Иннӕтӕм Йегъовӕйы цӕстӕй кӕсыс?

«Цӕмӕй буары уӕнгтӕ ма ныддихтӕ уой, фӕлӕ ӕмхуызон тыхсой кӕрӕдзийыл» (1 КОР. 12:25).

1. Фыццаг хатт монон дзӕнӕтмӕ куы бацыдтӕ, уӕд цы банкъардтай?

АЦЫ фыддунейӕ куы рацыдыстӕм ӕмӕ Йегъовӕйы адӕмы куы базыдтам, уӕд нӕхиуыл банкъардтам, хотӕ ӕмӕ ӕфсымӕрты ’хсӕн цы уарзондзинад ис ӕмӕ кӕрӕдзийыл куыд тыхсынц, уый. Куыд тынг хицӕн кодтой Ӕвдисӕнтӕ, Сайтаны дӕлбар чи ис, уыцы фыдзӕрдӕ, тызмӕг ӕмӕ хъуырхъуыргӕнаг адӕмӕй! Мах бацыдыстӕм, фарн ӕмӕ иудзинад кӕм ис, уыцы монон дзӕнӕтмӕ (Ис. 48:17, 18; 60:18; 65:25).

2. а) Иннӕтӕм раст цӕстӕй цӕуылнӕуал фӕкӕсӕм? ӕ) Цы нӕ хъӕуид бакӕнын?

² Фӕлӕ куыдфӕстӕмӕ, чи зоны, нӕ хотӕ ӕмӕ не ’фсымӕртӕм ӕндӕр цӕстӕй кӕсын райдыдтам, раст кӕсӕнцӕстыты хӕлд ӕвгтӕй куыд кӕсай, уыйау. Не ’нӕххӕстдзинады аххосӕй нӕм хатт сӕ хъӕндзинӕдтӕ фӕкӕсынц тынг стыр, сӕ хорз миниуджытӕ та сын уынгӕ дӕр нал фӕкӕнӕм. Цыбырдзырдӕй сӕм Йегъовӕйы цӕстӕй нал фӕкӕсӕм. Кӕд махӕй дӕр уый зӕгъӕн ис, уӕд нӕ хъӕуы нӕ цӕстӕнгас фӕивын ӕмӕ иннӕтӕм Йегъовӕйы цӕстӕй кӕсын райдайын (Рац. 33:13).

Йегъовӕ нын не ’фсымӕртӕм куыд кӕсы

3. Библи чырыстон ӕмбырд цӕимӕ бары?

³ Апостол Павел 1 Коринфӕгтӕм 12:2–26 сӕрст чырыстӕтты ӕмбырд абарста, бирӕ уӕнгтӕ кӕм ис, ахӕм буаримӕ. Буары уӕнгтӕ кӕрӕдзийӕ куыд хицӕн кӕнынц, афтӕ, ӕмбырды чи ис, уыдон дӕр кӕрӕдзийӕ хицӕн кӕнынц сӕ уындӕй, сӕ миниуджытӕй ӕмӕ сӕ курдиӕттӕй. Фӕлӕ Йегъовӕйӕн иууылдӕр сты зынаргъ, алкӕйдӕр уарзы ӕмӕ нымайы. Уый тыххӕй дзуры Павел дӕр,  зӕгъгӕ, чырыстӕттӕ хъуамӕ «ӕмхуызон тыхсой кӕрӕдзийыл». Уый ӕнцон нӕ вӕййы, уымӕн ӕмӕ иууылдӕр иухуызон не сты.

4. Нӕ цӕстӕнгас нӕ не ’фсымӕртӕм фӕивын кӕд фӕхъӕуы?

⁴ Гӕнӕн ис, ӕмӕ фӕцахуыр уӕм не ’фсымӕртӕн ӕрмӕст сӕ хъӕндзинӕдтӕ уынын. Кӕд афтӕ кӕнӕм, уӕд, зӕгъӕн ис, ӕмӕ нывӕн уынӕм ӕрмӕст йӕ иу хай. Фӕлӕ Йегъовӕ уыны, ныв ӕнӕхъӕнӕй дӕр цыхуызӕн у, уый. Мах, чи зоны, ныккомкоммӕ уӕм, нӕ зӕрдӕмӕ цы нӕ цӕуы, уымӕ. Йегъовӕ та адӕймагмӕ ӕнӕхъӕнӕй кӕсы ӕмӕ йын йе ’ппӕт хорз миниуджытӕ дӕр уыны. Цас тынгдӕр архайӕм, цӕмӕй Йегъовӕйы хуызӕн уӕм, уыйас фылдӕр уарзондзинад ӕмӕ фарн уыдзӕн ӕмбырды (Еф. 4:1–3; 5:1, 2).

