Чырыстон бинонтӕ, «уӕхи цӕттӕ дарут»!

«Уӕхи цӕттӕ дарут, уымӕн ӕмӕ, цы сахат ӕнхъӕл нӕ уат, уыцы сахат ӕрцӕудзӕн Адӕймаджы Фырт» (ЛУК. 12:40).

1, 2. Нӕ зӕрдӕмӕ арф цӕмӕн хъуамӕ айсӕм Йесойы фӕдзӕхст, «уӕхи цӕттӕ дарут», зӕгъгӕ?

«АДӔЙМАДЖЫ Фырт... кадджын цыд куы ’ркӕна» ӕмӕ адӕмы куы ахицӕн кӕна, уӕд ды ӕмӕ дӕ бинонтӕ кӕй ӕхсӕн разындзыстут? (Матф. 25:31, 32). Уыцы хабар ӕрцӕудзӕн, цы сахат ӕнхъӕл не стӕм, уыцы сахат. Уымӕ гӕсгӕ мах хъуамӕ нӕ зӕрдӕмӕ арф айсӕм Йесойы фӕдзӕхст: «Уӕхи цӕттӕ дарут»! (Лук. 12:40).

² Амӕй размӕйы статьяйы мах ӕркастыстӕм, бинонтӕй алчидӕр йӕ хӕстӕ, куыд ӕмбӕлы, афтӕ куы ӕххӕст кӕна, уӕд иууылдӕр цырддзаст кӕй уыдзысты. Ныр та ӕркӕсӕм, цы ма ис саразӕн, цӕмӕй нӕ бинонтӕн сӕ уырнындзинад фидар уа.

«Уӕ цӕст иу цӕмӕдӕр» саразут

3, 4. а) Чырыстон бинонтӕ лӕмбынӕг цӕмӕн хъуамӕ уой? ӕ) Цы нысан кӕны, нӕ «цӕст иу цӕмӕдӕр арӕзт уӕд», зӕгъгӕ?

³ Цӕмӕй бинонтӕ Чырыстийы ӕрцыдмӕ цӕттӕ уой, уый тыххӕй хъуамӕ сӕхи хизой, раст фӕндагӕй сӕ чи фӕиппӕрд кӕндзӕн, уыцы хъуыддӕгтӕй. Уый тыххӕй хъуамӕ уой къӕрцхъус. Бирӕ бинонтӕ мулчы фӕдыл кӕй адзӕгъӕл сты, уымӕ гӕсгӕ ӕркӕсӕм Йесойы ныхӕстӕм, зӕгъгӕ, уӕ «цӕст иу цӕмӕдӕр арӕзт уӕд». (Бакӕс  Матфейы 6:22, 23.) Фӕндагыл рухс куы фӕсудзы, уӕд нӕ развӕндаг фӕуынӕм, ӕмӕ нын фӕкӕлынӕй тӕссаг нӕ вӕййы. Афтӕ ахӕсгӕ хуызы дӕр зӕгъӕн ис, нӕ «зӕрдӕйы цӕстыты» фӕрцы нӕ развӕндаг кӕй уынӕм ӕмӕ нӕхи кӕй хизӕм алыхуызон къахкъуырӕнтӕй (Еф. 1:18).

⁴ Нӕ бон куыд у нӕ зӕрдӕйы цӕстытӕ иу цӕмӕдӕр саразын? Уый тыххӕй хъуамӕ нӕ хъарутӕ иу хъуыддагмӕ саразӕм. Мах хъуамӕ фылдӕр тыхсӕм нӕ бинонты уырнындзинадыл, цы бахӕрой ӕмӕ сӕ уӕлӕ цы скӕной, ӕрмӕст ууыл нӕ, фӕлӕ (Матф. 6:33). Уый ууыл дзурӕг у, ӕмӕ хъуамӕ разы уӕм, цы нын ис, уымӕй ӕмӕ Хуыцауы хъуыддаг фыццаг бынаты ӕвӕрӕм (Дзут. 13:5).

5. Иу чызг куыд равдыста, йӕ цӕст Хуыцауӕн лӕггад кӕнынмӕ арӕзт кӕй у, уый?

