Чырыстийы уарзондзинад нӕ разӕнгард кӕны иннӕты уарзынмӕ

«Йесо... бауарзта йӕхиуӕтты, ацы дунейы йын чи уыди, уыдоны, ӕмӕ сӕ бауарзта кӕронмӕ» (ИОАН. 13:1).

1, 2. а) Йесойы уарзондзинады тыххӕй цы зӕгъӕн ис? ӕ) Ацы статьяйы уарзондзинады тыххӕй цы базондзыстӕм?

ЗӔХХЫЛ Йесойы хуызӕн уарзондзинад никуы ничи равдыста. Йе стыр уарзондзинадыл дзурӕг уыдысты йӕ хъуыддӕгтӕ иууылдӕр: адӕмимӕ куыд ныхас кодта, йӕхи куыд дардта, иннӕты цӕуыл ахуыр кодта, стӕй йӕ цард нывондӕн кӕй ӕрхаста, уый дӕр. Йесо суанг йӕ фӕстаг сулӕфты онг дӕр тыхсти, йӕ цуры чи уыди, уыдоныл, уӕлдайдӕр та йӕ ахуыргӕнинӕгтыл.

² Уарзондзинад цы у, уый Йесойы хуызӕн ничи равдыста. Ӕмӕ уымӕй йӕ фӕдылдзӕуджытӕн фӕзминаг у. Йесойы уарзондзинад нӕ разӕнгард кӕны, цӕмӕй ахӕм уарзтӕй уарзӕм нӕ чырыстон хотӕ ӕмӕ ӕфсымӕрты дӕр ӕмӕ иннӕ адӕмы дӕр. Ацы статьяйы мах аныхас кӕндзыстӕм цалдӕр хъуыддагыл. Зӕгъӕм, цӕуыл ахуыр кӕнынц ӕмбырды хистӕр нӕлгоймӕгтӕ, тӕригъӕд чи ракодта, (суанг уӕззау тӕригъӕд дӕр) уыдонмӕ Йесо уарзондзинад куыд ӕвдыста, уымӕй. Стӕй ма, Йесойы уарзондзинад чырыстӕтты куыд разӕнгард кӕны хорз хъуыддӕгтӕм, се ’мчырыстӕттӕ истӕуыл куы фӕтыхсынц, ӕрдзон бӕллӕх сын исты куы разиан кӕны кӕнӕ сӕ исчи куы фӕрынчын вӕййы, уӕд.

3. Кӕд Петр уӕззау тӕригъӕдтӕ ӕруагъта, уӕддӕр ӕм Йесо цы цӕстӕй каст?

³ Йесойыл, йӕ мӕлӕты размӕ ’хсӕв, апостол Петр ӕртӕ хатты бавдисӕн кодта (Марчы 14:66–72). Фӕлӕ Йесо уый размӕ загъта, Петр йӕ рӕдыдыл кӕй ӕрфӕсмон кӕндзӕн, ӕмӕ хабар ӕцӕгдӕр афтӕ рауад. Йесо йын йӕ тӕригъӕд ныххатыр кодта, ӕмӕ йын стӕй йӕ бӕрны стыр хӕстӕ бакодта (Лук. 22:32; Ап. хъ. 2:14; 8:14–17; 10:44, 45). Цӕуыл ахуыр кӕнӕм, уӕззау тӕригъӕд чи ракодта, уыдонмӕ Йесо цы цӕстӕй каст, уымӕй?

Тӕригъӕд чи ракодта, уыдонмӕ Чырыстийы цӕстӕй кӕсут

4. Уӕлдайдӕр цавӕр хъуыддагмӕ фӕхъӕуы Чырыстийы цӕстӕй кӕсын?

