Зондджын у – Хуыцауӕй тӕрс!

«Иегъовӕйӕ тӕрсын – зонды райдиан» (ӔМБИСӔНДТӔ 9:10).

1. Хуыцауӕй тӕрсын цы у, уый бирӕтӕн зын ӕмбарӕн цӕмӕн у?

РАЗДӔР-ИУ искӕмӕй куы загътой, зӕгъгӕ, Хуыцауӕй тӕрсы, уӕд-иу дзы ӕппӕлгӕ кодтой. Абон та бирӕтӕм афтӕ кӕсы, ӕмӕ уыцы миниуӕг царды нал ахады ӕмӕ уӕвгӕ цы у, уый ӕмбаргӕ дӕр нӕ кӕнынц. «Кӕд Хуыцау уарзондзинад у, уӕд дзы цӕмӕн хъуамӕ тӕрсон?»,– чи зоны фӕрсой уыдон. Уыцы адӕмы хъуыдымӕ гӕсгӕ, тӕрсай, уым хорзӕй ницы ис, уый адӕймаджы хъару сӕтты. Фӕлӕ Хуыцауӕй тӕрсын ӕцӕгӕйдӕр цы у, уымӕ бирӕ цыдӕртӕ хауы ӕмӕ куыд фендзыстӕм, афтӕмӕй уый ӕрмӕст ӕнкъарӕн нӕу.

2, 3. Хуыцауӕй тӕрсынмӕ цы хауы?

² Библи Хуыцауӕй тӕрсын нымайы хорз миниуӕгыл (Исай 11:3). Уый нысан кӕны Хуыцауӕн кад ӕмӕ аргъ кӕнын, ӕмӕ йӕ зӕрдӕхудты бацӕуынӕй тӕрсын (Псалом 113:19). Уымӕ хауы, Хуыцау ӕгъдауы тыххӕй цы уагӕвӕрдтӕ радта, уыдоныл разы кӕнын ӕмӕ сӕ куыд ӕмбӕлы, афтӕ ӕххӕст кӕнын ӕмӕ, Хуыцау хорз кӕнӕ ӕвзӕрыл цы нымайы, уый хынцгӕйӕ цӕрын. Иу дзырдуатмӕ гӕсгӕ, ахӕм тас кӕмӕ ис, «уыцы адӕймаг хӕрзӕгъдау цард кӕны ӕмӕ йӕхи алы фыддзинадӕй хизы, Хуыцауӕн кӕй кад кӕны, уый тыххӕй». Уымӕ гӕсгӕ нын Хуыцауы Ныхас дзуры: «Иегъовӕйӕ тӕрсын – зонды райдиан» (Ӕмбисӕндтӕ 9:10).

³ Ӕцӕгӕйдӕр, ацы миниуӕг – Хуыцауӕй тӕрсын – адӕймаджы царды бирӕ хъуыддӕгтӕм хауы. Ӕмӕ уый ӕрмӕст зондимӕ баст нӕу, фӕлӕ цин, фарн, хъӕздыг цард, бирӕ цӕрӕнбонтӕ, ныфс ӕмӕ ӕууӕнкимӕ дӕр (Псалом 2:11; Ӕмбисӕндтӕ 1:7; 10:27; 14:26; 22:4; 23:17, 18; Куыстытӕ 9:31). Хуыцауӕй тӕрсын ма ӕнгом баст у уырнындзинад ӕмӕ уарзондзинадимӕ. Бӕлвырд у, ацы миниуӕгмӕ кӕй хауы, Хуыцау ӕмӕ адӕмимӕ куыд цӕрӕм, уымӕ цыдӕриддӕр ахӕссӕн ис, уый (Дыккаг закъон 10:12; Иов 6:14; Дзуттытӕм 11:7). Хуыцауӕй тӕрсын ма у, фидарӕй ӕууӕндын, нӕ уӕларвон Фыд ныл кӕй тыхсы ӕмӕ цӕттӕ кӕй у нӕ тӕригъӕдтӕ хатыр кӕнынмӕ (Псалом 129:4). Фӕсмон чи нӕ кӕны, ӕрмӕст уыцы тӕригъӕдджынтӕ хъуамӕ ризой Хуыцауы раз * (Дзуттытӕм 10:26–31).

Ахуыр кӕнӕм Иегъовӕйӕ тӕрсын

4. Цӕй фӕрцы ахуыр кӕндзыстӕм Иегъовӕйӕ тӕрсын?