5. Иннӕтыл фаутӕ ӕвӕрын ӕмӕ сӕ кой кӕнын раст цӕуылнӕ у?

⁵ Йесо тынг хорз зыдта, ӕнӕххӕст адӕймаг иннӕтыл фаутӕ ӕвӕрынмӕ ӕмӕ сӕ кой кӕнынмӕ ӕмхиц кӕй у ӕмӕ йӕ ахуыргӕнинӕгтӕн загъта: «Макӕй кой кӕнут, ӕмӕ сымах кой дӕр ничи кӕндзӕн» (Матф. 7:1). Ацы ныхӕстӕ фыццаг цы ӕвзагыл фыст ӕрцыдысты, уымӕ гӕсгӕ Йесо ӕнӕуи, «макӕй кой кӕнут», зӕгъгӕ, нӕ загъта, фӕлӕ «йӕ кой макӕмӕнуал кӕнут». Уымӕн ӕмӕ зыдта, кӕимӕ ныхас кодта, уыдонӕй бирӕтӕ кӕй фӕцахуыр сты искӕй кой кӕныныл. Махӕй та цы зӕгъӕн ис? Кӕд уымӕ ӕмхиц стӕм, уӕд хъуамӕ ӕппӕт тыхтӕй архайӕм уыцы хъуыддаг ныууадзыныл, цӕмӕй нын нӕхи фыдкой дӕр мачи кӕна. Ӕцӕгдӕр, чи стӕм мах, цӕмӕй фаутӕ ӕвӕрӕм, Йегъовӕ йӕ бӕрны цавӕрдӕр хӕстӕ кӕмӕн бакодта, уыдоныл кӕнӕ дзурӕм, ахӕм адӕймаг хъуамӕ ӕмбырды ма уа, зӕгъгӕ? Чи зоны, ӕфсымӕрмӕ цыдӕр хъӕндзинӕдтӕ ис, фӕлӕ йын уӕддӕр Йегъовӕ аргъ кӕны. Уӕдӕ йыл мах нӕхи куы ракъуыр-бакъуыр кӕнӕм, уӕд уый раст уыдзӕн? (Иоан. 6:44). Ӕцӕгдӕр нӕ уырны, Йегъовӕ йӕ организацийӕн разамынд кӕй дӕтты ӕмӕ, кӕд исты аивын хъӕуа, уӕд ӕй йӕ афоныл кӕй аивдзӕн? (Бакӕс Ромӕгтӕм 14:1–4.)

6. Йегъовӕ йӕ лӕггадгӕнджытӕм куыд кӕсы?

⁶ Йегъовӕ диссаг уымӕй у, ӕмӕ зоны, алы чырыстон дӕр ног дунейы ӕххӕст куы суа, уӕд цавӕр уыдзӕн, уый. Зоны ма, Библийӕ цы базыдтой, уымӕ гӕсгӕ ныридӕгӕн дӕр куыд аивтой, уый дӕр. Уӕдӕ Йегъовӕ адӕймагӕн йӕ алы рӕдыдмӕ дӕр нӕ кӕсы. Псаломы 103:12 фыст ис: «Хурскӕсӕн хурныгуылӕнӕй куыд дард у, афтӕ уый махӕй адард кодта нӕ фыдхъуыддӕгтӕ». Куыд бузныг дзы стӕм, ӕвӕдза, уый тыххӕй! (Пс. 130:3).

7. Йегъовӕ Давидмӕ куыд каст, уымӕй цӕуыл ахуыр кӕнӕм?

