Армагеддон – бӕстысӕфт у?

АРМАГЕДДОН! Ацы дзырд куы фехъусыс, уӕд дӕ цӕстытыл цы ауайы: адӕм куыд цагъды кӕнынц ӕви дуне пиллон арты куыд судзы? Библийы цы дзырдтӕ ис, уыдонӕй Армагеддонӕй арӕхдӕр никӕцы дзырд ис фехъусӕн. Уымӕй фӕпайда кӕнынц, адӕммӕ цы ӕбуалгъ фидӕн ӕнхъӕлмӕ кӕсы, ууыл дзургӕйӕ. Армагеддоны цытӕ цӕудзӕн, уыдӕттӕ алыхуызон хиирхӕфсӕнты (кинонывты, чингуыты, видеохъӕзтыты) ахӕм хуызы ӕвдисынц, ӕмӕ адӕймагӕн йӕ хъуын арц сбады. Ацы дзырд цы нысан кӕны, уый бирӕтӕ нӕ зонынц ӕмӕ йӕ раст не ’мбарынц. Алы ӕмӕ алыхуызон хъуыдытӕ ис, Армагеддон цы у, уый тыххӕй. Фӕлӕ уыдонӕн сӕ фылдӕр раст не сты Библимӕ гӕсгӕ – ацы дзырд кӕцӕй ист у, уыцы чиныгмӕ гӕсгӕ.

Библийы Армагеддон ӕмӕ «дунейы фӕуд» баст кӕй сты, уымӕ гӕсгӕ не сразы уаис, ацы дзырд бӕлвырдӕй цы нысан кӕны, уый ӕнӕмӕнгӕй кӕй хъӕуы базонын? (Матфейы 24:3, НТ). Раст нӕ уаид, ӕцӕгады суадонмӕ, Хуыцауы Ныхасмӕ куы ӕркӕсиккам ӕмӕ куы базониккам, Армагеддон цы у ӕмӕ дын дӕхи ӕмӕ дӕ бинонты цардыл куыд фӕзындзӕн?

Ацы фарст Библимӕ гӕсгӕ куы равзарӕм, уӕд фендзыстӕм, Армагеддон дунейы сӕфт кӕй нӕу, фӕлӕ амондджын царды райдиан, рӕстаг ног дунейы цинӕфсӕстӕй цӕрын кӕй фӕнды, уыцы адӕмӕн. Уӕдӕ Армагеддон ӕцӕгӕй цы нысан кӕны, уый бӕлвырд бамбардзынӕ, иннӕ статья куы бакӕсай, уӕд.

[Рамкӕ/Ныв 3 фарсыл]

КУЫД ХЪУЫДЫ КӔНЫС, АРМАГЕДДОН ЦЫ У?

• Ядерон хӕст.

• Ӕрдзон бӕллӕх.

• Зӕхх ӕмӕ исты уӕларвон буар кӕрӕдзи скъуырдзысты.

• Хуыцау фыдадӕмы фесафдзӕн.