Ӕмбаргӕ ут

«Сӕ зӕрдыл [сын] лӕууын кӕн, цӕмӕй уой ӕмбаргӕ» (ТИТ. 3:1, 2).

1, 2. Ӕмбаргӕдзинады тыххӕй Фыстад цы дзуры ӕмӕ цӕмӕн хъуамӕ уӕм ӕмбаргӕ?

НӔ УАРЗӔГОЙ уӕларвон Фыд Йегъовӕ у ӕгӕрон зонды хицау. Не Сфӕлдисӕг кӕй у, уымӕ гӕсгӕ разамынд дӕр уымӕй агурӕм (Пс. 48:14). Чырыстийы ахуыргӕнинаг Иаков ныффыста: «Уӕлейӕ ӕрцӕугӕ зонд та фыццаджыдӕр у сыгъдӕг, стӕй фарнуарзаг, ӕмбаргӕ, коммӕгӕс, ӕгасӕй дӕр у фӕлмӕнзӕрдӕ ӕмӕ алы хорз хъуыддагӕй хайджын, хъулон никӕй кӕны, нӕй йӕм цӕстмӕ митӕ» (Иак. 3:17).

² «Уе ’мбаргӕдзинадӕй уӕ зонӕд алчидӕр»,– дзуры апостол Павел * (Фил. 4:5). Йесо Чырысти у ӕмбырды Хицау ӕмӕ Сӕр (Еф. 5:23). Куыд ахсджиаг у уӕдӕ, цӕмӕй нӕ алчидӕр Чырыстийы коммӕ кӕса, стӕй ӕмбаргӕ уа!

3, 4. а) Адӕймаг ӕмбаргӕ куы уа, уӕд уый цы пайда у? Ӕрхӕсс цӕвиттон. ӕ) Ацы статьяйы цӕмӕ ’ркӕсдзыстӕм?

³ Ӕмбаргӕ куы уӕм, уӕд нын уый уыдзӕн стыр пайда. Райсӕм иу цӕвиттон. Стыр Британийы пъӕлицӕ террористты фӕндтӕ куы раргом кодта, уӕд, хӕдтӕхджытыл чи балц кодта, уыдонӕн арӕзт ӕрцыдысты ног уагӕвӕрдтӕ. Уыдонмӕ гӕсгӕ хӕдтӕхӕджы салонмӕ бирӕ цыдӕртӕ хӕссыны бар нал уыд. Фӕлӕ бӕлццӕттӕн сӕ фылдӕр ӕнӕ уӕлдай дзырдӕй уыцы уагӕвӕрдтӕ ӕххӕст кӕнын райдыдтой. Шофыртӕ дӕр ӕмбарынц, фӕндагыл иуӕй-иу рӕтты иннӕ машинӕты сӕ разӕй кӕй хъуамӕ уадзой, цӕмӕй мацы бӕллӕх ӕрцӕуа.

⁴ Нӕ фылдӕрӕн ӕнцон нӕу, цӕмӕй алы хатт ӕмбаргӕ уӕм. Уымӕ гӕсгӕ ӕркӕсӕм, куыд нын баххуыс кӕндзӕн, раст зӕрдӕйы уаг нын куы уа, хицӕутты коммӕ куы кӕсӕм ӕмӕ алы хъуыддаджы дӕр уӕззау зондӕй куы архайӕм, уый.

Раст зӕрдӕйы уаг

5. Моисейы Закъон куыд амыдта, уымӕ гӕсгӕ цагъарӕн йӕ хицаумӕ баззайын йӕ бон кӕд уыд?

⁵ Цӕмӕй адӕймаг ӕмбаргӕ уа, уый тыххӕй йӕ зӕрдӕйы уаг хъуамӕ уа раст. Ӕркӕсӕм иу хабармӕ. Рагзаманты-иу дзуттӕгтӕй цагъар чи сси, уыдон-иу Моисейы Закъонмӕ гӕсгӕ ссӕрибар сты ӕвдӕм азы кӕнӕ Сӕрибардзинады азы – уый баст уыд, фыццаг-иу сӕ кӕцы ралӕууыд, уымӕй. Фӕлӕ цагъарӕн йӕ бон уыд йӕ хицаумӕ баззайын ӕмӕ йын дарддӕр дӕр цагъарӕй лӕггад кӕнын (Бакӕс Рацыд 21:5, 6.) Цӕмӕн-иу ӕй бафӕндыд баззайын? Йӕ хицауы-иу кӕй уарзта, уый тыххӕй.