⁴ Царды бирӕ хъуыддӕгтӕм фӕхъӕуы Чырыстийы цӕстӕй кӕсын. Афтӕ кӕнын уӕлдай зын вӕййы, бинонтӕй йе та ӕмбырды исчи уӕззау тӕригъӕд куы ракӕны, уӕд. Хъыгагӕн, Сайтаны цардӕвӕрдӕн йӕ кӕрон куыд хӕстӕгдӕр кӕны, афтӕ абон дунейы зондыл фылдӕр чырыстӕттӕ ацӕуы. Ацы дуне ӕгъдауӕн кӕй нӕ аргъ кӕны, ӕмӕ ӕвзӕрдзинадмӕ та куыдфӕндыйы цӕстӕй кӕй кӕсы, уый ӕндавы ӕрыгӕттыл дӕр ӕмӕ ацӕргӕтыл дӕр, ӕмӕ сӕ рӕстдзинады фӕндагыл цӕуын хъыгдары. Фыццаг ӕнусы чырыстон ӕмбырдӕй кӕйдӕрты бахъуыд ацух кӕнын, кӕмӕндӕрты та уайдзӕф бакӕнын. Хабар афтӕ рауайы абон дӕр (1 Кор. 5:11–13; 1 Тим. 5:20). Фӕлӕ хистӕр нӕлгоймӕгтӕ ахӕм хъуыддӕгтӕ ӕвзаргӕйӕ Чырыстийау уарзгӕйӕ куы фӕархайынц, уӕд уый гӕнӕн ис, тӕригъӕд чи ракодта, ууыл тынг бандава.

5. Тӕригъӕд чи ракодта, уыдонмӕ хистӕр нӕлгоймӕгтӕ Чырыстийы цӕстӕй куыд хъуамӕ кӕсой?

⁵ Йесойау хистӕр нӕлгоймӕгтӕ дӕр хъуамӕ алкӕддӕр архайой Йегъовӕйы раст уагӕвӕрдтӕм гӕсгӕ. Афтӕмӕй сӕ бон у ӕвдисын Йегъовӕйы миниуджытӕ – фӕлмӕндзинад, хӕларзӕрдӕдзинад ӕмӕ уарзондзинад. Йӕ рӕдыды тыххӕй «зӕрдӕсаст» ӕмӕ «ныфссаст» чи вӕййы, ӕцӕгдӕр чи ӕрфӕсмон кӕны, ахӕм адӕймаджы хистӕр нӕлгоймӕгтӕн зын нӕ вӕййы фӕлмӕнӕй «раст зондыл саразын» (Пс. 34:18; Гал. 6:1). Фӕлӕ кӕд адӕймаг йӕ рӕдыдыл нӕ сӕтты ӕмӕ нӕ фӕсмон кӕны, уӕд та цы кӕнгӕ у?

6. Тӕригъӕд чи ракодта, уыдоны хъуыддӕгтӕ ӕвзаргӕйӕ хистӕр нӕлгоймӕгтӕ сӕхи цӕмӕй хъуамӕ хизой ӕмӕ цӕмӕн?

 ⁶ Тӕригъӕд чи ракодта, уый куы нӕ хъуса, Библимӕ гӕсгӕ йын цы уынаффӕ дӕттынц, уымӕ кӕнӕ та уыцы хъуыддаджы иннӕты куы аххосджын кӕна, уӕд ӕм хистӕр нӕлгоймӕгтӕ ӕмӕ иннӕ чырыстӕттӕ гӕнӕн ис мӕсты кӕной. Уыцы адӕймаг цы зиан ӕрхаста, уый куы зоной, уӕд сӕ чи зоны бафӕнда, йӕ миты тыххӕй цы хъуыды кӕнынц, уый зӕгъын. Фӕлӕ мӕсты адӕймаг арӕх рӕдийгӕ дӕр фӕкӕны, стӕй, «Чырысти куыд хъуыды кӕны, афтӕ» нӕ фӕхъуыды кӕны (1 Кор. 2:16; бакӕс Иаковы 1:19, 20). Йесо зӕххыл куы уыди, уӕд-иу кӕмӕндӕрты сӕ рӕдыдтытӕм комкоммӕ дӕр бацамыдта, фӕлӕ сын ахӕмӕй никуы ницы загъта, ӕмӕ сын сӕ ныфс асастаид кӕнӕ та сын сӕ зӕрдӕтӕ фӕриссын кодтаид (1 Пет. 2:23). Уый нӕ, фӕлӕ йӕ ныхӕстӕ ӕмӕ йӕ хъуыддӕгтӕй кӕддӕриддӕр бӕрӕг уыди, тӕригъӕд чи ракодта, уыдонӕн сӕ бон кӕй у ӕрфӕсмон кӕнын ӕмӕ фӕстӕмӕ Йегъовӕйы хорзӕх ссарын. Стӕй Йесо дунемӕ цӕмӕн ӕрцыд, уымӕн йӕ сӕйраг аххосӕгтӕй иу уыди «тӕригъӕдджынты фервӕзын кӕнын» (1 Тим. 1:15).

