Иннӕтӕн дӕ бартӕй хай кӕн. Цӕмӕн ӕмӕ куыд?

ЗӔХХ куы нӕма фӕзынд, уӕдмӕ дӕр Йегъовӕ йӕ бартӕй иннӕтӕн хай кодта. Хуыцау йӕ иунӕггуырд Фырты куы сфӕлдыста, уӕд дзы «дӕсны кусӕг» скодта ӕмӕ йемӕ сфӕлдыста Дун-дуне (Ӕмб. 8:22, 23, 30; Иоан. 1:3). Хуыцау фыццаг лӕг ӕмӕ усӕн загъта: «Зӕхх байдзаг кӕнут ӕмӕ йын хицау ут» (Райд. 1:28). Сфӕлдисӕг адӕмӕн бахӕс кодта, цӕмӕй ӕгас зӕхх дӕр Едемы цӕхӕрадоны хуызӕн скодтаиккой. О, иууыл райдианӕй дӕр Йегъовӕ йӕхӕдӕг дӕр ӕмӕ йӕ лӕггадгӕнджытӕ дӕр иннӕтӕн сӕ бӕрны кодтой цавӕрдӕр хӕстӕ.

Иннӕтӕн сӕ бӕрны цавӕрдӕр хӕстӕ кӕнынмӕ цы хауы? Хистӕр нӕлгоймӕгты цӕмӕн хъӕуы ахуыр кӕнын, цӕмӕй-иу иннӕтӕн дӕр ӕмбырды хъуыддӕгтӕй сӕ бӕрны истытӕ кӕной ӕмӕ уый сӕ бон куыд у аразын?

Уымӕ цы хауы?

Иннӕтӕн сӕ бӕрны цавӕрдӕр хӕстӕ кӕнынмӕ хауы кӕуылдӕр цыдӕр хъуыддаг баууӕндын, дӕ номӕй архайыны бар ын раттын. Уӕдӕ уый ууыл дзурӕг у, ӕмӕ цавӕрдӕр хъуыддӕгтӕ бакӕнынмӕ иннӕтӕм ӕххуысмӕ кӕй дзурдзынӕ, ӕмӕ сын афтӕмӕй дӕ бартӕй кӕй хай кӕндзынӕ.

Чырыстон ӕмбырды кӕмӕндӕр цыдӕр куы бахӕс кӕнынц, уӕд ын ӕй чи бабар кӕны, уыцы ’фсымӕры ныфс вӕййы, уыцы хъуыддаг кӕронмӕ кӕй ахӕццӕ кӕндзӕн, цы йын ӕнтысы, уый тыххӕй йын кӕй дзурдзӕн, ӕмӕ дзы ӕххуыс кӕй  курдзӕн. Фӕлӕ уыцы хъуыддагӕн сӕйраджыдӕр дзуапп дӕтты, чи йӕ бабар кодта, уыцы ӕфсымӕр. Хъуамӕ хъуыддагмӕ йӕ хъус дара, ӕмӕ куы хъӕуа, уӕд уынаффӕ дӕр радта. Фӕлӕ чи зоны исчи бафӕрса: «Кӕд мӕхӕдӕг алцӕуылдӕр ӕххӕссын, уӕд ма цавӕрдӕр хъуыддӕгтӕ искӕй бӕрны цӕмӕн хъуамӕ кӕнон?»

Цӕмӕн хъӕуы?

