Ахуыргӕнинӕгтӕ цӕттӕ кӕнын дын циндзинад хӕссӕд

«Ацӕут ӕмӕ... цӕттӕ кӕнут ахуыргӕнинӕгтӕ» (МАТФ. 28:19).

1–3. а) Бирӕтӕ цы цӕстӕй кӕсынц, искӕимӕ сын Библи ахуыр кӕнынӕн фадат кӕй ис, уымӕ? ӕ) Цавӕр фарстытыл аныхас кӕндзыстӕм?

«ФӔСТАГ дыууӕ мӕйы ӕмӕ ӕрдӕг Библи ахуыр кодтон Пакистанӕй иу бинонтимӕ»,– ныффыста иу хо Америкӕйы Иугонд Штаттӕй. Уыцы хо лӕггад кӕны хиндийы ӕвзагыл дзурӕг къорды. «Уыцы бинонтимӕ тынг балымӕн стӕм,– дзуры дарддӕр уый.– Мӕ зӕрдӕ суынгӕг вӕййы, тагъд фӕстӕмӕ Пакистанмӕ кӕй ацӕудзысты, ууыл куы фӕхъуыды кӕнын, уӕд. Ӕз ӕрмӕст уый тыххӕй нӕ кӕуын, ацӕуой, уый мӕ кӕй нӕ фӕнды, фӕлӕ мын семӕ Йегъовӕйы тыххӕй ныхас кӕнын цы стыр циндзинад хӕссы, уый тыххӕй дӕр».

² Адӕймаг Библи искӕимӕ куы фӕахуыр кӕны, уӕд ын уый ӕрхӕссы стыр циндзинад. Искуы ды дӕр нӕ хойау ахӕм циндзинад банкъардтай? Фыццаг ӕнусы Йесо Чырысти ӕмӕ йӕ фӕдылдзӕуджытӕн стыр циндзинад хаста ахуыргӕнинӕгтӕ цӕттӕ кӕнын. Уыцы хъуыддаг куыд кӕнын хъӕуы, уый Йесо ӕвдай ахуыргӕнинагӕн бацамыдта ӕмӕ сӕ стӕй хъусын кӕнынмӕ арвыста. Ахуыргӕнинӕгтӕ фӕстӕмӕ цингӕнгӕ куы ӕрыздӕхтысты ӕмӕ йын се ’нтыстыты тыххӕй куы радзырдтой, уӕд Йесойӕн йӕхиуыл дӕр «ӕрцыд сыгъдӕг уд ӕмӕ йӕ зӕрдӕ цинӕй байдзаг» (Лук. 10:17–21). Афтӕ абон дӕр бирӕтӕн стыр циндзинад хӕссы, ахуыргӕнинӕгтӕ кӕй цӕттӕ кӕнынц, уый. Уымӕн хорз бӕлвырдгӕнӕн у, 2007 азы хъусынгӕнджытӕн цы бантыст, уый:  алы мӕй дӕр Библи ахуыр кодтой 6,5 милуан адӕймагимӕ!

³ Фӕлӕ иуӕй-иу хъусынгӕнджытӕ Библи никуы никӕимӕ ахуыр кодтой. Чидӕртӕ та ныр бирӕ азты дӕргъы никӕимӕуал ахуыр кӕнынц Библи. Цавӕр зындзинӕдтыл сӕмбӕлӕм, искӕимӕ нӕ Библи ахуыр кӕнын райдайын куы фӕфӕнды, уӕд? Куыд ахизӕм уыцы зындзинӕдты сӕрты? Ӕмӕ цавӕр арфӕдзинӕдтӕй схайджын уыдзыстӕм, нӕ бон цы у, уый куы аразӕм, цӕмӕй ӕххӕст кӕнӕм Йесойы фӕдзӕхст, «ацӕут ӕмӕ... цӕттӕ кӕнут ахуыргӕнинӕгтӕ», зӕгъгӕ? (Матф. 28:19).

Цӕй аххосӕй фесӕфы нӕ циндзинад?

