Уӕ уарзондзинад тыхджындӕр кӕнӕд

«Чырысти сымах куыд бауарзта... афтӕ сымах дӕр цӕрут кӕрӕдзи уарзгӕйӕ» (ЕФ. 5:2).

1. Чырыстийы ныхӕстӕм гӕсгӕ йӕ ахуыргӕнинӕгтӕ цавӕр ахсджиаг хъуыддагӕй уыдзысты бӕрӕг?

ЙЕГЪОВӔЙЫ ӔВДИСӔНТЫ алкӕмдӕр зонынц, хорз хабар хӕдзарӕй хӕдзармӕ кӕй хъусын кӕнынц, уымӕй. Фӕлӕ ма Йесо Чырысти дзырдта, йӕ ахуыргӕнинӕгтӕ бӕрӕг цӕмӕй дардзысты, ӕндӕр ахӕм хъуыддаджы тыххӕй дӕр. Йесо загъта: «Дӕттын уын ног фӕдзӕхст: уӕ кӕрӕдзийы уарзут. Ӕз уӕ куыд бауарзтон, сымах дӕр афтӕ уарзут уӕ кӕрӕдзийы. Мӕ ахуыргӕнинӕгтӕ кӕй стут, уый адӕм иууылдӕр уымӕй базондзысты, ӕмӕ уе ’хсӕн уарзондзинад куы уа» (Иоан. 13:34, 35).

2, 3. Не ’хсӕн цы уарзондзинад ис, уый куыд бандавы, не ’мбырдтӕм чи ӕрбацӕуы, уыдоныл?

² Ӕцӕг чырыстӕтты ’хсӕн цы уарзондзинад ис, иннӕ адӕмы ’хсӕн ахӕм уарзондзинад нӕй. Магнит йӕхимӕ ӕфсӕйнаг куыд ӕлвасы, афтӕ уарзондзинад дӕр Йегъовӕйы лӕггадгӕнджыты кӕрӕдзимӕ ӕлвасы ӕмӕ уый уынгӕйӕ сыгъдӕгзӕрдӕ адӕмы дӕр Хуыцауӕн лӕггад кӕнын бафӕнды. Зӕгъӕм, Камеруны иу лӕг Марселинойыл куысты цыдӕр бӕллӕх ӕрцыд ӕмӕ бакуырм. Уыцы хабары фӕстӕ ахъӕр, зӕгъгӕ, хингӕнӕг кӕй у, уый тыххӕй бакуырм. Марселинойӕн йӕ аргъуаны пастор ӕмӕ йе ’муырнонтӕ ныфсытӕ нӕ бавӕрдтой, фӕлӕ йӕ аргъуанӕй ратардтой. Марселинойы иу Йегъовӕйы Ӕвдисӕн ӕмбырдмӕ куы фӕхуыдта, уӕд ацӕуын нӕ уӕндыд. Тарст, уырдыгӕй дӕр та йӕ куы ратӕрой, уымӕй.

³ Марселинойыл Паддзахады залы куыд бацин кодтой, уый йӕм тынг диссаг фӕкаст. Стӕй Библийӕ цы базыдта, уый йын йӕ зӕрдӕйы ныфс бауагъта. Уӕдӕй фӕстӕмӕ алы ӕмбырдмӕ дӕр цыд, Библи ахуыр кодта ӕмӕ 2006 азы донаргъуыд райста. Ныр йӕ бинонтӕн ӕмӕ йӕ сыхӕгтӕн хорз хабар фӕдзуры, стӕй ма цалдӕр адӕймагимӕ Библи ахуыр кӕны. Марселинойы тынг фӕнды, цӕмӕй, Библи кӕимӕ ахуыр кӕны, уыдон дӕр сӕхӕдӕг базоной, Хуыцауы адӕмы ’хсӕн цы уарзондзинад ис, уый.

4. Павелы ныхӕстӕм гӕсгӕ «кӕрӕдзи уарзгӕйӕ» цӕмӕн хъуамӕ цӕрӕм?

