Агурӕм рӕстдзинад, ӕмӕ нӕ хъахъхъӕндзӕн

«Фыццаджыдӕр агурут [Хуыцауы]... рӕстдзинад» (МАТФЕЙЫ 6:33, НТ).

1, 2. Иу ӕрыгон хо куыд бакодта ӕмӕ цӕмӕн?

АЗИЙЫ иу ӕрыгон хо секретарӕй куыста паддзахадон куыстуаты. Йӕ хӕстӕ зӕрдӕбынӕй ӕххӕст кодта, йӕ куыстмӕ-иу афоныл ӕрбацыд ӕмӕ куыстӕй йӕхи нӕ сайдта. Кӕд дзы рӕстӕгмӕ куыста, уӕддӕр хицауӕй ӕнӕбафиппайгӕ нӕ баззад. Уый йын загъта, зӕгъгӕ дӕ дӕ бынаты ныууадздзынӕн, ӕмӕ ма дӕ уӕлдӕр бынатмӕ дӕр раивдзынӕн, ӕрмӕст мемӕ ӕмуат ӕрцу. Хо фидарӕй «нӕ» загъта, кӕд ӕнӕ куыстӕй баззадаид, уӕддӕр.

² Уыцы ӕрыгон хо раст бакодта? О, уый архайдта Йесойы ныхӕстӕм гӕсгӕ: «Фыццаджыдӕр агурут [Хуыцауы]... рӕстдзинад» (Матфейы 6:33, НТ). Уыцы хойӕн бирӕ ахсджиагдӕр уыд рӕстаг уагӕвӕрдтӕм гӕсгӕ цӕрын, цӕйнӕфӕлтау ӕнӕгъдау ми бакодтаид ӕмӕ йӕ куысты баззадаид (1 Коринфӕгтӕм 6:18).

Рӕстдзинад ахсджиаг у

3. Цы у рӕстдзинад?

³ «Рӕстдзинад» у хӕрзӕгъдау уагӕвӕрдтыл фидар хӕцын. Библийы ацы дзырд грекъаг ӕмӕ дзуттаг ӕвзӕгтыл нысан кӕны «раст». Уый адӕймагӕн йӕхи рӕстдзинад нӕу, ома йӕхи сӕрмагонд закъӕттӕм гӕсгӕ уынаффӕтӕ хӕсса (Лукайы 16:15). Уый у, адӕймаг Иегъовӕйы уагӕвӕрдтӕм гӕсгӕ раст куы уа (Ромӕгтӕм 1:17; 3:21).

4. Рӕстдзинад чырыстонӕн ахсджиаг цӕмӕн у?

⁴ Рӕстдзинад ахсджиаг цӕмӕн у? Уымӕн ӕмӕ Иегъовӕ, «рӕстдзинады Хуыцау», йӕ адӕмӕй разы вӕййы, раст куы фӕкӕнынц, уӕд (Псалом 4:2; Ӕмбисӕндтӕ 2:20–22; Аввакум 1:13). Ӕнӕраст адӕймаг йӕ хӕлар никуы суыдзӕн (Ӕмбисӕндтӕ 15:8). Уымӕ гӕсгӕ фӕдзӕхста апостол Павел Тимофейы, цӕмӕй «лӕппуйы монцтӕй йӕхи хиза... тырна рӕстӕй цӕрынмӕ» ӕмӕ куса иннӕ ахсджиаг миниуджытыл (2 Тимофеймӕ 2:22, НТ). Павел монон хӕцӕнгӕрзтӕ нымайгӕйӕ, «рӕстады згъӕрхӕдоны» кой дӕр уымӕн ракодта (Ефесӕгтӕм 6:14, НТ).

5. Ӕнӕххӕст адӕмӕн сӕ бон куыд у рӕстдзинад агурын?

