Ӕдзух Йегъовӕйы хъуыддӕгты архай

Радзырдта йӕ Вернон Зубко

ӔЗ СХЪОМЫЛ дӕн Стенены хъӕуы цур фермӕйы, Саскачеваны провинцийы (Канадӕ). Мӕ фыд Фред ӕмӕ мӕ мад Аделлӕ тынг бирӕ фыдӕбон кодтой, цӕмӕй фондз сывӕллоны фӕдардтаиккой ӕмӕ сӕ Йегъовӕимӕ базонгӕ кодтаиккой: мӕ хистӕр хо Ауреллийы, мӕн, мӕ дыууӕ кӕстӕр ӕфсымӕр Альвин ӕмӕ Дарел ӕмӕ мӕ кӕстӕр хо Аллегрӕйы. Нӕ ныййарджытӕй суанг абоны онг дӕр бузныг стӕм, рӕстдзинады фӕндагыл нӕ кӕй слӕууын кодтой, уый тыххӕй.

Мӕ фыд уыд сӕрст чырыстон ӕмӕ хъӕбатыр хъусынгӕнӕг. Хъуыди йӕ бирӕ фыдӕбон кӕнын, цӕмӕй нӕ фӕдардтаид. Уый архайдта, цӕмӕй йӕ иууылдӕр зыдтаиккой Йегъовӕйы Ӕвдисӕнӕй. Ӕдзух-иу дзырдта рӕстдзинады тыххӕй. Куыд зынгзӕрдӕ ӕмӕ ныфсхаст уыд, уый мыл тынг бандӕвта. Арӕх-иу мын дзырдта: «Ӕдзух Йегъовӕйы хъуыддӕгты архай ӕмӕ дӕхи бирӕ зындзинӕдтӕй бахиздзынӕ».

Арӕх-иу хъусын кодтам Стенены ӕмӕ хӕстӕг горӕтты уынгты. Фӕлӕ мын хъусын кӕнын алыхатт ӕнцон нӕ уыд. Алы горӕты дӕр-иу уыди фыдуаг лӕппутӕ, ӕмӕ-иу ныл ӕрӕмбырд сты ӕмӕ нӕ хынджылӕг кодтой. Иу хатт, аст азы мыл куы цыд, уӕд тигъыл лӕууыдтӕн, мӕ къухы журналтӕ «Хъахъхъӕнӕн мӕсыг» ӕмӕ «Райхъал ут!», афтӕмӕй, ӕмӕ мыл лӕппутӕ амбырд сты. Мӕ ног худ мын мӕ сӕрӕй фелвӕстой ӕмӕ йӕ мӕ фӕстӕ столбӕйыл ацауыгътой. Хорз ӕмӕ мӕм иу ацӕргӕ ӕфсымӕр йӕ хъус дардта, ӕмӕ сӕ куы ауыдта, уӕд мӕм ӕрбацыд ӕмӕ мын афтӕ бакодта: «Верн, исты хабар у?» Уӕд лӕппутӕ ӕвиппайды фӕцыдӕр сты. Раст зӕгъгӕйӕ, мӕ ныфс гыццыл асаст, фӕлӕ иу хъуыддаг хорз бамбӕрстон: иунӕгӕй уынджы куы хъусын кӕнай, уӕд иу ран столбӕйау лӕууын нӕ хъӕуы. Мӕ гыццылӕй-иу ахӕм цӕуылдӕртыл кӕй сӕмбӕлдтӕн, уый фӕрцы мӕм хӕдзарӕй-хӕдзармӕ хъусын кӕнынӕн фаг ныфс фӕзынд.

Альвин ӕмӕ ӕз донаргъуыд райстам 1951 азы майы. Уӕд мыл цыди 13 азы. Абон дӕр ма йӕ хорз хъуыды кӕнын, донаргъуыды фӕдыл раныхас кӕмӕн уыди, уыцы ӕфсымӕр Джек Нейтан нын кӕй дзырдта, зӕгъгӕ уыл иу мӕй дӕр афтӕ ма ацӕуӕд, ӕмӕ Йегъовӕйы тыххӕй макӕмӕн мацы радзурат *. Нӕ бинонтӕ пионерӕй лӕггад кӕнын нымадтой царды ӕппӕты хуыздӕр фӕндагыл. Ӕмӕ 1958 азы скъола куы фӕдӕн, уӕд Виннипегмӕ, Манитобӕйы провинцимӕ, пионерӕй лӕггад кӕнынмӕ ацыдтӕн. Мӕ фыдӕн хъӕдӕрмӕджы куыст кӕнын кӕй ӕххуыс кодтон, уый йын кӕд ӕхсызгон уыди, уӕддӕр мӕ мӕ мадимӕ сразӕнгард кодтой, цӕмӕй ӕххӕстрӕстӕг лӕггад кодтаин ӕмӕ разы уыдысты, цӕмӕй уырдӕм ацыдаин.

