӕнтимӕ Библи ахуыр кӕнын чи райдайы, уымӕн йӕ бинонтӕ хатт йӕ ныхмӕ цӕмӕн вӕййынц?
13 Йесойы фӕдылдзӕуджыты хиуылхӕцындзинад тынгдӕр хъӕуы бинонты ’хсӕн. Йӕ зӕрдӕмӕ Библийы ӕцӕгад арф чи айста, уыцы адӕймаджы зӕрдиагӕй фӕнды, цӕмӕй йӕ бинонтӕ ӕцӕгад базоной. Фӕлӕ Йесо куыд загъта, афтӕмӕй бинонтӕ, гӕнӕн ис, ныхмӕ цӕуой (Матфейы 10:32–37; Иоанны 15:20, 21). Уымӕн бирӕ аххосӕгтӕ ис. Зӕгъӕм, Библи нын ӕххуыс кӕны, цӕмӕй уӕм цӕсгомджын, ӕууӕнкджын ӕмӕ уӕздан. Уыимӕ ма нӕ ахуыр кӕны, цыфӕнды уавӕры дӕр сӕйрагдӕр кӕй у не Сфӕлдисӕджы коммӕ кӕсын (Екклесиаст 12:1, 13; Куыстытӕ 5:29). Бинонтӕй исчи, чи зоны, хъуыды кӕна, зӕгъгӕ йын йӕ ныхасӕн нал аргъ кӕнынц, Иегъовӕйы фыццаг бынаты кӕй ӕвӕрынц, уый тыххӕй. Ахӕм уавӕры нӕ ӕнӕмӕнгдӕр хъӕуы Йесойы хиуылхӕцындзинад фӕзмын! (1 Петры 2:21–23; 3:1, 2).
14–16. Раздӕр йӕ бинонты ныхмӕ чи уыд, уыдонӕй иуӕй-иутӕ цӕй фӕрцы фӕивтой?
14 Абон Иегъовӕйӕн чи лӕггад кӕны, уыдонӕй бирӕтӕн, Библи ахуыр кӕнын куы райдыдтой ӕмӕ сӕ царды ивындзинӕдтӕ куы кодтой, уӕд йӕ цардӕмбал йе та бинонтӕй чидӕр ныхмӕ цыди. Уыдон, ӕвӕццӕгӕн, Иегъовӕйы Ӕвдисӕнты тыххӕй фауӕн ныхӕстӕ фехъуыстой, ӕмӕ тарстысты сӕ бинонтыл ӕвзӕрырдӕм куы фӕзыной. Сӕ хъуыды цӕй тыххӕй аивтой? Арӕхдӕр-иу стыр ахъаз фӕци уырнӕг адӕймаджы хорз цӕвиттон. Бинонты ныхмӕцыд-иу хатт ӕрсабыр, уырнӕг адӕймаг-иу Библийы уынаффӕтӕм кӕй хъуыста, уый фӕрцы – иудадзыг чырыстон фембӕлдтӕм цыди ӕмӕ хъусын кодта, стӕй ма бинонтыл тыхсти, ӕмӕ цыфӕнды ӕфхӕрдӕн дӕр быхста (1 Петры 2:12).
