Кӕс дӕхимӕ, цӕмӕй иннӕты «арӕхстджынӕй ахуыр кӕнай»

«Хъусын кӕн дзырд... иннӕтӕн уайдзӕф кӕн, сӕ рӕдыд-иу сын зӕгъ, фӕдзӕхс сӕ – у бирӕфӕразон ӕмӕ сӕ арӕхстджынӕй ахуыр кӕн» (2 ТИМ. 4:2).

1. Йесо йӕ ахуыргӕнинӕгтӕн цы бафӕдзӕхста ӕмӕ сын фӕзминаг цӕмӕй у?

ЙЕСО ЧЫРЫСТИ зӕххыл куы уыд, уӕд стыр диссӕгтӕ арӕзта – уӕззау рынчынты-иу сдзӕбӕх кодта. Фӕлӕ йӕ уӕддӕр хосгӕнӕг ӕмӕ диссӕгтӕ аразӕг нӕ хуыдтой. Хуыдтой йӕ ахуыргӕнӕг (Марчы 12:19; 13:1). Йесойӕн ӕппӕты сӕйрагдӕр уыд Хуыцауы Паддзахады тыххӕй хорз хабар хъусын кӕнын. Уый ӕппӕты сӕйрагдӕр у йӕ фӕдылдзӕуджытӕн дӕр абон. Чырыстӕтты хӕс у ахуыргӕнинӕгтӕ цӕттӕ кӕнын ӕмӕ адӕмӕн амонын, Чырысти цы бафӕдзӕхста, ӕппӕт уыдӕттӕ (Матф. 28:19, 20).

2. Цы кӕнын нӕ хъӕуы, цӕмӕй нын Йесо цы бафӕдзӕхста, уый ӕххӕст кӕнӕм?

² Цӕмӕй нӕ хӕс ӕххӕст кӕнӕм, уый тыххӕй хъуамӕ ӕдзухдӕр архайӕм, хуыздӕр ахуыргӕнджытӕ куыд уӕм, ууыл. Уый куыд ахсджиаг у, уый тыххӕй апостол Павел Тимофеймӕ ныффыста: «Ӕдзухдӕр дӕхимӕ кӕс, стӕй дӕ хъус дар, иннӕты куыд ахуыр кӕныс,  уымӕ. Ацы хъуыддӕгты лӕуд у алкӕддӕр, уымӕн ӕмӕ афтӕмӕй дӕхи дӕр фервӕзын кӕндзынӕ ӕмӕ дӕм чи хъусы, уыдоны дӕр» (1 Тим. 4:16). Павел, ахуыр кӕн, зӕгъгӕ, куы загъта, уӕд уый кой нӕ кодта, ӕмӕ адӕймаг, йӕхӕдӕг цы зоны, уый иннӕмӕн ӕнӕуи бацамона. Хуыцауы хъуыддаджы бирӕ цы чырыстӕттӕн ӕнтысы, уыдон бацагайынц адӕмы зӕрдӕтӕ ӕмӕ сӕ бафӕнды сӕ цард аивын дӕр. Уыцы чырыстӕттӕй ис зӕгъӕн, ӕмӕ сты арӕхстджын ахуыргӕнджытӕ. Уӕдӕ адӕмӕн Хуыцауы Паддзахады тыххӕй куы фӕхъусын кӕнӕм, уӕд сӕ нӕ бон куыд у «арӕхстджынӕй ахуыр кӕнын»? (2 Тим. 4:2).

Адӕмы «арӕхстджынӕй ахуыр кӕнӕм»

3, 4. а) Цы кӕнын нӕ хъӕуы, цӕмӕй адӕмы «арӕхстджынӕй ахуыр кӕнӕм»? ӕ) Цӕмӕй хорз ахуыргӕнджытӕ суӕм, уый тыххӕй нын Хъусынгӕнджыты скъола куыд ӕххуыс кӕны?

