Дӕ уырнындзинад хъуыддӕгтӕй бӕрӕг уӕд

«Уырнындзинад... ӕнӕ хъуыддӕгтӕй мард у» (ИАКОВЫ 2:17).

1. Фыццаг чырыстӕттӕ сӕ уырнындзинадмӕ ӕмӕ сӕ хъуыддӕгтӕм дӕр сӕ хъус цӕмӕн дардтой?

ФЫЦЦАГ чырыстӕттӕн сӕ уырнындзинад бӕрӕг уыд сӕ цардӕй. Чырыстийы ахуыргӕнинаг Иаков фӕдзӕхста ӕппӕт чырыстӕтты дӕр: «Уыцы дзырд ӕххӕст дӕр кӕнут, ма ут, ӕрмӕстдӕр ӕй хъусгӕ чи кӕны... ахӕмтӕ». Стӕй ма загъта: «Буар ӕнӕ улӕфтӕй мард куыд у, афтӕ уырнындзинад дӕр ӕнӕ хъуыддӕгтӕй мард у» (Иаковы 1:22; 2:26). Уыцы ныхӕстӕ куы ныффыста, уӕдӕй 35 азы бӕрц куы рацыд, уӕддӕр ма чырыстӕттӕ сӕ уырнындзинад хъуыддӕгтӕй ӕвдыстой. Фӕлӕ, хъыгагӕн, се ’ппӕт нӕ. Йесо Смирнӕйы ӕмбырдӕй раппӕлыди, Сардисы ӕмбырдӕй та бирӕтӕн бауайдзӕф кодта: «Зонын дын дӕ хъуыддӕгтӕ: ды хӕссыс удӕгасы ном, фӕлӕ дӕ мард» (Раргомад 2:8–11; 3:1).

2. Чырыстӕттӕ цӕуыл хъуамӕ ахъуыды кӕной?

² Йесо разӕнгард кодта Сардисы чырыстӕтты (стӕй ма йын йӕ ныхӕстӕ уый фӕстӕ чи кастаид, уыдоны дӕр), цӕмӕй сӕм райдианы ӕцӕгдзинадмӕ цы уарзт уыди, уыцы уарзты зынг та ногӕй ссыгътаиккой ӕмӕ уырнындзинады ма бафынӕй уыдаиккой (Раргомад 3:2, 3). Уымӕ гӕсгӕ алчидӕр лӕмбынӕг ахъуыды кӕнӕд: «Мӕ хъуыддӕгтӕ цӕуыл дзурӕг сты? Мӕ уырнындзинад алы хъуыддагӕй дӕр бӕрӕг у, уацамынд кӕнӕ ӕмбырдмӕ куы нӕ хауа, уӕддӕр?» (Лукайы 16:10). Бирӕ цӕуылдӕрты ис дзурӕн, фӕлӕ ӕркӕсдзыстӕм ӕрмӕстдӕр иу хъуыддагмӕ: бадтытӕ ӕмӕ чырыстон чындзӕхсӕвтӕм.

Бадтытӕ

3. Библи бадтыты тыххӕй цы дзуры?

³ Чырыстӕттӕй ӕхсызгон кӕмӕн нӕ вӕййы, бадтмӕ сӕ куы фӕхоныц, уӕд. Йегъовӕ у «амондджын Хуыцау» ӕмӕ йӕ фӕнды, цӕмӕй йӕ лӕггадгӕнджытӕ дӕр уой амондджын ӕмӕ хъӕлдзӕг (1 Тимофеймӕ 1:11). Йегъовӕ сразӕнгард кодта паддзах Соломоны Библийы ацы хъуыды ныффыссын: «Мӕхицӕн загътон, зӕгъгӕ, куыд хорз у рӕстӕг хъӕлдзӕгӕй ӕрвитын, уымӕн ӕмӕ арвы бын адӕймагӕн хӕрын, нуазын ӕмӕ цин кӕнынӕй хуыздӕр ницы ис ӕмӕ фыдӕбон кӕнгӕйӕ хъуамӕ цин кӕна йӕ цӕргӕ-цӕрӕнбонты» (Екклесиаст 3:1, 4, 13; 8:15). Ӕмӕ адӕймаг афтӕ фӕцин кӕны, йӕ бинонтимӕ иумӕ фынгыл куы фӕбады кӕнӕ йе ’муырнджытимӕ бадты куы вӕййы, уӕд (Иов 1:4, 5, 18; Лукайы 10:38–42; 14:12–14).

