Дӕ бон у ӕнустӕм цӕрын

ӔНУСОН цард кӕй уыдзӕн, ууыл алы динтыл хӕст адӕмӕн сӕ фылдӕр ӕууӕндынц. Уыцы хъуыддаг куыд уыдзӕн, уый алы дин дӕр йӕхирдыгонау ӕмбарын кӕны, фӕлӕ се ’ппӕты дӕр уыциу ныфс ис – хорз уавӕрты амондджынӕй кӕй цӕрдзысты ӕмӕ мӕлӕтӕй кӕй нӕ тӕрсдзысты. Ды дӕр уымӕ нӕ бӕллыс? Ӕнусон цардыл алы рӕтты цӕмӕн ӕууӕндынц? Цымӕ адӕм искуы ӕнустӕм цӕрдзысты?

Фыстад нын дзуры, Сфӕлдисӕг райдианӕй, фыццаг лӕг ӕмӕ усы куы сфӕлдыста, уӕд сын сӕ зонды арф кӕй нывӕрдта ӕнустӕм цӕрыны фӕндон. Уым фыст ис: «[Хуыцау] сын ӕнусон цард... сӕ зӕрдӕты нывӕрдта» (Екклесиаст 3:11).

Фӕлӕ фыццаг лӕг ӕмӕ ус цӕмӕй ӕнустӕм цардаиккой, уый тыххӕй хъуамӕ ӕмбӕрстаиккой, хорз ӕмӕ ӕвзӕр цы у, уый скъуыддзаг кӕныны бар Хуыцауӕн кӕй ис. Уӕд Иегъовӕ загътаид, ӕнустӕм цӕрыны аккаг кӕй сты, цы хӕдзар сын ӕрцӕттӕ кодта, уым – Едемы цӕхӕрадоны (Райдиан 2:8; 3:22).

Ӕнусон цардӕй ӕнӕхай фесты

Библи дзуры, Хуыцау уыцы цӕхӕрадоны кӕй ныссагъта «хорз ӕмӕ ӕвзӕр зоныны бӕлас». Адам ӕмӕ Евӕйы та бафӕдзӕхста, зӕгъгӕ йын йӕ дыргътӕй куы бахӕрат, уӕд амӕлдзыстут (Райдиан 2:9, 17). Адам ӕмӕ Евӕ уыцы дыргътӕй куы нӕ бахордтаиккой, уӕд Хуыцау федтаид, хицауыл ӕй кӕй нымайынц. Бӕласӕй куы бахордтаиккой, уӕд уый та ууыл дзурӕг уыдаид, ӕмӕ Хуыцауы хицауыл кӕй нӕ нымайынц. Уыдон Иегъовӕмӕ нӕ байхъуыстой ӕмӕ слӕууыдысты Сайтаны фарс – Хуыцауы ныхмӕ чи рацыд, уыцы зӕды фарс. Уымӕ гӕсгӕ Хуыцау раст тӕрхон рахаста ӕмӕ аскъуыддзаг кодта, Адам ӕмӕ Евӕ ӕнусон царды аккаг кӕй не сты (Райдиан 3:1–6).

Хуыцау адӕмӕн лӕвӕрдта цард кӕнӕ мӕлӕт. Йӕ коммӕ кӕй нӕ бакастысты, уый тыххӕй амардысты ӕмӕ нал уыдысты. Уый гӕнӕн нӕ уыд, ӕмӕ Адам ӕмӕ Евӕ, йе та сӕ байзӕддӕгтӕй исчи цавӕрдӕр «ӕвдадзы хосы» фӕрцы цӕргӕйӕ баззадаид кӕнӕ йӕ уд кӕмдӕр цардаид *.