15 Ӕнӕрвӕссон кӕнӕ сӕрбӕрзонддзинады тыххӕй дӕр, чи зоны, бинонтӕй исчи ма хъуса, Библийӕ йын цы дзурӕм, уымӕ. Афтӕ уыди иу лӕджы хабар Иугонд Штаттӕй. Йӕхӕдӕг куыд зӕгъы, афтӕмӕй уыди йӕ райгуырӕн бӕстӕйы сӕрхъуызой. Иу бон, йӕ ус конгресмӕ кӕй ацыд, уый тыххӕй йӕ дзаумӕттӕ амбырд кодта ӕмӕ йӕ бинонты ныууагъта. Ӕндӕр хатт та хӕдзарӕй хӕцӕнгарзимӕ рацыд ӕмӕ ӕртхъирӕн кодта, зӕгъгӕ, мӕхи амардзынӕн. Йӕхи афтӕ кӕй дардта, уым йӕ усы дин аххосджын кодта. Фӕлӕ уӕддӕр сылгоймаг архайдта Библийы уынаффӕтӕм гӕсгӕ. Ус Иегъовӕйы Ӕвдисӕн куы сси, уымӕй 20 азы фӕстӕ лӕг дӕр Иегъовӕйӕн лӕггад кӕнын райдыдта. Албанийы иу сылгоймаг тынг мӕсты кодта, йӕ чызг Иегъовӕйы Ӕвдисӕнтимӕ Библи кӕй ахуыр кодта ӕмӕ донаргъуыд кӕй райста, уый тыххӕй. 12 хатты йӕ чызджы Библи ныскъуыдтӕ кодта. Иу бон чызгӕн йӕ Библи стъолыл ферох. Мад ӕй байгом кодта ӕмӕ бакаст Матфейы 10:36 ӕмӕ бамбӕрста, уыцы ныхӕстӕ уымӕ кӕй хауынц. Йӕ чызг Ӕвдисӕнтимӕ Италимӕ конгресмӕ цыди, фӕлӕ йӕм йӕ зӕрдӕ кӕй ӕхсайдта, уымӕ гӕсгӕ йӕ наумӕ ахизын кодта. Уым куы федта, кӕрӕдзи куыд уарзынц, кӕрӕдзийыл куыд цин кӕнынц, уый, стӕй сын сӕ хъӕлдзӕг ныхас куы фехъуыста, уӕд мад йӕ ахаст аивта. Цасдӕры фӕстӕ сразы Библи ахуыр кӕныныл. Абон уый ӕххуыс кӕны, раздӕр ныхмӕ чи уыд, ахӕм адӕмӕн.
16 Уыди ма ахӕм хабар дӕр. Иу ус Паддзахады залмӕ куы цыди, уӕд ӕм йӕ лӕг кардимӕ лӕбурдта ӕмӕ йын алы цъаммар ныхӕстӕ фӕкодта. Сылгоймаг ын сабырӕй загъта: «Рацу Паддзахады залмӕ ӕмӕ дӕхӕдӕг алцыдӕр фен». Лӕг ӕм байхъуыста, ӕмӕ ныр у ӕмбырды хистӕр нӕлгоймаг.
17. Чырыстон бинонтӕ кӕрӕдзи куы нӕ ӕмбарой, уӕд сын цавӕр стих баххуыс кӕндзӕн?
17 Чырыстон бинонты ’хсӕн дӕр быцӕутӕ рауайы. Ӕнӕххӕст кӕй стӕм, уый аххосӕй, хатт, кӕрӕдзи дӕр нӕ бамбарӕм ӕмӕ хъӕр ныхас кӕнын дӕр райдайӕм. Нӕ хъус нӕ хъӕуы ӕрдарын, рагон Ефесы чырыстӕттӕн цы уынаффӕ ӕрцыд лӕвӕрд, уымӕ: «Бынтондӕр ныууадзут мӕсты ӕмӕ знӕт, хъӕр-хъӕлӕба, фыдгой, алы ӕндӕр фыдӕх» (Ефесӕгтӕм 4:31, НТ). Ӕвӕццӕгӕн, Ефесы чырыстӕттыл ӕндӕвтой сӕ алыварс цӕрӕг адӕм, сӕхи ӕнӕххӕстдзинад ӕмӕ, хаттӕй-хатт та, сӕ раздӕры цардыуаг. Цы сын баххуыс кодтаид фӕивынӕн? Уыдон хъуыди, сӕ «зонд сын чи цырен кӕны, уыцы тых сног» кӕнын (Ефесӕгтӕм 4:23, НД ). Уыдон хъуамӕ Фыстад ахуыр кодтаиккой, хъуыды кодтаиккой, сӕ цардыл куыд хъуамӕ ӕндава, ууыл, ӕмчырыстӕттимӕ фӕрнӕй цардаиккой ӕмӕ зӕрдӕбынӕй куывтаиккой. Ӕмӕ уӕд Хуыцауы сыгъдӕг уды дыргъ сӕ царды тынгдӕр ахадыдтаид. Ефесы чырыстӕттӕ хъуамӕ «цардаиккой хӕларӕй, кӕрӕдзийы зын сӕм хъардтаид, Хуыцау сын Чырыстийы фӕрцы куыд ныббарста, афтӕ хатыр кодтаиккой кӕрӕдзийӕн» (Ефесӕгтӕм 4:32, НТ). Иннӕтӕ цыфӕнды ма кӕной, уӕддӕр мах хъуамӕ уӕм хиуылхӕцгӕ, хӕларзӕрдӕ, тӕригъӕдгӕнаг, хартыргӕнаг. Ӕцӕг, мах хъуамӕ фыддзинад фыддзинадӕй макӕмӕн фидӕм (Ромӕгтӕм 12:17, 18). Алкӕйдӕр Хуыцауау сыгъдӕг уарзтӕй куы уарзӕм, уӕд никуы фӕрӕдийдзыстӕм (1 Иоанны 4:8).