⁴ Хуыцауӕй тӕрсын тынг ахсджиаг у, цӕмӕй зондджын уынаффӕтӕ хӕссӕм, ӕмӕ йӕ арфӕйӕ хайджын уӕм. Уымӕ гӕсгӕ нӕ бон куыд у ахуыр кӕнын, Иегъовӕйӕ куыд ӕмбӕлы, афтӕ тӕрсын? (Дыккаг закъон 17:19). Фыстады «махӕн зонд амонынӕн» ис Хуыцауӕй чи тарст, ахӕм нӕлгоймӕгтӕ ӕмӕ сылгоймӕгты цӕвиттонтӕ (Ромӕгтӕм 15:4). Хуыцауӕй тӕрсын ӕцӕгӕйдӕр цы у, уый бамбарынӕн нын баххуыс кӕндзӕн рагон Израилы паддзах Давиды цард.

5. Давид фыстӕ кӕй хызта, уый йын куыд баххуыс кодта бамбарын, цы у Иегъовӕйӕ тӕрсын?

⁵ Иегъовӕ йӕ къух систа Израилы фыццаг паддзах Саулыл, уымӕй нӕ, фӕлӕ адӕмӕй кӕй тарст, уый тыххӕй (1 Паддзахӕдты 15:24–26). Давид куыд цард ӕмӕ Иегъовӕмӕ куыд ӕввахс уыд, уымӕй та бӕрӕг уыд, Хуыцауӕй кӕй тарст. Ӕрыгонӕй Давид арӕх хызта йӕ фыды фыстӕ (1 Паддзахӕдты 16:11). Фос хизгӕйӕ-иу ӕхсӕвӕддӕ кӕй баззад ӕмӕ-иу стъалытӕм кӕй каст, уый йын баххуыс кодта хуыздӕр бамбарын, цы у Иегъовӕйӕ тӕрсын. Кӕд Давид ӕнӕкӕрон дун-дунейӕн ӕрмӕст йӕ гыццыл хай уыдта, уӕддӕр раст хатдзӕгмӕ ӕрцыд: Хуыцау кад ӕмӕ лӕггад кӕныны аккаг у. «Куы кӕсын ӕз Дӕ  ӕрвтӕм,– Дӕ ӕнгуылдзты хъуыддагмӕ, мӕй ӕмӕ стъалытӕм, кӕцыты Ды сӕвӕрдтай, уӕд цы у адӕймаг, Ды йӕ кӕй мысыс, ӕмӕ адӕймаджы фырт, Ды йӕ кӕй бӕрӕг кӕныс?»,– фӕстӕдӕр ныффыста Давид (Псалом 8:4, 5).

6. Давид Иегъовӕйы стыр хъуыддӕгтӕ хуыздӕр куы базыдта, уӕд ӕм цавӕр фӕнд фӕзынд?

⁶ Стъалытӕй дзаг ӕнӕкӕрон арвимӕ абаргӕйӕ куыд гыццыл у, ууыл хъуыдыгӕнгӕйӕ Давид дис кодта. Иегъовӕйӕ тӕрсыны бӕсты йӕ уыцы хъуыдытӕ разӕнгард кодтой, цӕмӕй йын кад кӕна: «Ӕрвтӕ хъусын кӕнынц Хуыцауы кад, ӕмӕ Йӕ къухты хъуыддӕгты тыххӕй дзуры арв» (Псалом 18:2). Уый фӕрцы Давид ноджы ӕввахсдӕр кодта Иегъовӕмӕ ӕмӕ йӕ фӕндыд йӕ раст фӕндӕгтӕ ахуыр кӕнын ӕмӕ сыл цӕуын. Ахъуыды ма кӕн, Давидӕн цы зӕрдӕйы уаг уыд, Иегъовӕйӕн куы зарыд: «Ды стыр ӕмӕ кӕныс диссӕгтӕ,– Ды, Хуыцау, иунӕг Ды. Сӕвӕр мӕн, Хицау, Дӕ фӕндагыл ӕмӕ цӕудзынӕн Дӕ ӕцӕгады; сфидар кӕн мӕ зӕрдӕ Дӕ номы тасы» (Псалом 85:10, 11).

7. Давид Хуыцауӕй кӕй тарст, уый йын куыд баххуыс кодта Голиафимӕ тохы?

