Ма хъуыр-хъуыр кӕнут
Ма хъуыр-хъуыр кӕнут
«Алцыдӕр кӕнут ӕнӕ хъуыр-хъуырӕй» (ФИЛИППӔГТӔМ 2:14).
1, 2. Апостол Павел Филиппты ӕмӕ Коринфы чырыстӕттӕн цавӕр уынаффӕ радта ӕмӕ цӕмӕн?
ФЫЦЦАГ ӕнусы Филиппты чырыстон ӕмбырдмӕ апостол Павел цы фыстӕг ныффыста, уым сӕ тынг раппӕлыд. Уыцы сахары чырыстӕттӕй ӕппӕлыд, рӕдау ӕмӕ зынгзӕрдӕ кӕй уыдысты, уый тыххӕй, ӕмӕ цин кодта сӕ хорз хъуыддӕгтыл. Фӕлӕ сын уӕддӕр Павел сӕ зӕрдыл ӕрлӕууын кодта, цӕмӕй «алцыдӕр кӕной ӕнӕ хъуыр-хъуырӕй» (Филиппӕгтӕм 2:14). Апостол сын ахӕм уынаффӕ цӕмӕн радта?
2 Павел зыдта, хъуыр-хъуыр кӕнын цӕмӕ ’ркӕны, уый. Цалдӕр азы размӕ Коринфы чырыстӕтты зӕрдыл ӕрлӕууын кодта, хъуыр-хъуыр кӕнын куыд тӕссаг у. Павел сын сӕ хъус ӕрдардта, израилӕгтӕ ӕдзӕрӕг быдыры куы уыдысты, уӕд-иу Иегъовӕйы кӕй мӕсты кодтой. Цӕмӕй? Сӕ зӕрдӕ-иу ӕвзӕр хъуыддӕгтӕ кӕй агуырдта, мӕнгхуыцӕуттӕн кӕй куывтой ӕмӕ кӕй хӕтыдысты, кӕй йӕ фӕлвӕрдтой ӕмӕ кӕй хъуыр-хъуыр кодтой. Павел коринфӕгтӕм сидтис, цӕмӕй уыцы цӕвиттонтӕй ахуыр кодтаиккой. Уый ныффыста: «Хъуыр-хъуыр дӕр ма кӕнӕм, уыдонӕй чидӕртӕ куыд хъуыр-хъуыр кодтой, афтӕ – уый тыххӕй зӕды къухӕй фӕцагъдысты» (1 Коринфӕгтӕм 10:6–11, НД).
3. Абон хъуыр-хъуыр кӕныныл цӕмӕн дзурӕм?
3 Иегъовӕйӕн кӕй лӕггад кӕнӕм, уымӕ гӕсгӕ махӕн дӕр нӕ зӕрдӕйы уаг у Филиппты ӕмбырды чырыстӕтты зӕрдӕйы уаджы хуызӕн. Мах зынгзӕрдӕйӕ хорз хъуыддӕгтӕ кӕнӕм ӕмӕ кӕрӕдзи уарзӕм (Иоанны 13:34, 35). Фӕлӕ ивгъуыд заманты Хуыцауы адӕмӕй иуӕй-иутӕ кӕй хъуыр-хъуыр кодтой, ӕмӕ сын уый зиан кӕй ӕрхаста, уымӕ гӕсгӕ хъуамӕ нӕ зӕрдӕмӕ айсӕм ацы уынаффӕ: «Алцыдӕр кӕнут ӕнӕ хъуыр-хъуырӕй». Уӕдӕ уал фыццаг ӕркӕсӕм, хъуыр-хъуыр чи кодта, уыдоны цӕвиттонтӕм Библийӕ. Уый фӕстӕ та ӕрныхас кӕндзыстӕм, зианхӕссӕг хъуыр-хъуырӕй нӕ чи бахиздзӕн, цалдӕр ахӕм хъуыддагыл.
Фыдзӕрдӕ адӕм хъуыр-хъуыр кӕнынц Иегъовӕйыл
4. Куыд хъуыр-хъуыр кодтой израилӕгтӕ ӕдзӕрӕг быдыры?
