Библи дын дӕ зӕрдӕмӕ рухс бауадздзӕн

БИБЛИ дохтырты чиныг нӕу, фӕлӕ уӕддӕр зӕгъы, зӕгъгӕ, ӕнкъарӕнтӕ,– хорз уой ӕви ӕвзӕр,– адӕймаджы ӕнӕниздзинад ӕмӕ зондахастыл фӕзынынц. «Хъӕлдзӕг зӕрдӕ у хорз хосгӕнӕг, ныфссаст зӕрдӕ та стджытӕ хус кӕны»,– зӕгъы Библи. Уым ма ис ноджыдӕр ахӕм ныхӕстӕ: «Зын сахат дӕхимӕ куы ныхъхъусай, уӕд дӕ тых асӕтдзӕн» (Ӕмбисӕндтӕ 17:22; 24:10). Ӕрхӕндӕг хъуыдытӕ адӕймагӕн йӕ хъару асӕттынц, йе уӕнг ын афтӕ амарынц, ӕмӕ йӕ нал фӕфӕнды йӕ зондахаст фӕивын, нал ӕй фӕхъӕуы искӕй ӕххуыс дӕр.

Зӕрдӕсӕттӕн хъуыдытӕ фӕзынынц уырнындзинадыл дӕр. Ахӕм хъуыдытӕ уӕгъд кӕй нӕуал фӕуадзынц, уыдонмӕ афтӕ фӕкӕсы, ӕмӕ Хуыцаумӕ никуы баввахс уыдзысты, никуы сын раарфӕ кӕндзӕн. Фыццаг статьяйы цы Симонӕйы кой кодтам, уый дӕр дызӕрдыг кодта, Хуыцау ӕй кӕй уарзы, ууыл. Фӕлӕ Библи куы кӕсӕм, уӕд бамбардзыстӕм – Хуыцауӕн йӕ зӕрдӕ чи рухс кӕны, уыдонӕй йын иу дӕр уӕлдайаг нӕу.

Хуыцау ныл ӕцӕгдӕр мӕт кӕны

Библи дзуры: «Хӕстӕг у Хицау саст зӕрдӕтӕм ӕмӕ удӕй сабырты ирвӕзын кӕндзӕн». Хуыцау «саст... зӕрдӕйыл» йӕхи нӕ атигъ кӕны, фӕлӕ «сӕрныллӕг ӕмӕ ныфссаст чи у, уыдоны зӕрдӕты рухс бауадзы» (Псалом 33:19; 50:19; Исай 57:15).

Иу хатт Хуыцауы Фырт, Йесо Чырысти, йӕ ахуыргӕнинӕгтӕн бамбарын кодта, Хуыцау кӕй кӕсы, йӕ лӕггадгӕнджыты хорзӕй цы ис, уымӕ. Цӕвиттонтӕ  ӕрхӕсгӕйӕ загъта, зӕгъгӕ, кӕд адӕмӕн сӕ фылдӕры цӕсты сырддонцъиу ницы у, уӕддӕр дзы иу дӕр Хуыцауы ӕвастӕй зӕхмӕ не ’рхауы. Стӕй ма загъта, адӕймаджы Хуыцауы хуызӕн кӕй ничи зоны,– зоны, суанг йӕ сӕрыл цал хъуыны ис, уый дӕр. Йӕ ныхасы кӕрон загъта: «Ма тӕрсут: сымах хуыздӕр стут бирӕ гыццыл цъиутӕй» (Матфейы 10:29–31) *. Йесо сын уый дзырдта, ӕмӕ адӕймаг йӕхи тыххӕй цыфӕнды ма хъуыды кӕна, уӕддӕр, уырнындзинад кӕмӕ ис, уыдон Хуыцауӕн зынаргъ сты. Апостол Петр дӕр нын дзуры, зӕгъгӕ, «Хуыцау... никӕй хъулон кӕны... Фӕлӕ Дзы чи тӕрсы ӕмӕ рӕстӕй чи цӕры, уый цыфӕнды адӕмыхаттӕй куы уа, уӕддӕр Ын адджын у» (Куыстытӕ 10:34, 35, НТ).

