«Сыгъдӕг уды коммӕ кӕсдзынӕ»?
«Сыгъдӕг уды коммӕ кӕсдзынӕ»?
«Сыгъдӕг уды коммӕ кӕсут, ӕмӕ уӕ тӕригъӕдджын буары монцты фӕдыл никуы ацӕудзыстут» (ГАЛАТӔГТӔМ 5:16).
1. Афтӕ нӕм куы кӕса, ӕмӕ сыгъдӕг уды ныхмӕ тӕригъӕд ракодтам, уӕд цы бакӕнӕм, цӕмӕй мауал мӕт кӕнӕм?
АФТӔ нӕм куы кӕса, ӕмӕ сыгъдӕг уды ныхмӕ ракодтам тӕригъӕд, уӕд цы бакӕнӕм, цӕмӕй мауал мӕт кӕнӕм? Уымӕн нын баххуыс кӕндзӕн апостол Павелы уынаффӕ: «Сыгъдӕг уды коммӕ кӕсут, ӕмӕ уӕ тӕригъӕдджын буары монцты фӕдыл никуы ацӕудзыстут» (Галатӕгтӕм 5:16). Хуыцауы сыгъдӕг уды коммӕ куы кӕсӕм, уӕд ныл нӕ тӕригъӕдджын буары фӕндтӕ нӕ уӕлахиз кӕндзысты (Ромӕгтӕм 8:2–10).
2, 3. Сыгъдӕг уды коммӕ кӕй кӕсӕм, уый ныл куыд фӕзындзӕн?
2 Хуыцауы «сыгъдӕг уды коммӕ куы кӕсӕм», уӕд нӕ уый ахӕм зондыл араздзӕн, цӕмӕй Йегъовӕмӕ хъусӕм. Хуыцауы зӕрдӕмӕ цы миниуджытӕ цӕуы, уыдон нӕм кӕй сты, уый ӕвдисдзыстӕм уацамынды, ӕмбырды, хӕдзары – иудзырдӕй, кӕмдӕриддӕр уӕм, уым. Сыгъдӕг уд ныл кӕй ӕндавы, уый бӕрӕг уыдзӕн, нӕ цардӕмбалӕн, нӕ сывӕллӕттӕн, не ’мчырыстӕттӕн ӕмӕ иннӕтӕн куыд стӕм, уымӕй.
3 Кӕд, «Хуыцауы цӕстӕй кӕсгӕйӕ... сыгъдӕг уд куыд амоны», афтӕ цӕрӕм, уӕд нын уый ӕххуыс кӕны, цӕмӕй тӕригъӕд ма аразӕм (1 Петры 4:1–6). Сыгъдӕг уд ныл куы ӕндава, уӕд, кӕй зӕгъын ӕй хъӕуы, ныххатыр кӕнӕн кӕмӕн нӕй, ахӕм тӕригъӕд никуы ракӕндзыстӕм. Фӕлӕ сыгъдӕг уды коммӕ кӕй кӕсӕм, уый ма ныл ноджыдӕр куыд фӕзындзӕн?
Ма адард ут Хуыцау ӕмӕ Чырыстийӕ
4, 5. Сыгъдӕг уды коммӕ кӕй кӕсӕм, уый куыд зыны, Йесойы тыххӕй цы хъуыды кӕнӕм, ууыл?
4 Сыгъдӕг уды коммӕ куы кӕсӕм, уӕд Хуыцауӕй ӕмӕ йӕ Фыртӕй нӕ адард уыдзыстӕм. Павел Коринфмӕ йе ’мчырыстӕттӕм фыста, сыгъдӕг уд кӕй дӕтты, уыцы курдиӕтты тыххӕй. Мӕнӕ цы загъта, раздӕр мӕнгхуыцӕуттӕн чи куывта, уыдонӕн: «[Мӕн] фӕнды, цӕмӕй йӕ зонат, ӕмӕ Хуыцауы сыгъдӕг удӕй чи дзуры, уый афтӕ никуы зӕгъдзӕн: „Йесо ӕлгъыст у!“ Ӕмӕ, „Йесо у Хицау!“, зӕгъгӕ, афтӕ дӕр, сыгъдӕг удӕй чи дзуры, ӕрмӕстдӕр уый зӕгъдзӕн» (1 Коринфӕгтӕм 12:1–3). Йесойы ӕлгъитыныл адӕмы ардауы Сайтан Хӕйрӕг. Фӕлӕ мах кӕсӕм сыгъдӕг уды коммӕ ӕмӕ зонӕм, Йегъовӕ Йесойы кӕй райгас кодта ӕмӕ йӕ адӕмӕй дӕр ӕмӕ зӕдтӕй дӕр уӕлдӕр кӕй сӕвӕрдта (Филиппӕгтӕм 2:5–11). Мах ӕууӕндӕм, Чырысти йӕ цард нывондӕн кӕй ӕрхаста ӕмӕ йӕ нымайӕм, Хуыцау нын нӕ сӕргъы кӕй сӕвӕрдта, уыцы Хицауыл.
