Ӕмбырдтӕ фидар кӕнӕнт

«Ӕмбырдтӕн скодта сабыр рӕстӕг, ӕмӕ фидарӕй-фидардӕр кодтой» (ХЪУЫДДӔГТӔ 9:31).

1. Цавӕр фарстытӕ фӕзыны «Хуыцауы ӕмбырды» тыххӕй?

НӔ ЭРӔЙЫ 33 азы Фӕндзайӕм бон Йегъовӕ равзӕрста Йесо Чырыстийы ахуыргӕнинӕгты ӕмӕ сӕ схуыдта йӕ ног адӕм, «Хуыцауы Израил» (Галатӕгтӕм 6:16). Ӕмӕ ма Библийы куыд кӕсӕм, афтӕмӕй сыгъдӕг удӕй сӕрст чырыстӕттӕ систы «Хуыцауы ӕмбырд» дӕр (1 Коринфӕгтӕм 11:22). Фӕлӕ уый куыд ӕмбаргӕ у? «Хуыцауы ӕмбырд» куыд арӕзт у? Ӕмбырд ӕгас зӕххыл куыд хъуамӕ архайдтаид? Уыдӕттӕ нӕ цардыл куыд баст сты ӕмӕ нын нӕ циныл цин куыд ӕфтауынц?

2, 3. Йесо куыд бамбарын кодта, ӕмбырд куыд арӕзт уыдзӕн, уый?

² Раззаг статьяйӕ базыдтам, Йесо кӕй дзырдта, сӕрст фӕдылдзӕуджыты ӕмбырд кӕй фӕзындзӕн, уый тыххӕй. Апостол Петрӕн загъта: «Ацы къӕдзӕхдурыл [Йесо Чырыстийыл] ӕз сараздзынӕн ме ’мбырд, ӕмӕ йӕ ингӕны дуӕрттӕ нӕ бауромдзысты» (Матфейы 16:18). Уымӕй уӕлдай ма, Йесо цалынмӕ йӕ апостолтимӕ уыд, уӕдмӕ сӕ ахуыр кодта, уыцы ӕмбырд куыд хъуамӕ архайдтаид ӕмӕ дзы цы ӕгъдау хъуамӕ уыдаид, ууыл.

³ Йесо ныхӕстӕй дӕр ӕмӕ хъуыддӕгтӕй дӕр равдыста, ӕмбырды иуӕй-иутӕ сӕхимӕ разамынд кӕй исдзысты ӕмӕ афтӕмӕй иннӕтӕн кӕй лӕггад кӕндзысты. Чырысти загъта: «Сымах зонут, ацы дунейы хицӕуттыл кӕй нымайынц, уыдон сӕхи адӕмӕн ӕлдӕрттӕ кӕй кӕнынц ӕмӕ сын сӕ дзырддзӕугӕ лӕгтӕ сӕхи хицау кӕй кӕнынц. Фӕлӕ сымах хъуамӕ афтӕ ма кӕнат. Кӕй уӕ фӕнды, цӕмӕй дзырддзӕугӕ уа, уый уын хъуамӕ уа лӕггадгӕнӕг. Ӕмӕ уӕ кӕй фӕнды, цӕмӕй уа фыццаг, уый се ’ппӕтӕн дӕр хъуамӕ уа цагъар» (Марчы 10:42–44). Бӕрӕг у, «Хуыцауы ӕмбырды», кӕй куыд фӕндыд, афтӕ хъуамӕ ма лӕггад кодтаид, фӕлӕ иууылдӕр иумӕ ӕмвӕндӕй.

4, 5. Ӕмбырдӕн разамынд дӕттын кӕй хъӕуы, уый кӕцӕй зонӕм?