⁴ Фӕлӕ не ’хсӕн цы уарзондзинад ис, уый йӕхигъӕдӕй нӕ фӕзыны. Зӕгъӕм, улӕфынмӕ чи ацӕуы, уыдон изӕры арт куы скӕнынц, уӕд йӕ рухс ӕмӕ йӕ хъарммӕ се ’ппӕт дӕр ӕрбамбырд вӕййынц. Фӕлӕ арты фарсмӕ чи бады, уыдон дзы сугтӕ куы не ’ппарой, уӕд ахуысдзӕн. Афтӕ у, не ’мбырдты цы уарзондзинад ис, уый хабар дӕр: уыцы уарзондзинад фидар кӕныныл алы чырыстон дӕр куы нӕ архайа, уӕд ӕруазал уыдзӕн. Нӕ бон цы у аразын? Апостол Павел ныффыста: «Чырысти сымах куыд бауарзта ӕмӕ йӕхи сымах сӕрвӕлтау кувинагӕн ӕмӕ нывондӕн куыд ӕрхаста, ӕмӕ йӕ нывонды тӕф Хуыцауӕн адджын куыд уыд, афтӕ сымах дӕр цӕрут кӕрӕдзи уарзгӕйӕ» (Еф. 5:2). Аныхас кӕнӕм, махӕй алкӕмӕн дӕр йӕ бон куыд у йӕ уарзондзинад ӕвдисын.

«Уӕ зӕрдӕтӕ уӕрӕх байгом кӕнут»

5, 6. Павел Коринфы чырыстӕттӕн цӕмӕн дзырдта, «уӕ зӕрдӕтӕ уӕрӕх байгом кӕнут», зӕгъгӕ?

⁵ Рагон Коринфы чырыстӕттӕм апостол Павел ныффыста: «Коринфӕгтӕ, мах уемӕ дзургӕ дӕр ӕргомӕй кӕнӕм, ӕмӕ уын нӕ зӕрдӕтӕ дӕр уӕрӕх байгом кодтам. Нӕ зӕрдӕты сымахӕн ис бынат, фӕлӕ уӕ зӕрдӕты фаг бынат нӕй фӕлмӕн уарзтӕн. Уӕдӕ уын хи хъӕбултау зӕгъын: сымах дӕр нын ӕй  уымӕй бафидут, ӕмӕ нын уӕ зӕрдӕтӕ уӕрӕх байгом кӕнут» (2 Кор. 6:11–13). Павел коринфӕгтӕн цӕмӕн дзырдта, зӕгъгӕ, «уӕ зӕрдӕтӕ уӕрӕх байгом кӕнут»?

⁶ Ӕркӕсӕм-ма, Коринфы ӕмбырд куыд фӕзынд, уымӕ. Павел Коринфмӕ ӕрцыд н. э. 50 азы фӕззӕджы. Кӕд ӕй райдианы чидӕртӕ хъусын кӕнын нӕ уагъта, уӕддӕр йӕ къухтӕ не ’руагъта. Фӕлӕ тагъд рӕстӕджы бирӕтӕ хорз хабар сӕ зӕрдӕмӕ айстой. Павел Коринфы «баззад афӕдз ӕмӕ ’рдӕг» ӕмӕ дзы цы ’мбырд фӕзынд, уый ахуыр кодта ӕмӕ йӕ фидар кодта. Кӕй зӕгъын ӕй хъӕуы, Павел тынг бауарзта Коринфы чырыстӕтты (Ап. хъ. 18:5, 6, 9–11). Уыдон дӕр ӕй цӕй тыххӕй уарзтаиккой ӕмӕ йын аргъ кодтаиккой, уый уыди. Фӕлӕ дзы ӕмбырды иуӕй-иутӕ сӕхи дард ластой. Ӕвӕццӕгӕн сӕ зӕрдӕмӕ нӕ цыд, комкоммӕ сын уынаффӕтӕ кӕй лӕвӕрдта, уый (1 Кор. 5:1–5; 6:1–10). Чидӕр та дзы, ӕвӕццӕгӕн, байхъуыста, «„диссаджы“ апостолтӕ» дзы цытӕ дзырдтой, уымӕ (2 Кор. 11:5, 6). Павелы та фӕндыд, цӕмӕй йӕ хотӕ ӕмӕ ӕфсымӕртӕ иууылдӕр зӕрдиагӕй уарзтаиккой. Уымӕ гӕсгӕ сӕ разӕнгард кодта, «уӕ зӕрдӕтӕ уӕрӕх байгом кӕнут», зӕгъгӕ, ома мӕн дӕр ӕмӕ иннӕ чырыстӕтты дӕр уарзут.

