Уыдон рох не сты

АПОСТОЛ Павел чырыстӕттӕн дзырдта: «Алкӕмӕн дӕр хорздзинад аразӕм, уӕлдайдӕр та, уырнындзинады фӕрцы иу бинонтау кӕимӕ стӕм, уыдонӕн» (Гал. 6:10). Уыцы уынаффӕ хауы махмӕ дӕр ӕмӕ нӕ фӕнды, цӕмӕй нӕ хотӕн ӕмӕ не ’фсымӕртӕн хорздзинад аразӕм. Чырыстон ӕмбырд кӕуыл хъуамӕ тыхса, уыдонӕй иутӕ сты, зӕрӕдты хӕдзӕртты чи цӕры, уыцы зынаргъ ацӕргӕ хотӕ ӕмӕ ’фсымӕртӕ. Уыдон уый аккаг сты, цӕмӕй сӕ уӕлдай тынгдӕр рӕвдауӕм.

Иуӕй-иу бӕстӕты ацӕргӕтӕм фӕкӕсынц сӕ бинонтӕ. Ӕндӕр бӕстӕты та ацӕргӕты бахъӕуы цӕрын зӕрӕдты хӕдзӕртты. Фӕлӕ цы зӕгъӕн ис, ахӕм хӕдзӕрттӕм чи бахауы, уыцы чырыстӕттӕй? Цавӕр зындзинӕдтыл сӕмбӕлынц? Цы у сӕ бон аразын, сӕ бинонтӕ сӕ куы нӕ бӕрӕг кӕной, уӕд? Ӕмбырдӕн йӕ бон куыд у уыцы хотӕ ӕмӕ ’фсымӕртӕн баххуыс кӕнын? Арӕх сӕ куы бӕрӕг кӕнӕм, уӕд нын уый цавӕр арфӕдзинӕдтӕ ’рхӕсдзӕн?

Цавӕр зындзинӕдтӕ ис зӕрӕдты хӕдзӕртты

Ацӕргӕ чырыстӕттӕ зӕрӕдты хӕдзармӕ куы бахауынц, уӕд гӕнӕн ис, ӕмӕ уой ӕндӕр ӕмбырды территорийы. Уыцы ӕмбырды хотӕ ӕмӕ сӕ ’фсымӕртӕ нӕ фӕзонынц ӕмӕ сӕ, чи зоны, арӕх нӕ фӕбӕрӕг кӕнынц. Уымӕй уӕлдай, зӕрӕдты хӕдзары сӕ алыварс вӕййынц, ӕндӕр диныл хӕст чи у, ахӕм адӕм. Ӕппӕт уыдӕтты тыххӕй нӕ ацӕргӕ хотӕ ӕмӕ ’фсымӕртӕн зын куыннӕ уыдзӕн.

Зӕгъӕм, иуӕй-иу рӕтты зӕрӕдты хӕдзӕрттӕм ӕрбахонынц сауджынты. Зӕрӕдты хӕдзары чи кусы, иу ахӕм нӕлгоймаг загъта:  «Ацӕргӕ Ӕвдисӕнтӕй йӕ бон рӕстмӕ дзурын кӕмӕн нӕу, уыдоны фӕрсгӕ дӕр нӕ бакӕнынц, афтӕмӕй сӕ сӕ креслӕты аласынц, цӕмӕй сауджынмӕ байхъусой». Уымӕй уӕлдай ма ацӕргӕты истӕмӕй бахъӕлдзӕг кӕныны тыххӕй зӕрӕдты хӕдзӕртты фӕкӕнынц гуырӕнбонтӕ, Цыппурс кӕнӕ Куадзӕн. Иуӕй-иу рӕтты та фӕдӕттынц, Ӕвдисӕнтӕн сӕ динмӕ гӕсгӕ хӕрын кӕй не ’мбӕлы, ахӕм хӕринӕгтӕ (Ап. хъ. 15:29). Нӕ ацӕргӕ хотӕ ӕмӕ ’фсымӕрты арӕхдӕр куы бӕрӕг кӕнӕм, уӕд сын нӕ бон уыдзӕн уыцы фӕлварӕнты ӕххуыс кӕнын.

