Хуыцауы хъуыддӕгты агурӕм удӕнцой

«Ме ’фсондз уӕхиуыл сӕвӕрут... ӕмӕ ссардзыстут удӕнцой» (МАТФ. 11:29).

1. Хуыцау Синайы хохыл йӕ адӕмӕн цы бафӕдзӕхста ӕмӕ цӕмӕн?

ХУЫЦАУ Синайы хохыл израилӕгтӕн Закъон куы радта, уӕд сын загъта, алы сабаты дӕр сӕ цы аразын хъуыди, уый. Йӕ лӕггадгӕнӕг Моисейы уылты сын бафӕдзӕхста: «Ӕхсӕз боны кус, ӕвдӕм бон та мацы араз, цӕмӕй баулӕфой дӕ гал дӕр ӕмӕ дӕ хӕрӕг дӕр, дӕ цагъар-сылгоймаджы фырт дӕр ӕмӕ ӕрцӕуӕггаг дӕр» (Рац. 23:12). Хуыцау йӕ адӕмы кӕй уарзта ӕмӕ сыл кӕй тыхсти, уымӕ гӕсгӕ сын иу бон рахицӕн кодта улӕфынӕн.

2. Израилӕгтӕ сабатбоны закъон кӕй ӕххӕст кодтой, уый сын цы пайда уыд?

² Цымӕ сабатбон израилӕгтӕн ӕрмӕст улӕфынӕн уыд? Нӕ. Уыцы бон Йегъовӕ рахицӕн кодта, цӕмӕй-иу ын куывтаиккой. Нӕлгоймӕгтӕ-иу сӕ бинонты ахуыр кодтой «Йегъовӕйы фӕндагыл цӕуын» (Райд. 18:19). Стӕй ма уый бинонтӕ ӕмӕ ӕмбӕлттӕн хорз фадат уыд, цӕмӕй-иу иумӕ Йегъовӕйы хъуддӕгтыл аныхас кодтаиккой ӕмӕ-иу кӕрӕдзийыл фӕцин кодтаиккой (Ис. 58:13, 14). Сӕйраджыдӕр та, сабатбон амыдта, Чырыстийы миназон хицаудзинады рӕстӕджы адӕм ӕцӕг удӕнцой кӕй ссардзысты, уымӕ (Ром. 8:21). Мах рӕстӕджы тыххӕй та цы ис зӕгъӕн? Ӕцӕг чырыстӕттӕн – Хуыцауы фӕндӕгтӕ зонын кӕй фӕнды, уыдонӕн – сӕ бон кӕм ӕмӕ куыд у ахӕм удӕнцой ссарын?

Удӕнцой агурӕм не ’мчырыстӕтты ’хсӕн

3. Фыццаг ӕнусы чырыстӕттӕ кӕрӕдзийӕн куыд ӕххуыс кодтой?

³ Апостол Павел чырыстон ӕмбырды тыххӕй загъта, зӕгъгӕ, «ууыл лӕууы ӕмӕ ӕнцайы ӕцӕгдзинад» (1 Тим. 3:15). Фыццаг ӕнусы чырыстӕттӕ-иу кӕрӕдзийы ныфсыл ныфс ӕфтыдтой ӕмӕ-иу кӕрӕдзи сӕ уарзондзинадӕй тавтой (Еф. 4:11, 12, 16). Павел Ефесы куы уыд, уӕд ӕй Коринфы ӕмбырды чырыстӕттӕ абӕрӕг кодтой ӕмӕ йӕ бафидар кодтой. Дӕ хъус-ма ӕрдар, уый йыл куыд фӕзынд, уымӕ: «Ӕз... тынг цин кӕнын, Стефанас, Фортунат ӕмӕ Ахаик мемӕ кӕй сты, ууыл... Уыдон [мын] барӕвдыдтой мӕ зӕрдӕ» (1 Кор. 16:17, 18). Афтӕ Тит дӕр Коринфмӕ ӕфсымӕртӕн балӕггад кӕнынмӕ куы ацыд, уӕд сӕм уый фӕстӕ Павел ныффыста: «Уе ’ппӕт дӕр [ын] йӕ зӕрдӕ барӕвдыдтат» (2 Кор. 7:13). Абон дӕр Йегъовӕйы Ӕвдисӕнтӕ се ’мчырыстӕттимӕ хӕларӕй кӕй цӕрынц, уый сын хӕссы ӕцӕг удӕнцой.

4. Чырыстон фембӕлдтӕ нын удӕнцой куыд хӕссынц?