7, 8. Хистӕр нӕлгоймӕгтӕ, тӕригъӕд чи ракӕны, уыдоны хъуыддӕгтӕ цавӕр уагӕвӕрдтӕм гӕсгӕ хъуамӕ ӕвзарой?

⁷ Йесойы цӕвиттон куыд хъуамӕ ӕндава, ӕмбырды уайдзӕф бакӕнын кӕмӕн хъӕуы, уыдонмӕ цы цӕстӕй хъуамӕ кӕсӕм, ууыл? Дӕ зӕрдыл дар, Библийы барадон фарстатӕ ӕвзарыны тыххӕй цы уагӕвӕрдтӕ ис, уыдон кӕй хъахъхъӕнынц дзуг ӕмӕ, тӕригъӕд чи ракодта, уымӕн гӕнӕн ис ӕрфӕсмон кӕнынӕн баххуыс кӕной (2 Кор. 2:6–8). Хъыгагӕн, чидӕртӕ сӕ рӕдыдыл нӕ басӕттынц ӕмӕ сӕ ӕмбырдӕй ацух кӕнынц. Фӕлӕ тынг ӕхсызгон у, ахӕм адӕмӕн сӕ фылдӕр фӕстӕдӕр Йегъовӕмӕ ӕмӕ ӕмбырдмӕ кӕй раздӕхынц, уый. Тӕригъӕд чи ракодта, уыдонмӕ хистӕр нӕлгоймӕгтӕ Чырыстийы цӕстӕй куы фӕкӕсынц, уӕд сын афтӕмӕй баххуыс кӕнынц сӕ зӕрдӕйы уаг фӕивынӕн ӕмӕ фӕстӕмӕ ӕрбацӕуынӕн. Ӕмбырдӕй кӕй ацух кодтой, уыдонӕй чидӕртӕ фӕстӕдӕр гӕнӕн ис, ӕмӕ ма хъуыды кӕной, хистӕр нӕлгоймӕгтӕ сын Библийӕ цы уынаффӕтӕ радтой, уыдон иууылдӕр, фӕлӕ сӕ, ӕвӕццӕгӕн, никуы ферох уыдзӕн, хистӕр нӕлгоймӕгтӕ семӕ уӕзданӕй ӕмӕ фӕлмӕнӕй кӕй ныхас кодтой, уый.

⁸ Уымӕ гӕсгӕ хистӕр нӕлгоймӕгтӕ хъуамӕ  ӕвдисой, «сыгъдӕг удӕй цы миниуджытӕ гуыры, уыдон», сӕйраджыдӕр та уарзондзинад. Ӕмӕ афтӕ хъуамӕ кӕной, тӕригъӕд чи ракодта, уый уынаффӕтӕм куы нӕ хъуса, суанг уӕд дӕр (Гал. 5:22, 23). Хистӕр нӕлгоймӕгтӕ хъуамӕ макуы тагъд кӕной, цӕмӕй, чи фӕрӕдыд, уыцы адӕймаджы ӕмбырдӕй ацух кӕной, фӕлӕ хъуамӕ сӕ ахастӕй бӕрӕг уа, кӕй сӕ фӕнды, цӕмӕй Йегъовӕмӕ раздӕха. Ӕмӕ тӕригъӕд чи ракодта, уый фӕстӕдӕр куы ӕрфӕсмон кӕна (ахӕм адӕмы нымӕц та гыццыл нӕу), уӕд тынг бузныг уыдзӕн Йегъовӕйӕ ӕмӕ йын ӕмбырдмӕ раздӕхынӕн чи баххуыс кодта, уыцы «лӕвӕрттӕй – адӕймӕгтӕй» (Еф. 4:8, 11, 12).