Ахъуыды-ма кӕнӕм ахӕм хъуыддагыл: Йегъовӕ йӕ иунӕггуырд Фырты сфӕлдыста ӕмӕ йын загъта, цӕмӕй йын баххуыс кодтаид Дун-дуне скӕнынӕн. О, «уымӕй фӕстӕмӕ цы сфӕлдыста, уыдӕттӕ иууылдӕр сфӕлдыста уый ӕххуысӕй: уӕлӕрвты цы ис, уый дӕр ӕмӕ, зӕххыл цы ис, уый дӕр; цӕстӕй цы уынӕм, уыдӕттӕ дӕр ӕмӕ, цӕстӕй цы нӕ уынӕм, уыдӕттӕ дӕр» (Кол. 1:16). Сфӕлдисӕгӕн йӕ бон уыд алцыдӕр иунӕгӕй саразын, фӕлӕ йӕ фӕндыд, цӕмӕй йӕ Фыртӕн дӕр уыцы ӕхсызгон куыстӕй йӕ зӕрдӕ барухс уыдаид (Ӕмб. 8:31). Афтӕмӕй Фырт Хуыцауы миниуджытӕ хуыздӕр базыдта. Зӕгъӕн ис, ӕмӕ Фыд уыцы фадатӕй спайда кодта, цӕмӕй йӕ иунӕггуырд Фырты цӕуылдӕрты сахуыр кодтаид.

Йесо Чырысти зӕххыл куы уыди, уӕд йӕ Фыдау архайдта ӕмӕ-иу иннӕты бӕрны цавӕрдӕр хӕстӕ бакодта. Уый йӕ ахуыргӕнинӕгтӕн гыццылгай цыдӕртӕ амыдта. Йесо хъусын кӕнынмӕ йӕ разӕй фыццаг арвыста 12 апостолы, уый фӕстӕ та иннӕ 70 ахуыргӕнинаджы (Лук. 9:1–6; 10:1–7). Фӕстӕдӕр-иу Йесо уыцы рӕттӕм куы ’рцыд, уӕд-иу адӕм цӕттӕ уыдысты хъусынмӕ. Йесо фӕстӕмӕ уӕларвмӕ куы здӕхти, уӕд йӕ фӕлтӕрд ахуыргӕнинӕгтӕн сӕ бӕрны бакодта ноджы ахсджиагдӕр хӕслӕвӕрдтӕ, уыимӕ ма ӕппӕт дунейы хорз хабар хъусын кӕныны хъуыддаг дӕр (Матф. 24:45–47; Ап. хъ. 1:8).

Чырыстон ӕмбырд зындгонд сси, кӕмӕндӕрты дзы сӕ бӕрны цавӕрдӕр хӕстӕ кӕй бакӕнынц ӕмӕ дзы иннӕты кӕй фӕахуыр кӕнынц, уымӕй. Апостол Павел Тимофеймӕ фыста: «Уыдӕттӕ бацамон, йӕхи бон дӕр иннӕты ахуыр кӕнын кӕмӕн уыдзӕн, ахӕм ӕууӕнкджын адӕймӕгтӕн» (2 Тим. 2:2). Куыд уынӕм, афтӕмӕй фӕлтӕрд чырыстӕттӕ хъуамӕ ахуыр кӕной, фӕстӕдӕр йӕхӕдӕг ахуыргӕнӕг чи суыдзӕн, уыдоны.

Хистӕр нӕлгоймаг йӕ хӕстӕй искӕмӕн куы бабар кӕны, уӕд иннӕтӕ дӕр схайджын вӕййынц, искӕй ахуыр кӕныны ӕмӕ ӕмбырдмӕ хъус дарыны куыст цы стыр циндзинад хӕссы, уымӕй. Ӕнӕххӕст адӕймагӕн йӕ бон алцӕуыл аххӕссын кӕй нӕу, уый хистӕр нӕлгоймӕгтӕ куы ’мбарой, уӕд ма уый тыххӕй дӕр ӕмбырды хъуыддӕгтӕ искӕй бӕрны кӕндзысты. Библийы фыст ис: «Зонд... ис бонзонгӕтӕм» (Ӕмб. 11:2). Бонзонгӕ адӕймаг ӕмбары, йӕ бон алцы кӕй нӕу, уый. Алцыдӕр дӕхӕдӕг иунӕгӕй куы аразай, уӕд бафӕллайдзынӕ ӕмӕ дын дӕ бинонтӕн рӕстӕг нал фаг кӕндзӕн. Уӕдӕ зондыл дзурӕг уыдзӕн, иннӕтӕн дӕр фадат куы дӕттай, цӕмӕй ӕмбырды хъуыддӕгтӕй искӕцытӕ аразой. Зӕгъӕм, ӕмбырды хистӕр нӕлгоймӕгты советы координатор чи у, уыцы ’фсымӕрӕн йӕ бон у иннӕ хистӕр нӕлгоймӕгтӕн зӕгъын, ӕмӕ ӕмбырды ӕхцайы хыгъдмӕ ’ркӕсой. Афтӕмӕй уыдон дӕр базондзысты, ӕмбырды цас ӕхца ис, уый.