4, 5. а) Иуӕй-иу рӕтты нын бирӕтӕ нӕ хъуыддагмӕ цы цӕстӕй кӕсынц? ӕ) Ӕндӕр рӕтты та хъусынгӕнджытӕ цавӕр зындзинӕдтыл ӕмбӕлынц?

⁴ Иуӕй-иу рӕтты адӕм зӕрдиагӕй исынц нӕ литературӕ ӕмӕ ахуыр кӕнынц Библи. Австралийӕ иу бинонтӕ, лӕг ӕмӕ ус, рӕстӕгмӕ лӕггад кодтой Замбийы. Мӕнӕ цы ныффыстой уыдон: «Ӕцӕгдӕр, Замбийы адӕймаг хъусын кӕнынӕй не ’фсӕды. Уынгты хъусын кӕнын у стыр диссаг! Адӕм нӕм сӕхӕдӕг бацӕуынц, иуӕй-иутӕ та фӕкурынц нӕ журналтӕй бӕлвырд кӕцыдӕр номыртӕ». Фӕстаг азтӕй иуы Замбийы нӕ хотӕ ӕмӕ не ’фсымӕртӕ Библи ахуыр кодтой 200 мин адӕймагӕй фылдӕримӕ – рӕстӕмбис нымадӕй алы хъусынгӕнӕг дӕр уагъта иу библион ахуырӕй фылдӕр.

⁵ Фӕлӕ иннӕ рӕтты та хъусынгӕнджытӕм литературӕ парахат кӕнын ӕмӕ иудадзыг Библи искӕимӕ ахуыр кӕнын зын кӕсы. Цӕмӕн? Уымӕн ӕмӕ адӕмы арӕх сӕ хӕдзӕртты нӕ баййафынц. Хӕдзары чи вӕййы, уыдон та, гӕнӕн ис, ӕмӕ динмӕ уазал цӕстӕй кӕсой. Уыдон, чи зоны, схъомыл сты, Хуыцауыл чи не ’ууӕнды, ахӕм бинонты ’хсӕн кӕнӕ та сын дин фенад мӕнг динты цӕстмӕ миты тыххӕй. Бирӕтӕн мӕнг фыййӕуттӕ сӕ зӕрдӕтӕ фӕриссын кодтой, бафхӕрдтой сӕ ӕмӕ сӕ дзӕгъӕл ныууагътой (Матф. 9:36). Уӕдӕ диссаг нӕу, ахӕм адӕймӕгты Библийыл ныхас кӕнын кӕй нал фӕфӕнды.

6. Цавӕр зындзинӕдтыл ӕмбӕлынц иуӕй-иу хъусынгӕнджытӕ?

⁶ Иуӕй-иу хъусынгӕнджытӕ та ӕмбӕлынц ӕндӕр зындзинӕдтыл, ӕмӕ уый тыххӕй, гӕнӕн ис, сӕ циндзинад дӕр фесафой. Уыдон раздӕр бирӕ ахуыргӕнинӕгтӕ цӕттӕ кодтой, фӕлӕ ныр сӕ бон нал у, уымӕн ӕмӕ се ’нӕниздзинад фӕцудыдта кӕнӕ сыл азтӕ сӕ уӕз ӕруагътой. Уымӕй уӕлдай ма, гӕнӕн ис, ӕмӕ нӕхӕдӕг нӕхи къуылымпы кӕнӕм. Зӕгъӕм, афтӕ дӕм кӕсы, ӕмӕ искӕимӕ Библи ахуыр кӕнынмӕ нӕ сарӕхсдзынӕ. Чи зоны, дӕхи хатыс, Йегъовӕ Моисейы фараонимӕ ныхас кӕнынмӕ куы ’рвыста, уӕд Моисей йӕхи куыд хатыд, афтӕ. Моисей загъта: «Ныххатыр мын кӕн, Йегъовӕ, фӕлӕ ӕз дзурынмӕ дӕсны нӕ дӕн. Нӕ уыдтӕн ахӕм нӕдӕр знон, нӕдӕр уый размӕ» (Рац. 4:10). «Ӕз нӕ сарӕхсдзынӕн» ӕмӕ «ницы мын рауайдзӕн» – ацы дыууӕ хъуыддаджы кӕрӕдзийӕ дард нӕ лӕууынц. Чи зоны, ӕмӕ мӕт кӕнӕм, зӕгъгӕ, Библи кӕимӕ ахуыр кӕнӕм, уый Чырыстийы ахуыргӕнинаг никуы суыдзӕн, уымӕн ӕмӕ хорз ахуыргӕнджытӕ не стӕм. Уымӕй тӕрсгӕйӕ адӕймагимӕ Библи ахуыр кӕнын нӕ райдайӕм, фадат нын куы фӕвӕййы, уӕд дӕр. Ахӕм зындзинӕдты сӕрты нӕ бон хизын куыд у?