4. Бадт чи араза, уый йӕ хъус цӕмӕ хъуамӕ ’рдара?

⁴ Ахӕм бадт скӕныны фӕнд дӕм куы уа, кӕнӕ дын куы бахӕс кӕной ахӕм бадтмӕ хъус фӕдарын, уӕд дӕ алцӕуылдӕр хъӕудзӕн лӕмбынӕг ахъуыды кӕнын, кӕд дзы цалдӕр адӕймаджы йеддӕмӕ нӕ уа, уӕддӕр (Ромӕгтӕм 12:13). Кӕд дӕ фӕнды, цӕмӕй «алцыдӕр уа уаг ӕмӕ ӕгъдауыл», уӕд «уӕлейӕ ӕрцӕугӕ зондӕй» архай (1 Коринфӕгтӕм 14:40; Иаковы 3:17). Апостол Павел дӕр уый тыххӕй дзырдта: «Хӕргӕ кӕнат, нуазгӕ кӕнат ӕви ӕндӕр исты аразат,–  алцыдӕр аразут Хуыцауы кадӕн. Къуылымпыйы хос ма ут» (1 Коринфӕгтӕм 10:31, 32). Цӕмӕ хъӕуы уӕлдай тынгдӕр хъус ӕрдарын? Цавӕрдӕр хъуыддӕгтыл рагацау куы ахъуыды кӕнай, уӕд дӕхӕдӕг дӕр ӕмӕ дӕ уазджытӕ дӕр уырнындзинад хъуыддагӕй ӕвдисдзысты (Ромӕгтӕм 12:2).

Бадты цавӕр ӕгъдау хъуамӕ уа?

5. Цӕмӕн хъӕуы лӕмбынӕг хъуыды кӕнын бадты карз нозт ӕрӕвӕрыны ӕмӕ музыкӕйы тыххӕй?

⁵ Бирӕтӕ фӕхъуыды кӕнынц, бадты карз нозт ӕрӕвӕрой ӕви нӕ, ууыл. Ӕнӕ нозтӕй дӕр бадт хорз рауайы. Нӕ зӕрдыл ма ’рлӕууын кӕнӕм, Йесо бирӕ адӕмы куы бафсӕста, уыцы хабар – уый сбирӕ кодта цалдӕр дзул ӕмӕ кӕсаг. Фӕлӕ ма уӕд Йесо адӕмӕн диссаджы хуызы сӕн дӕр кӕй радта, уый тыххӕй Библийы ницы фыст ис, кӕд уый скӕнын йӕ бон уыд, уӕддӕр (Матфейы 14:14–21). Кӕд фынгыл карз нозт ӕрӕвӕрын сфӕнд кӕнай, уӕд бӕрцӕй, стӕй чи нӕ нуазы, уыдонӕн та ӕрӕвӕр адджын дон (1 Тимофеймӕ 3:2, 3, 8; 5:23; 1 Петры 4:3). Хорз нӕ уыдзӕн, искӕмӕн тыххӕй нуазын кӕнын, цӕмӕй йыл нозт «калмау фӕхӕца» (Ӕмбисӕндтӕ 23:29–32). Фӕлӕ цы зӕгъӕн ис кӕфтытӕ ӕмӕ музыкӕйы тыххӕй та? Уӕ бадты музыкӕ куы уа, уӕд дӕ хъӕудзӕн лӕмбынӕг ӕркӕсын зарджытӕн сӕ ныхӕстӕм ӕмӕ цагъдмӕ (Колоссӕгтӕм 3:8; Иаковы 1:21). Бирӕ чырыстӕттӕ зонынц, ахӕм бадты «Паддзахады мелодитӕм» куы фӕхъусынц кӕнӕ уыцы зарджытӕ иумӕ куы фӕзарынц, уӕд сын уый цы удӕнцой ӕрхӕссы (Ефесӕгтӕм 5:19, 20). Стӕй ма хъус дарын хъӕуы, музыкӕ ӕгӕр хъӕрӕй куыд нӕ цӕгъда, уымӕ, цӕмӕй ныхас кӕнын дӕр ӕмӕ сыхӕгты дӕр ма хъыгдара (Матфейы 7:12).