4 Йӕ хъуыды «хъуыр-хъуыр кӕнын, бустӕ кӕнын кӕнӕ хъаст кӕнын» цы дзуттаг дзырдӕн у, уый Библийы ӕмбӕлы, израилӕгтӕ 40 азы дӕргъы ӕдзӕрӕг быдыры куы уыдысты, уыцы хабӕртты. Хатт-иу израилӕгтӕ сӕ цардӕй разы нӕ уыдысты, ӕмӕ-иу хъуыр-хъуыр кодтой. Зӕгъӕм, Египетӕй куы ссӕрибар сты, уымӕй цалдӕр къуыри йеддӕмӕ нӕма рацыд, афтӕ «Израилы фырттӕ Моисей ӕмӕ Аароны ныхмӕ хъуыр-хъуыр кӕнын райдыдтой». Израилӕгтӕ хъаст кодтой сӕ хӕринагӕй: «Фӕлтау Иегъовӕйы къухӕй нӕ мӕлӕт Египеты куы ссардтаиккам, дзидзайы цуайнӕгты уӕлхъус куы бадтыстӕм ӕмӕ нӕ фаг дзул куы хордтам, уымӕн ӕмӕ нӕ сымах ацы ӕдзӕрӕг быдырмӕ ӕрбакодтат, цӕмӕй ӕнӕхъӕн ӕмбырд дӕр ӕххормагӕй амарат» (Рацыд 16:1–3).
5. Израилӕгтӕ куы хъаст кодтой, уӕд ӕцӕгӕй кӕуыл хъуыр-хъуыр кодтой?
5 Афтӕмӕй та израилӕгты ӕдзӕрӕг быдыры ӕнӕмӕнг цы хъуыд, уыдӕттӕй сӕ Иегъовӕ цух нӕ уагъта, йе стыр уарзтӕй сын лӕвӕрдта хӕринаг ӕмӕ дон. Израилӕгтӕн ӕххормагӕй амӕлынӕй ӕппындӕр тӕссаг нӕ уыд. Фӕлӕ хъаст кӕнын кӕй райдыдтой, уымӕ гӕсгӕ сӕхи ныммӕгуыр кодтой ӕмӕ хъуыр-хъуыр кодтой. Кӕд хъаст Моисей ӕмӕ Ааронӕй кодтой, уӕддӕр сын сӕ ныхӕстӕ Иегъовӕ йӕхимӕ иста. Моисей израилӕгтӕн загъта: «Иегъовӕ фехъуыста, кӕй йыл хъуыр-хъуыр кӕнут. Ӕмӕ мах чи стӕм? Сымах махыл нӕ хъуыр-хъуыр кӕнут, фӕлӕ Иегъовӕйыл» (Рацыд 16:4–8).
6, 7. Нымӕцты 14:1–3 куыд фыст ис, афтӕмӕй израилӕгты зӕрдӕйы уаг куыд аивта?
6 Уымӕй бирӕ нӕ рацыд, ӕмӕ та израилӕгтӕ ногӕй хъуыр-хъуыр кӕнын райдыдтой. Моисей 12 сгарӕджы арвыста Зӕрдӕвӕрд зӕхмӕ. Куы ӕрыздӕхтысты, уӕд дзы дӕс хорзӕй ницы загътой. Уый цӕмӕ ’ркодта? «Израилы фырттӕ иууылдӕр Моисей ӕмӕ Аароныл хъуыр-хъуыр кӕнын райдыдтой ӕмӕ сын ӕппӕт ӕхсӕнад дӕр райдыдта дзурын: „Фӕлтау Египеты кӕнӕ ацы ӕдзӕрӕг быдыры куы амардаиккам! Иегъовӕ нӕ ацы зӕхмӕ [Ханаанмӕ] цӕмӕ ӕрбакодта, нӕ мӕлӕт кардӕй кӕм ссардзыстӕм, уырдӕм? Нӕ устытӕ ӕмӕ нӕ сывӕллӕттӕ сӕ амӕттаг фӕуыдзысты. Хуыздӕр нӕ уаид Египетмӕ аздӕхын?“» (Нымӕцтӕ 14:1–3).
