Фӕзм ӕппӕты хуыздӕр Миссионеры
Фӕзм ӕппӕты хуыздӕр Миссионеры
«Мӕн фӕзмут, ӕз Чырыстийы куыд фӕзмын, афтӕ» (1 КОР. 11:1).
1. Йесо Чырыстийы цӕмӕн хъуамӕ фӕзмӕм?
АПОСТОЛ Павел фӕзмыдта ӕппӕты хуыздӕр Миссионер Йесо Чырыстийы. Павел йе ’мчырыстӕттӕн дӕр дзырдта: «Мӕн фӕзмут, ӕз Чырыстийы куыд фӕзмын, афтӕ» (1 Кор. 11:1). Йесо йӕ апостолтӕн сӕ къӕхтӕ куы ныхсадта ӕмӕ сын уымӕй, сӕрныллӕгдзинад цы у, уый куы равдыста, уӕд сын загъта: «Ӕз уын равдыстон, куыд кӕнын хъӕуы, уый, цӕмӕй уын ӕз куыд сарӕзтон, афтӕ аразат сымах дӕр» (Иоан. 13:12–15). Махӕн дӕр, абоны чырыстӕттӕн, нӕ хӕс у, цӕмӕй Йесо Чырыстийы фӕзмӕм ныхасӕй дӕр ӕмӕ хъуыддагӕй дӕр, ӕмӕ нӕм уыйау, Хуыцауы зӕрдӕмӕ чи цӕуы, ахӕм миниуджытӕ уа (1 Пет. 2:21).
2. Кӕд дӕ Разамонӕг совет миссионерӕй лӕггад кӕнынмӕ нӕ арвыста, уӕддӕр дӕ бон цы у аразын?
2 Айразмӕ статьяйӕ базыдтам, миссионер кӕй у, иннӕтӕн хорз хабар хъусын кӕнынмӕ кӕй арвитынц, ахӕм адӕймаг. Уый фӕдыл Павел радта цалдӕр цымыдисаг фарсты. (Бакӕс Ромӕгтӕм 10:11–15.) Кӕс-ма, Павел куыд бафарста: «Куы ничи хъусын кӕна, уӕд хъусгӕ... куыд фӕкӕндзысты?» Стӕй ӕрхаста пехуымпар Исайы ныхӕстӕ: «Куыд рӕсугъд сты, хуыздӕр цыдӕр кӕй уыдзӕн, уый тыххӕй хорз хабар чи хъусын кӕны, уыдоны къӕхтӕ!» (Ис. 52:7). Фӕлӕ дӕ кӕд фӕсарӕнтӕм миссионерӕй лӕггад кӕнынмӕ нӕ арвыстой, уӕддӕр дӕ бон у Йесойау зынгзӕрдӕйӕ хорз хабар хъусын кӕнын. Фарон 6 957 852 Паддзахады хъусынгӕнӕджы хорз хабар хъусын кодтой 236 бӕстӕйы (2 Тим. 4:5).
«Мах ӕппӕт дӕр... ныууагътам ӕмӕ дӕ фӕдыл... рацыдыстӕм»
3, 4. Йесо уӕлӕрвты цы ныууагъта ӕмӕ, цӕмӕй йӕ фӕдыл цӕуӕм, уый тыххӕй мах цы кӕнын хъӕуы?
3 Зӕххыл ӕй цы хъуыддаг бакӕнын хъуыд, уый тыххӕй Йесо ныууагъта йӕ уӕларвон цард ӕмӕ кад, «йӕхи алцӕмӕй дӕр фӕцух кодта, райста цагъары хуыз» (Фил. 2:7). Цӕмӕй Чырыстийы фӕзмӕм, уый тыххӕй нӕхи цӕмӕйфӕнды ма фӕцух кӕнӕм, уӕддӕр уымӕн абарӕн нӕ уыдзӕн, Йесо зӕхмӕ ӕрцӕугӕйӕ йӕхи цӕмӕй фӕцух кодта, уыимӕ. Фӕлӕ нӕ бон у, ӕмӕ фидарӕй дарддӕр дӕр йӕ фӕдыл цӕуӕм ӕмӕ фӕсмон ма кӕнӕм, Сайтаны дунейы цы ныууагътам, ууыл (1 Иоан. 5:19).
