ХЪӔЗДЫГ адӕймаг гӕнӕн ис, ӕмӕ зӕгъа: «Нӕ фырттӕ уӕнт зайаг халсарау сӕ сывӕллон афон; ӕмӕ нӕ чызджытӕ уӕнт дзӕбӕх арӕзт хӕдзары цӕджындзтау. Нӕ хордонтӕ дзаг уӕнт... нӕ фыстӕ уадз ӕмӕ цӕуӕнт мингай». Уымӕй уӕлдай ма хъӕздыг адӕймаг зӕгъдзӕн: «Тӕхудиаг сты уыцы адӕм, адӕттӕ кӕмӕн ис!». Фӕлӕ псаломзарӕггӕнӕг та зӕгъы: «Тӕхудиаг сты уыцы адӕм, сӕ Хуыцау Иегъовӕ кӕмӕн у!» (Псалом 143:12–15, МГТ). Уӕдӕ ӕндӕр куыд хъуамӕ уа! Иегъовӕ у амондджын Хуыцау ӕмӕ йын чи кувы, уыдон дӕр сты амондӕй ӕфсӕст (1 Тимофеймӕ 1:11). Уый бӕрӕг у Хуыцауы сыгъдӕг удӕй фыст зарджыты фӕстаг хайӕ, уыдон сты 106–150 псаломтӕ.

Псаломты чиныджы 5 хайы ма дзырд цӕуы Иегъовӕйы диссаджы миниуджытыл, уыимӕ йе ’нувыд уарзт, йӕ ӕцӕгад ӕмӕ йӕ хорздзинадыл. Хуыцауы цас хуыздӕр зонӕм, уыйас ӕй тынгдӕр уарзӕм ӕмӕ дзы тӕрсӕм. Афтӕмӕй та кӕнӕм амондджындӕр. Цӕй диссаджы хабар ис Псаломты чиныджы 5 хайы! (Дзуттытӕм 4:12).

АМОНДДЖЫН ИЕГЪОВӔЙЫ ӔНУВЫД УАРЗТӔЙ

(Псалом 106:1–118:176)

«Уадз стауӕнт Хицауы Йӕ хорзӕх ӕмӕ Йӕ диссаг хъуыддӕгты тыххӕй адӕймӕгты фырттӕн!»– зарынц, Вавилоны уацарӕй чи ссӕрибар, уыцы иудейтӕ (Псалом 106:8, 15, 21, 31). Давид Хуыцауы кадджын кӕны: «Ӕврӕгъты онг [у] Дӕ ӕцӕгад» (Псалом 107:5). Йӕ фӕстӕ цы зарӕг ис, уым та кувы: «Баххуыс кӕн мӕнӕн, Хицау, Мӕ Хуыцау; фервӕзын кӕн мӕн Дӕ хорзӕхмӕ гӕсгӕ» (Псалом 108:18, 19, 26). 109 псалом у пехуымпарад Мессийӕйы хицаудзинады тыххӕй. «Зонды райдайӕн – Хицауы тасдзинад»,– дзуры Псалом 110:10. Иннӕ псаломы та кӕсӕм: «Тӕхудиаг у, Хицауӕй чи тӕрсы, уыцы лӕг» (Псалом 111:1, МГТ).

112–117 псаломтӕ хонынц аллилуияйы псаломтӕ, уымӕн ӕмӕ дзы арӕх ӕмбӕлы дзырд «аллилуия» кӕнӕ «кадджын кӕнут Иагъы!». Мишнайы, н. э. ӕртыккаг ӕнусы рагон дзыхӕйдзургӕ ӕгъдӕуттӕ фыст цы куысты ӕрцыдысты, уым куыд фыст ис, афтӕмӕй иудейтӕ ацы зарджытӕ зарыдысты Куадзӕны ӕмӕ сын афӕдзы мидӕг цы ӕртӕ бӕрӕгбоны уыд, уыдоны рӕстӕджы. Ӕппӕты даргъдӕр псалом ӕмӕ ӕппӕты даргъдӕр сӕр Библийы у 118 псалом. Уый бӕрзонд кӕны, Иегъовӕ кӕй раргом кодта, уыцы ныхас кӕнӕ хабар.

