Фӕлмӕнзӕрдӕ уӕм. Куыд?
Фӕлмӕнзӕрдӕ уӕм. Куыд?
«Алкӕмӕн дӕр хорздзинад аразӕм, уӕлдайдӕр та, уырнындзинады фӕрцы иу бинонтау кӕимӕ стӕм, уыдонӕн» (ГАЛАТӔГТӔМ 6:10).
1, 2. Хӕларзӕрдӕ самариаджы хабарӕй фӕлмӕнзӕрдӕдзинады тыххӕй цӕуыл ахуыр кӕнӕм?
ЗАКЪОН хорз чи зыдта, иу ахӕм лӕг Йесойы бафарста: «Мӕ хион та чи у?» Йесо йын радзырдта фӕсномыг ныхас: «Иу лӕг Иерусалимӕй ӕрцӕйцыд Иерихонмӕ ӕмӕ фӕндагыл абырджыты къухтӕм бахауд. Уыдон ӕй сбӕгънӕг кодтой, фӕнадтой йӕ ӕмӕ йӕ уым ӕрдӕгмардӕй ныууагътой. Ныр рауад афтӕ, ӕмӕ уыцы фӕндагыл ӕрцӕйцыд иу сауджын, ӕмӕ йӕ куы федта, уӕд фӕндагӕн йӕ иннӕ фарсмӕ ахызт ӕмӕ йӕ рӕзты аивгъуыдта. Афтӕ левит дӕр, уыцы бынатмӕ куы ’рхӕццӕ ӕмӕ йӕ куы федта, уӕд фӕндагӕн йӕ иннӕ фарсмӕ ахызт ӕмӕ йӕ рӕзты аивгъуыдта. Фӕлӕ ма уыцы фӕндагыл фӕцӕйцыд иу самариаг лӕг дӕр. Ӕмӕ йӕ цурмӕ куы бахӕццӕ ӕмӕ йӕ куы ауыдта, уӕд ын фӕтӕригъӕд кодта. Гъемӕ йӕм бацыд, йӕ цӕфтыл ын сой ӕмӕ сӕн рауагъта ӕмӕ йын сӕ бабаста. Стӕй йӕ йӕ хӕрӕгыл сӕвӕрдта, фысымуатмӕ йӕ баласта ӕмӕ йӕм базылд. Дыккаг бон фысымуаты хицауӕн дыууӕ динары радта ӕмӕ йын загъта: „Ацы лӕгмӕ дӕ хъус фӕдар. Уымӕй уӕлдай ма йыл цы схардз кӕнай, уый та дын, куы ӕрыздӕхон, уӕд бафиддзынӕн“». Уый фӕстӕ Йесо уыцы лӕджы бафарста: «Куыд дӕм кӕсы, абырджыты къухтӕм чи бахауд, уымӕн уыцы ӕртӕйӕ хион чи разынд?» Лӕг ын дзуапп радта: «Чи йын фӕтӕригъӕд кодта ӕмӕ йын чи баххуыс кодта, уый» (Лукайы 10:25, 29–37а).
2 Самариаг лӕг уыцы адӕймагӕн кӕй баххуыс кодта, уый хорз ӕвдисы, ӕцӕг фӕлмӕнзӕрдӕдзинад цы у, уый. Самариаг цӕфтӕ лӕгӕн кӕй фӕтӕригъӕд кодта, уый хъуыддагӕй равдыста. Уымӕй уӕлдай, кӕй фӕнадтой, уыцы лӕг самариаг нӕ уыд. Фӕлмӕнзӕрдӕдзинад равдисынӕн къуылымпыйы хос не сты адӕймаг ӕндӕр адӕмыхаттӕй уа, ӕндӕр диныл кӕнӕ ӕндӕр ӕгъдауыл хӕст уа, уый. Йесо хӕларзӕрдӕ самариаджы хабар куы ракодта, уӕд, чи йӕ фарста, уыцы лӕгӕн загъта: «Уӕдӕ ацу ӕмӕ ды дӕр афтӕ кӕн» (Лукайы 10:37ӕ). Мах дӕр ацы уынаффӕ нӕ зӕрдӕмӕ айсӕм ӕмӕ архайӕм, цӕмӕй иннӕтӕм фӕлмӕнзӕрдӕ уӕм. Куыд? Нӕ бон куыд у алы бон дӕр фӕлмӕнзӕрдӕдзинад ӕвдисын?