5 Н. э. фыццаг ӕнусы, раст динӕй чи аздӕхт, уыцы чырыстӕттӕ дзырдтой, зӕгъгӕ, Йесо адӕймагӕй не ’рцыд (2 Иоанны 7–11). Уыцы рӕдыд хъуыдыйыл чи ныххӕцыд, уыдонӕй иуӕй-иутӕ рацыдысты Йесойы, Мессийӕйы тыххӕй ӕцӕг ахуырӕдты ныхмӕ (Марчы 1:9–11; Иоанны 1:1, 14). Сыгъдӕг уды коммӕ куы кӕсӕм, уӕд ахӕм къӕппӕджы нӕ бахаудзыстӕм ӕмӕ раст динӕй нӕ аздӕхдзыстӕм. Мах хъуамӕ ӕцӕг ахуырӕдтыл фидар хӕцӕм ӕмӕ алцӕмӕ дӕр Йегъовӕйы цӕстӕй кӕсӕм, уымӕн ӕмӕ ӕрмӕстдӕр уӕд уыдзыстӕм хайджын йе стыр хорзӕхӕй ӕмӕ ӕрмӕстдӕр уӕд цӕрдзыстӕм «ӕцӕгдзинадмӕ гӕсгӕ» (3 Иоанны 3, 4). Уӕдӕ раст дин чи ныууагъта, уыдон цыфӕнды куы дзурой, уӕддӕр сӕм ма хъусӕм ӕмӕ архайӕм, цӕмӕй нӕ уӕларвон Фыдӕй ма адард уӕм.
6. Сыгъдӕг уды коммӕ чи кӕсы, уыдонмӕ Хуыцауы архайгӕ тыхы фӕрцы цавӕр миниуджытӕ фӕзыны?
6 Павел тӕригъӕдджын буары хъуыддӕгтӕ куы ранымадта, уӕд хӕтын ӕмӕ хӕлд хъуыддӕгты кой кӕнгӕйӕ ракодта мӕнгхуыцӕуттӕн кувынмӕ аздӕхын ӕмӕ сектӕтыл дихтӕ кӕныны кой дӕр. Фӕлӕ бамбарын кодта: «Йесо Чырыстийы чи у, уыдон сӕ тӕригъӕдджын буар йӕ монцтӕ ӕмӕ йӕ фӕндтимӕ хъӕдыл байтыгътой. Кӕд сыгъдӕг уды коммӕ кӕсӕм, уӕд дарддӕр дӕр, сыгъдӕг уд куыд амоны, афтӕ кӕнӕм» (Галатӕгтӕм 5:19–21, 24, 25). Сыгъдӕг уд куыд амоны, афтӕ чи цӕры ӕмӕ йӕ коммӕ чи кӕсы, уыдонмӕ Хуыцауы архайгӕ тыхы фӕрцы цавӕр миниуджытӕ фӕзыны? Павел фыста: «Сыгъдӕг удӕй цы миниуджытӕ гуыры, уыдон та сты: уарзондзинад, цин, фарн, бирӕфӕразондзинад, хӕларзӕрдӕдзинад, хорздзинад, уырнындзинад, фӕлмӕн удыхъӕд, хиуыл хӕцын» (Галатӕгтӕм 5:22, 23). Цӕй уӕдӕ ацы миниуджытыл аныхас кӕнӕм.
«Кӕрӕдзийы... уарзӕм»
7. Цы у уарзондзинад ӕмӕ бӕрӕг цӕмӕй вӕййы?