⁵ Кӕй зӕгъын ӕй хъӕуы, адӕмӕй иу дӕр кӕронмӕ рӕстаг нӕу. Иууылдӕр Адамӕй сӕ туджы рахастой ӕнӕххӕстдзинад ӕмӕ сӕ райгуырдӕй фӕстӕмӕ сты тӕригъӕдджын ӕмӕ ӕнӕраст. Фӕлӕ Йесо загъта рӕстдзинад кӕй хъуамӕ агурӕм. Уымӕн куыд ис гӕнӕн? Йесо йе ’ххӕст цардӕй мах тыххӕй ахӕстаргъ кӕй бафыста, ууыл куы ӕууӕндӕм, уӕд нын Иегъовӕ нӕ тӕригъӕдтӕ хатыр кӕндзӕн (Матфейы 20:28; Иоанны 3:16; Ромӕгтӕм 5:8, 9, 12, 18). Уымӕ гӕсгӕ, Иегъовӕйы рӕстаг уагӕвӕрдтӕ куы ахуыр кӕнӕм ӕмӕ ӕппӕт тыхтӕй уыдонмӕ гӕсгӕ цӕрын куы архайӕм, ӕххуыс дзы куы курӕм, цӕмӕй нӕ лӕмӕгъдзинӕдтыл нӕ бон уӕлахиз кӕнын уа, уӕд нын Иегъовӕ нӕ лӕггадӕй разы уыдзӕн (Псалом 1:6; Ромӕгтӕм 7:19–25; Раргомад 7:9, 14). Уый махӕн кӕуылты ныфс у!

Рӕстдзинад ӕнӕраст дунейы

6. Фыццаг ӕнусы чырыстӕттӕн дунейы алы ран дӕр тӕссаг цӕмӕн уыд?

⁶ Йесо йӕ ахуыргӕнинӕгтӕн куы бахӕс кодта, цӕмӕй йын ӕвдисӕнтӕ уой «суанг зӕххы кӕронмӕ», уӕд зын уавӕры бахаудысты (Куыстытӕ 1:8). Кӕм хъусын кодтой, уый ӕнӕхъӕнӕй дӕр уыдис «Фыдбылызы къухы» (1 Иоанны 5:19, НД). Сайтаны ӕвзӕр зондахастӕй хъӕстӕ дунейы чырыстӕттӕ йӕ зианхӕссӕг ӕндӕвдадӕй хызт нӕ уыдысты (Ефесӕгтӕм 2:2). Дунейы сын алы ран дӕр тӕссаг уыд. Иузӕрдионӕй ӕрмӕстдӕр уӕд баззадаиккой,  фыццаджыдӕр Хуыцауы рӕстдзинад куы агуырдтаиккой. Сӕ фылдӕр нӕ фӕцудыдтой, фӕлӕ уӕддӕр иуӕй-иутӕ «рӕстдзинады фӕндагӕй» фӕиппӕрд сты (Ӕмбисӕндтӕ 12:28; 2 Тимофеймӕ 4:10).

7. Чырыстӕттӕ ацы хӕлд дунейы ӕндӕвдады ныхмӕ цӕмӕн хъуамӕ лӕууой?

⁷ Абоны дуне чырыстӕттӕн тӕссаг нал у? Куыннӕ ма! Дуне фыццаг ӕнусы куыд хӕлд уыд, уымӕй ныр фыддӕр у. Стӕй ма Сайтан ӕппӕрст ӕрцыд зӕхмӕ ӕмӕ карз тох кӕны сӕрст чырыстӕттимӕ, «иннӕтимӕ [сылгоймаджы] мыггагӕй, Хуыцауы фӕдзӕхстытӕ хъахъхъӕнджытимӕ, ӕмӕ Йесо Чырыстийы ӕвдисӕнад кӕмӕ ис, уыдонимӕ» (Раргомад 12:12, 17). Сайтан ма хӕцы, уыцы «мыггаджы» фарс чи лӕууы, уыцы чырыстӕттимӕ дӕр. Фӕлӕ Хуыцауы лӕггадгӕнджытӕн сӕ бон ацы дунейӕ бамбӕхсын нӕу. Ӕмӕ кӕд дунейӕ не сты, уӕддӕр дзы кӕнынц цӕргӕ (Иоанны 17:15, 16). Уыдон хъуамӕ ацы дунейы хъусын кӕной, рӕстзӕрдӕ адӕмы агурой ӕмӕ сӕ ахуыр кӕной, цӕмӕй Чырыстийы ахуыргӕнинӕгтӕ суой (Матфейы 24:14; 28:19, 20). Уӕдӕ, кӕд уый гӕнӕн нӕй, ӕмӕ ацы хӕлд дуне чырыстӕттыл ӕппындӕр ма ӕндава, уӕддӕр йӕ ныхмӕ лӕууынц. Ӕркӕсӕм, чырыстӕттӕн дуне цавӕр цыппар хъуыддаджы у тӕссаг.