Фарстытӕн дзуаппытӕ:

108:23 – Давиды цы зӕгъын фӕндыд ацы ныхӕстӕй: «Ӕз сӕфын, куыд фӕкъулуӕвӕг аууон»? Давид аив ныхасӕй загъта, йӕ мӕлӕт кӕй ӕрхӕстӕг кӕны, уый кӕй ӕмбары (Псалом 101:12).

109:1, 2 – «[Давиды] Хицау», Йесо Чырысти, цы арӕзта, Хуыцауы рахиз фарс куы бадти, уӕд? Йесо Чырысти куы райгас, уӕд уый фӕстӕ аздӕхт уӕлӕрвтӕм ӕмӕ Хуыцауы рахиз фарс ӕнхъӕлмӕ каст, цалынмӕ 1914 азы Паддзах не сси, уӕдмӕ. Уыцы рӕстӕджы Йесойӕн йӕ дӕлбар уыдысты йӕ сӕрст фӕдылдзӕуджытӕ. Уый сын разамынд лӕвӕрдта хъусын кӕныны ӕмӕ ахуыргӕнинӕгтӕ цӕттӕ кӕныны хъуыддаджы, стӕй ма сӕ цӕттӕ кодта йемӕ йӕ Паддзахады хицауиуӕг кӕнынмӕ (Матфейы 24:14; 28:18–20; Лукайы 22:28–30).

109:4 – Иегъовӕ цавӕр сомыйыл нӕ фӕфӕсмон кӕндзӕн? Ацы сомы у Иегъовӕйы бадзырд Йесо Чырыстиимӕ, Паддзах  ӕмӕ Хистӕр сауджынӕй кӕй лӕггад кӕндзӕн, уый фӕдыл (Лукайы 22:29).

112:3 – Иегъовӕйы ном «хурыскӕсӕнӕй ныгуылӕны онг» кадджынгонд куыд цӕуы? Уый афтӕ нӕу, ӕмӕ ӕрмӕст къорд адӕймаджы лӕггад кӕнынц Хуыцауӕн алы бон дӕр. Хур скӕсӕны куы скӕсы ӕмӕ цалынмӕ ныгуылӕны нӕ фӕкъул вӕййы, уӕдмӕ йӕ тынтӕ ӕгас зӕххы къори дӕр фӕрухс кӕнынц. Афтӕ Иегъовӕ дӕр кадджынгонд цӕуы ӕгас зӕххыл. Уымӕн та ӕнӕ ӕмвӕнд-ӕмзонд архайдӕй гӕнӕн нӕй. Мах, Иегъовӕйы Ӕвдисӕнтӕ, тынг аргъ кӕнӕм, ахӕм кад нӕм кӕй ӕрхауд, цӕмӕй Хуыцауы кадджын кӕнӕм ӕмӕ йӕ Паддзахады тыххӕй зынгзӕрдӕйӕ хъусын кӕнӕм.

115:6 – Иегъовӕйы цӕсты йӕ иузӕрдион адӕймӕгты мӕлӕт зынаргъ куыд у? Иегъовӕйӕн йӕ лӕггадгӕнджытӕ афтӕ зынаргъ сты, ӕмӕ нӕ бауадздзӕн, цӕмӕй иууылдӕр зӕххы цъарӕй фесӕфой. Иегъовӕ уый куы бауадзид, уӕд уый ууыл дзурӕг уаид, ӕмӕ йе знӕгтӕ йӕхицӕй бирӕ тыхджындӕр сты. Уымӕй уӕлдай уӕд ног дунейӕн бындартӕ нал баззаид.

118:71 – Тухӕн кӕныны хорзӕй цы ис? Зындзинӕдтӕ нӕ ахуыр кӕнынц, цӕмӕй нӕ ныфс Иегъовӕйыл тынгдӕр дарӕм, ноджы зӕрдиагдӕрӕй йӕм кувӕм, Библи лӕмбынӕгдӕр ахуыр кӕнӕм ӕмӕ дзы цы фыст ис, уымӕ гӕсгӕ архайӕм. Уымӕй уӕлдай ма зындзинӕдты рабӕрӕг вӕййынц, сраст кӕнын нӕ цы хъӕуы, уыцы миниуджытӕ. Зындзинад нӕ не стызмӕг кӕндзӕн, нӕхи йын хуыздӕр кӕнын куы уадзӕм, уӕд.