«Ӕфсымӕрӕн... йӕ уӕлӕ цы скӕна, уый куы нӕ уа»
3, 4. Уӕлдайдӕр нӕ хотӕ ӕмӕ не ’фсымӕртӕм фӕлмӕнзӕрдӕ цӕмӕн хъуамӕ уӕм?
3 Апостол Павел загъта: «Цалынмӕ рӕстӕг ис, уӕдмӕ алкӕмӕн дӕр хорздзинад аразӕм, уӕлдайдӕр та, уырнындзинады фӕрцы иу бинонтау кӕимӕ стӕм, уыдонӕн» (Галатӕгтӕм 6:10). Уымӕ гӕсгӕ уал фыццаг ӕркӕсӕм, нӕ бон куыд у нӕ хотӕ ӕмӕ не ’фсымӕртӕм фӕлмӕнзӕрдӕдзинад хъуыддӕгтӕй ӕвдисын.
4 Ахуыргӕнинаг Иаков чырыстӕтты разӕнгард кодта, цӕмӕй кӕрӕдзимӕ фӕлмӕнзӕрдӕ уой: «Тӕригъӕдгӕнаг чи нӕу, уымӕн тӕрхоны дӕр тӕригъӕд нӕ фӕкӕндзысты» (Иаковы 2:13). Иаковы фыстӕгӕй зыны, нӕ бон куыд у фӕлмӕнзӕрдӕдзинад ӕвдисын. Зӕгъӕм, Иаковы 1:27 кӕсӕм: «Цӕсты сыгъдӕг, ӕнӕфау дин у ахӕм: сидзӕртӕ ӕмӕ идӕдзтӕн сӕ тыхсты сӕ фарсмӕ балӕуу ӕмӕ ацы дунейӕ дӕхи фӕчъизи кӕнын ма бауадз». Иаковы 2:15, 16 та фыст ис: «Ӕфсымӕр кӕнӕ хойӕн, йӕ уӕлӕ цы скӕна, уый куы нӕ уа ӕмӕ хӕринагхъуаг куы ӕййафа, ӕмӕ йын сымахӕй исчи афтӕ куы зӕгъа, дзӕбӕх у, дӕхи хъарм дар ӕмӕ дӕхи хӕрдцух ма уадз, зӕгъгӕ, цы хъуаг у, уый та йын куы нӕ ратта, уӕд ын уый цы пайда у?»
5, 6. Нӕ бон куыд у не ’мбырды хотӕ ӕмӕ ӕфсымӕртӕн бирӕ хорз хъуыддӕгтӕ аразын?
5 Ӕцӕг диныл хӕст чи у, уый иннӕтыл тыхсы ӕмӕ ӕххуысхъуаг чи у, уыдоны фарсмӕ балӕууы. Мах адӕймагыл ӕрмӕст ныхасӕй нӕ тыхсӕм, фӕлӕ ӕцӕгӕйдӕр ӕххуысхъуаг чи у, уыдонӕн тӕригъӕд кӕй кӕнӕм, уый тыххӕй сӕм фӕкӕсӕм (1 Иоанны 3:17, 18). Цӕмӕй? Зӕгъӕм, рынчынӕн хӕринаг скӕнӕм, ацӕргӕ адӕймагӕн йӕ хӕдзары куыстытӕ бакӕнӕм, куы хъӕуа, уӕд адӕймаджы ӕмбырдмӕ аласӕм ӕмӕ ӕххуыс кӕнын кӕмӕн хъӕуы, уыдонмӕ рӕдау вӕййӕм. Адон сты, нӕ фӕлмӕнзӕрдӕдзинад цы бирӕ хъуыддӕгтӕй хъуамӕ уа бӕрӕг, уыдонӕй иуӕй-иутӕ (Дыккаг закъон 15:7–10).
