Уӕхи хизут мӕнг динӕй!
Уӕхи хизут мӕнг динӕй!
«Рацӕут се ’хсӕнӕй ӕмӕ сӕ рахицӕн ут, зӕгъы Хицау, чъизи цы у, уымӕй уӕхи хизут» (2 КОРИНФӔГТӔМ 6:17, НТ).
1. Бирӕ сыгъдӕгзӕрдӕ адӕм цы уавӕры сты?
БИРӔ сыгъдӕгзӕрдӕ адӕм нӕ зонынц ӕцӕг Хуыцауы ӕмӕ сӕм цы фидӕн ӕнхъӕлмӕ кӕсы, уый. Сӕ фарстытӕн дзуапп кӕй нӕ арынц, уымӕ гӕсгӕ сты тыхст ӕмӕ нӕ зонынц, сӕ цард сӕ кӕдӕм кӕны, уый. Милуантӕ цы мӕнгуырнындзинӕдты, ӕгъдӕутты ӕмӕ бӕрӕгбӕтты уаргъы бын сты, уыдон Сфӕлдисӕгӕн сты ӕнӕуынон. Чи зоны дӕ сыхӕгтӕ ӕмӕ дӕ хиуӕттӕй дӕр кӕйдӕрты уырны зындоны арт, Хуыцау Ӕртӕиууон кӕй у, уд кӕй нӕ мӕлы кӕнӕ ӕндӕр мӕнг ахуырӕдтӕ.
2. Динты разамонджытӕ цы бакуыстой ӕмӕ уый цӕмӕ ’ркодта?
2 Кӕй аххос у, Хуыцауы афтӕ бирӕ адӕм кӕй нӕ зоны, уый? Диссаг дӕр куыннӕ у, фӕлӕ динты аххос, уӕлдайдӕр та сӕ разамонджыты, Библийы ахуырӕдтӕ чи зыгъуыммӕ кӕны, уыдоны (Маркы 7:7, 8). Уымӕ гӕсгӕ бирӕ адӕм фӕсайды сты ӕмӕ сӕм афтӕ кӕсы, ӕцӕг Хуыцауӕн кувынц, ӕцӕгӕй та йӕ хъыг кӕнынц. Ахӕм кӕуинаг уавӕр мӕнг дины аххос у.
3. Мӕнг дины сӕргъы чи лӕууы ӕмӕ уый тыххӕй Библи цы зӕгъы?
3 Мӕнг дины сӕргъы чи лӕууы, уый фенӕн нӕй, у ӕнӕуынгӕ. Уый тыххӕй апостол Павел загъта: «А дунейы хуыцау уыцы ӕнӕуырнджыты бакуырм кодта, ӕмӕ нӕ уынынц Чырыстийы, Хуыцауы Халдихы, намысыл дзурӕг фарны уацы тӕмӕнкалгӕ рухс» (2 Коринфӕгтӕм 4:4, НТ). «А дунейы хуыцау» у Сайтан Хӕйрӕг. Мӕнг динӕн бындурӕвӕрӕг уый уыди. «Уым диссагӕй ницы ис: хӕйрӕг дӕр йӕхи равдисы рухсы зӕдӕй,– фыста Павел.– Ӕмӕ йӕ кусджытӕ дӕр рӕстады кусджытӕй сӕхи куы февдисынц, уӕд уый ӕнӕрцӕугӕ хабар нӕу» (2 Коринфӕгтӕм 11:14, 15, НТ). Сайтан йе ’взӕр хъуыддӕгтӕ афтӕ аразы, цыма хорз сты ӕмӕ уымӕй адӕмы мӕнг уырнындзинӕдтыл ӕууӕндын кӕны.
4. Хуыцауы Закъон рагон Израилӕн мӕнг пехуымпарты тыххӕй цы дзырдта?