⁷ Филистимӕгтӕ Израилмӕ куы бабырстой, уӕд 3 метры дӕргъӕн уӕйыг Голиаф израилӕгтӕй хынджылӕг кодта, зӕгъгӕ, равзарут, лӕгӕй-лӕгмӕ кӕимӕ рахӕцон, ахӕм лӕджы ӕмӕ мыл кӕд фӕтых уа, уӕд уын лӕггад кӕндзыстӕм (1 Паддзахӕдты 17:4–10). Саул йе ’ппӕт ӕфсадимӕ фыртӕссӕй рызти, Давид та нӕ. Уый зыдта, адӕймаг цыфӕнды хъаруджын ма уа, уӕддӕр тӕрсын ӕрмӕстдӕр Иегъовӕйӕ кӕй хъӕуы. «Ӕз дӕ ныхмӕ цӕуын ӕфсӕдты Иегъовӕйы номӕй,– загъта Давид Голиафӕн.– Ӕмӕ ам чидӕриддӕр ӕрӕмбырд, уыдон базондзысты, Иегъовӕ ӕхсаргард ӕмӕ арцӕй кӕй нӕ ирвӕзын кӕны, уымӕн ӕмӕ уый Иегъовӕйы хӕст у». Дурӕхсӕн ӕмӕ иунӕг дуримӕ – ӕмӕ Иегъовӕйы ӕххуысӕй – Давид уӕйыджы амардта (1 Паддзахӕдты 17:45–47).

8. Хуыцауӕй чи тарст, уыцы адӕмы цардӕй цӕуыл ахуыр кӕнӕм?

⁸ Чи зоны, мах цы зындзинӕдтӕ кӕнӕ знӕгтыл ӕмбӕлӕм, уыдон Давиды зындзинӕдтӕй къаддӕр не сты. Уӕд нын куыд кӕнгӕ у? Махӕн дӕр нӕ бон у семӕ тох кӕнын, Давид ӕмӕ ӕндӕр рагон иузӕрдион лӕггадгӕнджытау, Хуыцауӕй кӕй тӕрсӕм, уый фӕрцы. Хуыцауӕй куы тӕрсӕм, уӕд адӕмӕй нӕ тӕрсдзыстӕм. Зӕгъӕм, израилӕгты ныхмӕ куы цыдысты, уӕд сӕ Хуыцауы иузӕрдион лӕггадгӕнӕг Нееми разӕнгард кодта: «Ма сӕ тӕрсут. Уӕ хъуыдыйы дарут Иегъовӕйы, стыр ӕмӕ тасӕфтауӕг Хуыцауы» (Нееми 4:14). Иегъовӕйы ӕххуысӕй Давид, Нееми ӕмӕ  ӕндӕр иузӕрдион лӕггадгӕнджытӕ ӕнтыстджын уыдысты, Хуыцау сын цы хъуыддаг бахӕс кодта, уый ӕххӕстгӕнгӕйӕ. Афтӕ махӕн дӕр нӕ бон у, Хуыцауӕй куы тӕрсӕм, уӕд.

Зындзинӕдтыл ӕмбӕлгӕйӕ дӕр Хуыцауӕй тӕрс

9. Цавӕр уавӕрты равдыста Давид, Хуыцауӕй кӕй тарст, уый?

⁹ Давид Голиафы куы амардта, уый фӕстӕ ма йын Иегъовӕ бирӕ уӕлахизтӕ балӕвар кодта. Хӕлӕггӕнӕг Саулӕн йӕ къухы нӕ бафтыд Давиды амарын. Фыццаг архайдта йӕ сонт зӕрдӕйӕ, уый фӕстӕ мӕнгардӕй, стӕй та ӕфсадимӕ дӕр. Кӕд Иегъовӕ Давидӕн зӕрдӕ бавӕрдта, паддзах кӕй уыдзӕн, уӕддӕр ӕй бирӕ азты дӕргъы бахъуыд йӕ сӕр ӕмбӕхсын, тох кӕнын ӕмӕ ӕнхъӕлмӕ кӕсын, Иегъовӕ йӕ ныхас кӕд сӕххӕст кӕндзӕн, уӕдмӕ. Уыцы рӕстӕджы дӕргъы Давиды цардӕй бӕрӕг уыд, ӕцӕг Хуыцауӕй кӕй тарст (1 Паддзахӕдты 18:9, 11, 17; 24:2).

10. Давид зын уавӕры дӕр Хуыцауӕй кӕй тӕрст, уый куыд равдыста?