Хӕлд миты къӕппӕг

8. Израилӕгтӕ моавитӕгты хуыцӕуттӕн лӕггад кӕнын цӕмӕн райдыдтой?

⁸ Израилӕгтӕ 40 азы дӕргъы ӕдзӕрӕг быдыры куы фӕцыдысты, уӕд сӕ фӕстагмӕ бирӕтӕ рӕстдзинады фӕндаг ныууагътой. Уыдон уыдтой, Иегъовӕ се ссӕрибар кӕныны тыххӕй цы бирӕ хъуыддӕгтӕ арӕзта. Ныр та лӕууыдысты Зӕрдӕвӕрд зӕххы къӕсӕрыл. Фӕлӕ уыцы цардивӕн рӕстӕджы лӕггад кӕнын райдыдтой моавитӕгты хуыцӕуттӕн. Цӕмӕн? Уымӕн ӕмӕ ацыдысты сӕ «буары фӕндоны» фӕдыл (1 Иоанны 2:16). Библи уый тыххӕй дзуры: «Адӕм Моавы чызджытимӕ хӕтын райдыдтой» (Нымӕцтӕ 25:1).

9, 10. Буары ӕвзӕр фӕндӕттӕн цы зианхӕссӕг ӕндӕвдад ис, уый нӕ уӕлдай тынгдӕр нӕ зӕрдыл цӕй тыххӕй хъӕуы дарын?

⁹ Ацы цау хорз ӕвдисы, адӕймаг къӕрцхъус куы нӕ уа ӕмӕ йӕ буары монцты фӕдыл куы адзӕгъӕл уа, уӕд куыд фесӕфы. Уый нын хъуамӕ зондзонӕн уа, уӕлдайдӕр та абон хӕлд митӕ бирӕ рӕтты ӕвзӕр хъуыддагыл кӕй нал нымайынц, уымӕ гӕсгӕ (1 Коринфӕгтӕм 10:6, 8). Иугонд Штатты иу журналы дзырдӕуы: «1970 азы онг искӕимӕ бацӕрын [ӕнӕ загсӕй искӕимӕ цӕрын] Америкӕйы ӕппӕт штатты дӕр ӕнӕзакъон хъуыддагыл нымад уыд. Фӕлӕ ныр уый нымады дӕр никӕмӕуал у. Къӕйттӕн се ’мбисӕй фылдӕр сӕ чындзӕхсӕвы размӕ дӕр иумӕ лӕг ӕмӕ усы цард фӕкӕнынц». Искӕимӕ бацӕрын ӕмӕ ӕндӕр ахӕм ӕнӕгъдау хъуыддӕгтӕ ӕрмӕст иу бӕстӕйы нӕ цӕуынц. Уавӕр афтӕ у ӕгас зӕххыл дӕр. Ӕмӕ хъыгагӕн, иуӕй-иу чырыстӕттӕ дӕр уыцы фӕндагыл ацыдысты – суанг ма чырыстон ӕмбырды сӕ хорз ном дӕр фесӕфтой (1 Коринфӕгтӕм 5:11).