Кӕроны рӕстӕджы Чырыстийы уарзондзинад фӕзмут

9. Ӕрхӕсс цӕвиттон, Йесо йӕ ахуыргӕнинӕгтӕм йӕ уарзондзинад куыд равдыста, уымӕн.

⁹ Лукайы Евангелийы фыст ис, Йесойы уарзондзинад кӕмӕй зыны, иу ахӕм хабар. Йесо зыдта, цасдӕры фӕстӕ Ромы ӕфсӕддонтӕ Иерусалимыл кӕй ӕрхъула кӕндзысты, ӕмӕ дзы алидзӕн кӕй нал уыдзӕн. Уымӕ гӕсгӕ йӕ ахуыргӕнинӕгты развӕлгъау бафӕдзӕхста: «Иерусалимыл ӕфсӕдтӕ кӕй ӕртыхстысты, уый куы фенат, уӕд-иу ӕй зонут, йе сӕфт кӕй ӕрхӕстӕг». Цы хъуамӕ сарӕзтаиккой? Йесо сын бӕлвырд бамбарын кодта, цы кӕнын сӕ хъӕудзӕн, уый: «Уӕд, Иудейы чи уа, уыдон лидзӕнт хӕхтӕм. Иерусалимы чи уа, уыдон дӕр уырдыгӕй лидзӕнт, ӕмӕ йӕ алфамбылай чи уа, уыдон та йӕм ма бацӕуӕнт. Уымӕн ӕмӕ уыцы бонтӕ уыдзысты мастисӕн бонтӕ, фыст цы у, уыдӕттӕ иууылдӕр куыд сӕххӕст уой» (Лук. 21:20–22). Нӕ эрӕйы 66 азы Ромы ӕфсад Иерусалимы алыварс куы ӕрбынат кодта, фӕлӕ стӕй ӕнӕнхъӕлӕджы фӕстӕмӕ куы аздӕхт, уӕд коммӕгӕс адӕм ацы амындтӕм гӕсгӕ архайдтой.

10, 11. Иерусалимӕй чи ралыгъд, уыцы чырыстӕтты цӕвиттон нӕ «стыр бӕллӕхмӕ» куыд цӕттӕ кӕны?

¹⁰ Чырыстӕттӕ Иерусалимӕй куы ралыгъдысты, уӕд сӕ хъуыди Чырыстийы уарзондзинад фӕзмын ӕмӕ йӕ хъуыддагӕй ӕвдисын. Цыдӕриддӕр сӕм уыди, уый хъуамӕ кӕрӕдзийӕн ма ӕвгъау кодтаиккой. Фӕлӕ Чырыстийы пехуымпарад ӕрмӕст уыцы горӕтыл нӕ сӕххӕст, уый ма хъуамӕ сӕххӕст уа ӕгас дунейыл дӕр. Йесо загъта: «Уӕд уыдзӕн, дунейы фӕзындӕй нырмӕ чи никуыма уыд, ахӕм стыр бӕллӕх – нӕ уыд, ӕмӕ нал дӕр уыдзӕн» (Матф. 24:17, 18, 21). Уыцы «стыр бӕллӕхы» размӕ дӕр ӕмӕ куы райдайа, уӕд дӕр мах дӕр гӕнӕн ис бирӕ цӕмӕйдӕрты фӕцух уӕм ӕмӕ бирӕ зындзинӕдтыл сӕмбӕлӕм. Чырысти куыд хъуыды кодта, афтӕ куы хъуыды кӕнӕм, уӕд фидар фӕлӕудзыстӕм.