Адам Хуыцауы ныхмӕ кӕй рацыд, уый тыххӕй йӕ байзӕддӕгтӕ иууылдӕр хъизӕмар кӕнынц. Уый фӕдыл апостол Павел фыста: «Иу адӕймагӕй тӕригъӕд куыд бацыди дунемӕ, ӕмӕ тӕригъӕдӕй мӕлӕт, афтӕ мӕлӕт дӕр бахызт ӕппӕт адӕммӕ, уымӕн ӕмӕ уый мидӕг иууылдӕр тӕригъӕд ракодтой» (Ромӕгтӕм 5:12).

Ногӕй та ӕнусон цард

Апостол Павел Адамы байзӕддӕгты уавӕр абарста фыццаг ӕнусы цагъарты уавӕримӕ. Адам ӕмӕ Евӕйы цот сӕ туджы тӕригъӕд кӕй рахастой, уымӕ гӕсгӕ  гуырдысты «тӕригъӕды цагъартӕй», сӕ кӕрон цыд мӕлӕтмӕ (Ромӕгтӕм 5:12; 6:16, 17). О, афтӕ уыдаид, Иегъовӕ куы нӕ батыхстаид ӕмӕ, уыцы цагъарты ссӕрибар кӕнынӕн цы хъуыд, уый куы нӕ сарӕзтаид, уӕд. Павел бамбарын кодта: «Иу адӕймаджы [ома Адамы] тӕригъӕд ӕппӕт адӕмӕн карз тӕрхон куыд расайдта, афтӕ иу Адӕймаджы раст хъуыддаг раст кӕны ӕппӕт адӕмы ӕмӕ сын дӕтты цард». «Раст хъуыддаг» уымӕ амоны, ӕмӕ Йесо йе ’ххӕст цард ӕппӕт адӕмы сӕрвӕлтау радта «сӕрмӕ-сӕр ахӕсты аргъӕн». Ахӕсты аргъӕн Иегъовӕйы цӕсты закъонмӕ гӕсгӕ ис тых, ома уый фӕрцы адӕмы ис «карз тӕрхонӕй» ссӕрибар кӕнӕн (Ромӕгтӕм 5:16, 18, НТ, 19; 1 Тимофеймӕ 2:5, 6, НД).

Растдӕр уый тыххӕй ахуыргӕндтӕ адӕймаджы мидӕг, йӕ генетикон коды никуы ссардзысты, ӕнустӕм цӕрӕн цӕй фӕрцы ис, уый. Уый агурын хъӕуы ӕндӕр ран. Адӕймаг кӕй мӕлы, уый Библимӕ гӕсгӕ буары скондимӕ баст нӕу, фӕлӕ ӕгъдау ӕмӕ ӕфсармимӕ, стӕй закъонимӕ. Ӕмӕ Чырыстийы ӕлхӕнӕг нывонд дӕр – адӕмӕн ӕнусон цард ногӕй райсын сӕ бон цӕй фӕрцы у, уый – уыд закъонмӕ гӕсгӕ. Ахӕстаргъ ма дзурӕг у Хуыцауы рӕстдзинад ӕмӕ ӕнувыд уарзтыл дӕр. Уӕдӕ ахӕсты аргъ кӕмӕн фӕахъаз уыдзӕн ӕмӕ ӕнустӕм чи цӕрдзӕн?

Лӕвар – ӕнӕмӕлгӕ цард

Иегъовӕ Хуыцау у «ӕнусӕй-ӕнусмӕ». Уый у ӕнӕмӕлгӕ (Псалом 89:3). Иегъовӕ ӕнӕмӕлгӕ цард фыццаг радта Йесо Чырыстийӕн. Апостол Павел дзуры: «Чырысти мӕрдтӕй райгас, ӕмӕ никуыуал амӕлдзӕн – мӕлӕты бар ыл нал цӕуы» (Ромӕгтӕм 6:9, НД). Уӕдӕ зӕххон хицӕуттӕй уӕлдай райгасуӕвӕг Йесойы тыххӕй Павел загъта, зӕгъгӕ, ӕрмӕст уый у ӕнӕмӕлгӕ хицау. Йесо уыдзӕн «мыггагмӕ». Уымӕн ис, «фесафӕн кӕмӕн нӕй», ахӕм цард (Дзуттӕгтӕм 7:15–17, НД, 23–25; 1 Тимофеймӕ 6:15, 16).