4 Иухатт апостол Петр Йесойӕн загъта: «Мах ӕппӕт дӕр нӕ ныууагътам ӕмӕ дӕ фӕдыл нӕ рацыдыстӕм?» (Матф. 19:27). Петр, Андрей, Иаков ӕмӕ Иоаннӕн Йесо куы загъта, мӕ фӕдыл рацӕут, зӕгъгӕ, уӕд уайтагъд сӕ хызтӕ ныууагътой. Уӕдӕй фӕстӕмӕ сын ӕппӕты сӕйрагдӕр сси кӕсагахсыны куыст нӕ, фӕлӕ хорз хабар хъусын кӕнын. Лука йӕ Евангелийы куыд фыссы, афтӕмӕй Петр загъта: «Ӕмӕ мах, цы нӕм уыд, уыдон нӕ ныууагътам ӕмӕ дӕ фӕдыл нӕ рацыдыстӕм?» (Лук. 18:28). Цӕмӕй Йесойы фӕдыл цӕуӕм, уый тыххӕй махӕн нӕ фылдӕр, «цы нӕм уыд», уыдон иууылдӕр нӕ ныууагътам. Фӕлӕ цӕмӕй Чырыстийы фӕдылдзӕуджытӕ ӕмӕ Йегъовӕйы иузӕрдион лӕггадгӕнджытӕ суыдаиккам, уый тыххӕй хъуамӕ нӕхи тыххӕй мауал цардаиккам (Матф. 16:24). Уый та у тынг арфӕйаг хъуыддаг. (Бакӕс Матфейы 19:29.) Чырыстийау хорз хабар зӕрдиагӕй куы хъусын кӕнӕм, уӕд нӕ зӕрдӕ цинӕй йедзаг уыдзӕн, уӕлдайдӕр та искӕмӕн иу гыццыл дӕр куы баххуыс кӕнӕм, цӕмӕй Хуыцаумӕ ӕмӕ йӕ уарзон Фыртмӕ баввахс уа.
5. Ӕндӕр бӕстӕйы ӕцӕгдзинад чи базыдта, уымӕн йӕ бон цы у бакӕнын, цӕмӕй Библийы уагӕвӕрдтӕм гӕсгӕ цӕра? Ӕрхӕсс цӕвиттон.
5 Валмир, бразилиаг нӕлгоймаг, цард Суринамы ӕмӕ уыд сызгъӕринкъахӕг. Валмир нозтӕй ӕфсис нӕ зыдта ӕмӕ ӕнӕгъдау цард кодта. Иухатт горӕты куы уыд, уӕд Йегъовӕйы Ӕвдисӕнтӕ йемӕ Библи ахуыр кӕнын райдыдтой. Ахуыр кодтой алы бон дӕр. Валмир йӕ цард аивта ӕмӕ цыбыр рӕстӕгмӕ донаргъуыд райста. Йӕ куыстӕй йӕм бирӕ ӕхца ӕфтыд, фӕлӕ йӕ бамбӕрста, Библийы уагӕвӕрдтӕм гӕсгӕ цӕрын ӕй кӕй хъыгдары. Валмир йӕ хорз куыстуат ауӕй кодта ӕмӕ фӕстӕмӕ Бразилимӕ ацыд, цӕмӕй йӕ бинонтӕн Хуыцауы базонынӕн баххуыс кодтаид. Хъӕздыг бӕстӕтӕм ӕхца кусынмӕ чи ацӕуы, уыдонӕй бирӕтӕ Библийы ӕцӕгдзинад куы базонынц, уӕд фӕстӕмӕ сӕхимӕ аздӕхынц, цӕмӕй, Хуыцауы тыххӕй цы базыдтой, уый сӕ хиуӕттӕ ӕмӕ иннӕ адӕмӕн радзурой. Уӕдӕ уыдонӕй зӕгъӕн ис, цӕттӕ кӕй сты хорз хабар удуӕлдайӕ хъусын кӕнынмӕ.
6. Паддзахады хъусынгӕнджытӕ кӕм нӕ фаг кӕны, ахӕм ранмӕ ацӕуын нӕ нӕ уавӕртӕ куы нӕ амоной, уӕд нӕ бон цы у аразын?