6 Хотӕ ӕмӕ ӕфсымӕртӕн ӕнӕуи ӕххуыс кӕнынӕй бирӕ ахсджиагдӕр у сӕ уырнындзинад фидар кӕнын. Мах хъуамӕ, «ныфссаст чи у, уыдоны ныхасӕй рӕвдауӕм, лӕмӕгъты фидар кӕнӕм» (1 Фессалоникӕгтӕм 5:14). «Ацӕргӕ сылгоймӕгтӕ... хъуамӕ... хорз цы у, ууыл иннӕты ахуыр кӕной» (Титмӕ 2:3). Ӕмбырды цӕстдарджыты тыххӕй та Библийы фыст ис: «Алчидӕр сӕ уыдзӕн дымгӕйӕ ӕмбӕхсӕн агъуысты ӕмӕ тӕрккъӕвдайӕ бааууонгӕнӕн бынаты хуызӕн» (Исай 32:2).
7. Фӕлмӕнзӕрдӕдзинад ӕвдисӕн куыд ис, уый тыххӕй сириаг Антиохийы ахуыргӕнинӕгтӕй цӕуыл ахуыр кӕнӕм?
7 Фыццаг ӕнусы чырыстӕттӕ се ’мбырдты идӕдзтӕн, сидзӕртӕн, ӕххуысхъуаг ӕмӕ ныфссаст чи уыд, уыдонӕн ӕххуыс кодтой, стӕй ма-иу рӕстӕгӕй-рӕстӕгмӕ ӕндӕр рӕтты ӕфсымӕртӕм дӕр фӕкастысты. Зӕгъӕм, пехуымпар Агав куы фехъусын кодта, «ӕгас зӕххыл кӕй скӕндзӕн тынг ӕххормаг рӕстӕг», уӕд сириаг Антиохийы ахуыргӕнинӕгтӕ «бауынаффӕ кодтой, алчидӕр сӕ, йӕ бон кӕмӕн цы у, уымӕй кӕй баххуыс кӕндзӕн Иудейы цӕрӕг ӕфсымӕртӕн». Цы ӕрӕмбырд кодтой, уый хистӕр нӕлгоймӕгтӕ «Варнавӕ ӕмӕ Савлимӕ арвыстой» (Хъуыддӕгтӕ 11:28–30). Абон та куыд у хабар? «Ӕууӕнкджын ӕмӕ зондджын цагъар» сарӕзта комитеттӕ, цӕмӕй-иу баххуыс кӕной ӕрдзон бӕллӕхты, зӕгъӕм, тыхдымгӕ, зӕххӕнкъуыст кӕнӕ цунами зиан кӕмӕн ӕрхаста, уыцы ӕфсымӕртӕн (Матфейы 24:45). Ахӕм уавӕрты нӕ рӕстӕг, нӕ хъарутӕ ӕмӕ нӕ фӕрӕзтыл куы нӕ ауӕрдӕм, уӕд ӕвдисдзыстӕм нӕ фӕлмӕнзӕрдӕдзинад.
«Кӕд хъулон митӕ кӕнут...»
8. Хъулон митӕ кӕнын фӕлмӕнзӕрдӕдзинады ныхмӕ куыд у?
