«Зыд мацӕуыл кӕнут»

«Адӕймагмӕ алцыдӕр парахатӕй куы уа, уӕддӕр йӕ цард, цы йӕм ис, уымӕй аразгӕ нӕу» (ЛУКАЙЫ 12:15).

1, 2. а) Адӕм цӕмӕ бӕллынц, уый тыххӕй цы зӕгъӕн ис? ӕ) Ахӕм зондахастӕн ныл йӕ бон бандавын куыд у?

ӔХЦА, исбон, кад, хорз мызд, бинонтӕ – адон адӕмӕн сӕ фылдӕр нымайынц, амонд ӕмӕ ӕдас фидӕн кӕмӕй кӕнгӕ сты, уыцы хъуыддӕгтыл. Хъӕздыг бӕстӕты дӕр ӕмӕ мӕгуыр бӕстӕты дӕр бирӕ адӕм бӕллынц хъӕздыгдзинад ӕмӕ кадмӕ. Ӕмӕ сӕ царды Хуыцауӕн цы бынат ис, уый – кӕд ын ис, уӕд – кӕны къаддӕрӕй-къаддӕр.

² Уымӕй ӕххӕст кӕнынц Библийы ныхӕстӕ: «Уый зон, ӕмӕ фӕстаг бонты скӕндзӕн тынг уӕззау рӕстӕг. Уымӕн ӕмӕ адӕм уыдзысты хиуарзон, ӕхцауарзаг... Хуыцауы нӕ уарздзысты, фӕлӕ уарздзысты ирхӕфсӕнтӕ, сӕхи афтӕ ӕвдисдзысты, цыма Хуыцауыл иузӕрдион сты, фӕлӕ сӕ цардӕй та уый бӕрӕг нӕ уыдзӕн» (2 Тимофеймӕ 3:1–5). Ӕцӕг чырыстӕттӕ ахӕм адӕмы ’хсӕн кӕй цӕрынц, уымӕ гӕсгӕ ӕдзух тох кӕнынц, цӕмӕй ацы дунейы зондахастыл ӕмӕ митыл ма ныххӕцой. Цы нын баххуыс кӕндзӕн, цӕмӕй нӕ ацы дуне, «йӕхи куыд фӕнды, афтӕ ма ива»? (Ромӕгтӕм 12:2, «The New Testament in Modern English», Дж. Б. Филлипс).

3. Цавӕр уынаффӕйыл уыдзӕн нӕ ныхас?

³ Йесо Чырысти, «уырнындзинады фӕндагыл нӕ чи кӕны, уыцы Разамонӕг ӕмӕ нын нӕ уырнындзинад алцӕмӕй ӕххӕст Чи кӕны», уый нын радта хорз уынаффӕтӕ (Дзуттӕгтӕм 12:2). Иухатт адӕмӕн ӕмбарын  кодта, Хуыцауӕн кувын куыд хъӕуы, уыимӕ баст фарстатӕ. Иу лӕг ын йӕ ныхас фескъуыдта, ӕмӕ йӕм бахатыд: «Ахуыргӕнӕг, ме ’фсымӕрӕн-ма зӕгъ, ӕмӕ нын цы бынтӕ баззад, уыдон мемӕ адих кӕна». Йесо уыцы лӕджы – ӕмӕ уым чидӕриддӕр уыд, уыдоны – тынг бафӕдзӕхста иу хъуыддагӕй: загъта сын, цӕмӕй зыд ма кӕной, ӕмӕ сын радзырдта иу ӕмбисонд. Уӕдӕ лӕмбынӕг ахъуыды кӕнӕм Йесойы ныхӕстыл ӕмӕ фенӕм, цы пайда нын уыдзӕн йӕ уынаффӕ (Лукайы 12:13–21).

Ӕнахуыр курдиат

4. Иу лӕг Йесойы ныхас кӕй фескъуыдта, уый ӕнахуыр цӕмӕн уыд?