6. Хӕдзары хицау йӕ уырнындзинад куыд равдисдзӕн, ныхас цӕуыл цӕуы ӕмӕ ӕндӕр хъуыддӕгтӕм йӕ хъус куыд дары, уымӕй?

⁶ Бадтыты рӕстӕг ӕфсымӕртӕ ӕмӕ хотӕн сӕ бон у бирӕ цӕуылдӕрты дзурын, исты хъӕрӕй кӕсын кӕнӕ цымыдисаг хабӕрттӕ дзурын. Ныхас, чырыстӕттӕн чи нӕ фидауы, ахӕм хъуыддӕгтӕм куы рахиза, уӕд хӕдзары хицауӕн йӕ бон у ныхас уӕзданӕй хорзырдӕм азилын. Хъуамӕ кӕса, цӕмӕй иу адӕймаг ныхас йӕхимӕ ма райса. Хъуыддаг афтӕ куы рауайа, уӕд хъуамӕ фысым бацархайа, цӕмӕй иннӕтӕн дӕр дзырды бар уа. Зӕгъӕм, ӕрыгӕтты истӕмӕй афӕрса кӕнӕ алчидӕр цӕуыл аныхас кӕна, ахӕм хъуыддагыл ӕрдзура. Ӕрыгӕттӕ дӕр ӕмӕ хистӕртӕ дӕр хъуамӕ райгондӕй баззайой. Ахӕм бадты зондджынӕй ӕмӕ уӕзданӕй разамынд куы дӕттай, уӕд иууылдӕр фендзысты «де ’мбаргӕдзинад» (Филиппӕгтӕм 4:5). Ӕмӕ бамбардзысты,  фидар уырнындзинад дӕм кӕй ис ӕмӕ уый дӕ царды алы хъуыддаджы дӕр бӕрӕг кӕй у.

Чындзӕхсӕвтӕ

7. Чындзӕхсӕв рагацау пълан кӕнын цӕмӕн хъӕуы?

⁷ Рӕстӕг ма хъӕлдзӕгӕй ӕрвитӕн ис чырыстон чындзӕхсӕвы. Хуыцауы рагон лӕггадгӕнджытӕ, уыимӕ Йесо ӕмӕ йӕ ахуыргӕнинӕгтӕ дӕр, цыдысты чындзӕхсӕвтӕм (Райдиан 29:21, 22; Иоанны 2:1, 2). Фӕлӕ цард куыд равдыста, афтӕмӕй чындзӕхсӕв рагацау спълан кӕнынӕн хъӕуы хъарутӕ ӕмӕ ӕмбаргӕдзинад, стӕй ма хъуыддагмӕ хъӕуы Хуыцауы цӕстӕй кӕсын дӕр. Чындзӕхсӕв хорз фадат у чырыстонӕн йӕ уырнындзинад равдисынӕн.

8, 9. Бирӕтӕ чындзӕхсӕвтӕ куыд аразынц, уымӕй куыд зыны 1 Иоанны 2:16, 17 цы кӕсӕм, уый?

⁸ Бирӕ адӕм нӕ зонынц, ӕмӕ сӕ хъӕугӕ дӕр нӕ кӕнынц, Хуыцауы раст уагӕвӕрдтӕ. Уыдонӕн чындзӕхсӕв у, сӕхи кӕм равдисой, се ’нӕгъдау митӕн сын кӕм нӕ бауайдзӕф кӕндзысты, ахӕм бынат. Европӕйы иу газеты иу сылгоймаг йӕ чындзӕхсӕвы тыххӕй фыста: «Нӕ чындзӕхсӕв уыди растдӕр паддзахы чындзӕхсӕвы хуызӕн. Нӕ разӕй цыдысты барджытӕ бӕхтыл, нӕ фӕстӕ та музыканттӕ. Нӕ фынгтыл цы нӕ ’рӕвӕрдтам, ахӕм нӕ уыд. Диссаджы чындзӕхсӕв рауад, раст мӕн куыд фӕндыд, афтӕ!»