Цавӕрдӕр хъуыддаг кӕмӕн бахӕс кӕнынц, уый бирӕ цӕуылдӕрты сахуыр вӕййы ӕмӕ сфӕлтӕры, ӕмӕ йын ӕй чи бахӕс кӕны, уый та фены, уыцы адӕймагмӕ цы курдиӕттӕ ис, уый. Уӕдӕ хистӕр нӕлгоймӕгтӕ иннӕ ’фсымӕртӕн, сӕ бон сӕххӕст кӕнын кӕй у, ахӕм хӕслӕвӕрдтӕ куы раттынц, уӕд сӕ афтӕмӕй бафӕлварынц, кӕстӕриуӕггӕнӕг ӕфсымӕртӕй лӕггад кӕнынӕн «бӕззынц ӕви нӕ» (1 Тим. 3:10).

Ӕппынфӕстаг, хистӕр нӕлгоймӕгтӕ сӕ хӕстӕй искӕмӕн куы бахай кӕнынц, уӕд равдисынц, иннӕтыл дӕр кӕй ӕууӕндынц. Павел Тимофеимӕ уацамындон балцы куы уыди, уӕд ӕй ахуыр кодта. Уыдон тынг балымӕн сты. Павел Тимофейӕ загъта, зӕгъгӕ мын «уырнындзинады фӕрцы... ӕцӕг хъӕбулау... сси» (1 Тим. 1:2). Раст афтӕ Йегъовӕ ӕмӕ Йесо дӕр тынг схӕлар сты, иумӕ куы фыдӕбон кодтой ӕмӕ Дун-дуне куы фӕлдыстой, уӕд. Хистӕр нӕлгоймӕгтӕ иннӕ ӕфсымӕртыл цавӕрдӕр хъуыддӕгтӕ куы ӕууӕндой, уӕд семӕ балымӕн уыдзысты.

 Иуӕй-иуты уый цӕуылнӕ фӕфӕнды?

Иннӕты бӕрны цавӕрдӕр хӕстӕ кӕнын раст ӕмӕ хорз кӕй у, уый кӕд хистӕр нӕлгоймӕгтӕй чидӕртӕ фӕуыны, уӕддӕр сын уыцы хъуыддаг бакӕнын тынг зын вӕййы. Ӕвӕццӕгӕн, уый уымӕн афтӕ у, ӕмӕ сӕ нӕ фӕфӕнды сӕ бартӕй иннӕтӕн хай кӕнын. Чи зоны сӕхицӕн фӕзӕгъынц, зӕгъгӕ, рохтӕ мӕ къухы хъуамӕ уой. Фӕлӕ ма ӕрхъуыды кӕн, Йесо уӕлӕрвтӕм ацӕуыны размӕ йӕ ахуыргӕнинӕгтӕн тынг ахсджиаг хӕслӕвӕрд кӕй радта, кӕд ӕй зыдта, ӕмӕ уыдон стырдӕр хъуыддӕгтӕ сараздзысты, уӕддӕр! (Матф. 28:19, 20; Иоан. 14:12).

