Аргъ кӕнӕм нӕ фембӕлдтӕн
Аргъ кӕнӕм нӕ фембӕлдтӕн
«Ӕз сӕ скӕндзынӕн мӕ сыгъдӕг хохмӕ, ӕмӕ мӕ кувӕн хӕдзары цин кӕндзысты» (ИСАЙ 56:7).
1. Фембӕлдтӕн, куыд ӕмбӕлы, афтӕ кӕй хъуамӕ аргъ кӕнӕм, уый Фыстад куыд ӕвдисы?
ЙЕГЪОВӔ ӕрӕмбырд кодта йӕ адӕмы – сӕрст чырыстӕтты ӕмӕ се ’мбӕлтты,– цӕмӕй йын йӕ «сыгъдӕг хохыл» кувой. Уыдон цин кӕнынц йӕ «кувӕн хӕдзары», йӕ ӕнӕуынгӕ кувӕндоны – уый у «кувӕн хӕдзар ӕппӕт адӕмтӕн дӕр» (Исай 56:7; Марчы 11:17). Уыдӕттӕй бӕрӕг у, ӕмӕ, Йегъовӕйӕн кӕй кувӕм, уый у сыгъдӕг, раст ӕмӕ стыр хъуыддаг. Уӕдӕ, Хуыцауы Ныхас кӕм ахуыр кӕнӕм ӕмӕ йын кӕм кувӕм, уыцы фембӕлдтӕн, куыд ӕмбӕлы, афтӕ куы аргъ кӕнӕм, уӕд ӕвдисдзыстӕм, табуйаг хъуыддӕгтӕм Йегъовӕйы цӕстӕй кӕй кӕсӕм.
2. Йегъовӕ кувынӕн цы бынат равзӕрста, уый табуйагыл кӕй нымадта ӕмӕ йӕм Йесо дӕр ахӕм цӕстӕй кӕй каст, уый цӕмӕй бӕрӕг у?
2 Йегъовӕ рагон Израилӕн афтӕ цы бынатӕй загъта, уым мын кувдзыстут, зӕгъгӕ, уый хъуамӕ нымадтаиккой табуйагыл, сыгъдӕгыл. Хӕсгӕ кувӕндоны цатыр, стӕй дзы цы дзаумӕттӕ ӕмӕ мигӕнӕнтӕ уыд, уыдон хъуыди байсӕрдын ӕмӕ сӕ Хуыцауӕн снывонд кӕнын, ӕмӕ уӕд уыдаиккой «иууылсыгъдӕг дзаумӕттӕ» (Рацыд 30:26–29). Кувӕн бынаты дыууӕ уатӕй иу хуынди «Сыгъдӕг бынат», иннӕ та – «Ӕппӕты сыгъдӕг бынат» (Дзуттӕгтӕм 9:2, 3). Фӕстӕдӕр хӕсгӕ цатыры бӕсты арӕзт ӕрцыд кувӕндон Иерусалимы. Уыцы ран адӕм Йегъовӕйӕн кӕй куывтой, уымӕ гӕсгӕ Иерусалим хуынд «сыгъдӕг сахар» (Нееми 11:1; Матфейы 27:53). Йесо зӕххыл куы уыд, уӕд уый дӕр кувӕндонӕн, куыд ӕмбӕлы, афтӕ аргъ кодта. Адӕм кувӕндонӕй базар кӕй сарӕзтой, стӕй иу сӕ фӕндаг уый уылты кӕй фӕцыбыр кодтой, ууыл Йесо тынг смӕсты (Марчы 11:15, 16).
3. Израилӕгты ӕмбырдтӕ табуйаг кӕй уыдысты, уый цӕмӕй у бӕрӕг?