⁵ Сывӕллӕттӕн сӕ цӕст иу цӕмӕдӕр арӕзт куы вӕййы, уӕд сыл зӕрдӕ цин кӕнынӕй нал фефсӕды! Ӕркӕсӕм иу скъоладзау чызджы хабармӕ Эфиопийӕ. Скъола хорз бӕрӕггӕнӕнтимӕ каст кӕй фӕци, уымӕ гӕсгӕ йын загътой, цӕмӕй йӕ ахуыр адарддӕр кодтаид. Фӕлӕ йӕ Йегъовӕйӕн лӕггад кӕнын тынг кӕй фӕндыди, уый тыххӕй ууыл не сразы ис. Цасдӕры фӕстӕ йӕ фӕхуыдтой иу ранмӕ кусынмӕ, мӕйы мидӕг ын мызд фыстаиккой 4 200 доллӕры. Эфиопийы та ахӕм куыст ӕнцон ссарӕн нӕу. Фӕлӕ чызг уырдӕм кусынмӕ нӕ бацыди, уымӕн ӕмӕ йӕ цӕст арӕзт уыди пионерӕй лӕггад кӕнынмӕ. Стӕй йӕ уый тыххӕй йӕ ныййарджыты фӕрсыны сӕр дӕр нӕ бахъуыди. Чызг ахӕм уынаффӕ кӕй рахаста, уымӕ йӕ ныййарджытӕ цы цӕстӕй ракастысты? Уыдон ууыл тынг бацин кодтой ӕмӕ йын загътой, уый тыххӕй дзы сӕрыстыр кӕй сты!

6, 7. Тӕссаг нын цавӕр миниуӕгӕй у?

⁶ Матфейы 6:22, 23 Йесо мах фӕдзӕхсы зыд кӕнынӕй. Йесойы ныхӕстӕ, «дӕ цӕст ӕвзӕр цы у, уымӕ арӕзт куы уа», зӕгъгӕ, амонынц зыд кӕнынмӕ кӕнӕ кӕрӕфдзинадмӕ (Матф. 6:23). Йегъовӕ зыд кӕнынмӕ цы цӕстӕй кӕсы? Библийы фыст ис: «Хӕтынӕн ӕмӕ [уӕм] алы чъизи хъуыддагӕн кӕнӕ зыддзинадӕн йӕ кой дӕр ма уӕд» (Еф. 5:3).

⁷ Адӕймаг йӕхӕдӕг зыдгӕнаг кӕй у, уый йын зын рахатӕн вӕййы. Фӕлӕ, исчи зыд кӕй кӕны, уый ӕнцонтӕй бафиппайӕм, фӕлӕ нӕхӕдӕг ахӕм кӕй стӕм, уый та – нӕ. Уӕдӕ хорз уаид, Йесойы уынаффӕмӕ куы байхъусиккам: «Кӕсут, зыд мацӕуыл кӕнут» (Лук. 12:15). Уӕдӕ хъуамӕ нӕ зӕрдӕтӕм ныккӕсӕм ӕмӕ фенӕм, цы дзы ӕрбынат кодта, уый. Чырыстон бинонтӕ хъуамӕ лӕмбынӕг ахъуыды кӕной, цас рӕстӕг ӕмӕ сын цас ӕхца цӕуы ирхӕфсӕнтӕ, улӕфт ӕмӕ алыхуызон дзауматӕ ӕлхӕныныл.

8. Исты ӕлхӕнын нӕ куы фӕнда, уӕд цӕуыл хъуамӕ ахъуыды кӕнӕм?

⁸ Цалынмӕ исты балхӕнай, уӕдмӕ дӕ ӕрмӕст ууыл нӕ хъӕуы ахъуыды кӕнын, ӕмӕ дӕм уый фаг ӕхца ис ӕви нӕ. Хъуамӕ ма ахъуыды кӕнай ахӕм фарстатыл дӕр: «Ацы дзаумайӕ арӕх пайда кӕндзынӕн ӕмӕ йӕм хорз зилдзынӕн? Цӕмӕй дзы пайда кӕнын сахуыр уон, ууыл мын цас рӕстӕг ацӕудзӕн?» Ацы дуне тынг рекламӕ кӕны алыхуызон дзауматӕ ӕмӕ фӕстаг модӕйыл хуыд зынаргъ уӕлӕдарӕс. Фӕлӕ, ӕрыгӕттӕ, уӕхи сайын ма бауадзут! Хиуылхӕцгӕ ут! Ахъуыды-ма кӕнут, уыдӕттӕй уӕ исты балхӕнын куы бафӕнда, уӕд уый куыд бандавдзӕн, уӕ бинонтӕ Адӕймаджы Фырты ӕрцыдмӕ цӕттӕ куыд уыдзысты, ууыл. Ӕппындӕр ма дызӕрдыг кӕнут Йегъовӕйы ныхӕстыл: «Никуы дӕ ныууадздзынӕн ӕмӕ дӕ никуы ферох кӕндзынӕн» (Дзут. 13:5).

