Кӕсджыты фарстатӕ

Фембӕлдты ӕмӕ конгрессты хо къухӕй амонгӕ ӕвзагмӕ раныхӕстӕ куы фӕтӕлмац кӕны, уӕд ӕй сӕрбӕттӕн ныккӕнын фӕхъӕуы?

Куыд зонӕм, афтӕмӕй сылгоймаг сӕрбӕттӕн ныккӕны, йӕ сӕры хицауӕн йе та ӕмбырды ӕндӕр искӕцы ӕфсымӕрӕн йӕ бӕрны цы хӕстӕ вӕййы, уыдон куы феххӕст кӕны, уӕд. Ацы хъуыддаг раст у, апостол Павел цы уагӕвӕрд радта, уымӕ гӕсгӕ. Уый ныффыста, зӕгъгӕ, «сылгоймаг... гомсӕрӕй куы кува кӕнӕ пехуымпар-ныхас куы кӕна, уӕд уый... йӕ сӕр худинаг кӕны», уымӕн ӕмӕ «сылгоймагӕн йӕ сӕрыхицау у нӕлгоймаг» (1 Кор. 11:3–10). Ахӕм уавӕрты хо йӕ сӕрыл сӕрбӕттӕн куы кӕна, уӕд уымӕй ӕвдисдзӕн, Хуыцау чырыстон ӕмбырды цы ӕгъдау ӕрӕвӕрдта, уымӕн кӕй аргъ кӕны (1 Тим. 2:11, 12) *.

Фӕлӕ хо къухӕй амонгӕ ӕвзагмӕ ӕфсымӕры раныхас куы тӕлмац кӕна, уӕд ӕй куыд бакӕнын хъӕуы? Ахӕм уавӕры хо ныхасмӕхъусджытӕн ӕрмӕстдӕр ӕххуыс кӕны, цӕмӕй бамбарой, ӕфсымӕр сын сценӕйӕ цы дзуры, уый. Ӕмӕ хотӕ ӕмӕ ӕфсымӕрты уый нӕ фӕахуыр кӕны. Уыдоны фӕахуыр кӕны, кӕй ныхӕстӕ тӕлмац кӕны, уыцы ӕфсымӕр. Фӕлӕ къухӕй амонгӕ ӕвзагмӕ куыд тӕлмац кӕнынц, уый тынг хицӕн кӕны, хъусгӕ чи кӕны, уыцы адӕмы ӕвзӕгтӕм куыд тӕлмац кӕнынц, уымӕй. Ахӕм ӕвзӕгтӕм куы фӕтӕлмац кӕнынц, уӕд хъусджытӕн сӕ бон вӕййы кӕсын ӕфсымӕрмӕ ӕмӕ ма хъусын тӕлмацгӕнӕгмӕ дӕр. Ахӕм уавӕры хъусджытӕн се ’ргом хомӕ арӕзт нӕ вӕййы. Тӕлмацгӕнгӕйӕ хойӕн хатт йӕ бон вӕййы бадын дӕр. Лӕугӕ куы фӕкӕны, уӕд та йӕ бон вӕййы кӕсын, ныхасы чи рацӕуы, уыцы ӕфсымӕрмӕ, залмӕ нӕ фӕлӕ. Уымӕ гӕсгӕ ӕнӕуи ӕвзагмӕ чи фӕтӕлмац кӕны, уыцы хойӕн йӕ бон у, ӕмӕ сӕрбӕттӕн ма ныккӕна.

 Абон программӕ къухӕй амонгӕ ӕвзагмӕ куы фӕтӕлмац кӕнынц, уӕд уый равдисынӕн арӕхдӕр фӕпайда кӕнынц техникӕйӕ, ӕмӕ уымӕ гӕсгӕ хотӕ ӕмӕ ӕфсымӕртӕ фылдӕр фӕкӕсынц тӕлмацгӕнӕгмӕ. Тӕлмацгӕнӕджы равдисынц стыр экраныл, ныхасы чи рацӕуы, уый та гӕнӕн ис аудиторимӕ зынгӕ дӕр ма кӕна. Уымӕ гӕсгӕ раст уаид, къухӕй амонгӕ ӕвзагмӕ чи фӕтӕлмац кӕны, уыцы хо-иу йӕ сӕрыл сӕрбӕттӕн куы ныккӕнид, ӕмӕ-иу афтӕмӕй куы равдисид, ӕрмӕстдӕр тӕлмацгӕнӕг кӕй у, уый.

Ацы ног амынд куыд ӕндавы къухӕй амонгӕ ӕвзагмӕ тӕлмац кӕныныл? Зӕгъӕм, куыд хъуамӕ тӕлмац кӕной Хуыцауы Ныхас хъусынгӕджыты Скъолайы программӕйы хӕйттӕ ӕмӕ равдыстытӕ? Йе та ӕмбырдимӕ Библийы ахуыры, Хъусын кӕныны фембӕлды ӕмӕ «Хъахъхъӕнӕн мӕсыджы» ахуыры рӕстӕджы фарстатӕн цы дзуаппытӕ фӕдӕттынц, уыдон? Ацы фембӕлдты къухӕй амонгӕ ӕвзагмӕ чи тӕлмац кӕна, уыцы хойы сӕрбӕттӕн кӕнын хъӕуы? Куыд зыны, афтӕмӕй йӕ цавӕрдӕр уавӕрты сӕрбӕттӕн кӕнын нӕ хъӕудзӕн, уымӕн ӕмӕ иууылдӕр хъуамӕ ӕмбарой, фембӕлд уый кӕй нӕ уадзы. Зӕгъӕм, сӕрбӕттӕн кӕнын ӕй нӕ хъӕуы, хъусджыты дзуаппытӕ, хоты хӕслӕвӕрдтӕ йе та равдыстытӕ куы тӕлмац кӕна, уӕд. Фӕлӕ йӕ сӕрыл хъуамӕ сӕрбӕттӕн ныккӕна, уыцы фембӕлдты рӕстӕджы ӕфсымӕрты раныхӕстӕ куы тӕлмац кӕна, уӕд, стӕй ма «Хъахъхъӕнӕн мӕсыджы» ахуыр йе та ӕмбырдимӕ Библийы ахуыр чи уадза, уыцы ӕфсымӕры ныхӕстӕ куы тӕлмац кӕна, уӕд дӕр. Сӕрбӕттӕн ма йыл хъуамӕ уа, хъусӕй чи нӕ хъусы, уыцы хотӕ ӕмӕ ӕфсымӕртӕн зарджытӕ зарынӕн ӕххуысгӕнгӕйӕ дӕр. Фембӕлды рӕстӕджы йӕ гӕнӕн ис бахъӕуа тӕлмац кӕнын ӕфсымӕртӕ, хотӕ, сывӕллӕттӕ ӕмӕ хистӕр нӕлгоймӕгты. Уымӕ гӕсгӕ, растдӕр уаид, йӕ сӕрбӕттӕн-иу ӕмбырды рӕстӕджы куы нӕ сисид.

[Фиппаинаг]