³ Иу дзырдуатмӕ гӕсгӕ «арӕхстдзинад» у, «адӕймаг цыдӕр кӕй фӕахуыр кӕны, цы базоны, уымӕй кӕй фӕпайда кӕны ӕмӕ иннӕтӕм кӕй фӕкӕсы, уый фӕрцы исты хъуыддаг дӕсны аразын куы сахуыр вӕййы, уый». Цӕмӕй хорз хабар хъусын кӕнынмӕ арӕхсӕм, уый тыххӕй нӕ ацы ӕртӕ хъуыддагмӕ хъӕуы нӕ хъус лӕмбынӕг дарын. Цы ахуыр кӕнӕм, уый хорз ӕрмӕстдӕр уӕд бамбардзыстӕм, нӕ зӕрдӕ йӕм куы раттӕм ӕмӕ Йегъовӕмӕ куы скувӕм. (Бакӕс Псалом 119:27, 34.) Адӕмы ахуыр кӕнынмӕ хорз чи арӕхсы, уыцы хъусынгӕнджытӕм куы кӕсӕм, уӕд мах дӕр уыдонӕй ахуыр кӕндзыстӕм. Ӕмӕ, цы базыдтам, уымӕй ӕдзухдӕр куы пайда кӕнӕм, уӕд мах дӕр иннӕты ахуыр кӕнынмӕ хуыздӕр арӕхсдзыстӕм (Лук. 6:40; 1 Тим. 4:13–15).

⁴ Йегъовӕ у не Стыр Зондамонӕг. Йӕ организацийы уылты Йегъовӕ йӕ лӕггадгӕнджыты ахуыр кӕны, хъусын кӕнын куыд хъӕуы, ууыл (Ис. 30:20, 21). Уымӕ гӕсгӕ алы ӕмбырды дӕр ӕрвылкъуыри вӕййы Хуыцауы Ныхас хъусынгӕнджыты скъола. Уыцы Скъола, йӕхи дзы чи ныффыста, уыдонӕн ӕххуыс кӕны, цӕмӕй хорз хъусынгӕнджытӕ суой. Сӕйраджыдӕр дзы ахуыр кӕнынц Библи. Йегъовӕ нын йӕ Ныхасы уылты дзуры, адӕмӕн цы хъуамӕ амонӕм, уый. Уымӕй уӕлдай ма нын Хуыцауы Ныхас ӕвдисы, куыд хуыздӕр ӕмӕ куыд растдӕр у адӕмы ахуыр кӕнын. Скъолайы нын ӕдзух нӕ зӕрдыл лӕууын кӕнынц, хуыздӕр ахуыргӕнджытӕ кӕй суыдзыстӕм, адӕмӕн сӕ хъус сӕйраджыдӕр Хуыцауы Ныхасмӕ куы дарӕм, фарстытӕ дӕттынмӕ куы арӕхсӕм, хуымӕтӕгӕй куы амонӕм ӕмӕ адӕмыл сыгъдӕгзӕрдӕйӕ куы тыхсӕм, уӕд. Цӕй ӕмӕ ацы хъуыддӕгтӕй алкӕуылдӕр хицӕнӕй аныхас кӕнӕм. Уый фӕстӕ та аныхас кӕндзыстӕм, ахуыргӕнинаджы зӕрдӕ куыд ис бацагайӕн, ууыл.

Адӕмӕн се ’ргом здах Хуыцауы Ныхасмӕ

5. Адӕмӕн се ’ргом сӕйраджыдӕр цӕмӕ хъуамӕ здахӕм ӕмӕ цӕмӕн?

⁵ Йесойӕ хуыздӕр ахуыргӕнӕг никуы уыд. Уый алы хатт дӕр пайда кодта Фыстадӕй (Матф. 21:13; Иоан. 6:45; 8:17). Йесо йӕхи номӕй нӕ дзырдта, фӕлӕ йӕ чи рарвыста, уый номӕй (Иоан. 7:16–18). Уымӕй нын у фӕзминаг. Хӕдзарӕй-хӕдзармӕ хъусын кӕнӕм ӕви искӕимӕ Библи ахуыр кӕнӕм – хъуамӕ адӕмы ’ргом здахӕм сӕйраджыдӕр Хуыцауы Ныхасмӕ (2 Тим. 3:16, 17). Цыфӕнды хорз куы дзурӕм, уӕддӕр нӕ ныхас адӕмыл афтӕ нӕ бандавдзӕн, Фыстад сыл куыд бандава. Библийӕн ис стыр уӕз. Ахуыргӕнинагӕн исты фарст куы ’мбарын кӕнӕм, уӕд ӕппӕты  хуыздӕр уыдзӕн, уыцы фарсты фӕдыл Фыстад цы дзуры, уый йын куы равдисӕм. (Бакӕс Дзуттӕгтӕм 4:12.)