7 Куыд тынг аивта израилӕгты зӕрдӕйы уаг! Райдианы Иегъовӕйӕ бузныг уыдысты, Египетӕй сӕ кӕй ссӕрибар кодта ӕмӕ сӕ Сырх денджызы астӕуты кӕй ахизын кодта ӕмӕ йӕ кадӕн зарыдысты (Рацыд 15:1–21). Фӕлӕ ӕдзӕрӕг быдыры ӕнцон цӕрӕн кӕй нӕ уыд, стӕй ханаайнӕгтӕй кӕй фӕтарстысты, уымӕ гӕсгӕ бузныджы бӕсты хъаст кӕнын райдыдтой. Израилӕгтӕ сӕ сӕрибардзинады тыххӕй Хуыцауӕй бузныг нал уыдысты, фӕлӕ йӕ ӕлгъыстой, уымӕн ӕмӕ сӕм афтӕ каст, ӕмӕ цӕмӕйдӕрты цух ӕййӕфтой. Сӕ хъуыр-хъуырӕй бӕрӕг уыд, Иегъовӕ сын цы лӕвӕрдта, уымӕн ӕппындӕр кӕй нӕ аргъ кодтой. Уӕдӕ диссаг нӕу, Иегъовӕ кӕй загъта: «Ацы фыдзӕрдӕ адӕм мыл кӕдмӕ хъуыр-хъуыр кӕндзысты?» (Нымӕцтӕ 14:27; 21:5).
Хъуыр-хъуыр кодтой фыццаг ӕнусы
8, 9. Ӕрхӕсс, Чырыстон Грекъаг Фыстыты хъуыр-хъуыр кӕныны тыххӕй цы цӕвиттонтӕ ис, уыдонӕй иуӕй-иутӕ.
8 Уӕлдӕр цы адӕмы кой кодтам, уыдон-иу, ӕвӕццӕгӕн, хъаст кодтой ӕргом. Фӕлӕ н. э. 32 азы Халагъудты бӕрӕгбоны Йесо Чырысти Иерусалимы куы уыд, уӕд дзы «адӕм сусӕгӕй кодтой алы ныхас» (Иоанны 7:12, НТ, 13, 32). Уыдон сусу-бусу кодтой, ӕмӕ йӕ иутӕ хуыдтой хорз, иннӕтӕ та – ӕвзӕр.
9 Иннӕ хатт та Йесо ӕмӕ йӕ ахуыргӕнинӕгтӕ уазӕгуаты уыдысты хъалонисӕг Левийы, ома Матфейы хӕдзары. «Фарисейтӕ ӕмӕ динамонджытӕ хъуыр-хъуыр кодтой ӕмӕ Йесойы ахуыргӕнинӕгтӕн дзырдтой: „Хъалонисджытимӕ ӕмӕ тӕригъӕдджынтимӕ цӕмӕн хӕрут ӕмӕ нуазут?“» (Лукайы 5:27–30, НТ). Иу цасдӕры фӕстӕ Галилейы «иудейтӕ [Йесойыл] схъуыр-хъуыр кодтой, Уый афтӕ кӕй загъта: „Ӕз дӕн уӕларвӕй ӕрцӕуӕг дзул“». Суанг ма Йесойӕн йӕ фӕдылдзӕуджытӕй дӕр кӕмӕдӕрты йӕ ныхӕстӕ хъыг фӕкастысты ӕмӕ райдыдтой хъуыр-хъуыр кӕнын (Иоанны 6:41, 60, 61).
10, 11. Грекъаг ӕвзагыл дзурӕг дзуттӕгтӕ цӕмӕн хъуыр-хъуыр кодтой ӕмӕ хъуыддаг куыд аскъуыддзаг ис, уымӕй хистӕр нӕлгоймӕгтӕ цӕуыл ахуыр кӕнынц?
10 Ӕндӕр хатт та, н. э. 33 азы Фӕндзайӕм бонӕй гыццыл фӕстӕдӕр, адӕм куы хъуыр-хъуыр кодтой, уӕд хъуыддаг рауад бирӕ хуыздӕр. Ӕндӕрбӕстӕгтӕй чырыстон дин ӕрӕджы чи райста, уыдон рӕвдыд уыдысты се ’муырнджыты уазӕгуарзондзинадӕй Иудейы. Фӕлӕ сӕм цы уыд, уый уаргӕйӕ хабар хорз нӕ рауад. Библи дзуры: «Грекъагау чи дзырдта, уыцы дзуттӕгтӕ хъуыр-хъуыр кӕнын райдыдтой, дзуттагау чи дзырдта, уыцы дзуттӕгтыл, алы бон-иу хӕринаг куы уӕрстой, уӕд-иу сын сӕ идӕдзтӕм сӕ хъус кӕй не ’рдардтой, уый тыххӕй» (Куыстытӕ 6:1, НД).
