«Уӕ удӕй арт уадзут»
«Уӕ удӕй арт уадзут»
«Уӕ хъуыддаджы зивӕггӕнаг ма ут. Уӕ удӕй арт уадзут. Йегъовӕйӕн цагъартау лӕггад кӕнут» (РОМ. 12:11).
1. Израилӕгтӕ цӕмӕн хастой Йегъовӕйӕн фосы нывӕндтӕ ӕмӕ ӕндӕр кувинӕгтӕ?
ЙЕГЪОВӔ тынг аргъ кӕны, йӕ лӕггадгӕнджытӕ йын зӕрдӕйӕ цы нывӕндтӕ хӕссынц, уыдонӕн. Уыцы нывӕндтӕй бӕрӕг вӕййы, кӕй йӕ уарзынц ӕмӕ сӕ йӕ фӕндон ӕххӕст кӕнын кӕй фӕнды, уый. Рагзаманты Йегъовӕйӕн хастой алыхуызон фосы нывӕндтӕ ӕмӕ ӕндӕр кувинӕгтӕ. Израилӕгтӕ Моисейы Закъонмӕ гӕсгӕ нывӕндтӕ хастой, цӕмӕй-иу сӕ тӕригъӕдтӕ хатыргонд ӕрцыдаиккой, стӕй-иу, Хуыцауӕй бузныг кӕй уыдысты, уый равдыстаиккой. Чырыстон ӕмбырд куы фӕзынд, уӕд Йегъовӕ ахӕм нывӕндтӕ нал домдта. Фӕлӕ апостол Павел Ромы чырыстӕттӕм цы фыстӕг ныффыста, уым бамбарын кодта, Хуыцау уӕддӕр цавӕрдӕр нывӕндтӕм кӕй ӕнхъӕлмӕ кӕсы. Уый тыххӕй фыст ис Ромӕгтӕм 12 сӕры. Ӕркӕсӕм, цавӕр нывӕндтӕ сты, уымӕ.
Удӕгас нывонд
2. Мах, чырыстӕттӕ, нӕ цард куыд аразӕм ӕмӕ уымӕ цы хауы?
2 Бакӕс Ромӕгтӕм 12:1, 2. Павел йӕ фыстӕджы райдианы бӕлвырд бамбарын кодта, Хуыцауы цӕсты-иу сӕрст чырыстӕттӕ – дзуттӕгтӕй дӕр ӕмӕ ӕндӕр адӕмыхӕттытӕй дӕр – рӕстгӕнджытыл нымад кӕй ӕрцыдысты сӕ хъуыддӕгтӕм гӕсгӕ нӕ, фӕлӕ сӕ уырнындзинадмӕ гӕсгӕ (Ром. 1:16; 3:20–24). Павел 12 сӕры зӕгъы, зӕгъгӕ, чырыстӕттӕ бузныг кӕй сты, уый хъуамӕ ӕвдисой сӕ удуӕлдай цардӕй. Уый тыххӕй та нӕ хъӕуы нӕ зонд ног кӕнын. Нӕ туджы ӕнӕххӕстдзинад кӕй рахастам, уымӕ гӕсгӕ стӕм «тӕригъӕд ӕмӕ мӕлӕты закъоны» цагъартӕ (Ром. 8:2). Уӕдӕ мах хъуамӕ, «нӕ зонд нын цы тых разӕнгард кӕны, уый» сног кӕнӕм ӕмӕ нӕ удыхъӕд цӕхгӕр фӕивӕм (Еф. 4:23). Ахӕм стыр ивындзинад скӕнын та нӕ бон суыдзӕн ӕрмӕстдӕр Хуыцау ӕмӕ йӕ сыгъдӕг уды фӕрцы. Стӕй ма хъуамӕ ӕппӕт тыхтӕй архайӕм, цӕмӕй ӕмбаргӕ уӕм. Уый ууыл дзурӕг у, ӕмӕ нӕ бон цы у, уый хъуамӕ аразӕм, цӕмӕй «ацы дунейы ӕгъдаумӕ гӕсгӕ мауал цӕрӕм», ома нӕхи хизӕм ӕнӕгъдаудзинадӕй, ӕнӕфсарм хиирхӕфсӕнтӕй ӕмӕ хӕлд зондахастӕй (Еф. 2:1–3).