8 Фӕлмӕнзӕрдӕдзинад ӕвдисын ӕмӕ «паддзахы закъон», ома уарзондзинады закъон ӕххӕст кӕнын цы хъыгдары, уый тыххӕй Иаков фӕдзӕхста: «Кӕд хъулон митӕ кӕнут, уӕд тӕригъӕд аразут, уымӕн ӕмӕ закъонмӕ гӕсгӕ стут закъонхалджытӕ» (Иаковы 2:8, 9). Хъӕздыг кӕнӕ стыр бынат чи ахсы, ахӕм адӕмӕн уӕлдай буц митӕ куы кӕнӕм, уӕд нӕм «мӕгуыры дзыназын» нал хъардзӕн (Ӕмбисӕндтӕ 21:13). Адӕймаг хъулон митӕ куы кӕна, уӕд ын зын уыдзӕн, цӕмӕй ма фӕлмӕнзӕрдӕ уа. Фӕлмӕнзӕрдӕ уыдзыстӕм, куы никӕй хъулон кӕнӕм, уӕд.
9. Ӕвзӕр цӕуылнӕ у искӕмӕн уӕлдай тынгдӕр аргъ кӕнын?
9 Цымӕ макӕй хъулон кӕнӕм, уый ууыл дзурӕг у, ӕмӕ нӕ бон нӕу, искӕмӕн уӕлдай тынгдӕр аргъ кӕнын? Кӕй зӕгъын ӕй хъӕуы, нӕ. Йе ’мкусӕг Епафродиты тыххӕй апостол Павел филиппаг чырыстӕттӕм фыста: «Ахӕм адӕймӕгтӕн аргъ кӕнут». Цӕмӕн? «Уымӕн ӕмӕ нӕ Хицауы хъуыддаджы тыххӕй йӕхи тӕссаг уавӕры баппӕрста ӕмӕ мӕлӕты къахыл лӕууыд, цӕмӕй мемӕ уыдаид ӕмӕ мын уӕ бӕсты лӕггад кодтаид» (Филиппӕгтӕм 2:25, 29, 30). Епафродит иузӕрдионӕй кӕй лӕггад кодта, уый тыххӕй уӕлдай кады аккаг уыд. Уымӕй уӕлдай ма 1 Тимофеймӕ 5:17 кӕсӕм: «Хистӕр нӕлгоймӕгтӕ дӕттынц хорз разамынд, ӕмӕ сын уымӕ гӕсгӕ уӕлдай кад кӕнут, уӕлдайдӕр та Хуыцауы ныхас дзурын ӕмӕ амоныны хъуыддаджы чи фыдӕбон кӕны, уыдонӕн». Хорз миниуджытӕ кӕмӕ ис, уый дӕр раппӕлыны аккаг у. Ахӕм адӕмӕн аргъ кӕнын хъулон митыл нымад нӕ цӕуы.
«Уӕлейӕ ӕрцӕугӕ зонд... ӕгасӕй дӕр у фӕлмӕнзӕрдӕ»
10. Цы дзурӕм, уымӕ нӕ хъус цӕмӕн хъуамӕ дарӕм?
10 Ӕвзаджы тыххӕй Иаков загъта: «Уый ахӕм фыдбылыз у, ӕмӕ йын бауромӕн нӕй, йӕ тӕккӕ дзаг у мӕлӕтхӕссӕг маргӕй. Уымӕй арфӕ кӕнӕм Йегъовӕйӕн, нӕ Фыдӕн, ӕмӕ уымӕй ӕлгъитӕм, „Хуыцаумӕ гӕсгӕ“ кӕй сфӕлдыстӕуыд, уыцы адӕмы. Уыцы иу дзыхӕй рацӕуы арфӕ дӕр ӕмӕ ӕлгъыст дӕр». Стӕй ма загъта: «Кӕд уӕ зӕрдӕйы ис хӕлӕг ӕмӕ уӕ зӕрдӕ загъд агуры, уӕд уӕхицӕй ма ӕппӕлут ӕмӕ рӕстдзинадӕй мӕнг ма дзурут. Уый уӕлейӕ ’рцӕугӕ зонд нӕу, фӕлӕ зӕххон, хъӕддаг, хӕйрӕджытӕй. Уымӕн ӕмӕ хӕлӕг ӕмӕ загъд кӕм ис, уым нӕдӕр уаг ис, нӕдӕр ӕгъдау, ис дзы алы ӕвзӕрдзинад. Уӕлейӕ ӕрцӕугӕ зонд та фыццаджыдӕр у сыгъдӕг, стӕй фарнуарзаг, ӕмбаргӕ, коммӕгӕс, ӕгасӕй дӕр у фӕлмӕнзӕрдӕ ӕмӕ алы хорз хъуыддагӕй хайджын, хъулон никӕй кӕны, нӕй йӕм цӕстмӕ митӕ» (Иаковы 3:8–10а, 14–17).
