«Ис рӕстӕг ӕнӕдзургӕйӕ лӕууынӕн»

ИУ РАГОН скӕсӕйнаг ӕмбисонд зӕгъы: «Дзурын ӕвзист у, нӕдзурын та сыгъзӕрин». Ахӕм ӕмбисонд ма ис дзуттаг адӕммӕ дӕр. Иу чиныджы куыд фыст ис, афтӕмӕй уый дзуры: «Кӕд дзурын иу сиклы аргъ у, уӕд нӕдзурын та – дыууӕ сиклы аргъ» («Brewer’s Dictionary of Phrase and Fable»). Рагон Израилы зондджын паддзах Соломон фыста: «Алцӕмӕн дӕр ис йӕхи афон, арвы бын алы хъуыддагӕн дӕр ис йӕхи рӕстӕг... ис рӕстӕг ӕнӕдзургӕйӕ лӕууынӕн ӕмӕ ис рӕстӕг дзурынӕн» (Еккл. 3:1, 7).

Уӕдӕ дзурынӕй нӕдзурын хуыздӕр кӕд у? Библийы дзырдтӕ «ӕнӕдзургӕйӕ лӕууын», «ницы дзурын», «хъусӕй лӕууын», «ӕнцад лӕууын», «сабыр рӕстӕг» ӕмӕ «хибар ран» ӕмбӕлынц сӕдӕ хаттӕй фылдӕр. Ацы дзырдтӕ цы скъуыддзӕгты ӕмбӕлынц, уыдонӕй хорз зыны, адӕймаг ӕнӕдзургӕйӕ лӕууа, мацы дзура, уый раст кӕй у царды ӕппынкъаддӕр ӕртӕ хъуыддаджы. Цӕй уӕдӕ лӕмбынӕгдӕр ӕркӕсӕм, адӕймаг ӕнӕдзургӕйӕ куы лӕууа, куы ницы дзура, уӕд уымӕй куыд ӕвдисдзӕн, иннӕтӕн кӕй аргъ кӕны, ӕмбаргӕ ӕмӕ арфуынӕг кӕй у, уый. Адӕймаг ма хибар ӕмӕ сабыр ран куы уа, уӕд ын уый ӕххуыс кӕндзӕн хъуыды кӕнынӕн.

Уымӕй ӕвдисӕм, иннӕтӕн кӕй аргъ кӕнӕм

Адӕймаг иннӕты раз ӕнӕдзургӕйӕ куы лӕууа, уӕд сын уымӕй гӕнӕн ис, ӕмӕ саргъ кӕна кӕнӕ та сын скад кӕна. Пехуымпар Аввакум загъта: «Йегъовӕ ис йӕ сыгъдӕг кувӕндоны. Йӕ разы мацы дзурут, ӕгас зӕххы цӕрджытӕ!» (Ав. 2:20). Хуыцауы ӕцӕг лӕггадгӕнджытӕ, «Йегъовӕ сӕ кӕд фервӕзын кӕндзӕн, уымӕ... ӕнхъӕлмӕ кӕсынц ӕнӕдзургӕйӕ» (Йер. хъ. 3:26). Псаломзарӕггӕнӕг зарыд: «Йегъовӕйы раз ӕнӕдзургӕйӕ лӕуу ӕмӕ йӕм зӕрдиагӕй ӕнхъӕлмӕ кӕс. Ма мӕсты кӕн, алцыдӕр кӕмӕн ӕнтысы, уымӕ» (Пс. 37:7).

Цымӕ нӕ бон у Йегъовӕйы афтӕ кадджын кӕнын, ӕмӕ иу ныхас дӕр ма зӕгъӕм? Куыннӕ ма! Зӕгъӕм, Хуыцауы къухты скондмӕ кӕсгӕйӕ афтӕ никуы бадис кодтай, ӕмӕ дӕ бон сдзурын дӕр нал уыди? Ӕрдзы рӕсугъддзинадыл хъуыды кӕнгӕйӕ цымӕ не Сфӕлдисӕджы нӕ зӕрдӕйы нӕ фӕкадджын кӕнӕм? Псаломзарӕггӕнӕг Давид йӕ зарджытӕй иу  райдыдта ахӕм ныхӕстӕй: «О Хуыцау, Сионыл дӕуӕн ӕмбӕлы кад, дӕ разы ӕмбӕлы ӕнӕдзургӕйӕ лӕууын. Цӕй тыххӕй дын расомы кодтам, уыдон сӕххӕст кӕндзыстӕм» (Пс. 65:1).