3. Чырыстон хъуыддӕгты цӕмӕн архайӕм?
3 Павел ма нын дзуры, цӕмӕй ӕмбаргӕ уӕм ӕмӕ базонӕм, «цы у Хуыцауы фӕндон: цы йӕм кӕсы хорз, цы йын у ӕхсызгон ӕмӕ цы у йӕ цӕсты ӕххӕст». Библи алы бон дӕр цӕмӕн фӕкӕсӕм ӕмӕ цы бакӕсӕм, ууыл цӕмӕн фӕхъуыды кӕнӕм? Хуыцаумӕ цӕмӕн фӕкувӕм? Чырыстон фембӕлдтӕм цӕмӕн фӕцӕуӕм ӕмӕ хорз хабар цӕмӕн фӕхъусын кӕнӕм? Хистӕр нӕлгоймӕгтӕ нӕ кӕй фӕразӕнгард кӕнынц, ӕрмӕстдӕр уый тыххӕй? Се ’ххуысы тыххӕй сӕ бузныг кӕй стӕм, ууыл дзырд дӕр нӕй. Фӕлӕ чырыстон хъуыддӕгты уымӕн архайӕм, ӕмӕ нӕ Хуыцауы сыгъдӕг уд разӕнгард кӕны, цӕмӕй ӕвдисӕм, Йегъовӕйы ӕппӕт зӕрдӕйӕ кӕй уарзӕм, уый. Уымӕй уӕлдай ма нӕ алчи дӕр фидарӕй зоны, Хуыцауы кӕй фӕнды, цӕмӕй афтӕ аразӕм (Зах. 4:6; Еф. 5:10). Нӕ цард Библийы уагӕвӕрдтӕм гӕсгӕ куы аразӕм, уӕд Хуыцауы зӕрдӕ рухс кӕндзыстӕм. Ӕмӕ ууыл куы фӕхъуыды кӕнӕм, уӕд нын уый фӕхӕссы стыр циндзинад ӕмӕ удӕнцой.
Алыхуызон лӕвӕрттӕ
4, 5. Хистӕр нӕлгоймӕгтӕ сӕ лӕвӕрттӕй куыд хъуамӕ пайда кӕной?
4 Бакӕс Ромӕгтӕм 12:6–8, 11. Павел ӕмбарын кӕны, Хуыцау нӕ «йе стыр хорзӕхмӕ гӕсгӕ алыхуызон лӕвӕрттӕй» кӕй схайджын кодта. Павел цы лӕвӕртты кой кодта, уыдонӕй иуӕй-иутӕ – иннӕты фӕдзӕхсын ӕмӕ сын разамынд дӕттын – сӕйраджыдӕр хауынц, «зӕрдиагӕй» зонд чи хъуамӕ амона, уыцы хистӕр нӕлгоймӕгтӕм.
5 Павелы ныхӕстӕм гӕсгӕ цӕстдарджытӕ афтӕ зӕрдиагӕй хъуамӕ архайой иннӕты ахуыр кӕнгӕйӕ дӕр ӕмӕ сӕ лӕггад ӕххӕст кӕнгӕйӕ дӕр. Ацы стихты контекстӕй зыны, Павел кӕй дзуры ӕмбырды лӕггад кӕныны тыххӕй, ӕмбырд та абарста «буаримӕ» (Ром. 12:4, 5). Уыцы лӕггад у, Хъуыддӕгты 6:4 апостолтӕ цы куысты кой кӕнынц, уый хуызӕн: «Мах... нӕ рӕстӕг ӕмӕ нӕ хъарутӕ ратдзыстӕм кувынӕн ӕмӕ Хуыцауы ныхас амонынӕн». Куыд зыны, афтӕмӕй хистӕр нӕлгоймӕгтӕ сӕ лӕвӕрттӕй фӕпайда кӕнынц хотӕ ӕмӕ ӕфсымӕрты фидар кӕнынӕн. Сӕ лӕггадыл ӕнувыд кӕй сты, уый бӕрӕг вӕййы, разамынд ӕмӕ амындтӕ Хуыцауы Ныхасӕй кӕй фӕдӕттынц, уымӕй. Уымӕн та сын ӕххуыс кӕны, сӕхӕдӕг Библи кӕй кӕсынц ӕмӕ йӕ кӕй иртасынц, стӕй иннӕты кӕй ахуыр кӕнынц ӕмӕ сын сӕ уырнындзинадыл кӕй тыхсынц, уый. Цӕстдарджытӕ хъуамӕ сӕ лӕвӕрттӕй ӕнӕзӕрдӕхудтӕй пайда кӕной ӕмӕ фыстыл «зӕрдӕйӕ» тыхсой (Ром. 12:7, 8; 1 Пет. 5:1–3).