118:96 – Цы нысан кӕны «кӕрон алкӕцы ӕххӕстдзинадӕн»? Псаломзарӕггӕнӕг ӕххӕстдзинады тыххӕй дзуры адӕймаджы цӕстӕй кӕсгӕйӕ. Ӕвӕццӕгӕн ӕй уый зӕгъын фӕндыд, ӕмӕ адӕймаг, ӕххӕстдзинад цы у, уый кӕронмӕ не ’мбары. Фӕлӕ Хуыцауы фӕдзӕхстӕй уый зӕгъӕн нӕй. Уый нын разамынд дӕтты царды цыфӕнды хъуыддаджы дӕр.

118:164 – Цӕуыл дзурӕг у Хуыцауы «авд хатты бон стауын»? Нымӕц авд арӕх фӕамоны ӕххӕстдзинадмӕ. Уӕдӕ псаломзарӕггӕнӕг дзуры, Иегъовӕ кӕй у ӕппӕт кады аккаг дӕр.

Зондзонӕнтӕ махӕн:

106:27–31. Дунейы зонд фесӕфдзӕн, Армагеддон куы райдайа, уӕд (Раргомад 16:14, 16). Зонд сӕфтӕй никӕй бахъахъхъӕндзӕн. Иегъовӕмӕ ирвӕзындзинадмӕ чи ӕнхъӕлмӕ кӕсы, ӕрмӕстдӕр уыдон цӕрдзысты, цӕмӕй йын арфӕ кӕной йӕ хорзӕхы тыххӕй.

108:30, 31; 109:5. Ӕфсӕддон рахиз къухӕй фӕхӕцы кардыл, галиу къухӕй та – уартыл, ӕмӕ уымӕ гӕсгӕ рахизырдыгӕй хъахъхъӕд нӕ вӕййы. Ахӕсгӕ хуызы, Иегъовӕ лӕууы йӕ лӕггадгӕнджыты «рахиз фарс», цӕмӕй сӕ сӕрыл тох кӕна. Афтӕмӕй сӕ хъахъхъӕны ӕмӕ сын ӕххуыс кӕны. Уӕдӕ йӕ куыннӕ хъуамӕ стауӕм хъӕрӕй!

112:4–9. Иегъовӕ афтӕ бӕрзонд у, ӕмӕ суанг арвмӕ ӕркӕсыны тыххӕй дӕр хъуамӕ гуыбыр ӕркӕна. Фӕлӕ уый тӕригъӕд кӕны ӕфхӕрд ӕмӕ мӕгуыр адӕймагӕн ӕмӕ ӕнӕзӕнӕг сылгоймагӕн. Дунедарӕг Иегъовӕ у сӕрныллӕг ӕмӕ йӕ фӕнды, цӕмӕй йӕ лӕггадгӕнджытӕ дӕр йӕхи хуызӕн уой (Иаковы 4:6).

113:3–7. Иегъовӕ йӕ адӕмы сӕраппонд Сырх денджыз, Иорданы цӕугӕдон ӕмӕ Синайы хохы цур цы диссаджы хъуыддӕгтӕ сарӕзта, уыдон ныл хъуамӕ тынг ӕндавой. Адӕм – «зӕхх» – хъуамӕ табу кӕной Хицауӕн, ома ахӕсгӕ хуызы «ризой» Хуыцауы раз.

118:97–101. Хуыцауы Ныхасы зонд ӕмӕ ӕмбарындзинад куы агурӕм, уӕд нӕхи хиздзыстӕм, уырнындзинадӕн зиан чи хӕссы, ахӕм хъуыддӕгтӕй.

118:105. Хуыцауы Ныхас нӕ къахӕн рухсгӕнӕн уыцы хуызы у, ӕмӕ нын ӕххуыс кӕны зындзинӕдты сӕрты хизынӕн. Уый ма нын, зӕгъӕн ис, рухс кӕны нӕ къахвӕд [«фӕндаг», МГТ] дӕр, уымӕн ӕмӕ нын развӕлгъау дзуры, Хуыцаумӕ фидӕны тыххӕй цы фӕнд ис.