¹¹ Уыцы рӕстӕг мах хъӕудзӕн Чырыстийы фӕзмын ӕмӕ алкӕйдӕр сыгъдӕг зӕрдӕйӕ уарзын. Уый фӕдыл Павел радта ахӕм уынаффӕ: «Алчидӕр нӕ хъуыды кӕнӕд, иннӕмӕн хуыздӕр цы уыдзӕн, фидардӕр ӕй цы фӕкӕндзӕн, ууыл. Уымӕн  ӕмӕ Чырысти дӕр, йӕхицӕн куыд ӕнцондӕр уа, ууыл нӕ хъуыды кодта [...] Уӕдӕ уын фидардзинад ӕмӕ удӕнцойдӕттӕг Хуыцау ахӕм хорзӕх ракӕнӕд, ӕмӕ сымах дӕр Йесо Чырыстийы хуызӕн куыд хъуыды кӕнат» (Ром. 15:2, 3, 5).

12. Нӕ удыхъӕды цавӕр уарзондзинад хъуамӕ фидар кӕнӕм ӕмӕ цӕмӕн?

¹² Петр банкъардта Йесойы уарзондзинад, ӕмӕ уымӕ гӕсгӕ уый дӕр чырыстӕттӕн дзырдта, цӕмӕй сӕ «ӕфсымӕртыл ӕнувыд уыдаиккой» ӕмӕ «ӕцӕгдзинады коммӕ кастаиккой». Разӕнгард сӕ кодта: «Кӕрӕдзийы зӕрдиагӕй уарзут» (1 Пет. 1:22). Ахӕм миниуджытыл кусын нӕ абон куыд хъӕуы, афтӕ никуы. Ӕгас зӕххыл дӕр Хуыцауы адӕм бонӕй-бонмӕ фылдӕр зындзинӕдтӕ ӕвзарынц. Мах ацы дунейы хъуыддӕгтӕй иуыл дӕр нӕ ныфс ма хъуамӕ дарӕм. Ӕмӕ уый хорз зыны, ӕрӕджы ӕппӕт дунейы дӕр цы экономикон кризис райдыдта, уымӕй. (Бакӕс 1 Иоанны 2:15–17.) Ацы дунейӕн йӕ кӕрон куыд хӕстӕгдӕр кӕны, афтӕ мах хъуамӕ ӕнгомдӕр кӕнӕм Йегъовӕмӕ дӕр ӕмӕ кӕрӕдзимӕ дӕр, стӕй ӕмбырды алкӕимӕдӕр хӕларӕй цӕрыныл архайӕм. Павел дзырдта: «Кӕрӕдзи уарзут ӕфсымӕртау, фӕлмӕн уарзтӕй. Кӕрӕдзийӕн кад кӕнынмӕ уӕ иу иннӕмӕ ӕнхъӕлмӕ ма кӕсӕд» (Ром. 12:10). Петр дӕр уыцы хъуыдымӕ бафтыдта: «Сӕйраджыдӕр та кӕрӕдзийы зӕрдиагӕй уарзут, уымӕн ӕмӕ уарзондзинад хатыр кӕны бирӕ тӕригъӕдтӕ» (1 Пет. 4:8).

13–15. Ӕрдзон бӕллӕхты фӕстӕ ӕфсымӕртӕй бирӕтӕ се ’мчырыстӕттӕм уарзондзинад куыд равдыстой?

¹³ Ӕппӕт дунейы дӕр Йегъовӕйы Ӕвдисӕнты зонынц, уарзондзинад хъуыддагӕй чи ӕвдисы, ахӕм адӕмӕй. Ӕркӕсӕм, ӕрдзон бӕллӕхтӕ кӕм ӕрцыд, уырдӕм ӕххуыс кӕнынмӕ барвӕндонӕй чи ацыд, уыцы Ӕвдисӕнты цӕвиттонтӕм. 2005 азы Иугонд Штатты хуссар хайыл рацыд тыхджын уадтымыгътӕ, ӕмӕ стыр зиӕнттӕ ӕрхастой. 20 минӕй фылдӕр Ӕвдисӕны Йесойы уарзондзинад бафӕзмыдтой ӕмӕ ӕххуысмӕ ацыдысты, уӕззау уавӕры чи бахауд, уыцы ’фсымӕртӕм. Уыцы барвӕндон кусджытӕй бирӕтӕ ныууагътой сӕ хорз хӕдзӕрттӕ ӕмӕ сӕ куыст.