⁹ Кӕд алы бӕстӕйы дӕр йӕхи ӕгъдӕуттӕ ис, уӕддӕр уыцы сылгоймаджы ныхӕстӕ бӕлвырд кӕнынц, апостол Иоанн цы ныффыста, уый: «Дунейы цыдӕриддӕр ис: тӕригъӕдджын буары монцтӕ, цӕстыты монцтӕ ӕмӕ мулкӕй ӕппӕлын – уыдон Фыдӕй не сты, фӕлӕ сты ацы дунейӕ». Куыд дӕм кӕсы, чырыстон адӕймаг паддзахы чындзӕхсӕвы хуызӕн стыр чындзӕхсӕв сараздзӕн? Уый нӕ, фӕлӕ сӕ чындзӕхсӕв куыд пълан кӕнынц, уымӕй бӕрӕг уыдзӕн, сӕ зӕрдыл кӕй дарынц ацы ныхӕстӕ: «Хуыцауы фӕндон чи ӕххӕст кӕны, уый... цӕрдзӕн ӕнустӕм» (1 Иоанны 2:16, 17).

10. а) Цӕмӕй чындзӕхсӕв хорз ацӕуа, уый тыххӕй йӕ рагацау пълан кӕнын цӕмӕн хъӕуы? ӕ) Уазджытӕ хонгӕйӕ цӕуыл хъӕуы ахъуыды кӕнын?

¹⁰ Чындзӕхсӕв чи кӕндзӕн, уыдон хъуамӕ хъуыддагмӕ кӕсой раст цӕстӕй, уой ӕмбаргӕ, ӕмӕ сын уымӕн баххуыс кӕндзӕн Библи. Чындзӕхсӕвы бон у ахсджиаг бон. Фӕлӕ рох кӕнын нӕ хъӕуы, уый дыууӕ удӕн сӕ иумӕйаг ӕнусон царды райдиан кӕй у. Ӕнӕмӕнг сӕ нӕ хъӕуы чындзӕхсӕвы стыр фынгтӕ ӕрӕвӕрын. Кӕд фынгтӕ ӕвӕрдзысты, уӕд сӕ хъӕудзӕн сӕ хӕрдзтӕ банымайын ӕмӕ алцӕуылдӕр лӕмбынӕг ахъуыды кӕнын (Лукайы 14:28). Библимӕ гӕсгӕ нӕлгоймаг у бинонты хицау (1 Коринфӕгтӕм 11:3; Ефесӕгтӕм 5:22, 23). Уымӕ гӕсгӕ чындзӕхсӕв цӕттӕ кӕнгӕйӕ лӕппуйыл фылдӕр хӕстӕ ис. Кӕй зӕгъын ӕй хъӕуы, йӕ чындзагимӕ бауынаффӕ кӕндзӕн, кӕй ӕмӕ цал адӕймаджы фӕхондзысты, ууыл. Чи зоны сӕ бон нӕ уа се ’мбӕлттӕ ӕмӕ сӕ хиуӕттӕй алкӕйдӕр фӕхонын. Уый тыххӕй сӕ хъӕуы ӕмбаргӕ уынаффӕтӕ хӕссын. Чындзӕхсӕв чи кӕны, уыдон хъуамӕ ма дызӕрдыг кӕной, се ’мчырыстӕттӕй кӕй нӕ фӕхоной, уыдон сӕ кӕй бамбардзысты ӕмӕ сӕм кӕй нӕ фӕхъыг уыдзысты (Екклесиаст 7:9).

Бадты разамынддӕттӕг

11. Чындзӕхсӕвмӕ йӕ хъус чи дардзӕн, уый цы хъуамӕ араза?