⁷ Йегъовӕ адӕймагӕн йӕ хорз миниуджытӕ кӕй уыны, уый Библийы бирӕ хабӕрттӕй зыны. Хуыцау Давиды тыххӕй загъта, зӕгъгӕ, Давид уыди «мӕ лӕггадгӕнӕг... мӕ фӕдзӕхстытӕ мын чи ӕххӕст кодта ӕмӕ ӕппӕт зӕрдӕйӕ мӕ фӕдыл чи цыд ӕмӕ, мӕ цӕсты раст цы у, ӕрмӕст уый чи арӕзта» (1 Пад. 14:8). Кӕй зӕгъын ӕй хъӕуы, Давид дӕр-иу фӕрӕдыд. Фӕлӕ йын Йегъовӕ каст йӕ хорз миниуджытӕм, уымӕн ӕмӕ зыдта, йӕ зӕрдӕ сыгъдӕг кӕй уыд (1 Аз. 29:17).

 Де ’фсымӕртӕм Йегъовӕйы цӕстӕй кӕс

8, 9. а) Цавӕр хъуыддаджы у нӕ бон Йегъовӕйы фӕзмын? ӕ) Цавӕр цӕвиттонӕй уаид уый равдисӕн ӕмӕ дзы цӕуыл ахуыр кӕнӕм?

⁸ Йегъовӕ уыны зӕрдӕтӕ, мах та нӕ. Бӕлвырд нӕ зонӕм, иннӕ адӕймаг цӕуыл хъуыды кӕны, цы фӕндтӕ йӕм ис. Ӕрмӕст уый тыххӕй дӕр хъуамӕ фаутӕ макӕуыл ӕвӕрӕм ӕмӕ макӕй кой кӕнӕм. Уымӕ гӕсгӕ хорз уаид, нӕ разы уыцы нысан куы сӕвӕриккам, цӕмӕй Йегъовӕйы фӕзмӕм ӕмӕ адӕймагӕн йе ’нӕххӕстдзинадмӕ ма кӕсӕм, уымӕн ӕмӕ ӕнӕххӕстдзинадӕн фӕстагмӕ йӕ кой дӕр нал уыдзӕн. Уый нын баххуыс кӕндзӕн нӕ хотӕ ӕмӕ не ’фсымӕртимӕ фӕрнӕй ӕмӕ хӕларӕй цӕрынӕн (Еф. 4:23, 24).

⁹ Ӕрхӕссӕм ахӕм цӕвиттон: иу хӕдзарӕн йӕ цыхцырӕгтӕ асастысты, йӕ рудзгуытыл ӕвгтӕ нал ис ӕмӕ йӕ цар хъары. Уыцы хӕдзар чи фены, уыдонӕн сӕ фылдӕр, чи зоны, ахъуыды кӕнынц, куы йӕ фехаликкой, тынг ӕнаив у, зӕгъгӕ. Фӕлӕ иу адӕймаг хӕдзар куы федта, уӕд иннӕтау нӕ ахъуыды кодта. Уый иннӕтӕй арфдӕр уыны ӕмӕ федта, хӕдзар фидар кӕй у ӕмӕ йӕ саразӕн кӕй ис. Уыцы адӕймаг ӕй балхӕдта, бацалцӕг ӕй кодта, ӕмӕ хӕдзар рафидыдта. Ныр та йӕм адӕм кӕсынӕй не ’фсӕдынц. Цымӕ махӕн нӕ бон нӕу, цӕмӕй, хӕдзар бацалцӕг кӕныныл чи бацархайдта, уыцы адӕймаджы хуызӕн уӕм? Нӕ хотӕ ӕмӕ не ’фсымӕртӕн сӕ хъӕндзинӕдтӕм кӕсыны бӕсты хуыздӕр нӕ уаид, сӕ хорз миниуджытӕ сын куы уыниккам ӕмӕ, сӕ бон хуыздӕрырдӕм аивын кӕй у, ууыл куы хъуыды кӕниккам? Афтӕ куы кӕнӕм, уӕд нӕ хотӕ ӕмӕ не ’фсымӕрты уарздзыстӕм, Йегъовӕ сӕ цӕй тыххӕй уарзы, уый тыххӕй – сӕ чырыстон миниуджыты тыххӕй (Бакӕс Дзуттӕгтӕм 6:10.)

10. Филиппӕгтӕм 2:3, 4 цы уынаффӕ ис, уый нын куыд баххуыс кӕндзӕн?

