Ӕмбаргӕйӕ архай ӕмӕ дӕ циндзинад ма саф

«НИЦЫ та мын дзы рауад!» Ахӕм ныхӕстӕ, ӕвӕццӕгӕн, иу ӕмӕ дыууӕ хатты нӕ загътай, дӕ фӕнд-иу дӕ къухы куы нӕ бафтыд, уӕд. Гӕнӕн ис, йӕхи афтӕ хата, ноггуырд сывӕллон кӕмӕн ис, ахӕм хо. Ахӕм сывӕллонӕн йӕхицӕн иу хицау хъӕуы ӕмӕ, чи зоны, хо мӕт кӕна, Хуыцауы хъуыддӕгтӕн ын фаг рӕстӕг кӕй нал ис. Кӕмӕндӕр та йӕ ныййарджытӕ ӕгӕр домаг уыдысты ӕмӕ дзы никуы ӕппӕлыдысты. Ӕмӕ йӕм ныр ӕппынӕдзух афтӕ кӕсы, ӕмбырды хъуыддӕгты фаг кӕй нӕ архайы. Кӕнӕ ацӕргӕ хо, чи зоны, йӕхи мидӕг тыхсы, Йегъовӕйӕн раздӕр цас лӕггад кодта, уыйас йӕ бон кӕй нал у. «Хъусынгӕнджыты пионертӕй лӕггад кӕнынмӕ куы фӕразӕнгард кӕнынц, уӕд хатт мӕ цӕссыгтӕ нал бауромын»,– зӕгъы иу хо, Кристиан. Йӕ бинонты уавӕр ӕй нӕ амоны, цӕмӕй йӕ цас фӕнды, Йегъовӕйӕн уыйбӕрц лӕггад кӕна.

Ахӕм хъуыдытӕ куы фӕзына, уӕд цы ис саразӕн? Иуӕй-иутӕн сӕ бон куыд баци сӕ уавӕртӕм раст цӕстӕй кӕсын? Нӕхицӕй ӕгӕр бирӕ куы нӕ домӕм, уӕд нын уый цавӕр арфӕдзинӕдтӕ ’рхӕсдзӕн?

Ӕмбаргӕ у

Апостол Павел равдыста, нӕ циндзинад цӕуыл баст у: «Хицауимӕ иудзинады кӕй стут, уымӕ гӕсгӕ ӕдзухдӕр цин кӕнут. Ӕмӕ ма уын ноджыдӕр зӕгъын: цин кӕнут! Уе ’мбаргӕдзинадӕй уӕ зонӕд алчидӕр» (Фил. 4:4, 5). Цӕмӕй цингӕнгӕйӕ Хуыцауӕн лӕггад кӕнӕм, уый тыххӕй хъуамӕ ӕмбаргӕ уӕм, стӕй хъуыды кӕнӕм нӕ уавӕртыл ӕмӕ, нӕ бон цы у ӕмӕ цы нӕу, ууыл. Нӕ бон цы нӕу, уый сӕххӕст кӕныныл цыфӕндыйӕ дӕр куы архайӕм, уӕд нӕхицӕн ӕнӕхъуаджы зын скӕндзыстӕм. Фӕлӕ хъуамӕ нӕхицӕн ӕгӕр ма тӕригъӕд кӕнӕм ӕмӕ ’фсӕнттӕ ма агурӕм, раздӕримӕ абаргӕйӕ къаддӕр кӕй лӕггад кӕнӕм, уымӕн.

Цыфӕнды уавӕры ма уӕм, уӕддӕр Йегъовӕйы фӕнды, цӕмӕй йын дӕттӕм, хуыздӕрӕй нӕм цы ис, уый – ӕппӕт удӕй ӕмӕ йын ӕппӕт зӕрдӕйӕ лӕггад кӕнӕм (Кол. 3:23, 24). Хуыздӕрӕй нӕм цы ис, уый кӕд Йегъовӕйӕн нӕ дӕттӕм, уӕд ын цы дзырд радтам, уымӕ гӕсгӕ нӕ цӕрӕм (Ром. 12:1). Уымӕй уӕлдай ма нӕхи цух кӕнӕм, Йегъовӕйӕн ӕппӕт удӕй чи лӕггад кӕны, уыдон цы арфӕдзинӕдтӕй хайджын сты, цы удӕнцой ӕмӕ цы циндзинад ӕвзарынц, уыдӕттӕй (Ӕмб. 10:22).