7 Уарзондзинад у, сыгъдӕг удӕй цы миниуджытӕ гуыры, уыдонӕй иу. Уый амоны уымӕ, ӕмӕ чидӕр кӕйдӕр тынг уарзы, удуӕлдайӕ йыл тыхсы, йӕ зӕрдӕйӕн адджын у. Библийы фыст ис, «Хуыцау у уарзондзинад», ома цы у, уымӕй ӕгасӕй дӕр у уарзондзинад. Хуыцау ӕмӕ йӕ Фырт адӕмы куыд тынг уарзынц, уымӕн хорз ӕвдисӕн у Йесо Чырыстийы нывонд (1 Иоанны 4:8; Иоанны 3:16; 15:13; Ромӕгтӕм 5:8). Мах стӕм Йесойы фӕдылдзӕуджытӕ ӕмӕ нӕ иннӕтӕ базонынц, кӕрӕдзийы кӕй уарзӕм, уымӕй (Иоанны 13:34, 35). Библи нӕ фӕдзӕхсы, цӕмӕй «кӕрӕдзийы... уарзӕм» (1 Иоанны 3:23). Апостол Павел уарзондзинады тыххӕй дзургӕйӕ загъта, зӕгъгӕ, уарзондзинад бирӕ фӕразы ӕмӕ у хӕларзӕрдӕ. Уарзондзинад хӕлӕг нӕ кӕны, йӕхицӕй не ’ппӕлы, чи не ’мбӕлы, ахӕм митӕ нӕ кӕны, йӕхицӕн куыд хуыздӕр уа, ууыл нӕ хъуыды кӕны. Уарзондзинад мӕсты нӕ кӕны ӕмӕ йын ӕвзӕрӕй чи цы ракодта, уый нӕ нымайы. Уый цин кӕны рӕстдзинадыл, раст цы нӕу, ууыл нӕ, фӕлӕ. Уарзондзинад алцӕмӕн дӕр быхсы, алцӕуыл дӕр ӕууӕнды, алцӕуыл дӕр йӕ ныфс дары, алцӕмӕн дӕр фидар лӕууы. Уымӕй уӕлдай, уарзондзинад алкӕддӕр уыдзӕн (1 Коринфӕгтӕм 13:4–8).
8. Йегъовӕйӕн немӕ чи лӕггад кӕны, уыдоны цӕмӕн хъуамӕ уарзӕм?
8 Хуыцауы сыгъдӕг удӕн бар куы дӕттӕм, цӕмӕй нын нӕ удыхъӕды уарзондзинад фидар кӕна, уӕд уарздзыстӕм Хуыцауы дӕр ӕмӕ адӕмы дӕр (Матфейы 22:37–39). Апостол Иоанн ныффыста: «Йе ’фсымӕры чи нӕ уарзы, уый мӕлӕты къухы ис. Йе ’фсымӕрӕй йе сӕфт чи уыны, уый у лӕгмар. Сымах та зонут: лӕгмарӕн ӕнусон цард нӕй» (1 Иоанны 3:14, 15). Рагон Израилы ӕмбӕхсӕн горӕтмӕ лӕгмарӕн йӕ бон ӕрмӕстдӕр уӕд уыдис бацӕуын, йӕ къухӕй чи фӕмард, уымӕй кӕд йе сӕфт нӕ уыдта (Дыккаг закъон 19:4, 11–13). Сыгъдӕг уды разамындмӕ куы хъусӕм, уӕд уарздзыстӕм Хуыцауы, не ’мчырыстӕтты ӕмӕ иннӕ адӕмы.
«Йегъовӕйыл кӕй цин кӕнӕм, уый нӕ фидар кӕны»
9, 10. Цин чи фӕкӕны ӕмӕ мах цӕмӕн цин кӕнӕм?
9 Амондджын чи вӕййы, цин дӕр уый фӕкӕны. Йегъовӕ у «амондджын Хуыцау» (1 Тимофеймӕ 1:11; Псалом 103:31). Фыртӕн ӕхсызгон у йӕ Фыды фӕндон ӕххӕст кӕнын (Псалом 39:9; Дзуттӕгтӕм 10:7–9). «Йегъовӕйыл кӕй цин кӕнӕм, уый нӕ фидар кӕны» (Нееми 8:10).