4 Уӕдӕ диссаг нӕу, Библи мӕнг дины ныхмӕ карзӕй кӕй дзуры! Зӕгъӕм, Моисейы Закъонмӕ гӕсгӕ Хуыцауы ӕвзӕрст адӕм уӕлдай тынгдӕр фӕдзӕхст уыдысты мӕнг пехуымпартӕй. Чидӕриддӕр мӕнг ахуырӕдтӕ амыдтаид ӕмӕ мӕнг хуыцӕуттӕн кувынмӕ разӕнгард кодтаид, уый хъуамӕ амардтаиккой, адӕмы Иегъовӕйӕ кӕй здӕхта, уый тыххӕй. Израилӕгтӕн фидарӕй загъд уыд, зӕгъгӕ, ахӕмты уе ’хсӕнӕй фесафут (Дыккаг закъон 13:1–5). Бӕрӕг у, Иегъовӕ мӕнг дин фыддзинадыл кӕй нымайы (Иезекил 13:3).
5. Абон лӕмбынӕг цавӕр фӕдзӕхстытӕм хъуамӕ уӕм?
5 Иегъовӕйӕн мӕнг дин куыд ӕнӕуынон уыд, афтӕ ӕнӕуынон уыд Йесо Чырыстийӕн ӕмӕ йӕ апостолтӕн дӕр. Йесо йӕ ахуыргӕнинӕгты фӕдзӕхста: «Уӕхи хъахъхъӕнут мӕнг пехуымпартӕй, кӕцытӕ ӕрбацӕуынц сымахмӕ фысдзармы; мидӕгӕй та тугдзых бирӕгътӕ» (Матфейы 7:15; Маркы 13:22, 23). Павел дӕр фыста: «Арвӕй гом кӕны Хуыцауы фыдӕх адӕмты ӕнӕнамыс ӕмӕ ӕнӕрӕстдзинадыл, кӕцытӕ рӕстдзинад ссӕндынц» (Ромӕгтӕм 1:18). Куыд ахсджиаг у, цӕмӕй ӕцӕг чырыстӕттӕ лӕмбынӕг уой ацы фӕдзӕхстытӕм ӕмӕ сӕхи хизой, Хуыцауы Ныхасы ӕцӕгад чи ссӕнды кӕнӕ мӕнг ахуырӕдтӕ чи парахат кӕны, уыдонӕй! (1 Иоанны 4:1).
«Стыр Вавилонӕй» рацӕут
6. «Стыр Вавилон» Библийы куыд ӕвдыст цӕуы?
6 Ӕркӕсӕм, Библийы Раргомады чиныджы мӕнг дин куыд ӕвдыст цӕуы, уымӕ. Ӕвдыст цӕуы расыг хъахбайӕ, бирӕ паддзахӕдтыл ӕмӕ йӕ адӕмыл йӕ бар кӕмӕн цӕуы, ахӕмӕй. «Хъахбай» сылгоймаг хӕты бирӕ паддзӕхтимӕ ӕмӕ расыг у Хуыцауы ӕцӕг лӕггадгӕнджыты тугӕй (Раргомад 17:1, 2, 6, 18). Йӕ ныхыл цы ном фыст ис, уый йыл хорз фидауы, уымӕн ӕмӕ йӕ митӕ сты чъизи ӕмӕ ӕнӕгъдау. Йӕ ном та у «Стыр Вавилон, хъахбайты ӕмӕ зӕххон ӕлгъаг миты мад» (Раргомад 17:5, НТ).
7, 8. Мӕнг дин политикон хицауӕдтимӕ куыд хӕты ӕмӕ уый цӕмӕ ӕркодта?