3 Израилӕгтӕ-иу иудадзыг ӕмбырд кодтой, цӕмӕй Йегъовӕйӕн куывтаиккой ӕмӕ йын йӕ Закъон хъӕрӕй куыд кастысты, уымӕ хъуыстаиккой. Сӕ бӕрӕгбӕтты кӕцыдӕр бонтӕ нымад уыдысты сыгъдӕг ӕмбырдтыл кӕнӕ стыр ӕмбырдтыл, ӕмӕ уый дзурӕг уыд, уыцы фембӕлдтӕ табуйаг кӕй уыдысты (Левит 23:2, 3, 36, 37). Иухатт, Ездрӕ ӕмӕ Неемийы заман, адӕм куы ӕрӕмбырд сты, уӕд сын левиттӕ «закъон ӕмбарын кодтой». «Адӕм, закъоны ныхӕстӕм хъусгӕйӕ, иууылдӕр куыдтой», ӕмӕ сӕ левиттӕ сабыр кодтой, дзырдтой сын: «Ма кӕут! Ацы бон у сыгъдӕг бон». Уый фӕстӕ израилӕгтӕ авд боны бӕрӕг кодтой Халагъудты бӕрӕгбон, ӕмӕ «сӕ цинӕн кӕрон дӕр нал уыд». Стӕй ма «алы бон дӕр – фыццаг бонӕй фӕстаг бонмӕ – хъӕрӕй кастысты ӕцӕг Хуыцауы закъоны чиныг. Сӕ бӕрӕгбон ахаста авд боны, ӕстӕм бон та ӕгъдаумӕ гӕсгӕ скодтой стыр ӕмбырд» (Нееми 8:7–11, 17, 18). О, уыцы бонтӕ уыдысты табуйаг, ӕмӕ-иу дзы чи уыд, уыдон сын хъуамӕ аргъ кодтаиккой.
Нӕ фембӕлдтӕ сты табуйаг
4, 5. Нӕ фембӕлдтӕ табуйаг цӕмӕ гӕсгӕ сты?
4 Абон Йегъовӕйӕн зӕххыл нӕй цавӕрдӕр сыгъдӕг сахар кӕнӕ горӕт, нӕй йын кувӕндон дӕр. Фӕлӕ нӕ хъуамӕ рох ма уа: Йегъовӕйӕн кувынӕн кӕм ӕрӕмбырд вӕййӕм, уыцы фембӕлдтӕ сты табуйаг. Къуыри ӕртӕ хатты фембӕлӕм, цӕмӕй Фыстад кӕсӕм ӕмӕ йӕ ахуыр кӕнӕм. Уым нын Йегъовӕйы Ныхасы «нысаниуӕг амонынц» ӕмӕ, Неемийы рӕстӕджы куыд уыд, афтӕ йын ныр дӕр «йӕ хъуыды халынц» (Нееми 8:8). Нӕ фембӕлдтӕ иууылдӕр райдайынц ӕмӕ фӕвӕййынц куывдӕй. Сӕ фылдӕры фӕзарӕм зарджытӕ Йегъовӕйы кадӕн (Псалом 25:12). О, фембӕлдтӕ ӕнӕмӕнг баст сты Хуыцауӕн кувынимӕ, ӕмӕ сын хъуамӕ аргъ кӕнӕм, уӕлӕнгай цӕстӕй сӕм ма кӕсӕм.
5 Йегъовӕйӕн йӕ адӕм куы ӕрӕмбырд вӕййынц, цӕмӕй йын кувой, йӕ Ныхас ын ахуыр кӕной ӕмӕ сӕ хотӕ ӕмӕ се ’фсымӕртимӕ кӕрӕдзийы ныфсыл ныфс ӕфтауой, уӕд сӕ схайджын кӕны стыр арфӕдзинӕдтӕй. Фидарӕй ис зӕгъӕн, ӕмбырды фембӕлды кӕй райсдзыстӕм Йегъовӕйы арфӕдзинад (Псалом 132:1, 3). Уӕдӕ фембӕлды куы уӕм ӕмӕ дзы цы дзурынц, уымӕ лӕмбынӕг куы хъусӕм, уӕд йӕ арфӕдзинӕдтӕй хайджын уыдзыстӕм. Уымӕй уӕлдай ма Йесо афтӕ загъта: «Мӕ номыл дыууӕйӕ кӕнӕ ӕртӕйӕ кӕм ӕрӕмбырд уой, уым ӕз дӕр уыдзынӕн семӕ». Ацы ныхӕстӕ сӕйраджыдӕр хауынц, чырыстӕтты ’хсӕн исты хъуыддаг куы рауайы, уӕд йӕ равзарыны тыххӕй цы хистӕр нӕлгоймӕгтӕ фембӕлынц, уыдонмӕ. Фӕлӕ уыцы ныхӕстӕ ахӕссӕн ис нӕ фембӕлдтӕм дӕр (Матфейы 18:20). Чырыстӕттӕ Чырыстийы номыл куы ӕрӕмбырд вӕййынц, уӕд уый сыгъдӕг уды фӕрцы вӕййы се ’хсӕн. Ӕмӕ уӕд уыцы фембӕлдтӕ табуйагыл куыннӕ хъуамӕ нымайӕм?