Ӕнӕмӕлгӕ цард ӕрмӕст Йесойӕн не ’рцыд лӕвӕрд. Йесо куыд райгас, афтӕ райгас вӕййынц сыгъдӕг удӕй сӕрст чырыстӕттӕ дӕр – паддзӕхтӕй уӕларвон кады хицауиуӕг кӕнынмӕ ӕвзӕрст чи ’рцыд, уыдон (Ромӕгтӕм 6:5). Апостол Иоанн дзуры, ацы кад лӕвӕрд кӕй ӕрцыд 144 000 адӕймагӕн (Раргомад 14:1). Уыдон дӕр райстой ӕнӕмӕлгӕ цард. Куыд хъуамӕ райгас уыдаиккой, уый тыххӕй Павел дзуры: «Буар ӕмӕ тугӕн сӕ бон... нӕу Хуыцауы Паддзахадӕй хай райсын... труба ныууасдзӕн ӕмӕ мӕрдтӕ райгас уыдзысты ӕнӕмбийгӕтӕй, мах та аивдзыстӕм; уымӕн ӕмӕ ацы ӕмбийгӕйӕн ӕмбӕлы сфӕлындын ӕнӕмбийгӕйы, ӕмӕ ацы мӕлӕтон – сфӕлындын ӕнӕмӕлӕтоны». Уӕларвон цардмӕ чи райгас уыдзӕн, уыдоныл мӕлӕты бар нӕ цӕуы (1 Коринфӕгтӕм 15:50–53; Раргомад 20:6).

Хуыцау ам цы раргом кодта, уый ӕцӕгдӕр диссаг у. Зӕдтӕ сты уӕларвон удгоймӕгтӕ, фӕлӕ суанг уыдон дӕр афтӕ конд не сты, ӕмӕ ӕнӕмӕлгӕ уой. Уый бӕрӕг у, Сайтаны фарс цы зӕдтӕ рахӕцыд, уыдон сӕфт кӕй ӕрцӕудзысты, уымӕй (Матфейы 25:41). Йесойы ӕмпаддзӕхтӕ та райсдзысты ӕнӕмӕлгӕ цард ӕмӕ уымӕй бӕлвырд кӕны, Иегъовӕ сын сӕ иузӕрдиондзинадыл ӕппындӕр кӕй нӕ дызӕрдыг кӕны.

Уӕдӕ ӕнустӕм ӕрмӕст 144 000 цӕрдзысты – зӕххыл цы миллиардгай адӕймӕгтӕ цард, уыдонимӕ абаргӕйӕ ӕрмӕст армыдзаг адӕм? Нӕ. Ӕркӕсӕм ма, цӕмӕн ис афтӕ зӕгъӕн.

 Ӕнусон цард зӕххыл Дзӕнӕты

Раргомады чиныджы диссаджы хуызы ӕвдыст цӕуынц, зӕххыл дзӕнӕты ӕнусон цардӕй хайджын чи ’рцыд, уыцы ӕнӕнымӕц бирӕ адӕм. Семӕ ма сты, мӕрдтӕй чи райгас ӕмӕ фӕстӕмӕ йе ’рыгон бонты ӕнӕниздзинад ӕмӕ хъарутӕ кӕмӕ ӕрыздӕхтысты, уыдон (Раргомад 7:9; 20:12, 13; 21:3, 4). Уыдоны кӕнынц, «Хуыцауы... бадӕнӕй дзӕнхъайау цы ӕрттивгӕ царддӕттӕг цӕугӕдон кӕлы», уырдӕм. «Йӕ иу фарс дӕр ӕмӕ йӕ иннӕ фарс дӕр рӕзы... царды бӕлас [«бӕлӕстӕ», НД]. Бӕласы [«бӕлӕсты», НД] сыфтӕртӕ адӕмтӕн сты ӕвдадзыхос». Иегъовӕ Хуыцау хӕларзӕрдӕйӕ хоны: «Дойны кӕмӕн у, уый ӕрцӕуӕд, ӕмӕ кӕй фӕнды, уый царды дон айсӕд лӕвар» (Раргомад 22:1, 2, 17, НТ).

