Ӕнтыстджын ӕмӕ арӕхстджын лӕггадгӕнджытӕ уӕм

«Ӕппӕтӕн дӕр ӕз сдӕн ӕппӕтдӕр, цӕмӕй ӕппын фӕстаг фервӕзын кӕнон иуӕй-иуты» (1 КОРИНФӔГТӔМ 9:22).

1, 2. а) Павел ӕнтыстджын цӕй фӕрцы уыд? ӕ) Павел йӕ хӕслӕвӕрдмӕ цы цӕстӕй каст, уый фӕдыл цы загъта?

УЫМӔН ӕнцон уыдис ахуыргӕндтимӕ ӕмӕ хуымӕтӕг ӕрмдӕснытимӕ. Йӕ ­ныхас ахадыдта ромаг уӕздӕттӕ ӕмӕ фригиаг зӕхкусджыты ’хсӕн. Йӕ фыстӕджытӕ хъардтой сӕрибархъуыдыгӕнӕг грекъӕгты ӕмӕ зӕронд ӕгъдӕуттыл хӕст иудейты зӕрдӕтӕм. Йӕ ныхасы уыд стыр уӕз ӕмӕ арф ӕнкъарӕнтӕ. Уый архайдта, алы адӕймагимӕ дӕр кӕрӕдзи куыд бамбӕрстаиккой, ууыл, цӕмӕй йӕ ӕрбакодтаид Чырыстимӕ (Куыстытӕ 20:21).

² Уыцы адӕймаг уыд апостол Павел – ӕнтыстджын лӕггадгӕнӕг (1 Тимофеймӕ 1:12). Йесо йын бахӕс кодта, цӕмӕй йын «хъусын кӕна [йӕ] ном адӕмты ӕмӕ паддзӕхты, ӕмӕ Израилы фыртты раз» (Куыстытӕ 9:15). Цы цӕстӕй каст Павел уыцы хӕслӕвӕрдмӕ? Уый загъта: «Ӕппӕтӕн дӕр ӕз сдӕн ӕппӕтдӕр, цӕмӕй ӕппын фӕстаг фервӕзын кӕнон иуӕй-иуты. Адон та кӕнын Евангелийы тыххӕй, цӕмӕй уон уыимӕ ӕмархайӕг» (1 Коринфӕгтӕм 9:19–23). Цӕмӕй нын хъусын кӕныны ӕмӕ ахуыргӕнинӕгтӕ цӕттӕ кӕныны хъуыддаджы фылдӕр ӕнтыса, уый тыххӕй нын Павелы цӕвиттон куыд ӕххуыс кӕны?

Лӕг йӕ зондахаст аивта, ӕмӕ йӕ хӕслӕвӕрд ӕххӕст кӕнын райдыдта

3. Павел раздӕр чырыстӕттӕм цы зӕрдӕ дардта?

³ Уыцы хӕслӕвӕрд ӕххӕст кӕнынӕн цы сабыр ӕмӕ зӕрдӕхӕлар адӕймаг хъуыди, Павел алкӕддӕр ахӕм уыд? Кӕцӕй! Цы диныл хӕст уыд, уый йӕ афтӕ бакуырм кодта, ӕмӕ Савл (ныр ӕй зонынц Павелӕй) знӕтӕй зылди Чырыстийы ахуыргӕнинӕгты фӕдыл. Йе ’рыгонӕй ма ӕххуыс кодта Стефаны марынӕн дӕр. Стӕй та карзӕй ӕфхӕрдта иннӕ чырыстӕтты (Куыстытӕ 7:58; 8:1, 3; 1 Тимофеймӕ 1:13). Павелӕн «ӕнӕуынон уыдысты Хицауы ахуыргӕнинӕгтӕ, ӕртхъирӕнтӕ сӕм кодта амарынӕй». Ӕмӕ канд Иерусалимы нӕ, фӕлӕ ма суанг цӕгатырдӕм Дамаскмӕ дӕр ацыд, цӕмӕй сыл уым дӕр йӕ фыдӕх ныккала (Куыстытӕ 9:1, 2, НТ).