Ӕмбырды ӕххуыс

Фыццаг ӕнусы чырыстӕттӕ зыдтой, сӕ хӕс кӕй уыд, бинонтӕ кӕмӕн нӕ уыди, уыцы ацӕргӕ чырыстӕттӕн ӕххуыс кӕнын (1 Тим. 5:9). Афтӕ абон дӕр ӕмбырды цӕстдарджытӕ архайынц, цӕмӕй, зӕрӕдты хӕдзӕртты цы ацӕргӕ хотӕ ӕмӕ ’фсымӕртӕ ис, уыдон рохуаты ма зайой *. Иу хистӕр нӕлгоймаг, Робер, дзуры: «Хорз уаид, цӕстдарджытӕ сӕхӕдӕг куы бӕрӕг кӕниккой ацӕргӕты, цӕмӕй, цы уавӕрты цӕрынц, уый зоной ӕмӕ семӕ кувой. Ӕмбырдӕн йӕ бон бирӕ цӕмӕйдӕрты у баххуыс кӕнын». Ацӕргӕты бӕрӕг кӕнынӕн рӕстӕг куы арӕм, уӕд уымӕй ӕвдисдзыстӕм, ӕххуысхъуаг адӕмыл тыхсын Йегъовӕйы цӕсты куыд ахсджиаг хъуыддаг у, уый кӕй ӕмбарӕм (Иак. 1:27).

Куы фӕхъӕуы, уӕд хистӕр нӕлгоймӕгтӕ зӕрдиагӕй бацархайынц, цӕмӕй ӕмбырд фӕкӕса, зӕрӕдты хӕдзӕртты чи ис, уыцы ацӕргӕтӕм. Адӕймаджы цавӕр ӕххуыс фӕхъӕуы,  уый тыххӕй Робер дзуры: «Хъуамӕ сӕ разӕнгард кӕнӕм ӕмбырды фембӕлдтӕм цӕуынмӕ – кӕд сӕ бон у, уӕд». Фӕлӕ йӕ бон Паддзахады залмӕ цӕуын кӕмӕн нал у, уыдонӕн куыд ис баххуыс кӕнӕн? Жаклин, 80-аздзыд хо, рынчын у остеоартритӕй, фембӕлдты программӕмӕ фӕхъусы телефонӕй. Жаклин зӕгъы: «Кӕд залы нӕ вӕййын, уӕддӕр мӕм афтӕ фӕкӕсы, цыма уым дӕн. Тынг фӕцин кӕнын! Ӕз уый ӕппындӕр ницӕуыл баивин!»

Гӕнӕн куы нӕ уа, цӕмӕй ацӕргӕ чырыстон фембӕлды программӕмӕ телефонӕй хъуса, уӕд хистӕр нӕлгоймӕгтӕн сӕ бон у программӕ кассетӕйыл ныффыссын. Зӕрӕдты хӕдзармӕ хойӕн кӕнӕ ӕфсымӕрӕн кассета чи бахӕсса, уый-иу хъуамӕ йемӕ ныхас дӕр акӕна, цӕмӕй йын йӕ уырнындзинад бафидар кӕна. «Ацӕргӕ хотӕ ӕмӕ ’фсымӕртимӕ ӕмбырды хабӕртты кой куы кӕнай, уӕд сын ӕхсызгон уыдзӕн – сӕхи ӕцӕгдӕр нымайдзысты ӕмбырды уӕнгтыл»,– зӕгъы иу хистӕр нӕлгоймаг.

Семӕ ныхас кӕнут

Кӕй зӕгъын ӕй хъӕуы, ацӕргӕтӕй зӕрӕдты хӕдзармӕ чи бахауы, уыдонӕй бирӕтӕ тынг фӕмӕт кӕнынц ӕмӕ фӕтыхсынц. Иуӕй-иутӕ дзы уый тыххӕй суанг сӕхимӕ дӕр ныхъхъусынц. Ӕмӕ хорз уаид, зӕрӕдты хӕдзармӕ куы бахауой, уӕд сӕ уайтагъд куы бабӕрӕг кӕниккам ӕмӕ сын куы зӕгъиккам, арӕх-иу уӕм ӕрбауайдзыстӕм, зӕгъгӕ. Уый сын стыр ӕххуыс фӕуыдзӕн, цӕмӕй сӕ сагъӕстӕ ферох кӕной ӕмӕ та сӕ зӕрдӕйы ногӕй циндзинад фӕзына (Ӕмб. 17:22).