Кӕнӕ та-иу, чи зоны, хистӕр нӕлгоймӕгтӕ кӕмӕндӕрты сӕ бӕрны цавӕрдӕр хӕстӕ бакодтой, фӕлӕ-иу уыцы хъуыддагӕй хорзӕй ницы рауад. Ӕмӕ уымӕ гӕсгӕ хъуыды кӕнынц, сӕхӕдӕг алцыдӕр хуыздӕр ӕмӕ тагъддӕр кӕй бакӕндзысты. Цӕвиттонӕн ма райсӕм Павелы. Уый уыдта, иннӕтӕн сӕ бӕрны цавӕрдӕр хӕстӕ кӕнын хорз кӕй у, фӕлӕ ма уый дӕр ӕмбӕрста, ӕмӕ ахуыргӕнинӕгтӕ алы хатт, уый куыд фӕнды, афтӕ кӕй нӕ кӕндзысты. Йӕ фыццаг уацамындон балцы Павел йемӕ акодта ӕрыгон Маркы ӕмӕ йӕ ахуыр кодта. Павелӕн тынг хъыг уыди, Марк йӕ лӕггад куы ныууагъта ӕмӕ фӕстӕмӕ сӕхимӕ куы аздӕхт (Ап. хъ. 13:13; 15:37, 38). Кӕд хабар афтӕ рауад, уӕддӕр Павел дарддӕр дӕр иннӕ ӕфсымӕрты ахуыр кодта. Уӕлдӕр куыд загътам, афтӕмӕй уый йемӕ уацамындон балцы акодта ӕрыгон Тимофейы. Тимофейӕн йӕ бон ахсджиаг хӕслӕвӕрдтӕ ӕххӕст кӕнын куы сси, уӕд ӕй Павел Ефесы ныууагъта ӕмӕ йын радта бар, цӕмӕй ӕмбырдты цӕстдарджыты ӕмӕ кӕстӕриуӕггӕнӕг ӕфсымӕрты нысан кодтаид (1 Тим. 1:3; 3:1–10, 12, 13; 5:22).

Афтӕ абон дӕр. Кӕд ӕфсымӕртӕй кӕйдӕр йӕхимӕ фылдӕр хӕстӕ исын нӕ фӕнды, уӕддӕр хистӕр нӕлгоймӕгтӕ хъуамӕ сӕ къухтӕ ма ауадзой, ӕмӕ иннӕ ’фсымӕрты ахуыр кӕной. Иннӕтыл ӕууӕндын ӕмӕ сӕ ахуыр кӕнын раст у ӕмӕ уыцы хъуыддаг ӕнӕмӕнгӕй хъӕуы аразын. Фӕлӕ хистӕр нӕлгоймӕгтӕ сӕ зӕрдыл цы хъуамӕ дарой, искӕмӕн йӕ бӕрны цавӕрдӕр хӕстӕ куы кӕной, уӕд?

Куыд ис уый аразӕн?

Хистӕр нӕлгоймӕгтӕ ’фсымӕртӕн сӕ бӕрны исты хӕстӕ куы кӕной, уӕд хъуамӕ кӕсой, уый аккаг сты ӕви нӕ, уымӕ. Иерусалимы чырыстӕттӕн алы бон дӕр хӕринаг уарын куы хъуыди, уӕд апостолтӕ равзӕрстой авд адӕймаджы, «сыгъдӕг удӕй ӕмӕ зондӕй хайджын чи уыд, ахӕмты» (Ап. хъ. 6:3). Дӕ зӕрдӕ кӕуыл нӕ дарыс, ахӕм адӕймагӕн исты куы бабар кӕнай, уӕд ӕй гӕнӕн ис, ӕмӕ ма сараза. Уымӕ гӕсгӕ уал ын-иу раздӕр бахӕс кӕн гыццыл хъуыддӕгтӕ. Хорз сӕ куы сараза, уӕд ын стырдӕр хъуыддӕгтӕ дӕр уыдзӕн йӕ бар бакӕнӕн.

Уымӕй уӕлдай ма, хъуамӕ ӕмбарай, адӕм алыхуызон кӕй сты ӕмӕ сӕ алкӕмӕндӕр алыхуызон курдиӕттӕ кӕй ис. Чидӕр фӕлтӕрдджын у, чидӕр та – нӕ. Хӕларзӕрдӕ ӕмӕ цингӕнаг ӕфсымӕрӕн хуыздӕр рауайдзӕн уагдарӕй лӕггад кӕнын. Алы хъуыддаг дӕр пълан ӕмӕ ӕгъдауыл чи аразы, уый та сбӕздзӕн ӕмбырды секретарӕн ӕххуысгӕнӕгӕй. Курдиатджын хойӕн та бахӕс кӕнӕн ис, цӕмӕй Ӕрымысӕн изӕрмӕ сценӕ дидинджытӕй срӕсугъд кӕна.