Йегъовӕ уый аккаг у, цӕмӕй йын йӕхицӕн дӕр аргъ кӕнӕм ӕмӕ йӕ ныхӕстӕн дӕр. Зӕгъӕм, Хуыцауы пехуымпар Моисей Израилы адӕмимӕ фӕстаг хатт куы ныхас кодта, уӕд йӕхӕдӕг дӕр ӕмӕ сауджынтӕ дӕр, уым чидӕриддӕр уыди, уыдонӕн загътой: «Ӕнцад байхъусут. [...] Уӕ Хуыцау Йегъовӕмӕ хъусут». Израилы фырттӕ-иу Хуыцауы Закъон кӕсынмӕ куы ӕрӕмбырд сты, уӕд-иу хъуамӕ лӕмбынӕг хъуыстаиккой суанг сӕ сывӕллӕттӕ дӕр. Моисей загъта: «Ӕрӕмбырд кӕнут адӕмы се ’ппӕты дӕр: нӕлгоймӕгты, сылгоймӕгты, сывӕллӕтты... цӕмӕй... ахуыр кӕной» (Дык. з. 27:9, 10; 31:11, 12).

Нӕ рӕстӕджы дӕр Йегъовӕйы лӕггадгӕнджытӕ хъуамӕ лӕмбынӕг хъусой, фембӕлдты ӕмӕ сын конгрессты цы амындтӕ фӕдӕттынц, уыдонмӕ. Сценӕйӕ Библийы ахсджиаг хабӕрттыл куы дзурой, мах та кӕрӕдзиимӕ куы ныхас кӕнӕм, уӕд цымӕ уый ууыл дзурӕг уыдзӕн, ӕмӕ Хуыцауы Ныхас ӕмӕ йӕ организацийӕн аргъ кӕнӕм? Программӕйы рӕстӕджы хъуамӕ ӕнцад бадӕм ӕмӕ хъусӕм.

Дыууӕ адӕймаджы куы ныхас кӕной ӕмӕ дзы иу иннӕмӕ лӕмбынӕг куы хъуса, уӕд уый дӕр ууыл дзурӕг у, кӕй йын аргъ кӕны. Зӕгъӕм, Иов, йӕ ныхмӕ чи дзырдта, уыдонӕн загъта: «Дзурут, ӕз та уӕм ӕнцад хъусдзынӕн». Уыдон куы дзырдтой, уӕд сӕм Иов сабырӕй хъуыста. Дзырды бар-иу ӕм куы ӕрхауди, уӕд-иу сын уӕзданӕй афтӕ бакодта: «Мӕ цуры мацыуал сдзурут, ныр та мӕнмӕ байхъусут!» (Иов 6:24; 13:13).

Уымӕй ӕвдисӕм, ӕмбаргӕ ӕмӕ арфуынӕг кӕй стӕм

Библи дзуры: «Йе ’взаджы рохтыл чи хӕцы, уый... у ӕмбаргӕ адӕймаг» ӕмӕ «арфуынӕг адӕймаг... никӕмӕн ницы радзуры» (Ӕмб. 10:19; 11:12). Зӕгъӕм, Йесо уыди тынг ӕмбаргӕ ӕмӕ арфуынӕг, хорз зыдта, дзурын кӕм хъуыд ӕмӕ кӕм нӕ хъуыд, уый. Йесо ӕмбӕрста, йӕ фыдзӕрдӕ знӕгты цур дзурын раст кӕй нӕ уыдзӕн, ӕмӕ уымӕ гӕсгӕ «ницы дзырдта» (Матф. 26:63). Фӕстӕдӕр, Пилаты раз куы уыди, уӕд дӕр Йесо «ӕппындӕр ницы сдзырдта». Йесо ӕмбаргӕдзинад равдыста ӕмӕ дзырды бар радта йӕ хъуыддӕгтӕн (Матф. 27:11–14).