Нӕ ацӕргӕ хо кӕнӕ ’фсымӕрӕн йӕ хъуыдытӕ хӕццӕ кӕнын куы райдайынц, хъусӕй куы нал фӕхъусы кӕнӕ ӕндӕр истӕй аххосӕй йӕ бон рӕстмӕ дзурын куы нал вӕййы, уӕд иуӕй-иутӕм, гӕнӕн ис, афтӕ кӕса, ӕмӕ йӕ бӕрӕг кӕнын ницыуал пайда у. Фӕлӕ семӕ ныхас кӕнын цыфӕнды зын ма уа, уӕддӕр сӕ куы бӕрӕг кӕнӕм, уӕд ӕвдисдзыстӕм, нӕ кӕрӕдзийӕн кад кӕнынмӕ нӕ иу иннӕмӕ кӕй не ’нхъӕлмӕ кӕсы (Ром. 12:10). Кӕд ацӕргӕ рохгӕнаг сси, уӕд ын нӕ бон зӕгъын у, цӕмӕй нын йӕ раздӕры хабӕрттӕй исты радзура, зӕгъӕм, йӕ сабийы бонты тыххӕй кӕнӕ, Хуыцауы куыд базыдта, уый тыххӕй. Ӕмӕ йӕ хъуыдытӕ дзурын йӕ бон куы нӕ уа, уӕд та? Хъусӕм ӕм, ӕмӕ нӕм кӕд нӕ фӕхъыг уыдзӕн, уӕд ын баххуыс кӕнӕм. Куыд? Зӕгъӕм, куы фӕкъуыхцы уа, уӕд йӕ бӕсты зӕгъӕм дыууӕ-ӕртӕ дзырды – кӕд уыдонӕй искӕцы уаид, цы дзырд ӕрхъуыды кӕнынмӕ хъавы, уый. Кӕнӕ та, цы зӕгъынмӕ хъавы, уый йӕ бӕсты зӕгъӕм, ӕмӕ йын стӕй зӕгъӕм, цӕмӕй йӕ ныхас дарддӕр кӕна. Кӕд дзургӕ-дзурын ферхӕцы ӕмӕ цы дзуры, уый зынӕмбарӕн вӕййы, уӕд ын хъусӕм йӕ хъӕлӕсы уагмӕ, цӕмӕй бамбарӕм, цы зӕгъынмӕ хъавы, уый.

Кӕд адӕймаг ӕппындӕр нал дзуры, уӕд дӕр исты ӕрхъуыды кӕнӕн ис. Хо Лоранс лӕггад кӕны пионерӕй. Арӕх бабӕрӕг кӕны 80-аздзыд хо Мадлены. Мадлен дзыхӕй нал дзуры. Уӕдӕ уӕд куыд фӕныхас кӕнынц? Лоранс зӕгъы: «Иумӕ куы фӕкувӕм, уӕд ын йӕ къух мӕ къухмӕ райсын. Мӕ къух мын йӕ лӕмӕгъ къухӕй куыд фелхъив-фелхъив кӕны ӕмӕ йӕ цӕстытӕ куыд ӕрцъынд-ӕрцъынд фӕкӕны, уымӕй февдисы, тынг кӕй аргъ кӕны нӕ иумӕйаг куывдтытӕн». Нӕ зынаргъ ацӕргӕ хотӕн ӕмӕ ’фсымӕртӕн ӕцӕгдӕр тынг ӕхсызгон вӕййы, сӕ къух сын куы райсӕм кӕнӕ сӕ зӕрдиагӕй куы ӕрбахъӕбыс кӕнӕм.

Сӕ фарсмӕ у

Нӕ ацӕргӕ хоты ӕмӕ ’фсымӕрты арӕх куы бӕрӕг кӕнӕм, уӕд уый фӕзындзӕн, куыд сӕм зилынц, ууыл. Нӕ хо Даниэль, зӕрӕдты хӕдзӕртты чи цӕры, уыцы ацӕргӕ Ӕвдисӕнты бӕрӕг кӕны 20 азӕй фылдӕр. Уыцы азты дӕргъы цы бафиппайдта, уый тыххӕй дзуры: «Зӕрӕдты хӕдзары кусджытӕ куы фенынц, кӕйдӕр арӕх бӕрӕг кӕнынц, уӕд ӕм хуыздӕр кӕсын райдайынц». Уӕлдӕр кӕй кой кодтам, уыцы ӕфсымӕр Робер зӕгъы: «Кусджытӕ тынгдӕр аргъ кӕнынц, рынчынтӕм арӕх чи фӕцӕуы, уыдоны ныхасӕн. Фӕлӕ сӕ ӕрмӕст стӕм хатт чи абӕрӕг кӕны, уыдоны ныхӕстӕм байхъусдзысты, уый зын зӕгъӕн у». Медицинон хоты куыстмӕ рынчынты хиуӕттӕ арӕх фаутӕ фӕхӕссынц. Ӕмӕ сын мах бузныг куы дзурӕм, уӕд сын тынг ӕхсызгон уыдзӕн. Уымӕй уӕлдай ма семӕ куы балымӕн уӕм, уӕд тынгдӕр аргъ кӕндзысты, сӕ бӕрны чи ис, уыцы ацӕргӕ Ӕвдисӕнты динӕн.