Ацы бӕлӕстӕ ӕмӕ дӕттӕ не сты, рагзаманты алхимиктӕ ӕмӕ иртасджытӕ кӕй агуырдтой, уыцы царды хос кӕнӕ ӕвзонгады суадон. Уыдон ӕвдисынц, Хуыцау Йесо Чырыстийы уылты адӕмы фӕстӕмӕ ӕххӕстдзинадмӕ ӕркӕнынӕн кӕй аразы, уыцы мадзӕлттӕ.

Хуыцауы фӕнд – коммӕгӕс адӕмӕн ӕнусон цард раттын – нӕ фӕивта. Иегъовӕ иузӕрдион кӕй у, уымӕ гӕсгӕ йӕ фӕндон сӕххӕст кӕндзӕн. Псаломы 36:29 фыст ис: «Рӕстгӕнджытӕ зӕхх сӕхи бакӕндзысты ӕмӕ цӕрдзысты ууыл ӕнустӕм». Ацы зӕрдӕвӕрд нӕ разӕнгард кӕны, цӕмӕй, уӕларвыл ӕнӕмӕлгӕ цардӕй хайджын чи ’рцыд, уыдонимӕ иумӕ дзурӕм: «Стыр ӕмӕ диссаг сты дӕ хъуыддӕгтӕ, Иегъовӕ, Ӕппӕтхъомысджын Хуыцау! Раст ӕмӕ ӕцӕг сты дӕ фӕндӕгтӕ, ӕнусты Паддзах! Чи нӕ фӕтӕрсдзӕн дӕуӕй, Иегъовӕ, ӕмӕ дын дӕ ном чи нӕ скадджын кӕндзӕн? Уымӕн ӕмӕ ӕрмӕстдӕр ды дӕ иузӕрдион!» (Раргомад 15:3, 4, НД).

Нӕ дӕ фӕнды уыцы диссаджы лӕвар райсын ӕмӕ ӕнустӕм цӕрын? Кӕд о, уӕд «ӕнусты Паддзахыл» иузӕрдион у ӕмӕ йӕ коммӕ кӕс. Фылдӕр базон Иегъовӕ ӕмӕ Йесо Чырыстийы тыххӕй – уыцы цардӕн гӕнӕн кӕй фӕрцы ис, уый тыххӕй. Хорздзинад ӕмӕ ӕвзӕрдзинадмӕ Хуыцауы цӕстӕй чи кӕса ӕмӕ уый йӕ цардӕй бӕрӕг кӕмӕн уа, уыцы адӕм райсдзысты лӕвар – «мыггагмӕйы цард» (Иоанны 17:3).

[Фиппаинаг]

 [Рамкӕ/Ныв 5 фарсыл]

Ӕнусон цардӕй сфӕлмӕцдзыстӕм?