⁴ Йесо, цалынмӕ йын уыцы лӕг йӕ ныхас нӕ фескъуыдта, уӕдмӕ йӕ ахуыргӕнинӕгтӕн ӕмӕ иннӕ адӕмӕн дзырдта, цӕмӕй сӕхи цӕстмӕ митӕй хизой ӕмӕ адӕймаджы Фыртимӕ кӕй сты, уый тыххӕй хъӕбатырӕй дзурой. Дзырдта сын, сыгъдӕг уд сын кӕй ӕххуыс кӕндзӕн, уый тыххӕй дӕр (Лукайы 12:1–12). Адон уыдысты тынг ахсджиаг фарстатӕ ӕмӕ сӕ ахуыргӕнинӕгтӕ хъуамӕ сӕ зӕрдыл бадардтаиккой. Ӕмӕ Йесо ахӕм ахсджиаг хъуыддӕгтыл куы дзырдта, уӕд ын уыцы лӕг ӕвиппайды йӕ ныхас ӕрдӕгыл фескъуыдта, ӕмӕ йӕм бахатыд, цӕмӕй, сӕ бинонты ’хсӕн мулчы фӕдыл цы быцӕу рауад, уый равзӕрстаид. Ацы хабарӕй райсӕн ис иу хорз зондзонӕн.

5. Йесомӕ цы лӕг бацыд, уымӕн йӕ курдиатӕй куыд зыны, йӕ зӕрдӕйы цы уыд, уый?

⁵ Иу библииртасӕджы ныхӕстӕм гӕсгӕ, «адӕймаджы удыхъӕд арӕх рабӕрӕг вӕййы, дины фӕдзӕхстытӕм хъусгӕйӕ йӕ хъуыдытӕ кӕцырдӕм ацӕуынц, уымӕй». Йесо, Хуыцауӕн куыд кувын хъӕуы, уыдӕттыл куы дзырдта, уӕд уыцы лӕг та, ӕвӕццӕгӕн, хъуыды кодта, йӕ къухы фылдӕр мулк куыд бафта, ууыл. Бынтӕй йӕм цы хай ӕмбӕлд, уый йын ӕцӕгдӕр нӕ лӕвӕрдтой, уый бӕрӕг нӕу. Ӕвӕццӕгӕн, цӕмӕй хъуыддаг йӕхи пайдайӕн алыг кӕнын кодтаид, уый тыххӕй йӕ фӕндыд Йесо йын куы баххуыс кодтаид, уымӕн ӕмӕ Йесойы зыдтой зондджын адӕймагӕй ӕмӕ йын йӕ ныхасӕн аргъ кодтой (Исай 11:3, 4; Матфейы 22:16). Куыдфӕнды ма уыдаид, йӕ курдиатмӕ гӕсгӕ бамбарӕн уыд, хабар кӕй уыд, йӕ зӕрдӕйы цы уыд, уый мидӕг – Хуыцауы хъуыддӕгтӕн фаг аргъ нӕ кодта. Уӕдӕ уӕд мах дӕр нӕ зӕрдӕмӕ ныккӕсын нӕ хъӕуы? Зӕгъӕм, чырыстон фембӕлдты, чи зоны, нӕ хъуыдытӕ адзӕгъӕл уой кӕнӕ та хъуыды кӕнӕм, фембӕлды фӕстӕ цы араздзыстӕм, ууыл. Фӕлӕ мах хъуамӕ лӕмбынӕг хъусӕм ӕмӕ хъуыды кӕнӕм, цы базыдтам, уымӕй куыд спайда кӕнӕм, цӕмӕй баввахсдӕр уӕм нӕ уӕларвон Фыд Йегъовӕ Хуыцаумӕ ӕмӕ не ’мчырыстӕттӕм (Псалом 21:23; Марчы 4:24).

