Зиу Болгарийы

«Кӕрдинаг бирӕ ис, кусджытӕ та – гыццыл. Уӕдӕ курут хуымы Хицауӕй, цӕмӕй йӕ хуыммӕ кусджытӕ рарвита» (МАТФ. 9:37, 38).

КУЫД хорз ӕвдисынц Йесо Чырыстийы ныхӕстӕ, Болгарийы цы уавӕр ис, уый! Ацы рӕсугъд бӕстӕйы, хуссар-скӕсӕн Европӕйы, цӕры авд милуан адӕймаджы, ӕмӕ цӕмӕй хорз хабар фехъусой, уый тыххӕй хъӕуы фылдӕр кусджытӕ. Болгарийы ис 1 700 хъусынгӕнӕджы. Фӕлӕ ӕнӕхъӕн бӕстӕйыл хорз хабар фехъусын кӕнынӕн уыдон фаг не сты. Уымӕ гӕсгӕ Разамонӕг совет уынаффӕ рахаста, цӕмӕй, Европӕйы бӕстӕтӕй Болгаримӕ зиумӕ фӕхуыдтаиккой болгайраг ӕвзагыл дзурӕг хъусынгӕнджыты. Зиу хъуамӕ цыдаид 2009 азы, сӕрды, авд къуырийы дӕргъы ӕмӕ фӕуыдаид 14–16 августы. Уыцы бонты ӕфсымӕртӕ спълан кодтой облӕстон конгресс Софияйы, «Цырддзаст ут!», зӕгъгӕ.

Тынг бирӕтӕ зиууӕттӕ

Софийяйы филиалы цы ’фсымӕртӕ лӕггад кӕны, уыдон тынг бадис кодтой, куыд бирӕты бафӕндыд зиуы архайынмӕ ӕрцӕуын, ууыл. Хотӕ ӕмӕ ’фсымӕртӕ Францӕй, Германӕй, Грецийӕ, Италийӕ, Польшӕйӕ ӕмӕ Испанийӕ цӕттӕ уыдысты Болгаримӕ ӕрцӕуынмӕ. Цӕугӕ та хъуамӕ ӕркодтаиккой сӕхи хардзӕй, стӕй сӕ хъуыди отпуск райсын дӕр. Ӕрцӕуын кӕй фӕндыд, уыдоны нымӕц къуырийӕ-къуыримӕ фылдӕр кодта, цалынмӕ, ӕппынфӕстаг, не схӕццӕ 292 адӕймагмӕ! Афтӕ бирӕ кӕй уыдысты, уый фӕрцы сӕ арвыстой ӕртӕ горӕтмӕ: Казанлыкмӕ, Санданскимӕ ӕмӕ Силистрӕмӕ. Болгарийы районон цӕстдарӕджытӕ зиумӕ фӕхуыдтой бынӕттон пионерты ӕмӕ хъусынгӕнджыты дӕр. Афтӕмӕй, хорз хабар арӕх кӕм нӕ хъусын кодтой, уым зынгзӕрдӕйӕ лӕггад кодта 382 адӕймаджы.

Уыцы горӕттӕм хӕстӕгдӕр цы ӕмбрыдтӕ ис, уыдонӕн рагацау фехъусын кодтой, цӕмӕй уазджытӕн цӕрӕн бынӕттӕ ссардтаиккой. Ӕфсымӕртӕ баххуырстой агъуыстытӕ ӕмӕ аслам гостиницӕтӕ. Уыдон сӕхиуыл нӕ ауӕрстой, цӕмӕй уызджыты сӕ бынӕттӕм фӕхӕццӕ кодтаиккой ӕмӕ сын стӕй, сӕ бон цӕмӕй уыд, уымӕй ӕххуыс кодтаиккой. Ӕртӕ горӕты дӕр баххуырстой бынӕттӕ ӕмбырдтӕ уадзынӕн. Стӕй хъуыддӕгтӕ афтӕ спълан кодтой, цӕмӕй ӕмбырдтӕ уагътаиккой уазӕг ӕфсымӕртӕ. Ӕхсызгон куыннӕ уыди, Йегъовӕйы Ӕвдисӕнтӕй иу дӕр кӕм нӕ цард, уым-иу 50 хъусынгӕнӕджы кӕй ӕрӕмбырд Йегъовӕйы кадджын кӕнынмӕ.