Уынаффӕ алы чырыстонӕн дӕр
18. 2 Тимофеймӕ 2:24 уынаффӕ рагон Ефесы хистӕр нӕлгоймагӕн куыд баххуыс кодта ӕмӕ алы чырыстонӕн дӕр ахъаз куыд у?
18 Уынаффӕ «маст ӕвзаргӕйӕ... хиуылхӕцгӕ» ут хауы алы чырыстонмӕ дӕр (2 Тимофеймӕ 2:24, НД ). Фӕлӕ ацы уынаффӕ ӕппӕты фыццаг лӕвӕрд уыди Тимофейӕн, Ефесы хистӕр нӕлгоймагӕй куы лӕггад кодта, уӕд. Уыцы ӕмбырды чидӕртӕ сӕхи ныхас кодтой ӕмӕ мӕнг ахуырад амыдтой. Уыдон хорз не ’мбӕрстой Моисейы Закъон. Уырнындзинад, уарзондзинад ӕмӕ сыгъдӕг цӕсгом куыд ахсджиаг сты, уый ницӕмӕ дардтой. Дзырдтыл хъаугъа кӕнгӕйӕ сӕ сӕ сӕрыстырдзинад быцӕутӕм ӕркодта. Ферох сӕ ис Чырыстийы ахуырӕдты сӕйраг нысан ӕмӕ Хуыцауы ӕфсарм куыд ахсджиаг у, уый. Уавӕр фӕхуыздӕр кӕнынӕн Тимофей хъуамӕ фидарӕй хӕцыдаид Фыстады ӕцӕгадыл, фӕлӕ йӕ йе ’фсымӕртимӕ та хъуыди сабырӕй ныхас кӕнын. Абоны хистӕр нӕлгоймӕгтӕ дӕр Тимофейау зонынц дзуг сӕхи кӕй нӕу ӕмӕ хъуамӕ сӕхи афтӕ дарой, цӕмӕй уый ахъаз уа чырыстон уарзондзинад ӕмӕ иудзинадӕн (Ефесӕгтӕм 4:1–3; 1 Тимофеймӕ 1:3–11; 5:1, 2; 6:3–5).
19. Не ’ппӕт дӕр сӕрныллӕгдзинадмӕ цӕмӕн хъуамӕ тырнӕм?
19 Хуыцау йӕ адӕмӕн дзуры, цӕмӕй «тырной сӕрныллӕгдзинадмӕ» (Софони 2:3). «Сӕрныллӕгдзинад» цы дзуттаг дзырдӕй ӕрцыд тӕлмац, уый амоны ахӕм адӕймагмӕ, ӕфхӕрдӕн ӕнӕ мӕстыйӕ ӕмӕ ӕнӕ мастхӕссынӕй чи быхсы. Цӕй уӕдӕ Иегъовӕйӕ зӕрдиагӕй ӕххуыс курӕм, цӕмӕй хиуылхӕцгӕ уӕм ӕмӕ суанг зындзинӕдтӕ ӕвзаргӕйӕ дӕр ӕнаипп уӕм.
Цы базыдтай?
• Исчи дӕм тызмӕгӕй куы дзура, уӕд дын цавӕр стихтӕ баххуыс кӕндзысты?
• Савл афтӕ тызмӕг цӕмӕн уыди?
• Йесойы цӕвиттон нын куыд ӕххуыс кӕны алы адӕмтӕм дӕр хорз зӕрдӕ дарынӕн?
• Бинонты ’хсӕн хиуылхӕцгӕ цӕмӕн хъуамӕ уӕм?
[Фарстатӕ ахуыр кӕнынӕн]
[Ныв 15 фарсыл]
Кӕд Савлы фыдлӕгӕй зыдтой, уӕддӕр Анани йемӕ хӕларӕй ныхас кодта.
[Ныв 17 фарсыл]
Бинонтӕ ныхмӕ нал цӕудзысты, чырыстӕттӕ сыл зӕрдиагӕй куы тыхсой, уӕд.
[Ныв 18 фарсыл]
Чырыстӕттӕ ахъаз кӕныц уарзондзинад ӕмӕ иудзинадӕн.