11. Фӕлмӕнзӕрдӕ кӕй стӕм, уый нӕ ныхасӕй куыд зындзӕн?
11 Уӕдӕ нӕ ныхасӕй бӕрӕг вӕййы, «ӕгасӕй дӕр... фӕлмӕнзӕрдӕ» чи у, ахӕм зонд нӕм ис ӕви нӕ. Фӕлӕ зӕгъӕм, хӕлӕг кӕй кӕнӕм кӕнӕ загъдгӕнаг кӕй стӕм, уый тыххӕй нӕхицӕй ӕппӕлын, сайын кӕнӕ искӕй фыдкой кӕнын куы райдайӕм, уӕд та? Псалом 94:4 фыст ис: «Ӕвзӕрдзинад чи кӕны, уыдон се ’ппӕт дӕр сӕхицӕй ӕппӕлынц». Зианхӕссӕг ныхӕстӕ ӕнцонтӕй фесафынц ӕнаххос адӕймаджы хорз ном (Псалом 64:2–4). Стӕй ма ахъуыды кӕн, цас маст ӕрхӕсдзӕн, «мӕнг ӕвдисӕн [цы] бирӕ мӕнг ныхӕстӕ фӕкӕндзӕн», уый (Ӕмбисӕндтӕ 14:5; 3 Паддзӕхты 21:7–13). Иаков куы ныффыста ӕвзаг цы зиан ӕрхӕссы, уый тыххӕй, уӕд ма загъта: «Афтӕ хъуамӕ ма уа, ме ’фсымӕртӕ» (Иаковы 3:10ӕ). Цӕмӕй ӕцӕг фӕлмӕнзӕрдӕ уӕм, уый тыххӕй хъуамӕ нӕ ныхас уа сыгъдӕг, уӕздан ӕмӕ ӕмбаргӕ. Йесо загъта: «Зӕгъын уын: адӕм сӕ алы дзӕгъӕл ныхасы тыххӕй дӕр дзуапп ратдзысты Тӕрхоны бон» (Матфейы 12:36). Уӕдӕ куыд ахсджиаг у, цӕмӕй нӕ ныхасӕй дӕр бӕрӕг уа, фӕлмӕнзӕрдӕ кӕй стӕм!
«Адӕмӕн сӕ рӕдыдтытӕ... хатыр кӕнут»
12, 13. а) Йӕ хицауӕй бирӕ ӕхца чи дардта, уыцы цагъары хабарӕй цӕуыл ахуыр кӕнӕм? ӕ) Куыд ӕмбарын хъӕуы, де ’фсымӕрӕн «ӕвдай авд хатты» хатыр кӕн, зӕгъгӕ?