⁴ Ды дӕр ӕй, ӕвӕццӕгӕн, дӕхицӕй зоныс, чырыстон фембӕлдтӕ стыр циндзинад кӕй хӕссынц. Уым мах «кӕрӕдзийы уырнындзинадӕй бафидар вӕййӕм» (Ром. 1:12). Нӕ хотӕ ӕмӕ нын не ’фсымӕртӕ ӕнӕуи зонгӕтӕ не сты. Уыдон нын сты ӕцӕг ӕмбӕлттӕ, ӕмӕ сӕ мах уарзӕм ӕмӕ сын аргъ кӕнӕм. Ӕдзух семӕ ӕмбырды кӕй фембӕлӕм, уый нын вӕййы стыр цин ӕмӕ удӕнцойы хос (Филим. 7).

5. Нӕ бон куыд у конгрессты рӕстӕджы кӕрӕдзийӕн удӕнцой хӕссын?

⁵ Стыр удӕнцой ма ссарӕм, алы аз дӕр конгресстӕм куы ’рбацӕуӕм, уӕд дӕр. Уыцы стыр фембӕлдты райсӕм царддӕттӕг дӕттӕ Хуыцауы Ныхасӕй. Уымӕй уӕлдай ма нын хорз фадат вӕййы, цӕмӕй-иу нӕ кӕрӕдзийӕн нӕ «зӕрдӕтӕ уӕрӕх байгом кӕнӕм» (2 Кор. 6:12, 13). Фӕлӕ куы ’фсӕрмы кӕнӕм ӕмӕ нын ӕнцон куы нӕ уа, цӕмӕй искӕимӕ  базонгӕ уӕм, уӕд та куыд? Зӕгъӕм, нӕ бон у конгрессы ӕфсымӕртӕм истӕмӕй фӕкӕсын. Ӕппӕтдунеон конгрессы ӕфсымӕртӕн чи ӕххуыс кодта, иу ахӕм хо дзуры: «Мӕ бинонтӕ ӕмӕ мӕ цалдӕр ӕмбалы йеддӕмӕ, конгрессы чи уыд, уыдонӕй никӕй зыдтон. Фӕлӕ конгрессы фӕстӕ куы ’фснайдтам, уӕд бирӕ хотӕ ӕмӕ ӕфсымӕртимӕ базонгӕ дӕн. Мӕ цинӕн кӕрон дӕр нал уыд!»

6. Улӕфынмӕ ацӕуын куы фӕнд кӕнай, уӕд дӕ бон цы у спълан кӕнын?

⁶ Израилӕгтӕ-иу афӕдз ӕртӕ хатты Иерусалиммӕ цыдысты бӕрӕгбонмӕ (Рац. 34:23). Арӕх-иу сӕ бахъуыд сӕ быдыртӕ ӕмӕ сӕ куыстуӕттӕ ныууадзын ӕмӕ цалдӕр боны рыг фӕндӕгтыл къахӕй цӕуын. Фӕлӕ-иу кувӕндонмӕ куы ӕрбацыдысты ӕмӕ-иу дзы Йегъовӕйы чи кадджын кодта, уыдоны куы федтой, уӕд-иу «сӕ цинӕн кӕрон нал уыди» (2 Аз. 30:21). Абон дӕр Йегъовӕйы лӕггадгӕнджытӕй бирӕтӕ стыр циндзинад банкъарынц, сӕ бинонтимӕ, хӕстӕгдӕр сӕм чи у, уыцы Вефилмӕ куы ацӕуынц, уӕд. Ды дӕр дӕ бинонтимӕ искуы баулӕфын куы фӕнд кӕнай, уӕд дӕ бон у спълан кӕнын ахӕм ранмӕ ацӕуын?

7. а) Не ’мчырыстӕттимӕ кӕй ӕрӕмбырд вӕййӕм, уый хорз цӕмӕй у? ӕ) Цӕмӕй бадт алкӕй зӕрдӕмӕ дӕр фӕцӕуа, уый тыххӕй цы хъӕуы аразын?