7 Фыстад ӕвдисы, Стыр Вавилонмӕ кӕй хауынц ӕппӕт мӕнг динтӕ дӕр. Кӕд мингай динтӕ кӕрӕдзимӕ ницы бар дарынц, хицӕнтӕ сты, уӕддӕр сӕ иу кӕнынц сӕ фӕндтӕ ӕмӕ сӕ хъуыддӕгтӕ. Раргомады чиныджы цы ӕнӕгъдау сылгоймаджы кой цӕуы, уыйау мӕнг динӕн дӕр йӕ бар цӕуы хицауӕдтыл. Йӕ цардӕмбалӕн дзырд чи радта ӕмӕ йӕ чи фӕсайдта, уыцы хъахбай сылгоймагау, мӕнг дин дӕр хӕты политикон хицауӕдтимӕ, бадзырдтӕ аразы, куы сӕ иутимӕ куы се ’ннӕтимӕ. Ахуыргӕнинаг Иаков фыста: «Хӕтӕгтӕ! нӕ зонут ӕви, дунеимӕ лымӕндзинад Хуыцауимӕ знагдзинад кӕй у? Уӕдӕ кӕй фӕнды дунейӕн лымӕн уӕвын, уый Хуыцауӕн знаг свӕййы» (Иаковы 4:4).
8 Мӕнг дин хицауӕдтимӕ кӕй ӕмдзӕхдон кӕны, уый аххосӕй тынг бирӕ адӕм фӕхъизӕмар кодта. Африкӕйаг политикон иртасӕг Д. Онена Мангу загъта, зӕгъгӕ, «дунеон историйы арӕх уыд, дин ӕмӕ политикӕ ӕмдзӕхдон кӕй кодтой, уый аххосӕй-иу тынг бирӕ адӕм куы фӕцагъды». Иу газеты ӕрӕджы дзырдӕуыд: «Абон тугкалӕн ӕмӕ тынг тӕссаг быцӕутӕ цӕуы... фыццаджыдӕр дины тыххӕй». Милуантӕ фӕцагъды сты, дин-иу кӕй ракъахта, ахӕм быцӕуты. Стӕй ма Стыр Вавилон суанг Хуыцауы ӕцӕг лӕггадгӕнджыты фӕдыл дӕр зылдис ӕмӕ сӕ мардта, ӕмӕ цыма сӕ тугӕй барасыг, афтӕ сси (Раргомад 18:24).
9. Мӕнг дин Иегъовӕйӕн ӕнӕуынон кӕй у, уый Раргомады чиныг куыд ӕвдисы?
9 Мӕнг дин Иегъовӕйӕн ӕнӕуынон кӕй у, уый ирдӕй зыны, Стыр Вавилонмӕ цы ӕнхъӕлмӕ кӕсы, уымӕй. Раргомады 17:16 дзырдӕуы: «Дӕс сыкъайы, кӕцыты ды федтай сырдыл, уыдонӕн хӕтаг ӕнӕуынон суыдзӕн ӕмӕ йӕ ныппырх кӕндзысты ӕмӕ сбӕгънӕг кӕндзысты ӕмӕ йын йӕ буар бахӕрдзысты, ӕмӕ йӕ басудздзысты арты». Фыццаджыдӕр ӕй стыр сырд ныскъуыдтӕ кӕндзӕн ӕмӕ йын йӕ буар бахӕрдзӕн. Стӕй дзы цы баззайа, уый иууылдӕр басудздзӕн. Тагъд дунейы хицауӕдтӕ дӕр мӕнг динӕн афтӕ бакӕндзысты. Уыцы хъуыды сын сӕ зӕрдӕйы Хуыцау сӕвӕрдзӕн (Раргомад 17:17). Стыр Вавилонӕн, ӕппӕт мӕнг динтӕн иумӕйагӕй, мӕлӕты тӕрхон рахастӕуыд. Ӕмӕ Библи куыд зӕгъы, афтӕмӕй «йӕ нал ссардзысты» (Раргомад 18:21, НФ).
10. Цы цӕстӕй хъуамӕ кӕсӕм мӕнг динмӕ?