Иннӕтӕн исты хъуыддаг сӕ бӕрны куы кӕнай, уӕд-иу сын хорз бамбарын кӕн, куыд ӕй хъуамӕ саразой, уый. Аргъауӕг Иоанн йӕ ахуыргӕнинӕгты цалынмӕ Йесомӕ нӕ арвыста, уӕдмӕ сын бамбарын кодта, цы йӕ фӕнды базонын ӕмӕ Йесойы цӕмӕй хъуамӕ бафарстаиккой, уый (Лук. 7:18–20). Йесо та бакодта ӕндӕрхуызон. Адӕмӕн диссаджы хуызы дзул куы радта, ӕмӕ ма дзы цы къӕбӕртӕ баззад, уыдон йӕ ахуыргӕнинӕгтӕн куы ӕмбырд кӕнын кодта, уӕд уыцы хъуыддаг куыд хъуамӕ сарӕзтаиккой, уый сын сӕхи бар ныууагъта (Иоан. 6:12, 13). Хъуыддаг хорз рауайдзӕн ӕви нӕ, уый фылдӕр хатт баст вӕййы, хӕслӕвӕрд цыхуызӕн у ӕмӕ йӕ чи кӕндзӕн, уый цавӕр адӕймаг у, ууыл. Хӕслӕвӕрд чи радта, ӕмӕ йӕ чи ӕххӕст кӕны, уыдон  сӕ дыууӕ дӕр хъуамӕ хорз зоной, цы сӕ домдӕуы ӕмӕ куыст куыд цӕуы, уый фӕдыл арӕх хъӕудзӕн дзурын ӕви нӕ. Сӕ дыууӕ дӕр хъуамӕ зоной, хӕслӕвӕрд чи ӕххӕст кӕндзӕн, уымӕн йӕхи хъӕппӕрисӕй йӕ бон аразын цы у, уый. Кӕд хъуыддаг цыдӕр бӕлвырд рӕстӕгмӕ хъуамӕ ’рцӕуа арӕзт, уӕд хуыздӕр уаид, кӕмӕн ӕй бахӕс кодтай, уымӕн ӕрмӕст афтӕ куы нӕ зӕгъис, зӕгъгӕ, уӕдмӕ хъуамӕ цӕттӕ уа, фӕлӕ йӕ рагацау йӕ хъуыдыйӕ куы бафӕрсис ӕмӕ йемӕ куы баныхас кӕнис. Уӕд уыцы адӕймаг йӕ хӕслӕвӕрд ноджы зӕрдиагдӕрӕй бакӕндзӕн.

Хӕслӕвӕрд кӕмӕн радтай, уымӕ хъуамӕ алцыдӕр уа йӕ хӕслӕвӕрд сӕххӕст кӕнынӕн: ӕхца, кусӕнгӕрзтӕ, стӕй куы бахъӕуа, уӕд ын ӕххуыс дӕр бакӕн. Хорз уаид, уыцы хъуыддаджы тыххӕй иннӕтӕ дӕр куы зониккой. Йесо Петрӕн куы загъта, зӕгъгӕ дын «ратдзынӕн уӕларвон паддзахады дӕгъӕлтӕ», уӕд сӕ цуры уыдысты иннӕ ахуыргӕнинӕгтӕ дӕр (Матф. 16:13–19). Уӕдӕ, хорз уаид, ӕмбырд дӕр хатт куы зонид, цавӕрдӕр хӕстӕ кӕй бӕрны сты, уый.