6 Ӕвдисӕнтӕй бирӕтӕ ацыдысты, Паддзахады хъусынгӕнджытӕ кӕм нӕ фаг кӕны, ахӕм рӕттӕм. Иуӕй-иутӕ лӕггад кӕнынц суанг фӕсарӕнты дӕр. Чи зоны мах нӕ уавӕртӕ нӕ амонынц ӕндӕр ранмӕ ацӕуын. Фӕлӕ нӕ бон у Йесойы фӕзмын, кӕд ӕмӕ уацамынды алкӕддӕр ӕппӕт зӕрдӕйӕ архайӕм, уӕд.
Ахуыр кӕнӕм Йегъовӕмӕ
7. Цавӕр скъолатӕ ис, Паддзахады хабар хуыздӕр хъусын кӕнын кӕй фӕнды, уыдонӕн?
7 Йесойы ахуыр кодта йӕ Фыд. Ӕмӕ махӕн дӕр нӕ бон у ахуыр кӕнын Йегъовӕмӕ. Йесо загъта: «Пехуымпарты чингуыты фыст дӕр афтӕ у: „Уыдоны се ’ппӕты дӕр Йегъовӕ сахуыр кӕндзӕн“» (Иоан. 6:45; Ис. 54:13). Абон ис, Паддзахады хъусынгӕнджыты кӕм ахуыр кӕнынц, ахӕм скъолатӕ. Алкӕмӕндӕр стыр ӕххуыс у, алы ӕмбырды дӕр цы скъола ис, уый – Хуыцауы Ныхас хъусынгӕнджыты скъола. Пионерты фӕхонынц Пионерты скъоламӕ. Иуӕй-иутӕ уыцы скъола рацыдысты дыккаг хатт дӕр. Хистӕр нӕлгоймӕгтӕ ӕмӕ кӕстӕриуӕггӕнӕг ӕфсымӕртӕн ис Хистӕр нӕлгоймӕгты ӕмӕ кӕстӕриуӕггӕнӕг ӕфсымӕрты скъола. Уый сын ӕххуыс кӕны, цӕмӕй хуыздӕр ахуыргӕнджытӕ уой ӕмӕ се ’мчырыстӕттӕн хуыздӕр лӕггад кӕной. Ӕнӕус хистӕр нӕлгоймӕгтӕй ӕмӕ кӕстӕриуӕггӕнӕг ӕфсымӕртӕй бирӕтӕ каст фӕвӕййынц Лӕггад фӕхуыздӕр кӕныны скъола – уый сӕ бацӕттӕ кӕны, цӕмӕй хорз хабар ноджы хуыздӕр хъусын кӕной. Бирӕ хотӕ ӕмӕ ӕфсымӕртӕ та каст фесты Хъахъхъӕнӕн Мӕсыгы Ӕхсӕнады библион скъола Галаад ӕмӕ ныр миссионертӕй лӕггад кӕнынц фӕсарӕнты.
8. Йегъовӕмӕ ахуыр кӕныны тыххӕй бирӕ ӕфсымӕртӕ сӕхи цӕмӕй фӕцух кӕнынмӕ сты цӕттӕ?
8 Уыцы скъолаты сахуыр кӕныны тыххӕй Йегъовӕйы Ӕвдисӕнтӕй бирӕтӕ сӕ царды цыдӕртӕ аивынц. Иу ӕфсымӕры Канадӕйӕ, Йугуйы, фӕхуыдтой Лӕггад фӕхуыздӕр кӕныны скъоламӕ. Фӕлӕ йӕ йӕ хицауы ауадзын нӕ бафӕндыд ӕмӕ Йугу дӕр йӕ куыст ныууагъта. «Ӕз нӕ фӕсмон кӕнын,– дзуры Йугу.– Куы мӕ рауагътаиккой, уӕд сӕм афтӕ кастаид, хӕсджын сӕ дӕн, ӕмӕ сӕм хъуамӕ цӕрӕнбонтӕм кусгӕйӕ баззадаин. Фӕлӕ мӕ ныр ницы хъыгдары – цӕттӕ дӕн, Йегъовӕ мӕ кӕдӕм ӕрвита, уырдӕм ацӕуынмӕ». Хуыцаумӕ ахуыр кӕныны тыххӕй бирӕтӕ ныууагътой, раздӕр сын тынг зынаргъ цы уыд, уыдӕттӕ (Лук. 5:28).
