Цы хъӕуы донаргъуыд райсынӕн

«Цы... мӕ къуылымпы кӕны донӕйаргъуыд райсын?» (КУЫСТЫТӔ 8:36, НФ).

1, 2. Филипп эфиопаг хицауимӕ ныхас кӕнын куыд райдыдта ӕмӕ цӕмӕй рабӕрӕг, ацы лӕджы зӕрдӕйы уырнындзинад кӕй уыд?

ЙЕСОЙЫ мӕлӕтӕй иу аз рацыдаид ӕви дыууӕ, афтӕ Иерусалимӕй Газӕмӕ фӕндагыл хуссарырдӕм фӕцӕйцыд, стыр бынат чи ахста, иу ахӕм лӕг. Уыцы уӕззау фӕндагыл ма йӕ уӕрдоны цӕуын хъуыдаид, ӕвӕццӕгӕн, мин километрӕй фылдӕр. Ацы дингӕнӕг адӕймаг Эфиопийӕ Иерусалиммӕ ӕрцыд Иегъовӕйӕн бакувынмӕ. Уыцы дард фӕндагыл фӕстӕмӕ здӕхгӕйӕ, йӕ рӕстӕг дзӕгъӕлы нӕ сӕфта, фӕлӕ каст Хуыцауы Ныхас – ахӕм фидар уырнындзинады хицау уыд. Иегъовӕ ацы сыгъдӕгзӕрдӕ адӕймаджы ӕнӕбафиппайгӕ нӕ фӕци, ӕмӕ йӕм зӕдӕн Филиппы арвитын кодта, цӕмӕй уый йемӕ аныхас кодтаид (Куыстытӕ 8:26–28).

² Филиппӕн йемӕ ныхас кӕнын райдайын ӕнцон уыд, уымӕн ӕмӕ эфиопаг хицау, уӕды рӕстӕджы ӕгъдаумӕ гӕсгӕ, хъӕрӕй каст. Уӕдӕ Филипп фехъуыста, Исайы пехуымпарады тыхтонӕй кӕй каст. Уый лӕджы бацымыдис кодта иу хуымӕтӕг фарстӕй: «Цы кӕсыс, уый ӕмбарыс?» Уыйадыл сын ныхас бацайдагъ Исайы 53:7, 8 стихтыл. Фӕстагмӕ йын Филипп радзырдта «хорз уацхъуыд Йесойы тыххӕй» (Куыстытӕ 8:29–35).

3, 4. а) Филипп эфиопаг лӕгӕн донаргъуыд афтӕ тагъд цӕмӕн радта? ӕ) Цавӕр фарстытӕм ӕркӕсдзыстӕм?

³ Цыбыр рӕстӕгмӕ лӕг бамбӕрста, Йесойӕн  Хуыцауы фӕндоны цы бынат ис, уый. Бамбӕрста ма уый дӕр, ӕмӕ цӕмӕй Чырыстийы ахуыргӕнинаг суа, уый тыххӕй йӕ донаргъуыд райсын кӕй хъӕуы. «Цы... мӕ къуылымпы кӕны донӕйаргъуыд райсын?»,– бафарста Филиппы, донмӕ куы бахӕццӕ сты, уӕд. Кӕй зӕгъын ӕй хъӕуы, уавӕртӕ алы хатт афтӕ нӕ вӕййынц. Эфиопаг хицау уыд уырнӕг адӕймаг. Уый райста иудейты дин ӕмӕ лӕггад кодта Хуыцауӕн. Донаргъуыд ныр куы нӕ райстаид, уӕд ӕй ӕндӕр ахӕм фадатмӕ, чи зоны, бирӕ рӕстӕг бахъуыдаид ӕнхъӕлмӕ кӕсын. Уымӕй ахсджиагдӕр та уыд, ацы лӕг кӕй бамбӕрста, Хуыцау ӕм цӕмӕ ӕнхъӕлмӕ кӕсы, уый, ӕмӕ йӕ зӕрдӕйӕ фӕндыд уыцы хъуыддаг бакӕнын. Филипп ын йӕ ныхасыл ӕхсызгонӕй сразы. Ӕмӕ эфиопаг лӕг, донаргъуыд куы райста, уӕд «йӕ фӕндагыл дарддӕр цингӕнгӕйӕ цыд». Дызӕрдыггаг нӕу, йӕ бӕстӕмӕ куы ӕрыздӕхт, уӕд хорз хабар зынгзӕрдӕйӕ кӕй хъусын кодтаид (Куыстытӕ 8:36, НФ, 37–39).