Дӕ зӕрдыл-ма хъуамӕ дарай иу хъуыддаг: искӕмӕн исты хӕслӕвӕрд куы радтай, фӕлӕ йын йӕ фылдӕр хай дӕхӕдӕг куы аразай, уӕд уый ууыл дзурӕг уыдзӕн, ӕмӕ уыцы адӕймагыл кӕронмӕ не ’ууӕндыс. Кӕй зӕгъын ӕй хъӕуы, хъуыддӕгтӕ хатт, дӕу куыд фӕнды, афтӕ нӕ рауайынц. Фӕлӕ хъуыддаг кӕмӕн бахӕс кодтай, уыцы ’фсымӕры йӕхи дӕр сӕрибарӕй цыдӕртӕ аразын куы бауадзай, уӕд сфӕлтӕрдзӕн ӕмӕ фӕныфсджындӕр уыдзӕн. Стӕй хъуыддаг куыд аразы, уымӕ ды дӕр хъуамӕ куыдфӕндыйы цӕстӕй ма кӕсай. Кӕд Йегъовӕ йӕ Фыртыл дуне сфӕлдисыны цыдӕр хъуыддӕгтӕ баууӕндыд, уӕддӕр йӕхӕдӕг ӕнцад нӕ лӕууыд. Уый йӕ Дӕсны кусӕгӕн загъта: «Скӕнӕм адӕймаджы нӕхимӕ гӕсгӕ» (Райд. 1:26). Уӕдӕ уыцы адӕймагӕн ныхасӕй дӕр ӕмӕ хъуыддагӕй дӕр ӕххуыс кӕн, стӕй-иу дзы ӕппӕлгӕ дӕр ракӕн. Цы йын бантыст, ууыл цыбыртӕй куы аныхас кӕнат, уӕд дзы ныфс бацӕудзӕн. Кӕд куыст, куыд ӕмбӕлы, афтӕ нӕ аразы, уӕд ма фефсӕрмы кӕн ӕмӕ йын уынаффӕ ратт, кӕнӕ та йын ӕндӕр искуыд баххуыс кӕн. Ма рох кӕн, цы куыст ын бахӕс кодтай, уымӕн дзуапп сӕйраджыдӕр ды кӕй дӕттыс (Лук. 12:48).

Хистӕр нӕлгоймӕгтӕ-иу иннӕ ’фсымӕртӕн сӕ бӕрны цавӕрдӕр хӕстӕ кӕй бакодтой ӕмӕ-иу сын зӕрдиагӕй кӕй баххуыс кодтой, уый фӕрцы бирӕтӕ фӕлтӕрдджын чырыстӕттӕ систы. Хистӕр нӕлгоймӕгтӕ хъуамӕ зоной, иннӕтӕн сӕ бӕрны цавӕрдӕр хӕстӕ цӕмӕн хъӕуы кӕнын ӕмӕ уый куыд ис аразӕн. Афтӕмӕй Йегъовӕйау архайдзысты.

[Рамкӕ 29 фарсыл]

ИННӔТӔН ДӔ БАРТӔЙ КУЫ ХАЙ КӔНАЙ, УӔД...

• иннӕтимӕ цин кӕндзынӕ, цы уын бантыст, ууыл

• уын фылдӕр ӕнтысдзӕн

• зондӕй архайдзынӕ ӕмӕ бонзонгӕ уыдзынӕ

• иннӕты ахуыр кӕндзынӕ

• ӕвдисдзынӕ, кӕй сыл ӕууӕндыс

[Рамкӕ 30 фарсыл]

КУЫД ИС УЫЙ АРАЗӔН

• Равзар аккаг адӕмы

• Алцыдӕр хорз бамбарын кӕн/ӕргом ныхас кӕн

• Зӕгъ, цы йын хъуамӕ бантыса

• Цы йӕ бахъӕуа, уый йын ратт

• Хъуыддаг куыд цӕуы, уымӕй-иу афӕрс ӕмӕ йыл ӕууӕнд

• Хъуыддагӕн дзуапп сӕйраджыдӕр дӕтт ды

[Нывтӕ 31 фарсыл]

Нӕ бартӕй искӕмӕн куы бахай кӕнӕм, уӕд ын афтӕмӕй цыдӕр хъуыддаг бахӕс кӕнӕм ӕмӕ йӕ куыд аразы, уымӕ нӕ хъус фӕдарӕм