Дӕ зӕрдӕ бацӕттӕ кӕн

7. Йесойы хъусын кӕнын цӕмӕн фӕндыд?

⁷ Фыццаг уал хъуамӕ бацӕттӕ кӕнӕм нӕ зӕрдӕтӕ. Йесо загъта: «Адӕймаг, йӕ зӕрдӕйы цы вӕййы, дзургӕ дӕр уый фӕкӕны» (Лук. 6:45). Йесойы хъусын кӕнын уымӕн фӕндыд, ӕмӕ адӕмыл зӕрдӕйӕ тыхст. Зӕгъӕм, куы федта, ӕмӕ йӕ адӕм, дзуттӕгтӕ, Хуыцауӕй тынг дард сты, уӕд сын «фӕтӕригъӕд кодта». Йӕ ахуыргӕнинӕгтӕн загъта: «Кӕрдинаг бирӕ ис... курут хуымы Хицауӕй, цӕмӕй йӕ хуыммӕ кусджытӕ рарвита» (Матф. 9:36–38).

8. а) Хорз цӕуыл уаид ахъуыды кӕнын? ӕ) Цы у нӕ бон базонын, Библи чи ахуыр кӕны, иу ахӕм сылгоймаджы ныхӕстӕй?

⁸ Кӕд ахуыргӕнинӕгтӕ цӕттӕ кӕныны хъуыддаджы архайӕм, уӕд хорз уаид, арф куы ахъуыды кӕниккам, цы стыр арфӕдзинӕдтӕ нын ӕрхаста, чидӕр немӕ Библи ахуыр кӕнынӕн рӕстӕг кӕй ссардта, уый. Ноджыдӕр-ма ахъуыды кӕнӕм, уацамынды кӕуыл фембӕлдзыстӕм, уыцы адӕмыл ӕмӕ сын цы хабар хъусын кӕнӕм, уымӕ куы байхъусой, уӕд сын уый цы арфӕдзинӕдтӕ ӕрхӕсдзӕн, ууыл. Иу сылгоймаг ныффыста, кӕм цӕры, уыцы бӕстӕйы филиалмӕ: «Фӕнды мӕ зӕгъын, куыд тынг бузныг дӕн, хӕдзармӕ мӕм Библи ахуыр кӕнынмӕ чи цӕуы, уыцы Ӕвдисӕнтӕй. Зонын ӕй, хатт сын мемӕ зын кӕй вӕййы, уымӕн ӕмӕ мӕм бирӕ фарстытӕ вӕййы ӕмӕ сӕ алы хатт дӕр бафӕстиат кӕнын. Фӕлӕ мыл уыдон никуы бахъуыр-хъуыр кӕнынц ӕмӕ сӕхӕдӕг цы зонынц, уый мын зӕрдиагӕй амонынц. Ӕз бузныг  дӕн Йегъовӕ ӕмӕ Чырыстийӕ, уыцы адӕм мӕм кӕй ӕрбацыдысты».

9. Йесо сӕйраджыдӕр цӕуыл хъуыды кодта ӕмӕ йӕ нӕ бон куыд у фӕзмын?