6. Куыд ис базонӕн, ахуыргӕнинаг ӕрмӕг бамбӕрста ӕви нӕ?

⁶ Кӕй зӕгъын ӕй хъӕуы, уый ууыл дзурӕг нӕу, ӕмӕ ахуыргӕнӕджы йӕхи нӕ хъӕуы Библийы ахуырмӕ цӕттӕ кӕнын. Уый хъуамӕ рагацау ӕркӕса, цы ӕрмӕг ахуыр кӕндзысты, уым цы стихтӕ ис, уыдонмӕ ӕмӕ равзара, кӕцытӕ дзы бакӕсдзысты ахуыры рӕстӕджы. Хуыздӕр вӕййы бакӕсын, цӕуыл ӕууӕндӕм, уый чи бӕлвырд кӕны, уыцы стихтӕ. Ахуыргӕнинагӕн ма фӕхъӕуы баххуыс кӕнын, цӕмӕй-иу бамбара, цы стихтӕ бакаст, уыдоны хъуыды (1 Кор. 14:8, 9).

Фарстытӕ дӕттынмӕ арӕхс

7. Искӕимӕ Библи ахуыр кӕнгӕйӕ хорз цӕмӕн у фарстытӕй пайда кӕнын?

⁷ Ахуыргӕнӕг фарстытӕ дӕттынмӕ куы арӕхса, уӕд ахуыргӕнинагӕн хъуыды кӕнынӕн ӕххуыс кӕндзӕн ӕмӕ йын йӕ зӕрдӕ бацагайдзӕн. Уымӕ гӕсгӕ ахуыргӕнинагӕн стихтӕ дӕхӕдӕг ма ӕмбарын кӕн, фӕлӕ йын зӕгъ, цӕмӕй сӕ уый дӕуӕн бамбарын кӕна. Хатт ахуыргӕнинагмӕ бахъӕуы иу кӕнӕ цалдӕр уӕлӕмхасӕн фарсты раттын, цӕмӕй раст хатдзӕгмӕ ’рцӕуа. Афтӕ йӕ куы ахуыр кӕнай, уӕд ын, ахӕм хатдзӕг цӕмӕн кӕнӕм, ӕрмӕст уый бамбарынӕн нӕ баххуыс кӕндзынӕ, фӕлӕ ма йӕхи дӕр фидарӕй бауырндзӕн, цы дзурӕм, уый раст кӕй у (Матф. 17:24–26; Лук. 10:36, 37).

8. Ахуыргӕнинаджы зӕрдӕйы цы ис, уый нӕ бон куыд у базонын?

⁸ Нӕ литературӕйы ахуыргӕнӕн ӕрмӕг фӕахуыр кӕнӕм фарстытӕ ӕмӕ дзуаппытӕм гӕсгӕ. Библи кӕимӕ ахуыр кӕнӕм, уыдонӕн сӕ фылдӕрӕн зын нӕ уыдзӕн фарстытӕн абзацтӕм гӕсгӕ дзуапп раттын. Фӕлӕ арфуынӕг ахуыргӕнӕгӕн ӕрмӕст раст дзуаппытӕ фаг нӕ уыдзысты. Зӕгъӕм, ахуыргӕнинагӕн йӕ бон у бамбарын кӕнын, Библи хӕтындзинады тыххӕй цы дзуры, уый (1 Кор. 6:18). Фӕлӕ йӕхӕдӕг уымӕ цы цӕстӕй кӕсы, уымӕй йӕ куы бафӕрсай, уӕд рабӕрӕг уыдзӕн, цы базыдта, уый тыххӕй цы хъуыды кӕны. Бафӕрсӕн ис: «Библи хӕтындзинады ныхмӕ цӕмӕн у? Хуыцау нӕ уымӕй кӕй фӕдзӕхсы, уый тыххӕй цы хъуыды кӕныс? Хуыцау ӕгъдауы тыххӕй цы закъӕттӕ радта, уыдонмӕ гӕсгӕ цӕрын исты пайда у?» Ахуыргӕнинаджы дзуаппытӕй рабӕрӕг уыдзӕн, йӕ зӕрдӕйы цы ис, уый. (Бакӕс Матфейы 16:13–17.)