¹⁰ Апостол Павел радта, ӕмбырды нын иннӕтимӕ хӕларӕй цӕрынӕн чи баххуыс кӕндзӕн, ахӕм уынаффӕ: «Мацы аразут загъдгӕнгӕйӕ кӕнӕ кадмондагӕй, фӕлӕ ут сӕрныллӕг ӕмӕ иннӕты уӕхицӕй уӕлдӕр ӕвӕрут; уӕхицӕн куыд хуыздӕр уа, ӕрмӕст ууыл ма хъуыды кӕнут, фӕлӕ, иннӕтӕн куыд хуыздӕр уа, ууыл дӕр» (Фил. 2:3, 4). Сӕрныллӕг куы уӕм, уӕд иннӕтӕм раст цӕстӕй кӕсдзыстӕм. Иннӕтыл куы тыхсӕм ӕмӕ сын сӕ хорз миниуджытӕ куы фиппайӕм, уӕд нын уый дӕр баххуыс кӕндзӕн, цӕмӕй сӕм Йегъовӕйы цӕстӕй кӕсӕм.

11. Дунейы цы хабӕрттӕ цӕуы, уыдон иуӕй-иу ӕмбырдтыл куыд фӕзындысты?

¹¹ Фӕстаг рӕстӕджыты дунейы цы хабӕрттӕ цӕуы, уыдоны аххосӕй бирӕтӕ сӕ райгуырӕн бӕстӕ ныууадзынц ӕмӕ ӕндӕр ранмӕ цӕрынмӕ ацӕуынц. Иуӕй-иу горӕтты цӕры тынг бирӕ адӕм ӕндӕр бӕстӕтӕй. Кӕйдӕрты дзы Библийы ӕцӕгдзинад бацымыдис кодта ӕмӕ ныр уыдон дӕр немӕ Йегъовӕйӕн лӕггад кӕнынц. Уыцы адӕм сты «ӕппӕт адӕмыхӕттытӕй, мыггӕгтӕй, адӕмтӕй ӕмӕ ӕвзӕгтӕй» (Рарг. 7:9). Ӕмӕ ныр бирӕ ӕмбырдты ис алы ӕмӕ алы бӕстӕтӕй ӕрцӕуӕг адӕм.

12. Цавӕр цӕстӕй нӕ хъӕуы кӕрӕдзимӕ кӕсын ӕмӕ уый хатт ӕнцон цӕуылнӕ вӕййы?

¹² Кӕд махӕн дӕр не ’мбырд ахӕм у, уӕд нӕ, чи зоны, уӕлдай тынгдӕр хъӕуы нӕ хъус дарын, цӕмӕй иннӕтӕм раст цӕстӕй кӕсӕм. Уый тыххӕй хъуамӕ нӕ зӕрдыл дарӕм апостол Петры уынаффӕ, «ӕфсымӕртыл ӕнувыд ут» ӕмӕ «кӕрӕдзийы зӕрдиагӕй уарзут», зӕгъгӕ (1 Пет. 1:22). Арӕх ӕнцон нӕ вӕййы, цӕмӕй адӕймаг ӕнувыд уа ӕмӕ сыгъдӕг зӕрдӕйӕ уарза, йе ’мбырды алы бӕстӕтӕй цы хотӕ ӕмӕ ’фсымӕртӕ ис, уыдоны. Не ’мчырыстӕттӕ нӕ, чи зоны, тынг хицӕн кӕнынц се ’гъдауӕй, сӕ ахуырадӕй ӕмӕ, цы уавӕрты цӕрынц, уымӕй. Мыййаг дын зын у, иуӕй-иутӕ дзы куыд хъуыды кӕнынц кӕнӕ цӕмӕдӕр цы цӕстӕй кӕсынц, уый бамбарын? Ӕвӕццӕгӕн, уыдонӕн дӕр дӕу бамбарын афтӕ зын вӕййы. Фӕлӕ нын уӕддӕр Библи фӕдзӕхсы: «Уе ’фсымӕрты се ’ппӕты дӕр уарзут» (1 Пет. 2:17).

13. Хатт нӕ нӕ зондахасты цы фӕхъӕуы аивын?