⁹ Раст у, кӕд Йесо адӕмӕн баххуыс кӕныныл архайдта, уӕддӕр ын йӕ ныхӕстӕ алчи нӕ айста йӕ зӕрдӕмӕ (Матф. 23:37). Иуӕй-иутӕ цасдӕр рӕстӕг йӕ фӕдыл цыдысты, фӕлӕ йӕ ныхӕстӕй цыдӕр сӕ зӕрдӕмӕ нӕ фӕцыд, ӕмӕ «йемӕ нал цыдысты» (Иоан. 6:66). Фӕлӕ уый тыххӕй Йесо афтӕ нӕ ахъуыды кодта, ӕмӕ, цы хабар хъусын кодта, уый никӕй хъӕуы. Цы мыггӕгтӕ тыдта, уыдонӕн кӕд сӕ фылдӕр тыллӕг не ’рхастой, уӕддӕр Йесо сӕйраджыдӕр хъуыды кодта, хорзӕй цы арӕзта, ууыл. Уый уыдта, хуымтӕ кӕй фӕбур сты ӕмӕ цӕттӕ кӕй сты кӕрдынмӕ ӕмӕ тынг цин кодта, уыцы хуымтӕ кӕрдынӕн кӕй ӕххуыс кӕны. (Бакӕс Иоанны 4:35, 36.) Уӕдӕ хуыздӕр нӕ уаид, кӕм хъусын кӕнӕм, уым ӕфсирты ’хсӕн цы афтид зӕхх ис, мах дӕр уымӕ куы нӕ кӕсиккам, фӕлӕ дзы цы тыллӕг сисӕн ис, ууыл куы хъуыды кӕниккам? Цӕй аныхас кӕнӕм, нӕ бон цы у аразын, цӕмӕй ацы хъуыддагмӕ раст цӕстӕй кӕсӕм.

Тау, цӕмӕй ӕркӕрдай

10, 11. Цӕмӕй дӕ циндзинад ма фесафай, уый тыххӕй дӕ бон цы у аразын?

¹⁰ Зӕхкусӕг мыггаг уымӕн фӕтауы, цӕмӕй тыллӕг сиса. Афтӕ мах дӕр уымӕн фӕхъусын кӕнӕм, цӕмӕй искӕимӕ Библи ахуыр кӕнын райдайӕм. Фӕлӕ зӕгъӕм, хъусын кӕнынмӕ арӕх цӕуыс, ӕмӕ уӕддӕр бирӕты хӕдзары нӕ баййафыс, кӕнӕ та иу хатт семӕ аныхас кӕныс, ӕмӕ сыл уый фӕстӕ нал фӕхӕст кӕныс. Адӕймагӕн уый йӕ ныфс дӕр асӕтты. Ӕмӕ уӕд хъуамӕ хӕдзарӕй хӕдзармӕ мауал хъусын кӕнай? Куыннӕ хъуамӕ! Йегъовӕйы Ӕвдисӕнтӕ рагӕй фӕстӕмӕ дӕр хъусын кӕнынц хӕдзарӕй хӕдзармӕ ӕмӕ уый фӕрцы абоны онг дӕр бирӕтӕ базонынц рӕстдзинад.

¹¹ Фӕлӕ уӕддӕр цӕмӕй дӕ циндзинад ма фесафай, уый тыххӕй дӕ бон у, ӕмӕ хъусын кӕнай ӕрмӕст хӕдзарӕй хӕдзармӕ нӕ, фӕлӕ ма ӕндӕр искуыд дӕр. Зӕгъӕм, искуы адӕмӕн уынджы кӕнӕ та, кӕм кусынц, уым хъусын кодтай? Искуы телефонӕй хъусын кодтай кӕнӕ-иу хорз хабары тыххӕй кӕмӕн радзырдтай, уыдонӕн-иу сӕ телефоны номыртӕ райстай, цӕмӕй ма-иу  уый фӕстӕ дӕр Хуыцауы Паддзахады тыххӕй дӕ бон уыдаид семӕ аныхас кӕнын? Хъусын кӕнгӕйӕ-иу дӕ къухтӕ куы нӕ ауадзай ӕмӕ алы уавӕрӕй дӕр куы пайда кӕнай, уӕд ссардзынӕ, Хуыцауы Паддзахады хабар йӕ зӕрдӕмӕ чи айсдзӕн, ахӕм адӕмы, ӕмӕ дын уый стыр циндзинад хӕсдзӕн.