6. Нӕ бон куыд у Ромӕгтӕм 12:11 лӕвӕрд уынаффӕмӕ хъусын?
6 Павел дарддӕр загъта: «Уӕ хъуыддаджы зивӕггӕнаг ма ут. Уӕ удӕй арт уадзут. Йегъовӕйӕн цагъартау лӕггад кӕнут». Кӕд нӕ лӕггадмӕ уазал цӕстӕй кӕсын райдыдтам, уӕд нӕ чи зоны бахъӕуа цавӕрдӕр ивындзинӕдтӕ скӕнын. Зӕгъӕм, Библи ӕмӕ нӕ литературӕ куыд ахуыр кӕнӕм, уый фӕхуыздӕр кӕнын. Стӕй Йегъовӕмӕ зӕрдӕбындӕрӕй кувын ӕмӕ дзы арӕхдӕр йӕ сыгъдӕг уд курын. Сыгъдӕг уд та нын баххуыс кӕндзӕн, цӕмӕй хъӕрмуст мауал уӕм ӕмӕ та нӕ зӕрдӕйы зынг ногӕй ссудза (Лук. 11:9, 13; Рарг. 2:4; 3:14, 15, 19). Хуыцауы сыгъдӕг уд фыццаг чырыстӕтты разӕнгард кодта, цӕмӕй «Хуыцауы стыр хъуыддӕгты тыххӕй» иннӕтӕн дзырдтаиккой (Ап. хъ. 2:4, 11). Раст афтӕ мах дӕр разӕнгард кӕндзӕн, цӕмӕй зынгзӕрдӕ уӕм, нӕ «удӕй арт уадзӕм».
Сӕрныллӕг ӕмӕ бонзонгӕ
7. Хуыцауӕн лӕггад кӕнгӕйӕ сӕрныллӕг ӕмӕ бонзонгӕ цӕмӕн хъуамӕ уӕм?
7 Бакӕс Ромӕгтӕм 12:3, 16. Цы лӕвӕрттӕй стӕм хайджын, уыдон нӕм сты Йегъовӕйы «стыр хорзӕхы» фӕрцы. Павел уый тыххӕй ныффыста: «Уый нӕхи хъарутӕй нӕ бафтыд нӕ къухы – уый Хуыцауы фӕрцы у» (2 Кор. 3:5). Уымӕ гӕсгӕ мах хъуамӕ нӕхицӕй ма ныббуц уӕм. Хъуамӕ уӕм сӕрныллӕг ӕмӕ ӕмбарӕм, нӕ лӕггады ӕнтыстджын нӕхи хъаруты фӕрцы кӕй не стӕм, фӕлӕ нын Хуыцау кӕй арфӕ кӕны, уый фӕрцы (1 Кор. 3:6, 7). Уый тыххӕй Павел загъта: «Алкӕмӕн дӕр [уӕ] дзурын: цы стут, уӕхицӕй уымӕй фылдӕр ӕнхъӕл ма ут». Йегъовӕйӕн лӕггад кӕнын нын цин ӕмӕ удӕнцой кӕй хӕссы, уый хорз у, стӕй, нӕхицӕн кӕй аргъ кӕнӕм, уым дӕр ӕвзӕрӕй ницы ис, фӕлӕ нӕ бон алцы кӕй нӕу, уый куы ӕмбарӕм, уӕд никуы схъал уыдзыстӕм. Уый бӕсты архайдзыстӕм, «бонзонгӕ куыд уӕм».
8. Цы нын баххуыс кӕндзӕн, цӕмӕй «нӕхимӕ зондджын ма кӕсӕм»?