Раст цӕстӕнгас дын уӕд

Хуыцауы Ныхас нын дзуры, цӕмӕй нын раст цӕстӕнгас уа. Апостол Павел Хуыцауы фӕндӕй ныффыста: «Хуыцау мын хорзӕх кӕй радта, уымӕ гӕсгӕ уӕ алкӕмӕн дӕр зӕгъын: цы стут, уӕхицӕй уымӕй фылдӕр ӕнхъӕл ма ут, фӕлӕ уӕ алкӕмӕн дӕр Хуыцау уырнындзинад цас радта, уымӕ гӕсгӕ раст аргъ кӕнут уӕхицӕн» (Ромӕгтӕм 12:3, НТ).

Кӕй зӕгъын ӕй хъӕуы, хъуамӕ ӕгӕр хъал ма уӕм, фӕлӕ нӕхи ницӕйагыл дӕр ма нымайӕм. Хъуамӕ ахуыр кӕнӕм нӕхицӕн раст аргъ кӕнын, ома нӕ бон цы у ӕмӕ цы нӕу, уый ӕмбарын. Уый фӕдыл иу чырыстон сылгоймаг афтӕ загъта: «Зӕд дӕр нӕ дӕн ӕмӕ фыдбылыз дӕр. Алцӕмӕй дӕр хайджын дӕн – хорзӕй дӕр ӕмӕ ӕвзӕрӕй дӕр».

Уӕдӕ, нӕхимӕ раст цӕстӕй кӕсын сахуыр уӕм, уый ӕнцон нӕу. Куыд фӕзӕгъынц, афтӕмӕй хъуыддагӕн йӕ зӕгъынӕй, йӕ саразын зындӕр у. Бирӕ азты нӕхимӕ ӕгуыдзӕджы цӕстӕй куы кӕсӕм, уӕд нын зын у нӕ ныфссӕттӕн хъуыдытимӕ тох кӕнын. Фӕлӕ Хуыцауы фӕрцы нӕ бон у нӕ удыхъӕд ӕмӕ зондахаст аивын, ӕмӕ цардмӕ ӕндӕр цӕстӕй ракӕсын. Хуыцауы Ныхас дӕр нын уый дзуры: «Зӕронд адӕймаджы раздӕры царды сурӕт иуварс авӕрут, кӕцы сайӕн фӕндӕтты ӕмбийы, фӕлӕ сног ут удӕй уӕ зонды ӕмӕ сфӕлындут ног адӕймаджы, Хуыцаумӕ гӕсгӕ сконды, рӕстдзинады ӕмӕ ӕцӕг сыгъдӕгдзинады» (Ефесӕгтӕм 4:22–24).

Цӕмӕй «сног уӕм... удӕй нӕ зонды», ома нӕ зондахаст аивӕм, ууыл хъӕуы ӕппӕт тыхтӕй архайын. Афтӕмӕй нӕ бон бауыдзӕн не ’взӕр хъуыдытӕ хорзӕй баивын. Раззаг статьяйы цы Ленӕйы кой кодтам, уый цалынмӕ нӕ бамбӕрста кӕй йӕ хъӕуы фервӕзын йӕ зӕрдӕсӕттӕн хъуыдытӕй, зӕгъгӕ мӕ ничи уарзы ӕмӕ мӕ мын ничи баххуыс кӕндзӕн, уӕдмӕ йӕ бон нӕ уыд йӕ зондахаст фӕивын. Ленӕ, Симонӕ ӕмӕ ӕндӕртӕн Библийӕ цавӕр уынаффӕтӕ баххуыс кодтой сӕ зондахаст аивын?