12 Фӕлмӕнзӕрдӕдзинад ма куыд ис ӕвдисӕн, уый тыххӕй Йесо радзырдта фӕсномыг ныхас. Иу цагъар йӕ хицауӕй, паддзахӕй, дардта 60 000 000 динары. Йӕ хӕс цӕмӕй бафыстаид, уый йӕм нӕ уыди ӕмӕ йӕ хицауӕн ныллӕгъстӕ кодта, цӕмӕй йын ӕй ныббарстаид. Хицау ын фӕтӕригъӕд кодта ӕмӕ йын йӕ хӕс ныххатыр кодта. Фӕлӕ уыцы цагъар уырдыгӕй куы рацыд, уӕд ссардта, 100 динары дзы чи дардта, уыцы адӕймаджы, йӕхи хуызӕн цагъары, нӕ йын фӕтӕригъӕд кодта ӕмӕ йӕ ахӕстоны бакӕнын кодта. Уыдӕттӕ йӕ хицау куы фехъуыста, уӕд, йӕ хӕс кӕмӕн ныххатыр кодта, уыцы цагъары ӕрбакӕнын кодта ӕмӕ йын загъта: «Саузӕрдӕ цагъар, ды мын куы ныллӕгъстӕ кодтай, уӕд дын ӕз дӕ хӕс иууылдӕр куы ныххатыр кодтон. Ӕз дӕуӕн куыд фӕтӕригъӕд кодтон, афтӕ дӕуӕн дӕр не ’мбӕлди де ’мбал цагъарӕн фӕтӕригъӕд кӕнын?» Ӕмӕ йӕ хицау ахӕстонгӕсты къухмӕ радта. Йесо фӕстагмӕ загъта: «Афтӕ бакӕндзӕн сымахӕн дӕр мӕ уӕларвон Фыд, алчидӕр уӕ йе ’фсымӕрӕн зӕрдӕйӕ куы нӕ ныххатыр кӕна, уӕд» (Матфейы 18:23–35).
13 Ацы фӕсномыг ныхас хорз ӕвдисы, фӕлмӕнзӕрдӕ адӕймаг хатыр кӕнынмӕ цӕттӕ кӕй хъуамӕ уа, уый. Йегъовӕ нын хатыр кӕны бирӕ тӕригъӕдтӕ – стыр хӕс. Уӕдӕ мах дӕр хъуамӕ «адӕмӕн сӕ рӕдыдтытӕ [ма] хатыр кӕнӕм»? (Матфейы 6:14, 15). Йесо цалынмӕ фыдзӕрдӕ цагъары тыххӕй фӕсномыг ныхас нӕ радзырдта, уӕдмӕ йӕ Петр бафарста: «Хицау, ме ’фсымӕрӕн йӕ рӕдыд цал хатты хъуамӕ ныббарон? Авд хатты?» Йесо йын дзуапп радта: «Зӕгъын дын: авд хатты нӕ, фӕлӕ ӕвдай авд хатты» (Матфейы 18:21, 22). О, фӕлмӕнзӕрдӕ адӕймаг цӕттӕ у «ӕвдай авд хатты» хатыр кӕнынмӕ, ома ӕппынӕдзухдӕр хатыр кӕнынмӕ.
14. Матфейы 7:1–4 гӕсгӕ нӕ бон куыд у, ӕмӕ алы бон дӕр фӕлмӕнзӕрдӕ уӕм?
14 Ноджыдӕр ма фӕлмӕнзӕрдӕдзинад ӕвдисӕн куыд ис, уый тыххӕй Йесо йӕ Уӕлхох уацамынды загъта: «Макӕй кой кӕнут, ӕмӕ сымах кой дӕр ничи кӕндзӕн, уымӕн ӕмӕ иннӕтӕй цы дзурат, уый дзурдзысты сымахӕй дӕр... Дӕхи цӕсты хъӕд куы нӕ уыныс, уӕд де ’фсымӕры цӕсты хъӕмпыхалмӕ цы кӕсыс? Науӕд де ’фсымӕрӕн афтӕ куыд зӕгъыс: „Ӕри-ма, ӕз дын дӕ цӕстӕй хъӕмпыхал райсон“, кӕд ӕмӕ дӕхи цӕсты хъӕд ис?» (Матфейы 7:1–4). Уӕдӕ алы бон дӕр фӕлмӕнзӕрдӕ уӕд уыдзыстӕм, иннӕтӕн сӕ хъӕндзинӕдтӕ фӕразонӕй куы быхсӕм ӕмӕ сӕ кой куы нӕ кӕнӕм.