9. Адӕймаг Фыстад куы ахуыр кӕна ӕмӕ зӕрдӕбынӕй куы архайа, уӕд ын бирӕ кӕй бантысдзӕн, уымӕн цӕвиттон ӕрхӕсс.
9 Адӕймаг Фыстад куы ахуыр кӕна ӕмӕ зӕрдӕбынӕй куы архайа, уӕд ын бирӕ бантысдзӕн (2 Тим. 3:16, 17). Ӕркӕсӕм, Гватемалӕйы цы хабар ӕрцыд, уымӕ. Сауло райгуырд сахъатӕй. Йӕ ахуыргӕнджытӕй йын иу йӕ мадӕн загъта, зӕгъгӕ, лӕппуйы тыхӕй куы ахуыр кӕна кӕсын, уӕд тӕригъӕд у, йӕхимӕ дӕр ныхъхъусдзӕн. Сауло кӕсын нӕ базыдта, афтӕмӕй ацыд скъолайӕ. Фӕлӕ йӕ Ӕвдисӕнтӕй иу кӕсын ӕмӕ фыссын сахуыр кодта. Ӕппынфӕстаг Сауло афтӕ хорз райдыдта кӕсын, ӕмӕ йын Хуыцауы Ныхас хъусынгӕнджыты скъолайы хӕслӕвӕрдтӕ дӕттын райдыдтой. Иухатт Саулойы мад хӕдзарӕй-хӕдзармӕ хъусын кӕнгӕйӕ амбӕлд йӕ фырты ахуыргӕнӕгыл. Ахуыргӕнӕг куы фехъуыста, Сауло кӕсын кӕй базыдта, уый, уӕд ын йӕ мадӕн загъта, цӕмӕй йӕ иннӕ хатт йемӕ ӕрбакодтаид. Къуыри фӕстӕ йӕм куы бацыдысты, уӕд ахуыргӕнӕг Саулойы бафарста: «Цы мын бацамондзынӕ, мӕ къона?» Сауло систа чиныг «Библи бӕлвырдӕй цы дзуры?» ӕмӕ кӕсын райдыдта. «Ды мӕн ахуыр кӕныс, уый мӕ уырнгӕ дӕр нӕ кӕны»,– загъта ахуыргӕнӕг. Стӕй йӕ цӕссыгтӕ нал баурӕдта ӕмӕ Саулойӕн ныхъхъӕбыс кодта.
Адӕмы зӕрдӕтӕ агай
10. Адӕмимӕ Библи цавӕр чиныджы фӕрцы ахуыр кӕнӕм?
10 Йесо адӕмы ахуыр кодта, Йегъовӕйӕ цы базыдта ӕмӕ Хуыцауы Ныхасы цы фыст уыд, ууыл (Лук. 4:16–21; Иоан. 8:28). Мах дӕр Йесойы фӕзмӕм, йӕ уынаффӕтӕй йын кӕй пайда кӕнӕм ӕмӕ адӕмы Фыстадмӕ гӕсгӕ кӕй ахуыр кӕнӕм, уымӕй. Не ’ппӕт дӕр ӕмхуызон дзурӕм ӕмӕ ӕмхуызон хъуыды кӕнӕм, ӕмӕ уый фӕрцы не ’хсӕн ис иудзинад (1 Кор. 1:10). Мах бузныг стӕм, «ӕууӕнкджын ӕмӕ зондджын цагъар» цы литературӕ уадзы, уый тыххӕй. Уый фӕрцы иухуызон ахуыр кӕнӕм адӕмы ӕмӕ иухуызон хъусын кӕнӕм хорз хабар (Матф. 24:45; 28:19, 20). Зӕгъӕм, хорз ӕххуыс нын у чиныг «Библи бӕлвырдӕй цы дзуры?», ныридӕгӕн ис 179 ӕвзагыл.
11. Иу хойӕн йӕ ныхмӕ куы рацыдысты, уӕд чиныг «Библи цы дзуры»-йӕ куыд спайда кодта?