 Библийы уагӕвӕрдтӕ сты зӕрдӕрухсы хос

«Сӕвӕр Хицауыл дӕ мӕт, ӕмӕ Уый хӕццӕн дӕуыл. Никуы бауадздзӕн фӕцудын рӕстгӕнӕджы» (Псалом 54:23). Цӕмӕй зӕрдӕрухс уӕм ӕмӕ нын цард ад кӕна, уымӕн нын фыццаджыдӕр баххуыс кӕндзӕн иу хъуыддаг – Хуыцаумӕ кувын. Симонӕ зӕгъы: «Мӕ зӕрдӕ куы нырхӕндӕг вӕййы, уӕд Иегъовӕмӕ скувын, ӕмӕ дзы ӕххуыс ракурын. Афтӕ никуы уыди, ӕмӕ мын хъарутӕ ма радта ӕмӕ мӕ раст зондыл ма сӕвӕра». Псаломзарӕггӕнӕджы ныхӕстӕ, зӕгъгӕ, сӕвӕр Иегъовӕйыл дӕ мӕт, ууыл дзурӕг сты, ӕмӕ ныл Хуыцау канд мӕт нӕ кӕны, фӕлӕ йе ’ххуысы аккаг чи у, уыдоныл дӕр нӕ нымайы. Н. э. 33 азы Куадзӕны изӕр Чырысти йӕ ахуыргӕнинӕгтӕн куы ской кодта, тагъд сӕ кӕй ныууадздзӕн, уӕд тынг ӕрӕнкъард сты. Фӕлӕ сӕ Йесо афтӕ нӕ ныууагъта, загъта цӕмӕй Фыдмӕ кувой: «Курут ӕмӕ райсдзыстут, ӕмӕ уӕ цинӕн кӕрон нӕ уыдзӕн» (Иоанны 16:23, 24, НТ).

«Райсынӕй амондджындӕр хъуыддаг у раттын» (Куыстытӕ 20:35). Чырысти куыд дзырдта, афтӕмӕй зӕрдӕрухсы хос у искӕмӕн исты дӕттын. Ацы фӕдзӕхст куы ’ххӕст кӕнӕм, уӕд фылдӕр нӕхи уды кой нӕ кӕндзыстӕм, фӕлӕ иннӕты. Кӕмӕн баххуыс кӕнӕм, уымӕн йӕ райгонд цӕсгом куы фенӕм, уӕд нӕм цӕрын ӕрцӕуы. Ленӕ Библийӕ хорз хабар иудадзыг кӕй хъусын кӕны, уый йын ӕххуыс кӕны дыууӕ хъуыддаджы. Ленӕ афтӕ зӕгъы: «Фыццаджыдӕр, Йесо куыд загъта, афтӕмӕй амондджындӕр ӕмӕ зӕрдӕрухсдӕр дӕн. Дыккаджы та, адӕм мӕм хорз куы байхъусынц, уӕд мӕ зӕрдӕ барухс вӕййы». Адӕмӕн удуӕлдайӕ куы ӕххуыс кӕнӕм, уӕд Ӕмбисӕндты 11:25 цы фыст ис, уый махыл дӕр ӕххӕст кӕндзӕн: «Иннӕтӕн дон ӕнӕхӕлӕгӕй чи дары, уымӕн ӕй йӕхицӕн дӕр ӕнӕхӕлӕгӕй дардзысты».