«Алкӕмӕн дӕр хорздзинад аразӕм»
15. Фӕлмӕнзӕрдӕ ӕрмӕст нӕ хотӕ ӕмӕ не ’фсымӕртӕм цӕуылнӕ хъуамӕ уӕм?
15 Иаковы чиныджы сӕйраджыдӕр дзырд цӕуы, цӕмӕй нӕ хотӕ ӕмӕ не ’фсымӕртӕм фӕлмӕнзӕрдӕ уӕм. Фӕлӕ уый ууыл дзурӕг нӕу, ӕмӕ иннӕ адӕммӕ ахӕм зӕрдӕ хъуамӕ ма дарӕм. Псаломы 145:9 кӕсӕм: «Алкӕмӕн дӕр хорз у ӕмӕ йӕ фӕлмӕнзӕрдӕдзинад йе ’ппӕт хъуыддӕгты дӕр бӕрӕг у». Мах хъуамӕ «фӕзмӕм Хуыцауы» ӕмӕ «алкӕмӕн дӕр хорздзинад аразӕм» (Ефесӕгтӕм 5:1; Галатӕгтӕм 6:10). Кӕд ацы дуне, ӕмӕ дунейы цы ис, уый дӕр нӕ уарзӕм, уӕддӕр куыдфӕндыйы цӕстӕй нӕ кӕсӕм, ацы дунейы адӕм цӕуыл тыхсынц, уымӕ (1 Иоанны 2:15).
16. Иннӕтӕм фӕлмӕнзӕрдӕдзинад ӕвдисгӕйӕ, нӕ зӕрдыл цы хъуамӕ дарӕм?
16 Мах, Йегъовӕйы Ӕвдисӕнтӕ, кӕддӕриддӕр цӕттӕ стӕм баххуыс кӕнынмӕ, искӕуыл ӕнӕнхъӕлӕджы исты куы ’рцӕуа кӕнӕ исчи зын уавӕрты куы бахауа, уӕд (Екклесиаст 9:11). Кӕй зӕгъын ӕй хъӕуы, уый араздзыстӕм нӕ уавӕртӕм гӕсгӕ, не ’хца, нӕ рӕстӕг ӕмӕ нӕ хъарутӕ цас амонынц, уымӕ гӕсгӕ (Ӕмбисӕндтӕ 3:27). Искӕмӕн ӕхцайӕ, йе та ӕндӕр искуыд куы ӕххуыс кӕнӕм, уӕд хъуамӕ лӕмбынӕг уӕм, цӕмӕй адӕймагӕй магуса ма саразӕм (Ӕмбисӕндтӕ 20:1, 4; 2 Фессалоникӕгтӕм 3:10–12). Уӕдӕ ӕцӕг фӕлмӕнзӕрдӕдзинад тӕригъӕд кӕнын дӕр зоны ӕмӕ ӕмбаргӕ дӕр у.
17. Йегъовӕйӕн чи нӕ лӕггад кӕны, уыдонмӕ фӕлмӕнзӕрдӕ уӕм, уымӕн ӕппӕты хуыздӕр мадзал цы у?