6. Цы зӕгъӕн ис, нӕ фембӕлдтӕ кӕм фӕцӕуынц, уыцы бынӕттӕй?
6 Кӕй зӕгъын ӕй хъӕуы, Йегъовӕ адӕймаджы къухӕй конд кувӕндӕтты нӕ цӕры. Фӕлӕ Паддзахады залтӕ сты, мах ӕцӕг Хуыцауӕн кӕм кувӕм, ахӕм бынӕттӕ (Хъуыддӕгтӕ 7:48; 17:24). Уырдӕм ӕрбацӕуӕм, цӕмӕй Йегъовӕйы Ныхас ахуыр кӕнӕм, кувӕм ӕм ӕмӕ йӕ кадӕн зарӕм. Афтӕ зӕгъӕн ис Конгрессты залтӕй дӕр. Конгресстӕн стырдӕр бынӕттӕ, зӕгъӕм, стадионтӕ, концертон ӕмӕ ӕндӕр залтӕ, куы баххуырсӕм, уӕд уыдон уыцы рӕстӕджы свӕййынц, Хуыцауӕн кӕм кувӕм, ахӕм табуйаг бынӕттӕ. Уыцы фембӕлдтӕ стыр уой ӕви гыццыл – хъуамӕ сын аргъ кӕнӕм,ӕмӕ уый хъуамӕ зына нӕ ахаст ӕмӕ не ’гъдауӕй.
Нӕ фембӕлдтӕн куыд аргъ кӕнӕм
7. Нӕ фембӕлдтӕн кӕй аргъ кӕнӕм, уый цавӕр хъуыддагӕй ис равдисӕн?
7 Нӕ фембӕлдтӕн кӕй аргъ кӕнӕм, уый равдисӕн ис цалдӕр хъуыддагӕй. Иу уымӕй, ӕмӕ Паддзахады зарджытӕ куы зарой, уӕд мах дӕр уым уӕм. Бирӕтӕ дзы сты куывдтыты хуызӕн ӕмӕ сӕ хъӕуы, куыд ӕмбӕлы, афтӕ зарын. Апостол Павел, 21 псаломы ныхӕстӕ ’рхӕсгӕйӕ, Йесойы тыххӕй ныффыста: «Ме ’фсымӕртӕн фехъусын кӕндзынӕн дӕ ном. Ӕмбырды астӕу дӕ кадӕн зардзынӕн» (Дзуттӕгтӕм 2:12). Уӕдӕ хъуамӕ нӕхи афтӕ сахуыр кӕнӕм, ӕмӕ-иу цалынмӕ сӕрдариуӕггӕнӕг ӕфсымӕр, кӕцы зарӕг зардзыстӕм, уый зӕгъа, уӕдмӕ нӕ бынӕтты уӕм ӕмӕ-иу заргӕ-зарын зарӕгӕн йӕ ныхӕстыл хъуыды кӕнӕм. Цӕй ӕмӕ мах дӕр псаломзарӕггӕнӕгау зӕрдиагӕй зарӕм: «Стауын Дӕу, Хицау, мӕ ӕппӕт зӕрдӕйӕ рӕстгӕнджыты уынаффӕйы ӕмӕ ӕмбырды» (Псалом 110:1). О, Йегъовӕйы кадӕн нӕ зарын кӕй фӕнды, уый уый аргъ у, цӕмӕй-иу фембӕлдтӕм афоныл ӕрбацӕуӕм ӕмӕ-иу кӕронмӕ фӕбадӕм.
8. Библийӕ цавӕр хабар ӕвдисы, фембӕлдты цы куывдтытӕ фехъусӕм, уыдонӕн кӕй хъуамӕ аргъ кӕнӕм?