6. Йесо уыцы лӕджы курдиат цӕуылнӕ сӕххӕст кодта?

⁶ Цӕйфӕнды тыххӕй ма сӕвзӕрдаид уыцы лӕгмӕ ахӕм курдиат, Йесо йын ӕй нӕ сӕххӕст кодта. Загъта йын: «Хорз лӕг, мӕн сымахӕн тӕрхонгӕнӕгӕй кӕнӕ бынтӕ уарӕгӕй чи сӕвӕрдта?» (Лукайы 12:14). Афтӕ йын кӕй загъта, уымӕй адӕмы зӕрдыл ӕрлӕууын кодта, Моисейы закъонмӕ гӕсгӕ ахӕм фарстатӕ лыг кӕнынӕн горӕтты ӕвӕрд кӕй уыд тӕрхонгӕнджытӕ (Дыккаг закъон 16:18–20; 21:15–17; Руф 4:1, 2). Йесо та хъуыды кодта ноджы ахсджиагдӕр хъуыддӕгтыл – ӕцӕгдзинады тыххӕй ӕвдисӕн лӕууын ӕмӕ адӕмӕн амонын Хуыцауы фӕндон ӕххӕст кӕнын (Иоанны 18:37). Уӕдӕ Йесойау нӕ рӕстӕг ӕмӕ нӕ тыхтӕ дӕттӕм, цӕмӕй хорз хабар хъусын кӕнӕм ӕмӕ «ӕппӕт адӕмыхӕттытӕй дӕр цӕттӕ кӕнӕм ахуыргӕнинӕгтӕ» ӕмӕ алы боны сагъӕстӕн нӕхи раст фӕндагӕй адзӕгъӕл кӕнын ма бауадзӕм (Матфейы 24:14; 28:19).

Зыд ма кӕнут

7. Йесо раст цы бамбӕрста?

⁷ Йесо зӕрдӕйы арф хъуыдытӕ дӕр кӕй уыдта, уымӕ гӕсгӕ бамбӕрста, уыцы лӕджы курдиат, иу бакастӕй куыд зынд, афтӕ хуымӕтӕг кӕй нӕ уыд. Уӕдӕ йын Йесо йӕ курдиат кӕй нӕ сӕххӕст кодта, уый иу хъуыддаг уыд. Фӕлӕ ма уымӕй уӕлдай Йесо бамбӕрста, уыцы лӕгмӕ ахӕм фарст цӕмӕн сӕвзӕрд, уымӕн йӕ сӕйраг аххосаг ӕмӕ загъта: «Кӕсут, зыд мацӕуыл кӕнут, уымӕн ӕмӕ адӕймагмӕ алцыдӕр парахатӕй куы уа, уӕддӕр йӕ цард, цы йӕм ис, уымӕй аразгӕ нӕу» (Лукайы 12:15).

8. Цы у зыд кӕнын ӕмӕ уый цӕмӕ ’ркӕны?

 ⁸ Зыд кӕнын уый нӕу, ӕмӕ адӕймаджы фӕнда, цӕмӕй йӕм уа ӕхца кӕнӕ цавӕрдӕр дзаума, уымӕн ӕмӕ уыдӕттӕ пайда дӕр вӕййынц. Иу дзырдуатмӕ гӕсгӕ, «зыд кӕнын» у, «адӕймаг йӕ мондӕгты рохтыл хӕцын куы нӕ зона, ӕмӕ хъӕздыгдзинадмӕ, исбонмӕ, йе та ӕндӕр истӕмӕ йӕ былы цъӕрттӕ куы хӕра». Уымӕ хауы, адӕймаг, бӕрц цы у ӕмӕ ӕфсис цы у, уый куы нӕ зона, афтӕмӕй исты дзаумӕттӕм куы бӕлла – искӕй куы уой, уӕддӕр – ӕрмӕстдӕр уый тыххӕй, ӕмӕ йӕм уой. Ӕмӕ сӕ пайда кӕндзӕн ӕви нӕ, кӕнӕ сӕ куы балхӕна, уӕд уый иннӕтыл куыд бандавдзӕн, ууыл та хъуыды дӕр нӕ кӕны. Зыдгӕнаг адӕймагӕн йӕ хъуыдытӕ ӕмӕ йӕ хъуыддӕгтӕ иууылдӕр баст вӕййынц, цӕмӕ фӕбӕллы, уыимӕ, ӕмӕ, зӕгъӕн ис, уый свӕййы йӕ хуыцау. Дӕ зӕрдыл ма ӕрлӕууын кӕн, апостол Павел зыд адӕймаджы кӕй хуыдта мӕнгхуыцауӕн кувӕг. Ӕмӕ ахӕм адӕймаг та Хуыцауы Паддзахадмӕ нӕ бацӕудзӕн (Ефесӕгтӕм 5:5; Колоссӕгтӕм 3:5).