⁴ Кӕд нывонддзырд дӕттын ӕмӕ донаргъуыд исын талф-тулфӕй нӕ хъӕуы, уӕддӕр эфиопаг хицауы цӕвиттон ӕвдисы, кӕй-иу уыди ахӕм хабӕрттӕ, ӕмӕ-иу адӕм ӕцӕгад Хуыцауы Ныхасӕй куы фехъуыстой, уӕд-иу цыбыр рӕстӕгмӕ донаргъуыд кӕй райстой *. Уымӕ гӕсгӕ хорз уаид ӕркӕсын ахӕм фарстытӕм: адӕймаг донаргъуыдмӕ йӕхи куыд хъуамӕ бацӕттӕ кӕна? Кармӕ кӕсын кӕд хъӕуы? Адӕймаг цалынмӕ донаргъуыд нӕ райса, уӕдмӕ цавӕр къахдзӕфтӕ хъуамӕ скӕна? Ӕмӕ ӕппӕты сӕйрагдӕр та, Иегъовӕйы цӕмӕн фӕнды, цӕмӕй йӕ лӕггадгӕнджытӕ ацы къахдзӕф скӕной?

Дзырд раттын

5, 6. а) Рагзаманты Иегъовӕйы адӕм сӕ Хуыцауы уарзондзинад сӕ зӕрдӕмӕ куыд айстой? ӕ) Донаргъуыд куы райсӕм, уӕд нын Хуыцауимӕ цавӕр ӕввахс ахастытӕ фӕзыны?

⁵ Иегъовӕ израилӕгты Египетӕй куы ссӕрибар кодта, уӕд ӕй фӕндыд, цӕмӕй йӕ «исбон» суыдаиккой, уарзтаид сӕ ӕмӕ сӕ хъахъхъӕдтаид ӕмӕ сӕ скодтаид «сыгъдӕг адӕм». Цӕмӕй ахӕм арфӕдзинӕдтӕй хайджын уыдаиккой, уый тыххӕй йын йӕ уарзондзинад хъуамӕ сӕ зӕрдӕмӕ айстаиккой, ӕмӕ уый бӕлвырд хъуыддагӕй равдыстаиккой. Ӕвдисгӕ та йӕ ракодтой, Иегъовӕ сын цыдӕриддӕр загъта, уый кӕныныл кӕй сразы сты ӕмӕ йемӕ бадзырд кӕй сарӕзтой, уымӕй (Рацыд 19:4–9). Фыццаг ӕнусы Йесо йӕ фӕдылдзӕуджытӕн бафӕдзӕхста, цӕмӕй ӕппӕт адӕмтӕй дӕр ахуыргӕнинӕгтӕ цӕттӕ кӕной, ӕмӕ йын-иу йӕ ахуырад чи райста, уыдонӕн-иу донаргъуыд радтой. Хорз ахастытӕ Хуыцауимӕ баст уыдысты, адӕймаг Йесо Чырыстийыл кӕй ӕууӕндыд ӕмӕ-иу донаргъуыд кӕй райста, ууыл (Матфейы 28:19, 20; Куыстытӕ 2:38, 41).

⁶ Ацы цаутӕ ӕвдисынц, Иегъовӕ кӕй арфӕ кӕны, дзырд ын чи ратты, лӕггад дын кӕндзынӕн, зӕгъгӕ, ӕмӕ йӕ чи нӕ сайы, уыдонӕн. Цӕмӕй чырыстӕттӕ Иегъовӕйы хорзӕх ссарой, уый тыххӕй сӕ ӕнӕмӕнгӕй хъӕуы нывонддзырд раттын ӕмӕ донаргъуыд райсын. Мах фидарӕй сфӕнд кодтам, нӕ цард йӕ уагӕвӕрдтӕм гӕсгӕ кӕй араздзыстӕм ӕмӕ йын йӕ разамынд кӕй агурдзыстӕм (Псалом 47:15). Афтӕмӕй нын Иегъовӕ, зӕгъӕн ис, ӕмӕ хӕцы нӕ къухыл ӕмӕ нӕ кӕны, цы фӕндагыл хъуамӕ цӕуӕм, ууыл (Псалом 72:23; Исай 30:21; 41:10, 13).