¹⁰ Иу хатт Давид ӕмбӕхст Анхусмӕ, филистимаг сахар Гефы паддзахмӕ, Голиафы райгуырӕн сахары (1 Паддзахӕдты 21:10–15). Паддзахы лӕггадгӕнджытӕ базыдтой Давиды, сӕ адӕмы знаджы. Уыцы тӕссаг уавӕры Давид йӕхи куыд дардта? Иегъовӕмӕ зӕрдиагӕй куывта (Псалом 55:1–4, 12–14). Уыцы уавӕрӕй фервӕзыны тыххӕй, кӕд ӕррайы ӕфсон скодта, уӕддӕр Давид зыдта, ӕцӕгӕй йӕ Иегъовӕ кӕй ирвӕзын кӕны, йӕ хъуыддӕгтӕн ын кӕй арфӕ кӕны, уымӕй. Давид Иегъовӕйыл зӕрдиагӕй кӕй ӕууӕндыд ӕмӕ йыл йӕ ныфс кӕй дардта, уымӕй бӕрӕг уыд, кӕй дзы тарст, уый (Псалом 33:5–7, 10–12).

11. Зын рӕстӕг махӕн дӕр нӕ бон куыд у Давидау ӕвдисын, Хуыцауӕй кӕй тӕрсӕм, уый?

¹¹ Мах дӕр Давидау Хуыцауӕй кӕй тӕрсӕм, уый ӕвдисдзыстӕм, зындзинӕдты рӕстӕг нын ӕххуыс кӕй кӕндзӕн, ууыл куы ӕууӕндӕм, уӕд. «Ратт дӕ фӕндаг Хицаумӕ ӕмӕ Уымӕй ныфсджын у, ӕмӕ Уый сӕххӕст кӕндзӕн» (Псалом 36:5). Фӕлӕ уый ууыл дзурӕг нӕу, ӕмӕ нӕ зындзинӕдтӕ Иегъовӕйыл сӕвӕрӕм, нӕхӕдӕг та ӕнцад сбадӕм ӕмӕ йе ’ххуысмӕ ӕнхъӕлмӕ кӕсӕм. Давид-иу Хуыцаумӕ ӕххуысы тыххӕй куы скуывта, уӕд-иу стӕй ӕнцад не сбадт. Иегъовӕ йын цы хъару ӕмӕ зонд радта, уымӕй архайдта йӕ зындзинӕдтӕ аскъуыддзаг кӕныныл. Фӕлӕ Давид зыдта: ӕрмӕст адӕймаджы хъарутыл йӕ ныфс куы дара, уӕд ӕнтыстджын нӕ уыдзӕн. Уый хъуамӕ мах дӕр ӕмбарӕм. Нӕ бон цыдӕриддӕр у, уый аразӕм ӕмӕ нӕ зӕрдӕ дарӕм Иегъовӕйыл. Фӕлӕ вӕййы афтӕ дӕр, ӕмӕ нӕхицӕн нӕ бон ницы вӕййы, ӕрмӕст Иегъовӕмӕ ӕнхъӕлмӕ кӕсӕм. Ахӕм рӕстӕг рабӕрӕг вӕййы, Хуыцауӕй тӕрсӕм ӕви нӕ, уый. Удӕнцой нын ӕрхӕсдзысты Давиды зӕрдӕмӕхъаргӕ ныхӕстӕ: «Иегъовӕ ӕввахс у, чи дзы тӕрсы, уыдонмӕ» (Псалом 25:14, НД [24:14]).

12. Нӕ куывдтытӕм куыдфӕндыйы цӕстӕй цӕуылнӕ хъуамӕ кӕсӕм, ӕмӕ цавӕр зондахастӕй хъуамӕ хизӕм нӕхи?