¹¹ Лӕппу ӕмӕ чызг сӕ чындзӕхсӕвмӕ искӕй куы хоной, уӕд сын цы баххуыс кӕндзӕн, цӕмӕй алцыдӕр кад ӕмӕ ӕгъдауыл ацӕуа? Ацы хъуыддаджы Йегъовӕйы Ӕвдисӕнтӕн бафӕзминаг у, Чырысти Канӕйы цы чындзӕхсӕвы уыд,  уым цы ӕгъдау уыд, уый. Уыцы чындзӕхсӕвы алцӕмӕ дӕр йӕ хъус дардта «къӕбицы хицау» – бӕрнон адӕймаг (Иоанны 2:9, 10). Уымӕ гӕсгӕ ӕмбаргӕ усгур равзардзӕн уырнындзинады фидар ӕфсымӕры, цӕмӕй алцӕмӕ дӕр йӕ хъус дара. Уый базондзӕн, лӕппуйы цы ӕмӕ куыд фӕнды, стӕй рагацау алцӕуыл дӕр бӕстон ахъуыды кӕндзӕн ӕмӕ чындзӕхсӕвы бон алцӕмӕ дӕр кӕсдзӕн.

12. Фынгыл карз нозт уа ӕви нӕ, ууыл хъуыды кӕнгӕйӕ усгур йӕ зӕрдыл цы хъуамӕ дара?

¹² Фӕндзӕм абзацы цӕуыл ныхас кодтам, уымӕ гӕсгӕ, чи зоны, лӕппу ӕмӕ чызджы бафӕнда, цӕмӕй фынгтыл карз нозт ма уа, ӕмӕ сӕ цины бон ма фехӕла (Ромӕгтӕм 13:13; 1 Коринфӕгтӕм 5:11). Фӕлӕ нозт куы ’вӕрой, уӕд та хъуамӕ уа бӕрцӕй. Йесо Канӕйы цы чындзӕхсӕвы уыд, уым фынгтыл уыд сӕн. Стӕй ма сын донӕй хорз сӕн дӕр сарӕзта. «Къӕбицы хицау» ма афтӕ дӕр загъта: «Алчи фынгыл фыццаг хорз сӕн ӕрӕвӕры, ӕмӕ адӕм куы фӕнозтджын вӕййынц, уӕд та – ӕвзӕрдӕр. Ды та хорз сӕн нырмӕ ныууагътай» (Иоанны 2:10). Кӕй зӕгъын ӕй хъӕуы, Йесойы нӕ фӕндыд, цӕмӕй адӕм фыднозт бакодтаиккой, уымӕн ӕмӕ уый ӕвзӕр хъуыддагыл нымадта (Лукайы 12:45, 46). «Къӕбицы хицауы» ныхӕстӕй бӕрӕг у, афтӕ дӕр-иу кӕй уыд ӕмӕ-иу чындзӕхсӕвты уазджытӕ фӕрасыг сты (Хъуыддӕгтӕ 2:15; 1 Фессалоникӕгтӕм 5:7). Уӕдӕ усгур дӕр, ӕмӕ чындзӕхсӕвмӕ йӕ хъус чи дара, уыцы фӕлтӕрд ӕфсымӕр дӕр хъуамӕ къӕрцхъус уой, цӕмӕй иууылдӕр ацы бӕлвырд уагӕвӕрдмӕ гӕсгӕ сӕхи дарой: «Уӕхи сӕнӕй ма ныррасыг кӕнут – уый адӕймаджы ӕркӕны ӕнӕгъдау митӕм» (Ефесӕгтӕм 5:18; Ӕмбисӕндтӕ 20:1; Оси 4:11).

13. Чындзӕхсӕвы музыкӕ куы уа, уӕд лӕппу ӕмӕ чызг цӕуыл хъуамӕ ахъуыды кӕной ӕмӕ цӕмӕн?