⁷ Нӕ кӕрӕдзи ма фидар кӕндзыстӕм, нӕ бинонтимӕ ӕмӕ-иу не ’мбӕлттимӕ иумӕ куы ӕрӕмбырд уӕм, уӕд. Зондджын паддзах Соломон загъта: «Царды мидӕг адӕймагӕн уымӕй хуыздӕр ницы ис, ӕмӕ куы хӕра, куы нуаза ӕмӕ йӕ уӕззау фыдӕбонӕй йӕ удӕн хорзӕй исты куы уынын кӕна» (Еккл. 2:24). Ахӕм бӕдтытӕ нын ӕрмӕст удӕнцой нӕ хӕссынц, фӕлӕ ма уыдоны фӕрцы не ’мчырыстӕтты хуыздӕр базонӕм ӕмӕ, не ’хсӕн цы уарзондзинад ис, уый тыхджынӕй-тыхджындӕр кӕны. Цӕмӕй бадт алкӕй зӕрдӕмӕ дӕр фӕцӕуа ӕмӕ алкӕмӕн дӕр фӕпайда уа, уый тыххӕй хуыздӕр уаид, бирӕ адӕмы куы нӕ фӕхониккам ӕмӕ-иу нӕ хъус алцӕмӕдӕр куы дариккам, уӕлдайдӕр та фынгыл нозт куы уа, уӕд.

 Хорз хабар хъусын кӕнын хӕссы удӕнцой

8, 9. а) Чырысти цы хабар хъусын кодта, уый куыд хицӕн кодта, фарисейтӕ ӕмӕ чиныджыдӕснытӕ адӕмӕн цы амыдтой, уымӕй? ӕ) Адӕмӕн хорз хабар кӕй хъусын кӕнӕм, уый махӕн цы пайда у?

⁸ Чырысти хорз хабар зынгзӕрдӕйӕ хъусын кодта ӕмӕ йӕ ахуыргӕнинӕгты дӕр уымӕ разӕнгард кодта. Уый бӕрӕг у йӕ ныхӕстӕй: «Кӕрдинаг бирӕ ис, кусджытӕ та – гыццыл. Уӕдӕ курут хуымы Хицауӕй, цӕмӕй йӕ хуыммӕ кусджытӕ рарвита» (Матф. 9:37, 38). Йесо адӕмӕн хъусын кодта, ӕцӕг удӕнцой сын чи хаста, ахӕм «хорз хабар» (Матф. 4:23; 24:14). Уый тынг хицӕн кодта, фарисейтӕ адӕмыл цы уӕззау уаргъ ӕвӕрдтой, уымӕй – цы ӕгъдӕуттӕ сын кӕнын кодтой, уыдон уыдысты тынг зынӕххӕстгӕнӕн. (Бакӕс Матфейы 23:4, 23, 24.)

⁹ Адӕмӕн Паддзахады тыххӕй хорз хабар кӕй хъусын кӕнӕм, уый фӕрцы сын удӕнцой хӕссӕм. Стӕй ма нӕхӕдӕг дӕр рӕстдзинад хуыздӕр фембарӕм ӕмӕ йын тынгдӕр фӕаргъ кӕнӕм. Псаломзарӕггӕнӕг дӕр загъта: «Кадджын кӕнут Йагъы! Хорз у нӕ Хуыцауӕн зарын, уый у зӕрдӕйӕн ӕхсызгон» (Пс. 147:1). Дӕ бон у дӕ циндзинадыл бафтауын, хорз хабар хъусын кӕнгӕйӕ ӕмӕ Йегъовӕйы кадджын кӕнгӕйӕ?

10. Цымӕ нӕ лӕггады ӕнтыстджын стӕм ӕви нӕ, уый нӕм адӕм куыд хъусынц, уымӕй аразгӕ у? Бамбарын ӕй кӕн.

¹⁰ Кӕй зӕгъын ӕй хъӕуы, кӕд иуӕй-иу рӕтты хорз хабармӕ бирӕ адӕм байхъусы, уӕд иннӕ рӕтты та – къаддӕр. (Бакӕс Хъуыддӕгтӕ 18:1, 5–8.) Кӕд, кӕм цӕрыс, уым адӕм хорз хабармӕ ӕвзӕр хъусынц, уӕд-иу архай, уацамынды дын хорзӕй цы ӕнтысы, ууыл хъуыды кӕныныл. Рох дӕ ма уӕд, Йегъовӕйы ном кӕй кадджын кӕныс ӕмӕ уыцы хъуыддаджы кӕй фыдӕбон кӕныс, уый дзӕгъӕлы кӕй нӕу (1 Кор. 15:58). Стӕй ма, дӕ лӕггады ӕнтыстджын дӕ ӕви нӕ, уый дӕм адӕм куыд хъусынц, уымӕй аразгӕ нӕу. Нӕ бон фидарӕй ӕууӕндын у, Йегъовӕ кӕй батыхсдзӕн, цӕмӕй сыгъдӕгзӕрдӕ адӕмӕн фадат фӕзына хорз хабар фехъусынӕн (Иоан. 6:44).