Иуӕй-иутӕ зӕгъынц, зӕгъгӕ, ӕнусон цардӕй адӕймаг сфӕлмӕцдзӕн – гыццылгай йӕ уыциу ирхӕфсӕнтыл цы хардз кӕна, ӕндӕр ницы уыдзӕн. Ӕвӕццӕгӕн, уыдон ӕнхъӕлынц, абон адӕм куыд ӕмӕ цы уавӕрты цӕрынц, ӕнустӕм куы цӕрой, уӕд дӕр афтӕ цӕрдзысты. Уымӕ гӕсгӕ бирӕтӕ хъуыды кӕнынц, ахӕм цардӕй кӕй сфӕлмӕцдзысты ӕмӕ иугъӕдон кӕй уыдзӕн. Фӕлӕ Хуыцау зӕрдӕ бавӕрдта, зӕгъгӕ, ногӕй цы Дзӕнӕт скӕндзӕн, уым адӕймаг йӕ «мондӕгтӕ суадздзӕн бирӕ фарнӕй» (Псалом 36:11). Ахӕм цард адӕмӕн ратдзӕн фадат, цӕмӕй Иегъовӕйы сфӕлдыстады тыххӕй сӕ зонындзинӕдтӕ фылдӕр кӕной. Уӕд сын уыдзӕн рӕстӕг, абон ӕрмӕст бӕлгӕ кӕмӕ кӕнынц, уыцы хъуыддӕгтӕн, зӕгъӕм, алы диссаджы курдиӕтты сфӕлтӕрынӕн, алыхуызон иртасӕнтӕ ӕмӕ ӕндӕр хъуыддӕгтӕ кӕнынӕн.

Кембриджы университеты профессор-генетик Обри де Грей иртасы, адӕмӕн сӕ бон фылдӕр цӕрын куыд у, уый. Мӕнӕ цы зӕгъы: «Хорз ахуырад кӕмӕ ис ӕмӕ йӕ зонындзинӕдтӕй спайда кӕнынӕн рӕстӕг кӕмӕн ис, уыцы адӕм абон нӕ фӕлмӕцынц ӕмӕ ууыл хъуыды дӕр никуы акӕнынц, цы ног цыдӕртӕ сӕ фӕнды бакӕнын, уыдон искуы кӕй фӕуыдзысты». Ӕмӕ кӕд афтӕ у, уӕддӕр, Хуыцауы Ныхас куыд зӕгъы, афтӕмӕй, адӕймаг «никуы бамбардзӕн, ӕцӕг Хуыцау иууыл райдианӕй цы хъуыддаг аразы, уый» (Екклесиаст 3:11).

[Рамкӕ/Ныв 6 фарсыл]

Ӕнусон бӕллиц

Н. э. агъоммӕ дыккӕгӕм миназы Месопотамийы фӕзындысты Гильгамешы кадджытӕ. Уыцы кадджыты сӕйраг хъайтар агуры ӕнусон ӕвзонгад. Рагон Египеты марды буар сӕрстой ӕмбийынӕй хизӕг хостӕй, уымӕн ӕмӕ адӕмы уырныдта, уд ӕнӕмӕлгӕ кӕй у ӕмӕ йӕ бон кӕй у фӕстӕмӕ буармӕ ӕрыздӕхын. Уымӕ гӕсгӕ-иу египетӕгты ингӕнтӕй иуӕй-иутӕ дзаг уыдысты, марды «мӕрдты бӕсты» чи бахъуыдаид, ахӕм дзаумӕттӕй.

Н. э. агъоммӕ 8 ӕнусы китайаг алхимиктӕй бирӕтӕ ӕууӕндыдысты, уд кӕй нӕ мӕлы, ууыл. Ӕмӕ н. э. агъоммӕ 4 ӕнусмӕ та фӕзынд ахӕм хъуыды, зӕгъгӕ, уый къухы бафтдзӕн кӕлӕнгӕнӕн хосты руаджы. Астӕуккаг ӕнусты европӕйаг ӕмӕ араббаг алхимиктӕ агуырдтой ӕмӕ мысыдысты царды хостӕ. Сӕ хостӕй-иу иуӕй-иутӕм бафтыдтой мыстымарг, джынасу (ртуть) ӕмӕ сондон. Чи йӕ зоны, ахӕм хостӕй цал адӕймаджы фӕхъӕстӕ ис!

Иу афон ма бирӕ рӕтты парахат уыдысты, ӕвзонгады суадон кӕй хуыдтой, уый тыххӕй таурӕгътӕ – суадонӕй, дам, чи бануӕзтаид, уымӕн, дам, фӕстӕмӕ йе уӕнгты хъару бацыдаид.