 Ног хӕдзар ӕмӕ ног ӕмбал

1959 азы филиал разӕнгард кодта, йӕ бон кӕмӕн уыди, уыдоны Квебекы провинцимӕ ацӕуын, хъусынгӕнджытӕ дзы кӕй нӕ фаг кодта, уый тыххӕй. Ӕз та уӕд пионерӕй лӕггад кодтон Монреалы. Уӕд мӕ царды ӕрцыд стыр ивындзинӕдтӕ: райдыдтон ахуыр кӕнын французаг ӕвзаг ӕмӕ бынтон ӕндӕр ӕгъдӕуттыл. Иу хатт мын нӕ районон цӕстдарӕг загъта: «Макуы-иу зӕгъ: „Хӕдзары-иу мах уый афтӕ кодтам“». Йӕ уынаффӕ мын стыр пайда фӕци (1 Кор. 9:22, 23).

Квебекмӕ куы ацыдтӕн, уӕд мын пионер-ӕмбал нӕ уыди. Фӕлӕ иу ӕрыгон хо, Ширли Туркотт, зӕгъгӕ, уый размӕ Виннипегы кӕуыл фембӕлдтӕн, уый сси ме ’мбал цард-цӕрӕнбонтӕм, 1961 азы февралы нӕ цард куы баиу кодтам, уый фӕстӕ. Уымӕн дӕр йӕ бинонтӕ Йегъовӕйы бирӕ уарзтой. Уӕд ӕй ӕз нырма ӕмбаргӕ дӕр нӕ кодтон, Ширли мын царды мидӕг стыр ӕххуыс ӕмӕ ныфсы хос кӕй уыдзӕн.

Ацыдыстӕм Гаспемӕ

Нӕ чындзӕхсӕвӕй дыууӕ азы куы рацыд, уӕд нӕ сӕрмагонд пионертӕй лӕггад кӕнынмӕ арвыстой горӕт Римускимӕ (Квебек). Иннӕ аз нын уалдзӕджы филиал загъта, цӕмӕй ӕрзылдаиккам Гаспейы ӕрдӕгсакъадахыл, Канадӕйы скӕсӕн фарсыл. Нӕ хӕс уыди, гӕнӕн уӕвгӕйӕ, адӕмы зӕрдӕты фылдӕр мыггӕгтӕ байтауын (Еккл. 11:6). Нӕ машинӕйы сӕвӕрдтам иу мин журналӕй фылдӕр ӕмӕ иу-цыппар сӕдӕ чиныджы. Немӕ ма аластам хӕринаг ӕмӕ дзаумӕттӕ дӕр, ӕмӕ араст стӕм, иу мӕй хорз хабар кӕм хъусын кодтам, уырдӕм. Мах зылдыстӕм Гаспейы ӕппӕт гыццыл хъӕутыл дӕр. Бынӕттон радиойӕ фехъусын кодтой, зӕгъгӕ нӕм ӕрбацыдысты Ӕвдисӕнтӕ ӕмӕ сын сӕ публикацитӕ ма исут. Фӕлӕ бирӕтӕ афтӕ фенхъӕлдтой ӕмӕ нын нӕ публикацитӕн рекламӕ кӕнынц, ӕмӕ нын нӕ литературӕ истой.

Уыцы рӕстӕджы Квебекы иуӕй-иу рӕтты сӕрибарӕй хъусын кӕнын ӕрӕджы райдыдтой ӕмӕ-иу нӕ пъӕлицӕйы кусджытӕ арӕх баурӕдтой. Ахӕм хабар ныл ӕрцыд, нӕ литературӕ нын алы хӕдзары дӕр кӕм истой, уыцы горӕты. Пъӕлицӕйы кусӕг нӕм бацыди ӕмӕ нӕ участокмӕ акодта. Горӕты сӕйраг юрист бардзырд радта, цӕмӕй мауал хъусын кодтаиккам. Уыцы бон пъӕлицӕйы хистӕр куысты кӕй нӕ уыд, уымӕ гӕсгӕ уыцы юристӕн равдыстон гӕххӕт Торонтойы филиалӕй. Фыст дзы уыд, закъонмӕ гӕсгӕ нӕ бон кӕй у хъусын кӕнын. Юрист уыцы гӕххӕт куы бакаст, уӕд ӕвиппайды афтӕ куы бакӕнид: «Мӕн сӕрниз нӕ хъӕуы. Уый мын сауджын загъта, цӕмӕй уӕ хъусын кӕнын ма уадзон». Цӕмӕй адӕм афтӕ ма ахъуыды кодтаиккой, ӕмӕ нӕ хъуыддаг закъоны ныхмӕ у, уый тыххӕй ӕвӕстиатӕй ацыдыстӕм, пъӕлицӕйы кусӕг нӕ кӕм баурӕдта, уырдӕм, ӕмӕ дарддӕр хъусын кодтам.