⁴ Йесо – «Хуыцауы ӕмбырды» сӕргъы чи хъуамӕ слӕууыдаид, уый – йӕ апостолтӕн ӕмӕ иннӕ ахуыргӕнинӕгтӕн загъта, ӕмбырды сыл цы хӕстӕ хъуамӕ уыдаид, уый тыххӕй. Цы хъуамӕ арӕзтаиккой? Хъуамӕ ӕххӕст кодтаиккой ахсджиаг хъуыддаг: ӕмбырды адӕмы ахуыр кодтаиккой Йегъовӕйы закъӕттыл. Йесо куы райгас, уӕд иннӕ апостолты цур Петры бафарста, уарзыс мӕ, зӕгъгӕ. Петр ын загъта: «О, Хицау, куы йӕ зоныс, кӕй дӕ уарзын». Уӕд ын Йесо загъта: «Хиз мын мӕ уӕрыччыты... Кӕс мын мӕ гыццыл фыстӕм... Хиз мын мӕ гыццыл фысты» (Иоанны 21:15–17). Цӕй стыр хъуыддаг ын бакодта йӕ бӕрны!

⁵ Ацы ныхӕстӕй уынӕм, ӕмбырдмӕ чи цыд, уыцы адӕмы Йесо уӕтӕры фыстимӕ кӕй абарста. Уыцы «фыстӕн» кӕнӕ чырыстӕттӕн – нӕлгоймӕгтӕн, сылгоймӕгтӕн ӕмӕ сывӕллӕтӕн – хъуыд Хуыцауы Ныхас ӕмбарын кӕнын ӕмӕ сӕ хорз «хизын». Уымӕй уӕлдай ма, Йесо загъта, йӕ фӕдылдзӕуджытӕ се ’ппӕт дӕр иннӕты кӕй хъуамӕ ахуыр кӕной. Йӕ ахуыргӕнинаг чи суыдаид, уый та хъуамӕ ахуыр кодтаиккой уыцы фӕдзӕхст ӕххӕст кӕнын (Матфейы 28:19, 20).

6. «Хуыцауы ӕмбырды» цы ’рцыд арӕзт?

⁶ «Хуыцауы ӕмбырд» куы фӕзынд, уӕд чырыстӕттӕ ӕдзух ӕмбырд кодтой, цӕмӕй ахуыр кодтаиккой ӕмӕ кӕрӕдзи фидар кодтаиккой. «Уыдон дарддӕр дӕр, апостолтӕ цы амыдтой, уымӕ зӕрдиагӕй хъуыстой, алцӕмӕй дӕр кӕрӕдзийӕн хай кодтой, иумӕ хордтой ӕмӕ ӕдзухдӕр куывтой» (Хъуыддӕгтӕ 2:42, 46, 47). Стӕй ма Библийы кӕсӕм,  йӕ уырнындзинад фидар кӕмӕн уыд, уыцы нӕлгоймӕгтӕн-иу кӕй бахӕс кодтой алыхуызон хъуыддӕгты ӕххуыс кӕнын. Уыцы нӕлгоймӕгты, ахуыргонд кӕнӕ курдиатджын кӕй уыдысты, уый тыххӕй не ’взӕрстой. Уыдон уыдысты «сыгъдӕг удӕй ӕмӕ зондӕй хайджын». Сӕ иу уыд Стефан, Библи йӕ хоны «фидар уырнындзинады хицау ӕмӕ сыгъдӕг удӕй хайджын». Уӕдӕ ӕмбырдты фӕрцы «Хуыцауы ныхасӕн... бауромӕн нӕ уыд, ӕмӕ ахуыргӕнинӕгтӕ Иерусалимы фылдӕрӕй-фылдӕр кодтой» (Хъуыддӕгтӕ 6:1–7).

Хуыцау кӕй уылты ӕххуыс кӕны, уыцы нӕлгоймӕгтӕ

7, 8. а) Иерусалимы апостолтӕ ӕмӕ хистӕр нӕлгоймӕгтыл цы хӕстӕ уыд? ӕ) Ӕмбырдты уылты-иу цы уынаффӕ фехъусын кодтой, уый-иу ӕфсымӕртыл ӕмӕ хотыл куыд фӕзынд?