8 Нӕ фембӕлдтӕн ноджы тынгдӕр аргъ кӕнын та уый тыххӕй хъӕуы, ӕмӕ дзы ӕфсымӕртӕ зӕрдиагӕй скувынц, ӕмбырдмӕ чи ’рбацӕуы, уыдоны номӕй. Библийы ис фыст, фыццаг ӕнусы чырыстӕттӕ Иерусалимы куы ӕрӕмбырд сты, уӕд «ӕмзӕрдӕйӕ Хуыцаумӕ [кӕй] скуывтой». Уый фӕрцы дарддӕр дӕр, кӕд сӕ карзӕй ӕфхӕрдтой, уӕддӕр, «Хуыцауы ныхас ныфсджынӕй дзырдтой» (Хъуыддӕгтӕ 4:24–31). Мыййаг, уыцы ран чи уыд, уыдонӕй искӕмӕн йӕ хъуыдытӕ куывды рӕстӕг ӕндӕр кӕмдӕрты уыдаиккой? Нӕ, уымӕн ӕмӕ уыдон куывтой «ӕмзӕрдӕйӕ». Нӕ фембӕлдты цы куывдтытӕ фехъусӕм, уыдоны вӕййынц, алкӕмӕн дӕр йӕ зӕрдӕйы чи ис, уыцы хъуыдытӕ. Ӕмӕ уыцы куывдтытӕн хъуамӕ аргъ кӕнӕм ӕмӕ сӕм лӕмбынӕг хъусӕм.
9. Нӕ фембӕлдтӕн кӕй аргъ кӕнӕм, уый нӕ конд ӕмӕ не ’гъдауӕй куыд уыдзӕн бӕрӕг?
9 Нӕ фембӕлдтӕн стыр аргъ кӕй кӕнӕм ӕмӕ сӕ табуйагыл кӕй нымайӕм, уый ма бӕрӕг уыдзӕн нӕ кондӕй дӕр. Нӕ уӕлӕ цы ис, нӕ сӕр куыд фаст у, уымӕй ӕвдисдзыстӕм, нӕ фембӕлдтӕм уӕлӕнгай цӕстӕй кӕй нӕ кӕсӕм. Апостол Павел загъта: «Фӕнды мӕ, цӕмӕй, иумӕ кӕм ӕрӕмбырд вӕййут, уым-иу нӕлгоймӕгтӕ иузӕрдионӕй сдарой сӕ къухтӕ Хуыцаумӕ ӕмӕ йӕм кувой, мӕсты ма кӕной ӕмӕ быцӕу макӕимӕ кӕной, афтӕмӕй. Фӕнды ма мӕ, цӕмӕй сылгоймӕгтӕ сӕхи уымӕй ма рӕсугъд кӕной, ӕмӕ сӕ дзыккутӕ алыхуызӕттӕ бийой, сызгъӕрин ӕмӕ налхъуыт кӕнӕ тынг зынаргъ дзаумӕттӕ дарой, фӕлӕ аив дарӕсӕй – сӕ дарӕсӕй хъуамӕ бӕрӕг уа, хӕдӕфсарм ӕмӕ ӕмбаргӕ кӕй сты; стӕй сӕхи рӕсугъд кӕной, йӕхи Хуыцауӕн кувӕг чи хоны, уыцы сылгоймӕгтӕн куыд ӕмбӕлы, афтӕ» (1 Тимофеймӕ 2:8–10). Зӕгъӕм, стадионы нын конгресс куы уа, уӕддӕр гӕнӕн ис, цӕмӕй нӕ уӕлӕдарӕс боныхъӕдмӕ гӕсгӕ дӕр фидауа ӕмӕ ӕфсармыл дзурӕг дӕр уа. Уымӕй уӕлдай ма, конгрессӕн куы аргъ кӕнӕм, уӕд программӕйы рӕстӕджы хӕргӕ нӕ кӕндзыстӕм кӕнӕ чъиу не ’ууилдзыстӕм. Нӕ аив уӕлӕдарӕсӕй ӕмӕ не ’гъдауӕй мах кад кӕнӕм Йегъовӕ Хуыцауӕн, не ’мчырыстӕттӕн ӕмӕ ӕвдисӕм, Хуыцауӕн кӕй кувӕм, уымӕн кӕй аргъ кӕнӕм.
Хуыцауы хӕдзаронтӕн чи фидауы, ахӕм уагахаст
10. Апостол Павел куыд равдыста, фембӕлдты нӕ уагахаст фӕзминаг кӕй хъуамӕ уа, уый?