4. Павелы йӕ хӕслӕвӕрд сӕххӕст кӕнынӕн цы аивын хъуыд?

⁴ Павелӕн чырыстӕттӕ ӕнӕуынон, ӕвӕццӕгӕн, уымӕн уыдысты, афтӕ кӕй хъуыды кодта, ӕмӕ йын уыцы ног ахуырад йӕ фыдӕлты дин халы, ӕцӕгӕлон ӕгъдӕуттӕ йӕм хӕссы. Ӕмӕ уый диссаг нӕ уыд, уымӕн ӕмӕ Павел уыд фарисей. Уыцы дзырд та нысан кӕны «чи ахицӕн, уый» (Куыстытӕ 23:6). Уӕдӕ ма ахъуыды кӕн, Павел арвыцӕфау куыннӕ фӕуыдаид, куы базыдта, Хуыцау ӕй кӕй равзӕрста хъусын кӕнынӕн Чырыстийы тыххӕй ӕппӕт адӕмӕн – йӕ адӕмӕй чи нӕ уыд, уыдонӕн! (Куыстытӕ 22:14, 15; 26:16–18). Фарисейтӕ та, тӕригъӕдджынтыл кӕй нымадтой, уыцы адӕмимӕ хӕргӕ дӕр нӕ кодтой (Лукайы 7:36–39). Кӕй зӕгъын ӕй хъӕуы, Павелӕн ӕнцон нӕ уыд йӕ цӕстӕнгас Хуыцауы фӕндонмӕ гӕсгӕ аивын. Хуыцауы та фӕнды, цӕмӕй ӕппӕт адӕм дӕр аирвӕзой (Галатӕгтӕм 1:13–17).

5. Куыд у нӕ бон Павелы фӕзмын нӕ хъусын кӕныны хъуыддаджы?

⁵ Чи зоны мах дӕр исты аивын бахъӕуа. Уацамынды ӕндӕр ӕвзӕгтыл дзурӕг адӕмыл арӕхдӕр ӕмбӕлын кӕй райдыдтам, уымӕ гӕсгӕ нӕ хъӕуы нӕ зондахаст ивын ӕмӕ адӕммӕ иухуызон цӕстӕй кӕсын (Ефесӕгтӕм 4:22–24). Фӕнда нӕ ӕви нӕ, кӕм ӕмӕ куыд хъомыл кодтам,  уый ныл тынг ӕндавы. Растдӕр уый аххосӕй фӕкӕсӕм ӕнӕрвӕссон цӕстӕй иннӕтӕм ӕмӕ нын уымӕн вӕййы зын адӕмы уавӕртӕ хынцын. Кӕд нӕ фӕнды фысау сӕрныллӕг адӕмӕн Хуыцауы базонынӕн ӕххуыс кӕнын, уӕд хъуамӕ нӕхи хизӕм ахӕм зондахастӕй (Ромӕгтӕм 15:7). Афтӕ кодта Павел. Цӕмӕй фылдӕр адӕмыл аххӕссыдаид, уый тыххӕй цӕттӕ уыд йӕ зондахаст аивынмӕ. Адӕмы кӕй уарзта, уымӕ гӕсгӕ йӕхиуыл нӕ ауӕрста ӕмӕ, куыд ахуыргӕнӕг, афтӕ хуыздӕрӕй-хуыздӕр кодта. Уымӕй махӕн дӕр у фӕзминаг. «Муртатты Апостол» Павелы лӕггадмӕ куы ӕркӕсӕм, уӕд фендзыстӕм, адӕммӕ куыд лӕмбынӕг дардта йӕ хъус, куыд арӕхстджын ӕмӕ куыд ӕмбаргӕ уыд хъусын кӕныны ӕмӕ ахуыр кӕныны хъуыддаджы * (Ромӕгтӕм 11:13).

Ӕнтыстджын хъусынгӕнӕг

6. Павел йӕ хъус лӕмбынӕг куыд дардта йӕ ныхасмӕхъусджыты уавӕртӕм ӕмӕ йын уый фӕрцы цы ’нтыст?