Библийы дзырд «ӕмбаргӕ»-йӕ цы дзырд ратӕлмац кодтой, уымӕн йӕ хъуыды у «уӕздан», «фӕлмӕн» (Иак. 3:17). Ис ма йын ахӕм хъуыды дӕр, адӕймаг ӕгӕр домаг кӕй ма хъуамӕ уа. Уӕдӕ ӕмбаргӕ куы уӕм, уӕд нӕ уавӕртӕм раст цӕстӕй кӕсдзыстӕм. Уый зын у? Иуӕй-иутӕн зын у, кӕд сӕхӕдӕг иннӕты уавӕры бацӕуынц, уӕддӕр. Зӕгъӕм, дӕ хорз ӕмбал бирӕ кусы ӕмӕ ӕдзух фӕлмӕст ӕмӕ фӕллад вӕййы. Нӕ йын зӕгъдзынӕ, цӕмӕй иу гыццыл йӕхиуыл дӕр ахъуыды  кӕна? Афтӕ мах дӕр хъуамӕ нӕхимӕ кӕсын сахуыр уӕм, цӕмӕй-иу бамбарӕм, мыййаг, нӕ бон цы у, уымӕй фылдӕр нӕ аразӕм (Ӕмб. 11:17).

Нӕ бон цы у ӕмӕ цы нӕу, уымӕ раст цӕстӕй кӕсын уӕлдай зын у, кӕд нӕ нӕ ныййарджытӕ ӕгӕр бирӕ домдтой, уӕд. Иуӕй-иутӕм гыццылӕй афтӕ каст, ӕмӕ сӕ цӕмӕй сӕ ныййарджытӕ уарзой, уый тыххӕй, сӕ бон цы нӕ уыд, уый дӕр кӕй хъуамӕ арӕзтаиккой. Кӕд махӕй дӕр уый зӕгъӕн ис, уӕд, ӕвӕццӕгӕн, афтӕ хъуыды кӕнӕм, ӕмӕ нӕм Йегъовӕ дӕр ахӕм цӕстӕй кӕсы. Йегъовӕ нӕ уарзы, ӕппӕт зӕрдӕйӕ йын кӕй лӕггад кӕнӕм, уый тыххӕй. Хуыцауы Ныхас нын дзуры, Йегъовӕ «хорз [кӕй] зоны, цӕмӕй конд стӕм, уый, сыджыт кӕй стӕм, уый дзы рох нӕу» (Пс. 103:14). Йегъовӕ зоны, нӕ бон цы у ӕмӕ цы нӕу, уый дӕр, стӕй нӕ уавӕртӕ дӕр. Ӕмӕ нӕ уарзы, зындзинӕдтӕ ӕвзаргӕйӕ дӕр ыл нӕ зӕрдӕ кӕй нӕ ивӕм, уый тыххӕй. Нӕ Хуыцау ӕгъатыр ӕлдары хуызӕн кӕй нӕу, уый нӕ зӕрдыл куы дарӕм, уӕд бонзонгӕ уыдзыстӕм ӕмӕ нӕ бон цы нӕу, уый нӕхицӕй нӕ домдзыстӕм (Мих. 6:8).