«Ӕрхӕндӕг адӕймагӕн йӕ бонтӕ сты мӕт, хъӕлдзӕгзӕрдӕйӕн та алы бон дӕр у куывд» (Ӕмбисӕндтӕ 15:15). Алчидӕр нӕ йӕ уавӕртӕм цы цӕстӕй кӕсдзӕн, уый йӕхицӕй кӕнгӕ у. Нӕ бон у алцыдӕр фауын, алцӕуылдӕр мӕт кӕнын, тыхсын, науӕд та алцӕмӕдӕр хорз цӕстӕй кӕсын, хъӕлдзӕгзӕрдӕйӕ цӕрын ӕмӕ, раст цыма куывды бадӕм, афтӕ цин кӕнын. Симонӕ зӕгъы: «Ӕдзухдӕр хорз цӕуылдӕр хъуыды кӕныныл архайын. Ахуыр кӕнын Библи, цӕуын уацамынды ӕмӕ кувын. Стӕй мӕхи бӕттын хъӕлдзӕг, цардбӕллон адӕмыл ӕмӕ, мӕ бон цы у, уымӕй иннӕтӕн ӕххуыс кӕнын». Адӕймагӕн ахӕм зӕрдӕйы уаг куы уа, уӕд уыдзӕн зӕрдӕрухс ӕмӕ амондджын. Библи дӕр нын уымӕн амоны: «Хъӕлдзӕг ут Хицауы тыххӕй ӕмӕ цин кӕнут, рӕстгӕнджытӕ; циндзинады ут, ӕппӕт зӕрдӕйӕ рӕстытӕ» (Псалом 31:11).

«Ӕцӕг ӕмбал алкӕддӕр уарзы, ӕмӕ у, зын сахат цӕмӕй адӕймаджы фарсмӕ ӕрбалӕууа, уый тыххӕй чи райгуыры, ахӕм ӕфсымӕр»  (Ӕмбисӕндтӕ 17:17). Ӕввахс нӕм чи у, кӕнӕ нӕ раст зондыл чи сараздзӕн, ахӕм адӕймагӕн нӕ зӕрдӕ куы ӕргом кӕнӕм, уӕд нӕ бон уыдзӕн зӕрдӕсӕттӕн хъуыдытимӕ тох кӕнын, ӕмӕ ныл цалынмӕ нӕ фӕтых сты, уӕдмӕ сӕ аиуварс кӕнын. Афтӕмӕй сахуыр уыдзыстӕм раст ӕмӕ хорз цӕстӕй кӕсын. «Цы мӕ тыхсын кӕны, уыдӕттӕ куы радзурын, уӕд мын фенцондӕр вӕййы,– зӕгъы Симонӕ.– Дӕ зӕрдӕйы цы ис, уый хъуамӕ ӕндӕр искӕмӕн ӕргом кӕнай. Фылдӕр хатт мын уый дӕр фаг вӕййы». Ацы хорз хъуыдытӕ нӕ зӕрдӕмӕ куы айсӕм, уӕд бамбардзыстӕм, ацы ӕмбисонды ныхӕстӕ раст кӕй сты: «Зӕрдӕйы мӕт адӕймагӕн йӕ тых сӕтты, хорз ныхас та йын цины хос у» (Ӕмбисӕндтӕ 12:25).

Дӕ бон цы у аразын

Зӕрдӕсӕттӕн хъуыдытимӕ куыд ис тох кӕнӕн, стӕй цӕмӕй зӕрдӕрухс уӕм, уый тыххӕй Библийӕ ӕркастыстӕм ӕрмӕст цалдӕр хорз уагӕвӕрдмӕ. Кӕд ды дӕр ахӕм ныфссӕттӕн хъуыдытимӕ тох кӕныс, уӕд дын нӕ зӕрдӕ зӕгъы, Хуыцауы Ныхас, Библи, лӕмбынӕгдӕр иртасын. Ахуыр кӕн раст цӕстӕй кӕсын дӕхимӕ дӕр ӕмӕ Хуыцауимӕ дӕ ахастытӕм дӕр. Афтӕмӕй Хуыцауы Ныхасы фӕрцы дӕ алы хъуыддагӕй дӕр дӕ зӕрдӕ райдзӕн.

[Фиппаинаг]

[Ныв 7 фарсыл]

Библийы уагӕвӕрдтӕ нын сты зӕрдӕрухсы хос.