⁶ Уацамынды Павел йӕ хъус лӕмбынӕг да­рдта, кӕимӕ ныхас кодта, уыдоны уавӕртӕм ӕмӕ, цӕуыл ӕууӕндыдысты, уымӕ. Павел паддзах Агриппӕимӕ куы ныхас кодта, уӕд сразы, уый «хорз кӕй зоны иудейты ӕппӕт ӕгъдӕуттӕ ӕмӕ дзырддаг фарстатӕ», (НТ). Уый фӕстӕ Павел йӕ ныхас сарӕзта, Агриппӕ цӕуыл ӕууӕндыд ӕмӕ йын зонгӕ цы уыд, ууыл. Павелы ныхас афтӕ ахадгӕ ӕмӕ фидар уыд, ӕмӕ Агриппӕ загъта: «Басастай мӕ, бирӕ нал хъӕуы, цӕмӕй ӕз дӕр счырыстон уон!», (НФ) (Куыстытӕ 26:2, 3, 27, 28).

7. Павел Листрӕйы цӕрджытимӕ ныхасгӕнгӕйӕ арӕхстджын куыд разынд?

⁷ Уымӕй уӕлдай ма Павел уыд арӕхстджын. Ӕркӕс ма, Павел Листрӕйы цӕрджытимӕ куыд ныхас кодта, Варнавӕимӕ сын хуыцӕуттӕ ’нхъӕлӕй бакуывынмӕ куы хъавыдысты, уӕд. Зӕгъӕн ис, ӕмӕ ликаойнаг ӕвзагыл дзурӕг адӕм уыдысты талынг ӕмӕ мӕнгуырнындзинӕдтыл хӕст адӕм. Куыстытӕй 14:14–18 куыд зыны, афтӕмӕй сын Павел дзырдта Хуыцауы сфӕлдыстадыл ӕмӕ, ӕрдз цы хорздзинӕдтӕй дзаг у, уый тыххӕй, цӕмӕй равдыстаид, ӕцӕг Хуыцауӕн ӕмбал кӕй нӕй. Уый сын уыд ӕнцонӕмбарӕн ӕмӕ, ӕвӕццӕгӕн, уымӕн сразы сты, «цӕмӕй ма ӕрхӕссой... нывӕндтӕ» Павел ӕмӕ Варнавӕйӕн.

8. Павел йӕхи арӕхстджынӕй куыд ӕвдыста, кӕд-иу хатт йӕ маст рафыхт, уӕддӕр?

⁸ Кӕй зӕгъынӕй хъӕуы, Павел ӕххӕст адӕймаг нӕ уыд, ӕмӕ хатт цавӕрдӕр хъуыддӕгтӕм йӕ бон ӕнцад кӕсын нӕ уыди. Зӕгъӕм, иу хатт ӕй ӕнаххоссӕй бафхӕрдтой ӕмӕ йӕ маст рафыхт. Фӕлӕ йын куы загътой, ӕмӕ ӕнӕбары хистӕр сауджын Ананийы бафхӕрдта, уӕд дзы уайтагъд хатыр ракуырдта (Куыстытӕ 23:1–5). Афинӕты та куы уыд, уӕд райдианы смӕсты, «гуымирытӕй чи байдзаг, уыцы сахары уындӕй». Фӕлӕ Ареопагы ныхасы куы рацыд, уӕд мӕстыйӕ нӕ дзырдта. Уымӕй уӕлдай, афинӕгтимӕ сӕ тӕрхондоны ныхасгӕнгӕйӕ, сӕ кӕрӕдзи куыд бамбӕрстаиккой, ууыл архайдта. Дзырдта, зонгӕ сын цы уыд, ууыл – «ӕнӕзонгӕ Хуыцауӕн» нывонд­хӕссӕн уӕм федтон, зӕгъгӕ, стӕй сын ӕрхаста сӕ фысджытӕй иуы ныхӕстӕ (Куыстытӕ 17:16–28).

9. Алыхуызон адӕмимӕ ныхасгӕнгӕйӕ Павел ӕмбаргӕдзинад куыд ӕвдыста?