8 Раст нӕ уаид, не ’нтыстытӕй куы ӕппӕликкам. Ӕппӕт дӕр аразгӕ у Хуыцауӕй (1 Кор. 3:7). Павел зӕгъы, зӕгъгӕ, Хуыцау ӕмбырды алкӕй дӕр схайджын кодта уырнындзинадӕй. Мах хъуамӕ нӕхи иннӕтӕй уӕлдӕр ма ’вӕрӕм, фӕлӕ аргъ кӕнӕм, «Хуыцау [сын] цы уырнындзинад радта, уымӕ гӕсгӕ» сын цы ӕнтысы, уымӕн. Павел ма загъта: «Уӕхимӕ цы цӕстӕй кӕсут, ахӕм цӕстӕй кӕсут иннӕтӕм дӕр». Ӕндӕр фыстӕджы та апостол радта ахӕм уынаффӕ: «Мацы аразут загъдгӕнгӕйӕ кӕнӕ кадмондагӕй, фӕлӕ ут сӕрныллӕг ӕмӕ иннӕты уӕхицӕй уӕлдӕр ӕвӕрут» (Фил. 2:3). Хъуамӕ уӕм ӕцӕгдӕр сӕрныллӕг ӕмӕ ӕппӕт тыхтӕй архайӕм, цӕмӕй бамбарӕм, нӕ хотӕ ӕмӕ не ’фсымӕртӕ цавӕрдӕр хъуыддӕгты махӕй хуыздӕр кӕй сты. Сӕрныллӕгдзинад нӕ бахъахъхъӕндзӕн, цӕмӕй «нӕхимӕ зондджын ма кӕсӕм». Чырыстӕттӕй ӕмбырды цавӕрдӕр кадджын хӕстӕ кӕмӕн ис, уыдонмӕ гӕнӕн ис иннӕтӕ се ’ргом тынгдӕр здахой. Фӕлӕ нӕ алкӕмӕн дӕр ӕхсызгон вӕййы, адӕмы цӕсты кадджын цы куыстытӕ не сты, уыдон сӕрныллӕгӕй кӕнын (1 Пет. 5:5).
Нӕ чырыстон иудзинад
9. Павел сӕрст чырыстӕтты буары уӕнгтимӕ цӕмӕн абарста?
9 Бакӕс Ромӕгтӕм 12:4, 5, 9, 10. Павел сӕрст чырыстӕтты абарста иу буары уӕнгтимӕ. Уыдон ӕмвӕнд-ӕмзондӕй лӕггад кӕнынц сӕ Сӕр Чырыстийы разамындӕй (Кол. 1:18). Павел Хуыцауы сыгъдӕг удӕй гуырд чырыстӕттӕн сӕ зӕрдыл лӕууын кӕны, адӕймаджы буары бирӕ уӕнгтӕ кӕй ис ӕмӕ се ’ппӕт дӕр алыхуызон куыст кӕй кӕнынц. Ӕмӕ афтӕ уыдон дӕр, «кӕд бирӕ сты, уӕддӕр иу буар сты – Чырыстиимӕ иумӕ». Ахӕм ныхӕстӕ ма ныффыста Ефесы сӕрст чырыстӕттӕм дӕр: «Уарзондзинады куыд рӕзӕм ӕмӕ алцӕмӕй дӕр буарӕн йӕ сӕр Чырыстийы хуызӕн куыд суӕм. Дарддӕр уымӕй рӕзы ӕгас буар дӕр: буары уӕнгтӕ кӕрӕдзийыл хӕцынц ӕмӕ иумӕ сӕ куыст кӕнынц алыхуызон нуӕртты фӕрцы; уыцы нуӕрттӕй алкӕцыдӕр кӕны йӕхи куыст, буары алы уӕнг дӕр куыд архайы, уымӕ гӕсгӕ – ӕмӕ афтӕмӕй буар ӕгасӕй дӕр рӕзы ӕмӕ фидар кӕны уарзондзинады» (Еф. 4:15, 16).
10. «Ӕндӕр фыстӕ» кӕй коммӕ хъуамӕ кӕсой?