Кусджытӕ ма нӕм хорз цӕстӕй кӕсдзысты, истӕмӕйты-иу сын куы аххуыс кӕнӕм, уӕд.  Зӕрӕдты хӕдзӕрттӕй иуӕй-иуты кусджытӕ кӕй нӕ фӕфаг кӕны, уымӕ гӕсгӕ ацӕргӕтӕм фаг хъусдард нӕ вӕййы. Медицинон хо Ребеккӕ радта ахӕм уынаффӕ: «Хӕрынӕн рӕстӕг бирӕ нӕ вӕййы. Уымӕ гӕсгӕ ӕвзӕр нӕ уаид, уӕ хӕлӕрттӕм-иу хӕрдафон куы ’рбацӕуиккат ӕмӕ-иу сын куы бахӕрын кӕниккат». Ӕфсӕрмы ма кӕнӕм, ӕмӕ-иу кусджыты бафӕрсӕм, цӕмӕй уӕм фӕкӕсӕм, зӕгъгӕ.

Ацӕргӕ хотӕ ӕмӕ ’фсымӕрты зӕрӕдты хӕдзары арӕх куы бӕрӕг кӕнӕм, уӕд, цы хъуаг сты, уый фендзыстӕм. Фӕлӕ сын цӕмӕй баххуыс кӕнӕм, уый тыххӕй уал нӕ фыццаг хъӕудзӕн кусджытӕй бар ракурын. Зӕгъӕм, нӕ бон сын уаид сӕ къултыл сӕ хиуӕтты къамтӕ кӕнӕ сывӕллӕтты конд нывтӕ ӕрцауындзын. Ахъуыды кӕнӕн уаид, цы сын ис ӕрбахӕссӕн: хӕдзары дарынӕн хъарм дзаумӕттӕ кӕнӕ, цӕмӕй сӕхимӕ зилой, уый тыххӕй сӕ цы хъӕуы, уыдӕттӕ. Кӕд зӕрӕдты хӕдзары кӕрты парк ис, уӕд хорз уаид, нӕ хӕлары-иу тезгъо кӕнынмӕ куы ракӕниккам. Лоранс (йӕ кой кодтам уӕлдӕр) зӕгъы: «Мадлены алы къуыри дӕр бабӕрӕг кӕнын ӕмӕ мын уый дӕр ме ’рбацыдмӕ тынг фенхъӕлмӕ кӕсы. Сывӕллӕтты йӕм куы ’рбакӕнын, уӕд йӕ мидбылты худын райдайы ӕмӕ йӕ цӕстытӕ сӕрттивынц». Уыцы хъуыддӕгтӕ кӕд уадиссаг не сты, уӕддӕр тынг барухс кӕнынц, зӕрӕдты хӕдзары чи цӕры, уыдоны зӕрдӕтӕ (Ӕмб. 3:27).

Пайда у иутӕн дӕр ӕмӕ иннӕтӕн дӕр

Ацӕргӕты арӕх куы фӕбӕрӕг кӕнӕм, уӕд фӕлвӕрд фӕцӕуы, «нӕ уарзондзинад ӕцӕг уарзондзинад у ӕви нӕ, уый» (2 Кор. 8:8). Куыд? Кӕимӕ балымӕн стӕм, уыцы адӕймаг куыд лӕмӕгъ кӕны, уымӕ кӕсын тынг зын вӕййы. Мӕнӕ цы зӕгъы Лоранс: «Мадлен куыд ӕнӕбон уыд, уымӕ кӕсгӕйӕ-иу мӕ зӕрдӕ фӕрыст. Фыццаг рӕстӕджыты афтӕ никуы уыди, цӕмӕй Мадленӕй рацыдаин ӕмӕ ма фӕкуыдтаин. Фӕлӕ стӕй бамбӕрстон: Йегъовӕмӕ зӕрдӕйӕ куы кувай, уӕд де ’нкъарӕнтыл дӕ бар цӕудзӕн ӕмӕ ацӕргӕтӕн фылдӕр ныфс уыдзынӕ». Цалдӕр азы дӕргъы Робер бӕрӕг кӕны иу ӕфсымӕры, йӕ ном Ларри. Ларри рынчын у Паркинсоны низӕй. Робер дзуры: «Ларри йӕ низӕй афтӕ сси, ӕмӕ, цы фӕдзуры, уымӕй иу ныхас дӕр нал ӕмбарын. Фӕлӕ иумӕ куы фӕкувӕм, уӕд ӕй фӕхатын, йӕ уырнындзинад ныр дӕр фидар кӕй у».