Раст нысӕнттӕм тырнут

9. Бинонтӕ раст нысӕнттӕм куы тырной, уӕд сын уый куыд баххуыс кӕндзӕн?

⁹ Бинонтӕй ма алчидӕр йӕ разы раст нысӕнттӕ куы ӕвӕра ӕмӕ сӕм куы тырна, уӕд йӕ бон уыдзӕн йӕ уырнындзинад фидар кӕнын ӕмӕ Хуыцаумӕ ӕввахс кӕнын. Афтӕмӕй бинонтӕ фендзысты, Йегъовӕйӕн  лӕггад кӕнгӕйӕ сӕ цы хъӕуы фӕхуыздӕр кӕнын ӕмӕ сын царды ахсджиагдӕр цавӕр хъуыддӕгтӕ хъуамӕ уой, уый. (Бакӕс Филиппӕгтӕм 1:10.)

10, 11. а) Куыд бинонтӕ, афтӕ уӕ бон цавӕр хуымӕтӕг нысӕнттӕ у уӕ разы ӕвӕрын? ӕ) Цавӕр нысӕнттӕм ма у уӕ бон тырнын?

¹⁰ Бинонтӕ сӕ разы суанг хуымӕтӕг нысӕнттӕ дӕр куы ӕвӕрой, уӕддӕр сын уый стыр арфӕдзинӕдтӕ ӕрхӕсдзӕн. Зӕгъӕм, сӕ бон у алы бон дӕр стих ӕвзарын. Хӕдзаронтӕ сӕ хъуыдытӕ куыд дзурдзысты, уымӕй бинонты хистӕр бамбардзӕн, йӕ бинонтӕ Йегъовӕ ӕмӕ рӕстдзинад цас уарзынц, уый. Бинонтӕ алы бон дӕр Библи иумӕ куы кӕсой, уӕд сывӕллӕттӕ хуыздӕр базондзысты кӕсын ӕмӕ йӕ хуыздӕр ӕмбардзысты (Пс. 1:1, 2). Цымӕ хорз нысан нӕу, цӕмӕй нӕ куывдтыты хъӕд фӕхуыздӕр кӕнӕм? Хорз нысан ма у, Хуыцауы сыгъдӕг тых цы дыргъ дӕтты, уый хуыздӕр базонын ӕмӕ йӕ нӕ удыхъӕды фидар кӕнын (Гал. 5:22, 23). Ӕрӕвӕрӕн ма ис ахӕм нысан дӕр: уацамынды кӕуыл фембӕлӕм, уыцы адӕмимӕ хӕларзӕрдӕ уӕм. Ахӕм нысӕнттӕм тырнгӕйӕ ныййарджытӕ сӕ сывӕллӕттӕн баххуыс кӕндзысты, цӕмӕй фӕлмӕнзӕрдӕдӕр суой ӕмӕ сӕ бафӕнда фидӕны ӕххӕстрӕстӕг пионертӕй йе та миссионертӕй лӕггад кӕнын.

¹¹ Хорз ма уаид, ды дӕр ӕмӕ дӕ бинонтӕ дӕр ноджы ӕндӕр нысӕнттыл куы ахъуыды кӕниккат. Зӕгъӕм, уӕ бон у уӕ разы ахӕм нысан сӕвӕрын, цӕмӕй уӕ бинонтӕ фылдӕр рӕстӕг хъусын кӕной? Уӕ бон у бафӕлварын хъусын кӕнын телефонӕй, уынджы йе та ӕхсӕнадон бынӕтты? Никуы ахъуыды кодтат, хъусынгӕнджытӕ кӕм нӕ фаг кӕны, ахӕм ранмӕ ацӕуын ӕмӕ уым хъусын кӕнын? Уӕ бинонтӕй искӕмӕн йӕ  бон у ӕндӕр ӕвзаг сахуыр кӕнын, цӕмӕй ӕндӕр адӕмыхӕттытӕн хорз хабар хъусын кӕна?