11 Суанг нӕ ныхмӕ чи цӕуы, уыдоны зӕрдӕтӕ дӕр ӕрфӕлмӕн вӕййынц, «Библи цы дзуры»-йӕ куы фӕпайда кӕнӕм, уӕд. Пионерӕй чи лӕггад кӕны, иу ахӕм хо Эфиопийӕ, Лулӕ, зӕгъгӕ, иухатт иу сылгоймагимӕ Библи ахуыр кодта. Уыцы рӕстӕг сӕм уыцы сылгоймаджы хӕстӕг ӕнӕхойгӕйӕ фӕмидӕг ис ӕмӕ хъӕддыхӕй загъта, цӕмӕй уыцы хъуыддаджы фӕдыл Лулӕ уыцы хӕдзармӕ мауал цӕуа. Лулӕ сабырӕй йемӕ ныхас кӕнын райдыдта. Ӕрхаста йын, «Библи цы дзуры»-йы 15 сӕры мӕнг ӕхцаты тыххӕй цы цӕвиттон ис, уый. Сылгоймаг ӕрсабыр ӕмӕ сӕ нал хъыгдардта. Иннӕ хатт куы ахуыр кодтой, уӕд дӕр та сӕм бацыд ӕмӕ загъта, цӕмӕй йемӕ дӕр исчи Библи ахуыр кӕнын райдайа – уый тыххӕй разы уыд ӕхца бафидыныл дӕр! Бирӕ нӕ рацыд, афтӕ къуыри ӕртӕ хатты ахуыр кодта ӕмӕ йӕ уырнындзинад тынг бафидар.
12. Сывӕллӕттӕн дӕр сӕ бон кӕй у иннӕтимӕ Библи ахуыр кӕнын, уымӕн цӕвиттон ӕрхӕсс.
12 Сывӕллӕттӕн дӕр сӕ бон у иннӕтӕн баххуыс кӕнын «Библи цы дзуры»-йы руаджы. Киануйыл цӕуы 11 азы, цӕры Гавайӕты. Иубон Киану уыцы чиныг скъолайы каст ӕмӕ йӕ йӕ къласӕй иу лӕппу бафарста, бӕрӕгбӕттӕ цӕуылнӕ кӕнут, зӕгъгӕ. Киану йын Уӕлӕмхасӕнӕй бакаст темӕ «Бӕрӕгбӕттӕ кӕнын ӕмбӕлы?». Стӕй йын чиныджы сӕргӕндтӕ равдыста ӕмӕ йӕ бафарста, адонӕй дӕ тынгдӕр цы базонын фӕнды, зӕгъгӕ. Уыйадыл Киану йемӕ Библи ахуыр кӕнын райдыдта. Ивгъуыд лӕггады азы Йегъовӕйы Ӕвдисӕнтӕ Библи ахуыр кодтой 6 561 426 адӕймагимӕ, уыдонӕн сӕ фылдӕримӕ ахуыр кодтой чиныг «Библи цы дзуры»-йы руаджы. Ды дӕр ацы чиныгӕй пайда кӕныс?
13. Адӕмыл куыд бандавы, Библийӕ цы базонынц, уый?
13 Хуыцауы фӕндон ӕххӕст кӕнын кӕй фӕнды, уыдоны зӕрдӕтӕ тынг бацагайы, Фыстад семӕ «Библи цы дзуры»-йы фӕрцы куы фӕахуыр кӕнынц. Норвегийы сӕрмагонд пионертӕ, ус ӕмӕ лӕг, Библи ахуыр кӕнын райдыдтой иу бинонтимӕ Замбийӕ. Замбийӕ чи уыд, уыцы ус ӕмӕ лӕгӕн уыдис ӕртӕ чызджы ӕмӕ сӕ сывӕллон нал хъуыди. Ӕмӕ сылгоймаг куы басывӕрджын, уӕд аскъуыддзаг кодтой, аборт кӕй скӕндзӕн. Дохтырмӕ ацӕуынӕй цалдӕр боны раздӕр ахуыр кодтой 13 сӕр «Цардмӕ Хуыцауы цӕстӕй кӕс». Уыцы сӕры ис, чи нӕма райгуырд, ахӕм сывӕллоны ныв. Уыцы ныв сын сӕ зӕрдӕ афтӕ бацагайдта, ӕмӕ сӕ фӕнд аивтой. Сӕ уырнындзинад фидарӕй-фидардӕр кодта. Гуыргӕ та сын ракодта лӕппу ӕмӕ йыл сӕвӕрдтой, семӕ Библи чи ахуыр кодта, уыцы ’фсымӕры ном.