¹² Уымӕ гӕсгӕ хъуамӕ нӕ куывдтытӕм, ӕмӕ нын Хуыцауимӕ цы хӕлардзинад ис, уымӕ куыдфӕндыйы цӕстӕй ма кӕсӕм. «Хъуамӕ ӕууӕндӕм, Хуыцау кӕй ис ӕмӕ Йӕ чи агуры, уыдонӕн хорзӕх кӕй дӕтты, ууыл» (Дзуттытӕм 11:6, НТ; Иаковы 1:5–8). Ӕмӕ нын куы баххуыс кӕны, уӕд та дзы хъуамӕ «бузныг уӕм», апостол Павел нын куыд уынаффӕ кодта, афтӕ (Колоссӕгтӕм 3:15, 17, НТ). Мах хъуамӕ макуы суӕм, иу фӕлтӕрдджын сӕрст чырыстон кӕй тыххӕй дзырдта, уыдоны хуызӕн: «Уыдон афтӕ хъуыды кӕнынц, ӕмӕ Хуыцау сӕ уӕларвон лӕггадгӕнӕг у. Исты сӕ куы бахъӕуа, уӕд се ’нгуылдзтӕй фӕкъӕрцц кодтой – ӕмӕ сӕ цуры ӕрбалӕууыд. Цы сӕ хъӕуы, уый куы райсынц, уӕд та сӕ нал фӕхъӕуы». Ахӕм зондахастӕй бӕрӕг у, адӕймаг Хуыцауӕй кӕй нӕ тӕрсы.

Хуыцауӕй раздӕрау куы нал тӕрсӕм

13. Цы уавӕры нӕ сӕххӕст кодта Давид Хуыцауы Закъон?

¹³ Давид зындзинӕдты рӕстӕг Иегъовӕйы ӕххуысӕй цух кӕй нӕ уыд, уый руаджы дзы тынгдӕр тарст ӕмӕ йыл тынгдӕр ӕууӕндыд (Псалом 30:23–25). Фӕлӕ Давидыл ӕрцыд, стыр бӕллӕхтӕ чи расайдта, ӕртӕ ахӕм хабары, уымӕн ӕмӕ Хуыцауӕй раздӕрау нал тарст. Фыццаг хабар ӕрцыд, Иегъовӕйы бадзырды чырын Иерусалиммӕ ласынмӕ куы цӕттӕ кодта, уӕд. Хуыцауы Закъон куыд  дзырдта, афтӕ йӕ левитты уӕхсджытыл нӕ ахӕссын кодта, фӕлӕ йӕ уӕрдоныл аласын кодта. Озӕ, уӕрдон чи кодта, уый чырынмӕ куы февнӕлдта, ма рахауа, зӕгъгӕ, уӕд дзыхъмард фӕци йӕ къӕйных мийы тыххӕй. Озӕ стыр тӕригъӕд сарӕзта, фӕлӕ уыцы бӕллӕхы фыццаджыдӕр Давид уыд аххосджын, уымӕн ӕмӕ Хуыцауы Закъон нӕ сӕххӕст кодта. Уӕдӕ Хуыцауӕй тӕрсын у, хъуыддӕгтӕ йӕ фӕндонмӕ гӕсгӕ аразын (2 Паддзахӕдты 6:2–9; Нымӕцтӕ 4:15; 7:9).

14. Давид израилӕгты кӕй банымадта, уый цӕмӕ ’ркодта?

¹⁴ Фӕстӕдӕр Сайтаны ардыдӕй Давид банымадта Израилы хӕстхъом адӕмы (1 Паралипоменон 21:1). Афтӕ кӕй бакодта, уымӕй бӕрӕг уыд, Хуыцауӕй раздӕрау кӕй нал тарст ӕмӕ уый аххосӕй 70 мин израиладжы амард. Кӕд Давид Хуыцауы раз ӕрфӕсмон кодта, уӕддӕр йӕхӕдӕг дӕр ӕмӕ иннӕтӕ дӕр стыр хъизӕмӕрттӕ бавзӕрстой (2 Паддзахӕдты 24:1–16).

15. Давид тӕригъӕд цӕмӕн сарӕзта?

¹⁵ Ӕндӕр хатт та Давид рӕстӕгмӕ ферох кодта, Хуыцауӕй тарсын цы у, уый, ӕмӕ Урийы ус Вирсавиимӕ тӕригъӕд сарӕзта. Давид зыдта, хӕтын кӕнӕ суанг иннӕйы усмӕ бӕллын дӕр, стыр фыдракӕнд кӕй у (Рацыд 20:14, 17). Хъуыддаг уымӕй райдыдта, ӕмӕ Вирсавийы йӕхи найгӕ федта. Хуыцауӕй куы тарстаид, уӕд хъуамӕ уайтагъд иннӕрдӕм азылдаид ӕмӕ йыл ма хъуыды кодтаид. Уый бӕсты йӕм Давид каст, цалынмӕ йӕ зӕрдӕйы монц Хуыцауы ӕфсармыл нӕ фӕтых, уӕдмӕ (Матфейы 5:28; 2 Паддзахӕдты 11:1–4). Давиды ферох, йӕ царды алы хъуыддаджы дӕр йӕ зӕрдыл Иегъовӕйы кӕй хъуамӕ дара, уый (Псалом 138:1–7).

