Диссаджы балц

ӔРТӔ ӕрыгон ӕфсымӕры иу африкаг бӕстӕйӕ тынг фӕндыд облӕстон конгресмӕ ацӕуын. Фӕлӕ куыд ацыдаиккой, уый нӕ зыдтой. Цӕуын сӕ хъуыди иу-90 километры рыг ӕмӕ къуыппытӕ-дзыхъхъытӕ фӕндагыл, цӕуыл ацыдаиккой, уый та сын нӕ уыд. Уӕд сфӕнд кодтой искӕмӕй ӕртӕ велосипеды ракурын, фӕлӕ рӕстмӕ ницы ссардтой.

Кӕй тыхсынц, уый се ’мбырдӕй иу хистӕр нӕлгоймаг куы федта, уӕд сӕм авӕрдта йӕхи велосипед – зӕронд, фӕлӕ хорз. Уыцы ӕфсымӕр сын радзырдта, раздӕр-иу йӕхӕдӕг дӕр ӕмӕ иннӕтӕ дӕр конгресмӕ куыд цыдысты, уый тыххӕй. Ӕмӕ сын бацамыдта, ӕртӕйӕ иу велосипедыл сӕ бон ацӕуын куыд уыд, уый. Цымӕ йыл куыд цыдысты?

Боныгон ӕгӕр тӕвд кӕй вӕййы, уымӕ гӕсгӕ ӕфсымӕртӕ райсомӕй раджы фембӕлдысты, сӕ хӕссинӕгтӕ велосипедыл сӕвӕрдтой ӕмӕ араст сты. Сӕ иу сбадт велосипедыл, иннӕ дыууӕ та йӕ фӕдыл къахӕй ацыдысты. Велосипедыл-иу цы ӕфсымӕр уыд, уый-иу 500 метры бӕрц куы ацыд, уӕд-иу велосипед бӕласыл банцой кодта ӕмӕ-иу дарддӕр къахӕй ацыд. Кӕй зӕгъын ӕй хъӕуы, велосипед-иу ахӕм ран сӕвӕрдта, иннӕ дыууӕ дӕр ӕй куыд уыдтаиккой, цӕмӕй йыл ӕндӕр исчи ма «абадтаид».

Иннӕ дыууӕ-иу велосипеды онг куы бахӕццӕ сты, уӕд-иу ыл сӕ иу сбадт, иннӕ та-иу дарддӕр къахӕй цыд иннӕ 500 метры, цалынмӕ-иу йӕ рад не ’рцыд, уӕдмӕ. Сӕ балц хорз кӕй спълан кодтой, уымӕ гӕсгӕ сӕ алчидӕр къахӕй фӕцыд 90 километры нӕ, фӕлӕ 60 километры. Сӕ фыдӕбон дзӕгъӕлы нӕ уыд. Уыдон ныхӕццӕ сты сӕ бынатмӕ, фембӕлдысты хотӕ ӕмӕ ’фсымӕртыл ӕмӕ зӕрдиагӕй байхъуыстой конгрессы программӕмӕ (Дык. з. 31:12). Ды дӕр, дӕ бон цыдӕриддӕр у, уый бакӕндзынӕ, цӕмӕй ацы аз облӕстон конгресмӕ ацӕуай?