АМОНДДЖЫН ЗЫНДЗИНӔДТЫЛ ӔМБӔЛГӔЙӔ ДӔР

(Псалом 119:1–144:21)

Фӕлварӕнтӕм цы цӕстӕй хъуамӕ кӕсӕм ӕмӕ зындзинӕдтӕй нӕхи куыд хъуамӕ хизӕм? Уымӕн нын 119–133 псаломтӕ дӕттынц бӕлвырд дзуапп. Иегъовӕйӕ ӕххуыс куы курӕм, уӕд зындзинӕдтӕн фӕраздзыстӕм  ӕмӕ нӕ циндзинад нӕ сафдзыстӕм. Ацы псаломтӕ хуыйнынц хӕрдмӕцыды зарджытӕ. Израилӕгтӕ-иу сӕ, ӕвӕццӕгӕн, зарыдысты, Иерусалим цы хохыл уыд, уырдӕм-иу ӕрвылазон бӕрӕгбӕттӕм куы цыдысты, уӕд.

134 ӕмӕ 135 псаломты уынӕм, къухӕй конд ӕнӕбон хуыцӕуттӕй уӕлдай Иегъовӕ кӕй аразы, цы йӕ бафӕнды, уый. 135 псалом арӕзт у афтӕ: алы стихы фыццаг хайӕн дӕр дзуаппӕн зарын хъӕуы стихы фӕстаг хай. Иннӕ псаломы дзырд цӕуы, Иегъовӕйӕн Сионы лӕггад кӕнын кӕй фӕндыд, уыцы иудейтӕ Вавилоны куы уыдысты, уӕд куыд зӕрдӕсаст уыдысты, уый тыххӕй. 137–144 псаломтӕ ныффыста Давид. Уый фӕндыд Иегъовӕйы «кадджын кӕнын... ӕппӕт зӕрдӕйӕ». Цӕмӕн? «Уымӕн ӕмӕ ӕз диссаджы арӕзт дӕн»,– дзуры Давид (Псалом 137:1; 138:14). Псаломты 139–143 Давид кувы, цӕмӕй йӕ Хуыцау фыдзӕрдӕ адӕмӕй бахиза, раст тӕрхон кӕна, йе ’фхӕрджытӕй йӕ фервӕзын кӕна ӕмӕ йын разамынд дӕтта. Давид дзуры, Иегъовӕйы адӕм куыд амондджын сты, уый тыххӕй (Псалом 143:15). Давид ракодта Хуыцауы стырад ӕмӕ хорздзинады кой ӕмӕ стӕй загъта: «Мӕ дзых зӕгъдзӕн Хицауы ӕппӕлындзинад, ӕмӕ уадз арфӕ кӕнӕд алкӕцы буар Йӕ сыгъдӕг номӕн ӕнустӕй-ӕнустӕм» (Псалом 144:21).

Фарстытӕн дзуаппытӕ:

121:3 – Куыд ӕмбарын хъӕуы, зӕгъгӕ, Иерусалим уыди «иумӕ ӕмхӕст» сахар? Рагзаманты иннӕ сахарты куыд кодтой, афтӕ Иерусалимы дӕр хӕдзӕрттӕ кӕрӕдзимӕ тынг ӕввахс амадтой. Сахар стыр бынат нӕ ахста ӕмӕ уымӕ гӕсгӕ уыд ӕнцон хъахъхъӕнӕн. Уымӕй уӕлдай ма, хӕдзӕрттӕ кӕрӕдзимӕ ӕввахс кӕй уыдысты, уый тыххӕй сахары цӕрджыты ныфс уыди, бахъуаджы рӕстӕг кӕрӕдзийӕн кӕй ӕххуыс кӕндзысты ӕмӕ кӕрӕдзи кӕй хъахъхъӕндзысты. Уый ӕвдисы, Израилы 12 мыггаджы-иу иумӕ кувынмӕ куы ӕрӕмбырд сты, уӕд се ’хсӕн иудзинад кӕй уыд.