¹³ Хатт нӕ фӕхъӕуы нӕ зондахаст аивын, цӕмӕй нӕ зӕрдӕтӕ «уӕрӕх байгом кӕнӕм» ӕмӕ не ’фсымӕрты се ’ппӕты дӕр уарзӕм. (Бакӕс 2 Коринфӕгтӕм 6:12, 13.) Цымӕ афтӕ никуы загътай: «Мӕнӕн уӕлдай нӕу,  фӕлӕ...», ӕмӕ стӕй нымайын райдыдтай, иуӕй-иу адӕмыхӕттытӕм, дӕумӕ гӕсгӕ, цы хъӕндзинӕдтӕ ис, уыдон? Уый ууыл дзурӕг у, нырма дӕ зӕрдӕйы арф ӕмбӕхст кӕй ис, ӕдбындзар стонын кӕй хъӕуы, иу ахӕм ӕвзӕр миниуӕг – иннӕтӕм ӕнӕрвӕссон цӕстӕй кӕсын. Ахъуыды кӕн: «Ӕндӕр адӕмыхаттӕй чи у, уыцы хотӕ ӕмӕ ’фсымӕрты хуыздӕр базоныныл архайын?» Афтӕ нӕ зӕрдӕмӕ куы ныккӕсӕм, уӕд нын уый баххуыс кӕндзӕн, цӕмӕй ӕппӕт хотӕ ӕмӕ ’фсымӕрты дӕр бамбарӕм ӕмӕ сӕ бауарзӕм.

14, 15. а) Йӕ цӕстӕнгас чи аивта, уыдонӕй иуӕй-иутӕ чи уыдысты? Ӕрхӕсс цӕвиттонтӕ. ӕ) Уыцы адӕймӕгты нӕ бон бафӕзмын куыд у?

¹⁴ Библийы нӕ бон у бакӕсын, йӕ цӕстӕнгас чи аивта, ахӕм адӕймӕгты тыххӕй. Уыдонӕй иу уыд апостол Петр. Петр уыди дзуттаг, ӕмӕ уымӕ гӕсгӕ, ӕндӕр адӕмтӕй чи уыд, уыдоны хӕдзӕрттӕм нӕ цыд. Уӕдӕ ма ахъуыды кӕн, куыд зын ын уыдаид, сунӕт чи нӕ уыд, уыцы муртатт Корнилийы хӕдзармӕ ацу, зӕгъгӕ йын куы загътой, уӕд! Петр йӕ зондахаст аивта, уымӕн ӕмӕ бамбӕрста, Хуыцауы фӕндон кӕй у, цӕмӕй, ӕндӕр адӕмыхӕттытӕй чи сты, уыдон дӕр чырыстӕттӕ суой (Ап. хъ. 10:9–35). Савл дӕр, фӕстӕдӕр апостол Павел чи сси, уый, йӕ зондахаст аивта ӕмӕ адӕммӕ ӕнӕрвӕссон цӕстӕй нал каст. Павел басаст, чырыстӕттӕй йе сӕфт афтӕ тынг кӕй уыдта, ӕмӕ «Хуыцауы ӕмбырд... карзӕй ӕфхӕрдта ӕмӕ йӕ фесафыныл... архайдта». Фӕлӕ йын Хицау Йесо йӕ рӕдыдмӕ куы бацамыдта, уӕд тынг аивта ӕмӕ ма суанг, раздӕр кӕй фӕдыл зылд, уыдоны коммӕ дӕр бакаст (Гал. 1:13–20).

¹⁵ Дызӕрдыг кӕнын нӕ хъӕуы, Йегъовӕйы сыгъдӕг уды фӕрцы нӕ бон нӕ зондахаст аивын кӕй у. Адӕммӕ ӕнӕрвӕссон цӕстӕй кӕй кӕсӕм, уый куы бафиппайӕм, уӕд хъуамӕ уайтагъд бацархайӕм, цӕмӕй нӕ зондахаст сраст кӕнӕм ӕмӕ уыцы миниуӕг нӕ зӕрдӕйӕ ӕдбындзар стонӕм, стӕй нӕ бон цы у, уый кӕнӕм, цӕмӕй «кӕрӕдзийыл баст уӕм фарны тӕгтӕй, ӕмӕ... ӕмзондӕй цӕрӕм» (Еф. 4:3–6). Библи нӕ разӕнгард кӕны, цӕмӕй нӕм уа «уарзондзинад, уымӕн ӕмӕ уый хуызӕн ницы иу кӕны ӕмӕ ницы бӕтты кӕрӕдзийыл» (Кол. 3:14).