7. Нӕ бон куыд у нӕ хотӕ ӕмӕ не ’фсымӕртӕн «нӕ зӕрдӕтӕ уӕрӕх байгом кӕнын»?

⁷ Мах тыххӕй та цы зӕгъӕн ис? Нӕ бон куыд у нӕ хотӕ ӕмӕ ӕфсымӕртӕн «нӕ зӕрдӕтӕ уӕрӕх байгом кӕнын»? Иу кары чи ис, кӕнӕ иу адӕмыхаттӕй чи у, уыдонӕн ӕнцондӕр вӕййы иумӕ. Уыциу ирхӕфсӕнтӕ чи уарзы, уыдон дӕр иумӕ бирӕ рӕстӕг фервитынц. Фӕлӕ кӕд нӕ рӕстӕг ӕрмӕст иутимӕ ӕрвитӕм, ӕмӕ уый тыххӕй иннӕтӕй адард стӕм, уӕд хъуамӕ «нӕ зӕрдӕтӕ уӕрӕх байгом кӕнӕм». Хорз уаид, куы ахъуыды кӕниккам: «Мыййаг, ме ’мбӕлттӕ чи не сты, уыцы хотӕ ӕмӕ ӕфсымӕртимӕ уацамынды искуы иу хатт фӕцӕуын кӕнӕ семӕ стӕм хатт фӕныхас кӕнын? Ӕмбырды ногтимӕ искуы иу хатт фӕныхас кӕнын, уымӕн ӕмӕ афтӕ хъуыды кӕнын, ӕмӕ цӕмӕй ме ’мбӕлттӕ суой, уый тыххӕй хъуамӕ рӕстӕг рацӕуа? Ӕмбырды ацӕргӕтӕ ӕмӕ сывӕллӕттӕн салам фӕдӕттын?»

8, 9. Ромӕгтӕм 15:7 цы уынаффӕ ис, уый нын куыд баххуыс кӕндзӕн, цӕмӕй ӕфсымӕрты тынгдӕр уарзӕм?

⁸ Павел ромӕгтӕм цы ныффыста, уый нын баххуыс кӕндзӕн, цӕмӕй не ’мчырыстӕттӕм раст цӕстӕй кӕсӕм. (Бакӕс Ромӕгтӕм 15:7.) «Узӕлын»-ӕй цы грекъаг дзырд ӕрцыд тӕлмац, уый нысан кӕны «искӕуыл бацин кӕнын кӕнӕ йӕ суазӕг кӕнын, иумӕ рӕстӕг ӕрвитын ӕмӕ йӕ де ’мбалыл нымайын». Раджы заманты-иу уазӕгуарзон адӕймаг йе ’мбӕлтты йӕ хӕдзармӕ куы фӕхуыдта, уӕд-иу ӕргом ӕвдыста, се ’рбацыд ын ӕхсызгон кӕй у. Зӕгъӕн ис, Чырысти дӕр нӕ йе ’мбырдмӕ фӕхуыдта, ӕмӕ йӕ хъуамӕ мах дӕр фӕзмӕм ӕмӕ не ’мчырыстӕтты уазӕгуаты хонӕм.

⁹ Паддзахады залы кӕнӕ ӕндӕр ран нӕ хотӕ ӕмӕ не ’фсымӕртӕн салам куы фӕдӕттӕм, уӕд-иу нӕ хъус тынгдӕр ӕрдарӕм, фӕстаг хатт кӕй нӕ федтам кӕнӕ нын аныхас кӕныны фадат кӕимӕ нӕ фӕци, уыдонмӕ. Хорз уаид семӕ иугыццыл алӕууын ӕмӕ аныхас  кӕнын. Иннӕ хатт та нӕ бон у ӕндӕр хотӕ ӕмӕ ӕфсымӕртимӕ аныхас кӕнын. Афтӕмӕй цыбыр рӕстӕгмӕ ӕмбырды алкӕимӕ дӕр аныхас кӕндзыстӕм. Ӕрмӕст хъуамӕ ма мӕт кӕнӕм, уыцыиу бон нын алкӕимӕ дӕр аныхас кӕнын куы нӕ рауайа, уӕд. Стӕй хотӕ ӕмӕ ӕфсымӕртӕ дӕр хъуамӕ ма хъыг кӕной, кӕд сын салам нӕ раттам, уӕд.