7. Нывонддзырд ӕмӕ донаргъуыд нӕхи скъуыддзагкӕнинаг фарстатӕ цӕмӕн сты?

⁷ Уыцы къахдзӕфтӕ скӕнынмӕ нӕ хъуамӕ разӕнгард кӕна, Иегъовӕйы кӕй уарзӕм ӕмӕ нӕ кӕй фӕнды, цӕмӕй йын лӕггад кӕнӕм, уый. Иунӕг адӕймаг дӕр донаргъуыд уый тыххӕй хъуамӕ ма райса, ӕмӕ йе ’мбӕлттӕ донаргъуыд исынц кӕнӕ йын чидӕр дзуры, ныр фаг рӕстӕг ахуыр кӕныс, зӕгъгӕ. Кӕй зӕгъын ӕй хъӕуы, ныййарджытӕ ӕмӕ иннӕ фӕлтӕрд чырыстӕттӕн сӕ бон у, ӕмӕ адӕймаджы разӕнгард кӕной, цӕмӕй ахъуыды кӕна нывонддзырд раттын ӕмӕ донаргъуыд райсыныл. Апостол Петр, Фӕндзайӕм боны йӕм чи хъуыста, уыдонӕн дзырдта, зӕгъгӕ, донаргъуыд райсут (Куыстытӕ 2:38). Фӕлӕ нывонддзырд раттын махӕй алкӕмӕн дӕр йӕхи сӕрмагонд хъуыддаг у, ӕмӕ  йӕ нӕ бӕсты никӕй бон у бакӕнын. Нӕхӕдӕг хъуамӕ аскъуыддзаг кӕнӕм, Хуыцауы фӕндон ӕххӕст кӕндзыстӕм ӕви нӕ (Псалом 39:9).

Цы хъӕуы донаргъуыды размӕ

8, 9. а) Фыстадмӕ гӕсгӕ ӕнахъом сабитӕн донаргъуыд дӕттын раст цӕуылнӕ у? ӕ) Сывӕллӕттӕ донаргъуыд райсыны размӕ хорз цы хъуамӕ ӕмбарой?

⁸ Сывӕллӕттӕн сӕ бон у сӕхи Хуыцауӕн ӕмбаргӕ-ӕмбарын снывонд кӕнын? Библийы фыст нӕй, цал аздзыдӕй хъӕуы донаргъуыд исын. Фӕлӕ ӕнахъом сабитӕн, кӕй зӕгъын ӕй хъӕуы, сӕ бон нӕу, ӕмӕ уырнджытӕ суой, сӕ уырнындзинад сӕ хъуыддӕгтӕй ӕвдисой кӕнӕ Хуыцауӕн нывонддзырд раттой (Куыстытӕ 8:12). Фыццаг ӕнусы чырыстӕтты тыххӕй историк Август Неандер иу чиныджы фыссы: «Райдианы донаргъуыд истой ӕрмӕст стыртӕ, уымӕн ӕмӕ уыдон ӕмбӕрстой, донаргъуыд ӕмӕ уырнындзинад ӕнгом баст кӕй сты» («General History of the Christian Religion and Church»).

⁹ Зӕгъын хъӕуы, уый ӕмӕ сывӕллӕттӕй иуӕй-иутӕн сӕ уырнындзинад сфидар вӕййы гыццылӕй, иннӕтӕн та – куы бахъомыл вӕййынц, уӕд. Фӕлӕ донаргъуыд райсыны размӕ гыццылтӕн дӕр стыртау хъуамӕ уа сӕрмагонд ахастытӕ Иегъовӕимӕ, хъуамӕ хорз ӕмбарой Библийы сӕйраг ахуырӕдтӕ ӕмӕ, нывонддзырд раттынмӕ цы хауы, уый.

10. Нывонддзырд раттын ӕмӕ донаргъуыд райсыны размӕ цӕвӕр къахдзӕфтӕ скӕнын хъӕуы?