Нӕ ацӕргӕ хотӕ ӕмӕ ’фсымӕрты куы фӕбӕрӕг кӕнӕм, уӕд уый ӕрмӕст уыдонӕн нӕ вӕййы пайда, фӕлӕ ма нӕхицӕн дӕр. Уыдон цӕрынц ӕнӕуырнӕг адӕмы ’хсӕн, фӕлӕ сӕ фидар фӕнд у, цӕмӕй дарддӕр дӕр Йегъовӕйыл иузӕрдион уой. Уый нӕ ахуыр кӕны, уырнындзинад ӕмӕ хъӕбатырдзинад ӕвдисын куыд хъӕуы, ууыл. Кӕд хъусӕй рӕвдз нал вӕййынц, стӕй цӕстӕй хорз нал фӕуынынц, уӕддӕр Хуыцауы тыххӕй фылдӕр базонынмӕ куыд бӕллынц, уымӕй бӕрӕг у, «адӕймаг афтид дзулӕй [кӕй] нӕ цӕры, фӕлӕ Йегъовӕйы дзыхӕй рацӕугӕ алы дзырдӕй» (Матф. 4:4). Ацӕргӕтӕ тынг фӕцин кӕнынц хуымӕтӕг цӕуылдӕрты, зӕгъӕм, сывӕллоны мидбылхуыдтыл кӕнӕ сын сӕ хӕлӕрттимӕ иумӕ хӕринаг бахӕрыны фадат кӕй вӕййы, ууыл. Уый нын хорз зондзонӕн у, цӕмӕй разы уӕм, цы нын ис, уымӕй. Хуыцауимӕ ’ввахс хӕлӕрттӕ кӕй сты, уымӕн куыд тынг аргъ кӕнынц, уый нын ӕххуыс кӕны, сӕйрагдӕр хъуыддӕгтӕ фыццаг бынаты ӕвӕрынӕн.

Ацӕргӕтӕн ӕххуыс кӕнын пайда у ӕнӕхъӕн ӕмбырдӕн дӕр. Куыд? Рынчынты тынгдӕр хъӕуы ӕфсымӕрты ӕххуыс. Уымӕ гӕсгӕ, ӕмбырды чи ис, уыдонӕн уый у хорз фадат, цӕмӕй искӕй рис ӕмбарын сахуыр уой. Библи нӕ разӕнгард кӕны кӕрӕдзийӕн лӕггад кӕнынмӕ. Уӕдӕ ацӕргӕтӕн куы ӕххуыс кӕнӕм,– суанг бирӕ рӕстӕг дӕр,– уӕд уый дӕр хъуамӕ нымайӕм нӕ лӕггадыл (1 Пет. 4:10, 11). Уыцы хъуыддаджы хистӕр нӕлгоймӕгтӕ разамынд сӕхимӕ куы исой, уӕд иннӕтӕ дӕр фендзысты, ацӕргӕтыл тыхсын чырыстӕтты хӕс кӕй у ӕмӕ йӕм куыдфӕндыйы цӕстӕй кӕсӕн кӕй нӕй (Иез. 34:15, 16). Нӕ ацӕргӕ хотӕ ӕмӕ ’фсымӕрты куы уарзӕм ӕмӕ сын куы ’ххуыс кӕнӕм, уӕд ӕй уындзысты, рох кӕй не сты.

[Фиппаинаг]

[Хицӕнгонд текст 28 фарсыл]

«Зӕрӕдты хӕдзары кусджытӕ куы фенынц, кӕйдӕр арӕх кӕй бӕрӕг кӕнынц, уӕд ӕм хуыздӕр фӕкӕсынц»

[Ныв 26 фарсыл]

Нӕ зӕрдӕбын куывдтытӕ не ’мчырыстонӕн баххуыс кӕндзысты йӕ сагъӕстӕ ферох кӕнынӕн

[Ныв 26 фарсыл]

Ацӕргӕты нӕ бон у бафидар кӕнын нӕ фӕлмӕн уарзтӕй