10. Ӕмбырды алкӕмӕндӕр цы диссаджы фадат ис ӕмӕ дзы нӕ бон куыд у пайда кӕнын?

¹⁰ Адӕймагыл ӕппӕты фыццаг баузӕлӕм, салам ын куы раттӕм, уӕд. Уымӕй райдайы ныхас ӕмӕ хӕлардзинад дӕр. Зӕгъӕм, конгрессты нӕ фӕфӕнды, уый размӕ кӕимӕ базонгӕ стӕм ӕмӕ кӕимӕ аныхас кодтам, уыдоны фенын. Паддзахады залтӕ аразыны чи феххуыс кӕны кӕнӕ цалцӕггӕнӕн куыстытӕ чи фӕкӕны, уыдон арӕх хорз ӕмбӕлттӕ свӕййынц, уымӕн ӕмӕ кӕрӕдзи хорз миниуджытӕ базонынц. Йегъовӕйы организацийы бирӕ гӕнӕнтӕ ис, цӕмӕй хорз ӕмбӕлттӕ ссарӕм. «Нӕ зӕрдӕтӕ уӕрӕх [куы] байгом кӕнӕм», уӕд нын фылдӕр ӕмбӕлттӕ фӕзындзӕн ӕмӕ не ’хсӕн уарзондзинад тыхджындӕр кӕндзӕн.

Иннӕтӕн рӕстӕг ар

11. Марчы 10:13–16 стихтӕм гӕсгӕ Йесойы цӕмӕй ис бафӕзмӕн?

¹¹ Чырыстӕттӕ се ’ппӕт дӕр архайынц, цӕмӕй Йесойы фӕзмой. Ӕркӕсӕм-ма, Йесо цы загъта, йӕ ахуыргӕнинӕгтӕ йӕм сывӕллӕтты куы нӕ уагътой, уӕд. «Ӕрбауадзут мӕм сывӕллӕтты,– загъта Чырысти.– Ма сӕ хъыгдарут, уымӕн ӕмӕ Хуыцауы паддзахад ахӕмты у». Стӕй «сывӕллӕтты йӕ хъӕбысы ӕрбакодта, йӕ къухтӕ сыл ӕрӕвӕрдта ӕмӕ сын раарфӕ кодта» (Марчы 10:13–16). Ахъуыды-ма кӕнут, сывӕллӕттӕ куыд цин кодтаиккой, ӕппӕты хуыздӕр Ахуыргӕнӕг сӕ кӕй уарзы, уый куы федтой, уӕд!

12. Иннӕтимӕ ныхас кӕнын нӕ цы фӕхъыгдары?

¹² Алы чырыстон дӕр хъуамӕ ахъуыды кӕна: «Иннӕтимӕ ныхас кӕнынӕн рӕстӕг ссарын ӕви мӕ арӕх нӕ февдӕлы?» Иуӕй-иу хъуыддӕгтӕ ӕвзӕр не сты, фӕлӕ нӕ, гӕнӕн ис, иннӕтимӕ ныхас кӕнын хъыгдарой. Зӕгъӕм, иннӕты раз дзыппыхӕсгӕ телефонимӕ арӕх куы архайӕм кӕнӕ наушникты цӕмӕдӕр куы хъусӕм, уӕд сӕм афтӕ кӕсдзӕн, ӕмӕ нӕ семӕ ныхас кӕнын нӕ фӕнды. Дзыппыхӕсгӕ компьютеры архайгӕ нӕ чи уына, уыдон дӕр хъуыды кӕндзысты, семӕ ныхас кӕнын нӕ кӕй нӕ фӕнды, уый тыххӕй ӕфсӕнттӕ кӕй агурӕм. Кӕй зӕгъын ӕй хъӕуы, ис «рӕстӕг хъусӕй лӕууынӕн». Фӕлӕ нӕ алыварс адӕм куы уа, уӕд арӕхдӕр уый вӕййы «рӕстӕг дзурынӕн» (Еккл. 3:7). Чи зоны, чидӕр хъуыды кӕны: «Мӕнӕн иунӕгӕй ӕнцондӕр вӕййы» кӕнӕ «Райсомӕй мӕм дзурын нӕ фӕцӕуы». Фӕлӕ нӕм дзурын куы нӕ цӕуа, уӕддӕр иннӕтимӕ зӕрдӕхӕларӕй куы ныхас кӕнӕм, уӕд бӕрӕг уыдзӕн, кӕй сӕ уарзӕм. Ӕмӕ уарзондзинад та, «йӕхицӕн куыд хуыздӕр уа, ууыл нӕ хъуыды кӕны» (1 Кор. 13:5).