⁷ Фыццаг ӕмбырды разамынд сӕхимӕ апостолтӕ райстой, фӕлӕ ӕрмӕст уыдон нӕ. Хъуыддӕгтӕ 14:27 кӕсӕм, Павел йе ’мбӕлттимӕ сирийаг Антиохимӕ куы аздӕхт, уӕд цы ’рцыд, уый тыххӕй: «Уырдӕм куы ’рхӕццӕ сты, уӕд фӕдзырдтой ӕмбырды адӕммӕ ӕмӕ сын радзырдтой, Хуыцау сӕ къухӕй цы бирӕ хъуыддӕгтӕ сарӕзта». Антиохийы ӕмбырды ма куы уыдысты, уӕд фӕзынд фарст: дзуттаг чи нӕ уыд, уый сунӕт кӕнын хъӕуы ӕви нӕ. Уыцы хъуыддаг аскъуыддзаг кӕныны тыххӕй, Павел ӕмӕ Варнавӕйы арвыстой «Иерусалиммӕ апостолтӕм ӕмӕ хистӕр нӕлгоймӕгтӕм», разамонӕг советмӕ (Хъуыддӕгтӕ 15:1–3).

⁸ «Апостолтӕ ӕмӕ хистӕр нӕлгоймӕгтӕ [куы] ӕрӕмбырд сты уыцы хъуыддаджы фӕдыл», уӕд семӕ уыд хистӕр нӕлгоймаг Иаков дӕр, Йесойы ӕфсымӕр (апостол нӕ уыд) (Хъуыддӕгтӕ 15:6). Уыцы фарстайыл бӕстон аныхас кодтой ӕмӕ сыгъдӕг уды ӕххуысӕй Фыстадмӕ гӕсгӕ раст уынаффӕ рахастой, стӕй уый тыххӕй ӕмбырдтӕм писмо арвыстой (Хъуыддӕгтӕ 15:22–32). Ӕмбырдтӕ уыцы уынаффӕмӕ байхъуыстой. Уый сыл куыд фӕзынд? Ӕфсымӕрты ӕмӕ хоты уырнындзинад бафидар. Библийы фыст ис: «Афтӕмӕй ӕмбырдты ахуыргӕнинӕгты уырнындзинад фидардӕр кодта ӕмӕ бонӕй-бонмӕ фылдӕр кодтой» (Хъуыддӕгтӕ 16:5).

9. Библимӕ гӕсгӕ фӕлтӕрд чырыстон нӕлгоймӕгтыл ӕмбырды цы хӕстӕ ис?

⁹ Фӕлӕ ӕнӕуи та ӕмбырдтӕ куыд архайдтой? Ӕркӕсӕм, Криты цы ӕмбырдтӕ уыд,  уыдонмӕ. Кӕд Криты цӕрӕг адӕмӕн сӕ фылдӕр ӕвзӕр хъуыддӕгтӕ арӕзтой, уӕддӕр дзы иуӕй-иутӕ сӕ цард фӕивтой ӕмӕ ӕцӕг чырыстӕттӕ систы (Титмӕ 1:10–12; 2:2, 3). Уыдон цардысты алы горӕтты ӕмӕ дард уыдысты Иерусалимӕй, разамонӕг совет кӕм уыд, уырдыгӕй. Фӕлӕ сӕ уый ницӕмӕй къуылымпы кодта, уымӕн ӕмӕ, алы ӕмбырды куыд уыд, афтӕ Криты ӕмбырдты дӕр снысан кодтой «хистӕр нӕлгоймӕгты». Уыдон ӕххӕст кодтой, Библи хистӕр нӕлгоймӕгтӕй цы домы, уый. Хъуамӕ «раст ахуырады фӕрцы зонд амыдтаиккой ӕмӕ, ныхмӕ чи дзуры, уыдонӕн уайдзӕф кодтаиккой» (Титмӕ 1:5–9; 1 Тимофеймӕ 3:1–7). Иннӕ фӕлтӕрд нӕлгоймӕгтӕ та лӕггад кодтой кӕстӕриуӕггӕнӕг ӕфсымӕртӕй, цӕмӕй ӕххуыс кодтаиккой ӕмбырдтӕн (1 Тимофеймӕ 3:8–10, 12, 13).

10. Матфейы 18:15–17 гӕсгӕ, зын хъуыддӕгтӕ куыд лыг кӕнын хъуыд?