14. Иннӕты цӕуыл ахуыр кӕнӕм, нӕхӕдӕг дӕр уымӕ гӕсгӕ кӕй цӕрӕм, уый хорз цӕмӕн у, уымӕн цӕвиттон ӕрхӕсс.
14 Йесо ма хорз ахуыргӕнӕг уымӕн уыди, ӕмӕ йӕхӕдӕг дӕр цард, иннӕты цӕуыл ахуыр кодта, уымӕ гӕсгӕ. Уыцы хъуыддаджы Йегъовӕйы Ӕвдисӕнтӕ фӕзмынц Йесойы ӕмӕ сӕ хорз уагахаст фӕцӕуы бирӕты зӕрдӕмӕ. Ног Зеландийы иу хъӕздыг лӕгӕн йӕ машинӕ фӕкъахтой ӕмӕ йын йӕ пъартфел адавтой. Лӕг пъӕлицӕмӕ куы фӕхабар кодта, уӕд ын пъӕлицӕйы кусджытӕй иу загъта: «Кӕд дын ӕй Йегъовӕйы Ӕвдисӕнтӕй исчи ссара, уӕд дӕ амонд, кӕннод ӕй дӕ цӕсты кӕронӕй дӕр нал фендзынӕ». Нӕ хотӕй иу постхӕссӕгӕй куыста ӕмӕ уыцы пъартфел ссардта. Пъартфелы хицау уый куы фехъуыста, уӕд хомӕ сӕхимӕ бацыд. Ӕхсызгонӕй йӕ цы гӕххӕт хъуыд, уый куы федта, уӕд йӕхимӕ ’рцыд. Хо йын загъта: «Ӕз афтӕ уымӕн бакодтон, ӕмӕ Йегъовӕйы Ӕвдисӕн дӕн». Лӕгмӕ уый тынг диссаг фӕкаст, уымӕн ӕмӕ йӕ зӕрдыл ӕрбалӕууыд, райсомӕй йын пъӕлицӕйы кусӕг цы загъта, уый. Куыд зыны, афтӕмӕй ӕцӕг чырыстӕттӕ Йесойы фӕзмынц, ӕмӕ цӕрынц, Библийы цы фыст ис, уымӕ гӕсгӕ (Дзут. 13:18).
Йесо адӕммӕ цы зӕрдӕ дардта, ахӕм зӕрдӕ сӕм дар ды дӕр
15, 16. Цы хабар хъусын кӕнӕм, уымӕ адӕмы зӕрдӕтӕ нӕ бон куыд у раздахын?
15 Йесо адӕммӕ цы зӕрдӕ дардта, уый фӕрцы йӕм уыдон ӕхсызгонӕй хъуыстой. Зӕгъӕм, уарзӕгой ӕмӕ сӕрныллӕг кӕй уыд, уымӕ гӕсгӕ йӕ мӕгуыр адӕм бирӕ уарзтой. Чи-иу ӕм ӕрбацыд, уыдоны рыст-иу бамбӕрста, фӕлмӕн ныхасӕй-иу сын сӕ зӕрдӕтӕ ’рсабыр кодта ӕмӕ-иу бирӕты сдзӕбӕх кодта. (Бакӕс Марчы 2:1–5.) Махӕн нӕ бон диссӕгтӕ аразын нӕу, фӕлӕ нӕ бон у, цӕмӕй адӕмы уарзӕм, тӕригъӕд сын кӕнӕм ӕмӕ сӕрныллӕг уӕм. Уыдон та сты ахӕм миниуджытӕ, адӕмы зӕрдӕтӕ ӕцӕгдзинадмӕ чи раздахы.