13. Павел Тимофейӕн цы дзырдта ӕмбырды хотӕ ӕмӕ ӕфсымӕрты тыххӕй?

¹³ Павел ӕрыгон лӕппу Тимофейӕн дзырдта, цӕмӕй ӕмбырды алкӕмӕндӕр аргъ кодтаид. (Бакӕс 1 Тимофеймӕ 5:1, 2.) Мах дӕр ацӕргӕ чырыстӕттимӕ афтӕ ныхас кӕнӕм, цыма нӕ мадӕлтӕ ӕмӕ нӕ фыдӕлтӕ сты, ӕрыгӕттимӕ та – цыма нӕ мады зӕнджытӕ сты. Ахӕм зондахаст нӕм куы уа, уӕд нӕ зынаргъ хотӕ ӕмӕ ӕфсымӕртӕй ничи хъуыды кӕндзӕн, хъыгдарын ӕй, зӕгъгӕ.

14. Иннӕтимӕ хорз хъуыддӕгтыл ныхас кӕнын цы пайда у?

¹⁴ Иннӕтимӕ хорз хъуыддӕгтыл куы ныхас кӕнӕм, уӕд сын сӕ уырнындзинад фидар кӕндзыстӕм ӕмӕ сӕ зӕрдӕты фарн уыдзӕн. Иу ӕфсымӕры зӕрдыл лӕууы, Вефилы лӕггад кӕнын куы райдыдта, уӕд-иу йемӕ ныхас кӕнынӕн арӕх рӕстӕг кӕй ссардтой, уым рагӕй чи лӕггад кодта, уыдон. Цы зӕрдӕфидаргӕнӕн ныхӕстӕ йын кодтой, уыдон ын баххуыс кодтой, цӕмӕй йӕхи Вефилы бинонтӕй нымадтаид. Ныр йӕхӕдӕг дӕр иннӕтӕн афтӕ ӕххуыс кӕны.

Сӕрныллӕг куы уӕм, уӕд фарнхӕссӕг уыдзыстӕм

15. Цӕмӕй бӕрӕг у, чырыстӕттӕ дӕр кӕрӕдзимӕ кӕй фӕхъыг вӕййынц?

¹⁵ Рагон горӕт Филиппты дыууӕ чырыстон хо Еводи ӕмӕ Синтихийӕн зын уыд цавӕрдӕр хъуыддаджы тыххӕй бафидауын (Фил.  4:2, 3). Павел ӕмӕ Варнавӕ кӕй фӕбыцӕу сты, уый бирӕтӕ базыдтой ӕмӕ цасдӕр рӕстӕг иумӕ нал лӕггад кодтой (Ап. хъ. 15:37–39). Уыцы хабӕрттӕй бӕрӕг у, ӕцӕг чырыстӕттӕ дӕр кӕрӕдзимӕ кӕй фӕхъыг вӕййынц. Йегъовӕ нын баххуыс кӕны, цӕмӕй-иу бафидауӕм ӕмӕ та хӕларӕй цӕрӕм. Фӕлӕ махӕй дӕр цыдӕр домы.

16, 17. а) Бафидауынӕн сӕрныллӕгдзинад цӕмӕн хъӕуы? ӕ) Иаков ӕмӕ Исавы хабарӕй куыд зыны, сӕрныллӕгдзинад ахсджиаг кӕй у?