¹⁰ Ӕмбырд афтӕ арӕзт кӕй уыдзӕн, уый тыххӕй ма Йесо дӕр дзырдта. Матфейы 18:15–17 кӕсӕм йӕ ныхӕстӕ, зӕгъгӕ-иу, хаттӕй-хатт Хуыцауы лӕггадгӕнджыты ’хсӕн быцӕутӕ дӕр кӕй уыдзӕн, иу иннӕйы кӕй фӕхъыг кодтаид, уый тыххӕй. Кӕй бафхӕрдтой, уый хъуамӕ бацыдаид иннӕмӕ ӕмӕ йын «йӕ рӕдыд хибарӕй загътаид». Кӕд афтӕмӕй хъуыддаг нӕ алыг кодтаиккой, уӕд та сӕ бон уыд, уыцы хъуыддаджы тыххӕй чи зыдта, иу кӕнӕ дыууӕ ахӕм адӕймагӕн зӕгъын, цӕмӕй сын баххуыс кодтаиккой. Фӕлӕ уавӕр уӕддӕр куы нӕ фӕивтаид, уӕд та? Йесо загъта: «Кӕд уыдонмӕ дӕр нӕ байхъуса, уӕд та зӕгъ ӕмбырдӕн. Ӕмӕ ӕмбырдмӕ дӕр куы нӕ байхъуса, уӕд та дын иннӕ адӕмӕй ӕмӕ хъалонисджытӕй уӕлдай ма уӕд». Йесо ацы уынаффӕтӕ куы радта, уӕд нырма «Хуыцауы ӕмбырды» ӕрмӕст дзуттӕгтӕ уыд, уымӕ гӕсгӕ уыцы ныхӕстӕ фыццаг уыдонмӕ хаудысты *. Фӕлӕ фӕстӕдӕр чырыстон ӕмбырд арӕзт куы ’рцыд, уӕд Йесойы ныхӕстӕ чырыстӕттӕм дӕр хаудысты. Уымӕй дӕр бӕрӕг уыд, Хуыцауы адӕм ӕмбырдты кӕй хъуамӕ уой, цӕмӕй алкӕй уырнындзинад дӕр фидар кӕна ӕмӕ йын разамынд лӕвӕрд цӕуа.

11. Ӕмбырдты-иу зын фарстатӕ куы фӕзынд, уӕд-иу хистӕр нӕлгоймӕгтӕ куыд баххуыс кодтой?

¹¹ Хистӕр нӕлгоймӕгтӕ кӕнӕ цӕстдарджытӕн сӕ бон уыд ӕмбырдты зын фарстатӕ, кӕнӕ-иу исчи тӕригъӕд куы сарӕзта, уӕд уыцы хъуыддӕгтӕ дӕр лыг кӕнын. Уый бар сын кӕй уыд, уый бӕрӕг у, Титмӕ 1:9 хистӕр нӕлгоймӕгты тыххӕй цы фыст ис, уымӕй. Кӕй зӕгъын ӕй хъӕуы, Титау хистӕр нӕлгоймӕгтӕ дӕр ӕнӕххӕст уыдысты. Фӕлӕ уӕддӕр Павел Титы арвыста ӕмбырдтӕм, цӕмӕй, «раст чи нӕу, уыцы хъуыддӕгтӕ сраст кодтаид» (Титмӕ 1:4, 5). Абон хистӕр нӕлгоймагӕй снысан кӕнынмӕ кӕй фӕнд кӕной, уымӕн йӕ уырнындзинад ӕмӕ йӕ иузӕрдиондзинад хъуамӕ уый размӕ дӕр бӕрӕг уа. Уымӕ гӕсгӕ, ӕмбырдты иннӕтӕн сӕ бон у ӕууӕндын, хистӕр нӕлгоймӕгты уылты сын цы амындтӕ ӕмӕ уынаффӕтӕ фӕдӕттынц, уыдоныл.

12. Хистӕр нӕлгоймӕгтыл ӕмбырды раз цы хӕстӕ ис?