¹⁰ Цымӕ ахӕм исты ис, ӕнӕгъдаудзинад ӕргом кӕм нӕ хъарынц? Киноты ӕмӕ алыхуызон телепрограммӕты ӕрыгӕтты ахӕм  зондыл ардауынц, зӕгъгӕ, бинонтӕ скӕныны размӕ дӕр искӕимӕ ӕмуат ӕрцӕуой, уым ӕвзӕрӕй ницы ис. Дыууӕ нӕлгоймаджы кӕнӕ дыууӕ сылгоймаджы иумӕ лӕг ӕмӕ усы цард куы кӕной, уӕд уый дӕр ӕмбӕлон хъуыддагыл нымайынц. Бирӕ равдыстыты ӕргомӕй-ӕргомдӕр ӕвдисынц, нӕлгоймаг ӕмӕ сылгоймаджы ’хсӕн цы сусӕг ахастытӕ вӕййы, уыдон. Ахӕм хӕлд нывтӕ ӕнцонтӕй ссарӕн ис Интернеты. Цӕвиттон, иу журналист фыссы, зӕгъгӕ, йӕ авдаздзыд лӕппу скъолайӕ ӕрбацыд ӕмӕ йын уыцы цымыдисхуызӕй радзырдта, йе ’мбӕлттӕй иу Интернеты кӕй федта, бӕгънӕг сылгоймӕгтӕ хӕлд митӕ куыд кодтой. Фыд хорзау нал фӕци. Фӕлӕ ма ахӕм нывтӕ чи фены, ӕмӕ сӕ сӕ ныййарджытӕн чи не схъӕр кӕны, ахӕм сывӕллӕттӕ та цас ис? Уымӕй уӕлдай ма, цал ныййарӕджы зоны, сӕ сывӕллӕттӕ цавӕр видеохъӕзтытӕй хъазынц, уый? Арӕхдӕр кӕмӕй фӕхъазынц, уыцы хъӕзтытӕй бирӕтӕ йедзаг сты ӕлгъаг хӕлд митӕй, сау тыхты хъуыддӕгтӕй ӕмӕ тыхмийӕ.

11. Ацы дунейы хӕлд митӕй бинонтӕн сӕ бон куыд у сӕхи бахъахъхъӕнын?

¹¹ Бинонтӕн сӕ бон куыд у сӕхи ахӕм ӕгъдаухалӕг «хиирхӕфсӕнтӕй» хъахъхъӕнын? Фыццаджыдӕр Хуыцауы рӕстдзинад куы агурой ӕмӕ сӕ ӕнӕгъдаудзинадмӕ цы ӕркӕна, уыдӕттӕй сӕхи куы хизой (2 Коринфӕгтӕм 6:14; Ефесӕгтӕм 5:3). Йӕ сывӕллӕттӕм йӕ хъус лӕмбынӕг чи дары ӕмӕ сын сӕ зӕрдӕты уарзондзинад Иегъовӕмӕ ӕмӕ йӕ рӕстаг закъӕттӕм чи фидар кӕны, уыцы ныййарджытӕ сӕ ахуыр кӕнынц, цӕмӕй сӕхи порнографи, хӕлд видеохъӕзтытӕ ӕмӕ кинонывтӕй хизой ӕмӕ ӕвзӕр монцты ныхмӕ лӕууой (Дыккаг закъон 6:4–9) *.

Адӕмы зонды ӕндӕвдад тӕссаг у

12. Фыццаг ӕнусы цавӕр зын уавӕр уыди?

¹² Павел Листрӕйы, Къаннӕг Азийы, куы уыд, уӕд иу нӕлгоймаджы диссаджы ӕгъдауӕй сдзӕбӕх кодта. Библийы дзырдӕуы: «Павел цы бакодта, уый адӕм куы федтой, уӕд ликаониагау райдыдтой хъӕр кӕнын: „Адӕймаджы хуызы нӕм хуыцӕуттӕ ӕрцыдысты!“ Ӕмӕ Варнавӕйы хуыдтой Зевс, Павелы та – Гермес, уымӕн ӕмӕ ныхас фылдӕр уый кодта» (Куыстытӕ 14:11, 12, НТ). Фӕстӕдӕр та уыцы адӕм Павел ӕмӕ Варнавӕйы марынмӕ хъавыдысты (Куыстытӕ 14:19). Бӕрӕг у, уыдон иннӕты зондмӕ кӕй хъуыстой. Ӕвӕццӕгӕн, уыцы бынатӕй иуӕй-иутӕ чырыстон дин куы райстой, уӕд сӕ мӕнгуырнындзинӕдтӕ кӕронмӕ нӕ ныууагътой. Павел Колоссы чырыстӕтты фӕдзӕхста, цӕмӕй «зӕдтӕн [ма] кувой» (Колоссӕгтӕм 2:18, НТ).

13. Чырыстон цавӕр ӕгъдӕуттӕй хъуамӕ хиза йӕхи ӕмӕ йын цы баххуыс кӕндзӕн?