12. Бинонты хистӕртӕн сӕ бон цы у аразын, цӕмӕй сӕ хӕдзаронтӕн сӕ уырнындзинад ноджы тынгдӕр бафидар кӕной?

¹² Бинонты хистӕртӕ, хорз нӕ уаид, куы ахъуыды кӕниккат, уӕ бинонтӕн сӕ уырнындзинад цавӕр хъуыддӕгты хъӕуы ноджы тынгдӕр бафидар кӕнын. Уый фӕстӕ уӕ разы сӕвӕрут хорз нысӕнттӕ ӕмӕ сӕм тырнут. Уӕ разы цы нысӕнттӕ ӕвӕрут, уыдон хъуамӕ уой уӕ уавӕртӕ ӕмӕ уӕ гӕнӕнтӕм гӕсгӕ (Ӕмб. 13:12). Дзырд дӕр ыл нӕй, цӕмӕй уӕ къухы хорз нысан бафта, уымӕн уӕ хъӕуы рӕстӕг. Уый тыххӕй та уӕ фӕкъаддӕр кӕнын хъӕуы, телевизормӕ кӕсыныл уын цы рӕстӕг ацӕуы, уый, ӕмӕ йӕ хъӕуы рахицӕн кӕнын уӕ уырнындзинад фидар кӕнынӕн (Еф. 5:15, 16). Уӕ бинонты раз цы нысӕнттӕ ӕрӕвӕрдтат, уыдонмӕ тырнгӕйӕ-иу уӕ къухтӕ ма ӕруадзут (Гал. 6:9). Раст нысӕнттӕм цы бинонтӕ тырнынц, уыдонӕн «се ’нтыстдзинад алчидӕр» фӕуыны (1 Тим. 4:15).

Уӕ бинонты ахуыры изӕр ма рох кӕнут

13. Ӕмбырды фембӕлдты цавӕр ивындзинад ӕрцыд ӕмӕ нӕ цавӕр фарстатыл хъӕуы ахъуыды кӕнын?

¹³ Цӕмӕй бинонтӕ Адӕймаджы Фырты ӕрцыдмӕ сӕхи цӕттӕ дарой, уымӕн сын стыр ӕххуыс у, 2009 азы 1 январӕй ӕмбырды фембӕлдты цы ивындзинад ӕрцыд, уый. Раздӕр ма-иу ӕмбӕлдыстӕм къуырийы астӕу дӕр. Фӕлӕ ныр уыцы фембӕлд баиу кодтой Хуыцауы ныхас хъусынгӕнджыты скъола ӕмӕ Хъусын кӕныны фембӕлдимӕ, ӕмӕ хуыйны Библийы ахуыр ӕмбырдимӕ. Ацы ивындзинады фӕрцы чырыстон бинонтӕн фӕзынд фадат, цӕмӕй-иу къуырийы мидӕг иу изӕр рахицӕн кӕной ӕмӕ сӕ уырнындзинад фидар кӕной. Уыцы ивындзинадӕй рацыд цасдӕр рӕстӕг, ӕмӕ уымӕ гӕсгӕ нӕ бон у нӕхи бафӕрсын: «Ацы ивындзинады фӕрцы нын цы сӕрибар рӕстӕг фӕзынд, уымӕй пайда кӕнын, цӕмӕй мӕ бинонтимӕ йе та мӕхӕдӕг Библи ахуыр кӕнон? Уыцы хъуыддаджы мын исты бантыст?»

14. а) Библи нӕ бинонтимӕ йе та нӕхӕдӕг куы фӕахуыр кӕнӕм, уӕд нӕ сӕйраг нысан цы вӕййы? ӕ) Бинонты ахуыры изӕр ахсджиаг цӕмӕн у?