¹⁰ Йесо йӕ ахуыргӕнинӕгтӕн загъта, цӕмӕй ногты ахуыр кӕной, цы сын бафӕдзӕхста, ӕппӕт уыдӕттӕ ӕххӕст кӕнын (Матфейы 28:20). Фыццаджыдӕр, ногтӕ хъуамӕ бӕлвырд базоной ӕцӕгад, ӕмӕ уый фӕрцы та баууӕндой Иегъовӕ ӕмӕ йӕ Ныхасыл (Ромӕгтӕм 10:17; 1 Тимофеймӕ 2:4; Дзуттытӕм 11:6). Стӕй, Библийы ӕцӕгад адӕймаджы зӕрдӕмӕ куы бахъары, уӕд ӕрфӕсмон кӕны ӕмӕ раздӕхы, йӕ раздӕры цардыуаг ныууадзы (Куыстытӕ 3:19). Фӕстагмӕ йӕ бафӕнды йӕхи Иегъовӕйӕн снывонд кӕнын ӕмӕ, Йесо куыд бафӕдзӕхста, афтӕ донаргъуыд райсын.

11. Донаргъуыд райсыны размӕ хорз хабар иудадзыг хъусын кӕнын цӕмӕн хъӕуы?

¹¹ Донаргъуыд райсыны размӕ ма скӕнын хъӕуы ӕндӕр ӕнӕмӕнгхъӕугӕ къахдзӕф дӕр – Хуыцауы Паддзахады хорз хабар хъусын кӕнын. Уый у, Иегъовӕ йӕ адӕмӕн ацы фӕстаг бонты кӕй бахӕс кодта, уыцы ӕппӕты ахсджиагдӕр куыст (Матфейы 24:14). Уӕдӕ ӕнӕаргъуыд хъусынгӕнджытӕн сӕ бон у цин кӕнын, иннӕтӕн сӕ дины тыххӕй кӕй дзурынц, ууыл. Уый сӕ бацӕттӕ кӕны, цӕмӕй донаргъуыд куы райсой, уӕд уый фӕстӕ дӕр хорз хабар иудадзыг ӕмӕ зынгзӕрдӕйӕ хъусын кӕной (Ромӕгтӕм 10:9, 10, 14, 15).

Исты дӕ къуылымпы кӕны донаргъуыд райсын?

12. Иуӕй-иутӕ донаргъуыд цӕуылнӕ исынц?

¹² Иуӕй-иутӕ донаргъуыд, чи зоны, уымӕн нӕ исынц, ӕмӕ сӕ нӕ фӕнды, уыимӕ цы бӕрндзинад баст ис, уый сӕхимӕ райсын. Уыдон ӕмбарынц, цӕмӕй Иегъовӕйы домӕнты аккаг уой, уый тыххӕй сӕ сӕ царды стыр ивындзинӕдтӕ скӕнын кӕй хъӕуы. Кӕнӕ та, гӕнӕн ис, ӕмӕ тӕрсой, донаргъуыды фӕстӕ Хуыцауы уагӕвӕрдтӕм гӕсгӕ сӕ бон цӕрын куы нӕ бауа. Иннӕтӕ та ма, гӕнӕн ис, ӕмӕ афтӕ дӕр хъуыды кӕной: «Искуы, мыййаг, ӕвзӕрӕй исты куы саразон, уӕд мӕ ӕмбырдӕй ацух кӕндзысты».

13. Йесо зӕххыл куы уыд, уӕд иуӕй-иутӕ йӕ фӕдыл цӕуылнӕ цыдысты?

¹³ Йесо зӕххыл куы уыд, уӕд иуӕй-иутӕ йӕ ахуыргӕнинӕгтӕ уымӕн не систы, ӕмӕ сӕ сӕ хъуыддӕгтӕ кӕнӕ сӕ бинонты мӕт бахъыгдардтой.  Зӕгъӕм, Йесойӕн иу чиныджыдӕсны загъта, йӕ фӕдыл кӕдӕмфӕнды дӕр кӕй ацӕудзӕн. Фӕлӕ Йесо бамбарын кодта, бирӕ хатт, кӕм бахсӕвиуат кӕна, уый дӕр ын кӕй нӕ вӕййы. Иннӕмӕн та куы загъта, мӕ фӕдыл рацу, зӕгъгӕ, уӕд ын уый дзуапп радта, фыццаг уал ӕй йӕ фыды баныгӕнын кӕй хъӕуы. Ӕвӕццӕгӕн, уый фӕндыд хӕдзары баззайын ӕмӕ йӕ фыды мӕлӕтмӕ банхъӕлмӕ кӕсын. Ӕмӕ йӕ рӕстӕг куы ӕрцыдаид, уӕд йӕ хӕс сӕххӕст кодтаид – баныгӕдтаид ӕй. Фӕстагмӕ ӕртыккаг загъта, зӕгъгӕ йӕ Йесойы фӕдыл ацӕуыны размӕ йӕ бинонтӕн «хӕрзбон» зӕгъын хъӕуы. Афтӕ фӕстӕ-фӕстӕ чи кодта, уыдоны Йесо схуыдта «фӕстӕмӕ кӕсджытӕ». Уӕдӕ, бӕрӕг у, ахӕм адӕймӕгтӕ алкӕддӕр ӕфсӕнттӕ кӕй ардзысты, цӕмӕй сӕ чырыстон хӕстӕй сӕхи сайой (Лукайы 9:57–62).