¹³ Абон дӕр ӕцӕг чырыстӕтты хъӕуы сӕхи хизын, мӕнг динтӕй чи равзӕрд ӕмӕ чырыстон уагӕвӕрдты ныхмӕ чи сты, уыцы ӕгъдӕуттӕй, кӕд сӕ бирӕтӕ кӕнынц, уӕддӕр. Зӕгъӕм, иуӕй-иу бӕстӕты адӕймаджы райгуырд ӕмӕ мӕлӕтимӕ баст ӕгъдӕуттӕй бирӕтӕ равзӕрдысты ахӕм мӕнг хъуыдыйӕ, зӕгъгӕ, нӕ мидӕг ис ӕнӕмӕлгӕ уд (Екклесиаст 9:5, 10). Ис ахӕм бӕстӕтӕ дӕр, гыццыл чызджытӕн сӕ ӕрдон уӕнгтӕ кӕм сахъат кӕнынц *. Уый у ӕгъатыр, ӕнӕпайда ӕгъдау.  Уымӕн иумӕйагӕй ницы ис, чырыстон ныййарджытӕ сӕ сывӕллӕттыл уарзгӕйӕ кӕй хъуамӕ аудой, уыимӕ (Дыккаг закъон 6:6, 7; Ефесӕгтӕм 6:4). Чырыстӕттӕн сӕ бон куыд у сӕхи адӕмы зондӕй хъахъхъӕнын ӕмӕ ахӕм хъуыддӕгты ныхмӕ лӕууын? Уый тыххӕй хъуамӕ сӕ ныфс ӕгасӕй дӕр Иегъовӕйыл дарой (Псалом 30:7). Рӕстаг Хуыцау хъарутӕ дӕтдзӕн ӕмӕ ауддзӕн, зӕрдӕйӕ йӕм афтӕ чи дзура: «Мӕ ӕрлидзӕндон ӕмӕ мӕ иргъӕвӕг, мӕ Хуыцау, Кӕцыйӕ ныфсджын дӕн»! (Псалом 90:2; Ӕмбисӕндтӕ 29:25).

Иегъовӕйы ма рох кӕнӕм

14. Израилӕгты Зӕрдӕвӕрд зӕхмӕ бацӕуынмӕ бирӕ куы нал хъуыд, уӕд сӕ Иегъовӕ цӕмӕй бафӕдзӕхста?

¹⁴ Израилӕгты Зӕрдӕвӕрд зӕхмӕ бацӕуынмӕ бирӕ куы нал хъуыд, уӕд сӕ Иегъовӕ бафӕдзӕхста, цӕмӕй йӕ ма ферох кӕной. Уый сын загъта: «Дӕхимӕ кӕс, цӕмӕй ма ферох кӕнай дӕ Хуыцау Иегъовӕйы ӕмӕ йын ӕххӕст кӕнай йӕ фӕдзӕхстытӕ, йӕ тӕрхӕттӕ ӕмӕ йӕ уынаффӕтӕ, абон дын ӕз кӕй радтон, уыдон. Кӕннод дӕхи куы ӕфсадай ӕмӕ хорз хӕдзӕрттӕ куы аразай ӕмӕ дзы куы цӕрай, дӕ рӕгъӕуттӕ ӕмӕ дӕ дзугтӕ фылдӕрӕй-фылдӕр куы кӕной, фылдӕр куы кӕна дӕ сыгъзӕрин ӕмӕ де ’взист ӕмӕ дӕ алы мулк, уӕд дӕ зӕрдӕ схъӕлдзӕг уыдзӕн, ӕмӕ ферох кӕндзынӕ дӕ Хуыцау Иегъовӕйы» (Дыккаг закъон 8:11–14).

15. Иегъовӕйы кӕй нӕ рох кӕнӕм, уый куыд ис базонӕн?