10 Сыгъдӕг уд нын цы циндзинад дӕтты, уый фӕрцы зӕрдӕрайгӕйӕ ӕххӕст кӕндзыстӕм Хуыцауы фӕндон, суанг нын зын куы уа, истӕуыл куы хъыг кӕнӕм кӕнӕ нӕ куы ’фхӕрой, уӕд дӕр. Куыд амондджын стӕм, Хуыцауы кӕй зонӕм! (Ӕмбисӕндтӕ 2:1–5). Мах цин кӕнӕм, Хуыцауы хӕлӕрттӕ кӕй стӕм, ууыл. Йӕ хӕлӕрттӕ та уый фӕрцы стӕм, ӕмӕ нӕм ис бӕлвырд зонындзинӕдтӕ ӕмӕ ӕууӕндӕм Хуыцауыл, стӕй Йесойы нывондыл (1 Иоанны 2:1, 2). Цины хос ма нын сты нӕ хотӕ ӕмӕ не ’фсымӕртӕ ӕгас дунейы дӕр (Софони 3:9; Аггей 2:7). Хуыцауы Паддзахадыл нӕ ныфс кӕй дарӕм ӕмӕ хорз хабар кӕй хъусын кӕнӕм, уый дӕр нын хӕссы циндзинад (Матфейы 6:9, 10; 24:14). Цин ма кӕнӕм, нӕ бон ӕнустӕм цӕрын кӕй уыдзӕн, ууыл дӕр (Иоанны 17:3). Ахӕм диссаджы ныфс нын кӕй ис, уый тыххӕй хъуамӕ «цин кӕнӕм» (Дыккаг закъон 16:15).
Уарзут фарн ӕмӕ ут бирӕфӕразон
11, 12. а) Фарн цы у, уый куыд бамбарын кӕнис? ӕ) Хуыцауы фарн ныл куыд ӕндавы?
11 Фарн у, сыгъдӕг удӕй чи гуыры, ӕндӕр ахӕм миниуӕг. Фарн кӕмӕ ис, уый вӕййы сабыр ӕмӕ гыццыл ницӕй тыххӕй не стыхсы. Нӕ уӕларвон Фыд у фарны Хуыцау, ӕмӕ нын Библи ныфс ӕвӕры: «Йегъовӕ йӕ адӕмӕн раарфӕ кӕндзӕн ӕмӕ сӕ фарнӕй схайджын кӕндзӕн» (Псалом 29:11, НД, [28:11]; 1 Коринфӕгтӕм 14:33). Йесо йӕ ахуыргӕнинӕгтӕн загъта: «Фарн уын уадзын мӕ фӕстӕ, мӕ фарн уын дӕттын» (Иоанны 14:27). Уыцы фарн Йесойы фӕдылдзӕуджытӕн куыд баххуыс кодтаид?
12 Йесо йӕ ахуыргӕнинӕгтӕн цы фарн радта, уый сын сӕ зӕрдӕтӕ ӕмӕ сӕ зонд ӕрсабыр кодта ӕмӕ ницӕмӕйуал тарстысты. Уӕлдайдӕр та уыцы фарн банкъардтой, ныфс сын цы сыгъдӕг удӕй бавӕрдта, уый сыл куы ’рцыд, уӕд (Иоанны 14:26). Сыгъдӕг уд ныл кӕй ӕндавы ӕмӕ нын Хуыцау нӕ куывдтытӕ кӕй хъусы, уый фӕрцы нӕхиуыл бавзарӕм «Хуыцауы фарн». Уыцы фарн абарӕн ницӕимӕ ис – уый нын ӕрсабыр кӕны нӕ зӕрдӕ ӕмӕ нӕ зонд (Филиппӕгтӕм 4:6, 7). Уымӕй уӕлдай ма нын Йегъовӕйы сыгъдӕг уд ӕххуыс кӕны, цӕмӕй уӕм сабыр ӕмӕ фӕрнӕй цӕрӕм не ’мчырыстӕттимӕ дӕр ӕмӕ иннӕ адӕмимӕ дӕр (Ромӕгтӕм 12:18; 1 Фессалоникӕгтӕм 5:13).
13, 14. Цы у бирӕфӕразондзинад ӕмӕ цӕмӕн хъуамӕ уӕм бирӕфӕразон?