¹⁴ Иу ран карз дымгӕ денджызы дӕттӕ афтӕ сызнӕт кодта, ӕмӕ 80 километры бӕрц раивылдысты. Доны уылӕнтӕ хӕццӕ кодтой 10 метры бӕрзӕндӕн. Дон куы фӕкъаддӕр, уӕд хӕдзӕрттӕ ӕмӕ ӕндӕр агъуыстытӕн се ’ртыккаг хай уыдысты бынтон пырх. Уырдӕм алы бӕстӕтӕй чи ӕрцыд, уыцы барвӕндон кусджытӕ хорз зыдтой цалцӕггӕнӕн куыстытӕ, семӕ ӕрластой хъӕугӕ кусӕнгӕрзтӕ ӕмӕ арӕзтадон ӕрмӕг. Уыдон цӕттӕ уыдысты цыфӕнды куыст бакӕнынмӕ дӕр. Дыууӕ хӕрзхойы, идӕдзтӕ, сӕ дзаумӕттӕ гыццыл уӕзласӕн машинӕйы бавгӕдтой ӕмӕ ӕххуысмӕ ацыдысты, цӕуын та сӕ бахъуыд 3 мин километрӕй фылдӕр. Ӕрыгондӕр сӕ чи уыди, уый уым баззади, ӕмӕ ныр дӕр ӕххуысгӕнӕн комитетимӕ ӕмгуыст кӕны, стӕй ма лӕггад кӕны ӕххӕстрӕстӕг пионерӕй дӕр.

¹⁵ Тыхдымгӕтӕ кӕм рацыди, уыцы районты ногӕй сарӕзтой кӕнӕ та сцалцӕг кодтой 5 600 хӕдзарӕй фылдӕр. Йегъовӕйы Ӕвдисӕнтӕ баххуыс кодтой куыд се ’мчырыстӕттӕн, афтӕ ӕндӕр адӕмӕн дӕр. Бынӕттон Ӕвдисӕнтӕ сӕхи куыд хатыдысты, се ’мчырыстӕттӕ сӕм ахӕм стыр уарзондзинад кӕй равдыстой, уый тыххӕй? Иу хойӕн йӕ хӕдзар ныппырх. Ӕмӕ уал рӕстӕгмӕ цард, йӕ цар кӕмӕн тагъд ӕмӕ цъӕл пец кӕм уыди, ахӕм гыццыл фургоны. Ӕфсымӕртӕ йын самадтой гыццыл, фӕлӕ рӕсугъд хӕдзар. Йӕ ног хӕдзары раз лӕугӕйӕ хо фырцинӕй куыдта.  Куыд тынг бузныг уыди Йегъовӕйӕ ӕмӕ йе ’фсымӕртӕй! Афтӕ дӕр-иу уыди, ӕмӕ-иу бынӕттон Ӕвдисӕнтӕ, рӕстӕгмӕ кӕм цардысты, уым-иу баззадысты иу афӕдз йе та фылдӕр, кӕд сӕ хӕдзӕрттӕ цалцӕггонд ӕрцыдысты, уӕддӕр. Цӕмӕн? Цӕмӕй-иу сӕ ног хӕдзӕртты цардаиккой, ӕххуысмӕ сӕм чи ӕрцыд, уыцы хотӕ ӕмӕ ӕфсымӕртӕ. Цӕй диссаджы хуызы равдыстой Чырыстийы уарзондзинад!