Уазал цӕстӕй нӕм куы кӕсой

12. Нӕ территорийы цӕрӕг адӕм динмӕ уазал цӕстӕй куы кӕсой, уӕд цы ис бакӕнӕн?

¹² Кӕм хъусын кӕныс, уым адӕм динмӕ уазал цӕстӕй куы кӕсой, уӕд цы ис бакӕнӕн? Дӕ бон нӕ уаид дӕ ныхас афтӕ райдайын, цӕмӕй сын сӕ зӕрдӕтӕ бацагайай? Апостол Павел фыста йе ’мчырыстӕттӕм Коринфмӕ: «Дзуттӕгтӕн сдӕн дзуттаг... Закъоны дӕлбар чи нӕу, уыдонӕн сдӕн, цыма закъоны дӕлбар нӕ дӕн, афтӕ, кӕд Хуыцауы раз ӕнӕзакъон нӕ дӕн... уӕддӕр». Павелы уымӕ цы разӕнгард кодта? Мӕнӕ цы зӕгъы йӕхӕдӕг: «Алыхуызон адӕмӕн дӕр сдӕн алцыдӕр, цӕмӕй исты хуызы иуӕй-иуты уӕддӕр фервӕзын кӕнон» (1 Кор. 9:20–22). Нӕ территорийы цӕрӕг адӕмы цы цымыдис кӕны, ахӕм истӕуыл нӕ бон семӕ аныхас кӕнын у? Ӕнӕуырнджытӕй бирӕты фӕнды, сӕ бинонтӕ кӕрӕдзи хуыздӕр куы ’мбариккой. Чи зоны, цӕмӕн цӕрынц, уый дӕр нӕ зонынц. Цымӕ ахӕм адӕмӕн Паддзахады хабар нӕ бон афтӕ радзурын у, цӕмӕй йӕ сӕ зӕрдӕмӕ айсой?

13, 14. Цы у нӕ бон аразын, цӕмӕй нын ахуыргӕнинӕгтӕ цӕттӕ кӕныны хъуыддаг фылдӕр циндзинад хӕсса?

¹³ Фылдӕрӕй-фылдӕр кӕны, ахуыргӕнинӕгтӕ цӕттӕ кӕныны хъуыддаг стырдӕр цин кӕмӕн хӕссы, уыцы хъусынгӕнджыты нымӕц. Ӕмӕ уый афтӕ у, адӕмӕн сӕ фылдӕр динмӕ уазал цӕстӕй кӕм кӕсынц, суанг уыцы рӕтты дӕр. Цӕй руаджы? Фӕсарӕйнаг ӕвзаг кӕй ахуыр кӕнынц, уый руаджы. Иу ӕфсымӕр ӕмӕ хо, лӕг ӕмӕ ус (цӕуы сыл 60 азтӕ), бафиппайдтой, се ’мбырды территорийы кӕй цӕры мингай китайаг студенттӕ сӕ бинонтимӕ. «Уымӕ гӕсгӕ мах бафӕндыд китайаг ӕвзаг сахуыр кӕнын,– дзуры лӕг.– Кӕд нын ӕвзаг ахуыр кӕныныл алы бон дӕр гыццыл рӕстӕг нӕ цӕуы, уӕддӕр китайӕгтӕй бирӕтимӕ Библи ахуыр кӕнын райдыдтам».

¹⁴ Дӕ бон фӕсарӕйнаг ӕвзаг сахуыр кӕнын куы нӕ уа, уӕддӕр ӕндӕр ӕвзагыл дзурӕг адӕймагыл фембӕлгӕйӕ дӕ бон у пайда кӕнын брошюрӕйӕ «Хорз хабар ӕппӕт адӕмтӕн дӕр». Хорз ма уаид, кӕуыл амбӕлыс, уыцы адӕмы ӕвзӕгтыл литературӕ куы сзаказ кӕнис. Ӕцӕгдӕр, бирӕ рӕстӕг ӕмӕ тыхтӕ хъӕуы, ӕндӕр ӕвзагыл чи дзуры ӕмӕ ӕндӕр ӕгъдӕуттыл хӕст чи у, уыцы адӕмимӕ ныхас кӕнынӕн. Фӕлӕ рох кӕнын нӕ хъӕуы, Хуыцауы Ныхасы цы уагӕвӕрд ис, уый: «Рӕдау тауӕг... кӕрдгӕ дӕр ӕркӕндзӕн рӕдауӕй» (2 Кор. 9:6).