Хорз уаид мах дӕр не ’взаджы рохтыл куы хӕциккам, уӕлдайдӕр та нӕ исчи куы мӕсты кӕна, уӕд. Иу ӕмбисонд афтӕ зӕгъы: «Йӕ маст уромын чи зоны, уый у ӕцӕг арфуынӕг адӕймаг, фӕразондзинад кӕмӕ нӕй, уый та йе ’нӕзонддзинад ӕвдисы» (Ӕмб. 14:29). Тыхст уавӕры дзуапп дӕттынмӕ чи тагъд кӕна, уымӕй ӕнӕрхъуыды ныхас дӕр сирвӕздзӕн. Ахӕм уавӕры нын исчи нӕ ныхӕстӕ ӕнӕзонд ныхӕстыл дӕр банымайдзӕн. Фӕстӕдӕр, чи зоны, фӕсмон дӕр фӕкӕнӕм ӕмӕ нӕ удӕнцой дӕр фесафӕм.

Ӕмбаргӕдзинад нын ӕххуыс кӕндзӕн, цӕмӕй фыдзӕрдӕ адӕмы цур уӕлдай мацы дзурӕм. Уацамынды ныл исчи куы худа, уӕд хуыздӕр уыдзӕн, куы ницы йӕм сдзуриккам. Уымӕй уӕлдай ма, не ’мкъласонтӕ кӕнӕ не ’мкусджытӕ ӕнӕгъдау хъазӕн ныхӕстӕ куы кӕной йе та ӕнӕфсарм дзыхӕй куы дзурой, уӕд зондыл дзурӕг уыдзӕн, сӕ ныхасмӕ сын ныхас куы нӕ ’ппарӕм, цӕмӕй афтӕ ма рауайа, ӕмӕ уыдӕттӕ нӕ зӕрдӕмӕ цӕуынц  (Еф. 5:3). Псаломфыссӕг загъта: «Мӕ дзыхыл гуыдыр сӕвӕрдзынӕн, цӕмӕй йӕ уромон, цалынмӕ мӕ разы фыдгӕнӕг уа, уӕдмӕ» (Пс. 39:1).

«Арфуынӕг адӕймаг» искӕй сусӕгдзинӕдтӕ не ’ргом кӕны (Ӕмб. 11:12). Ӕцӕг чырыстон йе ’взаджы рохтыл куы хӕца, уӕд нӕ дзурдзӕн, иннӕтӕн зонын чи не ’мбӕлы, ахӕм хабӕрттӕ. Хистӕр нӕлгоймӕгтӕ ацы хъуыддаджы хъуамӕ тынг къӕрцхъус уой ӕмӕ архайой, цӕмӕй сыл чырыстӕттӕй макӕй зӕрдӕ фӕхуда, се ’ууӕнк ма фесафой.

Ӕнӕ иу ныхасӕй дӕр ис адӕймаджы зӕрдӕ ссарӕн. 19 ӕнусы англисаг фыссӕг Сидней Смит йе ’мдуггӕгтӕй иуы тыххӕй ныффыста: «Иуӕй-иу хатт афтӕ дӕр вӕййы, ӕмӕ ницы фӕдзуры, ӕмӕ уӕд йемӕ ныхас кӕнынӕй адӕймаг ӕфсӕдгӕ дӕр нӕ фӕкӕны». Ӕцӕгдӕр, дыууӕ ’мбалы куы ныхас кӕной, уӕд кӕрӕдзийӕн хъуамӕ ныхасы бар дӕттой. Хорз ныхасӕмбал хъусын дӕр зоны.

«Бирӕ чи дзуры, уымӕн ӕнӕфӕрӕдийгӕ нӕй,– фӕдзӕхста Соломон,– йе ’взаджы рохтыл чи хӕцы, уый та у ӕмбаргӕ адӕймаг» (Ӕмб. 10:19). Уӕдӕ адӕймаг цас къаддӕр дзура, уыйас къаддӕр рӕдийдзӕн. Ӕцӕгдӕр, «ӕнӕзонд куы ницы фӕдзуры, уӕд уый дӕр зондджын фенхъӕлынц, ӕмӕ хъусӕй чи фӕлӕууы, уый дӕр иннӕтӕм ӕмбаргӕ фӕкӕсы» (Ӕмб. 17:28). Уымӕ гӕсгӕ Йегъовӕйӕ курӕм, цӕмӕй нын «нӕ дзыхтӕн... сӕвӕра дуаргӕстӕ» (Пс. 141:3).