Рынчын чи у, уыдонмӕ Чырыстийы цӕстӕй кӕсут

16, 17. Нӕ бон куыд у, рынчын чи у, уыдонмӕ Чырыстийы цӕстӕй кӕсын?

¹⁶ Махӕй стӕмтӕ бавзӕрста йӕхиуыл, ӕрдзон бӕллӕх цы у, уый. Фӕлӕ алчи дӕр зоны, рынчын кӕнын цы у, уый – чи йӕхӕдӕг у рынчын, чи та йӕ бинонтӕй кӕмӕдӕр кӕсы. Рынчын чи у, уыдонмӕ цы цӕстӕй кӕсын хъӕуы, уымӕн нын Йесо у фӕзминаг. Уый адӕмы уарзта, ӕмӕ сын тӕригъӕд дӕр уымӕн кодта. Адӕм Йесомӕ сӕ рынчынты куы ӕрбакодтой, уӕд «сдзӕбӕх кодта рынчынты се ’ппӕты дӕр» (Матф. 8:16; 14:14).

¹⁷ Абон чырыстӕттӕн сӕ бон нӕу Йесойау рынчынты дзӕбӕх кӕнын. Фӕлӕ сын уыйау тӕригъӕд кӕнынц ӕмӕ сын сӕ рыст ӕмбарынц. Уый цӕмӕй бӕрӕг у? Зӕгъӕм, хистӕр нӕлгоймӕгтӕ ӕмбырды кӕмӕндӕрты бахӕс кӕнынц рынчын хотӕ ӕмӕ ӕфсымӕртӕм фӕкӕсын, ӕмӕ сӕ хъус фӕдарынц, цӕмӕй уыцы ӕххуыс афоныл уа. Уыдон, зӕгъӕн ис, фӕархайынц, Матфейы 25:39, 40 цы ныхӕстӕ ис, уымӕ гӕсгӕ *. (Бакӕс сӕ.)

18. Дыууӕ хойы се ’мчырыстонмӕ ӕцӕг уарзондзинад куыд равдыстой ӕмӕ сын цы бантыст?

¹⁸ Кӕй зӕгъын ӕй хъӕуы, цӕмӕй искӕмӕн хорздзинад саразай, уый тыххӕй ӕнӕмӕнг нӕу, ӕмӕ хистӕр нӕлгоймаг уай. Ӕркӕсӕм иу хабармӕ. 44-аздзыд хо Шарлин уыди ракӕй рынчын ӕмӕ йын дохтыртӕ загътой, дӕс боны йеддӕмӕ кӕй нал фӕцӕрдзӕн. Ӕмбырдӕй дыууӕ хойы, Шерон ӕмӕ Николет, уыдтой, Шарлин фӕкӕсинаг кӕй у, стӕй йӕ лӕджы цас тыхтӕ ӕмӕ хъарутӕ хъуыди, цӕмӕй йӕ рынчын усмӕ кастаид, уый дӕр. Уымӕ гӕсгӕ ацы дыууӕ хойы загътой, Шарлинмӕ кӕй фӕкӕсдзысты. Уый фӕцард дӕс боны нӕ, фӕлӕ иу мӕй ӕмӕ ӕрдӕджы бӕрц, фӕлӕ йӕ Шерон ӕмӕ Николет иу сахат дӕр иунӕгӕй нӕ ныууагътой, зылдысты йӕм суанг йӕ амӕлӕты онг. «Ӕвӕццӕгӕн, уымӕй зындӕр ницы ис, куы зонай, адӕймаг йӕ къахыл кӕй нал слӕудзӕн,– дзуры Шерон.– Фӕлӕ нын Йегъовӕ тых радта. Ацы хабар нӕ Йегъовӕмӕ дӕр баввахс кодта ӕмӕ кӕрӕдзимӕ дӕр». Шарлины лӕг дзуры: «Никуы мӕ ферох уыдзӕн, ацы дыууӕ хойы нын сӕ уды хардзӕй цы лӕггад бакодтой, уый. Мӕ зынаргъ ӕмӕ иузӕрдион Шарлиныл сыгъдӕгзӕрдӕйӕ кӕй тыхстысты ӕмӕ йын стыр ныфсы хос кӕй уыдысты, уымӕй йын йӕ фӕстаг фӕлварӕн фӕрогдӕр кодтой. Мӕхӕдӕг дӕр хуыздӕр уавӕры нӕ уыдтӕн, ӕмӕ ма мӕн дӕр фидар кодтой. Цӕрӕнбонты сӕ бузныг уыдзынӕн. Ахӕм удуӕлдайдзинад кӕй равдыстой, уый фӕрцы Йегъовӕйыл ноджы тынгдӕр баууӕндыдтӕн ӕмӕ ноджы тынгдӕр бауарзтон, нӕ организацийы цы хотӕ ӕмӕ ӕфсымӕртӕ ис, уыдоны».