Зиумӕ ӕндӕр бӕстӕтӕй чи ’рцыд, уыдон куыд зӕрдиагӕй хъусын кодтой, уый диссаг уыд. Сӕрды Болгарийы вӕййы 40 градусы бӕрц тӕвд. Фӕлӕ уыцы зынгзӕрдӕ хотӕ ӕмӕ ’фсымӕрты ницы баурӕдта. Горӕт Силистрӕ ис Дунайы былыл, цӕры дзы 50 000 адӕймагӕй фылдӕр. Уыдонӕн хорз хабар бӕстон хъуыстгонд ӕрцыд фыццаг ӕртӕ къуырийы дӕргъы. Уый фӕстӕ та ’фсымӕртӕ ӕмӕ хотӕ хъусын кӕнын райдыдтой хӕстӕгдӕр хъӕуты. Бахӕццӕ сты суанг Тутраканмӕ дӕр, Силистрӕйӕ ныгуылӕнырдӕм 55 километры дарддӕр. Хъусын кӕнын-иу райдыдтой райсомӕй дӕсы ’рдӕгыл. Сихор-иу куы бахордтой, уӕд та-иу хъусын кодтой изӕры авд сахатмӕ кӕнӕ та ноджы фӕстӕдӕрмӕ. Афтӕ уыд сӕ хабар, Казанлыкы ӕмӕ Саданскийы зиуы чи архайдта, уыцы  зынгзӕрдӕ хъусынгӕнджытӕн дӕр – уыцы горӕттыл зылд куы фесты, уӕд та хъусын кодтой хӕстӕгдӕр хъӕуты ӕмӕ горӕтты.

Зиуы рӕстӕджы цы бантыст?

Уыцы авд къуырийы дӕргъы тынг бирӕтӕ фехъуыстой хорз хабар. Апостолты рӕстӕг куыд загътой, афтӕ уыцы горӕты цӕрджытӕн дӕр сӕ бон зӕгъын уыд, нӕ горӕт нын уӕ ахуырадӕй байдзаг кодтат, зӕгъгӕ (Ап. хъ. 5:28). Зиуы чи архайдта, уыцы хъусынгӕнджытӕ байуӕрстой 50 000 журналы, Библи ахуыр кӕнын та райдыдтой 482 адӕймагимӕ. 2009 азы 1 сентябры Силистрӕйы фӕзынд ӕмбырд, Казанлыкы ӕмӕ Санданскийы та – къордтӕ. Фыццаг хатт хорз хабар уыцы зиуы рӕстӕг чи фехъуыста, уыдоны уырнындзинад куыд фидар кӕны, уымӕ кӕсгӕйӕ адӕймагӕн йӕ зӕрдӕ райы.

Зиуы фыццаг къуыри иу хо Испанийӕ Хуыцауы тыххӕй дзырдта Каринӕимӕ. Каринӕ цӕры Силистрӕйы, кусы газеттӕ уӕйгӕнӕгӕй уынджы. Сылгоймаджы зӕрдӕмӕ тынг фӕцыд, цы фехъуыста, уый ӕмӕ ӕмбырдмӕ ’рбацыд. Каринӕ уайтагъд сразы Библи ахуыр кӕныныл. Йӕ лӕджы Хуыцау нӕ уырны, ӕмӕ уымӕ гӕсгӕ загъта, цӕмӕй Библи йемӕ ахуыр кӕной парчы. Библи ахуыр кӕнын райдыдтой йӕ дыууӕ чызджы дӕр. Хистӕр чызг Даниелӕйӕн рӕстдзинад йӕ зӕрдӕмӕ тынг фӕцыд. Чиныг «Библи цы дзуры» иу къуыримӕ бакаст, ӕмӕ, Фыстад иконӕты тыххӕй цы дзуры, уый куы базыдта, уӕд Библийы уынаффӕмӕ гӕсгӕ бакодта. Стӕй рӕстдзинады тыххӕй дзурын райдыдта йе ’мбӕлттӕн. Фыццаг хатт ӕмбырдмӕ куы ’рбацыд, уымӕй ӕртӕ къуырийы фӕстӕ загъта, йемӕ Библи чи ахуыр кодта, уыцы хойӕн: «Мӕн дӕр фӕнды, цӕмӕй сымах хуызӕн уон. Цы кӕнын мӕ хъӕуы, цӕмӕй ӕз дӕр хъусын кӕнын райдайон?» Ныр се ’ртӕйӕн дӕр – Даниелӕйӕн, йӕ мадӕн ӕмӕ йӕ кӕстӕр хойӕн – сӕ уырнындзинад фидарӕй-фидардӕр кӕны.

