АЦЫ дунейы мӕнгарддзинад тынг сарӕх. Адӕм кӕрӕдзи сайынц ӕмӕ стигъынц, давынц, сӕ хӕстӕ нӕ фидынц ӕмӕ, бизнесы цы фӕлывд митӕ кӕнынц, уымӕй ӕппӕлынц. Ахӕм адӕмы ’хсӕн ӕнӕзӕрдӕхудтӕй цӕрын ӕнцон нӕу. Цы нын баххуыс кӕндзӕн, цӕмӕй ӕнӕзӕрдӕхудт уӕм? Баххуыс нын кӕндзӕн ӕртӕ ахсджиаг хъуыддаджы: Йегъовӕйӕ куы тӕрсӕм, сыгъдӕг цӕсгом нын куы уа ӕмӕ нӕм цы ис, уый фагыл куы нымайӕм.

Йегъовӕйӕ тӕрсын

Пехуымпар Исай ныффыста: «Йегъовӕ у нӕ Тӕрхонгӕнӕг, Йегъовӕ у нӕ Закъонӕвӕрӕг, Йегъовӕ у нӕ Паддзах» (Ис. 33:22). Йегъовӕ цы бынат ахсы, уый куы нӕ рох кӕнӕм, уӕд дзы тӕрсдзыстӕм, ӕмӕ уӕд ӕнӕзӕрдӕхудт уыдзыстӕм. Ӕмбисӕндты 16:6 фыст ис: «Йегъовӕйӕ чи тӕрсы, уый йӕхи хизы ӕвзӕрдзинадӕй». Ацы ныхӕстӕ афтӕ ӕмбаргӕ не сты, ӕмӕ хъуамӕ Хуыцауӕй ӕмризӕджы ризӕм, ома нӕ кӕй бафхӕрдзӕн, уымӕй тӕрсӕм. Мах хъуамӕ тӕрсӕм Хуыцауы фӕхъыг кӕнынӕй, уымӕн ӕмӕ уый у нӕ уӕларвон Фыд, ӕмӕ йӕ нӕ хорз фӕнды (1 Пет. 3:12).

Адӕймаг Хуыцауы фӕхъыг кӕнынӕй куы тӕрса, уӕд ыл уый хуыздӕрырдӕм кӕй фӕзындзӕн, уый бӕрӕг у иу бинонты хабарӕй. Рикарду ӕмӕ йӕ бинойнаг Фернандӕ банкӕй се счетӕй райстой ӕхца, доллӕртӕй нымайгӕйӕ уыдысты авдсӕдӕ доллӕры a. Фернандӕ ӕхцатӕ нӕ банымадта, ӕмӕ сӕ йе ’хцадоны нывӕрдта. Сӕ фиддонтӕй цыдӕртӕ куы бафыстой ӕмӕ хӕдзармӕ куы ӕрбаздӕхтысты, уӕд Фернандӕ йе ’хцадонмӕ ныккаст, ӕмӕ ма йын дзы бирӕ ӕхца разынд. «Ӕвӕццӕгӕн нын кассир фылдӕр ӕхца радта»,– загътой уыдон. Фыццаг сӕ фӕндыд уыцы ӕхца сӕхицӕн ныууадзын, бирӕ фидинӕгтӕ ма сын кӕй уыди, уый тыххӕй. Рикарду загъта: «Йегъовӕмӕ скуывтам, цӕмӕй нын уыйбӕрц тыхтӕ радтаид, ӕмӕ уыцы ӕхца фӕстӕмӕ банкмӕ ахастаиккам. Фӕндыдис нӕ Йегъовӕйы зӕрдӕ рухс кӕнын, Ӕмбисӕндты 27:11 куыд фыст ис, афтӕ, ӕмӕ ӕхца фӕстӕмӕ радтам».

Нӕ чырыстон ӕфсарм

Библи куы ахуыр кӕнӕм ӕмӕ цы базонӕм, уымӕй царды куы пайда кӕнӕм, уӕд не ’фсарм ахуыр кӕндзыстӕм. Хуыцауы ныхас удӕгас кӕй у ӕмӕ дзы стыр тых кӕй ис, уымӕ гӕсгӕ ӕндавы канд нӕ зондыл нӕ, фӕлӕ нӕ зӕрдӕйыл дӕр. Ӕмӕ нӕ уый тыххӕй «алы хъуыддаджы дӕр фӕнды ӕнӕзӕрдӕхудтӕй архайын» (Дзут. 4:12; 13:18).