Дыккаг бон райсомӕй пъӕлицӕйы хистӕрмӕ куы ’рбацыдыстӕм ӕмӕ куы фехъуыста, кӕй нӕ баурӕдтой, уӕд рамӕсты. Куы йӕ фехъуыстаиккат, телефонӕй уыцы юристимӕ куыд ныхас кодта, уый! Пъӕлицӕйы хистӕр нын загъта, зӕгъгӕ нӕ исчи куы хъыгдара, уӕд-иу мӕм ӕрбадзурут ӕмӕ цы хъӕуы, уый бакӕндзынӕн. Уыцы ран кӕд ӕрцӕуӕггӕгтӕ уыдыстӕм ӕмӕ французагау бынтон хорз нӕ дзырдтам, уӕддӕр нӕм адӕм хӕларзӕрдӕ уыдысты ӕмӕ нӕм уазӕгуарзондзинад равдыстой. Фӕлӕ хъуыды кодтам, зӕгъгӕ, цымӕ уыцы адӕм рӕстдзинад базондзысты? Ӕмӕ нӕ фарстайӕн дзуапп базыдтам бирӕ азты фӕстӕ, Гаспейы Паддзахады залтӕ аразын куы райдыдтам, уӕд. Хорз хабар кӕмӕн хъусын кодтам, уыдонӕй бирӕтӕ систы не ’фсымӕртӕ. Ӕцӕгдӕр, рӕстдзинады мыггаг ӕрмӕстдӕр Йегъовӕ сырӕзын кӕны (1 Кор. 3:6, 7).

Хуыцауӕй райстам лӕвар

Нӕ чызг Лисӕ райгуырд 1970 азы. Йегъовӕ нын ахӕм диссаджы лӕвар кӕй бакодта, ууыл тынг цин кодтам. Мӕ бинойнаг ӕмӕ мӕ чызгимӕ бирӕ Паддзахады залтӕ фӕарӕзтам. Лисӕ скъола куы фӕци, уӕд нын загъта: «Мамӕ ӕмӕ папӕ, ӕххӕстрӕстӕг лӕггад кӕнын уӕ цасдӕр рӕстӕг кӕй бакъуылымпы кодтон, уымӕ гӕсгӕ мӕ фӕнды пионерӕй лӕггад кӕнын, ӕмӕ уын цы нӕ бантыст, уый ӕз баххӕст кӕндзынӕн». Уӕдӕй рацыд 20 азы ӕмӕ Лисӕ абон дӕр лӕггад кӕны пионерӕй, фӕлӕ ныр йӕ лӕг Сильвенимӕ. Лисӕ  Сильвенимӕ цалдӕр хатты куыстой ӕндӕр бӕстӕты дӕр,– Паддзахады хъуыддаг размӕ кӕнынӕн чи хъӕуы, ахӕм агъуыстытӕ арӕзтой. Нӕ бинонты фӕнды хуымӕтӕг цард кӕнын ӕмӕ нӕ хъарутӕ Йегъовӕйӕн лӕггад кӕнынмӕ саразын. Лисӕ пионерӕй лӕггад кӕнын куы райдыдта, уӕд цы ныхӕстӕ загъта, уыдон мӕ никуы ферох уыдзысты. Сразӕнгард мӕ кодта, цӕмӕй та ногӕй пионерӕй лӕггад кӕнын райдыдтаин, ӕмӕ 2001 азӕй нырмӕ дӕн пионер. Пионерӕй кӕй лӕггад кӕнын, уымӕ гӕсгӕ дарддӕр ахуыр кӕнын алы хъуыддаджы дӕр мӕ ныфс Йегъовӕйыл дарын ӕмӕ хуымӕтӕг цард кӕнын. Ӕз мӕ цардӕй дӕн райгонд ӕмӕ дӕн амондджын.