Уыцы хъуыддаджы архайы ӕгас ӕмбырд дӕр

15, 16. а) Ахуыргӕнинӕгтӕ цӕттӕ кӕнын ӕгас ӕмбырды хъуыддаг цӕмӕн у? ӕ) Цавӕр ӕххуыс сты ацӕргӕтӕ ахуыргӕнинӕгтӕ цӕттӕ кӕныны хъуыддаджы?

¹⁵ Фӕлӕ адӕймаг Чырыстийы ахуыргӕнинаг ӕрмӕстдӕр иу адӕймаджы фыдӕбоны фӕрцы не свӕййы. Уыцы хъуыддаджы архайы ӕгас ӕмбырд дӕр. Цӕмӕн ис афтӕ зӕгъӕн? Йесо загъта: «Мӕ ахуыргӕнинӕгтӕ кӕй стут, уый адӕм иууылдӕр уымӕй базондзысты, ӕмӕ уе ’хсӕн уарзондзинад куы уа» (Иоан. 13:35). Ӕмӕ ӕцӕгдӕр, Библи чи ахуыр кӕны, уыдон фембӕлдтӕм куы ’рбацӕуынц, уӕд сӕ фылдӕрӕн сӕ зӕрдӕмӕ тынг фӕцӕуы, иууылдӕр кӕрӕдзи куыд уарзынц, уый. Библи чи ахуыр кӕны, иу ахӕм сылгоймаг ныффыста: «Тынг уарзын ӕмбырдтӕм цӕуын. Куыд зӕрдӕхӕлар ӕмӕ уазӕгуарзон адӕм сты!» Йесо загъта, зӕгъгӕ, йӕ фӕдыл чи цӕуа, уыдонӕн, гӕнӕн ис, ӕмӕ сӕхи бинонтӕ дӕр сӕ ныхмӕ цӕуой. (Бакӕс Матфейы 10:35–37.) Фӕлӕ зӕрдӕ бавӕрдта, ӕмбырды уыдон кӕй ссардзысты тынг бирӕ «ӕфсымӕртӕ, хотӕ, мадӕлтӕ, сывӕллӕттӕ» (Марчы 10:30).

¹⁶ Нӕ ацӕргӕ ӕфсымӕртӕ ӕмӕ хотӕ тынг стыр ӕххуыс сты, Библи чи ахуыр кӕны, уыдонӕн сӕ уырнындзинад фидар кӕнынӕн. Куыд? Кӕд уыдонӕй кӕмӕндӕрты сӕхи бон нӕу искӕимӕ Библи ахуыр кӕнын, уӕддӕр фембӕлдты хорз дзуаппытӕ кӕй фӕдӕттынц, уый бафидар кӕны, чи сӕм хъусы, уыдоны уырнындзинад. Уыдон «рӕстдзинады фӕндагыл» цӕуынц рагӕй. Ахӕм чырыстӕттӕ фидауын кӕнынц ӕмбырд ӕмӕ уыдонмӕ кӕсгӕйӕ сыгъдӕгзӕрдӕ адӕмы бафӕнды Хуыцауы организацимӕ ’рбацӕуын (Ӕмб. 16:31).

Ма тӕрсӕм ӕмӕ ныфсджынӕй размӕ цӕуӕм

17. Афтӕ нӕм куы кӕса, ӕмӕ нӕ бон искӕимӕ Библи ахуыр кӕнын нӕу, уӕд цы ис аразӕн?