13 Фарн баст у бирӕфӕразондзинадимӕ. Бирӕфӕразондзинад уый у, ӕмӕ нӕ исчи куы фефхӕры кӕнӕ нӕ куы фӕмӕсты кӕны, уӕд фидар куы фӕлӕууӕм ӕмӕ куы фенхъӕлмӕ кӕсӕм, уавӕр кӕй фӕхуыздӕр уыдзӕн, уымӕ. Хуыцау у бирӕфӕразон (Ромӕгтӕм 9:22–24). Йесомӕ дӕр ис ацы миниуӕг. Йӕ бирӕфӕразондзинад пайда у махӕн дӕр. Уый хорз зыны Павелы ныхӕстӕй: «Йесо Чырысти [мӕм] фӕлмӕнзӕрдӕдзинад уый тыххӕй равдыста, цӕмӕй мӕн уылты, тӕригъӕдджынтӕн сӕ фыццаджы уылты, равдиса йӕ бирӕфӕразондзинад иууылдӕр, ӕмӕ уый уа цӕвиттонӕн, чи йыл баууӕнда ӕмӕ ӕнустӕм чи цӕра, уыдонӕн» (1 Тимофеймӕ 1:16).
14 Бирӕфӕразондзинады фӕрцы фидар уыдзыстӕм, иннӕтӕ нӕ се ’нӕрхъуыды ныхӕстӕй кӕнӕ митӕй куы фӕхъыг кӕной, уӕд. Павел йе ’мчырыстӕттӕн дзырдта: «Алкӕимӕ дӕр ут бирӕфӕразон» (1 Фессалоникӕгтӕм 5:14). Не ’ппӕт дӕр ӕнӕххӕст кӕй стӕм ӕмӕ рӕдийгӕ кӕй кӕнӕм, уымӕ гӕсгӕ нӕ фӕнды, адӕм нын куы хатыр кӕниккой ӕмӕ, сӕ ныхмӕ исты куы фӕрӕдийӕм, уӕд-иу сӕм бирӕфӕразондзинад куы разынид. Уӕдӕ архайӕм, цӕмӕй «цингӕнгӕйӕ, бирӕ фӕразӕм» (Колоссӕгтӕм 1:9–12).
Хӕларзӕрдӕдзинад ӕмӕ хорздзинад
15. Бамбарын кӕн, цы у хӕларзӕрдӕдзинад ӕмӕ йын цӕвиттонтӕ ’рхӕсс.
15 Хӕларзӕрдӕ стӕм, уый бӕрӕг уыдзӕн, иннӕтӕм хорз зӕрдӕ куы дарӕм, ныхасӕй сыл куы узӕлӕм ӕмӕ сын хъуыддагӕй куы ӕххуыс кӕнӕм. Йегъовӕ у хӕларзӕрдӕ. Хӕларзӕрдӕ у йӕ Фырт дӕр (Ромӕгтӕм 2:4; 2 Коринфӕгтӕм 10:1). Уӕдӕ Хуыцау ӕмӕ Чырыстийы лӕггадгӕнджытӕ дӕр хъуамӕ уой хӕларзӕрдӕ (Михей 6:8; Колоссӕгтӕм 3:12). Йегъовӕйӕн чи нӕ кувы, суанг ма уыдонӕй дӕр ис ахӕмтӕ, иннӕтӕм «тынг хорз цӕстӕй [чи] ракӕсы» (Хъуыддӕгтӕ 27:3; 28:2). Уӕдӕ Хуыцауы сыгъдӕг уды коммӕ куы кӕсӕм, уӕд, кӕй зӕгъын ӕй хъӕуы, ацы диссаджы миниуӕг ӕвдисдзыстӕм.
16. Кӕд нӕ фӕхъӕуы хӕларзӕрдӕдзинад ӕвдисын?
16 Нӕ бон у хӕларзӕрдӕдзинад равдисын, исчи нӕ ӕфхӕрӕн ныхӕстӕй кӕнӕ ӕнӕрхъуыды митӕй куы фӕхъыг кӕна, уӕд дӕр. «Куы смӕсты уат, уӕддӕр-иу тӕригъӕд ма ӕруадзут,– загъта Павел,– хур уыл мӕстыйӕ ма аныгуылӕд, стӕй-иу Хӕйрӕгӕн бынат ма ныууадзут. ...Кӕрӕдзимӕ ут хӕларзӕрдӕ, уӕ кӕрӕдзийы зын ӕмбарут, ӕмӕ уын Чырыстийы фӕрцы Хуыцау зӕрдӕйӕ куыд ныххатыр кодта, сымах дӕр кӕрӕдзийӕн афтӕ зӕрдӕйӕ хатыр кӕнут» (Ефесӕгтӕм 4:26, 27, 32). Уӕлдай ахсджиаг дӕр та у, цӕмӕй хӕларзӕрдӕ уӕм, зындзинӕдтӕ чи ӕвзары, уыдонмӕ. Фӕлӕ зӕгъӕм, хистӕр нӕлгоймаг, «хорздзинад, рӕстдзинад ӕмӕ ӕцӕгдзинады» фӕндагӕй ахауынӕй тӕссаг кӕмӕн у, ахӕм адӕймагӕн йӕ зӕрдӕхудты бацӕуынӕй тӕрсы, ӕмӕ йын уымӕ гӕсгӕ уынаффӕ нӕ дӕтты (Ефесӕгтӕм 5:9). Уый хӕларзӕрдӕдзинадыл дзурӕг уыдзӕн? Кӕй зӕгъын ӕй хъӕуы, нӕ.