Фӕлӕ уӕддӕр бирӕтӕн ӕнцон нӕу, цӕмӕй ӕмбаргӕ уой. Кӕд дӕуӕй дӕр афтӕ зӕгъӕн ис, уӕд хорз нӕ уаид, дзӕбӕх дӕ чи зоны, ахӕм фӕлтӕрд ӕфсымӕр кӕнӕ хоимӕ куы аныхас кӕнис? (Ӕмб. 27:9). Зӕгъӕм, фӕнды дӕ ӕххӕстрӕстӕг пионерӕй лӕггад кӕнын. Тынг хорз хъуыды у! Фӕлӕ дӕуӕн, дӕ къухы ӕнцонтӕй чи нӕ бафта, ахӕм фӕнд у мыййаг? Уый тыххӕй дӕ, чи зоны, бахъӕуа дӕ цард фӕхуымӕтӕгдӕр кӕнын. Цымӕ дӕ бинонты уавӕр зонгӕйӕ ныр дӕ бон уаид райдайын пионерӕй лӕггад кӕнын? Цӕуылнӕ ис аныхас кӕнӕн уый фӕдыл, кӕуыл ӕууӕндыс, ахӕм хо кӕнӕ ӕфсымӕримӕ? Уый дын баххуыс кӕндзӕн, цӕмӕй бамбарай, дӕ бон суыдзӕн ӕви нӕ. Кӕнӕ ма фендзынӕ, цы уаид аивӕн дӕ уавӕрты, цӕмӕй дӕ бон суа фылдӕр лӕггад кӕнын. Лӕгӕн йӕ бон у йӕ усӕн баххуыс кӕнын, цӕмӕй йӕ хъуыддӕгтӕ пълан кӕна йӕ хъарутӕм гӕсгӕ. Зӕгъӕм, ахӕм уынаффӕ йын ратта, ӕмӕ йӕ фылдӕр цы мӕй фӕнды балӕггад кӕнын, уый размӕ мӕй баулӕфа. Уӕд ӕм фаг хъару уыдзӕн ӕмӕ йӕ лӕггадӕй йӕ зӕрдӕ рухс кӕндзӕн.

Ахъуыды кӕн, дӕ бон цы у саразын, ууыл

Азтӕ дыл сӕ уӕз кӕй ӕруагътой, кӕнӕ дӕ низ кӕй тыхсын кӕны, уымӕ гӕсгӕ, чи зоны, дӕ бон Йегъовӕйӕн бирӕ лӕггад кӕнын нӕу. Кӕд дын гыццыл сывӕллӕттӕ ис, уӕд дӕм, гӕнӕн ис, афтӕ кӕса, ӕмӕ дӕхӕдӕг Библи куы фӕахуыр кӕныс, уӕд дӕ хъуыдытӕ адзӕгъӕл вӕййынц кӕнӕ фембӕлдты рӕстӕджы лӕмбынӕг нӕ фӕхъусыс, уымӕн ӕмӕ дӕ рӕстӕг ӕмӕ дӕ хъарутӕ иууылдӕр дӕ сывӕллӕттыл цӕуынц. Фӕлӕ цымӕ дӕ бон цы нӕу, уыдӕттыл ӕгӕр бирӕ кӕй хъуыды кӕныс, уый дӕ арӕх нӕ фӕхъыгдары, дӕ бон саразын цы у, уый фенын?

Цалдӕр миназы размӕ иу левит дзырдта, тынг кӕмӕ бӕллыд, фӕлӕ чи никуы сӕххӕст уыдаид, ахӕм хъуыддагыл. Афӕдзы мидӕг-иу ӕм иу хатт ӕрхауд стыр кад – дыууӕ къуыри-иу лӕггад кодта кувӕндоны.  Фӕлӕ йӕ фӕндыд, ныводхӕссӕны раз алы бон дӕр куы лӕггад кодтаид ӕмӕ уымӕй раппӕлинаг уыд (Пс. 84:1–3). Уыцы иузӕрдион левитӕн цы баххуыс кодта, цӕмӕй йӕ циндзинад ма фесӕфтаид? Уый бамбӕрста, кувӕндоны кӕртыты иу бон арвитын дӕр стыр кад кӕй у (Пс. 84:4, 5, 10). Раст афтӕ мах дӕр, нӕ бон цы нӕу, ууыл хъуамӕ ма хъуыды кӕнӕм, фӕлӕ нӕ уавӕрты нӕ бон саразын цы у, ууыл.

Цӕвиттонӕн райсӕм хо Нерланды, цӕры Канадӕйы. Нерланд у рынчын ӕмӕ ӕнӕ инвалиды коляскӕйӕ йӕ бон цӕуын нӕу. Уымӕ гӕсгӕ йӕм афтӕ каст ӕмӕ йӕ бон ӕппындӕр хъусын кӕнын нӕу. Фӕлӕ дзӕбӕх куы ахъуыды кодта, уӕд сфӕнд кодта, сӕ фарсмӕ цы стыр дукани уыд, уым хъусын кӕнын. Нерланд дзуры: «Дуканимӕ куы бацӕуын, уӕд ахӕм ран ӕрлӕууын, цӕмӕй мӕ бон уа аныхас кӕнын, йӕ фӕллад суадзынмӕ чи ’рбады, уыдонимӕ». Хорз хабар хъусын кӕныны хъуыддаджы кӕй архайы, уый Нерландӕн стыр циндзинад хӕссы.