¹⁵ Гӕнӕн ис, ӕмӕ абон дӕр хабар афтӕ рауайа? О, царды фыццаг бынаты цы хъӕуы ӕвӕрын, уый куы не ’вӕрӕм, уӕд. Фӕлӕ фыццаджыдӕр Хуыцауы рӕстдзинад куы агурӕм, уӕд нын царды раст динӕй ахсджиагдӕр ницы уыдзӕн. Павел нӕ куыд разӕнгард кодта, афтӕ нӕ рӕстӕгӕй раст пайда кӕндзыстӕм ӕмӕ хорз хабар ӕвӕстиатӕй хъусын кӕндзыстӕм (Колоссӕгтӕм 4:5; 2 Тимофеймӕ 4:2). Фӕлӕ нын фембӕлдтӕм цӕуынӕй ӕмӕ хъусын кӕнынӕй сӕйрагдӕр улӕфын кӕнӕ, нӕ рӕстӕг хуыздӕр кӕм арвитӕм, уый куы уа, уӕд Иегъовӕйы ферох кӕндзыстӕм, ома йӕ нӕ царды дыккаг бынаты сӕвӕрдзыстӕм. Павел загъта, зӕгъгӕ, фӕстаг бонты адӕм «Хуыцауы уарзыны бӕсты фылдӕр уарздзысты ирхӕфсӕнтӕ» (2 Тимофеймӕ 3:4, НТ). Сыгъдӕгзӕрдӕ чырыстӕттӕ ӕдзух сӕ зӕрдӕтӕ сгарынц, цӕмӕй ахӕм зондахастӕй ма фӕхъӕстӕ уой (2 Коринфӕгтӕм 13:5).

Дӕхи хиз хивӕнд зондахастӕй

16. Евӕйӕн ӕмӕ Павелы бонты иуӕй-иутӕн цавӕр ӕвзӕр зондахаст уыд?

¹⁶ Едемы Сайтан спайда кодта, Евӕйы ӕнӕ искӕй разамындӕй цӕрын кӕй фӕндыд, уыцы хиуарзон фӕндонӕй. Евӕйы бафӕндыд, цӕмӕй йӕхӕдӕг скъуыддзаг кодтаид, хорз ӕмӕ ӕвзӕр цы у, уый (Уӕвынад 3:1–6). Фыццаг ӕнусы Коринфы ӕмбырды дӕр ахӕм хивӕнд зондахаст уыд иуӕй-иутӕн. Уыдонмӕ афтӕ каст, ӕмӕ алцыдӕр Павелӕй хуыздӕр зонынц, ӕмӕ сӕ уый дӕр хынджылӕгӕй схуыдта «уӕлдӕр апостолтӕ» (2 Коринфӕгтӕм 11:3–5; 1 Тимофеймӕ 6:3–5).

17. Цӕмӕй нӕм хивӕнд зондахаст ма фӕзына, уый тыххӕй нӕ цы кӕнын хъӕуы?

¹⁷ Абоны дунейы бирӕтӕ сты «къӕйных, стырзӕрдӕ» ӕмӕ уыцы зондахаст иуӕй-иу чырыстӕттыл дӕр бандӕвта. Чидӕртӕ дзы суанг ӕцӕгады ныхмӕ дӕр систы  (2 Тимофеймӕ 3:4, НФ; Филиппӕгтӕм 3:18). Дзырд раст диныл куы цӕуа, уӕд хъуамӕ разамынд агурӕм Иегъовӕйӕ, ӕмгуыст кӕнӕм «ӕууӕнкджын ӕмӕ зондджын цагъаримӕ» ӕмӕ ӕмбырды хистӕр нӕлгоймӕгтимӕ. Афтӕмӕй рӕстдзинады фӕндагыл цӕудзыстӕм ӕмӕ нӕ уый хъахъхъӕндзӕн, цӕмӕй нӕм хивӕнд зондахаст ма фӕзына (Матфейы 24:45–47; Псалом 24:9, 10; Исай 30:21). Сӕрст чырыстӕтты ӕмбырд у «ӕцӕгады цӕджындз ӕмӕ фидардзинад». Иегъовӕ йӕ сӕвӕрдта, цӕмӕй нӕ хъахъхъӕна ӕмӕ нын разамынд дӕтта (1 Тимофеймӕ 3:15). Уыцы ӕмбырд цы ахсджиаг хъуыддаг аразы, уый куы ӕмбарӕм, уӕд нӕхи стауыны тыххӕй ницы араздзыстӕм, фӕлӕ сӕрныллӕгӕй ӕххӕст кӕндзыстӕм Иегъовӕйы рӕстаг фӕндон (Филиппӕгтӕм 2:2–4; Ӕмбисӕндтӕ 3:4–6).

Йесойы фӕзмӕм

18. Цавӕр хъуыддӕгты нӕ хъӕуы Йесойы фӕзмын?