10 Кӕд «ӕндӕр фыстӕ» Чырыстийы «буары уӕнгтӕм» нӕ хауынц, уӕддӕр ацы цӕвиттонӕй сӕ бон у бирӕ цыдӕртӕ базонын (Иоан. 10:16). Павел загъта, зӕгъгӕ, Йегъовӕ «ӕппӕт дӕр ӕрӕвӕрдта [Чырыстийы] къӕхты бын, ӕмӕ йӕ ӕмбырдӕн ӕххуысӕн ӕппӕты сӕргъы сӕвӕрдта» (Еф. 1:22). Абон ӕндӕр фыстӕ хауынц, Йегъовӕ йӕ Фырты бӕрны кӕй бакодта, уыдоны нымӕцмӕ. Стӕй ма хауынц, Чырысти «ӕууӕнкджын ӕмӕ зондджын цагъары» бар «цыдӕриддӕр» бакодта, уыдонмӕ дӕр (Матф. 24:45–47). Фӕлӕ зӕххыл цӕрыны ныфс кӕмӕн ис, уыцы адӕм хъуамӕ Чырыстийы нымайой сӕ Хицауыл ӕмӕ хъусой ӕууӕнкджын ӕмӕ зондджын цагъармӕ ӕмӕ йӕ Разамонӕг советмӕ, стӕй ӕмбырдты цӕстдарджытӕй ӕвӕрд чи у, уыцы нӕлгоймӕгтӕм дӕр (Дзут. 13:7, 17). Уый ахъаз кӕны чырыстон иудзинадӕн.
11. Цӕуыл ӕнцайы нӕ иудзинад ӕмӕ Павел цавӕр уынаффӕтӕ радта?
11 Ахӕм иудзинад ӕнцайы уарзондзинадыл, «уымӕн ӕмӕ уый хуызӕн ницы иу кӕны ӕмӕ ницы бӕтты кӕрӕдзийыл» (Кол. 3:14). Афтӕ кӕй у, уый Павел Ромӕгтӕм 12 сӕры бахахх кодта, куы загъта, зӕгъгӕ, нӕ уарзондзинад хъуамӕ уа «ӕнӕхин» ӕмӕ кӕрӕдзи хъуамӕ «уарзӕм ӕфсымӕртау, фӕлмӕн уарзтӕй». Афтӕмӕй кӕрӕдзийӕн аргъ кӕндзыстӕм. Павел дзуры: «Кӕрӕдзийӕн кад кӕнынмӕ уӕ иу иннӕмӕ ӕнхъӕлмӕ ма кӕсӕд». Кӕй зӕгъын ӕй хъӕуы, адӕймаг ӕцӕг уарзтӕй уарза ӕмӕ тӕнзӕрдӕ уа, уыдон иу не сты. Мах хъуамӕ ӕппӕт дӕр аразӕм, цӕмӕй ӕмбырд сыгъдӕг уа. Павел уарзондзинады тыххӕй уынаффӕ куы радта, уӕд ма йӕ ныхӕстӕм бафтыдта: «Ӕвзӕрдзинадӕй уе сӕфт уынут, хорз цы у, ууыл та фидар хӕцут».
Ут уазӕгуарзон
12. Уазӕгуарзондзинады тыххӕй рагон Македонийы чырыстӕттӕй цӕуыл ахуыр кӕнӕм?
12 Бакӕс Ромӕгтӕм 12:13. Ӕфсымӕрты кӕй уарзӕм, уымӕ гӕсгӕ «сыгъдӕджытӕ хъуаг цӕмӕй ӕййафой, уымӕй-иу сӕм фӕкӕсдзыстӕм» ӕмӕ уый кӕндзыстӕм нӕ уавӕртӕм гӕсгӕ. Хъӕздыг куы нӕ уӕм, уӕддӕр нӕм цы ис, уымӕй сын хай кӕндзыстӕм. Македонийы чырыстӕтты тыххӕй Павел фыста: «Уыдон бахаудысты стыр фӕлварӕны, тыхст уавӕры. Фӕлӕ кӕд тынг мӕгуыр сты, уӕддӕр сӕ зӕрдӕ дзаг уыди цинӕй, ӕмӕ диссаджы рӕдау кӕй разындысты, уымӕй равдыстой, уырнындзинадӕй хъӕздыг кӕй сты. Уыдон сарӕзтой, сӕ бон цыдӕриддӕр уыди, уый, ӕмӕ уымӕй дӕр фылдӕр – мӕхӕдӕг ӕвдисӕн. Сӕхӕдӕг нын зӕрдиагӕй лӕгъстӕ кодтой, зӕгъгӕ, мах дӕр уый аккаг скӕнут, ӕмӕ исты раттӕм ӕмӕ не ’ххуысы хай бахӕссӕм [Иудейы] сыгъдӕджытӕн балӕггад кӕныны хъуыддагмӕ» (2 Кор. 8:2–4). Македонийы чырыстӕттӕ кӕд мӕгуыр цардысты, уӕддӕр тынг рӕдау уыдысты. Уыдон сӕхицӕн стыр кадыл нымадтой Иудейы цӕрӕг ӕфсымӕртӕн баххуыс кӕнын.