Ӕркӕсӕм-ма Жуаны хабармӕ. Жуан кӕмӕйдӕр дардта бирӕ ӕхца, доллӕртӕй нымайгӕйӕ фондз мин доллӕры. Йӕ хӕс фидын ӕй кӕй нӕ фӕндыд, уый тыххӕй ӕндӕр горӕтмӕ цӕрынмӕ алыгъд. Аст азы фӕстӕ, рӕстдзинад куы базыдта, уӕд йӕ зӕрдӕ йӕхиуыл ӕрхудт, ӕмӕ ӕхца кӕмӕй дардта, уыцы кредиторы ссардта, цӕмӕй йын йӕ хӕс радтаид. Жуаны йӕ бинойнаджы ӕмӕ йӕ цыппар сывӕллоны дарын кӕй хъуыди, ӕхца та йӕм бирӕ кӕй нӕ хауд, уымӕ гӕсгӕ уыцы кредитор сразы, цӕмӕй йын йӕ хӕс алы мӕй дӕр гыццылгай фыстаид.

Цы нӕм ис, уый фагыл нымайӕм

Апостол Павел ныффыста: «Хуыцауыл иузӕрдион уай, уый стыр пайда у, кӕд, цы нӕм ис, уый фагыл нымайӕм, уӕд. [...] Уӕдӕ нын хӕрд, уӕлӕдарӕс ӕмӕ, кӕм цӕрӕм, уый куы уа, уӕд уый фагыл нымайӕм» (1 Тим. 6:6–8). Ацы хорз уынаффӕ нӕ зӕрдӕмӕ куы айсӕм,  уӕд ныл зыд ӕмӕ хӕлӕг не схӕцдзӕни, стӕй нын нӕ зонд не сдзӕгъӕл кӕндзӕн дызӕрдыггаг бизнес кӕнӕ цыбыр рӕстӕгмӕ стыр ӕхцатӕ бакусыны хъуыды (Ӕмб. 28:20). Уӕдӕ Павелы уынаффӕмӕ куы хъусӕм, уӕд Хуыцауы Паддзахад фыццаг бынаты ӕвӕрдзыстӕм ӕмӕ дызӕрдыг дӕр нӕ кӕндзыстӕм, царды нӕ сӕйраджыдӕр цы хъӕуы, уымӕй цух кӕй нӕ уыдзыстӕм (Матф. 6:25–34).

«Хъӕздыгдзинад» адӕймаджы «йӕ фӕдыл [кӕй] асайы», уымӕ гӕсгӕ хъуамӕ къӕрцхъус уӕм, цӕмӕй зыд ӕмӕ кӕрӕф ма суӕм (Матф. 13:22). Ӕрхъуыды-ма кӕнӕм Аханы. Уый йӕхи цӕстӕй федта, израилӕгтӕ Иорданы цӕугӕдоныл куыд ахызтысты, уыцы диссаг. Фӕлӕ йыл уӕддӕр кӕрӕф бахӕцыд, ӕмӕ йӕ зӕрдӕ нӕ фӕлӕууыд: горӕт Иерихонӕй рахаста, знагӕй кӕй байстой, уыцы ӕвзист, сызгъӕрин ӕмӕ зынаргъ уӕлӕдарӕс. Ӕмӕ йӕ уый тыххӕй мӕлӕт баййӕфта (Йес. Н. 7:1, 20–26). Уымӕ гӕсгӕ ӕнусты фӕстӕ Йесо радта ахӕм фӕдзӕхст: «Кӕсут, зыд мацӕуыл кӕнут, уымӕн ӕмӕ адӕймагмӕ алцыдӕр парахатӕй куы уа, уӕд дӕр йӕ цард, цы йӕм ис, уымӕй кӕнгӕ нӕу» (Лук. 12:15).

Ӕнӕзӕрдӕхудт уӕм куысты

Ныр та ӕркӕсӕм, цӕмӕй алы хъуыддаджы дӕр ӕнӕзӕрдӕхудт уӕм, уымӕн фӕлварӕн цы свӕййы, цалдӕр ахӕм хъуыддагмӕ. Цӕмӕй нӕ куысты ӕнӕзӕрдӕхудт уӕм, уый тыххӕй хъуамӕ «мацы... давӕм», кӕд иннӕтӕ давынц, уӕддӕр (Тит. 2:9, 10). Журандир кусы иу учрежденийы, ӕмӕ-иу командировкӕйы рӕстӕг ӕхца цас бахардз кодта, уый-иу алы хатт дӕр ӕргом загъта. Фӕлӕ йемӕ чи куыста, уыдон та-иу сайдтой, зӕгъгӕ, фылдӕр бахардз кодтам. Афтӕ та уымӕн кодтой, ӕмӕ сын сӕ хицау сӕ къух арӕзта. Журандир кӕй нӕ сайдта, уый хицауы зӕрдӕмӕ нӕ цыд ӕмӕ йӕ командировкӕты нал ӕрвыста. Фӕлӕ сӕм иу бон ревизи куы скодтой, уӕд Журандирӕй раппӕлыдысты, ӕнӕзӕрдӕхудт кӕй уыди, уый тыххӕй. Ӕмӕ йӕ йӕ куысты фӕуӕлдӕр кодтой.