¹³ Чындзӕхсӕвы музыкӕ куы уа, уӕд ӕгӕр хъӕр ма уӕд, цӕмӕй адӕмы ныхас кӕнын ма хъыгдара. Иу чырыстон хистӕр нӕлгоймаг афтӕ загъта: «Изӕрырдӕм, уазджытӕ куы бахъӕлдзӕг вӕййынц ӕмӕ хъазт куы райдайы, уӕд иуӕй-иу хатт музыкӕ ӕгӕр хъӕрӕй цӕгъдын райдайы ӕмӕ адӕм кӕрӕдзийы дӕр нал фӕхъусынц. Чындзӕхсӕв у хорз фадат рӕстӕг хъӕлдзӕгӕй арвитынӕн. Куыд хорз уаид, ӕмӕ нӕ музыкӕ куы нӕ хъыгдарид!» Ам дӕр та усгур ӕмӕ, чындзӕхсӕвмӕ йӕ хъус чи дары, уыцы ӕфсымӕр хъуамӕ ӕмбаргӕ уой. Музыкантты ӕххуырсгӕ бакӕной ӕви нӕ, уӕддӕр сӕ хъуамӕ сӕхи бар ма уадзой – бар сын ма дӕттой, цӕмӕй хъӕрӕй цӕгъдой. Павел фыста: «Ӕмӕ цыфӕнды ма аразат,– ныхасӕй уа ӕви хъуыддагӕй,– ӕппӕт дӕр аразут нӕ Хицау Йесойы номыл, ӕмӕ уый номӕй алцӕй тыххӕй дӕр арфӕ кӕнут Хуыцауӕн, нӕ Фыдӕн» (Колоссӕгтӕм 3:17). Чындзӕхсӕвы фӕстӕ уазджытӕ сӕ зӕрдыл цы бадардзысты? Цы музыкӕ дзы уыд, уымӕй бӕрӕг уыдзӕн, лӕппу ӕмӕ чызг алцыдӕр Йесойы кадӕн кӕй кодтой, уый?

14. Чырыстон чындзӕхсӕвӕй адӕймаг цы хъуамӕ бахъуыды кӕна?

¹⁴ О, хорз цы чындзӕхсӕв спълан кӕнынц, уый ӕхсызгонӕй ӕрымысынц. Адам ӕмӕ Эдитӕ (иумӕ цӕрынц 30 азы) иу чындзӕхсӕвы тыххӕй загътой: «Уый ӕцӕг чырыстон чындзӕхсӕв уыд. Уым зарыдысты Йегъовӕйы кады зарджытӕ, фӕлӕ дзы ӕндӕр хорз ирхӕфсӕнтӕ дӕр уыд. Кӕфтытӕ ӕмӕ музыкӕ сӕйраг нӕ уыдысты. Алцыдӕр уыд хорз ӕмӕ Библийы уагӕвӕрдтӕм гӕсгӕ». Уӕдӕ бӕрӕг  у, лӕппу ӕмӕ чызгӕн бирӕ цӕмӕйдӕрты у сӕ бон сӕ уырнындзинад хъуыддагӕй равдисын.

Лӕвӕрттӕ чындзӕхсӕвмӕ

15. Чындзӕхсӕвмӕ лӕвар куы кӕнай, уӕд Библийӕ цавӕр уынаффӕ хъӕуы зӕрдыл дарын?

¹⁵ Бирӕ бӕстӕты хиуӕттӕ ӕмӕ зонгӕтӕ чындзӕхсӕвмӕ фӕкӕнынц лӕвӕрттӕ. Кӕд дӕу дӕр исты балӕвар кӕнын фӕнды, уӕд цӕуыл хъуамӕ ахъуыды кӕнай? Дӕ зӕрдыл ма ӕрлӕууын кӕн, апостол Иоанн «мулкӕй ӕппӕлыны» тыххӕй цы загъта, уый. Зӕгъгӕ, афтӕ кӕнынц, сӕ уырнындзинад хъуыддагӕй чи ӕвдисы, уыцы чырыстӕттӕ нӕ, фӕлӕ ацы мӕнг, рӕстӕгмӕ дуне (1 Иоанны 2:16, 17). Иоанны ныхӕстӕм гӕсгӕ, чи цы балӕвар кодта, уый дзурын хъӕуы? Македони ӕмӕ Ахайы чырыстӕттӕ Иерусалимы ӕфсымӕртӕн баххуыс кодтой, фӕлӕ Библийы сӕ нӕмттӕ фыст не сты (Ромӕгтӕм 15:26). Чындзӕхсӕвмӕ лӕвӕрттӕ чи фӕкӕны, уыцы чырыстӕттӕй бирӕты нӕ фӕфӕнды, цӕмӕй сын сӕ нӕмттӕ дзурой. Ацы хъуыддаджы нӕ рох кӕнын нӕ хъӕуы Йесойы ныхӕстӕ, фыст сты Матфейы 6:1–4.

16. Чызг ӕмӕ лӕппу сӕ зӕрдыл цы хъуамӕ дарой, цӕмӕй лӕвӕрттӕ исгӕйӕ макӕй фефсӕрмы кӕной?