10 Цы цӕстӕй хъуамӕ кӕсой Иегъовӕйы адӕм Стыр Вавилонмӕ? Уый тыххӕй Библи бӕлвырдӕй дзуры: «Рацӕут уырдыгӕй, Мӕ адӕм, йӕ тӕригъӕдтӕй хайджын куыд нӕ уат ӕмӕ йемӕ ӕфхӕрд куыд нӕ баййафат, афтӕ» (Раргомад 18:4, НТ). Аирвӕзын кӕй фӕнды, уыдон хъуамӕ мӕнг динӕй рацӕуой, цалынмӕ нӕ байрӕджы, уӕдмӕ. Йесо Чырысти зӕххыл куы уыди, уӕд загъта, зӕгъгӕ, фӕстаг бонты бирӕтӕ ӕрмӕст ныхасӕй уыдзысты йӕ фӕдылдзӕуджытӕ (Матфейы 24:3–5). Ахӕмтӕн загъта: «Ӕз уӕ никуы зыдтон. Ацӕут Мӕ цурӕй, тӕригъӕдджынтӕ» (Матфейы 7:23, НТ). Йесо Чырыстийӕн,– ныр уӕлӕрвты паддзах чи у, уымӕн,– мӕнг динимӕ иумӕйагӕй ницы ис.
Мӕнг динӕй нӕхи хизӕм – куыд?
11. Нӕхи мӕнг динӕй куыд хъуамӕ хизӕм?
11 Ӕцӕг чырыстӕттӕ мӕнг динӕй сӕхи хизынц, сӕ ахуырӕдтӕй дард кӕй лӕууынц, уымӕй. Уый афтӕ ӕмбаргӕ у ӕмӕ, Хуыцау ӕмӕ йӕ Ныхасы тыххӕй мӕнгдзинӕдтыл чи ахуыр кӕны, ахӕм радио ӕмӕ телералӕвӕрдтӕм кӕй нӕ хъусынц, стӕй мӕнг дины чингуытӕ кӕй нӕ кӕсынц (Псалом 118:37). Мах ма нӕхи хизӕм мӕнг динимӕ ӕмвӕнд чи у, уыцы организацитӕ цы ӕхсӕнадон хъуыддӕгтӕ ӕмӕ ирхӕфсӕнтӕн ахъаз кӕнынц, уыдонӕй дӕр. Уымӕй уӕлдай ма, мах ӕндӕр хуызы дӕр мӕнг дины фарс нӕ лӕууӕм (1 Коринфӕгтӕм 10:21). Ахӕм хъуыддӕгтӕй нӕхи куы хъахъхъӕнӕм, уӕд нӕ ничи «асайдзӕн ӕнӕпайда ӕмӕ гӕдыбыд ахуырӕдтӕй. Уыдонӕн сӕ бындур Чырысти нӕу, фӕлӕ дунейы ӕгъдӕуттӕ ӕмӕ адӕмы таурӕгътӕ» (Колоссӕгтӕм 2:8, НТ).
12. Мӕнг дин ныууадзынӕн цы хъӕуы?
12 Зӕгъӕм, адӕймаджы фӕнды, цӕмӕй Иегъовӕйы Ӕвдисӕн суа, фӕлӕ нырма мӕнг динтӕй кӕцыдӕримӕ баст у, уӕд куыд кӕнгӕ у? Чи зоны кӕмдӕрты адӕймаджы бахъӕудзӕн фыстӕг ныффыссын, мӕнг динӕй йӕ рацӕуын кӕй фӕнды, уый фӕдыл. Уымӕй ахсджиагдӕр та ма у, цӕмӕй йын мӕнг динимӕ иумӕйагӕй мацыуал уа. Иегъовӕйӕн лӕггад кӕнын кӕй фӕнды, уыцы адӕймаджы цардӕй хъуамӕ бӕрӕг уа – йӕ раздӕры ӕмуырнджытӕ ӕмӕ иннӕ адӕмӕн дӕр – уыцы динимӕ йын иумӕйагӕй кӕй ницыуал ис.
13. Цӕмӕй мӕнг динӕй нӕхи хизӕм, уый тыххӕй нын Библи цы уынаффӕ дӕтты?