Не ’фсымӕр Андре кусы уӕйгӕнӕгӕй. Иу афон дзы йӕ хицау домдта, цӕмӕй-иу клиенттӕй, цы ӕмбӕлд, уымӕй ӕхца дыууӕ хатты фылдӕр истаид. Андре Йегъовӕйӕ ныфсхастдзинад ракуырдта, цӕмӕй йӕ бон уыдаид, Библи куыд зӕгъы, афтӕ бакӕнын (Пс. 145:18–20). Уый фӕстӕ бафӕлвӕрдта йӕ хицауӕн бамбарын кӕнын, уый йын куыд дзуры, йӕ бон афтӕ бакӕнын цӕуылнӕ у, уый. Фӕлӕ йӕ хицау уӕддӕр йӕхи ныхас кодта. Уӕд Андре уыцы хорз куыст ныууагъта. Фӕлӕ йӕ иу афӕдзы фӕстӕ йӕ раздӕры хицау фӕстӕмӕ йӕ куыстмӕ фӕхуыдта, ӕмӕ йын загъта, клиентты кӕй нал сайынц. Уый фӕстӕ Андрейы менеджерӕй сӕвӕрдтой.

Хӕстӕ фидын

Апостол Павел чырыстӕттӕн радта ахӕм уынаффӕ: «Макӕмӕй мацы хӕс дарут» (Ром. 13:8). Искӕмӕй хӕс куы дарӕм, уӕд, гӕнӕн ис, ӕмӕ нӕхицӕн дзурӕм, цӕй, ницы кӕны, ӕхца  йӕм бирӕ ис, ӕмӕ уыцы ӕхца хъуаг нӕу, зӕгъгӕ. Фӕлӕ Библи афтӕ зӕгъы: «Фыдгӕнӕг ӕфстау райсы ӕмӕ йӕ фӕстӕмӕ нӕ ратты» (Пс. 37:21).

Библийы фыст ис: «Кӕд кӕуыл цы ’рцӕудзӕн, уымӕн ничи ницы зоны» (Еккл. 9:11). Уымӕ гӕсгӕ хабар афтӕ куы рауайа, ӕмӕ нӕ хӕстӕ нӕ бон бафидын нӕу, уӕд та куыд? Цӕмӕй Франсиско йӕ ипотекӕ бафыстаид, уый тыххӕй Альфредойӕ ӕфстау райста, доллӕртӕй нымайгӕйӕ авд мин доллӕры. Фӕлӕ йӕ куыст размӕ кӕй нӕ цыд, уымӕ гӕсгӕ йӕ бон нӕ уыд йӕ хӕс афоныл раттын. Уӕд Альфредомӕ бацыд, ӕмӕ йемӕ уый тыххӕй аныхас кодта. Альфредо йын сразы ис, цӕмӕй йын сӕ хайгай бафыстаид.

Дӕхи хиз цӕстмӕ митӕй

Ӕрхъуыды-ма кӕнӕм, фыццаг ӕнусы цӕрӕг чырыстон бинонтӕ Анани ӕмӕ Сапфирӕйы. Сӕ зӕхх куы ауӕй кодтой, уӕд апостолтӕм ӕрбахастой зӕххы ӕхцайӕн йе ’рдӕг ӕмӕ сын загътой, зӕгъгӕ, ӕхцатӕ иууылдӕр ӕрбахастам. Фӕндыди сӕ иннӕ чырыстӕтты сӕ рӕдаудзинадӕй дисы бафтауын. Фӕлӕ апостол Петр Хуыцауы сыгъдӕг тыхӕй схайджын, ӕмӕ сын сӕ хиндзинад базыдта, ӕмӕ сӕ Йегъовӕйы фыдӕх баййӕфта (Хъуыд. 5:1–11).