¹² Ефесы ӕмбырды хистӕр нӕлгоймӕгтӕн Павел загъта: «Уӕдӕ лӕмбынӕг кӕсут уӕхимӕ ӕмӕ ӕгас дзугмӕ. Уыцы дзугӕн уӕ сыгъдӕг уд сӕвӕрдта фыййӕуттӕй, цӕмӕй хизат Хуыцауы ӕмбырд,– йӕ Фырты тугӕй кӕй балхӕдта, уыцы ӕмбырд» (Хъуыддӕгтӕ 20:28). Афтӕ абоны ӕмбырдты дӕр хистӕр нӕлгоймӕгты сӕвӕрынц, цӕмӕй «хизой Хуыцауы ӕмбырд». Уыцы хъуыддаг хъуамӕ аразой уарзондзинадимӕ, дзугӕн сӕхи хицӕуттӕ ма кӕной (1 Петры 5:2, 3). Цӕстдарджытӕ хъуамӕ ӕппӕт тыхтӕй архайой, цӕмӕй «ӕгас дзуг» фидар кӕной ӕмӕ йын ӕххуыс кӕной.

Ӕмбырдыл иузӕрдион у

13. Иуӕй-иу хатт ӕмбырды цы ’рцӕуы ӕмӕ цӕмӕн?

¹³ Ӕмбырды хистӕр нӕлгоймӕгтӕ дӕр  ӕмӕ иннӕтӕ дӕр сты ӕнӕххӕст. Уымӕ гӕсгӕ рӕстӕгӕй-рӕстӕгмӕ цыдӕр зындзинӕдтӕ фӕзыны. Афтӕ уыди фыццаг ӕнусы, апостолтӕй ма чидӕртӕ удӕгас куы уыд, уӕд дӕр (Филиппӕгтӕм 4:2, 3). Чи зоны, цӕстдарӕг кӕнӕ ӕндӕр чидӕр цы загъта, уый нӕм фӕкӕса дӕрзӕг, ӕнӕхсӕст кӕнӕ бынтондӕр раст чи нӕу, ахӕм ныхас. Кӕнӕ нӕ бон у афтӕ хъуыды кӕнын: хистӕр нӕлгоймӕгтӕ зонынц, Библимӕ гӕсгӕ раст чи нӕу, ахӕм хабар кӕй ӕрцыд, ӕмӕ ницы аразынц. Фӕлӕ, чи зоны, уыцы хъуыддагмӕ ӕфсымӕртӕ ӕркастысты, йе та йӕ алыг кӕндзысты Фыстадмӕ гӕсгӕ ӕмӕ, мах кӕй нӕ зонӕм, уыцы бӕлвырдгӕнӕнтӕм гӕсгӕ. Кӕд ӕцӕгдӕр исты хабар ӕрцыд, уӕд-ма ахъуыды кӕн: Коринфы ӕмбырды, Йегъовӕ кӕуыл тыхсти, уыцы ӕмбырды, чидӕр стыр тӕригъӕд куы сарӕзта, уӕд хъуыддагмӕ уайтагъд не ’ркастысты. Фӕлӕ йӕ рӕстӕджы Йегъовӕ уыцы хабар сраст кодта (1 Коринфӕгтӕм 5:1, 5, 9–11). Нӕ бон у нӕхи бафӕрсын: «Уыцы рӕстӕг ӕз Коринфы куы цардаин, уӕд уыцы хъуыддагмӕ цы цӕстӕй ракастаин?»

14, 15. Иуӕй-иутӕ Йесойы фӕдыл кӕй нал цыдысты, уый махӕн зондзонӕн цӕмӕй у?

¹⁴ Ӕркӕсӕм-ма, ӕмбырды ма цы хабар ӕрцӕуы, уымӕ. Зӕгъӕм, кӕмӕндӕр зын у, цӕмӕй Библийӕ цавӕрдӕр ахуырад бамбара ӕмӕ йыл сразы уа. Чи зоны, дзуапп агуырдта Библийы ӕмӕ нӕ литературӕйы, стӕй фарста фӕлтӕрд чырыстӕтты, суанг хистӕр нӕлгоймӕгты дӕр. Фӕлӕ йын уӕддӕр зын у уыцы фарста бамбарын. Цы ма у йӕ бон саразын? Ахӕм хабар ӕрцыд, Чырыстийы мӕлӕтмӕ ма иу азы бӕрц куы хъуыд, уӕд. Йесо йӕхицӕй загъта, зӕгъгӕ, ӕз дӕн «царддӕттӕг дзул» ӕмӕ адӕймаг ӕнустӕм нӕ цӕрдзӕн, «Адӕймаджы Фырты буар куы нӕ хӕра ӕмӕ йын йӕ туг куы нӕ нуаза», уӕд. Уыцы ныхӕстӕ йӕ ахуыргӕнинӕгтӕй иуӕй-иутӕм тынг ӕнахуыр фӕкастысты. Уыцы хъуыды бамбарыны бӕсты, кӕнӕ йӕ Йегъовӕ кӕд раргом кӕндзӕн, уымӕ банхъӕлмӕ кӕсыны бӕсты, Йесойы ахуыргӕнинӕгтӕй бирӕтӕ «йемӕ нал цыдысты» (Иоанны 6:35, 41–66). Ӕмӕ та нӕ бон у ахъуыды кӕнын: «Ӕз уым куы уыдаин, уӕд цы бакодтаин?»