13 Апостол Павел фыста: «Ӕнӕуырнджытимӕ иу ӕфсондзы уӕхи ма сифтындзут. Рӕстдзинад ӕмӕ тӕригъӕдӕн, рухс ӕмӕ талынгӕн иумӕйагӕй исты ис, мыййаг? Чырыстийӕн велиаримӕ бафидауӕн ис, мыййаг? Кӕнӕ уырнӕджы цы бӕтты ӕнӕуырнӕгимӕ? Хуыцауы хӕдзарӕн мӕнгхуыцӕуттимӕ иумӕйагӕй цы ис? [...] Уымӕ гӕсгӕ рацӕут се ’хсӕнӕй ӕмӕ сӕ рахицӕн ут, зӕгъы Хицау, чъизи цы у, уымӕй уӕхи хизут» (2 Коринфӕгтӕм 6:14–17, НТ). Ацы ныхӕстӕм лӕмбынӕг кӕй хъусӕм, уый уымӕй бӕрӕг уыдзӕн, ӕмӕ нӕхи мӕнг динӕй куы хизӕм. Ацы уынаффӕ дӕтгӕйӕ, Павелы мыййаг уый зӕгъын фӕндыд, ӕмӕ мӕнг диныл хӕст чи у, уыдонӕй дард лӕууӕм?
Зондджынӕй архайут
14. Мӕнг динимӕ баст чи у, уыцы адӕмӕй хъуамӕ нӕхи хизӕм? Бамбарын ӕй кӕн.
14 Цымӕ Иегъовӕйы лӕггадгӕнджытӕ хъуамӕ сӕхи хизой, мӕнг динимӕ баст чи у, уыцы адӕмӕй? Немӕ Иегъовӕйӕн чи нӕ кувы, уыдонӕй, мыййаг, хъуамӕ нӕхи дард ласӕм? Нӕ, афтӕ нӕу. Хуыцауы закъоны дыууӕ сӕйрагдӕр фӕдзӕхстытӕй дыккаг у: «Бауарз дӕ хӕстӕджы, дӕхи хуызӕн» (Матфейы 22:39). Кӕй зӕгъын ӕй хъӕуы, нӕ уарзондзинад адӕммӕ уымӕй ӕвдисӕм, ӕмӕ сын Хуыцауы Паддзахады тыххӕй хорз хабар кӕй дзурӕм. Нӕ уарзондзинад ма уымӕй дӕр у бӕрӕг, ӕмӕ семӕ Библи кӕй ахуыр кӕнӕм ӕмӕ сын кӕй дзурӕм, мӕнг динӕй хи хизын куыд ахсджиаг у, уый.
15. Куыд ӕмбарын хъӕуы, «дунейӕ не стӕм», зӕгъгӕ?
15 Кӕд ацы дунейы адӕмӕн хорз хабар хъусын кӕнӕм, уӕддӕр Йесойы фӕдылдзӕуджытӕ кӕй стӕм, уымӕ гӕсгӕ «дунейӕ... не стӕм» (Иоанны 15:19). Дзырд «дуне» ацы ран хауы ӕнӕхуыцау адӕммӕ (Ефесӕгтӕм 4:17–19; 1 Иоанны 5:19). Мах ацы дунейӕ не стӕм, ома, нӕхи хизӕм, Иегъовӕйӕн ӕнӕуынон чи у, ахӕм зондахаст, ныхӕстӕ ӕмӕ уагахастӕй (1 Иоанны 2:15–17). Уымӕй дарддӕр ма, Библи афтӕ кӕй зӕгъы, зӕгъгӕ «ӕвзӕр ӕмбӕлттӕ хорз миниуджытӕ сафӕг сты», уымӕ гӕсгӕ, мах нӕхи дард ласӕм чырыстон уагӕвӕрдтӕ нымады кӕмӕ не сты, ахӕм адӕмӕй (1 Коринфӕгтӕм 15:33, НТ). Ацы дунейӕ ма уӕм, уый нысан кӕны, ӕмӕ нӕхи «хъахъхъӕнӕм ацы дунейӕ счъизи уӕвынӕй» (Иаковы 1:27). Уӕдӕ дунейӕ кӕй не стӕм, уый афтӕ ӕмбаргӕ нӕу, ӕмӕ хъуамӕ адӕмы ’хсӕнмӕ ма цӕуӕм (Иоанны 17:15, 16; 1 Коринфӕгтӕм 5:9, 10).