Болгайраг ӕфсымӕр Орлин зиумӕ ’рцыд Италийӕ. Орлин хъусын кодта Казанлыкы. Иу бон уацамынды фӕстӕ хӕдзармӕ куы фӕцӕйцыд, уӕд парчы федта дыууӕ лӕппуйы бандоныл бадгӕ. Орлин сӕмӕ аныхас кодта ӕмӕ сын радта чиныг «Библи цы дзуры», стӕй семӕ баныхас кодта, дыккаг бон та кӕй фембӕлдзысты, ууыл. Куы фембӕлдысты, уӕд Орлин Светомиримӕ Библи ахуыр кӕнын райдыдта. Иннӕ бон сӕ ахуыр адарддӕр кодтой, ӕмӕ афтӕ алы бон дӕр. Цы бон базонгӕ сты, уыцы бонӕй фӕстӕмӕ ма фембӕлдысты аст хатты ӕмӕ аст хатты дӕр ахуыр кодтой Библи. Светомир Орлинӕн загъта: «Демӕ куы фембӕлдтӕн, уымӕй дыууӕ боны раздӕр Хуыцаумӕ куывтон, цӕмӕй мын баххуыс кодтаид, ӕмӕ йӕ базыдтаин. Ӕз дзырд радтон, куы мын баххуыс кӕна, уӕд ын мӕ цард кӕй снывонд кӕндзынӕн». Орлин Италимӕ куы ацыд, уӕд Светомиримӕ Библи дарддӕр  ахуыр кодтой бынӕттон ӕфсымӕртӕ. Светомир рӕстдзинад йӕ зӕрдӕмӕ арф айста.

Хуыцауы хъуыддагӕн чи ницы бавгъау кодта, уыдон арфӕгонд ӕрцыдысты

Цы дзурынц, отпуск чи райста ӕмӕ йӕхи хардзӕй ӕндӕр бӕстӕмӕ хорз хабар хъусын кӕнынмӕ чи ацыд, уыдон? Иу хистӕр нӕлгоймаг Испанийӕ фыссы: «Зиуы фӕрцы Испанийы цӕрӕг болгайраг ӕфсымӕртӕ фенгомдӕр сты. Зиу тынг фӕзынд, чи дзы архайдта, уыцы ’фсымӕртыл». Иу лӕг ӕмӕ ус Италийӕ загътой: «Уымӕй диссагдӕр рӕстӕг нӕ царды никуы уыд! Зиу нын нӕ цард аивта. Ныр бынтон ӕндӕр адӕймӕгтӕ стӕм». Ацы бинонтӕ фӕнд кӕнынц Болгаримӕ цӕрынмӕ ацӕуын, цӕмӕй, хъусынгӕнджытӕ фылдӕр кӕм хъӕуы, уым лӕггад кӕной. Каринӕ цӕры Испанийы ӕмӕ лӕггад кӕны пионерӕй. Зиуы рӕстӕджы хъусын кодта Силистрӕйы. Каринӕ йӕ куыст ныууагъта ӕмӕ ацыд Болгаримӕ, Силистрӕйы цы ног ӕмбырд фӕзынд, уым лӕггад кӕнынмӕ. Каринӕ ӕрӕмбырд кодта ӕхца, цӕмӕй йын фаг уыдаиккой иу аз Болгарийы фӕцӕрынӕн. Афтӕ цӕмӕн бакодта, уый тыххӕй загъта: «Тынг цин кӕнын ӕмӕ Йегъовӕйӕ бузныг дӕн, фадат мын кӕй фӕци Болгарийы лӕггад кӕнынӕн. Ныфс мӕ ис, мӕ бон дзы бирӕ рӕстӕгмӕ баззайын кӕй уыдзӕн. Ныр Библи ахуыр кӕнын фондз адӕймагимӕ, ӕмӕ дзы ӕртӕйӕ цӕуынц ӕмбырдтӕм».

Иу хойы Италийӕ фӕндыд зиумӕ ацӕуын, фӕлӕ куыстмӕ нырма ӕрӕджы бацыд ӕмӕ йын отпуск нӕма ӕмбӕлд. Фӕлӕ уӕддӕр хицауӕн загъта, цӕмӕй йын ӕхца ма бафидой, афтӕмӕй йӕ иу мӕймӕ куыстӕй ауадзой. Куы нӕ йӕ ауагътаиккой, уӕд хо цӕттӕ уыд йӕ куыст ныууадзынмӕ дӕр. Куыннӕ йӕм фӕкастысты диссаг хицауы ныхӕстӕ: «Хорз, ӕрмӕст афтӕ баныхас кӕнӕм: Болгарийӕ мын-иу открыткӕ ӕрӕрвит». Кӕй зӕгъын ӕй хъӕуы, хо бамбӕрста, Йегъовӕ йын йӕ кувдтытӕ кӕй фехъуыста.