Бинонты ахуыр хӕссы удӕнцой

11. Йегъовӕ ныййарджытӕн цы бахӕс кодта ӕмӕ сӕ бон куыд у уыцы хӕс ӕххӕст кӕнын?

¹¹ Хуыцауӕй чи тӕрсы, уыцы ныййарджытӕн Йегъовӕ бахӕс кодта, цӕмӕй сӕ сывӕллӕтты ахуыр кӕной ӕмӕ йын йӕ фӕндӕгтӕ амоной (Дык. з. 11:18, 19). Ныййарджытӕ, рӕстӕг рахицӕн кӕнут уӕ сывӕллӕттимӕ нӕ уарзӕгой уӕларвон Фыды тыххӕй аныхас кӕнынӕн? Уый тынг ахсджиаг у, ӕмӕ цӕмӕй уӕ сывӕллӕттӕн уыцы хъуыддаджы баххуыс кӕнат, уый тыххӕй Йегъовӕ йӕ организацийы уылты дӕтты, пайда чи хӕссы ӕмӕ уырнындзинад чи фидар кӕны, бирӕ ахӕм ӕрмӕг – чингуытӕ, журналтӕ ӕмӕ дисктӕ.

12, 13. а) Бинонтӕ иумӕ Библи куы ахуыр кӕной, уӕд сын уый цы пайда уыдзӕн? ӕ) Ныййарджытӕн сӕ бон цы у аразын, цӕмӕй бинонты ахуыр алкӕмӕн дӕр удӕнцой хӕсса?

¹² Уымӕй уӕлдай ма зондджын ӕмӕ ӕууӕнкджын цагъары къорд бацархайдта, цӕмӕй бинонтӕн сӕ бон уа иу изӕр рахицӕн кӕнын ӕмӕ иумӕ алы къуыри дӕр Библи ахуыр кӕнын. Бирӕтӕ дзурынц, уый фӕрцы кӕрӕдзиимӕ ӕнгомдӕр кӕй систы ӕмӕ Хуыцаумӕ кӕй баввахсдӕр сты. Фӕлӕ ныййарджытӕн сӕ бон цы у аразын, цӕмӕй бинонты ахуыр алкӕмӕн дӕр удӕнцой хӕсса?

¹³ Бинонты ахуыр хъуамӕ афтӕ арӕзт уа, ӕмӕ алкӕй зӕрдӕмӕ дӕр цӕуа. Мах кувӕм «амондджын Хуыцауӕн» ӕмӕ йӕ фӕнды, цӕмӕй йын цингӕнгӕйӕ лӕггад кӕнӕм (1 Тим. 1:11; Фил. 4:4). Алы къуыри дӕр бинонтимӕ Библийы ахсджиаг хабӕрттыл куы ныхас кӕнӕм, уӕд арфӕгонд уыдзыстӕм. Ныййарджытӕн сӕ бон у архайын, цӕмӕй сӕ сывӕллӕтты ахуыр кӕнгӕйӕ алыхуызон мадзӕлттӕй пайда кӕной. Зӕгъӕм, иу бинонтӕ сӕ 10-аздзыд лӕппу Брэндонӕн бахӕс кодтой гыццыл раныхас бацӕттӕ кӕнын: «Библи Сайтаны калм цӕмӕн хоны?» Ацы фарста йӕ дисы бафтыдта, уымӕн ӕмӕ кӕлмытӕ бирӕ уарзы ӕмӕ йын тынг хъыг уыд, Библийы Хӕйрӕг калмы хуызы ӕвдыст  кӕй у, уый. Бинонтӕй иуӕй-иутӕ Библийӕ скъуыддзаг фӕкӕсынц ролтӕм гӕсгӕ. Иннӕтӕ та Библийӕ исты цау равзарынц ӕмӕ йӕ ролтӕм гӕсгӕ ахъазынц. Ахӕм мадзӕлтты фӕрцы сывӕллӕттӕ ӕнӕуи нӕ бахъӕлдзӕг вӕййынц, фӕлӕ ма сын Библийы уагӕвӕрдтӕ сӕ зӕрдӕ дӕр бацагайынц *.