¹⁷ Афтӕ дӕм куы кӕса, ӕмӕ дӕ бон искӕимӕ  Библи ахуыр кӕнын нӕу, уӕд цы ис аразӕн? Дӕ зӕрдыл-ма ӕрлӕууын кӕн, Йегъовӕ Моисейӕн куыд баххуыс кодта, уый: радта йын йӕ сыгъдӕг уд ӕмӕ йын йемӕ арвыста ӕмбал, йе ’фсымӕр Аароны (Рац. 4:10–17). Йесо йӕ фӕдылдзӕуджытӕн зӕрдӕ бавӕрдта, хъусын кӕныны хъуыддаджы сын сыгъдӕг уд кӕй ӕххуыс кӕндзӕн (Ап. хъ. 1:8). Уымӕй уӕлдай ма Йесо йӕ ахуыргӕнинӕгты хъусын кӕнынмӕ ӕрвыста дыгӕйттӕй (Лук. 10:1). Уӕдӕ дӕм кӕд искӕимӕ Библи ахуыр кӕнын зын кӕсы, уӕд Хуыцаумӕ кув, цӕмӕй дын йӕ сыгъдӕг уды фӕрцы ӕмбаргӕдзинад ратта, ӕмӕ хъусын кӕнынмӕ цу, дӕ ныфс дын чи бафидар кӕна ӕмӕ дын чи баххуыс кӕна, ахӕм фӕлтӕрд чырыстонимӕ. Бафидар ма дӕ кӕндзӕн уый дӕр, дӕ зӕрдыл куы дарай, Йегъовӕ ацы диссаджы хъуыддаг ӕххӕст кӕнынӕн барӕй кӕй равзӕрста хуымӕтӕг адӕймӕгты – «дунейы цӕсты лӕмӕгъ чи у, уыдоны» (1 Кор. 1:26–29).

18. Ахуыргӕнинагӕн мӕ бон баххуыс кӕнын нӕ бауыдзӕн, зӕгъгӕ, уымӕй куы тӕрсӕм, уӕд куыд бакӕнӕм?

¹⁸ Ахуыргӕнинагӕн мӕ бон баххуыс кӕнын нӕ бауыдзӕн, зӕгъгӕ, уымӕй куы тӕрсӕм, уӕд куыд бакӕнӕм? Хорз уаид, нӕ зӕрдыл куы дариккам, ӕмӕ ахуыргӕнинаг цӕттӕ кӕнын хӕринаг аразыны хуызӕн кӕй нӕу: хӕринаг рауайдзӕн ӕви нӕ, уый сӕйраджыдӕр аразгӕ у иу адӕймагӕй – пъовырӕй. Фӕлӕ ахуыргӕнинӕгтӕ цӕттӕ кӕныны хъуыддаджы ӕрмӕст мах нӕ архайӕм. Сӕйраджыдӕр Йегъовӕйӕ аразгӕ у, адӕймаг ӕм ӕрбацӕудзӕн ӕви нӕ, уый (Иоан. 6:44). Мах дӕр ӕмӕ, махӕй уӕлдай ӕмбырды чи ис, уыдон се ’ппӕтдӕр, сӕ бон цы у, уый аразынц, цӕмӕй ахуыргӕнинагӕн йӕ уырнындзинад фидар кӕнынӕн ӕххуыс кӕной. (Бакӕс 2 Тимофеймӕ 2:15.) Ахуыргӕнинӕгтӕ та хъуамӕ сӕ цард аразой, цы базонынц, уымӕ гӕсгӕ (Матф. 7:24–27). Адӕймаг Библи куы нал фӕахуыр кӕны, уӕд нын уый хатт тынг зын вӕййы. Кӕд нӕ ныфс ис, ӕмӕ ахуыргӕнинӕгтӕ раст фӕндаг равзардзысты, уӕддӕр «Хуыцауы раз алчидӕр йӕхи тыххӕй» ратдзӕн дзуапп (Ром. 14:12).

Цавӕр арфӕдзинӕдтӕй уыдзыстӕм хайджын?

19–21. а) Куыд нын ӕххуыс кӕны, адӕмимӕ Библи кӕй ахуыр кӕнӕм, уый? ӕ) Хорз хабар чи хъусын кӕны, уыдонӕй алкӕмӕ дӕр Йегъовӕ цы цӕстӕй кӕсы?