10 Чырыстон фембӕлдтӕ куыд уадзын хъӕуы, уый фӕдыл апостол Павел радта хорз уынаффӕтӕ 1 Коринфӕгтӕм 14 сӕры. Фӕстагмӕ та загъта: «Алцыдӕр уӕм уӕд уаг ӕмӕ ӕгъдауыл» (1 Коринфӕгтӕм 14:40). Фембӕлдтӕ чырыстон ӕмбырды хъуыддӕгты ахсынц стыр бынат, ӕмӕ дзы хъуамӕ нӕхи дарӕм, Йегъовӕйы хӕдзаронтӕн куыд ӕмбӕлы, афтӕ.
11, 12. а) Фембӕлдтӕм чи цӕуы, уыцы сывӕллӕттӕ цы хъуамӕ бамбарой? ӕ) Сывӕллӕттӕн куыд у сӕ бон фембӕлдты сӕ уырнындзинад ӕвдисын?
11 Уӕлдайдӕр сывӕллӕттӕн хъӕуы амонын, сӕхи ӕмбырды куыд хъуамӕ дарой, уый. Чырыстӕттӕ хъуамӕ сӕ сывӕллӕттӕн ӕмбарын кӕной, Паддзахады залы ӕмӕ, чиныгахуыр кӕм вӕййы, уыцы бынаты хъазын кӕй не ’мбӕлы. Уым мах кувӕм Йегъовӕйӕн ӕмӕ йын ахуыр кӕнӕм йӕ Ныхас. Зондджын паддзах Соломон ныффыста: «Ӕцӕг Хуыцауы хӕдзармӕ куы цӕуай, уӕд кӕс, дӕхи куыд дарыс, уымӕ, ӕмӕ тынгдӕр цӕттӕ у... хъусынмӕ» (Екклесиаст 5:1). Моисей израилӕгтӕн фӕдзӕхста, цӕмӕй-иу ӕрӕмбырд уыдаиккой иууылдӕр – хистӕртӕ дӕр ӕмӕ «гыццыл сывӕллӕттӕ» дӕр. Уый сын загъта: «Ӕрӕмбырд-иу кӕнут адӕмы... цӕмӕй хъусой ӕмӕ ахуыр кӕной уӕ Хуыцау Йегъовӕйӕ тӕрсын ӕмӕ архайой, ацы закъоны цыдӕриддӕр фыст ис, уый ӕххӕст кӕныныл. Ӕмӕ сӕ фырттӕ, ӕппӕт адӕттӕ чи нӕ зона, уыдон дӕр хъуамӕ хъусой ӕмӕ ахуыр кӕной... Йегъовӕйӕ тӕрсын» (Дыккаг закъон 31:12, 13).
12 Абон дӕр гыццыл сывӕллӕттӕ сӕ ныййарджытимӕ ӕмбырдтӕм сӕйраджыдӕр уый тыххӕй цӕуынц, цӕмӕй хъусой ӕмӕ ахуыр кӕной. Иугӕр сывӕллон лӕмбынӕг хъусын сахуыр, стӕй Библийы сӕйраг ахуырӕдтӕ ӕмбарын райдыдта, уӕд йӕ бон у цыбыр дзуаппытӕ дӕттын ӕмӕ афтӕмӕй «йӕ уырнындзинады тыххӕй ӕргом... дзурын» (Ромӕгтӕм 10:10). Зӕгъӕм, йӕ бон у, цы фарст ӕмбары, уымӕн цалдӕр ныхасӕй дзуапп раттын. Фыццаг ӕй, чи зоны, дзуапп бахъӕуа бакӕсын, фӕлӕ фӕстӕдӕр архайдзӕн йӕхи ныхӕстӕй дзурыныл. Уый сывӕллонӕн пайда дӕр у ӕмӕ цин дӕр фӕкӕны. Стӕй сывӕллӕтты уырнындзинад ӕмӕ зӕрдиаг дзуаппытӕ тынг ӕхсызгон сты хистӕртӕн дӕр. Арӕхдӕр сӕ ууыл фӕахуыр кӕнынц сӕ ныййарджытӕ, фембӕлдты сӕхӕдӕг дзуапп кӕй фӕдӕттынц, уымӕй. Гӕнӕн уӕвгӕйӕ ма хорз уаид, сывӕллонӕн йӕхицӕн куы уаид Библи, зарджыты чиныг ӕмӕ цы журнал кӕнӕ чиныг ахуыр кӕнӕм, уый. Хъуамӕ ахуыр кӕна нӕ литературӕйӕн аргъ кӕнын. Ӕппӕт уыдӕтты фӕрцы сывӕллӕттӕ бамбардзысты, нӕ фембӕлдтӕ табуйаг кӕй сты.