⁹ Алыхуызон адӕмимӕ ныхасгӕнгӕйӕ Павел ӕвдыста диссаджы ӕмбаргӕдзинад. Йӕ зӕрдыл-иу дардта, адӕм цы ӕгъдауыл хӕст уыдысты ӕмӕ цы уавӕрты хъомыл кодтой, уый. Павел ромаг чырыстӕттӕм куы фыста, уӕд ӕй рох нӕ уыд, уыдон кӕй цардысты уӕды заманы ӕппӕты тыхджындӕр дунеон паддзахады сӕйраг сахары. Уымӕ гӕсгӕ Павел Ромы чырыстӕттӕм куы фыста, уӕд сын сӕйрагдӕр сӕ хъус ӕрдардта, Чырыстийы нывондӕн цы тых ис, уый Адамы тӕригъӕды зианхӕссӕг тыхыл кӕй фӕуӕлахиз, уымӕ. Павел ромӕгтимӕ куы дзырдта – чырыстӕттӕ уыдаиккой ӕви нӕ,– йӕ ныхас ӕмбӕлди зӕрдӕйыл (Ромӕгтӕм 1:4; 5:14, 15).

10, 11. Павел, йӕ хъусджытӕ чи уыдысты, уымӕ гӕсгӕ сын цӕвиттонтӕ куыд хаста? (Кӕс фиппаинаджы.)

 ¹⁰ Павел кӕимӕ ныхас кодта, уыдонӕн-иу Библийы арф хъуыдытӕ куыд ӕмбарын кодта? Зонгӕ, ӕнцонӕмбарӕн сын чи уыд, ахӕм цӕвиттонтӕ-иу сын ӕрхаста. Зӕгъӕм, Павел тынг хорз зыдта Ромаг паддзахады цагъарады хъуыддӕгтӕ. Йӕ фыстӕджытӕ кӕмӕ фыста, уыдонӕй бирӕтӕ уыдысты цагъартӕ. Уымӕ гӕсгӕ Павел, цагъарады кой уымӕн ракодта, цӕмӕй бамбарын кодтаид, алчидӕр кӕй хъуамӕ аскъуыддзаг кӕна, кӕмӕн уыдзӕн коммӕгӕс – тӕригъӕдӕн ӕви рӕстдзинадӕн (Ромӕгтӕм 6:16–20).

¹¹ Иу бӕрӕгуаты дзырдӕуы: «Ромы-иу хицауӕн йӕ бон уыди цагъары ауадзын, кӕнӕ ­та-иу цагъарӕн йӕ бон уыди йӕхи балхӕнын. Цагъар ма-иу ссӕрибар ис, исты хуыцауы дӕлбар-иу йӕхи куы бакодта, уӕд». Ахӕм цагъарӕн уый фадат уыдис, ӕмӕ баззадаид ӕмӕ йӕ хицауӕн мыздыл куыстаид. Павел, ӕвӕццӕгӕн, ацы ӕгъдауы кой кодта, афтӕ куы фыста, зӕгъгӕ, алчидӕр хъуамӕ равзара, кӕмӕн лӕггад кӕндзӕн, уый – тӕригъӕдӕн ӕви рӕстдзинадӕн. Ромы чырыстӕттӕ-иу ссӕрибар сты тӕригъӕдӕй ӕмӕ-иу сӕхи Хуыцауы дӕлбар бакодтой. Ныр сын бар уыд кӕнӕ Хуыцауӕн лӕггад кӕнын, кӕна та сӕ кӕд фӕндыд, уӕд та сӕ раздӕры хицауӕн – тӕригъӕдӕн. Павел уыцы хуымӕтӕг ӕмӕ ӕнцонӕмбарӕн цӕвиттон Ромы чырыстӕттӕн уый тыххӕй ӕрхаста, цӕмӕй ахъуыды кодтаиккой: чи у мӕ хицау? *

Павел нын у фӕзминаг

12, 13. а) Кӕд нӕ фӕнды алыхуызон адӕмы зӕрдӕтӕ бацагайын, уӕд нӕ цӕуыл хъӕуы архайын? ӕ) Цӕмӕй алыхуызон адӕмӕн хъусынгӕнгӕйӕ ӕнтыстджын уай, уый тыххӕй цы аразыс?