13. Цы нысан кӕнынц ныхӕстӕ, зӕгъгӕ, «ут уазӕгуарзон»?
13 «Ут уазӕгуарзон»-ӕй цы грекъаг дзырдбаст ратӕлмац кодтой, уый нысан кӕны, уазӕджы сбуц кӕнынмӕ-иу кӕй хъуамӕ фӕраздӕр уӕм. 1994 азы уагъд «Ног Фӕдзӕхст ӕмӕ Псалтир»-ы та ацы дзырдбаст тӕлмац у афтӕ: «Ӕнувыд ут фӕндаггӕгты суазӕг кӕныныл». Адӕймаг искӕй куы фӕхоны, уӕд уымӕй дӕр равдисы уазӕгуарзондзинад, ӕмӕ уый зӕрдиагӕй куы фӕкӕны, уӕд раппӕлинаг вӕййы. Уазӕгуарзондзинад ма равдисӕн ис ӕндӕр хуызы дӕр. Зӕгъӕм, кӕд нӕ нӕ къух нӕ амоны йе та не ’нӕниздзинады аххосӕй нӕ бон фынг ӕрӕвӕрын нӕу, уӕддӕр нӕ алкӕй бон дӕр у иннӕты цай, къофимӕ фӕхонын.
14. а) «Уазӕгуарзон»-ӕй тӕлмац грекъаг дзырд цавӕр дзырдтӕй арӕзт у? ӕ) Ӕрцӕуӕггӕгтыл кӕй тыхсӕм, уый нӕ бон куыд у уацамынды ӕвдисын?
14 Нӕ уазӕгуарзондзинадӕй бӕрӕг вӕййы, адӕммӕ цы цӕстӕй кӕсӕм, уый. «Уазӕгуарзон»-ӕй тӕлмац грекъаг дзырд арӕзт у дзырдтӕй «уарзондзинад» ӕмӕ «фӕндаггон». Цы зӕрдӕ дарӕм фӕндаггӕгтӕм, йе та ӕрцӕуӕггӕгтӕм? Чырыстӕттӕй ӕндӕр ӕвзаг чи ахуыр кӕны ӕмӕ се ’мбырды территорийы чи цӕры, уыцы ӕрцӕуӕггӕгтӕн хорз хабар чи хъусын кӕны, уыдоны ӕцӕгдӕр схонӕн ис уазӕгуарзон. Кӕй зӕгъын ӕй хъӕуы, нӕ фылдӕрӕн сӕ бон нӕу ӕндӕр ӕвзаг сахуыр кӕнын, фӕлӕ нын уыцы хъуыддаджы стыр ӕххуыс у брошюрӕ «Благая весть для людей из всех народов». Хорз хабар дзы фыст ис бирӕ ӕвзӕгтыл. Уацамынды дзы спайда кодтай? Кӕд о, уӕд радзур исты цымыдисаг цау.
Уӕ хъыг ӕмӕ уӕ цин иу уӕнт
15. Ромӕгтӕм 12:15 лӕвӕрд уынаффӕ куыд ӕххӕст кӕнын хъӕуы, уымӕн нын Йесо фӕзминаг куыд у?