19, 20. а) Чырыстийы миниуджытӕй цавӕртӕ равзӕрстам? ӕ) Дӕ фидар фӕнд цы у?

¹⁹ Ацы ӕртӕ статьяйы мах ӕркастыстӕм Йесойы миниуджытӕй фондзмӕ, стӕй ма равзӕрстам, нӕ бон куыд у Йесойы зондахаст ӕмӕ хъуыддӕгтӕ фӕзмын. Уӕдӕ Йесойау уӕм «фӕлмӕн ӕмӕ сӕрныллӕг» (Матф. 11:29). Архайӕм, цӕмӕй иннӕтӕм хӕларзӕрдӕ уӕм, кӕд се ’нӕххӕстдзинад ӕмӕ сӕ лӕмӕгъдзинӕдтӕ рабӕрӕг вӕййынц, уӕддӕр. Цӕй ӕмӕ хъӕбатыр уӕм ӕмӕ Йегъовӕйы коммӕ алкӕддӕр кӕсӕм, суанг фӕлварӕнтыл сӕмбӕлгӕйӕ дӕр.

²⁰ Ӕппынфӕстаг, цӕй ӕмӕ Чырыстийау не ’фсымӕрты уарзӕм – «бауарзӕм сӕ кӕронмӕ». Ахӕм уарзондзинад нӕм куы уа, уӕд бӕрӕг уыдзӕн, Чырыстийы фӕдылдзӕуджытӕ кӕй стӕм, уый (Иоан. 13:1, 34, 35). О, «дарддӕр дӕр нӕ кӕрӕдзийы ӕфсымӕртау уарзӕм» (Дзут. 13:1). Нӕ къухтӕ макуы ауадзӕм! Нӕ цард афтӕ аразӕм, цӕмӕй кадджын кӕнӕм Йегъовӕйы ӕмӕ иннӕтӕн ӕххуыс кӕнӕм! Йегъовӕ нын нӕ зӕрдиаг фыдӕбонӕн арфӕ кӕндзӕн.

[Фиппаинаг]

Куыд бамбарын кӕнис?

• Хистӕр нӕлгоймӕгтӕн сӕ бон куыд у, тӕригъӕд чи ракодта, уыдонмӕ Чырыстийы цӕстӕй кӕсын?

• Кӕроны рӕстӕджы уӕлдай ахсджиаг цӕмӕн у Чырыстийы уарзондзинад фӕзмын?

• Нӕ бон куыд у, рынчын чи у, уыдонмӕ Чырыстийы цӕстӕй кӕсын?

[Фарстатӕ ахуыр кӕнынӕн]

[Ныв 17 фарсыл]

Хистӕр нӕлгоймӕгты фӕнды, цӕмӕй Йегъовӕмӕ ӕрбаздӕхой, тӕригъӕд чи ракодта, уыдон

[Ныв 18 фарсыл]

Иерусалимӕй чи ралыгъд, уыдон Чырыстийы куыд бафӕзмыдтой?

[Ныв 19 фарсыл]

Йегъовӕйы Ӕвдисӕнты зонынц, Чырыстийау сӕ уарзондзинад хъуыддагӕй чи ӕвдисы, ахӕм адӕмӕй