9. Адӕймаг зыдгӕнаг кӕй у, уый цӕмӕй бӕрӕг вӕййы? Ӕрхӕсс цӕвиттонтӕ.

⁹ Бафиппайын хъӕуы уый, ӕмӕ Йесо фӕдзӕхста, цӕмӕй «зыд мацӕуыл кӕнӕм». Адӕймаг зыдгӕнаг кӕй у, уый рабӕрӕг вӕййы алыхуызон хъуыддӕгтӕй. Уыдонӕй иуӕй-иутӕ нымад цӕуынц дӕсӕм фӕдзӕхсты: «Ма бабӕлл искӕй хӕдзармӕ. Ма бабӕлл искӕй усмӕ, нӕдӕр йӕ нӕлгоймаг-цагъармӕ, нӕдӕр йӕ сылгоймаг-цагъармӕ, нӕдӕр йӕ галмӕ, нӕдӕр йӕ хӕрӕгмӕ – цы йӕм ис, уымӕй ӕппындӕр мацӕмӕ бабӕлл» (Рацыд 20:17). Адӕм-иу сӕ фырзыдӕй стыр тӕригъӕд дӕр кӕй ракодтой, уымӕн Библийы ис бирӕ цӕвиттонтӕ. Йӕхи цы нӕ уыд, уымӕ чи бабӕллыд, уыдонӕй фыццаг уыд Сайтан. Уый бабӕллыд, ӕрмӕстдӕр Йегъовӕмӕ чи ӕмбӕлы, уыцы кад, намыс ӕмӕ бартӕм (Раргомад 4:11). Евӕйы бафӕндыд, цӕмӕй йӕхӕдӕг ӕвзӕрстаид, раст цы у, уый. Сайтанӕн йӕхи сайын кӕй бауагъта, уымӕ гӕсгӕ адӕм ныллӕууыдысты тӕригъӕд ӕмӕ мӕлӕты фӕндагыл (Райдиан 3:4–7). Хӕйрӕджытӕ раздӕр уыдысты зӕдтӕ. Фӕлӕ разы нал уыдысты сӕ «фыццаджы бынатӕй» ӕмӕ «сӕ цӕрӕнбынат... ныууагътой», цӕмӕй сын цы не ’мбӕлд, уый кодтаиккой (Иудӕйы 6; Райдиан 6:2). Ноджыдӕр ма ахъуыды кӕн Валаам, Ахан, Гиези ӕмӕ Иудӕйыл дӕр. Уыдон, цы сӕм уыд, уымӕй разы нал уыдысты ӕмӕ зыд кӕнын райдыдтой. Сӕ фырзыдӕй, сӕ бӕрны цы уыд, уымӕй раст не спайда кодтой ӕмӕ сӕ уый сӕфтмӕ ’ркодта.

10. Йесойы фӕдзӕхстмӕ гӕсгӕ «кӕсын» цӕмӕ хъӕуы?