122:2 – Цагъарты цӕстыты кой дзы цӕмӕн ис? Нӕлгоймаг ӕмӕ сылгоймаг цагъартӕ се ’лдӕртты кӕнӕ се ’хсинты къухмӕ фӕкӕсынц дыууӕ хъуыддаджы тыххӕй: цӕмӕй сын сӕ фӕндон базоной ӕмӕ сӕ цӕмӕй сӕ хицӕуттӕ бахъахъхъӕной ӕмӕ сӕ цӕрынӕн цы хъӕуы, уый сын радтой. Афтӕ мах дӕр Иегъовӕмӕ кӕсӕм, цӕмӕй йын йӕ фӕндон базонӕм ӕмӕ йын йӕ хорзӕх ссарӕм.

130:1–3 – Мады риуӕй хицӕнгонд сывӕллон йӕ мады къухты куыд ӕрсабыр вӕййы, афтӕ Давид йӕ уд куыд сабыр кодта? Мады риуӕй хицӕнгонд сывӕллон йӕ мады къухты йӕхи сабыр кӕнын куыд фӕахуыр кӕны, уыйау Давид дӕр ахуыр кодта йӕ уд сабыр кӕнын. Куыд? Уый стырзӕрдӕ нӕ уыд, йӕ сӕр бӕрзӕндты нӕ хаста ӕмӕ стыр цӕмӕдӕртӕм нӕ тырныдта. Давид йӕхицӕн кад нӕ агуырдта, йӕ бон алцы кӕй нӕ уыд, уый зыдта ӕмӕ уыд сӕрныллӕг. Зондджын уыдзыстӕм, махӕн дӕр ахӕм зондахаст куы уа, уӕлдайдӕр та ӕмбырды исты бӕрндзинадмӕ куы тырнӕм, уӕд.

Зондзонӕнтӕ махӕн:

119:1, 2, 6, 7. Хахуыртӕ ӕмӕ хынджылӕг ныхас, гӕнӕн ис, иннӕтӕн стыр маст ӕрхӕссой. Кӕм цы зӕгъӕм, ууыл куы хъуыды кӕнӕм, уӕд уымӕй дӕр бӕрӕг уыдзӕн, не ’хсӕн фарн кӕй ис.

119:3, 4. «Хинӕйдзаг ӕвзаг» кӕмӕн ис, ахӕм адӕймагӕн нӕ быхсын куы хъӕуа, уӕд нын удӕнцой хӕсдзӕн, Иегъовӕ йӕ афоныл алцыдӕр кӕй сраст кӕндзӕн. Хахуыргӕнджытӕ ӕфхӕрд баййафдзысты «тыхджыны»  къухӕй. Уыдон, ӕнӕмӕнг, басудздзысты Иегъовӕйы тӕрхоны цӕхӕрӕй, «ӕхсӕлыйы судзгӕ цӕхӕртӕй» ӕвдыст чи цӕуы, уымӕй.

126:1, 2. Алы хъуыддаджы дӕр хъуамӕ разамынд агурӕм Иегъовӕйӕ.

132:1–3. Иегъовӕйы адӕмы ’хсӕн цы иудзинад ис, уый адӕймаджы зӕрдӕ сабыр кӕны, хорзырдӕм ыл зыны ӕмӕ йӕ уӕнгрог кӕны. Мах уыцы иудзинад хъуамӕ ма халӕм, иннӕтыл фаутӕ ӕвӕргӕйӕ, хыл ӕмӕ хъаст кӕнгӕйӕ.

136:1, 5, 6. Иегъовӕйы лӕггадгӕнджытӕй уацары чи уыд, уыдон иузӕрдион уыдысты Сионыл – ӕвдыста Хуыцауы организаци. Махӕй та цы ис зӕгъӕн? Иегъовӕ абон цы организацийӕ пайда кӕны, ууыл иузӕрдион стӕм?

137:2. Иегъовӕ сбӕрзонд кодта йӕ дзырд йӕ алкӕцы номӕй уӕлдӕр, зӕгъгӕ, уый ууыл дзурӕг у, ӕмӕ йӕ номӕй цы зӕрдӕвӕрдтӕ радта, уыдон иууылдӕр, мах ӕнхъӕл дӕр куыд не стӕм, афтӕ кӕй сӕххӕст кӕндзӕн. Махмӕ, ӕцӕгдӕр, ӕнхъӕлмӕ кӕсы диссаджы фидӕн.