Хуымӕтӕгӕй амон

9. Искӕмӕн Библийӕ исты куы ’мбарын кӕнӕм, уӕд нӕ зӕрдыл цы хъуамӕ дарӕм?

⁹ Хуыцауы Ныхасы цы хабӕрттӕ ис фыст, уыдонӕн сӕ фылдӕр зын бамбарӕн не сты. Фӕлӕ гӕнӕн ис, ӕмӕ Библи кӕимӕ ахуыр кӕнӕм, уыдон хӕцынц мӕнг дины ахуырӕдтыл. Махӕн нӕ хӕс у, цӕмӕй сын Библи афтӕ амонӕм, ӕмӕ йӕ ӕнцонтӕй ӕмбарой. Хорз ахуыргӕнӕг ӕрмӕг ӕмбарын кӕны хуымӕтӕгӕй, стӕй бӕлвырд ӕмӕ раст. Ацы уынаффӕмӕ куы хъусӕм, уӕд ӕцӕгдзинад афтӕ нӕ амондзыстӕм, ӕмӕ зындӕр ӕмбарӕн уа. Ахсджиаг чи нӕу, уыцы лыстӕг хабӕрттыл нӕ дзурдзыстӕм. Цы стих бакӕсӕм, уый алывӕрсыгӕй ӕвзарын нӕ хъӕуы. Йӕ хъус ын ӕрдардзыстӕм, дзырд цӕуыл цӕуы, уый бамбарынӕн сӕйрагдӕр цы у, уымӕ. Ахуыргӕнинагӕн йӕ уырнындзинад цас фидардӕр кӕна, уыйас хуыздӕр ӕмбардзӕн Библийы арф хъуыдытӕ (Дзут. 5:13, 14).

10. Библи ахуыр кӕнгӕйӕ цас ӕрмӕг рацӕуӕн ис, уый цӕмӕй кӕнгӕ у?

 ¹⁰ Иу хаттӕн цас ӕрмӕг хъуамӕ сахуыр кӕнӕм? Цӕмӕй уый нӕ бон сбӕлвырд кӕнын уа, уый тыххӕй хъуамӕ уӕм ӕмбаргӕ. Ахуыргӕнинагӕн ӕмӕ ахуыргӕнӕгӕн сӕ курдиӕттӕ ӕмӕ сӕ уавӕртӕ иухуызон нӕ вӕййынц. Фӕлӕ хъуамӕ рох ма кӕнӕм, ӕмӕ махӕн, куыд ахуыргӕнджытӕн, афтӕ нӕ нысан кӕй у, ахуыргӕнинагӕн йӕ уырнындзинад сфидар кӕнынӕн баххуыс кӕнын. Уӕдӕ йын хъуамӕ фаг рӕстӕг дӕттӕм, цӕмӕй йын Хуыцауы Ныхасӕй цы фӕамонӕм, уый-иу бакӕса, бамбара-иу ӕй ӕмӕ-иу ӕй йӕ зӕрдӕмӕ айса. Йӕ бон бамбарын цас у, уымӕй фылдӕр ӕрмӕг нӕ ахуыр кӕндзыстӕм. Фӕлӕ иу фарстыл ӕгӕр бирӕ рӕстӕг дӕр нӕ хардз кӕндзыстӕм. Иугӕр ахуыргӕнинаг фарст бамбӕрста, уӕд иннӕ фарстмӕ ахиз.