11 Уыцы хъуырхъуыргӕнджытӕ, ӕдзӕрӕг быдыры чи уыд, уыцы израилӕгты хуызӕн нӕ уыдысты. Грекъаг ӕвзагыл дзурӕг дзуттӕгтӕ хиуарзон нӕ уыдысты ӕмӕ сӕ цардӕй нӕ хъаст кодтой. Уыдон тыхстысты, иуӕй-иу идӕдзтӕ хъуаг кӕй ӕййӕфтой, ууыл. Уымӕй уӕлдай адӕмы дӕр не змӕстой ӕмӕ Иегъовӕйы ныхмӕ нӕ дзырдтой. Сӕ хъаст бахастой апостолтӕм. Уыдон хъуыддаг уайтагъд банывыл кодтой, уымӕн ӕмӕ сӕ хъаст ӕнӕхъуаджы нӕ уыд. Цӕй хорз цӕвиттон ныууагътой апостолтӕ абоны хистӕр нӕлгоймӕгтӕн! Уыцы чырыстон фыййӕуттӕ сӕ хъустӕ не ’хгӕнынц, мӕгуыр адӕймаджы хъастӕй (Ӕмбисӕндтӕ 21:13; Куыстытӕ 6:2–6).
Дӕхи хиз хъуыр-хъуыр кӕныны зианхӕссӕг ӕндӕвдадӕй
12, 13. а) Хъуыр-хъуыр кӕнын куыд ӕндавы, уымӕн цӕстуынгӕ цӕвиттон ӕрхӕсс. ӕ) Адӕймаг цӕмӕн райдайы хъуыр-хъуыр кӕнын?
12 Цы цӕвиттонтӕм ӕркастыстӕм, уыдонӕн сӕ фылдӕрӕй бӕрӕг у, раздӕры заманты-иу Хуыцауы адӕмӕн хъуыр-хъуыр кӕнын стыр зиан кӕй ӕрхаста. Уымӕ гӕсгӕ хъуамӕ лӕмбынӕг ахъуыды кӕнӕм, уымӕн абон цавӕр зианхӕссӕг ӕндӕвдад ис, ууыл. Ам нын баххуыс кӕндзӕн иу цӕстуынгӕ цӕвиттон. Ӕфсӕйнаг згӕ кӕнаг у. Згӕ йыл куы фӕхӕца ӕмӕ йӕ куы ницӕмӕ ӕрдарой, уӕд афтӕ сызгӕ уыдзӕн, ӕмӕ ӕппындӕр нал сбӕздзӕн. Тынг бирӕ машинӕтӕ ӕппаринаг фӕвӕййынц, цыдӕр дзы кӕй фехӕлы, уый тыххӕй нӕ, фӕлӕ сӕ згӕ кӕй бахӕры ӕмӕ сыл цӕуын тӕссаг кӕй вӕййы, уый тыххӕй. Ацы цӕстуынгӕ цӕвиттон хъуыр-хъуыр кӕнынмӕ куыд ис ахӕссӕн?
13 Ӕфсӕйнаг куыд ӕнцонтӕй згӕ кӕны, раст афтӕ ӕнӕххӕст адӕм та ӕмхиц сты хъаст кӕнынмӕ. Уымӕ гӕсгӕ хъуамӕ къӕрцхъус уӕм, цӕмӕй-иу уыцы миниуӕг уайтагъд раиртасӕм. Ӕфсӕйнаг уымӕл уӕлдӕф ӕмӕ цӕххӕй тынгдӕр куыд згӕ кӕны, афтӕ мах та хъуыр-хъуыр кӕнын райдайӕм бӕллӕхты аххосӕй. Зындзинӕдтӕ гыццыл мастӕй дӕр стыр хӕрам рауайын кӕнынц. Ацы цардӕвӕрды фӕстаг бонты уавӕртӕ фыддӕр кӕнынц ӕмӕ адӕймаг, ӕвӕццӕгӕн, фылдӕр цӕмӕйдӕрты хъаст кӕндзӕн (2 Тимофеймӕ 3:1–5). Уӕдӕ Хуыцауы лӕггадгӕнджытӕй дӕр, чи зоны, иу иннӕйыл хъуыр-хъуыр кӕнын райдайа. Уымӕн йӕ аххосаг гӕнӕн ис, ӕмӕ стыр хъуыддаг ма уа: искӕмӕ мӕсты кӕна йӕ лӕмӕгъдзинӕдтӕ, йӕ курдиӕттӕ, йе та йын йӕ бӕрны фылдӕр хӕстӕ кӕй бакодтой кӕнӕ хъусын кӕныны хъуыддаджы ӕнтыстджын кӕй у, уый тыххӕй.