¹⁵ Абон иуӕй-иутӕ ӕмбырдтӕм нал цӕуынц, уымӕн ӕмӕ сӕм афтӕ кӕсы, ӕмӕ Хуыцауӕн иунӕгӕй дӕр лӕггад кӕндзысты. Чи зоны, фӕзӕгъынц, зӕгъгӕ, фӕхъыг мӕ кодтой, кӕнӕ цавӕрдӕр ахуырадыл  нӕ разы кӕнынц, йе та ӕмбырды цыдӕр ӕвзӕр хъуыддагмӕ куыдфӕндыйы цӕстӕй кӕсынц. Фӕлӕ цымӕ раст кӕнынц? Кӕд алчидӕр Хуыцаумӕ йӕхӕдӕг хъуамӕ ӕввахсдӕр кӕна, уӕддӕр нӕ хъуамӕ рох ма уа, апостолты рӕстӕг куыд уыд, афтӕ абон дӕр цы ӕмбырдтӕ ис, Хуыцау уыдоны уылты кӕй дӕтты разамынд. Уымӕй уӕлдай ма, фыццаг ӕнусы Йегъовӕ архайдта ӕмбырды уылты ӕмӕ сын арфӕ дӕр кодта: ӕвӕрдта фӕлтӕрдджын хистӕр нӕлгоймӕгты ӕмӕ кӕстӕриуӕггӕнӕг ӕфсымӕрты, цӕмӕй ӕмбырдӕн ӕххуыс кодтаиккой. Афтӕ у абон дӕр.

16. Искӕй ӕмбырд ныууадзын куы фӕнда, уӕд цӕуыл хъуамӕ ахъуыды кӕна?

¹⁶ Кӕд чырыстон афтӕ хъуыды кӕны, ӕмӕ йӕ бон уыдзӕн Хуыцауӕн иунӕгӕй лӕггад кӕнын, уӕд йӕ къух исы, Хуыцау цы ’гъдау сфидар кодта, ууыл – ӕмбырдыл. Адӕймаг Хуыцауӕн иунӕгӕй кӕнӕ иу-цалдӕримӕ куы лӕггад кӕна, уӕд цымӕ нӕ рох кӕны, Хуыцауы фӕндмӕ гӕсгӕ ӕмбырды хистӕр нӕлгоймӕгтӕ ӕмӕ кӕстӕриуӕггӕнӕг ӕфсымӕртӕ кӕй хъуамӕ уа? Павел Колоссы ӕмбырдмӕ куы фыста, ӕмӕ сын куы фӕдзӕхста, зӕгъгӕ-иу ацы писмо Лаодикийы дӕр бакӕсут, уӕд дзырдта, зӕгъгӕ, Чырыстийы «мидӕг уидӕгтӕ ауадзут, ууыл рӕзут». Ацы ныхӕстӕ пайда уыдысты, ӕмбырд чи ныууагъта, уыдонӕн нӕ, фӕлӕ йыл йӕхи чи баста, уыдонӕн (Колоссӕгтӕм 2:6, 7; 4:16).

Ӕмбырдыл «лӕууы ӕмӕ ӕнцайы ӕцӕгдзинад»

17. Ӕмбырды тыххӕй нӕ 1 Тимофеймӕ 3:15 цӕуыл ахуыр кӕны?