Анани ӕмӕ Сапфирӕйӕ уӕлдай, Библи чи фыста, уыдон уыдысты ӕргом ӕмӕ ӕнӕзӕрдӕхудт. Зӕгъӕм, Моисей ӕргом ныффыста, кӕй смӕсты, уый тыххӕй йын Хуыцау Зӕрдӕвӕрд зӕхмӕ бацӕуыны бар кӕй нӕ радта (Ным. 20:7–13). Ионӕ дӕр нӕ басусӕг кодта, Ниневимӕ ацӕуыны размӕ дӕр ӕмӕ Хуыцауы тӕрхон уым куы хъусын кодта, уӕд дӕр цы лӕмӕгъдзинӕдтӕ равдыста, уыдон. Иууылдӕр сӕ ӕргом ныффыста (Ионӕ 1:1–3; 4:1–3).

Раст цы у, уый зӕгъыны тыххӕй ӕнӕмӕнгдӕр фӕхъӕуы хъӕбатырдзинад. Ӕмӕ уый бӕрӕг у, Наталийыл скъолайы цы хабар ӕрцыд, уымӕй. Наталийыл цӕуы 14 азы. Экзамены цы ныффыста, уый фӕстӕмӕ куы райста, уӕд федта, йӕ дзуаппытӕй иу раст кӕй нӕ уыди, уый ахуыргӕнӕг кӕй нӕ бафиппайдта. Фӕлӕ йӕ ахуыргӕнӕгмӕ бацыд, ӕмӕ йын уый тыххӕй загъта, кӕд ӕй ӕмбӕрста, уый йын йӕ бӕрӕггӕнӕнтыл ӕвзӕрырдӕм кӕй фӕзындзӕн, уӕддӕр. Натали дзуры: «Мӕ ныййарджытӕ мын ӕдзух амонынц, цӕмӕй Хуыцауы зӕрдӕ рухс кӕнон, уый тыххӕй хъуамӕ ма сайон. Мӕ ахуыргӕнӕгӕн куы ницы загътаин, уӕд мӕ мӕ цӕсгом хордтаид». Натали ӕнӕзӕрдӕхудт кӕй разынд, уый тыххӕй дзы йӕ ахуыргӕнӕг раппӕлыд.

Ӕнӕзӕрдӕхудт уӕм, уый Йегъовӕйӕн хӕссы кад

Иу чызг Жизель, цӕуы йыл 17 азы, ссардта кӕйдӕр ӕхцадон. Уыди дзы документтӕ ӕмӕ ӕхца, доллӕртӕй нымайгӕйӕ 35 доллӕры. Жизель уыцы ӕхцадон скъолайы директоры уылты йӕ хицауыл фӕстӕмӕ сӕмбӕлын кодта. Иу мӕйы фӕстӕ скъолайы директоры хӕдивӕг Жизелы къласмӕ бацыд ӕмӕ сын иу писмо бакаст. Уыди дзы арфӕйы ныхӕстӕ, Жизель ӕнӕзӕрдӕхудт кӕй у, йӕ ныййарджытӕ йӕ хорз кӕй схъомыл кодтой ӕмӕ ахӕм хорз диныл хӕст кӕй у, уый тыххӕй. Йӕ «хорз хъуыддӕгтӕ» Йегъовӕйӕн ӕрхастой кад (Матф. 5:14–16).

«Хиуарзон, ӕхцауарзаг, хиппӕлой, сӕрбӕрзонд» ӕмӕ «мӕнгард» адӕмы ’хсӕн цӕргӕйӕ хъӕуы тыхтӕ, цӕмӕй ӕнӕзӕрдӕхудт уӕм (2 Тим. 3:2). Фӕлӕ Йегъовӕйы фӕхъыг кӕнынӕй куы тӕрсӕм, не ’фсарм Библимӕ гӕсгӕ куы ахуыр кӕнӕм ӕмӕ нӕм цы ис, уый фагыл куы нымайӕм, уӕд ацы мӕнгард дунейы уыдзыстӕм ӕнӕзӕрдӕхудт. Хъуамӕ ма архайӕм, цӕмӕй Йегъовӕ нӕ хуыздӕр ӕмбал суа, уымӕн ӕмӕ «Йегъовӕ у рӕстаг Хуыцау, уый уарзы раст хъуыддӕгтӕ» (Пс. 11:7).

[Фиппаинаг]

[Нывтӕ 7 фарсыл]

Йегъовӕйы фӕхъыг кӕнынӕй куы тӕрсӕм, уӕд уыдзыстӕм ӕнӕзӕрдӕхудт

[Ныв 8 фарсыл]

Ӕнӕзӕрдӕхудт куы уӕм, уӕд Йегъовӕйӕн хӕсдзыстӕм кад