11. Апостол Павел адӕмы куыд ахуыр кодта, уымӕй нӕ бон зондӕн райсын цы у?

¹¹ Апостол Павел-иу хорз хабар куы хъусын кодта, уӕд-иу йӕ ныхас уыд тынг хуымӕтӕг. Кӕд ахуыргонд адӕймаг уыд, уӕддӕр зынӕмбарӕн ӕвзагӕй нӕ дзырдта. (Бакӕс 1 Коринфӕгтӕм 2:1, 2.) Библийы ӕцӕгдзинад хуымӕтӕг кӕй у, уый фӕрцы хъары сыгъдӕгзӕрдӕ адӕмы зӕрдӕтӕм ӕмӕ сын удӕнцой хӕссы. Йӕ бамбарынӕн уӕлдӕр ахуырад нӕ хъӕуы (Матф. 11:25; Ап. хъ. 4:13; 1 Кор. 1:26, 27).

Ахуыргӕнинагӕн ӕххуыс кӕн, цӕмӕй аргъ кӕна Библийы ӕцӕгдзинадӕн

12, 13. Ахуыргӕнинаг цы базона, уый цӕй тыххӕй хъуамӕ ӕххӕст кӕна? Бамбарын ӕй кӕн.

¹² Хорз ахуыргӕнӕг бацагайы ахуыргӕнинаджы зӕрдӕ. Ахуыргӕнинагӕн хъӕуы бамбарын кӕнын, ӕрмӕг уымӕ куыд хауы, цы пайда йын у, стӕй, Фыстад куыд дзуры, афтӕ куы кӕна, уӕд йӕ цард куыд фӕхуыздӕр уыдзӕн (Ис. 48:17, 18).

¹³ Зӕгъӕм, нӕ ныхас у Дзуттӕгтӕм 10:24, 25. Уыцы стихтӕ чырыстӕтты разӕнгард кӕнынц, цӕмӕй иумӕ ӕмбырд кӕной, ӕмӕ афтӕмӕй сӕ уырнындзинад фидар кӕна ӕмӕ сын хотӕ ӕмӕ ӕфсымӕрты уарзондзинад сӕ ныфсыл ныфс ӕфтауа. Кӕд ахуыргӕнинаг ӕмбырды никуыма уыд, уӕд ын нӕ бон уаид цыбыртӕй радзурын, фембӕлдтӕ куыд фӕцӕуынц ӕмӕ дзы цӕуыл фӕдзурынц. Зӕгъӕн ын ис, ӕмбырды фембӕлдтӕм цӕуын дӕр кӕй хауы Хуыцауӕн лӕггад кӕнынмӕ, ӕмӕ йын радзурын, цы пайда сты фембӕлдтӕ махӕн нӕхицӕн. Уый фӕстӕ йӕ ис фӕхонӕн. Библийы фӕдзӕхстытӕ хъуамӕ йӕ ахуыргӕнӕджы хатырӕй ма ӕххӕст кӕна, фӕлӕ йӕ Йегъовӕйы коммӕ кӕсын кӕй фӕнды, уый тыххӕй (Гал. 6:4, 5).

14, 15. а) Ахуыргӕнинаг Йегъовӕйы тыххӕй цы базоны? ӕ) Ахуыргӕнинаг, Йегъовӕ цавӕр Хуыцау у, уый куы базона, уӕд уый йӕ цардыл куыд фӕзындзӕн?