¹⁴ Библи нӕ бинонтимӕ йе та нӕхӕдӕг куы фӕахуыр кӕнӕм, уӕд нӕ сӕйраг нысан вӕййы, цӕмӕй Хуыцаумӕ баввахсдӕр уӕм (Иак. 4:8). Библи ахуыр кӕнынӕн-иу ӕппынӕдзух рӕстӕг куы рахицӕн кӕнӕм ӕмӕ не Сфӕлдисӕджы хуыздӕр базоныныл куы архайӕм, уӕд нын ноджы адджындӕр суыдзӕн. Йегъовӕмӕ цас ӕввахсдӕр кӕнӕм, уыйас нӕ тынгдӕр фӕнддзӕн, цӕмӕй йӕ уарзӕм «ӕппӕт зӕрдӕйӕ, ӕппӕт удӕй, ӕппӕт зондӕй ӕмӕ ӕппӕт хъаруйӕ» (Мар. 12:30). Ӕцӕгдӕр, мах тынг фӕнды Хуыцауы коммӕ кӕсын ӕмӕ йӕ фӕзмын (Еф. 5:1). Уӕдӕ алы къуыри дӕр нӕ бинонтимӕ Библи куы ахуыр кӕнӕм, уӕд стырӕй-чысылӕй «стыр бӕллӕхмӕ» цӕттӕ уыдзыстӕм (Матф. 24:21). Уый стыр ӕххуыс у нӕ ирвӕзындзинадӕн.

15. Бинонты ахуыр бинонтыл хуыздӕрырдӕм куыд фӕзындзӕн?

¹⁵ Бинонты ахуыр ма ахъаз у ноджы иу хъуыддагӕн – бинонтӕ кӕрӕдзимӕ ӕнгомдӕр кӕнынц. Бинонтӕ алы къуыри дӕр Хуыцауы хъуыддӕгтыл куы ныхас кӕной, уӕд сыл уый хуыздӕрырдӕм фӕзындзӕн. Лӕг ӕмӕ ус Библи иумӕ куы иртасой ӕмӕ сын уый циндзинад куы хӕсса, уӕд кӕрӕдзийыл ӕнувыддӕр уыдзысты! (Бакӕс Екклесиаст 4:12.) Хуыцауы Ныхас иумӕ чи ахуыр кӕны, уыцы ныййарджытӕ ӕмӕ сывӕллӕттӕ кӕрӕдзи тынгдӕр фӕуарзынц, «уымӕн ӕмӕ уый хуызӕн ницы иу кӕны ӕмӕ ницы бӕтты кӕрӕдзийыл» (Кол. 3:14).

16. Радзур, иу ӕмбырды ӕртӕ хойы Библи иумӕ кӕй ахуыр кӕнынц, уый сын цы пайда ӕрхаста.

¹⁶ Ӕркӕсӕм, фембӕлдты цы ивындзинад ӕрцыд, уый иу ӕмбырдӕй ӕртӕ хойӕн куыд баххуыс кодта, уымӕ. Се ’ртӕ дӕр сты  идӕдзтӕ ӕмӕ ас хотӕ. Цӕрынц иу горӕты ӕмӕ бирӕ азты дӕргъы сты хӕлӕрттӕ. Уыдоны фӕндыд фылдӕр рӕстӕг иумӕ ӕрвитын, фӕлӕ ма сӕ фӕндыд сӕ уырнындзинад фидар кӕнын дӕр. Ӕмӕ баныхас кодтой, цӕмӕй-иу иумӕ иу изӕр ӕрӕмбырд уой ӕмӕ-иу Библи ахуыр кӕной. Иумӕ райдыдтой ахуыр кӕнын чиныг «Бӕстон хъусын кӕнӕм Хуыцауы Паддзахады тыххӕй». Сӕ иу дзуры: «Уыцы рӕстӕг афтӕ бирӕ уарзӕм, ӕмӕ нӕ ахуыр сахатӕй фылдӕр дӕр ахӕссы. Нӕ цӕстытыл ауайын кӕнӕм, фыццаг ӕнусы ӕфсымӕртӕ цы уавӕрты уыдысты, уый ӕмӕ фӕныхас кӕнӕм, мах та ахӕм уавӕрты цы бакӕниккам, ууыл. Уый фӕстӕ фӕархайӕм, цӕмӕй цы базыдтам, уымӕй уацамынды спайда кӕнӕм. Афтӕмӕй нын ныр хуыздӕр уайы Паддзахады хабар хъусын кӕнын ӕмӕ ахуыргӕнинӕгтӕ цӕттӕ кӕнын». Ацы ӕртӕ хӕлары ӕрмӕст сӕ уырнындзинад нӕ фидар кӕнынц, фӕлӕ ма кӕрӕдзимӕ ноджы ӕнгомдӕр кӕнынц. Уыдон зӕгъынц: «Ӕмбырды ахӕм ивындзинад кӕй ӕрцыд, ууыл тынг цин кӕнӕм».

17. Цӕмӕй бинонты ахуыры изӕр алкӕмӕндӕр ахъаз уа, уымӕн цы баххуыс кӕндзӕн?