6. Йегъовӕйӕн кӕй лӕггад кӕнӕм ӕмӕ ӕрмӕст нӕхиуыл кӕй нӕ хъуыды кӕнӕм, уый уарзондзинадимӕ куыд баст у?

⁶ Йегъовӕйы кӕй уарзӕм, уый тыххӕй мах дӕр бафӕнды, цӕмӕй йын нӕ цард снывонд кӕнӕм ӕмӕ йын цы дзырд радтам, уымӕ гӕсгӕ цӕрӕм (Ром. 14:7, 8). «Хуыцауы кӕй уарзӕм, уый уымӕй бӕрӕг уыдзӕн, ӕмӕ йын йӕ фӕдзӕхстытӕ куы ӕххӕст кӕнӕм. Ӕмӕ йӕ фӕдзӕхстытӕ та зынӕххӕстгӕнӕн не сты»,– ныффыста апостол Иоанн (1 Иоан. 5:3). Ахӕм уарзондзинад, йӕхицӕн куыд хуыздӕр уа, ууыл нӕ хъуыды кӕны (1 Кор. 13:4, 5). Иннӕты кӕй уарзӕм, уымӕ гӕсгӕ стӕм ӕмбаргӕ ӕмӕ сын сӕ ныхасӕн аргъ кӕнӕм. Мах архайӕм, цӕмӕй ӕрмӕст нӕхиуыл ма хъуыды кӕнӕм, фӕлӕ иннӕтыл дӕр (Фил. 2:2, 3).

7. Уацамынды ӕмбаргӕдзинад, кӕнӕ иннӕтыл хъуыды кӕнын, ахсджиаг цӕмӕн у?

⁷ Мах иннӕтӕн хъуамӕ къуылымпыйы хос ма уӕм мадӕр нӕ ныхӕстӕй, мадӕр нӕ хъуыддӕгтӕй (Еф. 4:29). Уарзондзинад нын ӕххуыс кӕны, цӕмӕй, ӕндӕр адӕмыхаттӕй чи у ӕмӕ ӕндӕр ӕгъдӕуттыл хӕст чи у, уыдоны Йегъовӕйӕн лӕггад кӕнын райдайын цы  бахъыгдара, ахӕмӕй мацы аразӕм. Уый арӕх баст вӕййы, иннӕтыл хъуыды кӕнӕм ӕви нӕ, ууыл. Зӕгъӕм, раздӕр йӕхи чи ахуырста ӕмӕ капрон цъындатӕ чи дардта, уыцы миссионер-хотӕ афтӕ нал фӕкӕнынц, кӕд, кӕм лӕггад кӕнынц, уым уый худинаг у кӕнӕ искӕмӕн цӕлхдур суыдзӕн, уӕд (1 Кор. 10:31–33).

8. Хуыцауы кӕй уарзӕм, уый нын куыд ӕххуыс кӕны, цӕмӕй нӕхи «иннӕтӕй дӕлдӕрыл» нымайӕм?

⁸ Йегъовӕйы кӕй уарзӕм, уый нын ӕххуыс кӕны, цӕмӕй сӕрбӕрзонд ма уӕм. Йесойы ахуыргӕнинӕгты ’хсӕн ныхас куы рауад, чи сӕ уӕлдӕр у, уый тыххӕй, уӕд сын Йесо гыццыл сывӕллоны сӕ астӕу ӕрлӕууын кодта, ӕмӕ сын загъта: «Ацы гыццыл сывӕллоны мӕ номы тыххӕй чи суазӕг кӕна, уый суазӕг кӕндзӕн мӕн дӕр. Ӕмӕ мӕн чи суазӕг кӕна, уый та суазӕг кӕндзӕн, мӕн чи рарвыста, уый дӕр. Уӕдӕ сымахӕй йӕхи иннӕтӕй дӕлдӕрыл чи нымайы, уӕлдӕр гъе уый у» (Лук. 9:48; Марчы 9:36). Алкӕйдӕр хицӕнӕй куы райсӕм, уӕд нын, чи зоны, ӕцӕгдӕр зын у нӕхи «иннӕтӕй дӕлдӕрыл» нымайын. Нӕ туджы тӕригъӕд кӕй рахастам ӕмӕ сӕрбӕрзонддзинадмӕ ӕмхиц кӕй стӕм, уымӕ гӕсгӕ, чи зоны, арӕх нӕхи уӕлдӕр фӕкӕнӕм, фӕлӕ нын сӕрныллӕгдзинад ӕххуыс кӕны, цӕмӕй ӕмбаргӕ уӕм (Ром. 12:10).