16, 17. Библи чи нӕ зоны, уыдонмӕ чырыстӕттӕ цы цӕстӕй хъуамӕ кӕсой?
16 Цы цӕстӕй хъуамӕ кӕсӕм, Библи чи нӕ зоны, уыдонмӕ та? Колоссӕгты ӕмбырдмӕ Павел фыста: «Ӕнӕуырнджытимӕ уӕхи дарут зондджынӕй, алы фадатӕй дӕр пайда кӕнгӕйӕ. Уӕ ныхас кӕддӕриддӕр уӕд зӕрдӕмӕдзӕугӕ ӕмӕ нывыл, ӕмӕ зонут, кӕмӕн цы дзуапп дӕттын хъӕуы, уый» (Колоссӕгтӕм 4:5, 6, НТ). Апостол Петр дӕр фыста: «Зӕрдӕбынӕй кад кӕнут Чырыстийӕн – уӕ Хицауӕн. Уӕ зӕрдӕдарӕны бындурӕй уӕ чи фӕрса, уымӕн кӕддӕриддӕр цӕттӕ ут ӕвӕлмасӕй ӕмӕ Хуыцауӕй тӕрсгӕйӕ дзуапп раттынмӕ» (1 Петры 3:15, НТ). Павел ма чырыстӕттӕн ахӕм уынаффӕ радта: «Макӕй фыдгой кӕнут, ма ут загъдгӕнаг, фӕлӕ алкӕимӕ дӕр ут ӕвӕлмас ӕмӕ сӕрныллӕг» (Титмӕ 3:2, НТ).
17 Иегъовӕйы Ӕвдисӕнтӕ кӕй стӕм, уымӕ гӕсгӕ иннӕтимӕ тызмӕгӕй нӕ ныхас кӕнӕм ӕмӕ сӕм сӕрбӕрзондӕй нӕ кӕсӕм. Кӕй зӕгъын ӕй хъӕуы, мах ӕндӕр диныл хӕст адӕмы нӕ фауӕм. Уый нӕ, фӕлӕ ма вӕййӕм уӕздан, суанг ма уацамынды исчи, сыхаг, йе та не ’мкусӕг нӕ ныхмӕ куы уа кӕнӕ нӕ куы ӕлгъита, уӕд дӕр (Колоссӕгтӕм 4:6; 2 Тимофеймӕ 2:24).
«Хӕц раст ахуырады хуызӕгыл»
18. Цӕмӕ ӕрхауынц, мӕнг динмӕ чи аздӕхы, уыдон?
18 Исчи ӕцӕгад базонгӕйӕ, фӕстӕмӕ мӕнг динмӕ куы аздӕха, уӕд ма уымӕй бӕллӕх дӕр цы уа! Хуыцауы Ныхас ӕвдисы уый цы ӕвирхъау хабӕрттӕм ӕркӕны: «Кӕд нӕ Хицау ӕмӕ Ирвӕзынгӕнӕг Йесо Чырыстийы базоныны фӕрцы фервӕзтысты дунейы чъизитӕй, фӕлӕ та дзы ногӕй суйтӕ кӕнынц ӕмӕ сӕ амӕддаг баисты, уӕд сӕ фӕстаг уавӕр фыццагӕй фыддӕр уыдзӕн... Фӕлӕ уыдоныл ӕрцыди раст ӕмбисонд: „Куыдз раздӕхы йӕ омдзӕгмӕ“, „ӕхсад хуы ацӕуы цъыфы йӕхи сӕвдулынмӕ“» (2 Петры 2:20–22, НТ).