Ӕххуыс хъуыды кӕнынӕн

Рӕстдзинады фӕндагыл чи цӕуы, уыцы адӕймаджы тыххӕй Фыстады фыст ис, зӕгъгӕ, Хуыцауы «закъон ӕхсӕвӕй-бонӕй сабыр хъӕлӕсӕй кӕсы» (Пс. 1:2). Ӕндӕр тӕлмацы та ацы стих у афтӕ: «Ахӕм ӕгъдау ӕм ис... ӕмӕ йын йӕ закъоныл... ӕхсӕвӕй-бонӕй хъуыды кӕны» («The Amplified Bible»). Цӕмӕй адӕймаг истӕуыл хъуыды кӕна, уый тыххӕй йын ӕппӕты хуыздӕр цы у?

Авраамы фырт Исахъ «изӕрӕй ацыд быдырмӕ, фӕндыди йӕ цӕуылдӕрты ахъуыды кӕнын» (Райд. 24:63). Уый хъуыды кӕнынӕн равзӕрста хибар ран ӕмӕ сабыр рӕстӕг. Паддзах Давид-иу хъуыды кодта ӕхсӕвы хъахъхъӕнӕн афонты, иу хъыпп-сыпп дӕр-иу куы никӕцӕй хъуысти, уӕд (Пс. 63:6). Кӕд Йесо ӕххӕст адӕймаг уыди, уӕддӕр-иу архайдта, цӕмӕй-иу иунӕгӕй баззадаид ӕмӕ-иу ахъуыды кодтаид. Уый-иу ацыд, адӕм кӕм нӕ уыд, уырдӕм, зӕгъӕм, хӕхтӕм, ӕдзӕрӕг быдырмӕ, йе та ӕндӕр хибар рӕттӕм (Матф. 14:23; Лук. 4:42; 5:16).

Бирӕтӕ зонынц, адӕймаг иуцасдӕр ӕнӕдзургӕйӕ куы абады, уӕд йӕхимӕ кӕй ӕрцӕуы. Ахӕм уавӕры йын ӕнцондӕр вӕййы йӕ зӕрдӕмӕ ныккӕсын,– уый та йӕ ӕнӕмӕнг хъӕуы, цӕмӕй йӕхиуыл куса ӕмӕ йӕ удыхъӕд хуыздӕр кӕна. Иунӕгӕй баззайынӕн-иу рӕстӕг куы ссарӕм, уӕд нын уый удӕнцой хӕсдзӕн. Хибар ран куы хъуыды кӕнӕм, уӕд нын уый ӕххуыс кӕндзӕн, цӕмӕй бонзонгӕ ӕмӕ сӕрныллӕг уӕм ӕмӕ тынгдӕр аргъ кӕнӕм, царды ӕцӕгдӕр ахсджиаг цы у, уымӕн.

Кӕд ӕнӕдзургӕйӕ лӕууын хорз у, уӕддӕр вӕййы «рӕстӕг дзурынӕн» (Еккл. 3:7). Абон Хуыцауы лӕггадгӕнджытӕ йӕ Паддзахады тыххӕй хорз хабар хъусын кӕнынц «ӕгас зӕххы цъарыл дӕр» (Матф. 24:14). Сӕ нымӕцыл бонӕй-бонмӕ кӕй ӕфты, уымӕ гӕсгӕ сӕ цины хъӕр тынгдӕр хъуысы (Мих. 2:12). Уӕдӕ зынгзӕрдӕйӕ хъусын кӕнӕм Паддзахады тыххӕй хорз хабар ӕмӕ иннӕтӕн дзурӕм Хуыцауы диссаджы хъуыддӕгты тыххӕй. Уӕдӕ ацы ахсджиаг хъуыддаджы архайгӕйӕ цӕй, ӕмӕ нӕ цардӕй ӕвдисӕм, хатт «нӕдзурын... сыгъзӕрин» кӕй у, уый.

[Ныв 3 фарсыл]

Ӕмбырды фембӕлдты хъуамӕ хъусӕм ӕмӕ ахуыр кӕнӕм

[Ныв 4 фарсыл]

Уацамынды ныл исчи куы хъӕр кӕна, уӕд хорз уаид ӕнӕдзургӕйӕ ацӕуын

[Ныв 5 фарсыл]

Хибарӕй ӕнцондӕр у хъуыды кӕнын