¹⁶ Зӕгъӕм, де ’мбалимӕ машинӕйыл кӕдӕмдӕр цӕуынвӕнд кӕнут. Фыццаг уал хъуамӕ машинӕйы дӕгъӕл бавӕрай ӕмӕ йӕ скусын кӕнай. Цӕйдӕр тыххӕй кӕрӕдзи куы нӕ бамбарӕм, уӕд дӕр фӕхъӕуы «дӕгъӕл» – цыдӕр фӕивын. Фыццаджыдӕр нӕ хъӕуы сӕрныллӕгдзинад. (Бакӕс Иаковы 4:10.) Фыстадӕй цы хабармӕ ӕркӕсдзыстӕм, уымӕй бӕрӕг у, кӕрӕдзимӕ чи фӕхъыг, уыдонӕн сӕрныллӕгдзинад кӕй баххуыс кӕндзӕн, цӕмӕй Библийы уынаффӕтӕй пайда кӕнын райдайой.

¹⁷ Ссӕдз азы рацыд, Исав йӕ фаззон ӕфсымӕр Иаковмӕ куы фӕхъыг, уӕдӕй нырмӕ. Иаков хистӕр фырты бартӕ кӕй байста, уый тыххӕй йӕ амарынмӕ хъавыд. Ныр хъуамӕ фембӕлдаиккой ӕмӕ «Иаков тынг фӕтарст ӕмӕ катайы бацыд». Тарст, Исав ӕй куы амара. Фӕлӕ куы фембӕлдысты, уӕд Иаков цы сарӕзта, уый Исавӕн ӕнӕнхъӕлӕджы уыд – «йӕ сӕрӕй йын зӕххы онг» акуывта. Дарддӕр цы ’рцыд? «Исав азгъордта Иаковы размӕ, ныхъхъӕбыс ын кодта, йӕ хъуырыл ын ныттыхстис ӕмӕ йын пъатӕ кодта, ӕмӕ сӕ дыууӕ дӕр куыдтой» (Райд. 27:41; 32:3–8; 33:3, 4). Афтӕмӕй бафидыдтой. Иаков сӕрныллӕг кӕй разынд, уый фӕрцы Исавы маст дӕр ӕрсабыр (Райд. 27:41; 32:3–8; 33:3, 4).

18, 19. а) Искӕимӕ кӕрӕдзи куы нӕ бамбарӕм, уӕд Библийы уынаффӕмӕ гӕсгӕ бафидауыныл цӕмӕн хъуамӕ архайӕм? ӕ) Иннӕ адӕймаджы нырма бафидауын куы нӕ фӕнда, уӕд нӕ ныфс цӕуылнӕ хъуамӕ асӕтта?

¹⁸ Кӕрӕдзи куы нӕ бамбарӕм, уӕд куыд бафидауӕн ис, уымӕн Библийы ис диссаджы уынаффӕ (Матф. 5:23, 24; 18:15–17; Еф. 4:26, 27) *. Фӕлӕ уыцы уынаффӕйӕ сӕрныллӕгӕй куы нӕ пайда кӕнӕм, уӕд не ’хсӕн фарн нӕ уыдзӕн. Ма ӕнхъӕлмӕ кӕсӕм, иннӕ адӕймаг сӕрныллӕгдзинад кӕд равдисдзӕн, уымӕ – нӕхӕдӕг дӕр хъуамӕ уӕм сӕрныллӕг.

¹⁹ Искӕимӕ дын зын куы уа бафидауын, уӕддӕр дӕ ныфс ма асӕттӕд. Чи зоны, уыцы адӕймаджы рӕстӕг хъӕуы, цӕмӕй ахъуыды кӕна. Зӕгъӕм, Иосифыл йӕ ’фсымӕртӕ гадзрахатӕй рацыдысты ӕмӕ йӕ цагъарӕй ауӕй кодтой. Ногӕй та сыл куы фембӕлд, уӕдмӕ рацыд бирӕ рӕстӕг. Уӕдмӕ Иосиф  Египеты сси стыр хицау. Фӕлӕ йе ’фсымӕртӕ аивтой ӕмӕ дзы хатыр куырдтой. Иосиф дӕр сын ныххатыр кодта, ӕмӕ Иаковы фырттӕй равзӕрд, Йегъовӕйы кадджын ном чи хаста, ахӕм адӕм (Райд. 50:15–21). Нӕ хотӕ ӕмӕ не ’фсымӕртимӕ хӕларӕй куы цӕрӕм, уӕд не ’мбырдты уыдзӕн иудзинад ӕмӕ циндзинад. (Бакӕс Колоссӕгтӕм 3:12–14.)