Цӕттӕ у ивындзинӕдтӕ скӕнынмӕ

Дымгӕ науӕн йӕ пӕлӕзтӕ ныддымсы ӕмӕ йӕ размӕ фӕцӕйскъӕфы. Фӕлӕ тыхдымгӕ куы сысты, уӕд наутӕрӕджы бахъӕуы пӕлӕзтӕ стухын. Тыхдымгӕйыл йӕ бар нӕ цӕуы, фӕлӕ науыл йӕ бар цӕудзӕн, наупӕлӕзтӕ афоныл куы стуха, уӕд. Афтӕ махӕн дӕр хатт нӕ бар нӕ фӕцӕуы, цы зын уавӕрты бахауӕм, уыдоныл, фӕлӕ уӕддӕр нӕхицӕй дӕр бирӕ кӕнгӕ у. Уый баст у, нӕ тыхтӕ цӕуыл хардз кӕнӕм ӕмӕ цӕуыл хъуыды кӕнӕм, ууыл. Нӕ уавӕртӕ куыд сты, уымӕ гӕсгӕ куы архайӕм, уӕд дарддӕр дӕр Хуыцауӕн цингӕнгӕйӕ лӕггад кӕндзыстӕм (Ӕмб. 11:2).

Мӕнӕ цалдӕр хорз уынаффӕйы. Кӕд тагъд афӕллайӕм, уӕд хорз уаид, ӕмбырд нын куы вӕййы, уыцы бон-иу бирӕ хъуыддӕгтӕ куы нӕ пълан кӕниккам. Уӕд нӕм тыхтӕ уыдзӕн, цӕмӕй нӕ хотӕ ӕмӕ не ’фсымӕртимӕ зӕрдиагӕй фӕныхас кӕнӕм. Кӕнӕ хойӕн йӕ сывӕллон рынчын куы уа ӕмӕ йӕ бон хӕдзарӕй хӕдзармӕ хъусын кӕнын куы нӕ уа, уӕд йӕ бон уаид хотӕй искӕмӕн зӕгъын, цӕмӕй йӕм хӕдзармӕ ’рбацӕуа ӕмӕ, цалынмӕ сывӕллон фынӕй кӕна, уӕдмӕ адӕмимӕ телефонӕй аныхас кӕной.

Фембӕлды цы ’рмӕг ӕвзардзыстӕм, уый ӕнӕхъӕнӕй бацӕттӕ кӕнын дӕ дӕ уавӕртӕ куы нӕ амоной, уӕд цы бакӕнӕн ис? Ахъуыды кӕн, дӕ бон дзы цы у сахуыр кӕнын ӕмӕ йӕ стӕй бӕстон бацӕттӕ кӕн. Нӕ уавӕртӕм гӕсгӕ куы архайӕм, уӕд Хуыцауы  хъуыддӕгты фӕстейӕ нӕ зайдзыстӕм ӕмӕ нӕ циндзинад нӕ сафдзыстӕм.

Цӕмӕй нӕ уавӕртӕм гӕсгӕ архайӕм, уый тыххӕй нӕ хъӕуы ӕппӕт тыхтӕй архайын. Серж ӕмӕ Анье цӕрынц Францы. Уыдоны бахъуыд сӕ пълӕнттӕ фӕивын. «Тынг нӕ фӕндыд миссионертӕй лӕггад кӕнын, фӕлӕ базыдтам, сывӕллон нын кӕй уыдзӕн»,– загъта Серж. Ныр сын ис дыууӕ фӕрдыджы хуызӕн чызджы. Ацы бинонтӕ сӕ разы сӕвӕрдтой ног нысан. Серж радзырдта: «Фӕсарӕнтӕм ацӕуын нӕ бон кӕй не сси, уымӕ гӕсгӕ аскъуыддзаг кодтам, „миссионертӕй“ кӕй лӕггад кӕндзыстӕм нӕхи бӕстӕйы, ӕмӕ ахызтыстӕм, ӕндӕр ӕвзагыл кӕм дзурынц, ахӕм къордмӕ». Цымӕ афтӕ кӕй бакодтой, уымӕй райгонд сты? Серж дзуры: «Уынӕм ӕй, дзӕгъӕлы кӕй нӕ рахызтыстӕм ацы ’мбырдмӕ».