19. Цӕмӕй нын нӕ уырнындзинад мацы фӕцудын кӕна, уый тыххӕй къӕрцхъус цӕмӕн хъуамӕ уӕм?
19 Мах хъуамӕ къӕрцхъус уӕм, цӕмӕй нын нӕ уырнындзинад мацы фӕцудын кӕна. Уымӕй кӕддӕриддӕр тӕссаг у! Апостол Павел фӕдзӕхста: «Хуыцауы Уд бӕлвырд зӕгъы: рӕстӕджы кӕрон бирӕтӕ ныууадздзысты уырнындзинад, баууӕнддзысты фӕлитой удтыл ӕмӕ дӕлимонты ахуырӕдтыл» (1 Тимофеймӕ 4:1, НТ). Мах цӕрӕм «рӕстӕджы кӕрон». Мӕнг динӕй йӕхи чи нӕ хизы, уыдоны, гӕнӕн ис, «алыхуызон ахуырӕдты уылӕнтӕ дыууӕрдӕм... раппар-баппар кӕна ӕмӕ дымгӕйау... рахӕсс-бахӕсс кӕна куы иуырдӕм, куы иннӕрдӕм – хин ӕмӕ кӕлӕн чи у, уыдон сӕ сайой ӕмӕ сӕ рӕдийын кӕной» (Ефесӕгтӕм 4:14, НД).
20. Куыд бахъахъхъӕнӕм нӕхи, мӕнг дин цы зиан хӕссы, уымӕй?
20 Куыд бахъахъхъӕнӕм нӕхи, мӕнг дин цы зиан хӕссы, уымӕй? Иегъовӕ нын цыдӕриддӕр дӕтты, уыдӕттӕй куы пайда кӕнӕм. Махмӕ ис Хуыцауы Ныхас, Библи (2 Тимофеймӕ 3:16, 17). Иегъовӕ ма нын парахатӕй дӕтты уырнындзинад фидаргӕнӕн хӕринаг «ӕууӕнкджын ӕмӕ зондджын цагъары» уылты (Матфейы 24:45). Нӕ уырнындзинад куыд фидардӕр кӕна, афтӕ тынгдӕр хъуамӕ ма агурӕм, фӕлтӕрд адӕмӕн чи у, ахӕм «хъӕбӕр хӕринаг» ӕмӕ нӕ хъуамӕ ма фӕнда Хуыцауы Ныхас иумӕ кӕм фӕахуыр кӕнӕм, уыцы фембӕлдтӕм цӕуын? (Дзуттытӕм 5:13, 14; Псалом 26:8). Цӕй уӕдӕ, Иегъовӕ нын цыдӕриддӕр дӕтты, уымӕй нӕхи цух ма уадзӕм, цӕмӕй «хӕцӕм раст ахуырады хуызӕгыл» (2 Тимофеймӕ 1:13). Афтӕмӕй нӕхи мӕнг динӕй хиздзыстӕм.
Цы базыдтай?
• Цы у «Стыр Вавилон»?
• Цы хъуамӕ аразӕм, цӕмӕй нӕхи мӕнг динӕй хизӕм?
• Нӕ уырнындзинадӕн тӕссаг цӕмӕй у?
[Фарстатӕ ахуыр кӕнынӕн]
[Ныв 18 фарсыл]
«Стыр Вавилон» ӕнӕгъдау сылгоймаджы хуызӕн ӕвдыст цӕмӕн у, уый зоныс?
[Ныв 19 фарсыл]
«Стыр Вавилонӕн» мӕлӕты тӕрхон рахастӕуыд
[Ныв 21 фарсыл]
Немӕ Иегъовӕйӕн чи нӕ кувы, уыдонмӕ сӕрбӕрзондӕй нӕ кӕсӕм