¹⁰ Йесо адӕмы куы фӕдзӕхста, зыд мацӕуыл кӕнут, зӕгъгӕ, уӕд йӕ ныхасы райдианы загъта, «кӕсут», зӕгъгӕ. Куыд раст у уый! Цӕмӕн? Уымӕн ӕмӕ чидӕр зыдгӕнаг кӕй у, уый адӕймаг уайтагъд фены. Фӕлӕ алчи нӕ басӕтдзӕн, йӕхӕдӕг ахӕм кӕй у, ууыл. Апостол Павел дӕр куыд загъта, афтӕмӕй, «адӕймаг ӕхцауарзаг куы уа, уӕд уымӕй цӕуынц ӕппӕт фыдбылызтӕ дӕр» (1 Тимофеймӕ 6:9, 10). Ахуыргӕнинаг Иаков бамбарын кодта, зӕгъгӕ, ӕвзӕр фӕнд «уидаг куы ауадзы, уӕд ӕркӕны тӕригъӕдмӕ» (Иаковы 1:15). Йесойы фӕдзӕхстмӕ гӕсгӕ, хъуамӕ, иннӕтӕ зыдгӕнаг сты ӕви нӕ, уымӕ ма «кӕсӕм», фӕлӕ «кӕсӕм» нӕ зӕрдӕмӕ, цӕмӕй «зыд мацӕуыл кӕнӕм».

Цӕмӕй аразгӕ у цард?

11, 12. а) Цӕмӕй зыд ма кӕнӕм, уый тыххӕй Йесо цавӕр фӕдзӕхст радта? ӕ) Йесойы фӕдзӕхстмӕ нӕ хъусын цӕмӕн хъӕуы?

¹¹ Фӕлӕ ма ноджыдӕр иу цӕйдӕр тыххӕй хъуамӕ хизӕм нӕхи зыд кӕнынӕй. Дӕ хъус-ма ӕрдар, Йесо дарддӕр цы дзуры, уымӕ: «Адӕймагмӕ алцыдӕр парахатӕй куы уа, уӕддӕр йӕ цард, цы йӕм ис, уымӕй аразгӕ нӕу» (Лукайы 12:15). Ацы ныхӕстыл хъӕуы  лӕмбынӕг ахъуыды кӕнын, уымӕн ӕмӕ ацы мулкылмард дунейы адӕм амонд хонынц хъӕздыгдзинад. Йесо йӕ ныхӕстӕй равдыста, адӕймаг, цӕмӕн цӕры, уый ӕмбардзӕн ӕмӕ йӕ цардӕй йӕ зӕрдӕ рухс кӕндзӕн, ӕви нӕ, уый мулкӕй, кӕнӕ йӕм цас исбон ис, уымӕй кӕнгӕ кӕй нӕу.

¹² Фӕлӕ чидӕртӕ уыцы хъуыдыимӕ не сразы уыдзысты. Уыдон, чи зоны, хъуыды кӕнынц, зӕгъгӕ, адӕймагмӕ бирӕ мулк куы уа, уӕд ӕнӕмӕт ӕмӕ хъӕлдзӕг цард кӕндзӕн, ӕмӕ афтӕмӕй йӕ цардӕй йӕ зӕрдӕ тынгдӕр райдзӕн. Уымӕ гӕсгӕ сӕ тыхтыл нӕ ауӕрдынц, цӕмӕй фылдӕр ӕхца кусой ӕмӕ ӕлхӕной, цӕмӕдӕриддӕр бӕллынц, уыдӕттӕ – алыхуызон дзауматӕ ӕмӕ техникӕ. Афтӕ сӕм кӕсы, ӕмӕ уый у амонд. Фӕлӕ ахӕм зондыл хӕст кӕй сты, уымӕй бӕрӕг у, Йесо цӕй кой кодта, ууыл кӕй нӕ хъуыды кӕнынц.