9. Цӕмӕй ӕмбаргӕ уӕм, уый тыххӕй нӕ зӕрдыл цы хъуамӕ дарӕм?

⁹ Цӕмӕй ӕмбаргӕ уӕм, уый тыххӕй хъуамӕ, Хуыцау бартӕ кӕй къухмӕ радта, уыдоны коммӕ кӕсӕм. Ӕцӕг чырыстӕттӕ иууылдӕр аргъ кӕнынц, хистӕр чи у, уый тыххӕй Хуыцау цы ахсджиаг уагӕвӕрд скодта, уымӕн. Апостол Павел уый хорз бамбарын кодта йӕ фыстӕджы коринфӕгтӕм: «Фӕнды [мӕ], цӕмӕй йӕ зонат, ӕмӕ алы нӕлгоймагӕн дӕр йӕ хицау у Чырысти, сылгоймагӕн йӕ сӕрыхицау у нӕлгоймаг, Чырыстийӕн та йӕ хицау у Хуыцау» (1 Кор. 11:3).

10. Йегъовӕйы коммӕ куы кӕсӕм, уӕд уый цӕуыл дзурӕг уыдзӕн?

¹⁰ Хуыцауы коммӕ куы кӕсӕм, уӕд уымӕй бӕрӕг уыдзӕн, нӕ уарзӕгой Фыдыл ӕй кӕй нымайӕм, кӕй йыл ӕууӕндӕм ӕмӕ йыл нӕ ныфс кӕй дарӕм. Хуыцау алцыдӕр уыны, ӕмӕ алкӕйдӕр йӕ хъуыддӕгтӕм гӕсгӕ схорзӕхджын кӕндзӕн. Уый зӕрдыл дарын хорз у, иннӕтӕ нӕ куы ницӕмӕ дарой, куы нӕм мӕсты кӕной ӕмӕ нӕ куы ’фхӕрой, уӕд. Павел фыста: «Уӕ бон цы у, уый аразут, цӕмӕй алкӕимӕ дӕр хӕларӕй цӕрат». Павел ацы уынаффӕ куы радта, уӕд ма бафӕдзӕхста: «Мӕ уарзон ӕфсымӕртӕ, уӕ маст макӕмӕй исут. Уыцы хъуыддаг Хуыцауы бар бакӕнут, уымӕн ӕмӕ афтӕ фыст у: „Мастисӕг ӕз дӕн. Цы сын ӕмбӕлы, уый сын ӕз бакӕндзынӕн,– зӕгъы Йегъовӕ“» (Ром. 12:18, 19).

11. Чырыстийы коммӕ кӕй кӕсӕм, уый ӕвдисын нӕ бон куыд у?

¹¹ Чырыстон ӕмбырды Йегъовӕ бартӕ кӕй къухмӕ радта, уыдоны коммӕ дӕр хъуамӕ кӕсӕм. Раргомады 1 сӕры фыст ис, Йесо Чырыстийӕн йӕ рахиз къухы кӕй ис ӕмбырды «стъалытӕ» (Рарг. 1:16, 20). Кӕд уыцы «стъалытӕ» комкоммӕ сӕрст цӕстдарджытӕм амонынц, уӕддӕр дзы цӕй кой цӕуы, уый ахӕссӕн ис, ӕндӕр фыстӕй чи сты, уыцы хистӕр нӕлгоймӕгты советтӕм дӕр. Ацы нысангонд цӕстдарджытӕ Чырыстийы коммӕ кӕсынц ӕмӕ уый  куыд фӕлмӕнзӕрдӕ у, афтӕ сты уыдон дӕр иннӕтимӕ. Йесо бӕлвырд фӕтк скодта, цӕмӕй «ӕууӕнкджын ӕмӕ зондджын цагъар» «хӕринаг афоныл дӕтта», ӕмӕ ӕмбырды иууылдӕр архайынц уыцы фӕткмӕ гӕсгӕ (Матф. 24:45–47). Уыцы ӕрмӕг ахуыр кӕнынмӕ ӕмӕ дзы царды пайда кӕнынмӕ цӕттӕ кӕй стӕм, уый ууыл дзурӕг у, Чырыстийы коммӕ кӕй кӕсӕм, ӕмӕ уый та ахъаз кӕны ӕмбырды фарн ӕмӕ иудзинадӕн (Ром. 14:13, 19).