13. Ӕмбырдмӕ фыццаг хатт чи ӕрбацӕуа, уыдонӕй нӕ цы фӕнды фехъусын?
13 Кӕй зӕгъын ӕй хъӕуы, мах нӕ фӕнды, цӕмӕй нӕ фембӕлдтӕ чырыстон аргъуанты службӕты хуызӕн уой. Нӕ фембӕлдтӕ хъуамӕ ма уой уазал, ма дзы уа цӕстмӕ митӕ кӕнӕ та ахӕм хъӕр-хъӕлӕба, раст цыма рок-концерт у, уыйау. Мах фӕнды, цӕмӕй-иу нӕ фембӕлдты кӕрӕдзийыл бацин кӕнӕм, фӕлӕ нӕхи хъуамӕ афтӕ ма дарӕм, цыма исты хиирхӕфсӕн бынаты стӕм. Мах ӕрӕмбырд вӕййӕм Йегъовӕйӕн кувынмӕ, ӕмӕ уымӕ гӕсгӕ фембӕлдтӕ дӕр алкӕддӕр хъуамӕ уой уаг ӕмӕ ӕгъдауыл. Зӕрдиагӕй нӕ фӕнды, цӕмӕй, фыццаг хатт чи ӕрбацӕуа, уыдон ӕмбырдмӕ куы байхъусой, не ’гъдау ӕмӕ, нӕ сывӕллӕттӕ сӕхи куыд дарынц, уый куы феной, уӕд зӕгъой: «Ӕцӕгдӕр, Хуыцау уемӕ ис» (1 Коринфӕгтӕм 14:25).
Хуыцауӕн кӕй кувӕм, уый алкӕддӕр цӕмӕй уыд бӕрӕг
14, 15. а) Цӕмӕй нӕ Хуыцауы хӕдзар рохуаты ма уадзӕм, уый тыххӕй нӕ цы хъӕуы аразын? ӕ) Исайы 66:23 ныхӕстӕ абон дӕр куыд ӕххӕст кӕнынц?
14 Райдианы куыд загътам, афтӕмӕй Йегъовӕ ӕмбырд кӕны йӕ адӕмы, ӕмӕ уыдон цин кӕнынц йӕ «кувӕн хӕдзары», йӕ ӕнӕуынгӕ кувӕндоны (Исай 56:7). Хуыцауыл иузӕрдион лӕг Нееми йӕ рӕстӕджы цӕрӕг дзуттӕгтӕн сӕ зӕрдыл ӕрлӕууын кодта, кувӕндонмӕ, куыд ӕмбӕлы, ахӕм цӕстӕй кӕй хъуамӕ кӕсой ӕмӕ уыцы хъуыддагӕн мысайнӕгтӕ кӕй хъуамӕ дӕттой. Уый сын загъта: «Нӕ Хуыцауы хӕдзар хъуамӕ рохуаты ма уадзӕм» (Нееми 10:39). Уӕдӕ нӕ Йегъовӕ кӕй фӕхуыдта, ӕрбацӕут мӕ «кувӕн хӕдзармӕ» ӕмӕ мын кувут, зӕгъгӕ, уымӕ мах дӕр хъуамӕ куыдфӕндыйы цӕстӕй ма кӕсӕм.
15 Исай йӕ пехуымпарады равдыста, Хуыцауӕн кувынмӕ иудадзыг ӕмбырд кӕнын ӕнӕмӕнг кӕй хъӕуы. Уый загъта ахӕм ныхӕстӕ: «„Уӕд иу ног мӕйӕ иннӕ ног мӕймӕ, иу сабатӕй иннӕ сабатмӕ алы адӕймаг дӕр цӕудзӕн кувынмӕ мӕ размӕ“,– дзуры Йегъовӕ» (Исай 66:23). Уыцы ныхӕстӕ ӕххӕст кӕнынц абон. Чырыстӕттӕ иудадзыгдӕр – алы мӕй дӕр, алы къуыри дӕр – иумӕ Йегъовӕйӕн кувынц. Уымӕ хауы фембӕлдтӕм цӕуын ӕмӕ хорз хабар хъусын кӕнын. Ды дӕр, Йегъовӕйӕн кӕм кувынц, уырдӕм ӕдзух цӕуыс?