13. Цы нысан кӕны цардмӕ ӕмӕ мулкмӕ раст цӕстӕй кӕсын?

¹³ Йесо уый кой нӕ кодта, ӕмӕ адӕймагмӕ бирӕ истытӕ уа, уый раст у, ӕви нӕ. Уый загъта, зӕгъгӕ, адӕймаджы цард, алцыдӕр ӕм парахатӕй уа, ома йӕм цы ис, уымӕй кӕнгӕ нӕу. Мах ӕй иууылдӕр зонӕм, цӕрынӕн, кӕнӕ, цӕмӕй цӕрынхъом уӕм, уый тыххӕй нӕ бирӕ кӕй нӕ хъӕуы: хӕринаг, уӕлӕдарӕс ӕмӕ цӕрӕн бынат. Хъӕздыг адӕймаг уыдӕттӕй хъуаг нӕу. Мӕгуыры та хъӕуы уӕззау куыст кӕнын, цӕмӕй йӕ цӕрынӕн ӕнӕмӕнг цы хъӕуы, уый йын фаг кӕна. Фӕлӕ хъӕздыг дӕр ӕмӕ мӕгуыр дӕр куы амӕлынц, уӕд сӕ ницыуал уӕлдай вӕййы (Екклесиаст 9:5, 6). Уӕдӕ цӕмӕй адӕймаг хуыздӕр цӕра ӕмӕ йӕ цардӕй йӕ зӕрдӕ райа, уый тыххӕй йӕ цард хъуамӕ, цы йӕм ис кӕнӕ йӕ бон самал кӕнын цы у, ӕрмӕст ууыл баст ма уа. Ацы хъуыды хуыздӕр бамбардзыстӕм, Йесо цавӕр царды кой кодта, ууыл бӕстондӕр куы аныхас кӕнӕм, уӕд.

14. Йесо, «цард», зӕгъгӕ, куы загъта, уӕд цӕй кой кодта?

¹⁴ Йесойы ныхӕсты, «адӕймаджы... цард, цы йӕм ис, уымӕй аразгӕ нӕу», зӕгъгӕ, Лукайы Евангелийы дзырд «цард» (грекъ. зои́) амоны, адӕймаг куыд цӕры, уымӕ нӕ, фӕлӕ цардӕн йӕхимӕ – цард комкоммӕ цы нысан кӕны, уымӕ *. Йесо загъта, зӕгъгӕ, хъӕздыг уӕм, ӕви мӕгуыр, ӕппындӕр мацы хъуаг уӕм, ӕви мамӕлайы къӕбӕр хӕрӕм, уӕддӕр, цас фӕцӕрдзыстӕм кӕнӕ ма райсом удӕгас уыдзыстӕм, ууыл нӕ бар кӕронмӕ нӕ цӕуы. Мӕнӕ цы загъта Йесо Уӕлхох уацамынды: «Куы мӕт кӕнат, уӕд уӕ уымӕй йӕ цардыл иу гыццыл дӕр исчи бафтаудзӕн?» (Матфейы 6:27). Библийы фыст ис, «царды суадон» Йегъовӕмӕ кӕй ис, ӕмӕ ӕрмӕстдӕр уый бон кӕй у раттын иузӕрдион адӕмӕн «ӕцӕг цард», ома «ӕнусон цард» – ӕнӕкӕрон цард уӕларвыл кӕнӕ зӕххыл (Псалом 35:10, МГТ; 1 Тимофеймӕ 6:12, 19).

15. Бирӕтӕ сӕ ныфс сӕ мулкыл цӕмӕн дарынц?