Дӕ уырнындзинад дын мацы ӕрлӕмӕгъ кӕнӕд

14, 15. а) Ацы фӕстаг бонты адӕмӕн сӕ ныфс цы асӕтты? ӕ) Иннӕ адӕмӕй уӕлдай ма ӕцӕг чырыстӕттӕ цавӕр зындзинӕдтыл ӕмбӕлынц?

¹⁴ Ацы фыддунейӕн йӕ кӕрон цас хӕстӕгдӕр кӕны, уыйас адӕм фылдӕр мӕстытӕ ӕвзарынц ӕмӕ сӕхи ӕдас нӕ хатынц. Куыст ссарын ӕмӕ цардыл ӕххӕссын зын кӕй у, уый милуангай адӕмыл тынг фӕзынд. Суанг куыст кӕмӕн ис, уыдон дӕр хъаст кӕнынц, цы ӕхца бакусынц, уыдон раст цыма хуынкъ дзыппы нывӕрынц, уыйау кӕй никуы разынынц ӕмӕ бинонты фаг кӕй не свӕййынц. (Абар Аггей 1:4–6.) Хицауадӕн йӕ бон ницы у саразын терроризм ӕмӕ ӕндӕр фыдхъуыддӕгты ныхмӕ. Бирӕтӕн сӕ ныфс асӕтты, исты раст куы нӕ саразынц, уӕд (Пс. 38:4).

¹⁵ Хӕйрӕджы дуне адӕмӕн цы зындзинӕдтӕ ӕвзарын кӕны, уыдонӕй ӕцӕг чырыстӕттӕ дӕр хызт не сты (1 Иоан. 5:19). Фӕлӕ ма уымӕй уӕлдай ӕндӕр зындзинӕдтыл дӕр сӕмбӕлынц, Йегъовӕйӕн иузӕрдионӕй кӕй лӕггад кӕнынц, уый тыххӕй. Йесо загъта: «Кӕд мӕн ӕфхӕрдтой, уӕд сымах дӕр ӕфхӕрдзысты» (Иоан. 15:20). Фӕлӕ кӕд «нӕ фӕдыл зилынц», уӕддӕр «иунӕг не стӕм» (2 Кор. 4:9). Цӕмӕн ис афтӕ зӕгъӕн?

16. Цы нын баххуыс кӕндзӕн, цӕмӕй нӕ цардӕй райгонд уӕм?

¹⁶ Йесо загъта: «Фыдӕбон чи кӕны ӕмӕ уӕззау уаргъ чи хӕссы,– уе ’ппӕт дӕр мӕм ӕрцӕут, ӕмӕ уын ӕз уӕ уаргъ фӕрог кӕндзынӕн» (Матф. 11:28). Чырыстийы нывондыл фидарӕй кӕй ӕууӕндӕм, уый фӕрцы нӕхи Йегъовӕйы дӕлбазыр бакӕнӕм ӕмӕ афтӕмӕй схайджын вӕййӕм, «адӕймагмӕ чи нӕй, ахӕм хъаруйӕ» (2 Кор. 4:7). Хуыцау нын радта «ӕххуысгӕнӕджы» – йӕ сыгъдӕг тых. Уый нын нӕ уырнындзинад афтӕ фидар кӕны, ӕмӕ нӕ бон ӕрмӕст зындзинӕдты сӕрты хизын нӕ уыдзӕн, фӕлӕ ма нӕ цардӕй алкӕддӕр райгонд уыдзыстӕм (Иоан. 14:26; Иак. 1:2–4).

17, 18. а) Нӕхи цӕмӕй хъуамӕ хизӕм? ӕ) Ӕрмӕст нӕ уды дзӕбӕхӕн куы цӕрӕм, уӕд уый цӕмӕ ’ркӕндзӕн?

¹⁷ Ацы дуне адӕмы разӕнгард кӕны сӕ рӕстӕг ӕрмӕст сӕ уды дзӕбӕхӕн ӕрвитынмӕ. Фӕлӕ ӕцӕг чырыстӕттӕ хъуамӕ лӕмбынӕг уой, цӕмӕй дунейы зондыл ма цӕуой. (Бакӕс Ефесӕгтӕм 2:2–5.) Лӕмбынӕг куы нӕ уӕм, уӕд нын «тӕригъӕдджын буары монцтӕ, цӕстыты монцтӕ ӕмӕ мулкӕй ӕппӕлын» къӕппӕг суыдзысты (1 Иоан. 2:16). Кӕнӕ, чи зоны, афтӕ хъуыды кӕнӕм, ӕмӕ нӕ буары монцты фӕдыл куы цӕуӕм, уӕд удӕнцой ссардзыстӕм (Ром. 8:6). Зӕгъӕм, иуӕй-иутӕ наркотиктыл ӕмӕ нозтыл бафтыдысты, порнографимӕ кӕсыныл фӕцахуыр сты, цардӕн тӕссаг чи у, ахӕм спорты архайынц ӕмӕ ӕндӕр алыхуызон ӕвзӕр хъуыддӕгтӕ кӕнынц. Хӕйрӕджы «хинмитӕ» адӕмы зонд афтӕ сзыгъуыммӕ кӕнынц, ӕмӕ, ӕцӕг удӕнцой цы у, уый нал фембарынц (Еф. 6:11).