16 Искӕмӕн йӕ рыст бамбарын, фӕтӕригъӕд ын кӕнын куыд ахсджиаг у, уый ӕвдисы, Сабыр океаны Кирибатийы сакъадахтӕй ӕппӕты дарддӕр чи ис, уыдонӕй сӕ иуыл цы хабар ӕрцыд, уый. Сӕрмагонд пионер Тариуа бахоста иу хӕдзармӕ ӕмӕ йӕм ракаст иу ацӕргӕ нӕлгоймаг, йӕ ном Биири. Бӕрӕг уыд, нӕлгоймаджы хъусын кӕй нӕ фӕндыд. Фӕлӕ Тариуа бафиппайдта рынчын кӕй уыд – ӕвӕццӕгӕн ӕй кӕддӕр паралич ныццавта. Тариуа йын тынг фӕтӕригъӕд кодта. «Искуы фехъуыстай, Хуыцау рынчын ӕмӕ ацӕргӕ адӕмӕн зӕрдӕ цӕмӕй ӕвӕры, уый?»– бафарста йӕ Тариуа. Стӕй йын Исайы чиныгӕй цалдӕр стихы бакаст. (Бакӕс Исайы 35:5, 6.) Нӕлгоймагмӕ уый тынг диссаг фӕкаст ӕмӕ загъта: «Мӕхӕдӕг дӕр тынг рагӕй кӕсын Библи, стӕй мӕм бирӕ азты дӕргъы нӕ аргъуанӕй цӕуы иу миссионер, фӕлӕ Библийы ацы ныхӕстӕ никуы федтон!» Биириимӕ Библи ахуыр кӕнын райдыдтой ӕмӕ йӕ уырнындзинад сфидар. Фӕстӕдӕр Биири донаргъуыд райста. Ӕмӕ кӕд тынг рынчын у, уӕддӕр разамынд дӕтты, дард ран чи ис, иу ахӕм къордӕн ӕмӕ ӕнӕхъӕн сакъадахыл дӕр хъусын кӕны хорз хабар.
Дарддӕр дӕр Чырыстийы фӕзмӕм
17, 18. а) Хорз хабар ӕнтыстджынӕй хъусын кӕнын дӕ бон куыд бауыдзӕн? ӕ) Хорз хабар хъусын кӕнынмӕ куыдфӕндыйы цӕстӕй чи нӕ кӕсы, уыдон хайджын цӕмӕй уыдзысты?
17 Уацамынды цы бирӕ цымыдисаг цаутӕ ’рцӕуы, уыдон хорз ӕвдисынц, нӕ бон кӕй у, ӕмӕ хорз хабар хъусын кӕныны хъуыддаджы ӕнтыстджын уӕм. Уый тыххӕй нӕ хъӕуы, Йесомӕ цы миниуджытӕ ис, уыдон нӕ удыхъӕды фидар кӕнын ӕмӕ сӕ хъуыддагӕй ӕвдисын. Куыд хорз у Чырыстийау зынгзӕрдӕйӕ хорз хабар хъусын кӕнын!
18 Фыццаг ӕнусы иуӕй-иутӕ Йесойы ахуыргӕнинӕгтӕ куы систы, уӕд Петр Йесойы бафарста: «Цы нын уыдзӕн хорзӕй?» Йесо йын дзуапп радта: «Мӕ номы тыххӕй йӕ хӕдзӕрттӕ, кӕнӕ йе ’фсымӕрты, кӕнӕ йӕ хоты, кӕнӕ йӕ фыды, кӕнӕ йӕ мады, кӕнӕ йӕ сывӕллӕтты, кӕнӕ йӕ зӕххытӕ чи ныууагъта, уый ссардзӕн, цы ныууагъта, уымӕй бирӕ фылдӕр ӕмӕ йын уыдзӕн ӕнусон цард» (Матф. 19:27–29). Уӕдӕ мах дӕр уыдӕттӕй хайджын уыдзыстӕм, дарддӕр дӕр ӕппӕты хуыздӕр Миссионер Йесо Чырыстийы куы фӕзмӕм, уӕд.
Цавӕр дзуапп ратдзынӕ?
• Йегъовӕ нӕ куыд ахуыр кӕны хорз хабар хъусын кӕнын?
• Чиныг «Библи цы дзуры» нын уацамынды хорз ӕххуыс цӕмӕн у?
• Йесо адӕммӕ цы зӕрдӕ дардта, ахӕм зӕрдӕ сӕм махӕн дӕр нӕ бон куыд у дарын?
[Фарстатӕ ахуыр кӕнынӕн]
[Ныв 17 фарсыл]
Петр, Андрей, Иаков ӕмӕ Иоаннмӕ Йесо куы фӕдзырдта, уӕд уайтагъд йӕ фӕстӕ ацыдысты
[Ныв 19 фарсыл]
Чиныг «Библи цы дзуры» ӕмӕ ӕндӕр ахӕм литературӕ хорз ӕххуыс сты, цӕмӕй адӕмы иухуызон ахуыр кӕнӕм