¹⁹ Адӕмимӕ Библи кӕй ахуыр кӕнӕм, уый нын ӕххуыс кӕны, цӕмӕй фыццаджыдӕр агурӕм Хуыцауы Паддзахад. Ацы хъуыддаг ма нын ӕххуыс кӕны, Хуыцауы Ныхасы цы фыст ис, уый нӕ зонд ӕмӕ нӕ зӕрдӕйы арфдӕр фидар кӕнынӕн. Куыд? Иу пионер-ӕфсымӕр, Барак, зӕгъгӕ, дзуры: «Библи адӕмимӕ кӕй ахуыр кӕныс, уый фӕрцы дӕхӕдӕг дӕр лӕмбынӕгдӕр иртасыс Хуыцауы Ныхас. Ӕз бамбӕрстон, фыццаг уал кӕй хъуамӕ фидар кӕнон мӕхи уырнындзинад, ӕмӕ уӕд мӕ бон уыдзӕн ӕндӕр искӕмӕн дӕр фидарӕй дзурын, цӕуыл ӕууӕндын, уыдӕтты тыххӕй».

²⁰ Кӕд Библи никӕимӕ ахуыр кӕныс, уӕд уый ууыл дзурӕг у, ӕмӕ Хуыцау дӕ лӕггадӕн нӕ аргъ кӕны? Нӕ, уый афтӕ нӕу! Йегъовӕ тынг аргъ кӕны, йӕ ном кадджын кӕныны тыххӕй цы аразӕм, уымӕн. Хорз хабар чи хъусын кӕны, уыдон иууылдӕр «кусынц Хуыцауимӕ». Фӕлӕ искӕимӕ Библи куы фӕахуыр кӕнӕм, уӕд нӕ циныл ноджы фылдӕр цин бафты, уымӕн ӕмӕ фӕуынӕм, цы мыггаг байтыдтам, уый Хуыцау куыд рӕзын кӕны, уый (1 Кор. 3:6, 9). Хо Эми лӕггад кӕны пионерӕй. Эми дзуры: «Ахуыргӕнинагӕн йӕ уырнындзинад куыд фидар кӕны, уый куы фӕуыныс, уӕд Йегъовӕйӕ тынг бузныг вӕййыс, дӕ фӕрцы уыцы адӕймагӕн кӕй радта диссаджы лӕвар – фадат, цӕмӕй йӕ базона ӕмӕ ӕнустӕм цӕра».

²¹ Адӕмимӕ Библи ахуыр кӕнын райдайыныл ӕмӕ сӕ дарддӕр ахуыр кӕныныл ӕппӕт тыхтӕй куы архайӕм, уӕд нын уый баххуыс кӕндзӕн, цӕмӕй нын абон Хуыцауӕн лӕггад кӕнынӕй сӕйрагдӕр мацы суа. Уый фӕрцы ма фидар кӕндзӕн нӕ ныфс дӕр, ног дунейы кӕй цӕрдзыстӕм, ууыл. Стӕй ма Йегъовӕйы фӕрцы баххуыс кӕндзыстӕм, чи нӕм хъусы, уыдонӕн дӕр. (Бакӕс 1 Тимофеймӕ 4:16.) Ӕвӕдза, куыд тынг цин кӕндзыстӕм, уӕд!

Бахъуыды кодтай?

• Иуӕй-иутӕн адӕмимӕ Библи ахуыр кӕнын зын цӕмӕн вӕййы?

• Афтӕ нӕм куы кӕса, ӕмӕ нӕ территорийы цӕрӕг адӕм динмӕ уазал цӕстӕй кӕсынц, уӕд цы ис бакӕнӕн?

• Цавӕр арфӕдзинӕдтӕй вӕййӕм хайджын, адӕмимӕ Библи куы фӕахуыр кӕнӕм, уӕд?

[Фарстатӕ ахуыр кӕнынӕн]

[Нывтӕ 9 фарсыл]

Цӕмӕй сыгъдӕгзӕрдӕ адӕмы ссарай, уый тыххӕй дӕ бон хъусын кӕнын куыд уаид?