¹⁴ Ахуыргӕнинаг Библи куы фӕахуыр кӕны ӕмӕ йын йӕ уагӕвӕрдтӕ куы феххӕст кӕны, уӕд ӕппӕты ахсджиагдӕр вӕййы, цӕмӕй Йегъовӕйы базона ӕмӕ йӕ бауарза (Ис. 42:8). Йегъовӕ у уарзӕгой Фыд ӕмӕ Дун-дунейы Сфӕлдисӕг ӕмӕ Хицау. Уымӕй уӕлдай ма, чи йӕ уарзы ӕмӕ йын чи лӕггад кӕны, уыдонӕн уый ӕргом кӕны, цавӕр Хуыцау у ӕмӕ йӕм цавӕр миниуджытӕ ис. (Бакӕс Рацыд 34:6, 7.) Йегъовӕ Моисейы куы ’рвыста, цӕмӕй израилӕгты Египеты уацарӕй ракодтаид, уӕд йӕхи тыххӕй загъта: «Ӕз суыдзынӕн, чи мӕ бафӕнда, уый» (Рац. 3:13–15). Уый ууыл дзурӕг у, ӕмӕ Йегъовӕйӕн йӕ бон у, ӕмӕ суа, йӕ адӕмы тыххӕй йӕм цы фӕндтӕ ис, уыдон сӕххӕст кӕныны тыххӕй йӕ цӕйфӕнды сӕр ма бахъӕуа, уый. Уый фӕрцы израилӕгтӕ Йегъовӕйы базыдтой, чи сӕ ирвӕзын кодта, сӕ сӕрыл чи тох кодта, чи сӕ ӕфсӕста ӕмӕ йе ’ппӕт фӕндтӕ дӕр чи ӕххӕст кодта, ахӕм Хуыцауӕй (Рац. 15:2, 3; 16:2–5; Йес. Н. 23:14).

¹⁵ Библи чи ахуыр кӕны, уымӕн Йегъовӕ, гӕнӕн ис, Моисейӕн диссаджы хуызы куыд ӕххуыс кодта, афтӕ ма ӕххуыс кӕна. Фӕлӕ цы базоны, уый фӕрцы йӕ уырнындзинад куы фидардӕр кӕна ӕмӕ уыцы зонындзинӕдтӕн тынгдӕр куы аргъ кӕна ӕмӕ сӕ куы пайда кӕна, уӕд ӕнӕмӕнгӕй бамбардзӕн, куыд ахсджиаг у Йегъовӕйӕ ныфс, зонд ӕмӕ разамынд курын. Уый фӕрцы уый дӕр базондзӕн, Йегъовӕ кӕй у, стыр зонды хицау чи у ӕмӕ ӕууӕндӕн кӕуыл ис, ахӕм Уынаффӕгӕнӕг, Хъахъхъӕнӕг ӕмӕ йыл чи тыхсы, уыцы Хуыцау (Пс. 55:22; 63:7; Ӕмб. 3:5, 6).

 Адӕмыл зӕрдӕйӕ тыхс

16. Цӕмӕй хорз ахуыргӕнджытӕ уӕм, уый тыххӕй ахсджиагдӕр нӕ курдиӕттӕ цӕуылнӕ сты?

¹⁶ Кӕд, дӕхи куыд фӕнды, афтӕ нӕ арӕхсыс иннӕты ахуыр кӕнынмӕ, уӕд дӕ ныфс ма асӕттӕд. Йегъовӕ ӕмӕ Йесо сӕ хъус дарынц, ӕгас дунейы дӕр ахуыргӕнинӕгтӕ цӕттӕ кӕныны хъуыддаг куыд цӕуы, уымӕ (Ап. хъ. 1:7, 8; Рарг. 14:6). Уыдон дын баххуыс кӕндзысты, цӕмӕй дӕ ныхӕстӕ рӕстаг адӕмы зӕрдӕтӕм хъарой (Иоан. 6:44). Ахуыргӕнӕг ахуыргӕнинаджы зӕрдӕйӕ куы уарза, уӕд уыцы уарзондзинад баххӕст кӕндзӕн, цы курдиӕттӕ йын нӕ фаг кӕны, уыдон. Апостол Павелы ныхӕстӕ ӕвдисынц, хорз кӕй ӕмбӕрста, ахуыргӕнинӕгты уарзын ахсджиаг хъуыддаг кӕй у, уый (Бакӕс 1 Фессалоникӕгтӕм 2:7, 8.)

17. Библи кӕимӕ ахуыр кӕнӕм, уый зӕрдӕйӕ кӕй уарзӕм, уый куыд ӕвдисӕм?