¹⁵ Йесойы ныхӕстӕ ӕвдисынц, адӕмӕй бирӕтӕ цардмӕ раст цӕстӕй кӕй нӕ кӕсынц. Адӕм иууылдӕр сты ӕнӕххӕст ӕмӕ хъӕздыгӕй-мӕгуырӕй – се ’ппӕтӕн дӕр сӕ кӕрон цӕуы иу ранмӕ. Рагзаманты пехуымпар Моисей загъта: «Нӕ азты бонтӕ ӕвдай азы, фӕлӕ фылдӕр фидардзинадӕй ӕстай азы; ӕмӕ сӕ хуыздӕр афон уыдонӕн – куыст ӕмӕ низ, уымӕн ӕмӕ ивгъуыйынц тагъд, ӕмӕ мах тӕхӕм» (Псалом 89:10; Иов 14:1, 2; 1 Петры 1:24). Уымӕ гӕсгӕ, Хуыцауы чи нӕ базыдта ӕмӕ йӕм чи нӕ баввахс, уыдонӕн арӕх сӕ зондахаст свӕййы, апостол Павел цы адӕмы кой кодта, уыдоны зондахасты хуызӕн: «Хӕрӕм ӕмӕ нуазӕм,– уӕддӕр райсом амӕлдзыстӕм» (1 Коринфӕгтӕм 15:32). Иннӕтӕ та, цард цыбыр кӕй у ӕмӕ, райсом цы уыдзӕн, уый бӕрӕг кӕй нӕу, уый ӕмбаргӕйӕ, ӕмбырд кӕнынц мулк, цӕмӕй сӕхи ӕдас хатой ӕмӕ сӕ сомбонмӕ сӕ зӕрдӕ ма ӕхсайа. Ӕвӕццӕгӕн афтӕ хъуыды кӕнынц, ӕмӕ сӕм бирӕ мулк куы уа, уӕд сӕ цард уыдзӕн ӕдасдӕр. Уымӕ гӕсгӕ ӕхсӕвӕй-бонӕй кусынц, цӕмӕй ӕмбырд кӕной, куыд сӕм кӕсы, афтӕмӕй, ӕдасдзинад ӕмӕ амонд цӕмӕй кӕнгӕ сты, уыдӕттӕ – хъӕздыгдзинад ӕмӕ исбон (Псалом 48:7, 12, 13).

 Ӕдас фидӕн

16. Цӕмӕй кӕнгӕ нӕу, адӕймагӕн йӕ цардӕй йӕ зӕрдӕ райдзӕн ӕви нӕ, уый?

¹⁶ Уый раст у, ӕмӕ адӕймаг хорз куы цӕра – куы йын уа хорз хӕринаг, хорз дзаумӕттӕ, хорз хӕдзар ӕмӕ бирӕ ӕндӕр цыдӕртӕ – уӕд ын уыдзӕн фылдӕр фадӕттӕ, ӕмӕ йӕхи дзӕбӕх кӕндзӕн хуыздӕр рынчындӕтты, ӕмӕ афтӕмӕй цалдӕр азы фылдӕр фӕцӕрдзӕн. Фӕлӕ цымӕ ахӕм адӕймагӕн йӕ цард хуыздӕр ӕмӕ ӕдасдӕр вӕййы? Адӕймагӕн йӕ цардӕй йӕ зӕрдӕ райдзӕн ӕви нӕ, уый, цас цӕры кӕнӕ цас мулк ӕрӕмбырд кодта, уымӕй кӕнгӕ нӕу. Апостол Павел дзырдта, уыдӕттыл ныфс ӕгӕр тынг дарын куыд тӕссаг у, уый тыххӕй. Тимофеймӕ ныффыста: «Ацы цардӕвӕрды хъӕздыг чи у, уыдоны фӕдзӕхс, цӕмӕй сӕхицӕй хъал ма уой ӕмӕ сӕ зӕрдӕ дарой, ӕууӕнк кӕуыл нӕй, уыцы хъӕздыгдзинадыл нӕ, фӕлӕ нын ӕппӕт дӕр нӕ зӕрдӕйы дзӕбӕхӕн рӕдауӕй чи дӕтты, уыцы Хуыцауыл» (1 Тимофеймӕ 6:17).