16. Давид йӕ тӕригъӕды тыххӕй цы хъизӕмӕрттӕ бавзӕрста?

¹⁶ Давид ӕмӕ Вирсавийӕн райгуырд лӕппу. Уымӕй бирӕ нӕ рацыд, афтӕ Иегъовӕ арвыста пехуымпар Нафаны Давиды тӕригъӕд раргом кӕнынмӕ. Йӕхи куы ӕрӕмбӕрста, уӕд та Давид Хуыцауӕй раздӕрау тӕрсын райдыдта ӕмӕ йӕм фӕсмон ӕрцыд. Иегъовӕйӕн лӕгъстӕ кодта, цӕмӕй йӕ ма ныууадза кӕнӕ йӕ йӕ сыгъдӕг удӕй ӕнӕхай ма фӕкӕна (Псалом 50:9, 13). Иегъовӕ Давидӕн ныххатыр кодта ӕмӕ йӕ карзӕй нӕ бафхӕрдта, фӕлӕ йе ’взӕр хъуыддӕгтӕ цы расайдтой, уымӕй йӕ нӕ бахызта. Йӕ лӕппу амард, ӕмӕ уӕдӕй фӕстӕмӕ йӕ бинонтӕ маст ӕмӕ бӕллӕхты бын фесты. Куыд зынаргъ слӕууы, адӕймаг Хуыцауӕй кӕй нал фӕтӕрсы, уый! (2 Паддзахӕдты 12:10–14; 13:10–14; 15:14).

17. Цы хъизӕмӕрттӕм ӕркӕны ӕнӕгъдаудзинад?

¹⁷ Хуыцауӕй тӕрсын цы у, уый абон дӕр адӕймагӕй куы ферох вӕййы ӕмӕ ӕгъдаумӕ куыдфӕндыйы цӕстӕй кӕсын куы райдайы, уӕд уый ӕркӕны стыр ӕмӕ бирӕ рӕстӕг чи ахӕссы, ахӕм хъизӕмӕрттӕм. Ахъуыды ма кӕн, цы зӕрдӕрыст бавзӕрста иу ӕрыгон сылгоймаг, куы базыдта, йӕ чырыстон лӕг фӕсарӕнты куы куыста, уӕд кӕй хӕтыд, уый. Йӕ маст ӕмӕ рыстӕй йӕ цӕсгом йӕ къухтӕй бамбӕрзта ӕмӕ йӕ дзыхы дзаг ныккуыдта. Цас рӕстӕг ӕмӕ цас хъарутӕ бахъӕудзӕн йӕ лӕджы, цӕмӕй та йыл йӕ цардӕмбал ӕууӕнда ӕмӕ та йын аргъ кӕна? Адӕймаг ахӕм стыр бӕллӕхтӕй хызт уыдзӕн, Хуыцауӕй куы тӕрса, уӕд (1 Коринфӕгтӕм 6:18).

Хуыцауӕй куы тӕрсӕм, уӕд нӕ уый тӕригъӕдӕй хиздзӕн

18. Сайтанӕн йӕ нысан цы у ӕмӕ куыд архайы?

¹⁸ Ацы дунейы ӕгъдау Сайтан бонӕй-бонмӕ тынгдӕр сафы ӕмӕ йӕ уӕлдайдӕр та фӕнды ӕцӕг чырыстӕтты фехалын. Цӕмӕй йын уый бантыса, уый тыххӕй нӕ зӕрдӕтӕ ӕмӕ нӕ зондмӕ равзары цыбырдӕр фӕндаг – не ’нкъарӕнтӕ, уӕлдайдӕр та нӕ цӕстытӕ ӕмӕ нӕ хъустӕ (Ефесӕгтӕм 4:17–19). Цы сараздзынӕ, ӕнӕнхъӕлӕджы ӕнӕгъдау нывтӕ, ныхӕстӕ кӕнӕ адӕймагыл куы сӕмбӕлай, уӕд?

19. Иу чырыстон Хуыцауӕй кӕй тарст, уый руаджы йӕхи ӕнӕгъдаудзинадӕй куыд бахызта?