Йегъовӕйы фӕзм уацамынды

16. Хуыцаумӕ адӕмы тыххӕй цы фӕнд ис?

¹⁶ «Хуыцау хъулон никӕй кӕны»,– фыста апостол Павел (Ром. 2:11). Йегъовӕйы фӕнды, цӕмӕй йын алыхуызон адӕймӕгтӕ дӕр лӕггад кӕной. (Бакӕс 1 Тимофеймӕ 2:3, 4.) Уымӕ гӕсгӕ Йегъовӕ афтӕ бакодта, цӕмӕй «ӕнусон хорз хабар» хъуыстгонд ӕрцӕуа «алы адӕмыхаттӕн, алы мыггагӕн, алы ӕвзагӕн ӕмӕ алы адӕмӕн» (Рарг. 14:6). Йесо загъта:  «Хуым [у] дуне» (Матф. 13:38). Цӕуыл дзурӕг у уый дӕуӕн ӕмӕ дӕ бинонтӕн?

17. Ӕндӕр адӕмыхӕттытӕй чи у, уыдонӕн нӕ бон баххуыс кӕнын куыд у?

¹⁷ Паддзахады хорз хабар хъусын кӕныны тыххӕй алкӕмӕн йӕ бон дард ранмӕ ацӕуын нӕу. Фӕлӕ уыцы хабар нӕ бон хъусын кӕнын вӕййы, ӕндӕр рӕттӕй ӕрцӕуӕг адӕмӕй нӕ алыварс чи цӕры, уыдонӕн. Цымӕ хорз хабар, ӕндӕр адӕмыхӕттытӕй чи у, уыдонӕн дӕр фӕхъусын кӕнӕм ӕви, рагӕй фӕстӕмӕ дӕр кӕй ӕхсӕн цӕрӕм, ӕрмӕст уыдонӕн? Хорз нӕ уаид, нӕ разы ахӕм нысан куы сӕвӕриккам, цӕмӕй хорз хабар хъусын кӕнӕм, чи йӕ нӕма фехъуыста, уыцы адӕмӕн? (Ром. 15:20, 21).

18. Йесо адӕмыл кӕй тыхсти, уый куыд равдыста?

¹⁸ Йесо тынг хорз ӕмбӕрста, алкӕмӕндӕр кӕй хъӕуы баххуыс кӕнын. Уымӕ гӕсгӕ ӕрмӕст иу ран нӕ хъусын кодта. Библийы фыст ис, зӕгъгӕ, Йесо «зылди ӕппӕт сахартӕ ӕмӕ хъӕутыл». Ӕмӕ «уыйбӕрц адӕмы куы федта, уӕд сын фӕтӕригъӕд кодта» ӕмӕ йӕ ахуыргӕнинӕгтӕн бамбарын кодта, баххуыс кӕнын сын кӕй хъӕуы (Матф. 9:35–37).

19, 20. Йегъовӕ ӕмӕ Йесойау алы адӕмтыл дӕр кӕй тыхсӕм, уый нӕ бон равдисын куыд у?

¹⁹ Мах дӕр адӕмыл афтӕ кӕй тыхсӕм, уый нӕ бон равдисын куыд у? Иуӕй-иутӕ архайынц, цӕмӕй хъусын кӕной, сӕ территорийы арӕх цы бынӕтты нӕ фӕхъусын кӕнынц, уым. Зӕгъӕм, ӕхсӕнадон бынӕтты, паркты, вагзалты ӕмӕ, хъахъхъӕнгӕ кӕй кӕнынц, ахӕм хӕдзӕртты. Иннӕтӕ та ахуыр кӕнынц ног ӕвзаг, цӕмӕй хорз хабар дзурой, ӕндӕр бӕстӕтӕй чи у ӕмӕ раздӕр арӕх кӕмӕн нӕ хъусын кодтой, уыдонӕн. Уыцы адӕмӕн се ’взагыл салам куы раттай, уӕд ӕрмӕст уымӕй дӕр бӕрӕг уыдзӕн, хорз цӕстӕй сӕм кӕй кӕсыс. Кӕд махӕн нӕхицӕн ӕндӕр ӕвзаг ахуыр кӕнын нӕ бон нӕу, уӕд цымӕ хорз нӕ уаид, ӕндӕр ӕвзаг чи ахуыр кӕны, уыдонӕн куы ’ххуыс кӕниккам? Кӕй зӕгъын ӕй хъӕуы, мах нӕ фӕнды, цӕмӕй сын нӕ ныхӕстӕй сӕ ныфс асӕттӕм кӕнӕ хъуыды кӕнӕм, адон ацы хъуыддаг хуымӕтӕджы нӕ кӕнынц, зӕгъгӕ. Хуыцауы цӕсты алы адӕймаджы цард дӕр зынаргъ у, ӕмӕ мах дӕр алцӕмӕдӕр уый цӕстӕй кӕсын фӕнды (Кол. 3:10, 11).