¹⁷ Сымахӕй та цы зӕгъӕн ис? Ӕмбырды фембӕлдты цы ивындзинад ӕрцыд, уый уын цы пайда ӕрхаста? Уӕ бинонтимӕ кӕнӕ уӕхӕдӕг Библи ӕдзух куы нӕ ахуыр кӕнат, уӕд уын уыцы ивындзинад ницы пайда ӕрхӕсдзӕн. Бинонтӕй алчи дӕр хъуамӕ цӕттӕ уа нысангонд рӕстӕгмӕ. Уыцы изӕр уӕ хъуамӕ ӕппындӕр мацы хъыгдара. Уымӕй уӕлдай ма-иу хъуамӕ равзарат, царды уын чи ӕххуыс кӕндзӕн, ахӕм ӕрмӕг. Уӕ бон цы у саразын, цӕмӕй уӕ ахуыр цымыдисаг уа? Ахуыр кӕныны мадзӕлттӕй ӕнтыстджынӕй пайда кӕнут. Уӕ ахуыры рӕстӕг-иу кӕрӕдзимӕ хъусут ӕмӕ кӕрӕдзийы ныхасӕн аргъ кӕнут (Иак. 3:18) *.

«Цырддзаст ут» ӕмӕ «уӕхи цӕттӕ дарут»

18, 19. Адӕймаджы Фырт тагъд кӕй ӕрцӕудзӕн, уый дӕуыл дӕр ӕмӕ дӕ бинонтыл дӕр куыд хъуамӕ ӕндава?

¹⁸ Царды уавӕртӕ фыддӕрӕй-фыддӕр кӕй кӕнынц, уымӕй хорз зыны, 1914 азӕй фӕстӕмӕ Сайтаны фыддунейӕн йӕ фӕстаг бонтӕ кӕй ралӕууыдысты. Армагеддоны сау мигътӕ хӕстӕгӕй-хӕстӕгдӕр кӕнынц. Адӕймаджы Фырт тагъд ӕрцӕудзӕн, цӕмӕй ӕнӕхуыцау дунейыл Йегъовӕйы тӕрхӕттӕ сӕххӕст кӕна (Пс. 37:10; Ӕмб. 2:21, 22). Ацы хабар дӕуыл дӕр ӕмӕ дӕ бинонтыл дӕр хъуамӕ ма ӕндава?

¹⁹ Сымахӕй та цы ис зӕгъӕн? Йесойы ныхӕстӕм хъусут, зӕгъгӕ, уӕ «цӕст иу цӕмӕдӕр арӕзт уӕд»? Ацы дунейы адӕм тырнынц, цӕмӕй уой хъӕздыг, зындгонд кӕнӕ сӕм стыр бартӕ уа. Уӕ бинонтӕ та цӕмӕ тырнынц? Сӕ разы раст нысӕнттӕ ӕвӕрынц? Алы къуыри дӕр уӕ бинонтимӕ йе та уӕхӕдӕг Библи фӕахуыр кӕнут? Уӕ разы цы нысӕнттӕ сӕвӕрдтат, уыдонмӕ тырнут? Ай размӕ статьяйы куыд дзырдтам, афтӕмӕй Библи лӕгтыл, устытыл ӕмӕ сывӕллӕттыл цы хӕстӕ ӕвӕры, уыдон уӕ къухы ӕфтынц? Ӕгас бинонтӕй дӕр «цырддзаст стут»? (1 Фес. 5:6). Кӕд о, уӕд Адӕймаджы Фырты ӕрцыдмӕ цӕттӕ стут.

[Фиппаинаг]

Цы базыдтай?

• Бамбарын кӕн, чырыстон бинонтӕн сӕ бон куыд у сӕхи цӕттӕ дарын...

сӕ «цӕст иу цӕмӕдӕр арӕзт куы уа, уӕд».

сӕ разы раст нысӕнттӕ куы ӕвӕрой ӕмӕ сӕм куы тырной, уӕд.

сӕ бинонтимӕ Библи куы ахуыр кӕной, уӕд.

[Фарстатӕ ахуыр кӕнынӕн]

[Ныв 13 фарсыл]

Нӕ цӕст иу цӕмӕдӕр арӕзт куы уа, уӕд ацы дунейы къахкъуырӕнтыл нӕ фӕкӕлдзыстӕм