Коммӕгӕс кӕд хъуамӕ уӕм?

12. Алкӕддӕр коммӕгӕс цӕуылнӕ хъуамӕ уӕм?

¹² Ӕмбаргӕ чи у, уый хъуамӕ хицӕутты коммӕ кӕса. Фӕлӕ уый ууыл дзурӕг нӕу, ӕмӕ уӕд йӕ уырнындзинадмӕ ӕмӕ Хуыцауы уагӕвӕрдтӕм куыдфӕндыйы цӕстӕй кӕсы. Куыд бакодтой фыццаг ӕнусы чырыстӕттӕ, дины разамонджытӕ сӕ карзӕй куы бафӕдзӕхстой, цӕмӕй Йесойы номӕй макӕйуал ахуыр кодтаиккой, уӕд? Петр ӕмӕ иннӕ апостолтӕ фидарӕй загътой: «Махӕн нӕ хицау Хуыцау у, ӕмӕ хъуамӕ уымӕ хъусӕм, адӕммӕ нӕ, фӕлӕ» (Ап. хъ. 4:18–20; 5:28, 29). Уӕдӕ нӕ абон дӕр хицӕуттӕ хъусын кӕнын куы нӕ фӕуадзынц, уӕд дӕр нӕ хъуыддаг нӕ ныууадзӕм, фӕлӕ ног уавӕртӕм гӕсгӕ фӕархайӕм. Кӕд нӕ хӕдзарӕй-хӕдзармӕ хъусын кӕнын нӕ уадзынц, уӕддӕр ссарӕм ӕндӕр мадзӕлттӕ, цӕмӕй уыцы адӕмимӕ ’мбӕлӕм ӕмӕ дарддӕр дӕр ӕххӕст кӕнӕм, Хуыцау нын цы бафӕдзӕхста, уый. Хицӕуттӕ нын фембӕлдтӕ уадзыны бар куы нӕ фӕдӕттынц, уӕд фембырд кӕнӕм гыццыл къордтӕй ӕмӕ афтӕмӕй равдисӕм, ӕмбаргӕ кӕй стӕм (Ром. 13:1; Дзут. 10:24, 25).

13. Хицӕутты коммӕ кӕсын кӕй хъӕуы, уый тыххӕй Йесо цы загъта?

¹³ Йесо Уӕлхох уацамынды загъта, хицӕутты коммӕ кӕсын кӕй хъӕуы, уый тыххӕй: «Исчи дыл тӕрхондонмӕ куы хъаст кӕна, дӕ хӕдон байсынмӕ дын куы хъава, уӕд ын ратт де ’ддаг дарӕс дӕр. Ӕмӕ дӕ барджынтӕй исчи йемӕ иу мин къахдзӕфы куы цӕуын кӕна, уӕд йемӕ ацу дыууӕ ахӕмы» (Матф. 5:40, 41) *. «Дыууӕ мин къахдзӕфы» ацӕуӕм, уымӕн ӕмӕ иннӕтыл хъуыды кӕнӕм ӕмӕ нӕ фӕнды, цӕмӕй сын баххуыс кӕнӕм (1 Кор. 13:5; Тит. 3:1, 2).

14. Йегъовӕйӕ чи аздӕхт, уыдонӕн цӕуылнӕ хъуамӕ басӕттӕм?