¹² Павелау мах дӕр адӕммӕ хъуамӕ нӕ хъус лӕмбынӕг дарӕм, стӕй уӕм арӕхстджын ӕмӕ ӕмбаргӕ, цӕмӕй алыхуызон адӕмы зӕрдӕтӕ агайӕм. Кӕд нӕ фӕнды адӕмӕн ӕххуыс кӕнын хорз хабар ӕмбарынӕн, уӕд фаг нӕу уӕлӕнгӕйтты сын истытӕ дзурын, ӕрмӕст цы бацӕттӕ кодтам, уый зӕгъын кӕнӕ сын литературӕ ныууадзын. Мах фӕнды, адӕм цӕмӕй тыхсынц ӕмӕ цӕуыл сагъӕс кӕнынц, цы уарзынц ӕмӕ цы нӕ уарзынц, цӕмӕй тӕрсынц ӕмӕ иннӕтӕм цы цӕстӕй кӕсынц, уыдӕттӕ хынцын. Кӕд уый ӕнцон нӕу, уӕддӕр хорз хабар хъусынгӕнджытӕ ӕгас зӕххы къорийы дӕр ууыл архайынц. Иегъовӕйы Ӕвдисӕнты филиал Венгрийы фыссы: «Ӕфсымӕртӕ ӕрцӕуӕггӕгты ӕгъдӕуттӕн аргъ кӕнынц ӕмӕ сӕм уымӕ не ’нхъӕлмӕ кӕсынц, сӕ цардыуаг бынӕттон ӕгъдӕуттӕм гӕсгӕ кӕй аивдзысты». Уымӕ тырнынц Ӕвдисӕнтӕ се ’ппӕт дӕр.

¹³ Дард Скӕсӕны иу бӕстӕйы адӕмӕн сӕ мӕт сӕйраджыдӕр у се ’нӕниздзинад, сӕ сывӕллӕттӕ ӕмӕ ахуырад. Уымӕ гӕсгӕ уымы хъусынгӕнджытӕ фылдӕр дзурынц уыдӕттыл, къаддӕр та дунейы ӕмӕ царды уавӕртӕ фыддӕрӕй-фыддӕр кӕй кӕнынц, ууыл. Америкӕйы иу стыр горӕты хъусынгӕнджытӕ бафиппайдтой, уыцы ран адӕмы фылдӕр кӕй тыхсын кӕны, гӕртамхортӕ кӕй сбирӕ сты, горӕт машинӕтӕй кӕй байдзаг ӕмӕ фыдракӕндтӕ.  Ӕвдисӕнтӕ ныхас райдайынц уыцы хабӕрттӕй ӕмӕ йӕ аздахынц Библимӕ. Ӕнтыстджын хъусынгӕнджытӕ цӕуылфӕнды ма ныхас кӕной, афтӕ фӕдзурынц, адӕмы ныфс куыд бауадзой. Се ’ргом сын здахынц, Библийы уынаффӕтӕ царды абон дӕр кӕй ахадынц, уымӕ, ӕмӕ Хуыцауы зӕрдӕвӕрд рухс фидӕнмӕ (Исай 48:17, 18; 52:7).

14. Нӕ ныхас адӕмы уавӕртӕм гӕсгӕ цӕмӕн хъуамӕ аразӕм?