14, 15. Хъаст кӕнынӕй нӕхи цӕмӕн хъуамӕ уромӕм?
14 Цӕуылфӕнды ма мӕсты кӕнӕм, хъаст кӕнынӕй нӕхи куы нӕ уромӕм, уӕд алцӕмӕ дӕр фаутӕ хӕсдзыстӕм ӕмӕ хъуыр-хъуыр кӕнын сахуыр уыдзыстӕм. О, хъуыр-хъуыр кӕнын уырнындзинадӕн зиан кӕй хӕссы, уымӕ гӕсгӕ нӕ гӕнӕн ис бынтондӕр фесафа. Израилӕгтӕ ӕдзӕрӕг быдыры сӕ цардӕй хъаст кӕнын куы райдыдтой, уӕд уый онг ӕрцыдысты, ӕмӕ ма Иегъовӕйы дӕр ӕфхӕрын райдыдтой (Рацыд 16:8). Макуы ныл ӕрцӕуӕд ахӕм хабар!
15 Ӕфсӕйнаг къаддӕр фезгӕ кӕны, згӕ кӕнын чи нӕ уадзы, ахӕм ахорӕнӕй йӕ куы сахорынц, ӕмӕ йыл цы згӕйы тӕппытӕ фӕзыны, уыдон уайтагъд куы асыгъдӕг кӕнынц, уӕд. Афтӕ мах дӕр куы бафиппайӕм, ӕмӕ хъаст кӕнын райдыдтам, уӕд ӕвӕстиатӕй архайӕм ӕмӕ кувӕм, цӕмӕй нӕ бон нӕхи уромын уа. Куыд?
Алцӕмӕ дӕр Иегъовӕйы цӕстӕй кӕс
16. Кӕд хъаст кӕнынмӕ ӕмхиц стӕм, уӕд уыцы ахуырӕй куыд фервӕзӕм?
16 Хъуыр-хъуыр куы фӕкӕнӕм, уӕд фӕхъуыды кӕнӕм ӕрмӕст нӕхиуыл, цӕмӕй фӕлмӕцӕм ӕмӕ цӕмӕй тыхсӕм, уыдӕттыл, ӕмӕ Иегъовӕйы Ӕвдисӕнтӕ кӕй стӕм, уый фӕрцы нын цы арфӕдзинӕдтӕ ис, уыдон нӕ айрох вӕййынц. Кӕд хъаст кӕнынмӕ ӕмхиц стӕм ӕмӕ нӕ уыцы ахуырӕй фервӕзын фӕнды, уӕд хъуамӕ фыццаджыдӕр нӕ зӕрдыл дарӕм Хуыцауы арфӕдзинӕдтӕ. Зӕгъӕм, алчидӕр нӕ хӕссы Иегъовӕйы ном – уый та у стыр кад (Исай 43:10). Нӕ бон у Иегъовӕмӕ ӕввахс кӕнын ӕмӕ йӕм кӕдфӕнды дӕр кувын (Псалом 64:3; Иаковы 4:8). Нӕ цардӕн ис мидис, уымӕн ӕмӕ мах ӕмбарӕм хицаудзинады фӕдыл дзырддаг фарст ӕмӕ нӕ зӕрдыл дарӕм, ахӕм кад нӕм кӕй ӕрхауд, цӕмӕй Хуыцауыл нӕ иузӕрдиондзинад ӕвдисӕм (Ӕмбисӕндтӕ 27:11). Иудадзыг Хуыцауы Паддзахады тыххӕй хорз хабар хъусын кӕнӕм (Матфейы 24:14). Йесо Чырыстийы ӕлхӕнӕг нывондыл кӕй ӕууӕндӕм, уый фӕрцы Хуыцауы раз нӕ цӕсгом у сыгъдӕг (Иоанны 3:16). Кӕд цыфӕнды зындзинӕдтӕ ӕвзарӕм, уӕддӕр ацы арфӕдзинӕдтӕ уый аргъ сты.
17. Кӕд нӕ хъаст дзӕгъӕлы нӕу, уӕддӕр алцӕмӕ дӕр Иегъовӕйы цӕстӕй цӕмӕн хъуамӕ кӕсӕм?