¹⁴ Фӕлӕ раст динӕй чи аздӕхт, уыдоны коммӕ кӕсын никуы хъӕуы. Уыцы хъуыддаджы хъуамӕ фидар уӕм, цӕмӕй ӕцӕгдзинад мацӕмӕй фӕчъизи кӕнӕм ӕмӕ ӕмбырды иудзинад бахъахъхъӕнӕм. «Мӕнг ӕфсымӕрты» тыххӕй апостол Павел ныффыста: «Мах уыцы адӕймӕгтӕн нӕ басастыстӕм ӕмӕ сӕ ныхасмӕ ӕппындӕр нӕ байхъуыстам, цӕмӕй сымах дарддӕр дӕр ӕцӕгдзинадыл, ома хорз хабарыл, фидар хӕцат» (Гал. 2:4, 5). Йегъовӕйӕ чи аздӕхт, ахӕм адӕм ӕмбырды куы фӕзыны, уӕд иузӕрдион чырыстӕттӕ фидар фӕхӕцынц, раст цы у, ууыл.

Цӕстдарджытӕ хъуамӕ ӕмбаргӕ уой

15. Чырыстон цӕстдарджытӕ ӕмбырды хъуыддӕгтӕ ӕвзаргӕйӕ ӕмбаргӕ куыд вӕййынц?

¹⁵ Цӕстдарджытӕй кӕй снысан кӕнынц, уыдонмӕ цы миниуджытӕ хъуамӕ уа, уыдонӕй иу у, цӕмӕй ӕмбаргӕ уой. Павел ныффыста: «Цӕстдарӕг... хъуамӕ... уа ӕмбаргӕ» (1 Тим. 3:2, 3). Уый уӕлдай ахсджиаг у, бӕрнхӕссӕг ӕфсымӕртӕ ӕмбырды хъуыддӕгтыл аныхас кӕнынмӕ куы ӕрӕмбырд вӕййынц, уӕд. Алкӕй бон дӕр у ӕргом йӕ хъуыды бамбарын кӕнын, фӕлӕ ӕнӕмӕнг нӕу, цӕмӕй алы хистӕр нӕлгоймаг дӕр исты зӕгъа. Ныхасы рӕстӕджы Библийӕ цы уагӕвӕрдтӕ ’рцӕуы хаст, уыдонмӕ хъусгӕйӕ исчи, гӕнӕн ис, ӕмӕ йӕ хъуыды аива. Фӕлтӕрд хистӕр нӕлгоймаг иннӕты ныхмӕ нӕ цӕудзӕн ӕмӕ-иу йӕхи ныхасыл цӕхгӕр нӕ ныллӕудзӕн, фӕлӕ иннӕты ныхасӕн аргъ кӕндзӕн. Райдианы, чи зоны, хистӕр нӕлгоймӕгтӕ иу хъуыдыйыл хӕст ма уой, фӕлӕ куы скувой, стӕй сӕрныллӕг ӕмӕ ӕмбаргӕ куы уой, уӕд се ’хсӕн цы иудзинад ис, уый нӕ фехӕлдзӕн (1 Кор. 1:10; бакӕс Ефесӕгтӕм 4:1–3).

16. Чырыстон цӕстдарджытӕн цавӕр зӕрдӕйы уаг хъуамӕ уа?

¹⁶ Чырыстон хистӕр нӕлгоймӕгтӕ хъуамӕ архайой, цӕмӕй ӕмбаргӕ уой ӕмӕ Хуыцауы разамындмӕ хъусой. Ахӕм зӕрдӕйы уаг сын баххуыс кӕндзӕн, цӕмӕй, Хуыцауы дзуг хизгӕйӕ, фӕлмӕнзӕрдӕ уой ӕмӕ фыстыл тыхсой. Апостол Петр ныффыста: «Хизут Хуыцауы дзуг, уӕ бар уын кӕй бакодтой, уыцы дзуг, тыххӕй кӕнӕгау нӕ, фӕлӕ ӕнӕзивӕгӕй, уӕхицӕн  дзы исты спайда кӕныны тыххӕй нӕ, фӕлӕ зӕрдиагӕй» (1 Пет. 5:2).

17. Ӕмбырды алкӕмӕндӕр йӕ бон куыд у иннӕтӕм раст цӕстӕй кӕсын?