Кӕрӕдзи уарзӕм «хъуыддагӕй, стӕй уӕд сыгъдӕгзӕрдӕйӕ»

20, 21. Чырысти йӕ апостолтӕн сӕ къӕхтӕ кӕй ныхсадта, уымӕй цӕуыл ахуыр кӕнӕм?

²⁰ Йесо йӕ мӕлӕты размӕ йӕ апостолтӕн загъта: «Ӕз уын равдыстон, куыд кӕнын хъӕуы, уый, цӕмӕй уын ӕз куыд сарӕзтон, афтӕ аразат сымах дӕр» (Иоан. 13:15). Ацы ныхӕсты размӕ йӕ 12 апостолӕн сӕ къӕхтӕ ныхсадта. Афтӕ ӕрмӕст ӕгъдаумӕ гӕсгӕ кӕнӕ йӕ хӕларзӕрдӕйӕ нӕ бакодта. Ацы хабар ныффыссыны размӕ Иоанн ныффыста: «Йесо... бауарзта йӕхиуӕтты, ацы дунейы йын чи уыди, уыдоны, ӕмӕ сӕ бауарзта кӕронмӕ» (Иоан. 13:1). Уыцы уарзондзинад Йесойы сразӕнгард кодта, цӕмӕй йӕ ахуыргӕнинӕгтӕн цагъарау балӕггад кодтаид. Ныр уыдон дӕр хъуамӕ сӕрныллӕгӕй кӕрӕдзийӕн лӕггад кодтаиккой. Нӕ хотӕ ӕмӕ не ’фсымӕрты зӕрдиагӕй кӕй уарзӕм, уый нӕ хъуамӕ разӕнгард кӕна, цӕмӕй хъуыддагӕй ӕвдисӕм, алкӕуылдӕр дзы кӕй тыхсӕм.

²¹ Хуыцауы Фырт йӕ къӕхтӕ кӕмӕн ныхсадта, уыдонӕй иу уыди апостол Петр. Уый бамбӕрста, Йесойы уымӕй цы равдисын фӕндыд ӕмӕ ныффыста: «Ӕцӕгдзинады коммӕ бакӕсыны руаджы сымах ссыгъдӕг кодтат уӕ удтӕ, цӕмӕй ӕфсымӕртыл ӕнувыд уат, сыгъдӕгзӕрдӕйӕ сӕ уарзат. Гъемӕ уӕдӕ кӕрӕдзийы зӕрдиагӕй уарзут» (1 Пет. 1:22). Апостол Иоаннӕн дӕр Йесо Чырысти йӕ къӕхтӕ ныхсадта. Иоанн ныффыста: «Мӕ хъӕбултӕ, уӕдӕ кӕрӕдзийы уарзӕм дзыхыныхасӕй нӕ, фӕлӕ хъуыддагӕй, стӕй уӕд сыгъдӕгзӕрдӕйӕ» (1 Иоан. 3:18). Цӕй уӕдӕ нӕ нӕ зӕрдӕтӕ разӕнгард кӕнӕнт, цӕмӕй нӕ уарзондзинад хъуыддагӕй ӕвдисӕм.

[Фиппаинаг]

Бахъуыды кодтай?

• Нӕ бон куыд у иннӕтӕн «нӕ зӕрдӕтӕ уӕрӕх байгом кӕнын»?

• Цы нын баххуыс кӕндзӕн, цӕмӕй иннӕтӕн рӕстӕг арӕм?

• Хӕларӕй цӕрынӕн сӕрныллӕгдзинад цӕмӕн хъӕуы?

• Цы нӕ хъуамӕ разӕнгард кӕна, цӕмӕй нӕ хотӕ ӕмӕ не ’фсымӕртыл тыхсӕм?

[Фарстатӕ ахуыр кӕнынӕн]

[Ныв 21 фарсыл]

Кӕрӕдзийыл цин кӕнӕм

[Ныв 23 фарсыл]

Иннӕтӕн рӕстӕг арӕм