²⁰ Адӕммӕ Хуыцауы цӕстӕй куы кӕсӕм, уӕд хорз хабар хъусын кӕндзыстӕм алкӕмӕндӕр, адӕймаг чифӕнды кӕнӕ цавӕрфӕнды ма уа, уӕддӕр. Уацамынды фембӕлӕн ис, ӕнӕхӕдзар чи у, йӕ дзаумӕттӕ чъизи кӕмӕн сты кӕнӕ ӕнӕгъдау цард чи кӕны, ахӕм адӕмыл. Исчи нӕ куы бафхӕра, уӕд хъуамӕ ахӕм хатдзӕг ма скӕнӕм, зӕгъгӕ, цы адӕмыхаттӕй у, уыдон иууылдӕр ахӕмтӕ сты. Павелы тынг бафхӕрдтой, фӕлӕ йӕ зӕрдӕ нӕ фӕхъӕбӕр ӕмӕ уӕддӕр хъусын кодта, кӕм ӕй бафхӕрдтой, уыцы ран чи цард, уыцы адӕмӕн (Ап. хъ. 14:5–7, 19–22). Ныфс ӕй уыд, чидӕртӕ дзы хорз хабармӕ кӕй байхъусдзысты.

21. Иннӕтӕм Йегъовӕйы цӕстӕй куы кӕсай, уӕд дын уый куыд баххуыс кӕндзӕн?

²¹ Уӕдӕ бӕрӕг у, адӕммӕ Йегъовӕйы цӕстӕй куы кӕсӕм, уӕд нын ӕнцондӕр кӕй уыдзӕн не ’мбырды хотӕ ӕмӕ ’фсымӕртимӕ хӕларӕй цӕрын, ӕппӕт дунейы дӕр нын цы ӕфсымӕртӕ ис, уыдонӕн аргъ кӕнын ӕмӕ адӕмӕн хорз хабар хъусын кӕнын. Уыцы хъуыддаджы Йегъовӕйы хуызӕн цас тынгдӕр уӕм, уыйас тынгдӕр ахъаз кӕндзыстӕм ӕмбырды фарн ӕмӕ иудзинадӕн. Ӕмӕ нын афтӕмӕй ӕнцондӕр уыдзӕн иннӕтӕн баххуыс кӕнын, цӕмӕй бауарзой Йегъовӕ Хуыцауы – уый та «хъулон никӕй кӕны», фӕлӕ алкӕуыл дӕр тыхсы ӕмӕ алкӕйдӕр уарзы, уымӕн ӕмӕ «иууылдӕр сты йӕ къухты сконд» (Иов 34:19).

Дӕ бон дзуапп раттын у?

• Цавӕр цӕстӕй не ’мбӕлы кӕсын нӕ хотӕ ӕмӕ не ’фсымӕртӕм?

• Цы нысан кӕны иннӕтӕм Йегъовӕйы цӕстӕй кӕсын?

• Ӕппӕт дунейы дӕр нын цы хотӕ ӕмӕ ’фсымӕртӕ ис, уыдонмӕ цы цӕстӕй хъуамӕ кӕсӕм?

• Хорз хабар хъусын кӕнгӕйӕ нӕ бон куыд у Йегъовӕйы фӕзмын?

[Фарстатӕ ахуыр кӕнынӕн]

[Ныв 26 фарсыл]

Дӕ бон куыд у хуыздӕр базонын, ӕндӕр адӕмӕй чи у, уыдоны?

[Нывтӕ 28 фарсыл]

Куыд ис фехъусын кӕнӕн фылдӕр адӕмӕн хорз хабар?