Адӕймаг цас цӕры?

ХУЫЦАУМӔ райдианы уыди фӕнд, цӕмӕй адӕм цардаиккой ӕнустӕм. Фыццаг адӕймаг Адам уыд ӕххӕст ӕмӕ, Хуыцаумӕ куы хъуыстаид, уӕд ӕнустӕм цардаид (Райд. 2:15–17). Фӕлӕ йӕм кӕй нӕ байхъуыста, уый тыххӕй ӕнусон цардӕй ӕнӕхай фӕци, ӕмӕ йӕ байзӕддӕгтӕ иууылдӕр сӕ туджы тӕригъӕд ӕмӕ мӕлӕт рахастой (Ром. 5:12).

Доны хъаймӕты размӕ

Доны хъаймӕты размӕ адӕм цардысты 1 000 азы бӕрц (Райд. 5:5–29). Ӕххӕстдзинадмӕ хӕстӕгдӕр кӕй уыдысты, уымӕ гӕсгӕ фылдӕр цардысты, фӕлӕ ӕххӕстдзинадӕй куыд дарддӕр кодтой, афтӕ сӕ цард цыбырдӕр кодта. Ӕппӕты фылдӕр фӕцард Мафусал – 969 азы. Доны хъаймӕты фӕстӕ та адӕймаджы цард бынтон фӕцыбыр.

Иуӕй-иутӕ зӕгъынц, зӕгъгӕ, Доны хъаймӕты размӕ иу аз нымад уыди иу мӕйыл. Фӕлӕ уый Библимӕ гӕсгӕ раст нӕу. Иу аз 30 боны куы уыдаид, уӕд Еносӕн райгуырдаид сывӕллон, 8 азы дӕр ыл куы нӕма цыд, уӕд. Каинанӕн, Малелеилӕн ӕмӕ Енохӕн та сывӕллӕттӕ райгуырдаид, 6 азы дӕр сыл куы нӕма сӕххӕст, уӕд (Райд. 5:9, 12, 15, 21). Райдианы 7:11 ӕмӕ Райдианы 8:3, 4 стихтӕй куыд зыны, афтӕмӕй 150 боны уыдысты фондз мӕйы. Доны хъаймӕт цы аз райдыдта, уыцы аз ма цы хабӕрттӕ ӕрцыд, Библи ма уыдоны кой дӕр кӕны, зӕгъӕм, 10-ӕм мӕйы кой дӕр, 40 боны кой ӕмӕ дыууӕ хатты 7 боны кой, ӕмӕ уымӕй бӕрӕг у афӕдзы мидӕг кӕй уыди 12 мӕйы (Райд. 8:5, 6, 10, 12–14).

Моисейы рӕстӕгӕй абоны онг

3 500 азы размӕ Моисей адӕймаджы царды тыххӕй ныффыста: «Нӕ царды бонтӕ сты ӕвдай азы. Ӕмӕ кӕд, уӕлдай фидар чи у, уымӕн ӕстай азы сты, уӕддӕр иууылдӕр сты маст ӕмӕ фыдӕбон» (Пс. 90:10). Уӕдӕй абоны онг уавӕр ӕппындӕр нӕ аивта.

Ӕнусты дӕргъы адӕм архайынц, фылдӕр куыд фӕцӕрой, ууыл. Ӕмӕ сӕ фӕнд сӕ къухы не ’фты. Фӕлӕ уӕддӕр иуӕй-иу бӕстӕты адӕм цӕрынц фылдӕр. Джеймс Фрайс ӕмӕ Лоуренс Крапо афтӕ зӕгъынц: «Ивгъуыд ӕнусы АИШ-ы адӕймаг цард 47 азы бӕрц. Абон та цӕры 73 азӕй фылдӕр – адӕймагӕн йӕ цардыл бафтыд 25 азӕй фылдӕр [...] Афтӕ уый тыххӕй нӕу, ӕмӕ цард ӕцӕгдӕр фӕдаргъдӕр ис, фӕлӕ адӕймаг афонӕй раздӕр кӕй нал амӕлы, уый тыххӕй» («Vitality and Aging», 1981 аз, 74, 75 фӕрстӕ).

Иу-2 000 азы размӕ Йесо Чырысти загъта, адӕймагӕн йӕ бон кӕй нӕу йӕ цардыл иу гыццыл дӕр бафтауын (Лук. 12:25). Фӕлӕ ма афтӕ дӕр загъта: «Адӕмӕн сӕ бон цы нӕу, уый Хуыцауӕн у йӕ бон» (Лук. 18:27). Хуыцау пехуымпар Исайы уылты загъта: «Мӕ адӕмы бонтӕ уыдзысты бӕласы бонтау бирӕ» (Ис. 65:22). Стӕй ма Исайы 25:8 фыст ис: «[Хуыцау] фесафдзӕн мӕлӕт ӕнустӕм, Дунедарӕг Хуыцау Йегъовӕ се ’ппӕтӕн дӕр сӕ цӕссыгтӕ сӕ рустӕй ныссӕрфдзӕн». Ацы зӕрдӕвӕрд ма фыст ис Библийы фӕстаг чиныджы дӕр: «Ӕмӕ сын [Хуыцау] ныссӕрфдзӕн сӕ цӕссыгтӕ, ӕмӕ нал уыдзӕн нӕдӕр мӕлӕт, нӕдӕр маст, нӕдӕр хъарӕг, нӕдӕр рыст» (Рарг. 21:4).