¹⁴ Уацамынды нын стыр ӕххуыс уаид, нӕ ныхас-иу уавӕрмӕ гӕсгӕ куы фӕивиккам, уымӕн ӕмӕ адӕм кӕрӕдзийӕ тынг хицӕн кӕнынц се ’гъдау, сӕ ахуырад ӕмӕ сӕ динӕй. Хуыцауыл чи ӕууӕнды, фӕлӕ Библийыл ӕнӕууӕнк чи кӕны, уыдонимӕ нӕ ныхас иухуызон уыдзӕн ӕмӕ, Хуыцау кӕй нӕ уырны, уыдонимӕ та – ӕндӕрхуызон. Афтӕ чи зӕгъы, дины чингуытӕ иууылдӕр адӕмы зонд дзӕгъӕл кӕнынӕн сты, зӕгъгӕ, ахӕмтимӕ куыд ныхас кӕндзыстӕм, уый хицӕн кӕндзӕн, Библийы уагӕвӕрдтӕн чи аргъ кӕны, уыдонимӕ куыд дзурдзыстӕм, уымӕй. Арӕхстджын ма хъуамӕ уӕм, адӕммӕ ӕмхуызон ахуыр кӕй нӕй, уымӕ гӕсгӕ дӕр. Дӕсны ахуыргӕнджытӕ ныхас кӕндзысты ӕмӕ цӕстуынгӕ цӕвиттонтӕ хӕсдзысты уавӕртӕм гӕсгӕ (1 Иоанны 5:20).

Ног хъусынгӕнджытӕн ӕххуыс кӕн

15, 16. Ног хъусынгӕнджыты ахуыр кӕнын цӕмӕн хъӕуы?

¹⁵ Павел канд ууыл нӕ хъуыды кодта, йӕхӕдӕг куыд хуыздӕр амона ӕцӕгад. Уый ма ӕмбӕрста, рӕзгӕ фӕлтӕры дӕр, зӕгъӕм, Тимофей ӕмӕ Титы, ахуыр кӕнын ӕмӕ цӕттӕ кӕнын кӕй хъӕуы, цӕмӕй ӕнтыстджын лӕггадгӕнджытӕ суой (2 Тимофеймӕ 2:2; 3:10, 14; Титмӕ 1:4). Уӕдӕ абон дӕр тынг ахсджиаг у ног лӕггадгӕнджыты ахуыр кӕнын.

¹⁶ 1914 азы ӕгас зӕххыл уыдис 5 минмӕ ’ввахс хъусынгӕнӕджы. Абон та алы къуыри дӕр 5 мины бӕрц донаргъуыд райсынц! (Исай 54:2, 3; Куыстытӕ 11:21). Ног адӕм чырыстон ӕмбырдмӕ куы ӕрбаиу вӕййынц ӕмӕ хъусын кӕнын куы райдайынц, уӕд сӕ фӕхъӕуы ахуыр кӕнын ӕмӕ сын разамынд дӕттын (Галатӕгтӕм 6:6). Уымӕ гӕсгӕ нын тынг ахсджиаг у, цӕмӕй мах дӕр ногты цӕттӕ кӕнӕм, не ’стыр Ахуыргӕнӕг Йесо ахуыргӕнинӕгты куыд ахуыр кодта ӕмӕ сӕ куыд цӕттӕ кодта, афтӕ *.

17, 18. Куыд у нӕ бон ног хъусынгӕнджытӕн ӕххуыс кӕнын, цӕмӕй уӕндонӕй дзурой?

 ¹⁷ Йесо йӕ ахуыргӕнинӕгты хъусын кӕнынмӕ куы арвыста, уӕд сӕ сӕхи бар нӕ ныууагъта. Фыццаджыдӕр уал сын сӕ хъус ӕрдардта, хъусын кӕныны хъуыддаг куыд ахсджиаг у, уымӕ, ӕмӕ сӕ уый фӕдыл ӕдзух кувын кӕй хъӕуы. Стӕй сын баххуыс кодта ӕртӕ сӕйраг хъуыддаджы: кӕимӕ, кӕм ӕмӕ цы хъусын кӕной (Матфейы 9:35–38; 10:5–7; Маркы 6:7; Лукайы 9:2, 6). Мах дӕр афтӕ кӕнын хъӕуы. Кӕмӕнфӕнды ма ӕххуыс кӕнӕм – нӕ сывӕллон уа, ног хъусынгӕнӕг ӕви рагӕй чи нал хъусын кӕны, ахӕм,– хорз уаид мах дӕр сӕ афтӕ куы ахуыр кӕниккам.