¹⁷ Уӕдӕ хъуамӕ зӕрдӕйӕ тыхсӕм, Библи кӕимӕ ахуыр кӕнӕм, уыдонӕй алкӕуылдӕр ӕмӕ рӕстӕг арӕм, цӕмӕй ахуыргӕнинаджы хуыздӕр базонӕм. Библийы уагӕвӕрдтыл йемӕ куы ныхас кӕнӕм, уӕд базондзыстӕм йӕ цард ӕмӕ йӕ уавӕртӕ. Нӕ бон у фенын, Библийӕ цы базыдта, уымӕ гӕсгӕ йӕ царды цыдӕртӕ кӕй аивта. Кӕмдӕрты та ма йӕ, чи зоны, нырма исты аивын хъӕуы. Ахуыры рӕстӕджы адӕймагӕн куы ’мбарын кӕнӕм, ӕрмӕг уымӕн йӕхимӕ куыд хауы, уӕд ын ӕххуыс кӕнӕм, цӕмӕй суа Чырыстийы ӕцӕг ахуыргӕнинаг.

18. Нӕ ахуыргӕнинагимӕ ӕмӕ нӕ ахуыргӕнинаджы тыххӕй кувын цӕмӕн хъӕуы?

¹⁸ Ӕппӕты сӕйрагдӕр та у, нӕ ахуыргӕнинагимӕ ӕмӕ нӕ ахуыргӕнинаджы тыххӕй кувын. Уый хъуамӕ уына, нӕ нысан кӕй у, цӕмӕй йе Сфӕлдисӕджы хуыздӕр базона, баввахс ӕм уа ӕмӕ йын йӕ разамындмӕ хъуса. (Бакӕс Псалом 25:4, 5.) Йегъовӕмӕ куы кувӕм, цӕмӕй ахуыргӕнинаг цы базоны, уымӕ гӕсгӕ архайа, уӕд ӕй фендзӕн, дзырд ӕххӕст кӕнын куыд ахсджиаг у, уый (Иак. 1:22). Ахуыргӕнинаг нын нӕ зӕрдиаг куывдтытӕм куы хъуса, уӕд уый дӕр кувын базондзӕн. Куыд ӕхсызгон вӕййы, Библи чи фӕахуыр кӕны, уымӕн куы баххуыс кӕнӕм ӕмӕ Йегъовӕйы хӕлар куы свӕййы!

19. Иннӕ статьяйӕ цы базондзыстӕм?

¹⁹ Нӕ ныфсыл нын ныфс ӕфтауы, ӕгас дунейы дӕр ӕхсӕз милуан ӕмӕ ’рдӕгӕй фылдӕр Ӕвдисӕны кӕй архайынц, цӕмӕй сыгъдӕгзӕрдӕ адӕмы Йесойы фӕдзӕхстытӕ ӕххӕст кӕнын арӕхстджынӕй ахуыр кӕной. Хъусын кӕныны хъуыддаджы фӕрцы сын цы ’нтысы? Ацы фарстӕн дзуапп базондзыстӕм иннӕ статьяйӕ.

Бахъуыды кодтай?

• Чырыстӕтты цӕмӕн хъӕуы архайын, цӕмӕй адӕмы «арӕхстджынӕй ахуыр кӕной»?

• Цӕй фӕрцы нын ӕнтысдзӕн адӕмы хуыздӕр ахуыр кӕнын?

• Цы курдиӕттӕ нын нӕ фаг кӕна, уыдон нын цы баххӕст кӕндзӕн?

[Фарстатӕ ахуыр кӕнынӕн]

[Ныв 9 фарсыл]

Хуыцауы Ныхас хъусынгӕнджыты скъолайы фыст дӕ?

[Ныв 10 фарсыл]

Хорз цӕмӕн у, цӕмӕй ахуыргӕнинаг Библийӕ стихтӕ йӕхӕдӕг кӕса?

[Ныв 12 фарсыл]

Кув дӕ ахуыргӕнинагимӕ ӕмӕ дӕ ахуыргӕнинаджы тыххӕй