Ацы куысты ӕнӕмӕнг хъӕуы уарзондзинад ӕмӕ иузӕрдиондзинад

Йегъовӕ мын равдыста, нӕхиуыл куы нӕ фӕауӕрдӕм ӕмӕ нын цы хӕслӕвӕрдтӕ ратты, уыдоныл нӕхи куы нӕ атигъ кӕнӕм, уӕд бирӕ арфӕдзинӕдтӕй хайджын кӕй вӕййӕм. Регионалон арӕзтадон комитеты кӕй дӕн ӕмӕ Квебекы ӕмӕ ӕндӕр рӕтты ме ’фсымӕртимӕ ӕмӕ мӕ хотимӕ залтӕ кӕй аразын, уый мӕхицӕн стыр кадыл нымайын.

Кӕд аразджытӕй чидӕртӕ сценӕйӕ дзурынмӕ дӕсны не сты, уӕддӕр сын Паддзахады залтӕ аразыны хъуыддаджы ӕмбал нӕй. Уыдон сӕ удтӕ раттынц уыцы хъуыддагӕн ӕмӕ сӕ курдиӕттӕ рабӕрӕг вӕййынц. Уый фӕрцы фӕзыны, Йегъовӕйӕн кӕм лӕггад кӕнынц, ахӕм рӕсугъд залтӕ.

Иу хатт мӕ чидӕр бафарста: «Цӕмӕй дӕ Паддзахады залтӕ аразынмӕ фӕхоной, уый тыххӕй адӕймагмӕ цавӕр миниуджытӕ хъуамӕ уа?» Мӕнмӕ гӕсгӕ, фыццаджыдӕр хъуамӕ уарза Йегъовӕйы, йӕ Фырты ӕмӕ йе ’мчырыстӕтты (1 Кор. 16:14). Дыккаджы та, хъуамӕ уа иузӕрдион. Хъуыддӕгтӕ мах куыд фӕнды, афтӕ куы нӕ цӕуой,– ӕнӕ уымӕй та гӕнӕн нӕй,– уӕд нын иузӕрдиондзинад баххуыс кӕндзӕн, Йегъовӕйы организаци цы разамынд дӕтты, уымӕ дарддӕр дӕр хъусын ӕмӕ Паддзахады залтӕ аразын.

Йегъовӕйӕ дӕн бузныг

Мӕ фыд амард 1985 азы. Цы уынаффӕ мын радта, ӕдзух Йегъовӕйы хъуыддӕгты архай, зӕгъгӕ, уый нырма дӕр мӕ зӕрдыл дарын. Иннӕ сӕрст чырыстӕттау мӕ фыдӕн дӕр уӕлӕрвты ис бирӕ куыст (Рарг. 14:13). Мӕ мадыл ныр цӕуы 97 азы. Инсульт ын кӕй уыди, уый тыххӕй йӕ бон дзурын нал у. Фӕлӕ уӕддӕр Библи хорз зоны. Цы писмотӕ нӕм ныффыссы, уым Библийы стихтӕй фӕпайда кӕны ӕмӕ нӕ фӕразӕнгард кӕны, цӕмӕй Йегъовӕйӕн дӕрддӕр иузӕрдионӕй лӕггад кӕнӕм. Ахӕм уарзӕгой ныййарджытӕ нын кӕй ис, уый тыххӕй сӕ куыд тынг бузныг стӕм!

Йегъовӕйӕ ма бузныг дӕн мӕ иузӕрдион цардӕмбал Ширлийы тыххӕй. Уый йӕ зӕрдӕмӕ айста йӕ мады ныхӕстӕ: «Верн Хуыцауы хъуыддаджы ӕдзух архайдзӕн ӕмӕ хъуамӕ ӕмбарай, алы хатт ын уый фадат нӕ уыдзӕн, цӕмӕй демӕ бирӕ рӕстӕг ӕрвита». 49 азы размӕ нӕ цард куы баиу кодтам, уӕд нӕ кӕрӕдзийӕн фидарӕй загътам, иумӕ Йегъовӕйӕн лӕггадгӕнгӕйӕ кӕй базӕронд уыдзыстӕм ӕмӕ кӕд ног дунемӕ бахауӕм, уӕд иумӕ не ’рыгон бонтӕм раздӕхдзыстӕм ӕмӕ йын ӕнустӕм кӕй лӕггад кӕндзыстӕм. Мах абон «бирӕ фыдӕбон кӕнӕм Хицауы хъуыддаджы» (1 Кор. 15:58). Йегъовӕ ныл алкӕддӕр тыхст ӕмӕ нӕ хорздзинӕдтӕй цух никуы ныууагъта.

[Фиппаинаг]

[Ныв 31 фарсыл]

«Нӕ бинонты фӕнды хуымӕтӕг цард кӕнын ӕмӕ нӕ хъарутӕ Йегъовӕйӕн лӕггад кӕнынмӕ саразын»