17, 18. Цы нысан кӕны хорздзинад ӕмӕ цавӕр бынат хъуамӕ ахса нӕ царды?
17 Хорздзинад у ӕфсарм, хӕрзӕгъдаудзинад кӕнӕ, хорз, зӕгъгӕ, цӕмӕй фӕзӕгъынц, уый. Хуыцау хорз у алцӕмӕй дӕр (Псалом 24:8; Захари 9:17). Хорздзинадӕй ӕххӕст у Чырысти дӕр. Фӕлӕ йӕ чидӕр «Хорз Ахуыргӕнӕг» куы схуыдта, уӕд йӕ зӕрдӕмӕ нӕ фӕцыд, цӕмӕй йӕм ахӕм номӕй дзырдтаиккой (Марчы 10:17, 18). Ӕвӕццӕгӕн, уый тыххӕй, ӕмӕ йын хорздзинады ӕппӕты стырдӕр цӕвиттон уыд Хуыцау.
18 Хорздзинад кӕнын нӕ фӕхъыгдары, нӕ туджы кӕй рахастам, уыцы тӕригъӕд (Ромӕгтӕм 5:12). Фӕлӕ нӕм ацы миниуӕг уӕд уыдзӕн, ӕмӕ Хуыцаумӕ куы кувӕм, цӕмӕй нӕ «хорздзинадыл ахуыр кӕна» (Псалом 119:66, НД, [118:66]). Павел Ромы чырыстӕттӕн загъта: «Ме ’фсымӕртӕ, ӕз мӕхӕдӕг дӕр ӕппындӕр нӕ дызӕрдыг кӕнын, сымахмӕ кӕй ис алы хорздзинад, уымӕн ӕмӕ алцыдӕр хорз зонут» (Ромӕгтӕм 15:14). Чырыстон цӕстдарӕг хъуамӕ «уарза хорздзинад» (Титмӕ 1:7, 8). Хуыцауы сыгъдӕг уды разамындмӕ куы хъусӕм, уӕд нӕ иууылдӕр нӕ хорз хъуыддӕгтӕй зондзысты ӕмӕ цы хорздзинад аразӕм, уый нын Йегъовӕ нӕ ферох кӕндзӕн (Нееми 5:19; 13:31).
«Ӕнӕхин уырнындзинад»
19. Дзуттӕгтӕм 11:1 цы фыст ис, уымӕ гӕсгӕ уырнындзинад цы нысан кӕны?
19 Сыгъдӕг удӕй чи гуыры, ӕндӕр ахӕм миниуӕг у уырнындзинад. Уый у, «адӕймаг цӕмӕ ӕнхъӕлмӕ кӕсы, уымӕй йӕ фидар ныфс куы уа ӕмӕ бӕлвырдгӕнӕнты фӕрцы куы зона, цӕстӕй цы нӕ уыны, уыдон ӕцӕгдӕр кӕй сты» (Дзуттӕгтӕм 11:1). Уырнындзинад нӕм куы уа, уӕд дызӕрдыг нӕ кӕндзыстӕм, Йегъовӕ, зӕрдӕ цӕмӕйдӕриддӕр ӕвӕры, уыдон иууылдӕр ӕнӕмӕнг кӕй сӕххӕст уыдзысты. Цӕстӕй цы нӕ уынӕм, уыдон ӕцӕгдӕр кӕй сты, уый бӕлвырдгӕнӕнтӕ афтӕ фидар сты, ӕмӕ, зӕгъӕн ис, уырнындзинад йӕхӕдӕг дӕр у ахӕм фидар бӕлвырдгӕнӕн. Зӕгъӕм, нӕ алыварс цы дуне ис, уый дзурӕг у, Сфӕлдисӕг кӕй ис, ууыл. Ахӕм уырнындзинад нӕм уыдзӕн, сыгъдӕг уды коммӕ куы кӕсӕм, уӕд.