138:1–6, 15, 16. Иегъовӕ нын зоны нӕ хъуыддӕгтӕ, нӕ хъуыдытӕ ӕмӕ, суанг цы зӕгъынмӕ фӕхъавӕм, уый дӕр. Иегъовӕ мах зоны, нӕ мады гуыбыны куы сӕвзӕрдыстӕм, нӕ буары хӕйттӕ бӕрӕг дӕр куы нӕма уыдысты, уӕдӕй нырмӕ. Хуыцау нӕ алкӕй дӕр куыд хорз зоны, уый ӕгӕр диссаг у, ӕмӕ йӕ нӕ бон кӕронмӕ бамбарын нӕу. Иегъовӕ ӕрмӕст уый нӕ уыны, цы уӕззау уавӕрты бахауӕм, фӕлӕ ма ӕмбары, куыд ныл ӕндавынц, уый дӕр. Уый нын удӕнцойы хос куыннӕ у!

138:7–12. Кӕмфӕнды дӕр куы уӕм, уӕддӕр нын Хуыцауӕн йӕ бон баххуыс кӕнын у.

138:17, 18. Иегъовӕ цы зонындзинӕдтӕ дӕтты, уыдон нын ӕхсызгон сты? (Ӕмбисӕндтӕ 2:10). Кӕд о, уӕд ссардтам ӕгӕрон циндзинады хос. Иегъовӕйы хъуыдытӕ сты «змисӕй дӕр фылдӕр» (МГТ). Иегъовӕйы тыххӕй цы базонӕм, уый нын алкӕддӕр уыдзӕн.

138:23, 24. Хъуамӕ нӕ фӕнда, Иегъовӕ нын нӕ зӕрдӕ куы сгарид, цӕмӕй нын фена нӕ «тӕссаг фӕндӕгтӕ» – ӕнӕраст хъуыдытӕ, фӕндтӕ ӕмӕ миниуджытӕ – ӕмӕ нын баххуыс кӕна, цӕмӕй сӕ фервӕзӕм.

142:4–7. Нӕ бон куыд у суанг уӕззау фӕлварӕнтӕ дӕр сфӕразын? Цы нын баххуыс кӕндзӕн, уый тыххӕй нын псаломзарӕггӕнӕг дӕтты ахӕм уынаффӕ, зӕгъгӕ, хъуыды кӕнут Иегъовӕйы хъуыддӕгтыл ӕмӕ йӕм кувут ӕххуысы тыххӕй.

«Иууылдӕр кадджын кӕнӕнт Иагъы»!

Псаломты фыццаг цыппар хайӕ алкӕцыдӕр фӕуд кӕны, Иегъовӕйы чи кадджын кӕны, ахӕм ныхӕстӕй (Псалом 40:14; 71:19, 20; 88:53; 105:48). Афтӕ фӕуд кӕны фӕстаг хай дӕр. Псалом 150:6 (НД) кӕсӕм: «Царды улӕфт кӕй мидӕг ис,– уадз иууылдӕр кадджын кӕнӕнт Иагъы». Уый ӕнӕмӕнг сӕххӕст уыдзӕн Хуыцауы ног дунейы.

Фӕлӕ цалынмӕ уыцы арфӕйаг рӕстӕгмӕ ӕнхъӕлмӕ кӕсӕм, уӕдмӕ бирӕ хъуыддӕгты тыххӕй ис ӕцӕг Хуыцауы стауӕн ӕмӕ йын йӕ ном кадджын кӕнӕн. Иегъовӕйы кӕй зонӕм ӕмӕ нӕ хӕлар кӕй у, уый фӕрцы куыд амондджын стӕм, ууыл куы фӕхъуыды кӕнӕм, уӕд нӕ нӕ фӕфӕнды, цӕмӕй йын зӕрдӕбынӕй бузныг дзурӕм ӕмӕ йӕ кадджын кӕнӕм?

[Ныв 15 фарсыл]

Иегъовӕйы хъуыддӕгтӕ нӕ дисы ӕфтауынц

[Ныв 16 фарсыл]

Иегъовӕйы хъуыдытӕ сты «змисӕй дӕр фылдӕр»