¹⁷ Апостол Павел йӕ фыццаг фыстӕджы хистӕр нӕлгоймаг Тимофеймӕ ранымадта, ӕмбырды хистӕр нӕлгоймӕгтӕ ӕмӕ кӕстӕриуӕггӕнӕг ӕфсымӕртӕй лӕггад кӕнынӕн цы миниуджытӕ хъӕуы, уыдон. Уый хӕдфӕстӕ Павел «удӕгас Хуыцауы ӕмбырды» тыххӕй загъта, зӕгъгӕ, «ууыл лӕууы ӕмӕ ӕнцайы ӕцӕгдзинад» (1 Тимофеймӕ 3:15). Фыццаг ӕнусы сӕрст чырыстӕтты ӕмбырд уый йӕ хъуыддӕгтӕй равдыста. Кӕй зӕгъын ӕй хъӕуы, ӕцӕгдзинадыл алы чырыстон дӕр сӕйраджыдӕр ахуыр кодта ӕмбырды. Уым-иу фехъуыста, ӕцӕгдзинад куыд амонын хъӕуы ӕмӕ йӕ фидар дзурын куыд хъӕуы, уый, ӕмӕ-иу уым сӕ ныфсыл ныфс бафтыд.

18. Ӕмбырдтӕ цӕмӕн хъӕуынц?

¹⁸ Афтӕ абон дӕр, ӕппӕт дунейы чырыстон ӕмбырд иумӕйагӕй у «Хуыцауы хӕдзар», «ууыл лӕууы ӕмӕ ӕнцайы ӕцӕгдзинад». Ӕмбырдты ӕдзух куы уӕм ӕмӕ йын йӕ хъуыддӕгты куы архайӕм, уӕд уыдзыстӕм фидардӕр ӕмӕ Хуыцаумӕ ӕнгомдӕр, стӕй цӕттӕ уыдзыстӕм йӕ фӕндон ӕххӕст кӕнынмӕ. Павел Коринфы ӕмбырдмӕ куы фыста, уӕд йӕ хъус ӕрдардта, ӕмбырдты цӕуыл фӕдзурынц, уымӕ. Фыста, цӕмӕй ӕмбырдты цы дзырдтой, уый ӕнцонӕмбарӕн уыдаид ӕмӕ-иу уӕд адӕм бафидар уыдаиккой (1 Коринфӕгтӕм 14:12, 17–19). Мах дӕр абон афтӕ фидар кӕндзыстӕм, куы ’мбарӕм, ӕмбырдтӕ Йегъовӕ кӕй сарӕзта ӕмӕ сын кӕй арфӕ кӕны, уый.

19. Ӕмбырдӕн цӕмӕн хъуамӕ аргъ кӕнӕм?

¹⁹ Уӕдӕ цӕмӕй нӕ уырнындзинад фидар уа, уый тыххӕй хъуамӕ уӕм ӕмбырды. Ныр бирӕ рӕстӕг ӕмбырд адӕмы хъахъхъӕны мӕнг ахуырӕдтӕй, стӕй Хуыцау ӕмбырдты уылты хъусын кӕны ӕгас дунейыл дӕр Мессийӕйы Паддзахады тыххӕй хорз хабар. Уӕдӕ йӕ уынӕм, Хуыцау бирӕ хъуыддӕгтӕ кӕй аразы чырыстон ӕмбырды уылты (Ефесӕгтӕм 3:9, 10).

[Фиппаинӕгтӕ]

Хъуыды ма кӕныс?

• Нӕ бон цӕмӕн у афтӕ зӕгъын, ӕмӕ Хуыцау пайда кӕны ӕмбырдтӕй?

• Кӕд хистӕр нӕлгоймӕгтӕ ӕнӕххӕст сты, уӕддӕр ӕмбырдӕн куыд ӕххуыс кӕнынц?

• Ӕмбырд нӕ куыд фидар кӕны?

[Фарстатӕ ахуыр кӕнынӕн]

[Ныв 14 фарсыл]

Апостолтӕ ӕмӕ хистӕр нӕлгоймӕгтӕ Иерусалимы лӕггад кодтой разамонӕг советы

[Ныв 16 фарсыл]

Хистӕр нӕлгоймӕгтӕ ӕмӕ кӕстӕриуӕггӕнӕг ӕфсымӕртӕ ахуыр кӕнынц, цӕмӕй ӕмбырды сӕ хӕстӕ ӕххӕст кӕной