¹⁸ Йесойы тыххӕй Библийы рагацау фыст уыд: «Ды бауарзтай рӕстдзинад ӕмӕ ӕнӕзакъондзинад нӕ бауарзтай» (Псалом 44:8; Дзуттытӕм 1:9). Диссаджы фӕзминаг зӕрдӕйы уаг ын уыд! (1 Коринфӕгтӕм 11:1). Йесо Иегъовӕйы бӕрзонд уагӕвӕрдтӕ ӕрмӕст зонгӕ нӕ кодта – уарзгӕ сӕ кодта. Сайтан ӕй ӕдзӕрӕг быдыры куы фӕлвӕрдта, уӕд фидар фӕлӕууыд ӕмӕ «рӕстдзинады фӕндагӕй» нӕ ахызт (Ӕмбисӕндтӕ 8:20; Матфейы 4:3–11).

19, 20. Рӕстдзинад агурын хорз цӕмӕй у?

¹⁹ Раст у, буары ӕвзӕр фӕндӕттӕ тыхджын вӕййынц (Ромӕгтӕм 7:19, 20). Фӕлӕ рӕстдзинад куы уарзӕм, уӕд нын уый тых дӕтдзӕн ӕвзӕрдзинады ныхмӕ фӕлӕууынӕн (Псалом 118:165). Рӕстдзинад ӕппӕт зӕрдӕйӕ куы уарзӕм, уӕд нӕ уый ӕвзӕр хъуыддӕгтӕй хъахъхъӕндзӕн (Ӕмбисӕндтӕ 4:4–6). Дӕ зӕрдыл дар: цал хатты фӕрӕдийӕм, уал хатты ныл Сайтан фӕуӕлахиз вӕййы. Фӕлӕ цас хуыздӕр у йӕ ныхмӕ фӕлӕууын ӕмӕ Иегъовӕйӕн кад ӕрхӕссын! (Ӕмбисӕндтӕ 27:11; Иаковы 4:7, 8).

²⁰ Ӕцӕг чырыстӕттӕ рӕстдзинад кӕй агурынц, уымӕ гӕсгӕ «Йесо Чырыстийы фӕрцы алцӕмӕй дӕр сты рӕстгӕнджытӕ Хуыцауы кад ӕмӕ намысӕн» (Филиппӕгтӕм 1:10, 11, НТ). Уыдон сфӕлындыдтой «ног адӕймаджы, Хуыцаумӕ гӕсгӕ сконды, рӕстдзинады ӕмӕ ӕцӕг сыгъдӕгдзинады» (Ефесӕгтӕм 4:24). Уыцы чырыстӕттӕ сты Иегъовӕйы, ӕмӕ сӕхи тыххӕй нӕ цӕрынц, фӕлӕ уымӕн лӕггад кӕныны тыххӕй (Ромӕгтӕм 14:8; 1 Петры 4:2). Ӕмӕ сӕ хъуыдытӕ ӕмӕ сӕ хъуыддӕгтӕ иууылдӕр сты адӕттыл. Цас циндзинад хӕссынц уыдон сӕ уӕларвон Фыды зӕрдӕйӕн! (Ӕмбисӕндтӕ 23:24).

[Фиппаинӕгтӕ]

Куыд бамбарын кӕнис?

• Рӕстдзинад агурын ахсджиаг цӕмӕн у?

• Ӕнӕххӕст адӕймагӕн йӕ бон куыд у рӕстдзинад агурын?

• Чырыстон йӕхи цавӕр хъуыддӕгтӕй хизы?

• Рӕстдзинад кӕй агурӕм, уый нӕ куыд хъахъхъӕны?

[Фарстатӕ ахуыр кӕнынӕн]

[Ныв 29 фарсыл]

Иегъовӕйы уарзын цы сывӕллӕтты ахуыр кӕнынц, уыдонӕн сӕ бон уыдзӕн хӕлд миты ныхмӕ фӕлӕууын.

[Ныв 30 фарсыл]

Израилӕгтӕ Зӕрдӕвӕрд зӕххы куы схъӕздыг сты, уӕд сӕ иуӕй-иутӕ Иегъовӕйы ферох кодтой.

[Ныв 31 фарсыл]

Йесойау чырыстӕттӕн дӕр ӕнӕрастдзинад ӕнӕуынон у.

[Ныв 32 фарсыл]

Йесойы ахуыргӕнинӕгтӕн дунейы алы ран дӕр тӕссаг уыд.