Хо Одиль цӕры Францы. Цӕуы йыл 70 азы. Йӕ уӕрджытӕ тынг риссынц ӕмӕ йӕ бон бирӕ лӕууын нӕу. Одиль тынг мӕт кодта, йӕ низы тыххӕй йӕ бон кӕй нӕ уыд хӕдзарӕй хӕдзармӕ хъусын кӕнын. Фӕлӕ йӕ ныфс нӕ асаст. Уый аскъуыддзаг кодта, кӕй хъусын кӕндзӕн телефонӕй. Одиль зӕгъы: «Телефонӕй хъусын кӕнын, куыд ӕнхъӕл уыдтӕн, уымӕй ӕнцондӕр разынд ӕмӕ тынг райгонд дӕн». Афтӕ хъусын кӕнын кӕй райдыдта, уый фӕрцы та дзы ныфс бацыд ӕмӕ та адӕмӕн зӕрдиагӕй дзуры хорз хабар.

Ӕмбаргӕйӕ куы архайай, уӕд арфӕгонд уыдзынӕ

Нӕ бон цы у аразын, уымӕ раст цӕстӕй куы кӕсӕм, уӕд нӕхи бахиздзыстӕм ӕнӕхъуаджы мӕтӕй. Нӕхицӕй ӕгӕр бирӕ куы нӕ домӕм, уӕд нӕ фӕндтӕ нӕ къухы ӕфтдзысты ӕмӕ райгонд уыдзыстӕм цыфӕнды зын уавӕрты дӕр. Цы сарӕзтам, ууыл цин кӕндзыстӕм, кӕд бирӕ нӕ уа, уӕддӕр (Гал. 6:4).

Нӕхицӕй ӕгӕр бирӕ куы нӕ домӕм, уӕд нӕ хоты ӕмӕ не ’фсымӕрты хуыздӕр ӕмбардзыстӕм. Сӕ уавӕртӕ сын куы зонӕм, уӕд сӕ алкӕддӕр бузныг уыдзыстӕм, цы нын аразынц, уый тыххӕй. Хотӕ ӕмӕ нын ӕфсымӕртӕ цыфӕнды гыццыл ӕххуыс дӕр куы бакӕной, ӕмӕ сӕ уый тыххӕй бузныг куы уӕм, уӕд ахъаз кӕндзыстӕм ӕмбырды иудзинадӕн ӕмӕ кӕрӕдзи хуыздӕр ӕмбардзыстӕм (1 Пет. 3:8). Рох нӕ ма уӕд, нӕ уарзӕгой Фыд Йегъовӕ нӕ, нӕ бон цы у, уымӕй фылдӕр кӕй никуы фӕдомы. Ӕмбаргӕ куы уӕм ӕмӕ нӕхицӕй ӕгӕр бирӕ куы нӕ домӕм, уӕд райгонд уыдзыстӕм ӕмӕ нӕ циндзинад нӕ сафдзыстӕм.

[Хицӕнгонд текст 29 фарсыл]

Цӕмӕй цингӕнгӕйӕ Хуыцауӕн лӕггад кӕнӕм, уый тыххӕй хъуамӕ ӕмбаргӕ уӕм, стӕй хъуыды кӕнӕм нӕ уавӕртыл ӕмӕ, нӕ бон цы у ӕмӕ цы нӕу, ууыл

[Ныв 30 фарсыл]

Нерланд цин кӕны, йӕ бон цы у, уый кӕй аразы, ууыл

[Ныв 31 фарсыл]

Ахуыр кӕн афоныл «наупӕлӕзтӕ тухын»

[Барлӕвӕрдӕй]

© Wave Royalty Free/​age fotostock

[Ныв 32 фарсыл]

Серж ӕмӕ Анье сӕ пълӕнттӕ фӕивтой ӕмӕ арфӕгонд ӕрцыдысты