17 Цӕй уӕдӕ алцӕмӕ дӕр нӕхи цӕстӕй нӕ, фӕлӕ Иегъовӕйы цӕстӕй кӕсӕм. «Бацамон мын, Хицау, Дӕ фӕндӕгтӕ, ӕмӕ сахуыр кӕн мӕн Дӕ цӕуӕнтыл»,– зарыд псаломзарӕггӕнӕг Давид (Псалом 24:4). Нӕ хъаст кӕд дзӕгъӕлы нӕу, уӕд ӕй Иегъовӕ дӕр зоны. Йӕ бон у, ӕмӕ уавӕр уайтагъд фӕива. Уӕдӕ уӕд цӕмӕн бауадзы, ӕмӕ нӕ зындзинӕдтӕ бирӕ рӕстӕг ахӕссой? Цӕмӕй нын баххуыс кӕна бакусын хорз миниуджытыл, зӕгъӕм, фӕразондзинад, фидардзинад, уырнындзинад ӕмӕ бирӕфӕразондзинадыл (Иаковы 1:2–4).
18, 19. Зын уавӕры бахаугӕйӕ куы нӕ хъаст кӕнӕм, уӕд уый адӕмыл куыд бандавы?
18 Зын уавӕры бахаугӕйӕ куы нӕ хъаст кӕнӕм, уӕд нын уый ӕрмӕст нӕ удыхъӕд хуыздӕр кӕнынӕн не ’ххуыс кӕны, фӕлӕ ма нӕм чи кӕсы, уыдоныл дӕр бандавы. 2003 азы Иегъовӕйы Ӕвдисӕнтӕй иу къорд Германӕй автобусыл цыдысты Венгримӕ конгресмӕ. Шофыр Иегъовӕйы Ӕвдисӕн нӕ уыд, ӕмӕ семӕ дӕс боны уыдаид, уый йӕ нӕ фӕндыд. Фӕлӕ балцы кӕрон йӕ хъуыды цӕхгӕр фӕивта. Цӕмӕн?
19 Фӕндагыл алцы хорз нӕ уыд. Фӕлӕ Ӕвдисӕнтӕ иу хъуыр-хъуыр дӕр не скодтой. Шофыр загъта, ахӕм хорз бӕлццӕтты кӕй никуы ма ласта! Суанг ма афтӕ дӕр загъта, зӕгъгӕ, дам мӕм иннӕ хатт Иегъовӕйы Ӕвдисӕнтӕ куы ӕрбацӕуой, уӕд сӕ мидӕмӕ бахондзынӕн ӕмӕ сӕм лӕмбынӕг байхъусдзынӕн. Бӕлццӕттӕ «алцыдӕр ӕнӕ хъуыр-хъуырӕй» кӕй кодтой, уый йыл куыд тынг бандӕвта!
Хатыр кӕнын ӕххуыс у иудзинадӕн
20. Кӕрӕдзийӕн цӕмӕн хъуамӕ хатыр кӕнӕм?
20 Куыд бакӕнӕм, не ’муырнӕгыл нӕм исты хъаст куы уа, уӕд? Кӕд уый стыр хъуыддаджы тыххӕй у, уӕд хъуамӕ спайда кӕнӕм, Йесо цы уагӕвӕрд радта, уымӕй. Фыст ис Матфейы 18:15–17. Фӕлӕ нӕ уый сӕр алы хатт нӕ бахъӕуы, уымӕн ӕмӕ хъӕстытӕн сӕ фылдӕр стыр хъуыддӕгты фӕдыл нӕ вӕййынц. Ахӕм уавӕры хорз нӕ уаид ныххатыр кӕнын? Павел фыста: «Кӕд-иу уӕ иу иннӕмӕ истӕуыл хӕрам уа, уӕд-иу ын ныббарӕд ӕмӕ-иу ын зӕрдӕйӕ ныххатыр кӕнӕд. Иегъовӕ уын зӕрдӕйӕ куыд ныххатыр кодта, сымах дӕр кӕрӕдзийӕн афтӕ хатыр кӕнут. Фӕлӕ ма уӕм уымӕй уӕлдай уӕд уарзондзинад, уымӕн ӕмӕ адӕмы уый хуызӕн ницы иу кӕны ӕмӕ кӕрӕдзийыл ницы бӕтты» (Колоссӕгтӕм 3:13, 14, НД). Хатыр кӕнынӕн нӕ зӕрдӕйы бынат ис? Иегъовӕ нӕ цӕмӕй рахъаст кӕна, уый йын нӕй? Ис, фӕлӕ нын уый уӕддӕр фӕтӕригъӕд кӕны ӕмӕ нын ныххатыр кӕны.