¹⁸ Ног хъусынгӕнджыты хъӕуы стыр ӕххуыс, цӕмӕй Хуыцауы Паддзахады хабар дзурын ма ӕфсӕрмы кӕной. Дӕ бон сӕм фӕкӕсын у, сӕ ныхас хуымӕтӕгӕй куыд райдайой, уый бацӕттӕ кӕнынмӕ? Хорз уаид, уацамынды-иу фыццаг цалдӕр адӕймагимӕ дӕхӕдӕг куы аныхас кӕнис ӕмӕ дӕм уый та куы байхъусид. Уыцы хъуыддаджы нӕ бон у бафӕзмын Гедеоны. Уый йе ’фсӕддонтӕн загъта: «Кӕсут, ӕз куыд кӕнын, уымӕ, ӕмӕ сымах дӕр афтӕ кӕнут» (Тӕрхонгӕнджыты 7:17). Стӕй та, уадз, ӕмӕ уый бафӕлварӕд. Куыд архайы, уый тыххӕй-иу дзы раппӕл ӕмӕ, кӕд хъӕуа, уӕд та-иу ын зӕгъ, цы йӕ фӕхуыздӕр кӕнын хъӕуы, уый.

19. Цӕмӕй «нӕ куыст кӕронмӕ бакӕнӕм», уый тыххӕй цӕуыл хъуамӕ архайӕм?

¹⁹ Цӕмӕй «нӕ куыст кӕронмӕ бакӕнӕм», уый тыххӕй хъуамӕ нӕхӕдӕг дӕр уӕм арӕхстджын ӕмӕ ног хъусынгӕнджыты дӕр ууыл ахуыр кӕнӕм. Нӕ нысан у, адӕмӕн Хуыцауы тыххӕй ирвӕзындзинадмӕ кӕнӕг зонындзинӕдтӕ раттын. Ӕмӕ уый ӕдзух нӕ зӕрдыл куы дарӕм, уӕд нын ӕнцондӕр уыдзӕн ӕппӕт хъарутӕй ууыл архайын, ӕмӕ алкӕмӕндӕр «суӕм ӕппӕтдӕр, цӕмӕй ӕппын фӕстаг фервӕзын кӕнӕм иуӕй-иуты» (2 Тимофеймӕ 4:5, НТ; 1 Коринфӕгтӕм 9:22).

[Фиппаинӕгтӕ]

Хъуыды ма кӕныс?

• Цавӕр хъуыддӕгты у нӕ бон Павелы бафӕзмын?

• Нӕ зондахасты хорз цы уаид фӕивын?

• Нӕ бон куыд у хорз хабар хъусынгӕнгӕйӕ адӕмы ныфс уадзын?

• Цӕмӕй ног хъусынгӕнджытӕ хорз хабар уӕндонӕй дзурой, уый тыххӕй сӕ цы хъӕуы?

[Фарстатӕ ахуыр кӕнынӕн]

[Хицӕнгонд текст 29 фарсыл]

Апостол Павел хъусын кӕнгӕйӕ ӕмӕ ахуыр кӕнгӕйӕ лӕмбынӕг йӕ хъус дардта адӕммӕ, уыдис арӕхстджын ӕмӕ ӕмбаргӕ

[Хицӕнгонд текст 31 фарсыл]

Йесо йӕ ахуыргӕнинӕгтӕн баххуыс кодта ӕртӕ сӕйраг хъуыддаджы: кӕимӕ, кӕм ӕмӕ цы хъусын кӕной

[Ныв 30 фарсыл]

Ӕмбаргӕ хъусынгӕнджытӕ сӕ хъус дарынц, кӕимӕ фӕныхас кӕнынц, уыдон цы ӕгъдауыл хӕст сты, уымӕ.

[Ныв 31 фарсыл]

Ӕнтыстджын лӕггадгӕнджытӕ ӕххуыс кӕнынц ног хъусынгӕнджытӕн уацамындмӕ цӕттӕ кӕнынӕн.

[Нывтӕ 32 фарсыл]

Павелӕн йӕ къухы ӕфтыди алыхуызон адӕмимӕ ныхас кӕнын, уымӕн ӕмӕ уыди арӕхстджын.