Станиславӕ у ӕрыгон хо болгайраг горӕт Варнӕйӕ. Уыцы хо куыста ӕнӕхъӕн бон ӕмӕ иста хорз мызд. Цӕмӕй Силистрӕмӕ зиумӕ ацыдаид, уый тыххӕй рӕстӕгмӕ йӕхи куыстӕй ракуырдта. Йӕ бӕстӕмӕ хорз хабар хъусын кӕнынмӕ ахӕм дард ранӕй чи ’рцыд, уыцы пионертӕ куыд цин кӕнынц, уый куы федта, уӕд йӕ цӕссыгтӕ ’ркалдысты. Станиславӕ бамбӕрста, ӕппӕты сӕйрагдӕр ын куыст кӕй сси ӕмӕ йӕ цард ӕнӕпайда хъуыддӕгтыл кӕй цӕуы. Дыууӕ къуырийы фӕстӕ сӕхимӕ куы ’рцыд, уӕд йӕ куыст ныууагъта ӕмӕ пионерӕй лӕггад кӕнын райдыдта. Ныр Станиславӕ йӕ цардӕй райгонд у, уымӕн ӕмӕ йе ’взонджы бонты йе Сфӕлдисӕг Стыр Хуыцауы йӕ зӕрдыл дары (Еккл. 12:1).

Цӕй стыр арфӕдзинад у Йегъовӕйӕн лӕггад кӕнын! Уымӕй хуыздӕр ницы ис, цӕмӕй дӕ рӕстӕг ӕмӕ дӕ хъарутӕ хардз кӕнай ацы ахсджиаг хъуыддагыл – адӕмы ахуыр кӕнай ӕмӕ хорз хабар хъусын кӕнай. Дӕуӕн та дӕ бон куыд у ацы цардирвӕзынгӕнӕн куысты фылдӕр архайын? Чи зоны дӕхи бӕстӕйы ис, хъусынгӕнджытӕ фылдӕр кӕм хъӕуы, ахӕм бынӕттӕ. Уырдӕм ацӕуын дӕ бон нӕ уаид? Кӕнӕ ис ӕндӕр ӕвзаг сахуыр кӕнӕн, цӕмӕй дӕ бӕстӕйы ӕххуыс кӕнай, рӕстдзинад базонынмӕ чи бӕллы, уыцы адӕмӕн. Хуыцауы хъуыддаджы фылдӕр аразыны тыххӕй дӕ царды цыфӕнды ма фӕивай, уӕддӕр дӕ фидарӕй уырнӕд, Йегъовӕ дын кӕй арфӕ кӕндзӕн (Ӕмб. 10:22).

[Рамкӕ/​Ныв 32 фарсыл]

Уыцы бон сӕ никуы ферох уыдзӕн

Европӕйы иннӕ бӕстӕтӕй Болгаримӕ зиумӕ чи ’рцыд, уыдонӕй бирӕтӕ сӕ рӕстӕг афтӕ спълан кодтой, цӕмӕй бахаудаиккой, Софийяйы цы облӕстон конгресс уыд, уымӕ. Конгресс хуынди «Цырддзаст ут!», зӕгъгӕ. Бынӕттон ӕфсымӕрты ӕмӕ хоты уӕлдай тынгдӕр бафидар кодта, фӕсарӕнтӕй дзы уыйбӕрц адӕм кӕй уыд, уый. Ӕфсымӕр Джеффри Джексон, Разамонӕг советӕй, куы фехъусын кодта, Библи (Ног дунейы тӕлмац) ӕнӕхъӕнӕй болгайраг ӕвзагыл кӕй рацыд, уӕд, конгрессы цы 2 039 адӕймаджы уыд, уыдоны цинӕн кӕрон нал уыд. Уыцы майрӕмбон уыдон сӕ зӕрдӕбын ӕмдзӕгъдӕй равдыстой, куыд тынг бузныг уыдысты ахӕм диссаджы лӕварӕй. Бирӕтӕ дзы фырцинӕй сӕ цӕссыг дӕр нал баурӕдтой. Ацы раст ӕмӕ ӕнцонӕмбарӕн тӕлмац сыгъдӕгзӕрдӕ болгайрӕгтӕн баххуыс кӕндзӕн Йегъовӕйы базонынӕн.

[Картӕ 30, 31 фӕрстыл]

(Мыхуыры куыд рацыд, уый фенӕн ис публикацийы)

БОЛГАРИ

Силистрӕ

Казанлык

Сандански

СОФИЯ

[Нывтӕ 31 фарсыл]

Уыцы авд къуырийы дӕргъы бирӕтӕ фехъуыстой хорз хабар