 ¹⁹ Ӕркӕсӕм Андрейы хабармӕ *. Уый цӕры Европӕйы, у хистӕр нӕлгоймаг, ис ын сывӕллӕттӕ ӕмӕ кусы дохтырӕй. Андре-иу ӕхсӕвы рынчындоны радгӕс куы уыд, уӕд-иу арӕх йе ’мкусӕг сылгоймӕгтӕ йӕ базыл ныууагътой фыстӕджытӕ, хуыдтой йӕ ӕмуат ӕрцӕуынмӕ. Фӕлӕ-иу сын Андре фидарӕй «нӕ» загъта. Уымӕй уӕлдай ма, цӕмӕй уыцы адӕмӕй дард уыдаид, уый тыххӕй йӕ куыст аивта. Хуыцауӕй кӕй тарст, уый зондджын ми уыд ӕмӕ йын арфӕдзинӕдтӕ ӕрхаста – абон Андре ӕххуыс кӕны йӕ бӕстӕйы Иегъовӕйы Ӕвдисӕнты филиалы.

20, 21. а) Хуыцауӕй кӕй тӕрсӕм, уый нӕ тӕригъӕд саразынӕй куыд бахиздзӕн? ӕ) Иннӕ статьяйы цӕуыл дзурдзыстӕм?

²⁰ Ӕвзӕр хъуыдытыл куы афӕстиат уӕм, уӕд нӕм ахӕм зонд ӕрцӕудзӕн, ӕмӕ Иегъовӕимӕ нӕ хӕлардзинад исты ӕнӕгъдаудзинадыл ӕнцонтӕй баивдзыстӕм (Иаковы 1:14, 15). Фӕлӕ Иегъовӕйӕ куы тӕрсӕм, уӕд нӕхи хиздзыстӕм, суанг-иу цӕугӕ дӕр акӕндзыстӕм, не ’гъдауыл ӕвзӕрырдӕм чи фӕзына, ахӕм адӕмӕй, бынӕттӕй, хъуыддӕгтӕй ӕмӕ ирхӕфсӕнтӕй (Ӕмбисӕндтӕ 22:3). Уый тыххӕй ныл худгӕ куы кӕной кӕнӕ нӕ цӕуылдӕр нӕ къух сисын куы бахъӕуа, уӕддӕр уый ницы у, Хуыцауы хорзӕх фесафынимӕ абаргӕйӕ (Матфейы 5:29, 30). Кӕй зӕгъын ӕй хъӕуы, Хуыцауӕй тӕрсын ма нысан кӕны зонгӕ-зонын ӕнӕгъдаудзинад куы нӕ аразӕм, уыимӕ хӕлд нывтӕ ӕмӕ кинотӕм куы нӕ кӕсӕм. Уый бӕсты хъуамӕ «аздахӕм нӕ цӕстытӕ, цӕмӕй ма уыной тыхстдзинад», ома ӕгад цы у, уый. Афтӕ куы кӕнӕм, уӕд нӕ ныфс уӕд, Иегъовӕ нын нӕ цард кӕй бахъахъхъӕндзӕн ӕмӕ нӕ цыдӕриддӕр ӕцӕгӕйдӕр хъӕуы, уый нын кӕй ратдзӕн (Псалом 83:12; 118:37).

²¹ Ӕцӕгӕйдӕр Хуыцауӕй тӕрсын у зонды фӕндаг. Стӕй ма ӕцӕг амонды хос дӕр у (Псалом 33:10). Ууыл бӕстондӕр дзурдзыстӕм иннӕ статьяйы.

[Фиппаинӕгтӕ]

Куыд бамбарын кӕнис?

• Хуыцауӕй тӕрсынмӕ цавӕр чырыстон миниуджытӕ хауы?

• Хуыцауӕй тӕрсын адӕймагӕй тӕрсыныл куыд фӕуӕлахиз вӕййы?

• Цӕмӕй бӕрӕг уыдзӕн, нӕ куывдтытӕм куыдфӕндыйы цӕстӕй кӕй нӕ кӕсӕм, уый?

• Хуыцауӕй кӕй тӕрсӕм, уый нӕ тӕригъӕд саразынӕй куыд хизы?

[Фарстатӕ ахуыр кӕнынӕн]

[Ныв 25 фарсыл]

Иегъовӕйы сфӕлдыстадыл хъуыды кӕнгӕйӕ, Давид ахуыр кодта Хуыцауӕй тӕрсын