21. Искӕй хъуыр-хъуырмӕ чи хъусы, уыдоныл уый куыд бандавы?
21 Цӕмӕйфӕнды куы хъаст кӕнӕм, уӕддӕр хъуыр-хъуырӕй хъуыддаг нӕ сырӕздзӕн. Йӕ нысан «хъуыр-хъуыр кӕнын» цы дзуттаг дзырдӕн у, уый ма нысан кӕны «бустӕ кӕнын» дӕр. Ӕвӕццӕгӕн, ӕмӕ ӕдзух хъуыр-хъуыр чи кӕны, ахӕм адӕймаджы цур фӕтыхсӕм, ӕмӕ дзы нӕхи дард фӕласӕм. Нӕхӕдӕг куы хъуыр-хъуыр кӕнӕм кӕнӕ куы бустӕ кӕнӕм, уӕд нӕм чи хъуса, уыдон дӕр сӕхи афтӕ хатдзысты: нӕ цуры тыхсдзысты, ӕмӕ нӕм хӕстӕг нал цӕудзысты! Искӕй бустӕм, чи зоны, исчи йӕ хъус ӕрдара, фӕлӕ уымӕй никӕй зӕрдӕ ссардзӕн.
22. Иу чызг Иегъовӕйы Ӕвдисӕнты тыххӕй цы загъта?
22 Хатыр кӕнын ӕххуыс у иудзинадӕн – уымӕн Иегъовӕйы адӕм тынг аргъ кӕнынц (Псалом 132:1–3). Европӕйы бӕстӕтӕй иуы, католикон диныл хӕст 17-аздзыд чызг Иегъовӕйы Ӕвдисӕнты филиалмӕ ныффыста, Ӕвдисӕнтӕ йӕ зӕрдӕмӕ тынг кӕй фӕцыдысты, уый тыххӕй. Уый загъта: «Ӕз ӕй зонын, адӕм ӕрмӕстдӕр уӕ организацийы нӕ дихтӕ кӕнынц ӕнӕуынондзинад, кӕрӕфдзинад, фыдӕхдзинад ӕмӕ хиуарзондзинады фыдӕй ӕмӕ иууылдӕр иу хъуыдыйыл хӕст сты».
23. Иннӕ статьяйы дзырд цӕуыл цӕудзӕн?
23 Ӕцӕг Хуыцау Иегъовӕйы лӕггадгӕнджытӕ кӕй стӕм, уымӕ гӕсгӕ нын цы стыр арфӕдзинӕдтӕ ис, уыдонӕн куы аргъ кӕнӕм, уӕд уый ӕххуыс кӕндзӕн нӕ иудзинадӕн ӕмӕ иннӕтыл нӕ хъуыр-хъуыр кӕндзыстӕм. Иннӕ статьяйӕ мах фендзыстӕм, Хуыцауы миниуджытӕ нӕ куыд бахъахъхъӕндзысты, цӕмӕй нӕхи хизӕм хъуыр-хъуыр кӕныны ноджы тӕссагдӕр хуызӕй – Иегъовӕйы организацийыл хъуыр-хъуыр кӕнынӕй.
Бахъуыды кодтай?
• Хъуыр-хъуыр кӕнын цы у?
• Цӕстуынгӕ цӕвиттон ӕрхӕсс, хъуыр-хъуыр кӕнын куыд ӕндавы, уымӕн.
• Цы нын баххуыс кӕндзӕн, цӕмӕй нӕхи хъуыр-хъуыр кӕнынӕй уромӕм?
• Хатыр кӕнынмӕ цӕттӕ куы уӕм, уӕд нӕ уый хъуыр-хъуыр кӕнынӕй куыд хиздзӕн?
[Фарстатӕ ахуыр кӕнынӕн]
[Ныв 7 фарсыл]
Израилӕгтӕ хъуыр-хъуыр кодтой Иегъовӕйыл!
[Ныв 9 фарсыл]
Алцӕмӕ дӕр Иегъовӕйы цӕстӕй кӕсыс?