¹⁶ Чи цы балӕвар кодта, уый дзурын нӕ хъӕуы, цӕмӕй ерыс кӕнынмӕ ма ардауӕм, зӕгъгӕ, кӕй лӕвар хуыздӕр кӕнӕ зынаргъдӕр у. Уымӕ гӕсгӕ къай нӕ дзурдзӕн, лӕвӕрттӕ сын чи ’рбахаста, уыдоны нӕмттӕ, цӕмӕй, йӕ бон лӕвар скӕнын кӕмӕн нӕ уыд, уыдон ма фефсӕрмы уой (Галатӕгтӕм 5:26; 6:10). Кӕй зӕгъын ӕй хъӕуы, чызг ӕмӕ лӕппуйӕн чи цы балӕвар кодта, уый зонын ӕвзӕр нӕу. Лӕвар кӕй номӕй у, уый сӕ бон у базонын, лӕваримӕ цы гӕххӕтт уа, уымӕй, фӕлӕ йӕ хъӕрӕй кӕсын нӕ хъӕуы. Лӕвар ӕлхӕнгӕ кӕнӕм, искӕмӕн ӕй дӕттӕм, йе та йӕ нӕхицӕн дӕттой, уый дӕр хорз фадат у нӕ уырнындзинад хъуыддӕгтӕй равдисынӕн *.

17. Чырыстӕттӕн сӕ уырнындзинад цӕмӕй хъуамӕ уа бӕрӕг?

¹⁷ Нӕ фидар уырнындзинад хъуамӕ бӕрӕг уа ӕрмӕст нӕ хӕрзӕгъдау цардӕй, ӕмбырдтӕм ӕмӕ уацамынды кӕй цӕуӕм, уымӕй нӕ, фӕлӕ ма нӕ царды алы хъуыддагӕй дӕр. О, нӕ уырнындзинад нӕ бон у ӕвдисын, «кӕронмӕ кӕй ахӕццӕ кӕнӕм», уыцы хъуыддӕгтӕй ӕмӕ уымӕ хауы, уӕлдӕр цӕуыл дзырдтам, уый дӕр (Раргомад 3:2).

18. Иоанны 13:17 цы фыст ис, уый куыд хауы чындзӕхсӕвтӕм дӕр ӕмӕ бадтытӕм дӕр?

¹⁸ Йесо йӕ иузӕрдион апостолтӕн сӕ къӕхтӕ куы ныхсадта, уӕд сын загъта: «Кӕд уый зонут ӕмӕ афтӕ кӕнут, уӕд амондджын стут» (Иоанны 13:4–17). Кӕм цӕрыс, уым, ӕвӕццӕгӕн, ис йе та нӕй ахӕм ӕгъдау, ӕмӕ уазӕгӕн йӕ къӕхтӕ ӕхсой. Ацы статьяйы куыд ӕркастыстӕм, афтӕмӕй царды ис бирӕ ӕндӕр фӕзилӕнтӕ дӕр, нӕ бон кӕм у равдисын нӕ уырнындзинад уарзгӕйӕ, не ’рхъуыдыдзинадӕй, зӕгъӕм, ӕнӕуи бадтыты кӕнӕ чындзӕхсӕвты. Уӕдӕ чындзӕхсӕв нӕхицӕн уа, ӕви нӕ ӕндӕр искӕй чындзӕхсӕвмӕ фӕхоной кӕнӕ нын не ’мчырыстӕттимӕ бадт уа, уӕддӕр нӕ бон у нӕ уырнындзинад хъуыддӕгтӕй ӕвдисын.

[Фиппаинаг]

Цавӕр дзуапп ратдзынӕ?

Дӕ бон куыд у дӕ уырнындзинад ӕвдисын

• бадтытӕ аразгӕйӕ?

• чындзӕхсӕв кӕнгӕйӕ?

• чындзӕхсӕвмӕ лӕвӕрттӕ кӕнгӕйӕ кӕнӕ сӕ исгӕйӕ?

[Фарстатӕ ахуыр кӕнынӕн]

[Ныв 18 фарсыл]

Цалдӕр адӕймаджы куы хонай, уӕддӕр «уӕлейӕ ӕрцӕугӕ зондӕй» архай