16. Фембӕлдтӕм ныридӕгӕн дӕр ӕдзух цӕмӕн хъуамӕ цӕуӕм?
16 Фӕлӕ, Исайы 66:23 цы фыст ис, уый кӕронмӕ сӕххӕст уыдзӕн, Йегъовӕ зӕрдӕ кӕмӕй бавӕрдта, уыцы ног дунейы. Уӕд ӕцӕгдӕр «алы адӕймаг дӕр», къуырийӕ-къуыримӕ, мӕйӕ-мӕймӕ, цӕудзӕн Йегъовӕйӕн кувынмӕ, ӕмӕ афтӕ уыдзӕн ӕнустӕм дӕр. Ног дунейы Йегъовӕйӕн кувынмӕ иудадзыг ӕмбырд кӕндзыстӕм. Ӕмӕ уӕд, Хуыцауӕн кӕм кувӕм, уыцы фембӕлдтӕм ныридӕгӕн дӕр ӕдзух хъуамӕ ма цӕуӕм?
17. «Уыцы бон куыд хӕстӕг кӕны, уый цас бӕлвырддӕр уынӕм, уыйас ноджы тынгдӕр» нӕ фембӕлдтӕм цӕуын цӕмӕн хъӕуы?
17 Кӕрон куыд ӕввахс кӕны, афтӕ хъуамӕ ноджы тынгдӕр архайӕм, Хуыцауӕн кӕм кувӕм, уыцы фембӕлдтӕм цӕуыныл. Нӕ фембӕлдтӕн куы аргъ кӕнӕм ӕмӕ сӕ табуйагыл куы нымайӕм, уӕд нӕ нӕ куыст ӕмӕ нӕ ахуыр нӕ хъыгдардзысты фембӕлдтӕм иудадзыг цӕуын. Мах ӕнӕмӕнг хъӕуы, не ’муырнджытимӕ кӕй ӕмбӕлӕм ӕмӕ афтӕмӕй цы хъару райсӕм, уый. Стӕй уым кӕрӕдзийы хуыздӕр базонӕм, кӕрӕдзийы ныфсыл ныфс бафтауӕм ӕмӕ «кӕрӕдзийы разӕнгард кӕнӕм уарзондзинад ӕмӕ хорз хъуыддӕгтӕм». Афтӕ аразын нӕ хъӕуы, «уыцы бон куыд хӕстӕг кӕны, уый цас бӕлвырддӕр уынӕм, уыйас ноджы тынгдӕр» (Дзуттӕгтӕм 10:24, 25). Цӕй уӕдӕ, нӕ фембӕлдтӕн кӕй аргъ кӕнӕм ӕмӕ сӕ табуйагыл кӕй нымайӕм, уый алкӕддӕр ӕвдисӕм нӕ аив уӕлӕдарӕс ӕмӕ нӕ хорз ӕгъдауӕй, стӕй сӕм ӕдзух кӕй цӕуӕм, уымӕй. Уӕд бӕрӕг уыдзӕн, табуйаг хъуыддӕгтӕм Йегъовӕйы цӕстӕй кӕй кӕсӕм.
Фарстытӕ фӕлхат кӕнынӕн
• Цӕмӕй бӕрӕг у, Йегъовӕйы адӕмы фембӕлдтӕ табуйагыл нымад кӕй хъуамӕ цӕуой, уый?
• Нӕ фембӕлдтӕ табуйаг цӕмӕ гӕсгӕ сты?
• Сывӕллӕттӕн сӕ бон куыд у ӕвдисын, фембӕлдтӕн кӕй аргъ кӕнынц ӕмӕ сӕ табуйагыл кӕй нымайынц?
• Фембӕлдтӕм ныридӕгӕн дӕр ӕдзух цӕмӕн хъуамӕ цӕуӕм?
[Фарстатӕ ахуыр кӕнынӕн]
[Нывтӕ 28 фарсыл]
Йегъовӕйӕн кӕм кувӕм, уыцы фембӕлдтӕ кӕмфӕнды ма уой, уӕддӕр нымад цӕуынц табуйагыл
[Ныв 31 фарсыл]
Сывӕллӕттӕ фембӕлдтӕм цӕуынц, цӕмӕй хъусой ӕмӕ ахуыр кӕной