¹⁷ Ӕмбырды ацӕргӕтӕ ӕрыгӕттӕй тынг бузныг сты, кӕй сын ӕххуыс кӕнынц, уый тыххӕй ӕмӕ сӕм уӕлейӕ дӕлӕмӕ нӕ кӕсынц. Уӕдӕ ӕрыгӕттӕ дӕр стыр аргъ кӕнынц, бирӕ азты дӕргъы Йегъовӕйӕн чи лӕггад кӕны, уыдонӕн (1 Тим. 5:1, 2). Ӕмбырды хистӕр нӕлгоймӕгтӕ фӕкӕсынц, ӕфсымӕртӕй аккаг чи у, цӕмӕй сын цавӕрдӕр хӕстӕ сӕ бӕрны бакӕной, ӕмӕ сӕ стӕй фӕахуыр кӕнынц Хуыцауы дзугмӕ хъус дарын (2 Тим. 2:1, 2). Алы чырыстон дӕр хъуамӕ хъуса Павелы уынаффӕмӕ: «Разамынд уын чи дӕтты, уыдон ӕдзухдӕр сымахыл тыхсынц, уымӕн ӕмӕ сӕ сымах тыххӕй дзуапп раттын хъӕудзӕн. Ӕмӕ сӕм уӕдӕ хъусут ӕмӕ сӕ коммӕ кӕсут, цӕмӕй уыцы хъуыддаг ӕвӕндонӕй ма кӕной, фӕлӕ зӕрдӕрухсӕй. Ӕвӕндонӕй йӕ куы кӕной, уӕд уый сымахӕн хорз нӕу» (Дзут. 13:17).

Ӕмбаргӕ уӕм бинонты ’хсӕн

18. Адӕймаг йӕ бинонты ’хсӕн ӕмбаргӕ цӕмӕн хъуамӕ уа?

¹⁸ Бинонтӕй алчидӕр хъуамӕ уа ӕмбаргӕ. (Бакӕс Колоссӕгтӕм 3:18–21.) Библийы фыст ис, чырыстон бинонтӕй алкӕуыл дӕр цавӕр хӕс ис, уый. Нӕлгоймаг у йӕ усы сӕрыхицау дӕр ӕмӕ сывӕллӕтты хъомыл кӕнын дӕр сӕйраджыдӕр хауы уымӕ. Ус хъуамӕ нымайа йӕ лӕджы, сывӕллӕттӕ та хъуамӕ сӕ ныййарджыты коммӕ кӕсой. Ахӕм уагӕвӕрд цӕуы Хицауы зӕрдӕмӕ. Бинонтӕ уыдзысты ӕнгом ӕмӕ се ’хсӕн уыдзӕн фарн, алчидӕр сӕ ӕмбаргӕ куы уа, уӕд. Уый афтӕ кӕй у, уымӕн Библийы ис цалдӕр цӕвиттоны.

19, 20. а) Бамбарын кӕн, Илийы хабарӕй куыд зыны, адӕймаг ӕгӕр фӕлмӕн куы уа, уӕд уый ӕмбаргӕдзинадыл дзурӕг кӕй нӕу. ӕ) Йегъовӕ ӕмӕ Илийы цӕвиттонтӕй ныййарджытӕн сӕ бон зондӕн райсын цы у? б) Бинонтӕй алкӕмӕндӕр йӕ бон куыд у, ӕмӕ ӕмбаргӕ уа?

¹⁹ Ӕмбаргӕ адӕймаг ӕгӕр фӕлмӕн нӕ вӕййы. Ӕркӕсӕм иу цӕвиттонмӕ. Самуил нырма гыццыл лӕппу куы уыд, уӕд Израилы хистӕр сауджын уыд Илий. Фӕлӕ Илийы фырттӕ Офни ӕмӕ Финеес «Йегъовӕйы ницӕмӕ дардтой», уыдысты «ницӕйаг адӕм». Илий хъуыста, йӕ фырттӕ цы ’взӕр митӕ кодтой, уый тыххӕй, суанг ма, ӕмбырды цатыры бахизӕны чи лӕггад кодта, уыцы сылгоймӕгтимӕ ӕнӕгъдау митӕ кӕй кодтой, уый дӕр. Цы сарӕзта Илий? Илий сын загъта, зӕгъгӕ, кӕд сӕ тӕригъӕд Йегъовӕйы ныхмӕ уыд, уӕд уыдоны тыххӕй ничиуал скувдзӕн. Фӕлӕ сӕ ӕфхӕргӕ нӕ бакодта, зонд сын нӕ бацамыдта. Ӕмӕ йӕ фырттӕ дӕр сӕ тӕригъӕдджын митӕ дарддӕр кодтой. Ӕппынфӕстаг Йегъовӕ загъта, мӕлӕты аккаг кӕй сты. Илий йӕ фыртты мӕлӕты тыххӕй куы фехъуыста, уӕд йӕхӕдӕг  дӕр зӕрдӕскъуыд фӕци. Куыннӕ уыд уый ӕнамонд хабар! Кӕй зӕгъын ӕй хъӕуы, Илий ӕгӕр фӕлмӕн кӕй уыд ӕмӕ йӕ фыртты ӕнӕуаг митӕ кӕй ницӕмӕ дардта, уый аххосӕй стыр бӕллӕхтӕ ’рцыд (1 Сам. 2:12–17, 22–25, 34, 35; 4:17, 18).