¹⁸ Кӕй зӕгъын ӕй хъӕуы, минас кӕнай ӕмӕ, чы ’мбӕлы, ахӕм ирхӕфсӕнтӕ дӕхицӕн  ӕвзарай, уым ӕвзӕрӕй ницы ис, бӕрц куы зонай, уӕд. Фӕлӕ нын уӕддӕр ацы хъуыддӕгтӕ царды сӕйрагдӕр не сты. Абон уӕлдай ахсджиаг у, цӕмӕй ӕмбаргӕйӕ архайӕм ӕмӕ хиуыл хӕцын зонӕм. Нӕ зӕрдӕйы фӕндтыл куы цӕуӕм, уӕд нӕ уырнындзинад ӕрлӕмӕгъ уыдзӕн ӕмӕ «нӕ Хицау Йесо Чырыстийы тыххӕй бӕлвырдӕй цы базыдтам», уымӕ гӕсгӕ нӕ бон архайын нал уыдзӕн ӕмӕ нӕ къухы бирӕ нал ӕфтдзӕн (2 Пет. 1:8).

19, 20. Куыд у нӕ бон ӕцӕг удӕнцой ссарын?

¹⁹ Йегъовӕйы фӕдзӕхстытыл куы фӕхъуыды кӕнӕм, уӕд ӕй фембарӕм, ацы дунейы хорздзинӕдтӕ ӕрмӕстдӕр рӕстӕгмӕ кӕй сты. Моисей дӕр уый хорз ӕмбӕрста (Дзут. 11:25). Адӕймаг ӕдзух зӕрдӕрухс куы уа ӕмӕ йӕ цардӕй райгонд куы уа, уӕд уый схонӕн ис ӕцӕг удӕнцой. Ахӕм удӕнцой ссардзыстӕм, нӕ уӕларвон Фыды фӕндон куы ӕххӕст кӕнӕм, уӕд (Матф. 5:6).

²⁰ Уӕдӕ дарддӕр дӕр Хуыцауы хъуыддӕгты агурӕм удӕнцой. Афтӕ куы кӕнӕм, уӕд «ӕнӕхуыцау хъуыддӕгтӕ ӕмӕ зӕххон монцтӕй дард лидздзыстӕм... цалынмӕ нӕ диссаджы ныфс нӕ сӕххӕст ӕмӕ кады мидӕг нӕ раргом Стыр Хуыцау, стӕй нӕ Ирвӕзынгӕнӕг Йесо Чырысти» (Тит. 2:12, 13). Чырыстийы ’фсондз нӕхиуыл кӕй сӕвӕрдтам, уымӕ гӕсгӕ йын йӕ разамындмӕ дарддӕр дӕр хъусӕм. Уый нын хӕсдзӕн ӕцӕг удӕнцой ӕмӕ амондджын уыдзыстӕм!

[Фиппаинаг]

Цавӕр дзуапп ратдзынӕ?

• Абон Йегъовӕйы адӕм удӕнцой цӕй фӕрцы ссарынц?

• Хорз хабар кӕй хъусын кӕнӕм, уый нӕхицӕн дӕр ӕмӕ иннӕтӕн дӕр удӕнцой куыд хӕссы?

• Бинонты хистӕртӕн сӕ бон цы у аразын, цӕмӕй бинонты ахуыр алкӕмӕн дӕр удӕнцой хӕсса?

• Нӕ уырнындзинад нын цавӕр хъуыддӕгтӕ ӕрлӕмӕгъ кӕнынц?

[Фарстатӕ ахуыр кӕнынӕн]

[Нывтӕ 26 фарсыл]

Мах ӕцӕг удӕнцой ссарӕм, Чырыстийы ’фсондз нӕхиуыл кӕй сӕвӕрӕм, уый фӕрцы