14. а) Йесо Петр, Андрей, Иаков ӕмӕ Иоаннӕн куы загъта, цӕмӕй адӕмахсджытӕ суой, уӕд цы бакодтой? ӕ) Йесойы уаргъ райсыныл фӕстӕ цӕуылнӕ хъуамӕ кӕнӕм?

¹⁴ Петр, Андрей, Иаков ӕмӕ Иоанн та ныууагътой бынтон ӕндӕрхуызон цӕвиттон. Йесо сӕ куы фӕхуыдта, цӕмӕй йӕ фӕдыл рацӕуой ӕмӕ адӕмахсджытӕ суой, уӕд цы бакодтой, уый тыххӕй Библи дзуры: «Уыцы сахаты, ныууадзгӕйӕ хызтӕ, ацыдысты Йӕ фӕстӕ» (Матфейы 4:19–22). Уыдон ӕвӕстиатӕй йӕ фӕдыл ацыдысты ӕмӕ сӕхиуыл бавзӕрстой, Йесо сын фӕстӕдӕр цы загъта, уый: «Сӕвӕрут Мӕ ӕфсондз уӕхиуыл, ӕмӕ сахуыр ут Мӕнӕй: цӕмӕйдӕриддӕр Ӕз сабыр ӕмӕ зӕрдӕфӕлмӕн дӕн; ӕмӕ ссардзыстут уӕ удтӕн ӕнцойад. Цӕмӕйдӕриддӕр Мӕ ӕфсондз хорз у, Мӕ уаргъ та рог у» (Матфейы 11:29, 30, НФ). Кӕд донаргъуыд бӕрндзинады уаргъимӕ баст у, уӕддӕр нын Йесо ныфс ӕвӕры, уый хорз ӕмӕ ӕнцонхӕссӕн кӕй у ӕмӕ нын стыр удӕнцой кӕй уыдзӕн.

15. Моисей ӕмӕ Иеремийы цӕвиттонтӕй куыд зыны, нӕ бон кӕй у нӕ ныфс Хуыцауы ӕххуысыл дарын?

¹⁵ Адӕймаг йӕхимӕ истӕй аккаг кӕй нӕ фӕкӕсы, уым, кӕй зӕгъын ӕй хъӕуы, диссагӕй ницы ис. Моисей дӕр ӕмӕ Иереми дӕр фыццаг сӕхи Иегъовӕйы хӕслӕвӕрд сӕххӕст кӕныны аккагыл нӕ нымадтой (Рацыд 3:11; Иереми 1:6). Хуыцау сӕ ныфс куыд бауагъта? «Ӕз уыдзынӕн демӕ»,– загъта Моисейӕн. «Ӕз демӕ дӕн, цӕмӕй дӕ ирвӕзын кӕнон»,– зӕрдӕ бавӕрдта Иеремийӕн (Рацыд 3:12; Иереми 1:8). Мах дӕр нӕ зӕрдӕ дарӕм Иегъовӕйы ӕххуысыл. Хуыцауы кӕй уарзӕм ӕмӕ йыл нӕ ныфс кӕй дарӕм, уый фӕрцы аиуварс кӕндзыстӕм, уӕгъд нӕ чи нӕ уадзы, уыцы дызӕрдыггаг хъуыдытӕ, зӕгъгӕ, нӕ бон нӕ нывонддзырдмӕ гӕсгӕ цӕрын не суыдзӕн. «Уарзондзинадӕн тасимӕ иумӕйагӕй ницы ис,– фыста апостол Павел,– ӕцӕг уарзондзинад кӕм уа, уым тасӕн бынат нӕй» (1 Иоанны 4:18, НТ). Гыццыл сывӕллон иунӕгӕй цӕугӕйӕ чи зоны тӕрса, фӕлӕ йӕ фыды къухыл хӕцгӕйӕ вӕййы ныфсджын. Уыйау махӕн дӕр Иегъовӕ зӕрдӕ ӕвӕры, нӕ ныфс ыл ӕгасӕй дӕр куы дарӕм ӕмӕ йемӕ куы цӕуӕм, уӕд нын нӕ къахвӕндӕгтӕ кӕй раст кӕндзӕн (Ӕмбисӕндтӕ 3:5, 6).