17, 18. а) Мулкмӕ цы цӕстӕй кӕсын хъӕуы, уыцы хъуыддаджы нын фӕзминаг чи сты? ӕ) Цавӕр фӕсномыг ныхасыл цӕудзӕн дзырд иннӕ статьяйы?

¹⁷ Ӕнӕзонд ми у ныфс хъӕздыгдзинадыл дарын, уымӕн ӕмӕ ууыл ӕууӕнк нӕй. Иов уыд тынг хъӕздыг адӕймаг. Фӕлӕ йыл ӕнӕнхъӕлӕджы бӕллӕх куы ’рцыд, уӕд ын йӕ хъӕздыгдзинад нӕ баххуыс кодта – ӕвиппайды ӕнӕ ницӕмӕй аззад. Ӕппӕт зындзинӕдтӕ ӕмӕ фӕлварӕнтӕ сфӕразынӕн ын баххуыс кодта, Йегъовӕйы ӕввахс хӕлар кӕй уыд, ӕрмӕстдӕр уый (Иов 1:1, 3, 20–22). Аврааммӕ уыд бирӕ мулк. Фӕлӕ йӕ уый нӕ бахъыгдардта, цӕмӕй сразы уыдаид, Йегъовӕ йын цы зын хъуыддаг бахӕс кодта, уый сӕххӕст кӕныныл. Уый тыххӕй йын Йегъовӕ раарфӕ кодта, ӕмӕ сси «бирӕ адӕмыхӕттыты фыд» (Райдиан 12:1, 4; 17:4–6). Ацы иузӕрдион нӕлгоймӕгтӕ ӕмӕ ма Хуыцауы иннӕ лӕггадгӕнджытӕ дӕр фӕзминаг сты махӕн. Ӕрыгӕттӕ стӕм, ӕви ацӕргӕтӕ – не ’ппӕт дӕр хъуамӕ нӕ зӕрдӕтӕм ныккӕсӕм, цӕмӕй бамбарӕм, нӕ царды нын сӕйрагдӕр цы у ӕмӕ нӕ ныфс цӕуыл дарӕм, уый (Ефесӕгтӕм 5:10; Филиппӕгтӕм 1:10).

¹⁸ Йесо зыд кӕныны ӕмӕ цардмӕ раст цӕстӕй кӕсыны тыххӕй кӕд ӕрмӕст цалдӕр ныхасы загъта, уӕддӕр сты тынг ахсджиаг ӕмӕ сӕ ис арф хъуыды. Уый фӕдыл ма Йесойы фӕндыд ноджыдӕр цыдӕр зӕгъын. Дарддӕр та радзырдта фӕсномыг ныхас ӕнӕзонд хъӕздыг лӕджы тыххӕй. Куыд ис уыцы фӕсномыг ныхас нӕ абоны цардмӕ ахӕссӕн ӕмӕ дзы нӕ бон нӕхицӕн зондӕн райсын цы у? Ацы фарстытӕн дзуапп ссардзыстӕм иннӕ статьяйы.

[Фиппаинаг]

Цавӕр дзуапп ратдзынӕ?

• Йесо иу лӕгӕн йӕ курдиат кӕй нӕ сӕххӕст кодта, уымӕй цӕуыл ахуыр кӕнӕм?

• Зыд кӕнынӕй нӕхи цӕмӕн хъуамӕ хизӕм ӕмӕ куыд?

• Цард мулкӕй кӕнгӕ цӕуылнӕ у?

• Адӕймагӕн йӕ цард хорз ӕмӕ ӕдас цӕй фӕрцы уыдзӕн?

[Фарстатӕ ахуыр кӕнынӕн]

[Нывтӕ 23 фарсыл]

Авраам мулкмӕ раст цӕстӕй кӕй каст, уый цӕмӕй рабӕрӕг?