²⁰ Ныр та ӕркӕсӕм, ӕмбаргӕдзинад ӕцӕгдӕр цы нысан кӕны, уымӕ: Хуыцау йӕ уӕларвон фырттимӕ куыд у. Пехуымпар Михей цӕстылуайӕны федта, Йегъовӕ ӕмӕ йӕ зӕдтӕ иумӕ куыд ӕрӕмбырд сты, уый. Йегъовӕ зӕдты бафарста, йӕ бон сӕ кӕмӕн у Израилы паддзах Ахавы асайын, уымӕн ӕмӕ уый кодта бирӕ тӕригъӕдджын хъуыддӕгтӕ ӕмӕ йӕ хъуыди фесафын. Йегъовӕ байхъуыста, йӕ уӕларвон фырттӕй чи цы дзырдта, уымӕ. Фӕстагмӕ иу зӕд загъта, уыцы хъуыддаг уый кӕй бакӕндзӕн. Йегъовӕ йӕ бафарста, куыд, зӕгъгӕ. Йӕ хъуыды йӕ зӕрдӕмӕ фӕцыд, ӕмӕ хъуыддаг уыцы зӕды бар бакодта (1 Пад. 22:19–23). Уӕдӕ, ӕмбаргӕдзинад цы у, уый тыххӕй ацы хабарӕй бинонтӕ цӕуыл ахуыр кӕнынц? Хорз вӕййы, бинонты хистӕр, йӕ ус ӕмӕ йӕ сывӕллӕттӕ цы хъуыды кӕнынц ӕмӕ сӕм цы фӕндтӕ ис, уымӕ куы байхъусы. Ус ӕмӕ сывӕллӕттӕ та хъуамӕ ӕмбарой, сӕ хъуыдытӕ ӕмӕ сӕ фӕндтӕ куы зӕгъой, уӕд сӕ уый фӕстӕ, чи зоны, бахъӕуа бакӕнын бинонты хистӕр – Библимӕ гӕсгӕ уынаффӕ хӕссыны бар кӕмӕн ис, уый куыд дзуры, афтӕ.

21. Цӕмӕ ’ркӕсдзыстӕм иннӕ статьяйы?

²¹ Уӕдӕ куыд бузныг стӕм Йегъовӕйӕ, кӕй нӕ уарзы, ахӕм хорз уынаффӕтӕ нын кӕй дӕтты ӕмӕ нӕ кӕй ахуыр кӕны, цӕмӕй ӕмбаргӕ уӕм! (Пс. 119:99). Иннӕ статьяйы ’ркӕсдзыстӕм, ӕмбаргӕдзинад бинонты царды куыд ӕххуыс кӕны, уымӕ.

[Фиппаинӕгтӕ]

Цавӕр дзуапп ратдзынӕ?

• Адӕймаг ӕмбаргӕ уа, уый хорз цӕмӕн у?

• Цӕстдарджытӕ ӕмбаргӕ кӕй сты, уый сӕ бон цавӕр хъуыддӕгтӕй у равдисын?

• Бинонтӕ иууылдӕр ӕмбаргӕ цӕмӕн хъуамӕ уой?

[Фарстатӕ ахуыр кӕнынӕн]

[Ныв 4 фарсыл]

Хистӕр нӕлгоймӕгтӕ сты Чырыстийау фӕлмӕнзӕрдӕ

[Ныв 6 фарсыл]

Хистӕр нӕлгоймӕгтӕ уынаффӕ хӕсгӕйӕ кӕй скувынц ӕмӕ сӕ ныхасыл цӕхгӕр кӕй нӕ ныллӕууынц, уый фӕрцы се ’хсӕн ис иудзинад