20. «Ӕнцонӕй [нӕ] чи ӕрцахсы, уыцы тӕригъӕд» цы у ӕмӕ уымӕй ӕмӕ буары хъуыддӕгтӕй нӕхи куыд хъахъхъӕнӕм?
20 Фаг уырнындзинад нӕм куы нӕ уа, уӕд уый у, «ӕнцонӕй [нӕ] чи ӕрцахсы, уыцы тӕригъӕд» (Дзуттӕгтӕм 12:1). Хуыцауы сыгъдӕг удыл хъуамӕ нӕ ныфс дарӕм, цӕмӕй буары хъуыддӕгтӕй, мулк уарзынӕй ӕмӕ мӕнг ахуырӕдтӕй нӕхи хъахъхъӕнӕм, ӕмӕ нын нӕ уырнындзинад ма ӕрлӕмӕгъ кӕной (Колоссӕгтӕм 2:8; 1 Тимофеймӕ 6:9, 10; 2 Тимофеймӕ 4:3–5). Библи кӕй кой кӕны, уыцы ӕвдисӕнтӕн ӕмӕ ӕндӕр адӕмӕн Хуыцауы сыгъдӕг уды фӕрцы сӕ уырнындзинад куыд фидар уыд, раст афтӕ фидар у абон сӕ уырнындзинад Йегъовӕйы лӕггадгӕнджытӕн дӕр (Дзуттӕгтӕм 11:2–40). Ӕмӕ нӕ «ӕнӕхин уырнындзинад» фидар кӕндзӕн иннӕты уырнындзинад дӕр (1 Тимофеймӕ 1:5; Дзуттӕгтӕм 13:7).
Фӕлмӕн удыхъӕд ӕмӕ хиуыл хӕцын
21, 22. Цы нысан кӕны фӕлмӕн удыхъӕд ӕмӕ фӕлмӕн цӕмӕн хъуамӕ уӕм?
21 Фӕлмӕн удыхъӕд кӕмӕн ис, уый вӕййы фӕлмӕн зӕрдӕйӕ ӕмӕ йӕ фӕлмӕндзинад бӕрӕг вӕййы йӕ хъуыддӕгтӕй. Хуыцау у фӕлмӕн удыхъӕды хицау. Йесо алцӕмӕй дӕр уыд Йегъовӕйы хуызӕн ӕмӕ уыд тынг фӕлмӕн адӕймаг (Матфейы 11:28–30; Иоанны 1:18; 5:19). Цымӕ уӕд Хуыцау махӕй та, йӕ лӕггадгӕнджытӕй, цӕмӕ ӕнхъӕлмӕ кӕсы?
22 Хуыцауы фӕнды, цӕмӕй уӕм «алкӕимӕ дӕр фӕлмӕн» (Титмӕ 3:2). Фӕлмӕн вӕййӕм хорз хабар хъусынгӕнгӕйӕ. Фӕлтӕрд чырыстӕттӕн Библи дзуры, цӕмӕй, чи фӕрӕдыд, уыдоны раст зондыл «аразой фӕлмӕнӕй» (Галатӕгтӕм 6:1). Алчидӕр нӕ «сӕрныллӕг, фӕлмӕн» куы уа, уӕд ахъаз кӕндзӕн чырыстон ӕмбырды иудзинад ӕмӕ фарнӕн (Ефесӕгтӕм 4:1–3). Фӕлмӕн уыдзыстӕм, ӕдзух сыгъдӕг уды коммӕ куы кӕсӕм ӕмӕ нӕхиуыл куы хӕцӕм, уӕд.
23, 24. Хиуыл хӕцын цы нысан кӕны ӕмӕ нын уыцы миниуӕг куыд ӕххуыс кӕны?