 Кады аккаг хъуыддаг

16. Донаргъуыд исгӕйӕ, адӕймаджы ӕнӕхъӕнӕй доны бын цӕмӕн фӕкӕнынц?

¹⁶ Донаргъуыды размӕ вӕййы раныхас. Уым дзырд фӕцӕуы, донаргъуыд куыд ахсджиаг у, ууыл. Раныхасы кӕрон донаргъуыдисджытӕм раттынц дыууӕ фарсты, цӕмӕй ӕргом зӕгъой сӕ уырнындзинады тыххӕй (Ромӕгтӕм 10:10; кӕс фӕлгӕты 24 фарсыл). Стӕй сӕ ӕнӕхъӕнӕй доны бын фӕкӕнынц – Йесо цы цӕвиттон ныууагъта, уымӕ гӕсгӕ. Библийы фыст ис, зӕгъгӕ, Йесо донаргъуыд куы райста, уӕд «рацыд донӕй» (Матфейы 3:16; Маркы 1:10). Куыд зыны, афтӕмӕй Аргъауӕг Иоанн Йесойы доны бын фӕкодта ӕнӕхъӕнӕй *. Ӕнӕхъӕнӕй дӕр нӕ доны бын кӕй фӕкӕнынц, уый хорз ӕвдисы, нӕ цард тынг кӕй аивӕм – зӕгъӕн ис, ӕмӕ нӕ раздӕры цардӕн амӕлӕм ӕмӕ ногӕй цӕрын райдайӕм Хуыцауӕн лӕггад кӕнынӕн.

17. Донаргъуыдисджытӕ ӕмӕ иннӕтӕ дӕр уыцы хъуыддагӕн куыд хъуамӕ аргъ кӕной?

¹⁷ Донаргъуыд у ахсджиаг ӕмӕ цины хабар. Библи дзуры, зӕгъгӕ, Йесо кодта кувгӕ, Иоанн ын Иорданы цӕугӕдоны аргъуыд куы радта, уӕд (Лукайы 3:21, 22). Йесойы цӕвиттонмӕ гӕсгӕ абон дӕр донаргъуыдисджытӕ хъуамӕ сӕхи, куыд ӕмбӕлы, афтӕ дарой. Библи нын дзуры, цӕмӕй нӕ дарӕс кӕддӕриддӕр хӕдӕфсармыл дзурӕг уа, уӕлдайдӕр та, донаргъуыд куы исӕм, уыцы бон (1 Тимофеймӕ 2:9). Иннӕтӕ дӕр хъуамӕ ацы цауӕн аргъ кӕной ӕмӕ лӕмбынӕг хъусой, донаргъуыды размӕ цы раныхас вӕййы, уымӕ, ӕмӕ уыцы цау куыд домы, афтӕ сӕхи дарой (1 Коринфӕгтӕм 14:40).

Донаргъуыд ахуыргӕнинӕгтӕ арфӕгонд куыд ӕрцӕуынц

18, 19. Донаргъуыд цавӕр хорзӕхтӕ хӕссы?