17 Йегъовӕйӕн чи нӕ лӕггад кӕны, уыдонмӕ фӕлмӕнзӕрдӕ уӕм, уымӕн ӕппӕты хуыздӕр мадзал у – хорз хабар сын дзурын. Цӕмӕн? Уымӕн ӕмӕ адӕмӕн сӕ фылдӕр абон Хуыцауы нӕ зонынц ӕмӕ уый тыххӕй сты талынджы. Сӕ зындзинӕдтӕ куыд аскъуыддзаг кӕной, уый кӕй нӕ зонынц ӕмӕ сӕ фидӕнӕй фидар ныфс кӕй нӕй, уымӕ гӕсгӕ сӕ фылдӕр «ӕнӕфыййау фыстау, ӕфхӕрд ӕмӕ дзӕгъӕл» сты (Матфейы 9:36). Хуыцауы Ныхасы цы хабар ис, уый, гӕнӕн ис, суа «рухсгӕнӕн сӕ къахӕн» ӕмӕ сын ӕххуыс кӕна сӕ зындзинӕдты. Уый ма сын гӕнӕн ис «рухс уа сӕ фӕндагӕн», уымӕн ӕмӕ Библи дзуры, Хуыцаумӕ фидӕны тыххӕй цы фӕнд ис, уый ӕмӕ уымӕй фидар ныфс ӕвӕры (Псалом 119:105). Цӕй стыр кад нын у, уыцы диссаджы хабар дзурын, фидӕнӕй ныфс кӕмӕ нӕй, уыдонӕн! «Стыр бӕллӕх» тынг тагъд кӕй уыдзӕн, уымӕ гӕсгӕ ныр хъуамӕ зӕрдиагӕй хъусын кӕнӕм Хуыцауы Паддзахады тыххӕй ӕмӕ ахуыргӕнинӕгтӕ цӕттӕ кӕнӕм (Матфейы 24:3–8, 21, 22, 36–41; 28:19, 20). Фӕлмӕнзӕрдӕдзинад цӕмӕй бӕрӕг вӕййы, уыдонӕй ацы хъуыддаджы хуызӕн ахсджиаг никӕцы у.
«Уӕ мидӕг цы ис, уымӕй мӕгуыртӕн ӕххуыс кӕнут»
18, 19. Цӕмӕн хъуамӕ архайӕм, цӕмӕй фӕлмӕнзӕрдӕдӕр уӕм?
18 «Уӕ мидӕг цы ис, уымӕй мӕгуыртӕн ӕххуыс кӕнут», загъта Йесо (Лукайы 11:41). Хорз хъуыддаг равзӕры ӕцӕг фӕлмӕнзӕрдӕдзинадӕй, «мидӕгӕй» – уарзӕгой ӕмӕ рӕдау зӕрдӕйӕ (2 Коринфӕгтӕм 9:7). Цӕй стыр удӕнцой хӕссы ахӕм фӕлмӕнзӕрдӕдзинад ӕгъатыр, хиуарзон, стӕй адӕмы рыст ӕмӕ зындзинӕдтӕ нымады дӕр кӕм не сты, уыцы дунейы!
19 Цӕй уӕдӕ архайӕм, цӕмӕй фӕлмӕнзӕрдӕдзинад нӕ царды бӕрӕг уа. Цас фӕлмӕнзӕрдӕдӕр уӕм, уыйас Хуыцауы хуызӕн тынгдӕр уыдзыстӕм. Афтӕмӕй уыдзыстӕм ӕцӕг амондджын ӕмӕ райгонд нӕ цардӕй (Матфейы 5:7).
Цы базыдтай?
• Уӕлдайдӕр нӕ хотӕ ӕмӕ не ’фсымӕртӕм фӕлмӕнзӕрдӕ цӕмӕн хъуамӕ уӕм?
• Ӕмбырды нӕ бон куыд у фӕлмӕнзӕрдӕдзинад ӕвдисын?
• Йегъовӕйӕн чи нӕ лӕггад кӕны, уыдонӕн нӕ бон куыд у хорздзинад аразын?
[Фарстатӕ ахуыр кӕнынӕн]
[Ныв 12 фарсыл]
Самариаг лӕг уыд фӕлмӕнзӕрдӕ
[Ныв 14 фарсыл]
Адӕммӕ фӕлмӕнзӕрдӕ уӕм, уымӕн ӕппӕты хуыздӕр мадзал у – хорз хабар сын дзурын