23 Адӕймаг йӕхиуыл хӕцын куы зона, уӕд йӕ хъуыдытыл, йӕ ныхӕстыл ӕмӕ йӕ хъуыддӕгтыл йӕ бар цӕудзӕн. Йегъовӕ «йӕхиуыл хӕцыд», вавилойнӕгтӕ Иерусалим куы ныппырх кодтой, уӕд (Исай 42:14). Йӕ Фырт хъизӕмӕрттӕ ӕвзаргӕйӕ йӕхиуыл куыд хӕцыд, уымӕй нын у фӕзминаг. Апостол Петр дӕр йе ’мчырыстӕтты фӕдзӕхста, цӕмӕй сӕ зонындзинӕдтӕ баххӕст кодтаиккой хиуылхӕцындзинадӕй (1 Петры 2:21–23; 2 Петры 1:5–8).
24 Хистӕр нӕлгоймӕгтӕ дӕр хъуамӕ зоной сӕхиуыл хӕцын (Титмӕ 1:7, 8). Сыгъдӕг уды разамындмӕ чи хъусы, уыдонӕн сӕ бон у сӕхиуыл хӕцын ӕмӕ сӕхи хъахъхъӕнын ӕнӕгъдаудзинадӕй, чъизи ныхӕстӕй – Йегъовӕйы зӕрдӕмӕ чи нӕ цӕуы, ӕппӕт уыцы хъуыддӕгтӕй. Хуыцауы сыгъдӕг уды фӕрцы нӕм хиуылхӕцындзинад куы уа, уӕд уый бӕрӕг уыдзӕн, иннӕтимӕ куыд ныхас кӕнӕм ӕмӕ нӕхи куыд дарӕм, уымӕй.
Сыгъдӕг уды коммӕ кӕсӕм дарддӕр дӕр
25, 26. Сыгъдӕг уды коммӕ куы кӕсӕм, уӕд уый нӕ ахастытыл адӕмимӕ ӕмӕ нӕ сомбоны цардыл куыд ӕндавдзӕн?
25 Сыгъдӕг уды коммӕ куы кӕсӕм, уӕд Хуыцауы Паддзахады тыххӕй хорз хабар зынгзӕрдӕйӕ хъусын кӕндзыстӕм (Хъуыддӕгтӕ 18:24–26). Иннӕтӕ нӕм хорз зӕрдӕ дардзысты. Уӕлдайдӕр та Хуыцауыл иузӕрдион чи у, уыдоны фӕнддзӕн, цӕмӕй-иу арӕхдӕр немӕ уой ӕмӕ немӕ ныхас кӕной. Сыгъдӕг уды разамындмӕ куы хъусӕм, уӕд, Йегъовӕйӕн немӕ чи лӕггад кӕны, уыдоны фидар кӕндзыстӕм (Филиппӕгтӕм 2:1–4). Алчидӕр нӕ уымӕ нӕ бӕллы?
26 Ацы дуне ис Сайтаны къухы, ӕмӕ уымӕ гӕсгӕ сыгъдӕг уды коммӕ кӕсын ӕнцон нӕу (1 Иоанны 5:19). Фӕлӕ уӕддӕр абон милуангай адӕм сыгъдӕг уды коммӕ кӕсынц. Нӕ зӕрдӕ ӕгасӕй дӕр Йегъовӕйыл куы дарӕм, уӕд цин кӕндзыстӕм абоны цардыл ӕмӕ ӕнустӕм цӕудзыстӕм, цӕстуарзонӕй нын йӕ сыгъдӕг уд чи дӕтты, уый рӕстаг фӕндӕгтыл (Псалом 127:1; Ӕмбисӕндтӕ 3:5, 6).
Цавӕр дзуапп раттис?
• Сыгъдӕг уды коммӕ кӕй кӕсӕм, уый куыд ӕндавы нӕ ахастытыл Хуыцауимӕ ӕмӕ йӕ Фыртимӕ?
• Сыгъдӕг удӕй цавӕр миниуджытӕ гуыры?
• Хуыцауы сыгъдӕг уды фӕрцы цы миниуджытӕ фӕзыны, уыдон нӕ бон ӕвдисын куыд у?
• Сыгъдӕг уды коммӕ кӕй кӕсӕм, уый нӕ абоны цардыл куыд зыны ӕмӕ нӕ сомбоны цардыл куыд бандавдзӕн?
[Фарстатӕ ахуыр кӕнынӕн]
[Ныв 12 фарсыл]
Йегъовӕйы сыгъдӕг уды фӕрцы тынгдӕр уарзӕм не ’фсымӕрты