¹⁸ Хуыцауӕн нӕхи куы снывонд кӕнӕм ӕмӕ донаргъуыд куы райсӕм, уӕд нын фӕзыны диссаджы бинонтӕ. Фыццаджыдӕр Иегъовӕ свӕййы нӕ Фыд ӕмӕ нӕ Хӕлар. Донаргъуыды размӕ уыдыстӕм иппӕрд Хуыцауӕй – ныр та йемӕ бафидыдтам (2 Коринфӕгтӕм 5:19; Колоссӕгтӕм 1:20). Чырыстийы нывонды уылты мах Хуыцаумӕ баввахс стӕм ӕмӕ нӕм уый дӕр ӕрбаввахс (Иаковы 4:8). Пехуымпар Малахи фыссы, Иегъовӕ йе ’ргом кӕй здахы ӕмӕ кӕй хъусы, йӕ ном ын чи хӕссы ӕмӕ йӕ номӕй чи дзуры, уыдонмӕ, ӕмӕ сын сӕ нӕмттӕ хӕссы зӕрдылдарӕн чиныгмӕ. «Уыдон уыдзысты мӕн,– дзуры Хуыцау.– Ӕз сын фӕтӕригъӕд кӕндзынӕн, фыд, чи йын лӕггад кӕны, уыцы фыртӕн куыд фӕтӕригъӕд кӕны, раст афтӕ» (Малахи 3:16–18).

¹⁹ Донаргъуыды фӕрцы свӕййӕм ӕппӕтдунеон ӕфсымӕрады уӕнгтӕ. Апостол Петр Чырыстийы куы бафарста, йӕ ахуыргӕнинӕгтӕ сӕхи цӕмӕй фӕцух кодтой, уый тыххӕй цы арфӕдзинӕдтӕ райсдзысты, уӕд ын уый зӕрдӕ бавӕрдта: «Мӕ номы сӕраппонд йӕ хӕдзӕрттӕ, кӕнӕ йе ’фсымӕрты, кӕнӕ йӕ хоты, кӕнӕ йӕ фыды, кӕнӕ йӕ мады, кӕнӕ йӕ усы, кӕнӕ йӕ сывӕллӕтты, кӕнӕ йӕ зӕххытӕ чи ныууадза, уый райсдзӕни фондзыссӕдз хатты фылдӕрӕй, ӕмӕ схайджын уыдзӕн мыггагмӕйы цардӕй» (Матфейы 19:29, НТ). Бирӕ азты фӕстӕ Петр фыста, «дунейы» цы ӕфсымӕрад фӕзынд, уый тыххӕй. Петр йӕхӕдӕг бавзӕрста уарзӕгой ӕфсымӕрады ӕххуыс ӕмӕ хорзӕх, ӕмӕ йӕ мах дӕр ӕвзарӕм (1 Петры 2:17; 5:9).

20. Донаргъуыд нын цавӕр диссаджы фадат дӕтты?

²⁰ Уымӕй уӕлдай ма Йесо банысан кодта, йӕ фӕдыл чи цӕуы, уыдон кӕй «схайджын уыдзысты мыггагмӕйы цардӕй». О, нывонддзырд  ӕмӕ нын донаргъуыд фадат дӕттынц, цӕмӕй «фидар ныххӕцӕм ӕцӕг цардыл» – ӕнусон цардыл Хуыцауы ног дунейы (1 Тимофеймӕ 6:19, НТ). Нӕхи ӕмӕ нӕ бинонты сомбонӕн ма уымӕй хуыздӕр бындур сӕвӕрӕн ис? Ацы диссаджы фадаты фӕрцы «цӕудзыстӕм нӕ Хуыцау Иегъовӕйы номӕй мыггагӕй-мыггагмӕ,– ӕнустӕм» (Михей 4:5).

[Фиппаинӕгтӕ]

Куыд бамбарын кӕнис?

• Иегъовӕйы уарзондзинад куыд ӕмӕ цӕмӕн хъуамӕ исӕм нӕ зӕрдӕмӕ?

• Донаргъуыд райсыны размӕ адӕймаг цавӕр къахдзӕфтӕ хъуамӕ скӕна?

• Фӕрӕдийдзыстӕм, уый тас кӕнӕ нӕ бӕрндзинад исын кӕй нӕ фӕнды, уый нӕ цӕуылнӕ хъуамӕ хъыгдара, цӕмӕй донаргъуыд райсӕм?

• Йесо Чырыстийы донаргъуыд ахуыргӕнинӕгтӕ цавӕр диссаджы арфӕдзинӕдтӕй сты хайджын?

[Фарстатӕ ахуыр кӕнынӕн]

[Нывтӕ 29 фарсыл]

Донаргъуыд у ахсджиаг ӕмӕ цины хабар