15 Бакӕс Ромӕгтӕм 12:15. Павел ам цы уынаффӕ радта, уый хуымӕтӕгӕй ис афтӕ зӕгъӕн: иннӕты рис ӕмбарут. Мах хъуамӕ сахуыр уӕм иннӕты ӕмбарын ӕмӕ сӕ уавӕры цӕуын – сӕ циныл сын цин кӕнын, сӕ мастыл та – маст. Нӕ удӕй арт куы уадзӕм, уӕд бӕрӕг уыдзӕн, иннӕты циныл кӕй цин кӕнӕм, йе та иннӕты рис кӕй ӕмбарӕм, уый. Чырыстийы 70 ахуыргӕнинаджы сӕ уацамындон балцӕй цингӕнгӕ куы ӕрбаздӕхтысты ӕмӕ сын цы бантыст, уый тыххӕй куы радзырдтой, уӕд Йесойыл «ӕрцыд сыгъдӕг уд ӕмӕ йӕ зӕрдӕ цинӕй байдзаг» (Лук. 10:17–21). Уый дӕр семӕ цин кодта. Йесо ма иннӕтимӕ хъыг дӕр кодта, йӕ хӕлар Лазӕр куы амард, уӕд (Иоан. 11:32–35).
16. Не ’мчырыстӕтты цин ӕмӕ нӕм хъыг кӕй хъары, уый нӕ бон ӕвдисын куыд у ӕмӕ сӕйраджыдӕр афтӕ чи хъуамӕ кӕна?
16 Мах дӕр фӕнды Йесойау иннӕты фӕлмӕн уарзтӕй уарзын. Нӕ хотӕй ӕмӕ не ’фсымӕртӕй исчи истӕуыл куы фӕцин кӕны, уӕд мах дӕр фӕфӕнды семӕ цин кӕнын. Кӕнӕ та сӕ исчи фыдӕвзарӕнты куы бахауы, йе та йыл исты уӕззау хабар куы ’рцӕуы, уӕд нын уый хъыг вӕййы ӕмӕ сыл нӕ зӕрдӕ фӕриссы. Арӕх зӕрдӕрыст хо кӕнӕ ӕфсымӕрӕн йӕ уаргъ фӕрогдӕр кӕнын нӕ бон свӕййы, рӕстӕг ын куы ссарӕм ӕмӕ йӕм лӕмбынӕг куы байхъусӕм, уӕд. Ӕмӕ сын хатт сӕ маст нӕ зӕрдӕмӕ афтӕ тынг айсӕм, ӕмӕ нӕ цӕссыг дӕр ӕркӕлы (1 Пет. 1:22). Иннӕтӕн сӕ рис ӕмбарыны тыххӕй Павел цы уынаффӕ радта, уый сӕйраджыдӕр хауы хистӕр нӕлгоймӕгтӕм.
17. Ромӕгтӕм 12 сӕрӕй цы базыдтам ӕмӕ цӕуыл цӕудзӕн дзырд иннӕ статьяйы?
17 Ромӕгтӕм 12 сӕрӕй цы стихтӕ равзӕрстам, уыдоны ис хорз уынаффӕтӕ, ӕмӕ нын баххуыс кӕндзысты нӕхи царды дӕр ӕмӕ не ’фсымӕртимӕ куыд хъуамӕ цӕрӕм, уыцы хъуыддаджы дӕр. Иннӕ статьяйы та ӕркӕсдзыстӕм, ацы сӕрӕй ма цы стихтӕ баззад, уыдонмӕ ӕмӕ аныхас кӕндзыстӕм, чырыстон чи нӕу, стӕй нӕ ныхмӕ чи цӕуы ӕмӕ нӕ чи ӕфхӕры, уыцы адӕммӕ цы цӕстӕй хъуамӕ кӕсӕм, ууыл.
Нӕ зӕрдыл ӕрлӕууын кӕнӕм
• «Нӕ удӕй арт [кӕй] уадзӕм», уый куыд ӕвдисӕм?
• Хуыцауӕн лӕггад кӕнгӕйӕ сӕрныллӕг ӕмӕ бонзонгӕ цӕмӕн хъуамӕ уӕм?
• Не ’мчырыстӕтты рис кӕй ӕмбарӕм ӕмӕ сын кӕй тӕригъӕд кӕнӕм, уый нӕ бон куыд у ӕвдисын?
[Фарстатӕ ахуыр кӕнынӕн]
[Нывтӕ 4 фарсыл]
Ацы хъуыддӕгтӕ цӕмӕн хъуамӕ кӕнӕм?
[Ныв 6 фарсыл]
Куыд у нӕ бон ӕрцӕуӕггӕгтӕн ӕххуыс кӕнын, цӕмӕй Паддзахады тыххӕй базоной?
